Mormon 8:12–Ether 3 (Unit 29)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante sa dihang gitun-an nila ang Mormon 8:12–Ether 3 (unit 29) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (Mormon 8:12–41)

Ang mga estudyante nakadiskubre nga si Moroni nakakita sa atong panahon ug nga siya misulat og mapanagnaon nga paghulagway sa mga kahimtang diin kita nagpuyo. Ilang nakita nganong ang Basahon ni Mormon usa ka bililhon nga gasa gikan sa Ginoo nga makagiya kanila hangtud sa katapusang mga adlaw. Base sa paghulagway ni Moroni sa katapusang mga adlaw, ang mga estudyante nakakat-on usab nga ang Dios mopatubag kanato kon giunsa nato pagtratar ang mga kabus ug ang mga timawa.

Day 2 (Mormon 9)

Si Moroni mitapos sa rekord sa iyang amahan pinaagi sa pagsangyaw nga kon kita maghinulsol ug motawag sa Dios, mamahimo kitang walay lama kon moadto na kita sa Iyang atubangan. Gikan ni Moroni, ang mga estudyante nakakat-on nga tungod kay ang Dios dili mausab, Siya mohatag og mga milagro sumala sa pagtuo sa Iyang mga anak ug kon kita mag-ampo diha sa hugot nga pagtuo ngadto sa Langitnong Amahan sa pangalan ni Jesukristo, mohatag Siya kanato og mga panalangin nga motabang kanato sa pagpaningkamot sa atong kaluwasan.

Day 3 (Ether 1–2)

Ang mga estudyante nakakat-on nga ang basahon ni Ether mao ang minubo ni Moroni sa 24 ka mga palid nga bulawan nga nadiskubrihan sa mga tawo ni Limhi, sumala sa narekord diha sa basahon ni Mosiah. Kini nga mga palid miistorya kabahin sa mga Jaredite, kinsa gigiyahan sa Ginoo ngadto sa gisaad nga yuta. Pinaagi sa pagtuon sa mga kasinatian sa mga Jaredite, ang mga estudyante nakakat-on nga kon kita molihok pinaagi sa hugot nga pagtuo diha sa direksyon nga gihatag sa Ginoo kanato, makadawat kita og dugang nga giya gikan Kaniya. Sa usa ka higayon atol sa panaw paingon sa gisaad nga yuta, ang Ginoo mipanton sa igsoong lalaki ni Jared tungod sa kapakyas sa pagtawag Kaniya. Pinaagi sa pagtuon niini nga kasinatian, ang mga estudyante nakakat-on sa kaimportante sa kanunay nga pagtawag sa Langitnong Amahan diha sa pag-ampo. Ang kasinatian sa igsoong lalaki ni Jared uban sa Ginoo sa dihang naghimo sa mga kasko nakatabang sa mga estudyante nga mahibalo nga kon kita mosangpit sa Ginoo ug mohimo sa atong bahin sa pagsulbad sa atong mga problema, makadawat kita sa tabang sa Ginoo.

Day 4 (Ether 3)

Samtang ang igsoong lalaki ni Jared naningkamot sa pagsulbad sa problema sa paghatag og kahayag diha sa mga kasko, iyang gipakita nga kon kita mapainubsanong mosangpit sa Ginoo, Siya mopanalangin kanato sumala sa atong pagtuo ug sa Iyang kabubut-on. Ang mga estudyante nakakat-on nga samtang mopakita kita og hugot nga pagtuo sa Ginoo, mas magkaduol kita Kaniya. Ang igsoong lalaki ni Jared misunod niini nga mga baruganan, ug iyang nakita ang espiritu nga lawas sa Manluluwas ug ang usa ka talagsaon nga panan-awon sa tanang lumulupyo sa yuta.

Pasiuna

Ang basahon ni Ether mao ang pinamubo ni Moroni sa Jaredite nga rekord. Si propeta Ether mihimo niini nga rekord diha sa 24 ka mga palid nga bulawan, nga nadiskubrihan sa usa ka grupo sa katawhan ni Haring Limhi. Ang mosunod nga ideya sa pagtudlo motabang sa mga estudyante nga makasabut sa pipila ka mga baruganan mahitungod sa pag-ampo nga gitudlo diha sa Ether 1.

Mga Sugyot alang sa Pagtudlo

Ether 1

Pinaagi sa mga pag-ampo sa igsoong lalaki ni Jared, siya ug ang iyang pamilya ug mga higala nakadawat og kalooy ug giya

Sugdi ang klase pinaagi sa paghangyo sa mga estudyante sa paghunahuna og sitwasyon nga ilang nasinati nga gibati gayud nila ang panginahanglan nga mag-ampo alang sa panabang. Dapita ang pipila ka mga estudyante sa pagpakigbahin sa ilang mga kasinatian, o ipakigbahin ang usa sa imong kaugalingong mga kasinatian.

Pahinumdumi ang mga estudyante nga ang basahon ni Ether mao ang pinamubo ni Moroni sa rekord sa mga Jaredite. Si Jared, ang iyang igsoong lalaki, ilang mga higala, ug ang ilang mga pamilya nagpuyo sa panahon sa Tore sa Babel (gibana-bana nga 2200 B.C.), dihang ang Dios milibug sa pinulongan sa katawhan. Dapita ang usa ka estudyante sa pagbasa og kusog sa Ether 1:33–35, ug hangyoa ang mga sakop sa klase sa pagpangita og mga rason nganong si Jared ug ang iyang igsoong lalaki mibati sa panginahanglan nga mag-ampo alang sa panabang. Sa dili pa mobasa ang estudyante, mahimo nimong ipasabut nga ang mga pulong nga “pangamuyo ngadto sa Ginoo” maoy laing paagi sa pagsulti sa “pag-ampo.” Dayon pangutan-a sa mosunod:

Unsa nga tabang ang gikinahanglan ni Jared ug sa iyang igsoong lalaki gikan sa Ginoo?
Unsa ang gisulti niini nga mga bersikulo kaninyo mahitungod sa gibati ni Jared sa pagtuo sa iyang igsoong lalaki?

Ipares-pares ang mga estudyante. Dapita ang matag pares nga magpuli-puli sa pagbasa og kusog ngadto sa usag usa gikan sa Ether 1:35–42. Sa dili pa sila mobasa, hangyoa sila sa pagpangita sa (1) matag higayon nga ang igsoong lalaki ni Jared nangamuyo ngadto sa Ginoo ug (2) matag higayon nga ang Ginoo mipakita og kalooy ngadto sa igsoong lalaki ni Jared isip resulta sa iyang mga pag-ampo. Human sa igong panahon, dapita ang pipila ka parisan sa pagpakigbahin og usa ka ehemplo sa Ginoo nga nagpakita og kalooy ngadto sa igsoong lalaki ni Jared ug sa iyang pamilya tungod sa ilang balik-balik nga mga pag-ampo.

Pangutana: Unsa nga mga baruganan ang atong makat-unan mahitungod sa pag-ampo gikan niini nga mga bersikulo? (Samtang ang mga estudyante mopakigbahin sa mga baruganan nga ilang nailhan, ipasabut og maayo ang mosunod nga baruganan: Samtang makanunayon kitang mangamuyo ngadto sa Dios diha sa hugot nga pagtuo, Siya magbaton og kalooy ngari kanato. Isulat kini nga baruganan diha sa pisara.)

Ipasabut sa mga estudyante nga importanting mahinumduman nga ang “pag-ampo mao ang lihok diin ang kabubut-on sa Amahan ug ang kabubut-on sa anak mapahiangay sa usag usa. Ang tumong sa pag-ampo dili ang pag-usab sa kabubut-on sa Dios, apan ang pag-angkon alang sa atong kaugalingon ug sa uban sa mga panalangin nga andam na nga ihatag sa Dios, apan sa kondisyon nga kita mangayo niini” (Bible Dictionary, “Prayer”).

Dapita ang mga estudyante sa pagribyu sa Ether 1:34, 36, 38 ug sa pagpangita kon unsay gihangyo sa igsoong lalaki ni Jared sa iyang mga pag-ampo. Hangyoa ang usa ka estudyante sa paglista sa mga butang nga nahibaloan sa mga estudyante ubos sa mga pulong nga “mangamuyo ngadto sa Dios” sa baruganan nga imong gisulat sa pisara.

Hatagig gibug-aton nga si Jared ug ang iyang igsoong lalaki adunay hugot nga pagtuo ug andam nga magmasulundon sa Ginoo. Isugyot nga markahan sa mga estudyante ang mga pulong nga “magmatinud-anon kita ngadto sa Ginoo” sa katapusan sa Ether 1:38.

Dapita ang mga estudyante sa pagribyu sa Ether 1:35, 37, 40–42 ug sa pagpangita sa piho nga mga paagi nga ang Dios mipanalangin sa igsoong lalaki ni Jared ug sa iyang pamilya ug mga higala. Samtang ang mga estudyante nag-ila niini nga mga panalangin, ipasulat kini sa usa ka estudyante ubos sa pulong nga kalooy sa baruganan nga imong gisulat sa pisara. Ipasabut nga ang Ginoo mihatag sa igsoong lalaki ni Jared sa mga panalangin nga iyang giampo.

Isulat ang mosunod nga mga pangutana diha sa pisara, o andama kini diha sa usa ka handout. Hangyoa ang mga estudyante nga mo-refer ngadto sa baruganan nga gisulat sa pisara ug, diha sa ilang parisan, hisgutan ang mga pangutana. Kini nga mga pangutana makatabang kanila nga makasabut ug mobati sa kaimportante sa baruganan.

Sa unsang paagi kaha ang “pangamuyo ngadto sa Dios” lahi kay sa “pagsulti lang og pag-ampo”?

Kanus-a kamo o tawo nga inyong kaila nakasinati sa kalooy sa Langitnong Amahan agig tubag sa usa ka pag-ampo?

Unsay inyong makat-unan mahitungod sa Ginoo gikan sa Iyang mga tubag sa mga pag-ampo sa igsoong lalaki ni Jared?

Human ang mga estudyante aduna nay panahon sa paghisgot niini nga mga pangutana, mahimo nimo silang hangyuon sa pagpakigbahin og kasinatian nga ilang gihisgutan diha sa ilang mga grupo o sa pagpakigbahin og mga panabut gikan sa ilang panaghisgot.

Ipakigbahin ang imong pagpamatuod sa gugma sa Langitnong Amahan alang kanato ug sa Iyang tinguha sa pagpanalangin kanato kon kita kanunay nga motawag Kaniya. Dapita ang mga estudyante nga ikonsiderar kon unsaon nila sa paggamit sa baruganan nga anaa sa pisara. Sama pananglit, mahimo silang maghimo og tumong nga mas kanunay nga mag-ampo o mopili og usa ka paagi aron mahimong mas sinsero ang ilang mga pag-ampo. Mahimo nimo silang hatagan og panahon sa pagsulat kon unsay gusto nilang buhaton diha sa ilang mga scripture study journal.

Ipasabut nga ang pagtuon sa mga pag-ampo sa igsoong lalaki ni Jared makahatag kanato og dugang nga panabut ngadto sa gugma sa Dios alang kanato ug sa mga panalangin nga moabut pinaagi sa pag-ampo. Dapita ang usa ka estudyante sa pagbasa og kusog sa Ether 1:43. Hangyoa ang klase sa pagsunod, nga mangita sa dugang nga panalangin nga gisaad sa Dios kang Jared ug sa iyang igsoong lalaki. Human ang mga estudyante moreport sa unsay ilang nakat-unan, ipasabut nga ang igsoong lalaki ni Jared wala gayud mag-ampo alang sa panalangin nga ang iyang kaliwatan mahimong usa ka bantugan nga nasud. Mahimo nimong isugyot nga markahan sa mga estudyante sa ilang mga kasulatan ang mga pulong sa katapusan sa Ether 1:43 nga nagpakita nganong ang Dios mitubag sa pag-ampo sa igsoong lalaki ni Jared niini nga paagi: “tungod niining taas nga panahon nga ikaw nangamuyo ngari kanako.”

Pangutana: Unsa nga mga baruganan ang atong makat-unan gikan sa pagkamanggihatagon sa Ginoo ngadto ni Jared ug sa iyang igsoong lalaki, sama sa gipakita sa Ether 1:43?

Adunay pipila ka mga baruganan nga makat-unan gikan niini nga kasulatan. Usa ka importante nga baruganan mao ang: Kon kanunay kitang mag-ampo sa Dios uban sa hugot nga pagtuo, makadawat kita og mga panalangin nga sobra pa sa atong gihangyo.

Pangutana: Kanus-a kamo nakabaton og kasinatian nga nagpakita nga kini nga baruganan tinuod? Nakaila ba kamo og tawo nga adunay ingon niana nga kasinatian, o makahunahuna ba kamo og tawo diha sa mga kasulatan nga aduna niana? (Sultihi ang mga estudyante nga hatagan nimo sila og panahon sa paghunahuna og mga ehemplo sa dili ka pa mohangyo kanila sa pagtubag. Mahimo ka usab nga mopakigbahin og ehemplo sa kaugalingon nimong kinabuhi.)

Sa pagtapos niini nga leksyon, ipakigbahin ang imong pagpamatuod nga ang Dios maminaw ug motubag sa atong mga pag-ampo. Puno Siya sa kaalam ug kalooy ug mahimuot sa pagpanalangin sa Iyang mga anak. Mahimuot Siya kon sinsero ug kanunay kita nga mag-ampo Kaniya. Awhaga ang mga estudyante nga maningkamot sa pag-ampo nga adunay mas hugot nga pagtuo. Awhaga sila sa paghinumdom nga ang Langitnong Amahan puno sa kalooy ug motubag sa ilang mga pag-ampo sumala sa unsay Iyang nahibaloan nga makahatag og labing dakong mga panalangin sa ilang mga kinabuhi.

Sunod nga Unit (Ether 4–12)

Sa sunod nga unit, ang mga estudyante makakat-on pa mahitungod sa mga Jaredite. Bisan og ang mga propeta mipasidaan sa mga Jaredite nga dili motudlo og mga hari, ang katawhan mibuhat gihapon niini, ug ang mga hari midala sa katawhan ngadto sa pagkabihag. Ang mga tawo nga nagtinguha og kalibutanong gahum kasagaran mogamit sa tinago nga mga kalihokan sa pagpalambo sa ilang hakog nga mga tinguha. Girekord ni Moroni ang daghang kahibulongan nga mga butang nga nahimo tungod kay pipila sa mga tawo adunay hugot nga pagtuo. Mitudlo siya nga kadtong magpaubos sa ilang mga kaugalingon sa atubangan sa Dios ug magbaton og hugot nga pagtuo diha Kaniya makadawat sa Iyang grasya nga makatabang nila sa pagbuntog sa ilang kahuyang.