2 Nephi 33

Pasiuna

Gitapos ni Nephi ang iyang rekord pinaagi sa pagpamahayag nga ang iyang sinulat nga mga pulong nagpamatuod kang Jesukristo ug nagdani sa mga tawo sa pagbuhat og maayo ug sa paglahutay hangtud sa katapusan. Miingon siya nga bisan tuod nga gisulat niya “diha sa kahuyang,” ang iyang mga pulong “dako og bili” ug “mahimo nga malig-on” alang niadtong mobasa niini (tan-awa sa 2 Nephi 33:3–4). Mipamatuod siya nga ang iyang mga sinulat mao “ang mga pulong ni Kristo” ug nga ang mga tawo maoy manubag ngadto sa Dios sa ilang pagsanong ngadto niini (tan-awa sa 2 Nephi 33:10–15).

Mga Sugyot alang sa Pagtudlo

2 Nephi 33:1–2

Nagtudlo si Nephi bahin sa gahum sa Espiritu Santo nga modala sa kamatuoran sa atong kasingkasing

Drowinga sa pisara ang mosunod nga hulagway:

Unsay kalainan tali sa usa ka mensahe paingon sa kasingkasing sa tawo ug usa ka mensahe mosulod sa kasingkasing sa tawo?

Dapita ang usa ka estudyante sa pagbasa og kusog sa 2 Nephi 33:1. Dayon hangyoa ang mga estudyante sa pagpamalandong og hilum sa mosunod nga pangutana.

Sa inyong hunahuna nganong mahinungdanon man nga ang Espiritu Santo modala sa kamatuoran paingon sa atong kasingkasing apan dili mosulod sa atong kasingkasing?

Samtang mamalandong ang mga estudyante niini nga pangutana, basaha og kusog ang mosunod nga pamahayag ni Elder David A. Bednar sa Korum sa Napulog Duha ka mga Apostoles. Ipasabut nga niini nga pamahayag, naghisgot si Elder Bednar bahin sa 2 Nephi 33:1.

“Palihug timan-i kon sa unsa nga paagi nga ang gahum sa Espiritu modala sa mensahe paingon pero dili gayud mosulod sa kasingkasing. Ang usa ka magtutudlo makapasabut, makapakita, makadani, ug makapamatuod, ug makabuhat og dako nga espirituhanong gahum ug pagkaepektibo. Sa kaulahian, hinoon, ang sulod sa usa ka mensahe ug ang saksi sa Espiritu Santo mosulod lamang ngadto sa kasingkasing kon ang nagdawat motugot niini nga mosulod” (“Paningkamot sa Pagkat-on pinaagi sa Hugot nga Pagtuo” [pakigpulong ngadto sa mga CES religious educator, Peb. 3, 2006], 1, si.lds.org).

Dapita ang usa ka estudyante sa pagbasa og kusog sa mosunod nga pamahayag ni Elder Gerald N. Lund sa Seventy:

“Ngano nga ngadto lamang sa kasingkasing? Ang indibidwal nga kabubut-on sagrado kaayo nga ang Langitnong Amahan dili gayud mamugos sa kasingkasing sa tawo, bisan pa man sa Iyang walay kinutuban nga gahum. … Ang Dios motugot nato nga mahimong mga magbalantay, o tigbantay, sa atong kaugalingong mga kasingkasing. Kita kinahanglan, sa atong kaugalingong kabubut-on, mobukas sa atong mga kasingkasing ngadto sa Espiritu” (“Pagbukas sa Atong mga Kasingkasing,” Ensign o Liahona, Mayo 2008, 33).

Unsa may motino kon ang mensahe mosulod sa kasingkasing sa tawo?
Kanus-a ninyo gibati nga ang mensahe sa ebanghelyo misulod sa inyong kasingkasing? Unsa ang nasabtan ninyo niini bahin sa inyong kasingkasing nianang higayuna?

Hangyoa ang mga estudyante sa pagbasa og hilum sa 2 Nephi 33:2, nga moila sa paagi sa reaksyon sa mga tawo ngadto sa Espiritu Santo kon mopatig-a sila sa ilang kasingkasing. Mahimo nimong ipasabut nga ang pulong nga “walay bili” nagpasabut og “wala.” Ang “giisip [sinulat nga mga pulong] nga mga butang nga walay bili” mao ang paghunahuna nga kini walay pulos.

Unsa man ang pipila ka mga pamatasan ug mga kinaiya sa mga tawo nga dunay tig-a nga kasingkasing?
Alang ninyo, unsa man ang mensahe sa 2 Nephi 33:2? (Ang mga estudyante mahimong motubag nga mopili kita nga moabli o mosira sa atong kasingkasing ngadto sa inspirasyon sa Espiritu Santo. Siguroha nga nakasabut sila nga kon ablihan nato ang atong kasingkasing, ang mga mensahe sa Espiritu Santo makasulod sa atong kasingkasing.)

Sa dili pa magpadayon sa leksyon, hatagi og panahon ang mga estudyante nga hilum nga mokonsiderar sa kahimtang sa ilang kasingkasing ug sa pagtino kon gitugutan ba nila ang mga mensahe sa kamatuoran nga mosulod sa ilang kasingkasing.

2 Nephi 33:3–15

Gipasabut ni Nephi ang katuyoan sa iyang rekord ug sa iyang gilauman nga ang iyang mga magbabasa motuo kang Kristo

Isulat sa pisara ang mosunod:

2 Nephi 33:3—Ako nag-ampo sa kanunay alang …

2 Nephi 33:4—Ako nasayud …

2 Nephi 33:6—Ako mihimaya …

2 Nephi 33:7—Ako adunay …

Dapita ang mga estudyante sa pagbasa og hilum sa 2 Nephi 33:3–7, nga mangita sa mga gilauman ni Nephi alang niadtong mobasa sa iyang mga pulong. Dapita ang pipila ka mga estudyante sa pag-adto sa pisara ug sa pagkompleto sa mga sentence, nga mogamit sa kaugalingon nilang mga pulong o sa mga pulong ni Nephi. (Ang pipila sa mga pulong diha sa pisara moresulta sa sobra sa usa ka tubag.)

Unsaon man nato paglig-on ang atong personal nga mga pagpamatuod ni Jesukristo ug sa Iyang Pag-ula?

Hangyoa ang lima ka estudyante nga magpuli-puli sa pagbasa og kusog gikan sa 2 Nephi 33:10–14. Hangyoa ang klase sa pagsunod, nga mangita sa mga pulong diha sa panamilit ni Nephi nga makahuluganon ngadto kanila. Mahimo nimong isugyot nga markahan sa mga estudyante kini nga mga pulong.

Unsa nga mga pulong ang makahuluganon nganha kaninyo? Ngano man?
Kon ang mga tawo motuo kang Kristo, unsa may ilang bation bahin sa Basahon ni Mormon? (Tan-awa sa 2 Nephi 33:10.)
Unsa ang gipanagna ni Nephi nga mahitabo niadtong mosalikway sa iyang mga pulong? (Samtang motubag ang mga estudyante niini nga pangutana, mahimo nimong isugyot nga maghunahuna usab sila kon unsay ilang bation diha sa presensya sa Ginoo kon mituo ug misunod sila sa mga pulong ni Nephi ug sa ubang mga propeta.)

Hangyoa ang mga estudyante sa pagbasa og hilum sa 2 Nephi 33:15 ug sa pagpamalandong sa katapusang mga pulong ni Nephi: “Ako kinahanglan gayud nga motuman.” Dayon hatagi sila og pipila ka minuto nga balikan ang 1 ug 2 Nephi, nga moila sa mga ehemplo sa pagkamasulundon ni Nephi. Human sa pipila ka minuto, hangyoa ang mga estudyante sa pagpakigbahin sa unsay ilang nakit-an. Ang mga tubag mahimong maglakip sa pagbiya sa Jerusalem, pagbalik ngadto sa Jerusalem aron kuhaon ang mga palid nga tumbaga, pagbalik og usab ngadto sa Jerusalem aron hangyuon ang pamilya ni Ishmael nga mouban kanila, paghupot sa duha ka hugpong sa mga palid, pagsunod sa mga direksyon diha sa Liahona, pagtukod og barko, pagbiyahe ngadto sa gisaad nga yuta, pakigbulag gikan nila ni Laman ug Lemuel, ug paggiya sa iyang katawhan diha sa pagkamatarung. Samtang maghatag ang mga estudyante og mga ehemplo, mahimo nimo kining isulat diha sa pisara.

Isulat ang mosunod diha sa pisara: Ako kinahanglan gayud nga …

Dapita ang mga estudyante sa pagkompleto niini nga sentence diha sa ilang mga scripture study journal o mga class notebook. Ipahayag ang imong pagsalig nga makapili sila nga magmasulundon. Ipakigbahin ang imong mga hunahuna kon sa unsang paagi nga ang mga pulong ni Nephi makatabang kanila nga malig-on ang ilang pagtuo diha ni Jesukristo ug mapalambo ang ilang abilidad sa paghimo og maayo.

Pagribyu sa 2 Nephi

Paggahin og panahon aron matabangan ang mga estudyante sa pagribyu sa 2 Nephi. Hangyoa sila sa paghunahuna kon unsay ilang nakat-unan gikan niini nga basahon, diha sa seminary ug sa ilang personal nga pagtuon sa kasulatan. Kon gikinahanglan, awhaga sila nga basahon kadali ang 2 Nephi aron matabangan sila sa paghinumdom. Hangyoa sila sa pag-andam sa pagpakigbahin og butang gikan sa 2 Nephi nga nakapadasig kanila sa paghimo og maayo ug sa pagbaton og hugot nga pagtuo diha ni Jesukristo, sama sa giingon ni Nephi (tan-awa sa 2 Nephi 33:4). Human sa igong panahon, hangyoa ang pipila ka mga estudyante sa pagpakigbahin sa ilang mga hunahuna ug mga pagbati.

Ipakigbahin ang mosunod nga mga pamahayag bahin sa atong responsibilidad sa pagbasa sa Basahon ni Mormon ug sa mga panalangin nga moabut sa atong kinabuhi kon matuman nato kini nga responsibilidad:

Miingon si Presidente Joseph Fielding Smith: “Alang nako ingon og bisan kinsa nga miyembro niini nga Simbahan dili gayud matagbaw hangtud nga iyang mabasa ang Basahon ni Mormon sa makadaghan, ug pamalandungan kini og maayo aron siya makasaksi nga kini usa gayud ka rekord nga adunay inspirasyon sa Labawng Makagagahum, ug ang kasaysayan niini tinuod” (sa Conference Report, Okt. 1961, 18).

Nagtudlo si Presidente Gordon B. Hinckley nga kon ang mga miyembro sa Simbahan mobasa sa Basahon ni Mormon, “adunay moabut sa [ilang] mga kinabuhi ug ngadto sa [ilang] mga panimalay nga dugang nga pagbu-bu sa Espiritu sa Ginoo, usa ka nalig-on nga tinguha nga maglakaw sa pagkamasulundon sa Iyang mga sugo, ug usa ka mas lig-on nga pagpamatuod mahitungod sa buhing kamatuoran kabahin sa Anak sa Dios” (“A Testimony Vibrant and True,” Ensign, Ago. 2005, 6).

Sa pagtapos sa leksyon, mahimo nimong ikonsiderar ang pagpakigbahin og personal nga kasinatian isip usa ka pagpamatuod nga ang mga pulong ni Nephi niini nga kapitulo natuman diha sa imong kinabuhi.