Leksyon 27
2 Nephi 5
Pasiuna
Nagpatalinghug sa usa ka pasidaan gikan sa Ginoo, si Nephi ug ang iyang mga sumusunod mibulag gikan nila ni Laman, Lemuel, ug sa mga anak nga lalaki ni Ishmael. Nagpuyo sila sa pagkamatarung ug kalipay, samtang ang mga sumusunod nila ni Laman ug Lemuel mipahilayo sa ilang kaugalingon gikan sa Ginoo.
Mga Sugyot alang sa Pagtudlo
2 Nephi 5:1–8
Gibulag sa Ginoo ang mga sumusunod ni Nephi gikan sa mga sumusunod nila ni Laman ug Lemuel
Dapita ang mga estudyante nga mamalandong sa lisud nga mga problema ug mga desisyon nga ilang giatubang. Awhaga sila nga hinumduman kining personal nga mga hagit diha sa ilang hunahuna samtang magtuon sila kon unsay reaksyon ni Nephi ngadto sa mga hagit. Pahinumdumi sila nga sa dihang namatay na si Lehi, nabilin si Nephi nga maoy espirituhanong lider sa pamilya. Hangyoa ang mga estudyante sa pagbasa og hilum sa 2 Nephi 5:1–4 aron makita ang hagit nga giatubang ni Nephi.
-
Sumala sa 2 Nephi 5:1, unsay gibuhat ni Nephi aron matabangan sa pagtino og solusyon sa iyang hagit?
-
Bisan human sa pagpangayo ni Nephi og tabang, unsay gitinguha nga buhaton nila ni Laman ug Lemuel?
Samtang moreport ang mga estudyante sa ilang mga tubag, mahimo nimong ipasabut nga ang atong mga pag-ampo mahimong dili kanunayng matubag dayon o sa paagi nga atong gitinguha.
Dapita ang usa ka estudyante sa pagbasa og kusog sa 2 Nephi 5:5–8. Hangyoa ang klase sa pagsunod, nga mangita kon unsay gibuhat sa Ginoo aron matabangan si Nephi ug ang iyang mga sumusunod.
Awhaga ang mga estudyante sa pag-summarize sa unsay ilang nakat-unan gikan sa 2 Nephi 5:1–8. Usa ka kamatuoran nga mahimo nimong hatagan og gibug-aton mao nga ang Ginoo mogiya niadtong matinud-anong nagtinguha Kaniya diha sa pag-ampo. Kalabut niini nga mga bersikulo, ipangutana ang mosunod:
-
Nganong importante man nga padayong magmatinud-anon kon ang atong mga pag-ampo wala dayon matubag o sa paagi nga atong gitinguha?
-
Sa unsang mga paagi kaha nga ang Ginoo mohatag kanato og mga pasidaan?
Samtang motubag ang mga estudyante niini nga pangutana, ikonsiderar ang pagbasa sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
“Kita dili makapadayon sa usa ka sayop nga agianan nga walay pagdawat og usa ka pasidaan” (kinutlo sa Kenneth Johnson, “Pagtugyan ngadto sa mga Pag-aghat sa Balaang Espiritu,” Liahona, Nob. 2002, 90).
-
Sa unsang mga paagi nga atong masunod ang ehemplo ni Nephi kon mag-atubang kita og mga hagit?
Isip kabahin sa panaghisgutan sa mga estudyante sa 2 Nephi 5:1–8, ipasabut nga ang panagbulag sa mga Nephite gikan sa mga Lamanite mao ang resulta sa kayugot nila ni Laman ug Lemuel kang Nephi. Kini nga panagbulag nagpadayon sa mga siglo, nga ang mga kaliwatan nila ni Laman ug Lemuel nagtudlo sa ilang mga anak sa pagdumot sa mga kaliwatan ni Nephi (tan-awa sa Mosiah 10:12–17).
2 Nephi 5:9–18, 26–27
Ang mga Nephite nagpuyo subay sa matang sa pagkamalipayon
Giyahi ang mga estudyante sa dungan nga pagbasa og kusog sa 2 Nephi 5:27. Mahimo nimong isugyot nga markahan sa mga estudyante kini nga bersikulo. Isulat sa pisara ang pulong nga kalipay.
-
Sa inyong hunahuna unsa man ang gipasabut sa pagpuyo “subay sa matang sa pagkamalipayon”?
Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).
Dapita ang usa ka estudyante sa pagbasa og kusog sa mosunod nga pamahayag ni Elder Marlin K. Jensen sa Seventy:
“Ang pihong mga baruganan ug mga kamatuoran nga dili mausab makahatag og kalipay sa atong kinabuhi. Kini nga hilisgutan nakahatag kanako og interes sulod sa daghang katuigan tungod kay bisan kon napanalanginan ko sa abundang paagi ug duna sa tanang rason nga magmalipayon, usahay nanglimbasug ko ug wala kanunay sa natural nga kalagmitan nga magmalipayon ug magmaya nga daw natagamtaman sa ubang mga tawo.
“Tungod niana nga rason, pipila ka tuig ang milabay usa ka tudling sa Basahon ni Mormon ang nakakuha sa akong atensyon. … Naestablisar ni Nephi ang usa ka katilingban nga gitukod diha sa mga kamatuoran sa ebanghelyo; ug bahin niana nga katilingban miingon siya, ‘Ug nahinabo nga kami mipuyo subay sa matang sa pagkamalipayon’ (2 Ne. 5:27). Ang tudling nakapatandog kaayo kanako. … Naghunahuna ko … kon unsa kaha ang tagsa-tagsa ka mga elemento sa tinuod nga malipayong katilingban ug kinabuhi, ug nagsugod ko sa pagpangita sa mga sinulat ni Nephi alang sa mga timailhan. Ako … modapit kaninyo sa pagpahigayon sa inyong kaugalingong pagpangita. Mahimo nga usa kini ka tibuok kinabuhi ug bililhon nga paningkamot. …
“… Ang sama nga mga sumbanan ug mga elemento sa inadlaw nga kinabuhi nga nakapahimo ni Nephi ug sa iyang katawhan nga magmalipayon 560 ka tuig sa wala pa si Kristo mosalir lang gihapon karon” (“Living after the Manner of Happiness,” Ensign, Dis. 2002, 56, 61).
Awhaga ang mga estudyante nga dawaton ang pagdapit ni Elder Jensen. Hangyoa sila sa pagbasa og hilum sa 2 Nephi 5:6, 10–18, 26–27, nga mangita sa “mga elemento sa tinuod nga malipayong katilingban ug kinabuhi.” Mahimo nimong isugyot nga ilang markahan ang mga baruganan nga nakatampo sa kalipay sa mga Nephite. Human sa pipila ka minuto, dapita ang pipila ka mga estudyante sa pagsulat diha sa pisara sa ilang mga nakit-an. (Ang mga tubag mahimong maglakip nga si Nephi ug ang iyang mga sumusunod miadto uban sa ilang mga pamilya [tan-awa sa bersikulo 6]; mituman sa Ginoo [tan-awa sa bersikulo 10]; mitrabaho og maayo aron masuportahan ang ilang kaugalingon [tan-awa sa bersikulo 11, 15–17]; midala sa mga kasulatan uban kanila [tan-awa sa bersikulo 12]; mitukod og usa ka templo [tan-awa sa bersikulo 16]; ug mituman sa matarung nga mga lider [tan-awa sa bersikulo 18, 26].)
Awhaga ang mga estudyante sa pagpili og usa o duha sa mga baruganan diha sa pisara ug ipakigbahin kon sa unsang paagi nga kining mga baruganan nakatabang kanila nga “[mag]puyo subay sa matang sa pagkamalipayon.”
Depende sa unsay mahatagan og gibug-aton sa mga estudyante, mahimo kang mo-follow up og pipila ka mga pangutana sama sa mosunod:
-
Sumala sa 2 Nephi 5:10–11, 16, unsa nga mga panalangin ang nadawat sa mga tawo tungod kay mituman sila sa mga sugo sa Ginoo? Kanus-a kamo mibati nga ang Ginoo nag-uban kaninyo? Sa unsang paagi nga ang impluwensya sa Ginoo sa inyong kinabuhi nakatampo sa inyong kalipay?
-
Sa unsa kahang paagi nga ang templo nakatabang sa mga tawo nga “mipuyo subay sa matang sa pagkamalipayon”? Sa unsang paagi nga ang templo nakahatag og mas dakong kalipay nganha kaninyo o sa usa ka tawo nga inyong nailhan?
-
Sa unsang mga paagi nga ang pagtrabaho og maayo nakatampo sa kalipay?
Dapita ang mga estudyante sa pag-summarize kon unsay ilang nakat-unan bahin sa paagi sa pagpalambo sa ilang kalipay. Bisan kon ang mga estudyante mahimong mopakigbahin og lain-laing mga baruganan, siguroha nga ilang nasabtan nga kon ang ebanghelyo ni Jesukristo mahimong paagi nato sa pagpakabuhi, molambo kita diha sa kalipay. Mahimo nimong isulat sa pisara kini nga baruganan.
Dapita ang mga estudyante sa pagsusi sa ilang kinabuhi ug sa pagtino kon unsay ilang buhaton aron mas hingpit nga magpakabuhi “subay sa matang sa pagkamalipayon.” Awhaga sila sa pagsulat niini nga aksyon diha sa ilang mga scripture study journal o mga class notebook. Ipakigbahin ang imong pagpamatuod bahin sa mga baruganan ug mga binuhatan nga nagdala og kalipay sa imong kinabuhi.
2 Nephi 5:19–25
Gitunglo ang mga Lamanite tungod sa ilang pagkadili masulundon
Dapita ang mga estudyante sa pagbasa og hilum sa 2 Nephi 5:19–24, nga mangita sa mga kalainan tali sa paagi sa pagpakabuhi sa mga Lamanite ug sa paagi sa pagpakabuhi sa mga Nephite.
-
Sumala sa 2 Nephi 5:20, unsa man ang sangputanan sa pagkadili masulundon sa mga Lamanite?
-
Sa unsang paagi nga ang 2 Nephi 5:21 nakatabang kaninyo nga masabtan nganong ang mga Lamanite gipahimulag gikan sa Ginoo? (Mahimo nimong ipasabut nga ang pulong nga santik [flint] usa ka gahi nga bato. Sa pagsulti nga ang mga Lamanite “nahimo nga sama ngadto sa usa ka santik,” gihatagan ni Nephi og gibug-aton ang kagahi sa mga kasingkasing sa mga Lamanite.)
-
Unsa nga pasidaan ang gihatag sa Ginoo bahin sa mga Nephite nga nakigminyo og mga Lamanite kinsa misalikway sa ebanghelyo? (Tan-awa sa 2 Nephi 5:23.)
-
Nganong importante nga malikayan ang pakig-date ug pakigminyo niadtong dili mopatalinghug sa Ginoo? Sa inyong hunahuna sa unsang paagi nga ang mga tawo nga inyong ika-date ug maminyuan sa katapusan moimpluwensya sa inyong mga paningkamot sa pagsunod sa ebanghelyo? (Makatabang ang pagpahinumdom sa mga estudyante nga ang Unang Kapangulohan mitambag, “Pilia nga makig-date lamang niadtong kinsa adunay taas nga moral nga mga sumbanan ug kansang pakigkuyog makapatunhay sa inyong mga sumbanan” [Alang sa Kalig-on sa mga Kabatan-onan (booklet, 2011), 4].)
-
Unsa ang pipila ka mga baruganan nga atong makat-unan gikan sa 2 Nephi 5:20–24? (Samtang mopakigbahin ang mga estudyante sa mga baruganan, siguroha nga nasabtan nila nga kon ang mga tawo mopatig-a sa ilang kasingkasing batok sa Ginoo, ilang gipahimulag ang ilang kaugalingon gikan kaniya.)
Hatagi og gibug-aton nga ang 2 Nephi 5 nagpresentar og dakong kalainan tali sa mga Nephite ug mga Lamanite. Makapili kita kon hain nga ehemplo ang atong sundon. Awhaga ang mga estudyante sa paghinumdom nga gitino nila nga mobuhat sila og butang aron mas hingpit nga magpakabuhi “subay sa matang sa pagkamalipayon.” Ipahayag ang imong pagsalig nga makasunod sila sa ehemplo sa mga Nephite ug tinuod nga magmalipayon.
Komentaryo ug Background nga Impormasyon
2 Nephi 5:5–9. Pagbulag sa atong kaugalingon gikan sa pagkadautan
Dunay mga panahon nga gikinahanglan nga sa pisikal nga paagi mopalayo gikan sa dautan, sama sa gibuhat ni Nephi ug sa iyang mga sumusunod. Hinoon, mahimong dili kita kanunay nga sa pisikal nga paagi makapalayo sa atong kaugalingon gikan sa pagkadautan. Gipasabut ni Elder Richard G. Scott sa Korum sa Napulog Duha ka mga Apostoles kon unsaon nato sa pagpanalipod sa atong kaugalingon sa ingon nga mga sitwasyon:
“Ang Dios mihatag og paagi sa pagpuyo niini nga kalibutan ug dili matakdan sa makauulaw nga mga pamugos sa mga dautan nga gisabwag niini. Mahimo kamong magpuyo og mahiyason, mabungahon, matarung nga kinabuhi pinaagi sa pagsunod sa plano sa panalipod nga gimugna sa inyong Amahan sa Langit: ang Iyang plano sa kalipay. Gilangkob kini diha sa mga kasulatan ug sa dinasig nga mga pamahayag sa Iyang mga propeta. …
“Paglikay sa kalibutanon nga pagkadautan. Hibaloi nga ang Dios ang nagdumala. Moabut ang panahon, nga si Satanas hingpit nga mapakyas ug pagasilutan alang sa iyang pagkadautan. Ang Dios adunay piho nga plano alang sa inyong kinabuhi. Ipadayag Niya ang mga bahin niana nga plano nganha kaninyo kon tun-an ninyo kini uban sa hugot nga pagtuo ug kanunay nga pagsunod. Gihatagan kamo og kagawasan sa Iyang Anak—dili tungod sa inyong mga buhat, apan gawasnon sa paghimo og mga kapilian. Ang mahangturon nga katuyoan sa Dios mao ang paghimo ninyo nga malampuson niining mortal nga kinabuhi. Bisan unsa pa kadautan ang kalibutan makahimo kamo sa pag-ani niana nga panalangin. Pagtinguha ug magmatinagdanon sa personal nga paggiya nga gihatag kaninyo pinaagi sa Balaang Espiritu. Padayon sa pagpakatakus aron makadawat niini. Tabangi ang uban nga nahisalaag ug nalibog, dili kahibalo kon unsa nga agianan ang sundon” (“Unsaon Pagpuyo sa Minaayo taliwala sa Nagkagrabe nga Pagkadautan,” Ensign o Liahona, Mayo 2004, 100, 102).
2 Nephi 5:11, 13. “Kami miuswag sa hilabihan”
Diha sa 2 Nephi 5:11, 13, nagsulti si Nephi bahin sa pag-uswag sa iyang katawhan ug sa ilang kalampusan sa pagbuhi og mga hayop, ug sa pagtanom. Kasagaran atong himuan og koneksyon ang pag-uswag sa makita nga mga panalangin. Nagtudlo si Presidente Heber J. Grant nga ang tinuod nga pag-uswag naglakip og mas labaw pa kay sa katigayunan o sa materyal nga mga butang sa kalibutan:
“Kon moingon ko nga pag-uswag wala ko maghunahuna niini kabahin lamang sa kwarta. … Apan unsay akong giisip nga tinuod nga pag-uswag, ingon nga ang usa ka butang diha sa uban nga adunay dakong bili ngadto sa matag lalaki ug babaye nga buhi, mao ang paglambo diha sa usa ka kahibalo sa Dios, ug diha sa pagpamatuod, ug diha sa gahum sa pagtuman sa ebanghelyo ug sa pagdasig sa atong mga pamilya sa pagbuhat sa sama. Mao kana ang pag-uswag sa labing tinuod nga matang” (Mga Pagtulun-an sa mga Presidente sa Simbahan: Heber J. Grant [2002], 148).
2 Nephi 5:10–18, 26–27. “Subay sa matang sa pagkamalipayon”
Si Propeta Joseph Smith mipasabut nga dunay usa ka dalan paingon sa kalipay: “Ang kalipay mao ang tumong ug desinyo sa atong pagkatawo; ug mao ang katapusan niini; kon kita magsubay sa dalan nga nagpaingon niini; ug kini nga dalan mao ang hiyas, pagkamatarung, pagkamatinud-anon, pagkabalaan, ug pagsunod sa tanang mga sugo sa Dios.” (History of the Church, 5:134–35).
Nagtudlo si Presidente Gordon B. Hinckley: “Ang kalipay magagikan sa pagkamatarung. ‘Ang pagkadautan dili mahitabo nga mahimo nga kalipay.’ (Alma 41:10.) Ang sala dili mahitabo nga mahimo nga kalipay. Ang pagkadalo dili mahitabo nga mahimo nga kalipay. Ang pagkahakog dili mahitabo nga mahimo nga kalipay. Ang kalipay anaa sa pagtuman sa mga baruganan sa ebanghelyo ni Jesukristo” (sa “Fast-Paced Schedule for the Prophet,” Church News, Abr. 20, 1996, 3).
2 Nephi 5:16. “Ug ako, si Nephi, mitukod og usa ka templo”
Gipasabut ni Elder Marlin K. Jensen sa Seventy kon sa unsang paagi nga ang pagtambong sa templo moresulta sa kalipay:
“Misulat si Nephi, ‘Ug ako, si Nephi, mitukod og usa ka templo’ (2 Ne. 5:16). Ang templo ni Nephi mahimong lahi sa pipila ka paagi sa atong mga templo sa ulahing mga adlaw, apan ang mahinungdanong katuyoan susama ra: sa pagtudlo ug pagpahibalo sa mga anak sa Dios kalabut sa Iyang plano alang sa ilang kalipay ug sa paghatag sa mga ordinansa ug mga pakigsaad nga gikinahanglan aron makab-ot kana nga kalipay.
“Human makapuyo niining maayo nga yuta sobra sa lima ka dekada, matinuoron akong makaingon nga ang labing hamtong sa espirituhanong paagi ug malipayon nga katawhan nga akong nailhan mao ang madasigon nga mga magtambungan sa templo. Adunay maayong rason alang niana. Diha kini sa templo nga ang hingpit nga han-ay sa programa sa Dios alang kanato gisaysay ug gisaysay pag-usab, ang matag pagsaysay nagdala og mas dako nga panabut ug pasalig nga magpakabuhi diha sa Iyang paagi. …
“Usa ka maayong pagsulay kon kumusta ang atong paningkamot nga moduol kang Kristo mahimong kon unsay atong gibati bahin sa templo ug sa atong mga kasinatian didto. Ang templo mahimong pareho og kahulugan sa kamaya ug hingpit nga kalipay. Mao kadto ang nahitabo kang Nephi ug sa iyang katawhan” (“Living after the Manner of Happiness,” Ensign, Dis. 2002, 60).
2 Nephi 5:20–25. Ang tunglo sa mga Lamanite
Diha sa 2 Nephi 5:20–25, makita nato ang mga tubag sa dili mominos sa upat ka mga pangutana bahin sa tunglo nga midangat sa mga Lamanite:
1. Unsa man ang tunglo?
Ang tunglo klaro nga gitino diha sa 2 Nephi 5:20 nga “gipahimulag gikan sa atubangan sa Ginoo.” Ang itum nga panit sa mga Lamanite dili mao ang tunglo.
2. Unsa may hinungdan sa tunglo?
Sumala sa 2 Nephi 5:21, ang tunglo midangat sa mga Lamanite “tungod sa ilang kadautan” ug tungod kay “sila mipatig-a sa ilang mga kasingkasing batok [sa Ginoo].” Sukad sa Pagkapukan ni Adan, ang pagkadautan kanunayng miresulta sa pagkahimulag gikan sa atubangan sa Ginoo (tan-awa sa 1 Nephi 2:21; 2 Nephi 4:4; 9:6; Alma 9:13; Ether 10:11).
3. Nganong ang marka sa itum nga panit gipahamtang man sa mga Lamanite?
Usa kini ka piho nga marka o timaan alang sa usa ka piho nga hugpong sa mga kahimtang. Mipasabut si Nephi, “Nga aron sila [ang mga Lamanite] unta dili makadani sa akong mga katawhan ang Ginoong Dios mihimo nga usa ka panit nga itum modangat diha kanila” (2 Nephi 5:21). Mihatag si Alma og susama nga pagpasabut: “Ang mga panit sa mga Lamanite mga itum … nga pinaagi niana ang Ginoong Dios unta manalipod sa iyang mga katawhan, nga sila unta dili mosagol ug motuo sa mga sayop nga tradisyon” (Alma 3:6, 8). Kini nga mga pagpasabut nahisubay sa ubang mga pasidaan gikan sa kasulatan nga ang katawhan sa Ginoo kinahanglang dili makigminyo sa mga dili tumutuo tungod kay ang resulta sa pagbuhat sa ingon sa kasagaran ang mga matarung mopalayo sa Ginoo (tan-awa sa Deuteronomio 7:2–4; 1 Mga Hari 11:4; 2 Mga Taga-Corinto 6:14; D&P 74:5).
4. Unsa man ang resulta sa tunglo?
Isip resulta sa tunglo—ang pagkahimulag gikan sa atubangan sa Ginoo—ang mga Lamanite “nahimo nga usa ka tapulan nga mga katawhan, puno sa pagkamaldito ug pagkamaliputon” (2 Nephi 5:24).
Ang tunglo milungtad lamang kon ang mga tawo dautan. Sa dihang naghinulsol ang mga Lamanite ug mipili nga mosunod sa ebanghelyo, “ang tunglo sa Dios wala na mosunod kanila” (Alma 23:18). Ang Basahon ni Mormon naglakip sa daghang mga ehemplo bahin sa mga Lamanite nga naghinulsol ug nakadawat sa giya sa Espiritu sa Ginoo. Ang basahon ni Helaman naghisgot sa usa ka panahon sa dihang ang mga Lamanite mas matarung pa kay sa mga Nephite (tan-awa sa Helaman 13:1).