Leksyon 145
Ether 3
Pasiuna
Nagtubag sa pangutana sa Ginoo—“Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan?”—ang igsoong lalaki ni Jared miandam og napulog unom ka mga bato ug mapainubsanong mihangyo sa Ginoo sa paghikap niini “nga sila mahimo nga mohayag diha sa ngitngit” (Ether 2:23; 3:4). Tungod sa kahugot sa pagtuo sa igsoong lalaki ni Jared, iyang nakita ang tudlo sa Manluluwas nga mihikap sa mga bato. Dayon ang Ginoo mipakita sa iyang Kaugalingon ngadto sa igsoong lalaki ni Jared ug mipadayag og daghan nga mga butang. Ang Ginoo misugo sa igsoong lalaki ni Jared sa pagsulat sa unsay iyang nakita ug nadungog ug sa pagsilyo niini nga mga sinulat hangtud nga gusto na sa Ginoo nga motungha kini.
Mga Sugyot alang sa Pagtudlo
Ether 3:1–20
Ang Ginoo mihikap sa mga bato aron sa paghatag og kahayag sa mga kasko sa mga Jaredite ug mipakita sa iyang Kaugalingon ngadto sa igsoong lalaki ni Jared
Dapita ang usa ka estudyante nga maoy mahimong tigsulat. Dayon pangutan-a ang mga estudyante sa mosunod ug hangyoa ang tigsulat nga ilista ang mga tubag sa mga estudyante diha sa pisara.
-
Unsa ang pipila ka butang nga kinasingkasing nga giampo sa mga tin-edyer?
Hangyoa ang mga estudyante sa paghunahuna nga usa sa ilang mga higala nag-ampo alang sa usa sa mga butang nga gilista diha sa pisara. Kini nga higala gustong masayud unsaon nga mapalambo ang iyang mga pag-ampo ug mga buhat aron makadawat sa tabang ug giya sa Ginoo. Awhaga ang mga estudyante sa paghunahuna niini nga hangyo samtang magtuon sila sa ehemplo sa igsoong lalaki ni Jared diha sa Ether 3, nga mangita og mga ideya nga mahimo nilang ipakigbahin sa ilang higala.
Pahinumdumi ang mga estudyante nga sa miaging leksyon, naghisgut sila kabahin sa istorya sa igsoong lalaki ni Jared nga mihangyo sa Ginoo mahitungod sa paagi sa pagbutang og kahayag sa mga kasko sa mga Jaredite.
-
Unsa ang gibuhat sa igsoong lalaki ni Jared aron makatabang sa paghatag og kahayag alang sa mga kasko? (Tan-awa sa Ether 3:1.)
-
Unsa ang gihangyo sa igsoong lalaki ni Jared nga buhaton sa Ginoo aron makahatag og kahayag? (Tan-awa sa Ether 3:1, 4.)
-
Unsay ganahan ninyo sa mga paningkamot sa igsoong lalaki ni Jared?
Ipasabut nga ang igsoong lalaki ni Jared mihimo og dakong paningkamot sa pag-andam sa mga bato. Dayon dapita ang mga estudyante sa pagkonsiderar kon unsa kaepektibo ang mga bato sa paghatag og kahayag kon wala pa kini hikapa sa Ginoo. Dapita ang mga estudyante sa pagbasa og hilum sa Ether 3:2–5, nga mangita sa mga pulong nga nagpasabut nga ang igsoong lalaki ni Jared nahibalo sa iyang pagdepende sa Ginoo.
Human mahatagi og panahon ang mga estudyante nga makabasa, ipares-pares sila. Hangyoa sila sa pagreport sa ilang mga nasayran ngadto sa usag usa. Isugyot usab nga ilang ipakigbahin ang unsay ilang ganahan kabahin sa pag-ampo sa igsoong lalaki ni Jared.
Samtang magbasa ang mga estudyante sa Ether 3:2, tingali aduna silay mga pangutana mahitungod sa mga pulong nga “kami dili takus sa imong atubangan” ug “ang among mga kinaiyahan nahimo nga mangil-ad sa kanunay.” Tabangi sila nga makasabut nga sa diha nga ang igsoong lalaki ni Jared migamit niini nga mga pulong, iyang gipasabut ang kahimtang nga atong napanunod “tungod sa pagkapukan.” Nahibulag kita sa Dios sa pisikal ug espirituhanong paagi, ug dugang natong gipalayo ang atong kaugalingon gikan Kaniya kon kita makasala. Kon itandi Kaniya, kita huyang ug dili angay. Kon wala ang Iyang tabang, dili gayud kita makabalik sa pagpuyo diha sa Iyang presensya.
Aron matabangan ang mga estudyante nga mas makasabut sa kahulugan sa mga bersikulo nga ilang gibasa, ipangutana ang mosunod:
-
Ngano kaha nga importanting makaamgo kita nga nagdepende kita sa Ginoo kon mangayo kita sa Iyang tabang?
-
Diha sa Ether 3:1–5, unsa nga ebidensya ang inyong nakita nga ang igsoong lalaki ni Jared adunay hugot nga pagtuo nga ang Ginoo makatabang kaniya sa pagsulbad sa iyang problema? (Kon gikinahanglan, awhaga ang mga estudyante sa pagpangita og mga pulong nga naghulagway sa paningkamot sa igsoong lalaki ni Jared ug sa mga pulong nga nagpakita sa iyang pagsalig sa Ginoo.)
Aron mahatagan og gibug-aton ang gahum sa hugot nga pagtuo sa igsoong lalaki ni Jared, hangyoa ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
“Sigurado nga ang Dios, ingon man usab ang mambabasa, makabantay sa katalagsaon sa daw bata nga kainosente ug kadasig sa pagtuo niining tawhana. ‘Tan-awa, O Ginoo, ikaw makahimo niini.’ Tingali wala nay mas gamhanan nga usa ka linya nga pamahayag sa hugot nga pagtuo nga gipamulong sa tawo diha sa kasulatan. … Bisan unsa pa ka dili sigurado ang propeta kabahin sa iyang kaugalingong abilidad, wala siyay pagduha-duha mahitungod sa gahum sa Dios” (“Rending the Veil of Unbelief,” in Nurturing Faith through the Book of Mormon: The 24th Annual Sidney B. Sperry Symposium [1995], 12).
Ipakita ang litrato nga Ang Igsoon nga Lalaki ni Jared Nakakita sa Tudlo sa Ginoo (62478; Libro sa mga Hulagway sa Ebanghelyo [2009], nu. 85). Dapita ang usa ka estudyante sa pagbasa sa Ether 3:6. Hangyoa ang klase sa pagsunod ug sa paghunahuna kon sama sa unsa alang sa igsoong lalaki ni Jared ang kasinatian nga narekord niini nga bersikulo.
-
Unsay inyong mahunahuna o bation kon aduna kamoy kasinatian nga susama niadtong sa igsoong lalaki ni Jared?
I-summarize ang Ether 3:6–8 pinaagi sa pagpasabut nga sa dihang ang igsoong lalaki ni Jared nakakita sa tudlo sa Ginoo, siya “natumba sa atubangan sa Ginoo” (Ether 3:6). Nasurprisa siya nga makita nga ang tudlo sa Ginoo “ingon sa tudlo sa usa ka tawo, sama ngadto sa unod ug dugo” (Ether 3:6). (Ang igsoong lalaki ni Jared sa wala madugay nakakat-on nga iyang nakita ang usa ka bahin sa espiritu nga lawas sa Ginoo [tan-awa sa Ether 3:16].)
Dapita ang mga estudyante sa pagbasa og hilum sa Ether 3:9, nga mangita sa rason nganong ang igsoong lalaki ni Jared nakakita sa tudlo sa Ginoo.
Human makatubag ang mga estudyante, isulat sa pisara ang mosunod nga dili kompleto nga pamahayag:
Kon mapainubsanon kitang mangamuyo sa Ginoo, mopanalangin Siya kanato sumala sa atong … ug Iyang kabubut-on.
Hangyoa ang mga estudyante sa pagsugyot og mga pulong nga mahimong gamiton sa pagkompleto niini nga pamahayag. Ang mga estudyante kinahanglang mosugyot nga ang pulong hugot nga pagtuo mokompleto sa sentence. Mahimo usab silang mosugyot og mga pulong sama sa mga paningkamot, pagpaubos, panginahanglan, ug sinseridad. Tabangi sila nga makakita nga kining tanan nga mga pulong nagrepresentar og mga pahayag sa atong hugot nga pagtuo. Dayon kompletuha ang pamahayag sa pisara: Kon mapainubsanon kitang mangamuyo sa Ginoo, mopanalangin Siya kanato sumala sa atong hugot nga pagtuo ug sa Iyang kabubut-on.
Balik ngadto sa lista diha sa pisara sa pagsugod sa leksyon. Pagpili og usa o duha ka mga item gikan sa lista. Dapita ang mga estudyante sa pagpakigbahin sa ilang mga hunahuna kon unsaon sa usa ka tawo sa pagpakita og hugot nga pagtuo diha sa Ginoo niadtong piho nga mga sitwasyon. Human mopakigbahin ang mga estudyante, balik ngadto sa baruganan nga bag-o lang nimong gisulat sa pisara.
-
Unsa nga mga kasinatian ang inyong nasinati nga nakatabang kaninyong masayud nga tinuod kini nga baruganan?
Aron matabangan ang mga estudyante nga magamit kini nga baruganan diha sa ilang mga kinabuhi, dapita sila sa paghunahuna og sitwasyon diin magkinahanglan sila sa tabang sa Ginoo. Hatagi sila og panahon sa pagsulat diha sa mga notebook o mga scripture study journal mahitungod sa usa ka paagi nga makapakita sila og dugang pagtuo samtang mapainubsanon silang magtinguha sa tabang sa Ginoo. Awhaga ang mga estudyante sa pagbuhat sa unsay ilang gisulat. Mahimo kang mopakigbahin og imong kasinatian sa dihang nakadawat ka og mga panalangin tungod kay mipakita ka og hugot nga pagtuo sa Ginoo.
Dapita ang usa ka estudyante sa pagbasa sa mosunod nga pamahayag, diin si Elder Jeffrey R. Holland mipasabut nga ang atong nangagi nga mga kasinatian makalig-on sa atong pagtuo.
“Ang pasiuna nga pagtuo mahulma pinaagi sa nangagi nga mga kasinatian—pinaagi sa nasayran, nga naghatag og basihanan sa pagtuo” (Christ and the New Covenant: The Messianic Message of the Book of Mormon [1997], 18).
-
Sugod diha sa Tore sa Babel, unsa ang pipila ka mga kasinatian sa igsoong lalaki ni Jared nga malagmit nakapalig-on sa iyang pagtuo sa Ginoo? Sa unsang paagi kaha kini nga mga kasinatian miandam kaniya sa pagpakita og ingon ka hugot nga pagtuo sa dihang gidala niya ang mga bato ngadto sa Ginoo?
Dapita ang mga estudyante sa pagpares-pares ug sa paghisgot sa mosunod nga mga pangutana:
-
Unsa nga mga kasinatian ang nakapalig-on sa inyong pagtuo sa Ginoo? Sa unsang paagi kadto nga mga kasinatian moandam kaninyo sa paggamit unya og mas hugot nga pagtuo diha sa inyong kinabuhi?
Dapita ang pipila ka mga estudyante nga magpuli-puli sa pagbasa og kusog sa Ether 3:9–12. Hangyoa ang klase sa pagsunod. Dayon ipangutana ang mosunod:
-
Sa dihang nangutana ang Ginoo “Motuo ba ikaw sa mga pulong diin ako mamulong?” ang igsoong lalaki ni Jared miingon, “Oo, Ginoo” (Ether 3:11–12). Ngano kaha nga mahinungdanon nga ang igsoong lalaki ni Jared mopasalig nga motuo sa mga pulong sa Ginoo sa wala pa siya makadungog niini?
Ipasabut nga human si Elder Holland mitudlo mahitungod sa pagtuo nga gibase sa nangaging mga kasinatian, mitudlo siya mahitungod sa mas kompleto nga pagtuo nga kinahanglan natong mapalambo. Dapita ang usa ka estudyante sa pagbasa og kusog sa mosunod nga pamahayag ni Elder Holland:
“Ang makaluwas nga pagtuo kinahanglang gamiton kanunay sa umaabut nga mga kasinatian—sa wala mahibaloi, nga naghatag og oportunidad alang sa milagruso. Ang higpit nga pagtuo, makapalihok og bukid nga pagtuo, pagtuo nga susama sa igsoong lalaki ni Jared, mag-una sa milagro ug sa kahibalo. … Ang hugot nga pagtuo mao ang pag-uyon nga walay kondisyon—ug mag-una—sa bisan unsang mga kondisyon nga mahimong kinahanglanon sa Dios sa hapit na ug sa layo pa nga umaabut.
“Ang pagtuo sa igsoong lalaki ni Jared kompleto” (Christ and the New Covenant, 18–19).
Awhaga ang mga estudyante sa pagkonsiderar kon aduna ba silay igong hugot nga pagtuo sa Ginoo aron mopasalig nga motuo ug mosunod sa unsay Iyang ipadayag ngadto kanila bisan kon wala pa kini Niya mapadayag.
Dapita ang mga estudyante sa pagbasa og hilum sa Ether 3:13–20, nga mangita sa panalangin nga nadawat sa igsoong lalaki ni Jared tungod sa iyang hugot nga pagtuo. Mahimo kang mohatag kanila og panahon sa pagsulat mahitungod sa mga kamatuoran nga iyang nakat-unan ug sa iyang kasinatian. Kon ang mga estudyante aduna nay igong panahon nga makasulat, ikonsiderar ang pagdapit og pipila kanila sa pagpakigbahin sa ilang gisulat.
Sa sayong bahin niini nga leksyon, sa dihang nabasa sa mga estudyante ang mahitungod sa igsoong lalaki ni Jared nga nakakita sa tudlo sa Ginoo, nangutana ka kon unsay ilang bation kon sila adunay susama nga kasinatian. Karon, human sila dugang nga nakabasa mahitungod sa kasinatian sa igsoong lalaki ni Jared, mahimo nimong ikonsiderar ang pagpangutana niadto pag-usab.
Ipamatuod nga samtang mopakita kita og hugot nga pagtuo nga susama sa igsoong lalaki ni Jared, mas mapaduol kita sa Ginoo.
Ether 3:21–28
Ang Ginoo misugo sa igsoong lalaki ni Jared sa pagsulat sa mga butang nga iyang nakita ug sa pagsilyo sa iyang rekord
Dapita ang usa ka estudyante sa pagbasa sa Ether 3:25–26, ug hangyoa ang klase sa pag-ila kon unsay gipakita sa Ginoo sa igsoong lalaki ni Jared diha sa panan-awon. Dapita ang mga estudyante sa pagreport sa unsay ilang nakat-unan.
I-summarize ang Ether 3:21–24, 27–28 pinaagi sa pagpasabut nga ang Ginoo misugo sa igsoong lalaki ni Jared sa pagsulat sa mga butang nga iyang nakita ug nadungog ug sa pagsilyo sa iyang mga sinulat. Ang Ginoo mipasabut usab nga Siya moandam og paagi aron ang mga sinulat sa igsoong lalaki ni Jared mahubad sa umaabut—pinaagi sa duha ka mga bato. Kini nga mga bato nalakip sa unsay gitawag nga Urim ug Thummim (tan-awa sa D&P 17:1; tan-awa usab sa Giya ngadto sa mga Kasulatan, “Urim ug Thummim”).
Tapusa pinaagi sa pag-awhag sa mga estudyante sa paggamit sa unsay ilang nakat-unan karon—sa pagtinguha og mga paagi nga mapakita ang ilang hugot nga pagtuo ug pagsalig sa Ginoo. Ipakigbahin ang imong pasalig nga samtang kita mopakita og hugot nga pagtuo kang Jesukristo, ang Dios mopanalangin kanato sama sa Iyang pagpanalangin sa igsoong lalaki ni Jared.
Komentaryo ug Background nga Impormasyon
Ether 3:7, 9. Ang Ginoo nangutana ngadto sa igsoong lalaki ni Jared
Ang Ginoo nangutana sa igsoong lalaki ni Jared: “Tindog, ngano nga ikaw natumba?” (Ether 3:7). “Nakakita ba ikaw og labaw pa niini? (Ether 3:9). Ang mga kasulatan naglakip og daghang mga ehemplo nga nangutana ang Ginoo bisan og nahibalo na Siyang daan sa mga tubag. Si Elder Jeffrey R. Holland sa Korum sa Napulog Duha ka mga Apostoles mitudlo nganong ang Ginoo nangutana sa ingon nga mga pangutana:
“Usa ka nag-unang pasikaran sa teyolohiya sa Santos sa Ulahing mga Adlaw nga ang Dios ‘nasayud sa tanan nga mga butang, ug walay butang nga siya wala mahibalo.’ [2 Nephi 9:20.] Ang mga kasulatan, karaan ug moderno, puno niining panghimatuod sa pagkasayud sa tanan. Bisan pa niana, ang Dios kanunayng nangutana sa mga mortal, sa kasagaran isip paagi sa pagsulay sa ilang pagtuo, pagsukod sa ilang pagkamatinuoron, o pagpalambo sa ilang kahibalo” (Christ and the New Covenant: The Messianic Message of the Book of Mormon [1997], 19–20).
Ether 3:15. “Wala pa gayud Ako makapakita sa akong kaugalingon ngadto sa tawo”
Si Elder Jeffrey R. Holland sa Korum sa Napulog Duha ka mga Apostoles mipresentar og posible nga pagpasabut sa pamahayag ni Jesus nga wala pa gayud Siya makapakita sa iyang Kaugalingon ngadto sa tawo sa wala pa magpakita sa iyang Kaugalingon ngadto sa igsoong lalaki ni Jared:
“Si Kristo nagsulti sa igsoong lalaki ni Jared, ‘Wala pa gayud Ako makapakita sa akong kaugalingon ngadto sa tawo niining paagiha, nga dili akong kabubut-on, nadasig lamang sa hugot nga pagtuo sa magtatan-aw.’ Sa kinatibuk-an, ang mga propeta dapiton ngadto sa presensya sa Ginoo, paanhaon niya sa iyang presensya ug pinaagi lamang sa iyang pagtugot. Ang igsoong lalaki ni Jared, sa laing bahin, morag mipugos sa iyang kaugalingon lapus sa tabil, dili isip usa ka wala mauyuni nga bisita apan tingali sa teknikal nga paagi isip wala gidapit nga bisita. … Klaro nga ang Ginoo mismo mikonektar sa walay sama nga pagtuo ngadto niining walay sama nga panan-awon. Kon ang panan-awon mismo dili talagsaon, nan ang hugot nga pagtuo gayud ug ang paagi sa pag-angkon sa panan-awon ang walay sama. Ang bugtong paagi nga ang hugot nga pagtuo nahimong talagsaon kaayo mao ang abilidad niini nga madala ang propeta, nga wala gidapit, ngadto sa dapit diin ang uban nakaadto lamang sa pagbuot sa Dios” (Christ and the New Covenant: The Messianic Message of the Book of Mormon [1997], 23).
Ether 3:16. “Kini nga lawas … mao ang lawas sa akong espiritu”
Si Elder Cecil O. Samuelson sa Seventy mipasabut og maayo nga pinaagi sa istorya sa igsoong lalaki ni Jared, nakat-on kita mahitungod sa premortal nga lawas ug pagkadios sa Manluluwas:
“Walay laing dapit diha sa mga kasulatan nga adunay mas klaro nga istorya sa kinaiya sa espiritu nga lawas ni Ginoong Jesukristo ug, sa pagkatinuod, sa mga kinaiya sa atong kaugalingong mga espiritu. Ang igsoong lalaki ni Jared wala lamang makakita sa tudlo sa antemortal nga Jesukristo apan sa pagkatinuod nakakita sa Iyang tibuok espiritu nga lawas (tan-awa sa Ether 3:6, 13). Ang pagsabut sa premortal nga pagkadios ni Jesukristo uban sa atong kaugalingong espirituhanong pagkatawo sa wala pa kita gipanganak sa pisikal nga lawas usa ka dakong panalangin ug bintaha. Kini nga mga panabut nga milapas sa naandang mga utlanan maoy direktang resulta sa walay utlanang pagtuo sa igsoong lalaki ni Jared” (“The Brother of Jared,” sa Heroes from the Book of Mormon [1995], 185).
Ether 3:23–24. “Kining duha ka mga bato”
Ang duha ka mga bato nga gihatag sa Ginoo ngadto sa igsoong lalaki ni Jared nalakip sa unsay gitawag nga Urim ug Thummim. Ang mga kasulatan naghisgot og sobra sa usa ka Urim ug Thummim, apan gipahibalo kita nga ang gigamit sa igsoong lalaki ni Jared mao ang anaa kang Joseph Smith (tan-awa sa Ether 3:22–28; D&P 10:1; 17:1). Sa Joseph Smith—Kasaysayan 1:35, si Propeta Joseph Smith mihatag og dili kompleto nga paghulagway niini nga Urim ug Thummim. Iyang kining gigamit sa paghubad sa Basahon ni Mormon ug sa pag-angkon og ubang mga pagpadayag.