Librarya
Leksyon 34: 2 Nephi 21–24

Leksyon 34

2 Nephi 21–24

Pasiuna

Daghan sa mga panagna ni Isaias diha sa Basahon ni Mormon ang kalabut sa katapusang mga adlaw. Nanagna siya bahin sa Pagpahiuli sa ebanghelyo, ni Propeta Joseph Smith, sa Ikaduhang Pag-anhi, ug sa pagkalaglag sa mga dautan. Nakita na niyang daan nga ang Ginoo “mopatindog og usa ka bandila alang sa mga nasud” aron sa pagpundok sa Iyang katawhan sa katapusang mga adlaw (tan-awa sa 2 Nephi 21:11–12). Mipamatuod usab si Isaias nga ang Ginoo magmadaugon batok ni Satanas ug mopasiugda sa Milenyum, usa ka panahon sa kalinaw ug hingpit nga kalipay.

Mga Sugyot alang sa Pagtudlo

2 Nephi 21:1–5, 10–12

Nakita nang daan ni Isaias ang Pagpahiuli sa ebanghelyo ni Jesukristo sa ulahing mga adlaw

Ipakita ang litrato nga Si Moroni Nagpakita ni Joseph Smith didto sa Iyang Lawak (62492; Libro sa mga Hulagway sa Ebanghelyo [2009], nu. 91). Ipasabut nga sa dihang unang mipakita si Moroni ngadto ni Joseph Smith, “siya mikutlo sa ikanapulo ug usa nga kapitulo sa Isaias, nag-ingon nga kini hapit na matuman” (Joseph Smith—Kasaysayan 1:40). Ang panagna diha sa Isaias 11 makita usab diha sa 2 Nephi 21.

Moroni Appears to Joseph Smith

Dapita ang mga estudyante sa pagbasa og hilum sa 2 Nephi 21:1. Idirekta ang ilang atensyon ngadto sa mga pulong nga “usa ka saha gikan sa kaliwatan ni Jese.” Dayon dapita sila sa pagbasa og hilum sa 2 Nephi 21:10. Idirekta ang ilang atensyon ngadto sa mga pulong nga “kaliwat ni Jese.” Mahimo nimong isugyot nga markahan sa mga estudyante kini nga mga pulong. Ipasabut nga si Propeta Joseph Smith nakadawat og pinadayag bahin niini nga mga pulong. Dapita ang mga estudyante sa pagpakli ngadto sa Doktrina ug mga Pakigsaad 113:1–6. Basaha og kusog kini nga tudling. Sa dili pa ka mobasa, hangyoa ang mga estudyante nga magsunod og basa ug mangita sa mga kahulugan sa mga pulong. Mahimo nimong isulat sa pisara kining mga kahulugan, sama sa gipakita sa ubos. Mahimo nimong awhagon ang mga estudyante sa pagsulat niini nga mga kahulugan diha sa ilang mga kasulatan.

Kaliwatan ni Jese—Jesukristo

Saha—usa ka sulugoon ni Kristo “kang kinsa adunay gitugyan nga dakong gahum”

Gamot ni Jese—usa ka indibidwal sa ulahing mga adlaw nga maghupot sa priesthood ug “ [sa] mga yawe sa gingharian”

Hangyoa ang usa ka estudyante sa pagbasa sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles. Hangyoa ang klase sa pagpaminaw alang sa pag-ila sa “saha” ug sa “gamot ni Jese.”

“Nasayop ba kita sa pag-ingon nga ang propeta nga gihisgutan dinhi mao si Joseph Smith, kang kinsa miabut ang priesthood, kinsa nakadawat sa mga yawe sa gingharian, ug kinsa mipataas sa bandila alang sa pagpundok sa katawhan sa Ginoo sa atong dispensasyon? Ug dili ba siya mao usab ang usa ka ‘sulugoon diha sa mga kamot ni Kristo, kinsa mao ang usa ka bahin sa kaliwat ni Jese ingon man usab ni Ephraim, o sa balay ni Jose, kang kinsa adunay gitugyan nga dakong gahum’?” (The Millennial Messiah: The Second Coming of the Son of Man [1982], 339–40).

Dapita ang usa ka estudyante sa pagbasa og kusog sa 2 Nephi 21:10, 12. Hangyoa ang klase sa pagpangita sa mga pulong nga may kalabutan ni Joseph Smith ug sa Pagpahiuli sa ebanghelyo ug sa Simbahan sa Ginoo. Sa dili pa mobasa ang estudyante, mahimo nimo silang pahinumduman nga ang pulong nga bandila nagpasabut sa usa ka sumbanan, bandera nga gigamit isip punto sa panagtigum o isip timailhan sa pagtipon (tan-awa sa leksyon 32).

  • Sa unsang paagi nga ang buhat ni Joseph Smith nakatuman sa panagna kalabut sa gamot ni Jese?

  • Sa unsang mga paagi nga napundok kita karon isip mga miyembro sa Simbahan? Sa unsang mga paagi nga mapataas nato ang bandila aron matabangan ang uban nga masayud kon asa magpundok?

Ipamatuod nga ang Ginoo mipahiuli sa Iyang ebanghelyo ug sa Iyang Simbahan pinaagi ni Propeta Joseph ug nagpundok karon sa Iyang katawhan sa katapusang mga adlaw.

2 Nephi 21:6–9; 22

Gihulagway ni Isaias ang Milenyum

Hangyoa ang mga estudyante sa paghunahuna nga ang usa ka higala kinsa miyembro sa laing simbahan nangutana kanila kon unsay ilang gituohan bahin sa Milenyum. Patun-i nila og hilum ang 2 Nephi 21:6–9 ug 22:1–6, nga mangita sa mga kamatuoran nga mahimo nilang ipakigbahin sa ingon nga panag-istoryahanay. Dapita sila sa pagsulat sa ilang mga ideya diha sa ilang mga scripture study journal o mga class notebook. Aron matabangan sila nga mahisgutan ang ilang nakit-an, ipangutana ang pipila o ang tanan sa mosunod nga mga pangutana:

  • Unsa may gisugyot sa mga paghulagway diha sa 2 Nephi 21:6–8 bahin sa mga kahimtang sa yuta panahon sa Milenyum?

  • Sumala sa 2 Nephi 21:9, nganong ang yuta mahimo man nga usa ka dapit sa kalinaw panahon sa Milenyum? (Tabangi ang mga estudyante nga makasabut nga panahon sa Milenyum, ang yuta mahimo nga usa ka dapit sa kalinaw tungod kay mapuno kini sa kasayuran bahin sa Ginoo.)

  • Sa unsang paagi nga ang kasayuran bahin sa Ginoo makatabang kanato nga magpuyo nga mas malinawon karon?

  • Diha sa 2 Nephi 22:1–6, gihulagway ni Isaias ang diwa sa pagsimba nga mabatunan sa mga tawo panahon sa Milenyum. Unsaon man nato sa pagpalambo niana nga samang kinaiya karon?

  • Unsa ang pipila ka mga aspeto sa Milenyum nga gusto ninyong mabatunan sa inyong kinabuhi karon mismo? (Awhaga ang mga estudyante sa pagpamalandong sa unsay ilang mabuhat aron makadawat sa pipila niining mga panalangin diha sa ilang kinabuhi.)

2 Nephi 23–24

Nagtudlo si Isaias nga ang mga dautan malaglag ug nga ang Ginoo malooy sa Iyang katawhan

Ipasabut nga diha sa 2 Nephi 23, gipanagna ni Isaias ang pagkalaglag sa Babelon ug gitandi kini sa pagkalaglag sa mga dautan atol sa Ikaduhang Pag-anhi sa Manluluwas. Dapita ang mga estudyante sa pagbasa sa gisulat alang sa “Babel, Babelon” diha sa Giya ngadto sa mga Kasulatan. Ipasabut nga sa pipila ka mga tudling sa kasulatan, ang pulong nga Babelon sa kasagaran nagpasabut sa pagkadautan sa kalibutan. Gipanagna ni Isaias nga moabut ang hilabihan nga pagkalaglag ngadto sa mga dautan sa Babelon ug sa katapusang mga adlaw.

Aron matabangan ang mga estudyante nga matino ang mga sangputanan alang sa mga dautan sa katapusang mga adlaw, ipabasa nila sa hilum ang 2 Nephi 23:1, 5–9, 11, 15, 19, ug 22.

Ipasabut nga gihisgutan ni Isaias ang pagkapukan ni Lucifer, o Satanas, isip laing paghulagway kon sa unsang paagi malaglag ang mga dautan. Dapita ang usa ka estudyante sa pagbasa og kusog sa 2 Nephi 24:12–16.

  • Unsa nga mga pulong niini nga mga bersikulo ang nagpakita sa pagka-arogante ni Satanas?

  • Giunsa paghulagway sa 2 Nephi 24:16 kon unsay atong bation bahin ni Satanas kon makita pa lang nato siya kon unsa siya?

Dapita ang usa ka estudyante sa pagbasa sa mosunod nga pamahayag ni Presidente Ezra Taft Benson:

“Sa konseho sa kinabuhi sa wala pa dinhi sa yuta, ang garbo mao ang nakapapukan ni Lucifer.’ (2 Ne. 24:12–15; tan-awa usab sa D&P 76:25–27; Moises 4:3.) … Sa konseho sa kinabuhi sa wala pa dinhi sa yuta, gipahimutang ni Lucifer ang iyang sugyot agig pakigkompetensya sa plano sa Amahan nga gipasiugdahan ni Jesukristo. (Tan-awa sa Moises 4:1–3.) Gusto siya nga pasidunggan labaw sa tanan. (Tan-awa sa 2 Ne. 24:13.) Sa ato pa, ang mapahitas-on niyang tinguha mao ang pagtangtang sa trono sa Dios. (Tan-awa sa D&P 29:36; 76:28.)” (“Beware of Pride,” Ensign, Mayo 1989, 4–5).

Idirekta ang atensyon sa mga estudyante ngadto sa pulong sa Ginoo sa pagtapos sa 2 Nephi 23:22: “Ako maloloy-on ngadto sa akong mga katawhan, apan ang mga dautan malaglag.” Mahimo nimong awhagon ang mga estudyante sa pagmarka niining pamahayag diha sa ilang mga kasulatan. (Hinumdumi nga ang katapusang sentence niini nga bersikulo dili makita sa katugbang nga bersikulo sa basahon ni Isaias diha sa King James Version sa Biblia. Nagsugyot kini nga ang mga palid nga tumbaga [brass plate] naglangkob og pipila ka impormasyon nga wala sa Biblia.)

  • Sa inyong hunahuna unsa man ang buot ipasabut sa maanaa taliwala sa katawhan sa Ginoo?

Hangyoa ang pipila ka mga estudyante sa pagbasa og kusog sa 2 Nephi 24:1–7, 24–27, nga magpuli-puli sa pagbasa sa usa o duha ka mga bersikulo. Dapita ang klase sa pagpangita sa mga saad sa Ginoo ngadto sa Iyang katawhan. Awhaga sila sa pagpakigbahin sa ilang mga obserbasyon ngadto sa usag usa. Mahimo nimong ikonsiderar nga ipasulat sa pisara sa usa ka estudyante kini nga mga obserbasyon.

  • Unsa nga mga mensahe ang mapakigbahin niini nga mga bersikulo alang niadtong nag-antus tungod sa pagkadautan sa ubang tawo?

  • Unsa nga ebidensya sa kalinaw ug paglaum ang inyong nakita niini nga mga bersikulo?

Siguroha nga masabtan sa mga estudyante nga ang Ginoo maloloy-on ngadto sa Iyang mga katawhan, apan ang mga dautan malaglag. Tabangi nga masabtan sa mga estudyante nga ang mga panagna ni Isaias diha sa 2 Nephi 21–24 nagpakita sa usa sa nag-unang mga mensahe sa Basahon ni Mormon—nga ang mga masulundon mouswag ug ang mga masinupakon malaglag. Ipamatuod nga mahimo kitang magpakabuhi diha sa pagkamatarung ug molambo karon samtang magpaabut kita sa Milenyum.

Komentaryo ug Background nga Impormasyon

2 Nephi 21:1. “Ug usa ka sanga ang moturok gikan sa iyang mga gamut”

Gipasabut ni Elder Bruce R. McConkie sa Korum sa Napulog Duha ka mga Apostoles ang sanga nga nahisgutan diha sa 2 Nephi 21:1:

“‘Ania karon, ang mga adlaw moabut na, miingon ang Ginoo, nga ako magpatindog alang kang David, usa ka matarung nga Sanga, ug siya magahari ingon nga hari ug magadumala …’ (Jer. 23:3–6). Sa ato pa, ang Hari nga magahari mismo sa yuta panahon sa Milenyum mao ang Sanga nga moturok gikan sa balay ni David. Ipadangat niya ang paghukom ug kaangayan sa tibuok yuta tungod kay siya mao si Ginoong Jehova, gani siya kinsa atong gitawag nga Kristo. Nga ang Sanga ni David mao si Kristo klaro gayud kaayo. Ato nang makita karon nga siya usab ang gitawag nga David, nga siya mao ang bag-ong David, usa ka Mahangturong David, kinsa magahari sa kahangturan diha sa trono sa iyang katigulangan sa karaan [tan-awa sa Jeremias 30:8–9]” (The Promised Messiah: The First Coming of Christ [1978], 193).