2 Nephi 12–15

Pasiuna

Gipanghimaraut ni Isaias ang pagkadautan sa mga tawo sa iyang panahon ingon man usab ang pagkadautan sa daghang mga tawo sa katapusang mga adlaw. Mipasidaan siya batok sa pagtawag sa dautan nga maayo, ug sa maayo nga dautan. Gihatagan usab niya og gibug-aton ang Pagpahiuli sa ebanghelyo sa katapusang mga adlaw, lakip na ang kamahinungdanon sa templo ug ang kaimportante sa pagkalimpyo gikan sa mga sala sa kalibutan. Alang sa dugang nga impormasyon bahin ni Isaias, tan-awa sa leksyon 21 niini nga manwal.

Mga Sugyot alang sa Pagtudlo

2 Nephi 12–15

Gihatagan og kalainan ni Isaias ang dautan nga Israel sa matarung nga Israel

Aron matabangan ang mga estudyante nga makasabut sa konteksto sa leksyon karong adlawa, sugdi ang klase pinaagi sa pagpahinumdom kanila nga sa miaging leksyon ilang nakat-unan ang bahin sa tawag ni Isaias nga mahimong usa ka propeta. Karong adlawa makat-unan nila ang bahin sa mga tawo nga iyang gitudloan.

Tabangi ang mga estudyante nga makasabut nga sa dihang gihulagway ni Isaias ang mga lihok sa mga katawhan sa pakigsaad sa Ginoo sa iyang panahon, gihulagway usab niya ang pipila ka mga tawo sa atong panahon. Si Elder Dallin H. Oaks sa Korum sa Napulog Duha ka mga Apostoles mipasabut: “Ang basahon ni Isaias naglangkob sa daghang mga panagna nga morag dunay daghang mga katumanan. … Ang kamatuoran nga daghan niining mga panagna dunay nagkadaiyang mga kahulugan nga naghatag og gibug-aton sa kaimportante sa pagtinguha nato og pinadayag gikan sa Espiritu Santo sa pagtabang nato nga mahubad kini” (“Scripture Reading and Revelation,” Ensign, Ene. 1995, 8).

Sa dili pa magklase, kopyaha ang mosunod nga tsart diha sa pisara o andama kini isip usa ka handout. Pagbilin og igong luna aron kasulatan sa mga estudyante diha sa matag kolum.

	2 Nephi 12:5–12, 17–19; 13:8–9	2 Nephi 13:16–26
Unsa nga mga kinaiya ug mga binuhatan ang nagpakita sa mga sala niining mga tawhana?
Unsa ang mahitabo ngadto niining mga tawhana isip sangputanan sa ilang mga sala?

Ipasabut nga kini nga tsart makatabang sa klase sa pagsusi sa mga sangputanan sa mga lihok sa mga tawo nga nagpakabuhi sukwahi sa ilang mga pakigsaad.

Tungaa ang klase. Hangyoa ang mga estudyante sa pagtuon sa 2 Nephi 12:5–12, 17–19; 13:8–9. Hangyoa ang laing katunga sa pagtuon sa 2 Nephi 13:16–26. Dapita ang mga estudyante sa pagbasa sa mga bersikulo nga gi-assign ngadto nila ug tinuon ang mga tubag sa duha ka pangutana diha sa wala nga kolum sa tsart. Kon ang tsart gi-display diha sa pisara, dapita ang usa ka estudyante gikan sa matag grupo sa pagreport sa ilang mga tubag diha sa tukma nga kolum. Kon ang tsart giapud-apod isip handout, iparekord sa mga estudyante ang ilang mga tubag diha sa ilang mga handout.

Ipasabut ngadto sa ikaduhang grupo nga nakita nang daan ni Isaias ang mga sangputanan sa mahalon nga mga sinina ug mga lihok sa kalibutanong mga babaye sa iyang kaugalingong panahon ug sa umaabut. Ang 2 Nephi 13:16–26 naghulagway sa unsay iyang nakita. Bisan kon piho nga namulong si Isaias sa “mga anak nga babaye sa Zion,” ang iyang mga pulong magamit usab sa mga lalaki. (Mahimo nimong ipasabut nga ang panagna diha sa 2 Nephi 14:1 dili mahitungod sa dinaghan nga kaminyoon. Bahin kini sa kalalakin-an nga nangamatay sa gubat nga gihulagway diha sa 2 Nephi 13:25–26, nga mibiya sa daghang kababayen-an isip mga biyuda.)

Human mahatagi og panahon ang mga estudyante nga makatubag sa mga pangutana diha sa tsart, ipangutana:

Unsa nga mga sala ang nahimo niining mga tawhana? (Ang mga tubag mahimong maglakip sa garbo, pag-ampo sa dios-dios, pagkakalibutanon, ug pagkakawang [vanity].) Unsa nga mga pulong ang nagpakita nga ang mga tawo sad-an niini nga mga sala? Unsa ang mga sangputanan niini nga mga sala?
Naghisgot si Isaias bahin sa dapit nga “puno sa mga dios-dios” (2 Nephi 12:8). Unsa ang pipila ka matang sa pagsimba sa dios-dios karon?

Isip kabahin niini nga panaghisgutan, basaha ang mosunod nga tambag gikan ni Presidente Spencer W. Kimball:

“Ang moderno nga mga larawan sa dios-dios o dili tinuod nga dios mahimo nga sama sa porma og sinina, mga panimalay, mga negosyo, mga makina, mga awto, mga sakyanan sa dagat nga panglulinghayaw, ug daghan pang lain nga mga materyal nga makapahisalaag kanato gikan sa pagkadiosnon. … Daghang batan-on nga mga lalaki ang modesisyon nga moeskwela sa kolehiyo nga angay unta nga magmisyon una sila. Ang degree, ug ang katigayunan ug ang seguridad nga moabut pinaagi niini, makita nga hilabihan kanindot nga ang misyon anaa na lang sa ikaduhang dapit. … Daghan ang mosimba sa pangayam, pamasol, pagbakasyon, mga piknik kada tapos sa semana ug mga paglulinghayaw. Ang uban mga paugnat sa kusog ang ilang dios-dios, baseball, football, pakig-away sa baka [bullfight], o golf. … Sa gihapon ang laing larawan nga gisimba sa tawo mao ang gahum ug pagkainila” (The Miracle of Forgiveness [1969], 40–41).

Gipanagna ni Isaias ang bahin sa mga tawo nga mopakita sa ilang garbo ug pagkakalibutanon pinaagi sa ilang sininaan. Unsaon nato sa pagbantay batok sa kalibutanong mga kinaiya ug mga uso?

Diha sa pisara, isulat ang pulong nga alaot. Ipasabut nga ang pulong nga alaot nagpasabut sa kasubo ug pag-antus. Ang karaang mga propeta migamit usahay niini nga pulong aron sa paghatag og gibug-aton sa mga sangputanan sa sala. (Ang mga estudyante mahimong mahinumdom nga nakakita niini nga pulong nga gibalik-balik diha sa 2 Nephi 9:27–38.) Dapita ang mga estudyante sa pagpaminaw samtang basahon nimo og kusog ang 2 Nephi 15:18–23. (Mahimo nimong awhagon ang mga estudyante nga markahan ang pulong nga alaot ug ang mga pulong nga naghulagway sa mga lihok ug mga kinaiya nga magdala og kasubo ug pag-antus. Mahimo usab nimong isugyot nga isulat nila ang kahulugan sa alaot diha sa margin tupad niining mga bersikulo.)

Unsa man ang kahulugan sa 2 Nephi 15:20 nganha kaninyo?
Sa unsang mga paagi nga nakita ninyo ang mga tawo nga mitawag sa “pagkadautan nga matarung, ug ang pagkamatarung dautan” sa atong panahon?

Sultihi ang mga estudyante nga basahon na nila karon ang bahin sa usa ka pundok sa katawhan nga mituman sa ilang mga pakigsaad. Dapita ang usa ka estudyante sa pagbasa og kusog sa 2 Nephi 14:2–4. Ipapangita sa klase ang paghulagway ni Isaias bahin niining pundok sa katawhan.

Unsa nga mga pulong ang nagpakita nga kini nga pundok lahi kay sa ubang mga pundok nga atong gisusi? (Ikonsiderar ang pagsulat sa mga tubag sa mga estudyante diha sa pisara.)

Hangyoa ang mga estudyante sa pagbasa og hilum sa 2 Nephi 14:5–6, nga mangita sa tulo ka dapit nga nahisgutan ni Isaias nga makahatag og espirituhanong proteksyon. Siguroha nga matino ug masabtan sa mga estudyante ang mga pulong nga pinuy-anan (balay o panimalay), mga katiguman (mga dapit sa kongregasyon, sama sa mga branch, mga ward, o mga stake), ug tabernakulo (templo). Ipasabut nga ang “panganod ug aso sa panahon sa adlaw ug kahayag sa nagsiga nga kalayo sa panahon sa gabii” nagpasabut sa proteksyon ug giya nga nadawat ni Moises ug sa iyang katawhan gikan sa Ginoo didto sa kamingawan (tan-awa sa Exodo 13:21–22). Kini nga mga pulong nagpahinumdom kanato sa proteksyon ug giya nga atong madawat gikan sa Ginoo. Ipasabut usab nga gipahisama ni Isaias ang templo sa usa ka mapanalipdon nga kapasilungan gikan sa init ug sa “tagoanan,” o kapasilungan, gikan sa unos ug sa ulan.

Kanus-a kamo mibati sa proteksyon ug giya sa Ginoo diha sa inyong panimalay o sa simbahan?
Kanus-a kamo nakakita og espirituhanong kahupayan o proteksyon diha sa templo?
Unsa nga matang sa katawhan ang mopuyo sa mga panimalay ug mosimba sa mga simbahan ug mga templo nga gihulagway diha sa mga bersikulo 5–6?
Unsa ang atong mabuhat aron sa paghimo sa atong mga panimalay ug mga branch o mga ward nga mga dapit nga makapanalipod batok sa kalibutan?

I-summarize ang mga kapitulo 12–15 pinaagi sa pagpasabut nga niining mga kapitulo atong makat-unan nga ang pagtuman sa atong mga pakigsaad magdala og mga panalangin sa espirituhanong proteksyon, samtang ang paglapas sa mga pakigsaad mopabilin kanato nga walay proteksyon sa Ginoo. Pasaligi ang mga estudyante nga makahimo sila og kahimtang sa ilang kaugalingong kinabuhi nga gihulagway diha sa 2 Nephi 14:5–6.

2 Nephi 12:1–5; 15:26

Nanagna si Isaias bahin sa mga templo ug sa Simbahan sa Ginoo nga maestablisar sa katapusang mga adlaw

Drowinga sa pisara ang mosunod nga diagram sa usa ka bukid ug usa ka templo:

Unsa ang pipila ka pagkasusama tali sa bukid ug sa templo? (Ang posible nga mga tubag mahimong maglakip nga ang duha parehong halangdon ug talagsaon ug ang duha parehong makapadasig kanato nga mohangad sa langit.)

Hangyoa ang mga estudyante sa pagbasa og hilum sa 2 Nephi 12:2–5, nga mangita sa unsay gisaad sa Dios nga i-establisar sa katapusang mga adlaw ug sa unsang paagi kini makapanalangin sa kinabuhi sa mga tawo.

Unsa ang gipasabut sa termino nga “bukid sa Ginoo”? (Duna kini piho nga pagpasabut ngadto sa Templo sa Salt Lake, apan mahimo usab kining magpasabut ngadto sa laing mga templo nga giestablisar sa Ginoo sa katapusang mga adlaw.)
Unsa ang mga panalangin gikan sa “balay sa Ginoo” sa katapusang mga adlaw? (Usa ka baruganan nga mahimong matino sa mga estudyante mao nga giestablisar sa Dios ang mga templo aron matudloan kita sa Iyang mga pamaagi ug aron matabangan kita nga mosubay sa Iyang mga dalan [tan-awa sa 2 Nephi 12:3].)
Sa unsang paagi nga ang mga templo makatabang kanato nga mosubay sa mga dalan sa Ginoo?

Basaha ang mosunod nga pamahayag diin namulong si Presidente Gordon B. Hinckley bahin sa kamahinungdanon sa mga templo:

“Kining talagsaon ug nindot kaayo nga mga building, ug ang mga ordinansa nga gipangalagad diha niini, nagrepresentar sa atong labing taas nga pagsimba. Kini nga mga ordinansa mahimo nga labing halawom nga mga pagpahayag sa atong teyolohiya. Giawhag nako ang atong mga katawhan sa tanang dapit, uban sa tanang pagdani diin ako makahimo, sa pagpuyo nga takus sa paghupot og usa ka temple recommend, sa pagkuha og usa ug isipon kini nga usa ka mahal nga kabtangan, ug sa paghimo og mas dako nga paningkamot sa pag-adto sa balay sa Ginoo ug dawaton ang espiritu ug ang mga panalangin nga anaa diha niini” (“Of Missions, Temples, and Stewardship,” Ensign, Nob. 1995, 53).

Sa unsa kaha nga paagi nga ang mga templo makatabang nga atong malikayan ang mga sangputanan sa pagkadautan nga gihulagway diha sa 2 Nephi 12–15? (Ang mga tubag mahimong maglakip sa mosunod: Ang paghimo ug pagtuman sa mga pakigsaad sa templo mopalig-on kanato ug sa atong mga pamilya batok sa pagkadautan. Ang regular nga pagsimba diha sa templo nagpahinumdom kanato bahin sa Manluluwas, sa Iyang maulaong sakripisyo, ug sa mga pakigsaad nga atong nahimo. Kon magpuyo kita nga takus nga maghupot og temple recommend, makabaton kita og paglaum alang sa mga panalangin sa kinabuhing dayon. Kana nga paglaum makapadasig kanato nga padayon nga magpakabuhi sa matarung nga paagi.)
Sa unsa nga paagi nga ang templo nakapadasig ug nakapanalangin kaninyo?

Ipabasa og kusog sa usa ka estudyante ang 2 Nephi 15:26. Hangyoa ang klase sa pagtino sa mga pulong nga nagpakita kon unsay “[i]pataas” sa Ginoo aron mopundok sa katawhan sa katapusang mga adlaw. Ipasabut nga ang pulong nga bandila nagpasabut sa usa ka sumbanan, flag, o bandera nga gigamit isip punto sa panagtigum o isip timailhan sa pagtipon, ilabi na sa gubat.

Unsa ang “bandila ngadto sa mga kanasuran” nga gipanagna ni Isaias?

Basaha ang mosunod nga pamahayag ni Presidente Joseph Fielding Smith:

“Kana nga bandila [mao] Ang Simbahan ni Jesukristo sa mga Santos sa Ulahing mga Adlaw, nga naestablisar sa katapusang higayon, nga dili na gayud pagagub-on o ihatag ngadto sa ubang mga tawo. Kadto ang labing mahinungdanon nga panghitabo nga nakita sa kalibutan sukad sa adlaw nga ang Manunubos gilansang sa krus ug mibuhat sa walay kinutuban ug mahangturong pag-ula. Mas dako kini og kahulugan ngadto sa katawhan kay sa bisan unsa nga nahitabo sukad nianang adlawa” (Doctrines of Salvation, 3 vols. [1954–56], 3:254–55).

Sa unsang mga paagi nga Ang Simbahan ni Jesukristo sa mga Santos sa Ulahing mga Adlaw “usa ka bandila ngadto sa mga kanasuran”?
Unsa nga mga panalangin ang miabut sa inyong kinabuhi tungod sa pagkamiyembro ninyo sa Simbahan?
Hunahunaa ang tanang mga panalangin nga inyong nadawat ug ang mga kamatuoran nga inyong nakat-unan isip usa ka miyembro sa Simbahan. Unsa ang usa ka kamatuoran nga inyong mapakigbahin sa uban nga mahimong makatabang kanila nga mapundok sa “bandila ngadto sa mga kanasuran”?

Ipamatuod nga ang Ginoo mipanalangin kanato og dakong tabang nga magpakabuhi nga malampuson sa katapusang mga adlaw. Iyang panalanginan ug balaanon kadtong mopili nga moduol Kaniya. Samtang kita mohimo ug motahud sa mga pakigsaad ngadto Kaniya, motabang Siya kanato nga maglakaw diha sa Iyang mga paagi.

Komentaryo ug Background nga Impormasyon

2 Nephi 12:2–5. “Ang bungtod sa balay sa Ginoo”

Gipasabut ni Presidente Gordon B. Hinckley nga ang 2 Nephi 12:2–5 nagpasabut sa Templo sa Salt Lake:

“Sukad mapahinungod ang Templo sa Salt Lake, atong gihubad kana nga kasulatan sa Isaias … nga alang niining sagrado nga balay sa Ginoo. Ug bahin niining dapita, sukad sa adlaw sa pagpahinungod niini, ang nagkadugang nga gidaghanon gikan sa laing dapit sa kalibutan miingon, “Umari kamo, ug manungas kita sa bukid sa Ginoo, ngadto sa balay sa Dios ni Jacob; ug kita pagatudloan Niya sa Iyang mga dalan, ug manlakat kita sa Iyang mga alagianan’” (“Usa ka Bandila ngadto sa mga Nasud, usa ka Kahayag ngadto sa Kalibutan,” Liahona, Nob. 2003, 82-83).

2 Nephi 13:16–24. “Mga Anak nga Babaye sa Zion”

Gipasabut ni Presidente Joseph Fielding Smith nga ang pasidaan ni Isaias ngadto sa “mga anak nga babaye sa Zion” magamit ngadto sa mga lalaki ingon man usab sa mga babaye:

“Ang mga sumbanan nga gipahayag sa mga General Authority sa Simbahan mao nga ang mga babaye, ingon man usab ang mga lalaki, kinahanglang magsinina og tarung. Gitudloan sila og hustong kinaiya ug tarung nga sininaan sa tanang higayon. Mao kini, sa akong hunahuna, ang usa ka subo nga panglantaw bahin sa ‘mga anak nga babaye sa Zion’ kon dili sila magsinina og tarung. Dugang pa, kini nga pakigpulong dunay kalabutan ngadto sa mga lalaki ingon man usab sa mga babaye. Mihatag ang Ginoo og mga sugo ngadto sa karaang Israel nga ang mga lalaki ug mga babaye kinahanglang motabon sa ilang mga lawas ug motuman sa balaod sa kaputli sa tanang higayon” (Answers to Gospel Questions, comp. Joseph Fielding Smith Jr., 5 vols. [1957–66], 5:174).

Hinumdumi nga kini nga panagna usa ka ehemplo sa dualismo. Nagamit kini sa mga tawo sa panahon ni Isaias, ug magamit usab kini sa mga tawo karon.