Leksyon 149: Ether 12:1–22

Leksyon 149

Ether 12:1–22

Pasiuna

Human mosaysay sa daghang katuigan sa kasaysayan sa mga Jaredite, si Moroni mipaila sa pagpangalagad ni propeta Ether. Si Moroni dayon mihunong sa istorya sa kasaysayan aron morekord sa pipila ka mga panalangin nga moabut niadtong mopakita og hugot nga pagtuo kang Jesukristo. Kini nga leksyon naglangkob sa Ether 12:1–22, samtang ang leksyon 150 naghisgot sa Ether 12:23–41.

Mga Sugyot alang sa Pagtudlo

Ether 12:1–4

Si Ether misangyaw og paghinulsol ngadto sa mga Jaredite

Sugdi ang klase pinaagi sa pagdapit og usa ka estudyante sa pagduol sa pisara ug pagdrowing og mga balud ug usa ka sakayan nga gihigot sa angkla.

Nganong importante man sa sakayan nga adunay angkla?
Unsa kaha nga mga kuyaw o kalisdanan ang masugatan sa sakayan kon kini walay angkla?
Unsa man ang impluwensya sa mga balud sa usa ka sakayan? (Ang mga tubag mahimong maglakip nga ang mga balud makahimo sa sakayan nga mabalhin-balhin, maanod, o magtuyatuya.)

Sulati ang sakayan sa mga pulong imong kinabuhi.

Kon ang sakayan nagrepresentar sa atong mga kinabuhi, sa unsa makumpara ang mga balud? (Ang mga tubag mahimong maglakip sa sosyal nga pagpamugos, kalisdanan, sayop nga mga pagtulun-an, o pagkadautan.)
Sa unsang paagi nga ang kinabuhi sa tawo sama sa usa ka sakayan nga walay angkla? (Mahimo nimong isugyot nga ang mga estudyante mobasa sa Mormon 5:17–18 sa pagtabang kanila sa pagtubag niini nga pangutana.)
Unsa ang pipila ka butang nga gihatag sa Ginoo nga magsilbing espirituhanon nga mga angkla sa atong mga kinabuhi? (Ang mga estudyante mahimong mohatag og lain-laing mga tubag. Daghang mga aspeto sa ebanghelyo makumpara sa usa ka angkla.)

Awhaga ang mga estudyante sa pagpangita og mga ehemplo sa espirituhanong mga angkla samtang magtuon sila sa Ether 12.

Ipasabut nga ang Ether 12 nagsugod sa pagpaila ni Moroni kang Ether, usa ka Jaredite nga propeta kinsa nagsangyaw sa panahon nga ang katawhan misalikway sa mga propeta ug nagpuyo diha sa pagkadautan. Dapita ang mga estudyante sa pagbasa og hilum sa Ether 12:1–3, nga ideterminar ang bisan unsa nga ilang ganahan sa mga gibuhat ni Ether. Ipareport kanila kon unsay ilang nakit-an.

Dapita ang usa ka estudyante sa pagbasa og kusog sa Ether 12:4. Hangyoa ang klase sa pagsunod, nga ideterminar kon unsay “[malauman]” niadtong nagtuo sa Dios bisan kon gilibutan sa mga kalisdanan ug pagkadautan. Samtang nagtubag ang mga estudyante, mahimo nimong ipasabut nga ang “maayo nga kalibutan” nga angay natong lauman mao ang “usa ka dapit diha sa tuo nga kamot sa Dios.”

Unsay gipasabut nga adunay dapit diha sa tuo nga kamot sa Dios? (Makabalik sa Iyang presensya ug makadawat og kinabuhing dayon.)
Sa unsang paagi kaha nga ang pagbaton og paglaum “uban sa kasiguroan” lahi kay sa pagpangandoy lang og usa ka butang? (Sa mga kasulatan, ang paglaum nagpasabut sa pagbaton og pagsalig nga atong madawat ang mga panalangin nga gisaad sa Dios kanato kon motuman kita sa atong mga pakigsaad Kaniya.)
Sumala sa Ether 12:4, unsaon nato nga makabaton og paglaum nga makadawat og usa ka dapit diha sa tuo nga kamot sa Dios? (Samtang motubag ang mga estudyante, ipasabut nga ang hugot nga pagtuo nga gihisgutan diha sa Ether 12:4 nagpasabut sa hugot nga pagtuo kang Jesukristo.) Sa unsang paagi nga ang hugot nga pagtuo kang Jesukristo nagtugot kanato nga molaum “uban sa kasiguroan” alang sa usa ka dapit diha sa tuo nga kamot sa Dios?

Sa pisara, sulati ang angkla sa mga pulong nga hugot nga pagtuo ug paglaum.

Sumala sa Ether 12:4, unsay mahitabo kon ang tawo adunay paglaum ug hugot nga pagtuo kang Jesukristo? (Bisan og ang mga estudyante tingali motubag gamit ang lahi nga mga pulong, kinahanglang mapahayag nila ang mosunod nga baruganan: Kon aduna kitay paglaum ug hugot nga pagtuo kang Jesukristo, mamahimo kitang makanunayon ug puno kita sa maayong mga buhat.)
Unsa kaha ang gipasabut sa “puno” sa maayo nga mga buhat? (Nagbuhat og daghang maayo nga mga butang.)
Unsa ang pipila ka maayong mga buhat nga “[nag]himaya sa Dios”? (Ang mga tubag mahimong maglakip sa pag-ampo, pagtuon sa kasulatan, pagserbisyo sa uban, ug pagpalambo og mga talento.)
Paghunahuna og mga tawo nga inyong nailhan kinsa daw kanunay nga puno sa maayo nga mga buhat ug dili maulaw mohimaya sa Dios. Unsa ang pipila ka piho nga mga butang nga ilang gibuhat nga nakapahimo kanila nga maayo nga mga ehemplo niini nga baruganan?

Dapita ang mga estudyante sa pagpamalandong og mga panahon nga lisud alang kanila nga magmakanunayon ug mapuno sa maayo nga mga buhat. Aron matabangan ang mga estudyante nga maandam alang sa susama nga mga sitwasyon sa tibuok nilang mga kinabuhi, awhaga sila sa pagpangita og mga paagi nga madugangan nila ang ilang pagtuo ug paglaum samtang nagpadayon sila sa pagtuon sa Ether 12.

Ether 12:5–22

Si Moroni misaysay sa mga milagro ug gamhanang mga buhat nga miabut pinaagi sa hugot nga pagtuo

Isulat ang mosunod nga mga pulong diha sa pisara: Gusto ko nga makabaton og espirituhanong saksi nga …

Dapita ang mga estudyante sa pagsugyot og bisan unsa nga mga kamatuoran sa ebanghelyo, mga baruganan, o mga doktrina nga ang mga tawo magtinguha og espirituhanon nga saksi. Samtang nagtubag ang mga estudyante, isulat sa pisara ang ilang mga tubag. (Ang mga tubag mahimong maglakip og usa ka saksi nga ang Basahon ni Mormon tinuod; ang pagpuyo og limpyo ug mahiyason nga kinabuhi importante; ang Pulong sa Kaalam usa ka balaod sa Dios; kinahanglan kong mangandam nga moserbisyo og misyon.) Dapita ang mga estudyante sa paghunahuna og usa ka kamatuoran sa ebanghelyo diin gusto nilang madawat ang espirituhanong saksi o mas lig-on nga pagpamatuod.

Ipasabut nga ang ubang mga tawo aduna sa mosunod nga kinaiya: “Dili ko motuo o mopuyo sumala sa usa ka baruganan sa ebanghelyo hangtud makakita ko og ebidensya nga kini tinuod.” Dapita ang mga estudyante sa pagbasa og hilum sa Ether 12:5–6, nga mangita kon sa unsang paagi kini nga mga bersikulo may kalabutan ngadto niini nga kinaiya. Ipasabut nga ang Ether 12:6 usa ka scripture mastery passage. Mahimo nimong isugyot nga ang mga estudyante momarka niini nga tudling sa lahi nga paagi aron dali nila kining madumduman.

Sumala sa Ether 12:6, unsay kinahanglan gayud nga mahitabo sa dili pa kita makadawat og usa ka saksi?
Unsay mosulod sa inyong hunahuna kon maghunahuna kamo sa mga pulong nga “pagsulay sa inyong hugot nga pagtuo”?

Human makatubag ang mga estudyante, mahimo nimong ipasabut nga ang pipila ka mga tawo sayop nga mohubad sa “pagsulay sa hugot nga pagtuo” nga kanunayng nagpasabut og kalisdanan. Ang mga pulong nga “pagsulay sa hugot nga pagtuo” mahimong mohulagway sa bisan unsa nga naghatag kanato og oportunidad nga mapakita o magamit ang atong hugot nga pagtuo kang Jesukristo. Aron sa pagtabang sa mga estudyante nga makaangkon og panabut niini nga mga pulong, dapita ang usa ka estudyante sa pagbasa og kusog sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Sa dili pa basahon ang pamahayag, hangyoa ang klase sa pagpaminaw sa pagpasabut ni Elder Scott sa mga pulong nga “pagsulay sa hugot nga pagtuo.”

“Makakat-on kamo sa paggamit sa hugot nga pagtuo sa mas epektibong paagi pinaagi sa paggamit niini nga baruganan nga gitudlo ni Moroni: ‘… kay kamo dili makadawat og saksi hangtud human sa pagsulay sa inyong hugot nga pagtuo’ [Ether 12:6; italics gidugang]. Mao nga, matag higayon nga inyong sulayan ang inyong hugot nga pagtuo, buot ipasabut nga, takus nga mobuhat sa usa ka impresyon, makadawat kamo sa mapamatud-anong ebidensya sa Espiritu. Kana nga mga pagbati makapalig-on sa inyong pagtuo. Sa inyong pagsubli niana nga sumbanan, ang inyong pagtuo mahimong mas lig-on” (“Ang Maabagon nga Gahum sa Hugot nga Pagtuo sa Walay Kasigurohan nga mga Panahon ug Pagsulay,” Ensign o Liahona, Mayo 2003, 76).

Sa unsang paagi ang proseso nga gihulagway ni Elder Scott lahi kay sa mga kinaiya niadtong gusto og ebidensya sa dili pa sila motuo o molihok?

Isulat sa pisara ang mosunod nga mga pakisayran sa kasulatan: Ether 12:7–12; Ether 12:13–18; Ether 12:19–22, 30–31. Bahina ang klase ngadto sa tulo ka grupo, ug i-assign ang usa sa mga tudling sa kasulatan sa matag grupo. Hangyoa ang mga estudyante sa pagpangita og mga panalangin nga miabut isip resulta sa hugot nga pagtuo sa mga tawo nga gihulagway diha sa matag tudling. Awhaga sila nga timan-an ang paggamit sa mga pulong “human sila makabaton og hugot nga pagtuo” o “hangtud human sa ilang hugot nga pagtuo” diha sa mga bersikulo 7, 12, 17, 18, ug 31. (Mahimo nimong isugyot nga markahan sa mga estudyante kini nga mga pulong sa matag higayon nga kini makita.)

Human ang mga estudyante mireport sa unsay ilang nakit-an, dapita sila sa pag-summarize kon unsay gihatag sa Ginoo human kita mopakita og hugot nga pagtuo kang Jesukristo. Bisan og ang mga estudyante mahimong mogamit og lahi nga mga pulong, kinahanglang mopahayag sila og usa ka kamatuoran nga susama sa mosunod: Kon magtinguha kita og espirituhanong saksi, nan kinahanglan gayud kitang mopakita usa og hugot nga pagtuo kang Jesukristo. Ipasabut nga sama gayud sa espirituhanong mga saksi, ang mga milagro dili moabut hangtud human kita mopakita sa atong hugot nga pagtuo.

Ipresentar ang mosunod nga mga sitwasyon ngadto sa klase. Dapita ang mga estudyante sa pagpasabut kon sa unsang paagi ang tawo sa matag sitwasyon makapakita og hugot nga pagtuo diha sa Ginoo.

Usa ka batan-ong babaye gusto nga makadawat og pagsaksi sa kamatuoran sa Basahon ni Mormon.
Usa ka batan-ong lalaki adunay dakong tinguha sa pagtabang sa iyang mga minahal nga modawat sa ebanghelyo.

Dapita ang mga estudyante sa pagpamalandong og panahon dihang sila o ang mga tawo nga ilang kaila nakadawat og espirituhanong mga saksi o mga milagro human mopakita og hugot nga pagtuo sa Ginoo. Dapita ang pipila ka mga estudyante sa pagpakigbahin sa mga kasinatian nga ilang gihunahuna. (Siguroa nga ang mga estudyante nakasabut nga dili sila obligado nga mopakigbahin og mga kasinatian nga personal o pribado ra kaayo.) Mahimong ikaw usab gustong mopakigbahin og usa ka kasinatian.

Dapita ang mga estudyante sa paghinumdom sa kamatuoran sa ebanghelyo nga gusto nilang makadawat og espirituhanon nga saksi. Dapita sila sa pagsulat diha sa mga notebook o mga scripture study journal og butang nga ilang mabuhat aron makapakita og mas hugot nga pagtuo diha sa Ginoo.

Scripture Mastery—Ether 12:6

Aron matabangan ang mga estudyante nga makasag-ulo sa Ether 12:6, dapita ang matag estudyante sa pagsulat sa bersikulo diha sa usa ka piraso nga papel, nga dili iapil ang importanting mga pulong ug pulihan og blangko nga luna diha sa ilang dapit. Kon mahuman na sila, hatagi ang mga estudyante og usa ka minuto nga mosulay sa pagsag-ulo sa bersikulo, tubagon diha sa ilang mga hunahuna ang mga blangko sa ilang mga papel.

Hangyoa ang mga estudyante sa pagbinayloay og mga papel sa tawo nga duol kanila. Ang matag estudyante kinahanglang mobasa og kusog sa iyang bag-o nga papel, sulayan sa pagtubag ang mga blanko gikan sa panumduman. Kon aduna pay panahon, ipausab sa mga estudyante ang kalihokan pinaagi sa pagbinayloay og usab sa mga papel.

Dapita ang mga estudyante nga dad-on ang ilang mga papel sa pagpauli ug gamiton kini sa pag-recite sa Ether 12:6 ngadto sa usa ka ginikanan. Awhaga sila sa pagpangutana sa ilang mga ginikanan mahitungod sa panahon nga sila mipakita og hugot nga pagtuo kang Jesukristo ug nakadawat og saksi o milagro nga ilang gitinguha.

Tapusa pinaagi sa pagpamatuod mahitungod sa mga baruganan nga gitudlo niini nga leksyon.

Komentaryo ug Background nga Impormasyon

Ether 12:4–6. Unsa ang paglaum?

Sa Ether 12, ang mga pagtulun-an ni Moroni kabahin sa mga baruganan sa paglaum ug hugot nga pagtuo nagpakita nga ang duha konektado kaayo. Iyang gipatin-aw ang hugot nga pagtuo isip “mga butang nga gilauman ug dili makita” (Ether 12:6) ug gitudlo nga ang atong paglaum alang sa kaluwasan “moabut pinaagi sa hugot nga pagtuo” kang Jesukristo (Ether 12:4). Ang booklet nga Matinud-anon sa Tinuhoan nagtudlo sa mosunod kabahin sa paglaum:

“Kon aduna kitay paglaum, mosalig kita sa mga saad sa Dios. Aduna kitay hilum nga kasiguroan nga kon kita mohimo og ‘mga buluhaton sa pagkamatarung,’ kita ‘makadawat sa [atong] ganti, gani ang kalinaw niini nga kalibutan, ug kinabuhi nga dayon diha sa kalibutan nga umaabut’ (D&P 59:23). … Ang baruganan sa paglaum moabut pa ngadto sa kahangturan, apan makatabang usab kini kanimo agi sa inadlaw-adlaw nga mga hagit” (Matinud-anon sa Tinuhoan: Usa ka Pakisayran sa Ebanghelyo [2004], 85–86).

Si Presidente Dieter F. Uchtdorf mihulagway sa paglaum sama sa mosunod:

“Ang paglaum usa ka gasa sa Espiritu. [Tan-awa sa Moroni 8:26.] Kini usa ka paglaum nga pinaagi sa Pag-ula ni Jesukristo ug sa gahum sa Iyang Pagkabanhaw, kita mabuhi ngadto sa kinabuhing dayon, ug kini tungod sa atong hugot nga pagtuo sa Manluluwas. [Tan-awa sa Moroni 7:41.] Kini nga matang sa paglaum usa ka prinsipyo sa saad, maingon man usab nga usa ka sugo [tan-awa sa Mga Taga-Colosas 1:21–23], ug, ingon sa tanan nga mga sugo, kita adunay responsibilidad sa paghimo niini nga buhing bahin sa atong mga kinabuhi ug pagbuntog sa tintasyon nga mawad-an og paglaum. Ang paglaum diha sa maloloy-ong plano sa kalipay sa atong Langitnong Amahan nagdala og kalinaw [tan-awa sa Mga Taga-Roma 15:13], kalooy [tan-awa sa Salmo 33:22], pagmaya [tan-awa sa Mga Taga-Roma 12:12], ug kalipay. [Tan-awa sa Mga Proverbio 10:28.] Ang paglaum sa kaluwasan sama sa usa ka panalipod nga helmet [tan-awa sa 1 Mga Taga-Tesalonica 5:8]; kini ang pundasyon sa atong hugot nga pagtuo [tan-awa sa Mga Hebreohanon 11:1; Moroni 7:40] ug angkla sa atong mga kalag. [Tan-awa sa Mga Hebreohanon 6:19; Ether 12:4.]” (“Ang Walay Kinutoban nga Gahum sa Paglaum,” Ensign o Liahona, Nob. 2008, 21–22).

Ether 12:6. “Pagsulay sa inyong hugot nga pagtuo”

Si Presidente Gordon B. Hinckley misaysay og istorya nga naghulagway sa baruganan sa pagdawat og saksi human sa pagsulay sa atong hugot nga pagtuo:

“Tuguti ko nga moistorya kaninyo kabahin sa usa ka babaye sa São Paulo, Brazil. Nagtrabaho siya samtang nag-eskwela aron makasangkap sa iyang pamilya. Gamiton nako ang kaugalingon niyang mga pulong sa pagsulti niini nga istorya. Nag-ingon siya:

“Ang unibersidad diin ako nag-eskwela dunay regulasyon nga nagpugong sa mga estudyante nga dunay utang sa pagkuha sa mga eksamin. Tungod niini, kon modawat ko sa akong sweldo lainon nako daan ang kwarta alang sa ikapulo ug mga halad, ug ang nahibilin igahin sa pagbayad sa eskwelahan ug ubang gastuhan.

“‘Nakahinumdom ko og panahon nga ako … nagsagubang og grabeng pinansyal nga kalisud. Huwebes kadto sa dihang nadawat nako ang akong sweldo. Dihang akong gikwenta ang binulan nga badyet, nakabantay ko nga dili kini paigo nga ibayad [sa] akong ikapulo ug sa akong unibersidad. Kinahanglang mopili ko og usa. Ang kada duha ka bulan nga eksamin sugdan na pagkasunod semana, ug kon dili ko makakuha niini mausik ang akong school year. Grabe ang akong kaguol. … Nagsakit ang akong dughan. Duna koy sakit nga desisyon nga buhaton, ug wala ko masayud unsay pilion. Naghunahuna ko tali sa duha ka mga pagpili: mobayad sa ikapulo o i-risgo ang posibilidad nga dili makaangkon sa gikinahanglang mga kridito aron maaprubahan sa eskwelahan.

“‘Kini nga pagbati misanap sa akong kalag ug nagpabilin kanako hangtud sa Sabado. Didto akong nahinumduman nga sa dihang gibunyagan ko miuyon ko nga mosunod sa balaod sa ikapulo. Akong giangkon sa akong kaugalingon ang usa ka obligasyon, dili sa mga misyonaryo, apan sa akong Langitnong Amahan. Nianang higayuna, ang kaguol misugod sa pagkahanaw, nga gipulihan sa nindot nga pagbati sa kalinaw ug determinasyon. …

“‘Nianang gabhiuna sa akong pag-ampo, nangayo ko og pasaylo sa Ginoo tungod sa akong pagduha-duha. Pagka-Dominggo, sa wala pa magsugod ang sakrament miting, gikontak nako ang bishop, ug uban sa dakong kalipay mibayad ko sa akong ikapulo ug mga halad. Espesyal kadto nga adlaw. Gibati nako ang kalipay ug kalinaw sulod sa akong kaugalingon ug sa Langitnong Amahan.

“‘Pagkasunod adlaw didto ko sa akong opisina; nangita ko og paagi nga makakuha sa mga eksamin nga sugdan na sa Miyerkules. Sa pagsige nako og hunahuna, gibati nako nga nagkalayo ang solusyon. …

“‘Hapit na matapos ang oras tingtrabaho sa dihang miduol ang akong amo ug mihatag sa katapusang mga sugo nianang adlawa. Pagkahuman niya og himo niini, nanamilit siya nga nagbitbit sa iyang briefcase. … Sa kalit lang, mihunong siya, ug nangutana siya nga nagtan-aw kanako, “Kumusta man ang imong pag-eskwela sa kolehiyo?” Nasurprisa ko, ug dili ko makatuo sa akong nadungog. Ang bugtong nakong natubag uban sa nagkurog nga tingog mao ang, “Maayo ra man!” Mahunahunaon siyang mitan-aw kanako ug nanamilit pag-usab. …

“‘Kalit lang nga misulod sa kwarto ang sekretarya, nag-ingon nga swerte kaayo ko nga tawo! Sa dihang ako siyang gipangutana kon ngano, yano siyang mitubag: “Ang amo bag-o lang miingon nga sugod karong adlawa ang kompaniya na ang hingpit nga mobayad sa imong pag-eskwela sa kolehiyo ug sa imong mga libro. Sa dili pa ka mobiya, hapit sa akong lamesa ug pahibaloa ko sa bayrunon aron mahatagan ko ikaw sa tseke ugma.”

“‘Human siya mibiya, naghilak ug mibati og hilabihan ka mapainubsanon, miluhod ko diha sa akong nahimutangan ug nagpasalamat sa Ginoo sa Iyang pagkamanggihatagon. Ako … misulti sa Langitnong Amahan nga dili kinahanglang mopanalangin Siya kanako pag-ayo. Nagkinahanglan ra ko sa kantidad sa usa ka bulan nga bayranan, ug ang ikapulo nga akong gibayad sa Dominggo gamay ra kaayo kon itandi sa kantidad nga akong nadawat! Atol niana nga pag-ampo ang mga pulong nga narekord sa Malaquias misantop sa akong hunahuna: ‘Sulayi ninyo ako karon, nagaingon ang Ginoo, kon dili ba buksan ko kaninyo ang mga tamboanan sa langit, ug buboan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini’ (Mal. 3:10). Hangtud nianang higayona wala nako sukad mabati ang gidak-on sa saad nga anaa niana nga kasulatan ug nga kini nga sugo tinuod gayud nga saksi sa gugma nga gihatag sa Dios, atong Langitnong Amahan, ngadto sa Iyang mga anak dinhi sa yuta’”(“We Walk by Faith,” Ensign, Mayo 2002, 73–74).

Ether 12:6. “Kamo dili makadawat og saksi hangtud human sa pagsulay sa inyong hugot nga pagtuo”

Si Presidente Spencer W. Kimball mitudlo:

“Tungod kay tawhanon kita, atong gusto nga tangtangon gikan sa atong kinabuhi ang pisikal nga kasakit ug mental nga pag-antus ug siguroon sa atong kaugalingon ang padayon nga kasayon ug kaharuhay, apan kon atong sirhan ang mga pultahan alang sa mga kasub-anan ug kasakit, basin masirhan sab nato og apil ang atong mga higala ug mga tawo nga makatabang nato. Ang pag-antus makahimong santos sa mga tawo samtang sila magkat-on og pasensya, pagkamainantuson, ug kahanas sa kaugalingon” (Mga Pagtulun-an sa mga Presidente sa Simbahan: Spencer W. Kimball [2006], 19].