Leksyon 23

2 Nephi 2 (Part 1)

Pasiuna

Ang 2 Nephi 2 naglangkob sa pagpadayon sa mga pagtulun-an ni Lehi sa wala pa siya mamatay. Direktang namulong ngadto sa iyang anak nga si Jacob, mipamatuod si Lehi bahin sa abilidad sa Ginoo sa pagpahinungod sa atong mga kasakit alang sa atong kaayohan. Namulong sa tanan niyang mga anak nga lalaki, nagtudlo siya bahin sa Pagkapukan ni Adan—nganong gikinahanglan kini ug sa unsang paagi kini nakaapekto sa katawhan—ug bahin sa panginahanglan alang sa Pag-ula ni Jesukristo. (Gitudlo usab ni Lehi ang bahin sa doktrina sa kabubut-on. Kini nga doktrina pagahisgutan sa sunod nga leksyon.)

Mga Sugyot alang sa Pagtudlo

2 Nephi 2:1–4

Naghisgot si Lehi ngadto ni Jacob bahin sa mga pagsulay ug mga panalangin

Aron matabangan ang mga estudyante nga makakita nga ang 2 Nephi 2 mahinungdanon sa ilang kinabuhi, hangyoa sila sa paghunahuna bahin sa usa ka tawo nga ilang nailhan kinsa nag-atubang og grabe nga mga kalisdanan o mga kasakit. Dapita sila nga mamalandong kon unsay ilang isulti aron madasig kana nga tawo. Hangyoa sila nga mangandam sa pagpakigbahin sa ilang mga hunahuna ngadto sa klase.

Tabangi ang mga estudyante nga makita nga ang mga kasulatan mahinungdanon ngadto kanila

Usa sa labing epektibo nga mga paagi aron matabangan ang mga estudyante nga makaandam sa pagkat-on mao ang paghangyo kanila nga mamalandong og usa ka pangutana o sitwasyon nga mahinungdanon ngadto kanila ug matubag diha sa mga kasulatan nga imong gitudlo. Makatabang kini sa mga estudyante nga magtuon sa mga kasulatan nga dunay katuyoan.

Ipasabut nga ang 2 Nephi 2 naglangkob og rekord ni Lehi nga nagsulti ngadto sa usa ka anak nga lalaki nga nakasinati og mga kalisdanan. Dapita ang mga estudyante sa pagbasa og hilum sa 2 Nephi 2:1. Hangyoa sila sa pag-ila kon kinsa nga anak nga lalaki ang gitudloan ni Lehi (Jacob) ug unsay hinungdan sa pag-antus niining anak nga lalaki (ang kapintas sa iyang mga igsoong lalaki). Dayon ipabasa og hilum sa mga estudyante ang 2 Nephi 2:2–3. Mahimo kang mosugyot nga ilang markahan ang mga pulong nga naghulagway kon unsay buhaton sa Ginoo alang ni Jacob.

Hangyoa ang mga estudyante sa pagpakigbahin sa mga pulong nga ilang nakit-an. Dayon ipangutana ang mosunod aron matabangan sila nga masabtan nga ang Ginoo makapahinungod sa atong mga kasakit alang sa atong kaayohan:

• Unsa ang kahulugan nganha kaninyo sa mga pulong nga “mopahinungod sa imong mga kasakit alang sa imong kaayohan”? (Mahimo nimong ipasabut nga ang mopahinungod nagpasabut nga ihalad o ibalaan.)

• Kanus-a ninyo nakita nga ang Ginoo makapahinungod sa atong mga kasakit alang sa atong kaayohan?

2 Nephi 2:5–25

Nagtudlo si Lehi sa iyang mga anak nga lalaki bahin sa Pagkapukan ug bahin sa Pag-ula ni Jesukristo

Ipasabut nga gitudloan ni Lehi si Jacob ug ang iyang ubang mga anak nga lalaki bahin sa Pagkapukan ni Adan ug ni Eva. Mahimong kinahanglan nimong ipasabut nga ang mga pulong nga “ang Pagkapukan” nagpasabut sa mga kahimtang nga miabut nila ni Adan ug ni Eva ug sa ilang mga kaliwatan tungod sa pagpili nila ni Adan ug ni Eva nga mokaon sa gidili nga bunga didto sa Tanaman sa Eden.

• Unsa nga kapilian ang gihatag sa Ginoo nila ni Adan ug ni Eva didto sa Tanaman sa Eden? (Iya silang gitugutan nga mopili kon makaon ba sila sa gidili nga bunga o dili.)

• Sumala sa 2 Nephi 2:15, nganong gihatagan man sila sa Ginoo niining kapilian? (“Sa pagpahigayon sa iyang walay katapusan nga mga katuyoan sa sangputanan sa tawo.” Mahimo nimong awhagon ang mga estudyante nga markahan kini nga mga pulong.)

• Unsa man ang walay katapusan nga mga katuyoan sa Dios alang kanato? (Aron mahatagan kita sa oportunidad nga makadawat og kinabuhing dayon ug mahisama Kaniya. Mahimo nimong awhagon ang mga estudyante nga maghimo og note bahin niini diha sa ilang mga kasulatan tupad sa mga pulong nga “walay katapusan nga mga katuyoan.” Mahimo usab nimong ipabasa nila ang Moises 1:39.)

Kopyaha ang mosunod nga tsart diha sa pisara, nga ipabiling blangko ang duha ka mga box sa ubos. (Mahimo nimong isugyot nga kopyahon sa mga estudyante kini nga tsart diha sa ilang mga scripture study journal o mga class notebook.)

Kon wala ang Pagkapukan

Tungod sa Pagkapukan

Ang tanang mga butang magpabilin unta sa mao nga kahimtang human sila malalang (tan-awa sa 2 Nephi 2:22). Si Adan ug si Eva dili unta makabaton og mga anak (tan-awa sa 2 Nephi 2:23). Si Adan ug si Eva magpabilin unta diha sa usa ka kahimtang nga walay sala, wala masayud kon unsay hingpit nga kalipay o pagkauyamot, maayo o sala (tan-awa sa 2 Nephi 2:23).

Si Adan ug si Eva gihinginlan gikan sa tanaman aron sa pag-ugmad sa yuta (tan-awa sa 2 Nephi 2:19). Si Adan ug si Eva nanganak—ang pamilya sa tibuok yuta (tan-awa sa 2 Nephi 2:20). Si Adan ug si Eva ug ang ilang mga kaliwatan makasinati og mortal nga kinabuhi, lakip ang pagkauyamot, hingpit nga kalipay, ug ang abilidad sa paghimo og maayo ug makasala (tan-awa sa 2 Nephi 2:23, 25). Mapaubos kita sa pisikal ug sa espirituhanong kamatayon (tan-awa sa 2 Nephi 9:6; Helaman 14:16).

Dapita ang usa ka estudyante sa pagduol ngadto sa pisara ug mahimong tigsulat alang sa klase. Hangyoa ang mga estudyante sa pagsiksik og hilum sa 2 Nephi 2:19–25, moila (1) sa mga sangputanan nga moresulta unta kon wala pa mokaon si Adan ug si Eva sa gidili nga bunga ug napukan ug (2) sa mga sangputanan nga miresulta tungod sa Pagkapukan. Hangyoa ang tigsulat sa pagsulat sa mga tubag sa mga estudyante diha sa tsart. Ang mga tubag kinahanglang maglakip niadtong gilista sa ibabaw (gawas sa impormasyon bahin sa pisikal ug sa espirituhanong kamatayon, nga idugang sa dili madugay).

Dapita ang mga estudyante sa pagribyu sa ilang mga tubag ubos sa ulohan nga “Kon Wala ang Pagkapukan.”

• Sa unsang paagi nga ang mga kahimtang didto sa Tanaman sa Eden makapugong unta ni Adan ug ni Eva sa pag-uswag diha sa plano sa Langitnong Amahan sa kaluwasan? (Tan-awa sa 2 Nephi 2:22–23.)

Dapita ang mga estudyante sa pagribyu sa lista ubos sa ulohan nga “Tungod sa Pagkapukan.” Siguroha nga nasabtan nila nga tungod kay kita mga kaliwatan ni Adan ug ni Eva, mapaubos kita sa mga kahimtang nga miabut kanila human sa Pagkapukan (tan-awa sa 2 Nephi 2:21).

• Ang mga pulong nga “pag-ugmad sa yuta” nagpasabut nga human nga si Adan ug si Eva gihinginlan gikan sa tanaman, kinahanglan silang motrabaho aron makabaton og pagkaon. Sa inyong hunahuna sa unsa man nga paagi nga ang pagtrabaho nakatabang nato nga mouswag diha sa plano sa Langitnong Amahan?

• Sa unsang paagi nga ang pagbaton og mga anak nakatabang ni Adan ug ni Eva nga mas mahisama sa Langitnong Amahan? Sa unsang mga paagi nga ang mga pamilya importante diha sa plano sa Langitnong Amahan?

• Sa unsang paagi nga ang oportunidad nga makasinati og hingpit nga kalipay ug pagkauyamot makatabang nato nga mouswag diha sa plano sa Langitnong Amahan?

Human mahisguti kini nga mga pangutana, ipasabut og maayo nga ang Pagkapukan ni Adan ug ni Eva mahinungdanon kaayo nga bahin sa plano sa Langitnong Amahan sa kalipay.

Ipasabut nga ang 2 Nephi 2:25 usa ka scripture mastery passage. Mahimo nimong awhagon ang mga estudyante nga markahan kini. Tungod kay mubo ra kini, mahimong mogahin ka og panahon sa pagtabang sa mga estudyante nga mamemorya kini.

2Nephi 2:25 I-refer ngadto sa ideya sa pagtudlo sa scripture mastery diha sa katapusan sa leksyon aron matabangan ang mga estudyante sa ilang pag-master niini nga tudling.

Ipasabut nga bisan kon ang Pagkapukan miabli sa agianan aron kita mouswag, mipaila usab kini sa kasakit, pag-antus, sala, ug kamatayon ngadto sa kalibutan. Aron matabangan ang mga estudyante nga mapalambo ang ilang panabut niini nga kamatuoran, hangyoa ang usa ka estudyante sa pagbasa og kusog sa 2 Nephi 9:6. Hangyoa dayon ang laing estudyante sa pagbasa og kusog sa Helaman 14:15–17. Hangyoa ang klase sa pagpangita sa mga sangputanan sa Pagkapukan nga gihulagway niini nga mga bersikulo.

• Unsa ang gitudlo niini nga mga bersikulo bahin sa Pagkapukan? (Nagdala kini og pisikal nga kamatayon, nga mao ang kamatayon sa lawas, ug espirituhanong kamatayon, nga mao ang kahimtang nga mahimulag gikan sa presensya sa Dios. Isulat ang Mapaubos kita sa pisikal ug sa espirituhanong kamatayon diha sa pisara ubos sa “Tungod sa Pagkapukan.”)

Aron matabangan ang mga estudyante nga makahunahuna kon sa unsang paagi nila nasinati ang mga sangputanan sa Pagkapukan nga gilista diha sa pisara, awhaga sila nga hilum nga mamalandong sa mosunod nga mga pangutana. (Basaha og hinay ang mga pangutana ug mohunong og kadali inigkahuman sa usa ka pangutana aron mahatagan ang mga estudyante og igong panahon nga makahunahuna.)

• Unsa ang pipila ka mga hinungdan sa pagkauyamot dinhi niini nga kinabuhi?

• Nganong ang kamatayon mahinungdanon man nga bahin sa plano sa kaluwasan?

• Sa unsang paagi nga ang mga kasamok ug mga kagul-anan makatabang nato nga makakat-on ug molambo?

Ipasabut nga samtang makasabut kita kon sa unsang paagi nga ang Pagkapukan makaapekto nato, makaamgo kita nga nagkinahanglan kita sa Pag-ula ni Jesukristo. Basaha ang mosunod nga pamahayag ni Presidente Ezra Taft Benson:

“Ingon nga ang tawo dili magtinguha og pagkaon hangtud nga gutumon siya, dili usab siya magtinguha sa kaluwasan ni Kristo hangtud nga masayud siya nganong nagkinahanglan siya ni Kristo.

“Walay usa ang igo ug tukma nga nasayud nganong gikinahanglan niya si Kristo hangtud nga iyang masabtan ug madawat ang doktrina sa Pagkapukan ug ang epekto niini sa tanang katawhan. Ug walay laing basahon sa kalibutan nga mas mipasabut niining mahinungdanong doktrina sama sa Basahon ni Mormon” (“The Book of Mormon and the Doctrine and Covenants,” Ensign, Mayo 1987, 85).

Human ang mga estudyante adunay igong panahon sa pagpamalandong niini nga mga pangutana, ipakita ang usa ka hulagway sa Manluluwas. Ipakigbahin ang imong pagpamatuod nga pinaagi sa Pag-ula, si Jesukristo mitubos nato gikan sa mga epekto sa Pagkapukan ug mitanyag og katubsanan gikan sa atong mga sala.

Dapita ang pipila ka mga estudyante nga magpuli-puli sa pagbasa og kusog sa 2 Nephi 2:5–10, 21 ug Alma 7:11–13. Hangyoa ang mga estudyante sa pagtino sa mga pulong niining mga bersikulo nga nagpakita kon unsay gibuhat sa Manluluwas aron matubos kita gikan sa mga epekto sa Pagkapukan ug gikan sa atong tagsa-tagsa nga mga sala. (Kalabut sa bersikuo 9, mahimong kinahanglan nimong ipasabut nga ang mga pulong nga “nangamuyo” nagpasabut nga mohangyo alang sa laing tawo o mobuhat alang sa dapit sa laing tawo.) Aron matabangan ang mga estudyante nga maanalisar ang mga pulong nga ilang natino, ipangutana:

• Unsa nga mga pulong niini nga mga bersikulo ang nagpakita nga pinaagi sa Pag-ula, ang Manluluwas motubos kanato gikan sa pisikal nga kamatayon?

• Unsa nga mga pulong ang nagpakita nga ang Manluluwas motubos kanato gikan sa espirituhanong kamatayon (ipahimulag gikan sa presensya sa Dios)?

• Unsa nga mga pulong ang nagpakita nga ang Manluluwas makatubos kanato gikan sa atong mga sala?

• Unsa nga mga pulong ang nagpakita nga ang Manluluwas makatabang kanato sa mga panahon sa pagsulay sama sa balatian ug kasakit?

Sumala sa 2 Nephi 2:7–9, 21, unsay kinahanglan gayud natong buhaton aron makadawat sa tanang mga panalangin nga anaa pinaagi sa Pag-ula? (Kalabut sa bersikuo 7, mahimong kinahanglan nimong ipasabut nga ang tawo nga adunay “usa ka masulub-on nga kasingkasing ug mahinulsulon nga espiritu” mapainubsanon ug andam nga mosunod sa kabubut-on sa Dios. Ang maong tawo mobati og hilabihan nga kasubo tungod sa sala ug sinsero nga magtinguha nga maghinulsol.)

Human makahisgot niining mga pangutana, ipasusi og hilum sa mga estudyante ang gi-assign nga mga bersikulo, nga mangita sa mga pulong nga labing makahuluganon ngadto kanila. Hangyoa ang mga estudyante nga magpares-pares ug mopakigbahin sa mga pulong nga ilang gipili ngadto sa usag usa. Dapita sila nga ipagkigbahin kon nganong kini nga mga pulong makahuluganon ngadto kanila.

Dapita ang usa o duha ka mga estudyante sa pag-summarize alang sa klase kon nganong ang Pagkapukan usa ka mahinungdanong bahin sa plano sa Langitnong Amahan sa kaluwasan. Dayon hangyoa sila nga ipakigbahin ang ilang mga gibati kon sa unsang paagi nga ang Pag-ula ni Jesukristo makatubos kanato gikan sa Pagkapukan.

Scripture Mastery—2 Nephi 2:25

Pahinumdom: Ikonsiderar ang paggamit sa mosunod nga kalihokan aron matabangan ang mga estudyante sa paggamit sa 2 Nephi 2:25 kon magtudlo sila sa ebanghelyo. Tungod sa matang ug gitas-on sa leksyon karon, mahimo nimong gamiton kini nga kalihokan sa laing adlaw, kon kamo dunay sobra nga oras.

Dapita ang mga estudyante sa pag-andam og usa ka leksyon bahin sa doktrina sa Pagkapukan, gamit ang 2 Nephi 2:25. Matudlo nila kini nga leksyon diha sa family home evening o sa laing kahimtang. Hangyoa ang pipila ka mga estudyante kon andam ba sila sa pagreport sa ilang mga kasinatian human sa ilang pagtudlo. Tuguti ang mga estudyante nga sugdan ang ilang pagpangandam panahon sa klase, kon itugot sa panahon.

Komentaryo ug Background nga Impormasyon

2 Nephi 2:15. Ang gidili nga bunga

Ang Ginoo mitahud sa kabubut-on ni Adan ug ni Eva human sa pagtudlo nila sa mga sangputanan sa pagkaon sa gidili nga bunga. Ang Dios miingon, “Ikaw mahimo nga makapili alang sa imong kaugalingon” (Moises 3:17). Si Presidente Joseph Fielding Smith mitabang nga masabtan nato ang mga instruksyon sa Ginoo ngadto ni Adan ug ni Eva bahin sa gidili nga bunga:

“Kon nganong ang Ginoo moingon ngadto ni Adan nga iyang gidid-an nga mokaon siya sa bunga niana nga kahoy wala giklaro diha sa istorya sa Biblia [tan-awa sa Genesis 2:17], apan sa orihinal nga miabut kanato diha sa Basahon ni Moises [tan-awa sa Moises 3:17] giklaro gayud kini. Kini mao nga ang Ginoo miingon ngadto ni Adan nga kon gusto siya nga magpabilin kon unsa siya diha sa tanaman, nan dili siya mokaon sa bunga, apan kon nagtinguha siya nga mokaon niini ug moambit sa kamatayon duna siyay kagawasan sa pagbuhat sa ingon” (Answers to Gospel Questions, comp. Joseph Fielding Smith Jr., 5 vols. [1957–66], 4:81).

2 Nephi 2:14, 25–26. Ang Paglalang, ang Pagkapukan, ug ang Pag-ula

Si Elder Bruce R. McConkie sa Korum sa Napulog Duha ka mga Apostoles mitudlo:

“Ang labing importante nga mga panghitabo nga sukad nahitabo o mahitabo sa tibuok kahangturan … mao ang Paglalang, ang Pagkapukan, ug ang Pag-ula.

“Sa dili pa gani kita makasugod sa pagsabut sa temporal nga paglalang sa tanang mga butang, kinahanglan gayud nga atong masayran kon giunsa ug sa unsang paagi nga kining tulo ka mga kamatuoran—ang Paglalang, ang Pagkapukan, ug ang Pag-ula—dili mabulag nga hiniusang moporma sa usa ka plano sa kaluwasan. Walay usa niini nga mag-inusarang makabarug; ang matag usa niini nasumpay sa duha; ug kon wala ang kahibalo bahin sa tanan niini, dili posible nga masayran ang kamatuoran bahin sa bisan usa niini. …

“… Angayan kining hinumduman, ang Pag-ula miabut tungod sa Pagkapukan. Gibayaran ni Kristo ang bugti alang sa kalapasan ni Adan. Kon wala pa ang Pagkapukan, wala unta ang Pag-ula uban sa misangput nga pagka-imortal ug kinabuhing dayon. Sa ingon, kon unsa ka sigurado nga ang kaluwasan moabut tungod sa Pag-ula, mao usab nga ang kaluwasan moabut tungod sa Pagkapukan” (“Christ and the Creation,” Ensign, Hunyo 1982, 9).

2 Nephi 2:24. “Diha sa kaalam kaniya kinsa nasayud sa tanan nga mga butang”

Si Presidente Brigham Young nagtudlo nga ang Pagkapukan ni Adan ug ni Eva usa ka bahin sa plano sa Langitnong Amahan sa kaluwasan:

“Migawas ba nga [si Adan ug si Eva] direktang misupak sa Dios ug sa iyang pangagamhanan? Wala. Apan nakalapas sila og usa ka mando sa Ginoo, ug pinaagi niana nga kalapasan miabut ang sala nganhi sa kalibutan. Nasayud ang Ginoo nga ila kining mabuhat, ug iyang gitakda nga kinahanglan silang mobuhat niini” (Discourses of Brigham Young, sel. John A. Widtsoe [1954], 103).

Dugang nga mga Ideya sa Pagtudlo

2 Nephi 2:2. “Siya mopahinungod sa imong mga kasakit alang sa imong kaayohan”

Nahibalo si Lehi sa mga kasakit nga giantus ni Jacob “tungod sa kapintas sa [iyang] mga igsoon nga lalaki” (2 Nephi 2:1), apan nagtudlo usab siya nga ang Dios “[mo]pahinungod sa mga kasakit ni [Jacob] alang sa [iyang] kaayohan” (2 Nephi 2:2). Hangyoa ang mga estudyante nga mamalandong bahin sa usa ka higayon sa dihang ang Dios mihimo sa kasakit ngadto sa usa ka positibo nga resulta.

Ang mosunod nga kasinatian nga gipakigbahin ni Presidente Dieter F. Uchtdorf sa Unang Kapangulohan nagpakita kon sa unsang paagi nga ang Ginoo mopahinungod sa atong mga kasakit alang sa atong kaayohan:

Niadtong 11 anyos pa ako, ang among pamilya napugos pagbiya sa East Germany ug gilayon nagsugod og bag-ong kinabuhi sa West Germany. Sa wala pa ang akong amahan makabalik sa iyang unang propesyon isip usa ka empleyado sa gobyerno, ang akong ginikanan adunay gamay nga negosyo nga modawat og labada sa among gamayng lungsod. Ako nahimong tighatud sa mga linabhan. Aron ma-epektibo sa pagbuhat niadto, ako nagkinahanglan og bisikleta aron pagguroy sa bug-at nga laundry cart. Ako kanunayng nangandoy nga makabaton og nindot, hinlo, sinaw, makalingaw nga bisikleta nga pula. Apan wala gayuy igo nga kwarta sa pagtuman niini nga damgo. Ang ako hinoon nga nabatunan usa ka bug-at, maot, itum, lig-on nga dugay maguba nga bisikleta. Ako ang maghatud sa linabhan pinaagi niadtong bisikleta sa dili pa ug inigkahuman sa akong klase sulod sa pipila ka tuig. Kadaghanan, ako dili gayud ingon kamalipayon sa bisikleta, sa kariton, o sa akong trabaho. Usahay ang kariton ingon sa bug-at kaayo ug ang trabaho kapoy kaayo nga usahay makaingon ako nga mobuto ang akong dughan, ug sa makadaghan mohunong ako aron moluag ang pagginhawa. Apan bisan pa niana, gibuhat nako ang akong buluhaton tungod kay nahibalo ako nga gikinahanglan kaayo ang kinitaan sa among pamilya, ug kini ang akong paagi nga makatabang.

“Kon nahibaloan ko pa lang unta niadto og unsa ang akong nakat-unan paglabay sa pipila ka tuig—kon ako pa lang unta nga nakita ang katapusan gikan sa sinugdanan—ako unta mapasalamaton niini nga mga kasinatian, ug makahimo unta kadto sa akong buluhaton nga mas magaan.

“Paglabay sa katuigan, sa dihang hapit na ako matawag sa pagkasundalo, nakahukom hinoon ako nga moboluntaryo ug magpiloto sa Air Force. Ganahan ako nga magpalupad ug nakahunahuna nga ang pagka-piloto maoy angay kanako.

“Aron madawat niadto nga plano kinahanglang makapasar ako og pipila ka mga eksamin, apil na ang makuti nga pag-eksamin sa panglawas. Ang mga doktor may gamayng kabalaka sa mga resulta ug naghimo og dugang nga pag-eksamin. Unya sila mipahibalo, ‘Aduna kay uwat sa imong baga nga nagpasabut nga aduna kay sakit sa baga niadtong panahon sa imong kabatan-on, apan dili kaduha-duhaan nga maayo ka na karon.’ Ang mga doktor nangatingala og giunsa ako pagtambal nga naayo ang akong sakit. Hangtud niadtong adlawa sa pag-eksamin wala gayud ako masayud nga may sakit diay ako kaniadto sa baga. Unya akong nahinumduman nga kadtong kanunay nakong pag-ehersisyo nga may lab-as nga hangin isip usa ka laundry boy maoy nakatabang sa akong pagkaayo niadtong sakita. Kon dili pa niadtong dugang paningkamot sa pagtindak niadtong bug-at nga bisikleta kada adlaw, pagguroy sa kariton sa linabhan ngadto ug nganhi sa mga dalan sa among lungsod, tingali dili unta ako mahimong jet fighter nga piloto ug unya nahimong kapitan sa 747 airline” (“Makita ang Katapusan Gikan sa Sinugdanan,” Ensign o Liahona, Mayo 2006, 42–43).

2 Nephi 2:25. Kalihokan sa scripture mastery

Ang mosunod nga kalihokan sa scripture mastery makatabang sa mga estudyante nga makapraktis sa pagtudlo sa doktrina diha sa 2 Nephi 2:25.

Pagpahigayon og usa ka pag-drama bahin sa misyonaryo diin ang mga estudyante mogamit sa 2 Nephi 2:25 sa pagtubag sa mga pangutana sa ubos. Bahina ang mga estudyante nga managkompanyon. Ipakita nila ang mga pangutana, ug hangyoa sila sa pagkonsiderar kon unsaon nila paggamit ang 2 Nephi 2:25 sa pagtubag sa mga pangutana. Samtang mangandam sila sa ilang mga tubag, awhaga sila sa (1) pagbasa og kusog sa tudling, (2) pagtino sa kamatuoran nga gitudlo niini, ug (3) pagpasabut kon sa unsang paagi nga kining kamatuoran makatubag sa mga pangutana. Dapita usab sila sa paghunahuna og mga panahon sa dihang nakasinati sila og hingpit nga kalipay pinaagi sa ebanghelyo ni Jesukristo. Hangyoa sila sa pagkonsiderar nga ipakigbahin ang pipila niining mga kasinatian.

Sa higayon nga ang mga estudyante aduna nay igong panahon nga makaandam, dapita ang usa ka managkompanyon sa pag-adto sa atubangan sa klase ug mopahigayon sa mga tahas sa mga misyonaryo. Dapita ang laing estudyante sa pag-adto sa atubangan sa klase ug mo-drama sa tahas sa usa ka investigator. Ipapangutana sa investigator ang usa sa mga pangutana sa ubos. Dayon hangyoa ang mga misyonaryo sa pagpakigbahin sa ilang mga tubag. Human nga mapakigbahin sa mga misyonaryo ang ilang tubag, pasalamati sila ug paghatag og positibo nga feedback bahin sa unsay maayo nilang nabuhat. Mahimo usab nimong dapiton ang klase sa paghatag og positibo nga feedback. Dayon hangyoa ang tulo pa ka mga estudyante nga moduol sa atubangan aron i-drama ang laing pangutana.

Pangutana A: Kanunay kong giingnan nga si Adan ug si Eva nakahimo og dakong sayop sa dihang mikaon sila sa gidili nga bunga. Nagpuyo sila sa paraiso, diin walay kamatayon o pagkadaut. Dili ba mas maayo man unta kon wala pa sila mapukan?

Pangutana B: Nakaistorya ko sa lain-laing mga tawo kalabut sa ilang mga gituohan kon nganong gibutang kita sa Dios niini nga planeta. Unsa man ang gituohan sa mga Santos sa Ulahing mga Adlaw?