Leksyon 150

Ether 12:23–41

Pasiuna

Diha sa mapainubsanong pag-ampo, si Moroni mipahayag og kabalaka. Nabalaka siya mahitungod sa kahuyang nga iyang nabantayan diha sa iyang mga sinulat ug sa mga sinulat sa ubang mga propeta sa Basahon ni Mormon. Ang Ginoo mitubag uban sa saad sa paglig-on niadtong magpaubos sa ilang mga kaugalingon ug magbaton og hugot nga pagtuo Kaniya.

Mga Sugyot alang sa Pagtudlo

Ether 12:23–41

Si Moroni mitudlo nga ang hugot nga pagtuo, paglaum, ug gugmang putli mahinungdanon sa kaluwasan

Isulat ang pulong nga lig-on sa usa ka bahin sa pisara ug ang pulong nga huyang sa pikas nga bahin sa pisara. Hatagi og panahon ang mga estudyante sa pagpamalandong kon unsay gibati nila nga ilang mga kalig-on. Dayon dapita sila sa paghunahuna og pipila sa ilang mga kahuyang o mga kakulangan. Hangyoa sila sa pagpataas sa ilang mga kamot kon gusto nilang mausab ang ilang mga kahuyang ngadto sa mga kalig-on. Ipasabut nga si Moroni mitudlo kon nganong aduna kitay mga kahuyang ug unsaon nato sa pagbuntog niini.

Dapita ang usa ka estudyante sa pagbasa og kusog sa Ether 12:23–25. Hangyoa ang klase sa pagsunod, nga ilhon ang kahuyang nga gibati ni Moroni nga aduna siya ug ang ubang mga tigsulat sa Basahon ni Mormon. Sa dili pa mobasa ang mga estudyante, mahimo nimong ipasabut nga ang pulong nga Hentil niini nga mga bersikulo nagpasabut sa mga tawo nga mopuyo sa Hentil nga mga nasud sa ulahing mga adlaw.

• Unsay gikabalak-an ni Moroni nga mahitabo tungod sa kahuyang niadtong mga misulat sa Basahon ni Mormon?

Dapita ang mga estudyante sa pagbasa og hilum sa tubag sa Ginoo sa kabalaka ni Moroni diha sa Ether 12:26–27. Hangyoa sila sa pagpangita og usa ka rason nganong ang Dios naghatag kanato og mga kahuyang. Ipasabut nga ang Ether 12:27 usa ka scripture mastery passage. Mahimo nimong awhagon ang mga estudyante sa pagmarka niini nga tudling sa lahi nga paagi aron dali nila kining madumduman.

Ang Ether 12:27 usa ka scripture mastery passage. Dangup ngadto sa mga ideya sa pagtudlo diha sa katapusan sa leksyon aron sa pagtabang sa mga estudyante sa ilang pagsag-ulo niini nga tudling.

Aron matabangan ang mga estudyante nga mas makasabut sa pulong nga kahuyang sa paagi nga kini gigamit niini nga mga bersikulo, hangyoa ang usa ka estudyante sa pagbasa sa mosunod nga pamahayag ni Elder Neal A. Maxwell sa Korum sa Napulog Duha ka mga Apostoles. Sa dili pa basahon ang pamahayag, hangyoa ang klase sa pagpaminaw sa duha ka matang sa kahuyang nga gihisgutan ni Elder Maxwell.

Elder Neal A. Maxwell

“Kon makabasa kita diha sa mga kasulatan kabahin sa ‘kahuyang’ sa tawo, kini nga pulong naglakip sa … kahuyang nga anaa na sa kinatibuk-ang tawhanong kahimtang diin ang pisikal nga lawas adunay grabe ka walay hunong [o kanunay] nga epekto diha sa espiritu (tan-awa sa Ether 12:28–29). Ang kahuyang naglakip usab, hinoon, sa atong piho, tagsa-tagsa nga mga kahuyang, diin gilauman kita nga makabuntog (tan-awa sa D&P 66:3; Jacob 4:7). Ang kinabuhi adunay paagi sa pagpakita niini nga mga kahuyang” (Lord, Increase Our Faith [1994], 84).

• Sumala ni Elder Maxwell, unsang duha ka matang sa tawhanong kahuyang ang atong mabasa sa mga kasulatan? (Tingali kinahanglan nimong ipasabut nga ang mga pulong nga “kinatibuk-ang tawhanong kahimtang” nagpasabut sa kahuyang nga miresulta gikan sa Pagkapukan ni Adan ug Eva o, sa laing pagkasulti, ang mga kahuyang nga may kalabutan sa “kinaiyanhon nga tawo” nga gihisgutan sa Mosiah 3:19.)

Pahinumdumi ang mga estudyante nga ang mga kasulatan usahay mopaila og usa ka baruganan pinaagi sa paggamit sa mga pulong nga kon ug niana. Ang pulong nga kon nagpaila og butang nga kinahanglan gayud natong buhaton, ug ang niana nagpaila og pagpasabut kon unsay mahitabo isip resulta sa atong mga lihok. Dapita ang mga estudyante nga hilum nga moribyu sa Ether 12:27, nga mangita sa “kon-niana” nga mga baruganan nga gitudlo niini nga bersikulo. Ang mga estudyante kinahanglang mahibalo sa mosunod nga mga baruganan (isulat kini sa pisara):

Kon kita moduol kang Jesukristo, niana Siya mopakita kanato sa atong kahuyang.

Kon magpaubos kita sa atong kaugalingon ug magpakita og hugot nga pagtuo sa Ginoo, niana Siya mohimo sa mahuyang nga mga butang nga mahimong lig-on ngari kanato.

• Ngano kaha nga importante alang kanato nga makaila sa atong mga kahuyang?

• Itudlo ang mga pulong nga “moduol kang Jesukristo” sa unang baruganan. Unsa ang pipila ka butang nga atong mahimo aron “moduol kang Jesukristo”? (Ang mga tubag mahimong maglakip nga kita makaampo, makapuasa, makahinulsol, makatuon sa mga kasulatan, makaapil sa pagsimba didto sa templo, makaserbisyo sa uban, ug magtinguha sa pagpalambo og Kristohanong mga hiyas. Mahimo nimong ipasabut nga sa kasagarang mga higayon, ang pagbuntog sa usa ka kahuyang nagpasabut nga agig dugang sa pagtinguha sa tabang sa Ginoo, kinahanglan gayud natong buhaton ang atong bahin.)

• Unsay gipasabut sa ikaduhang baruganan nga mahitabo kon kita dili mopili sa pagpaubos sa atong mga kaugalingon ug pagpakita og hugot nga pagtuo kang Jesukristo? (Ang atong mga kahuyang magpabilin tungod kay gibalibaran nato ang grasya sa Ginoo nga motabang kanato sa pagbuntog niini.)

• Unsa kaha ang gipasabut sa mga pulong nga “ang akong grasya igo alang sa tanan … nga magpaubos sa ilang mga kaugalingon sa akong atubangan”? (Aron matabangan ang mga estudyante sa pagtubag niini nga pangutana, tingali kinahanglan nimong ipasabut nga ang grasya mao ang “diosnon nga panabang o kalig-on, gihatag pinaagi sa buhong nga kalooy ug gugma ni Jesukristo” ug nahimong posible pinaagi sa Pag-ula [Bible Dictionary, “Grace”]. Kining makaabag nga gahum, o tabang, dili gayud mahurot—bisan unsa pa ka daghan ang mga tawo nga mogamit niini.)

Dapita ang mga estudyante sa pagpakigbahin sa ilang mga kasinatian dihang ang Ginoo mitabang kanila (o tawo nga ilang kaila) sa pagbuntog sa usa ka kahuyang. (Pahinumdumi ang mga estudyante nga kinahanglang dili sila mopakigbahin og mga kasinatian nga personal o pribado ra kaayo.) Mahimo ka usab nga mopakigbahin og kaugalingon nimong kasinatian.

Awhaga ang mga estudyante sa pagpakigbahin og espirituhanong mga kasinatian

Makasalig ka nga ang imong mga estudyante adunay espirituhanong mga kasinatian nga ipakigbahin. Si Presidente J. Reuben Clark Jr. sa Unang Kapangulohan miobserbar, “Walay batan-on nga moagi sa inyong seminary … nga pultahan nga wala makabenepisyo sa espirituhanong mga panalangin, … makakita sa kaepektibo sa pag-ampo, … makasaksi sa gahum sa hugot nga pagtuo sa pag-ayo sa masakiton, o … makakita sa mga pagpadayag sa espiritu diin ang kalibutan sa kinatibuk-an walay alamag karon” (The Charted Course of the Church in Education, rev. ed. [1994], 6; tan-awa usab sa si.lds.org).

Aron sa pag-awhag sa paggamit sa mga baruganan nga gitudlo sa Ether 12:27, isulat ang mosunod nga mga pulong sa pisara:

1. Moila sa akong kahuyang 2. Magpaubos sa akong kaugalingon 3. Magpakita og hugot nga pagtuo kang Jesukristo

Dapita ang mga estudyante sa pagsulat niini nga mga pulong diha sa ilang mga notebook o scripture study journal. Ubos sa tukma nga mga pulong, dapita sila sa pagsulat og (1) usa ka kahuyang nga gibati nila nga aduna sila, (2) usa ka paagi nga magpaubos sila sa ilang mga kaugalingon, ug (3) usa ka paagi nga makapakita sila og hugot nga pagtuo kang Jesukristo aron makadawat sila sa Iyang panabang, o grasya, sa pagbuntog sa kahuyang nga ilang gilista. Pasaligi ang mga estudyante nga samtang ilang buhaton ang unsay ilang gisulat, ang Ginoo “mohimo sa mahuyang nga mga butang nga mahimo nga malig-on ngadto kanila” (Ether 12:27).

Dapita ang mga estudyante sa pagbasa og hilum sa Ether 12:26, 28, nga mangita kon unsay dugang nga tubag sa Ginoo sa mga kabalaka ni Moroni kabahin sa iyang kahuyang.

Ipasabut ang pamahayag nga “Ang mga buang mobiay-biay apan sila gayud magbangutan” (Ether 12:26).

• Base sa unsay atong natun-an karon, ngano kaha nga binuang man ang pagbiay-biay sa mga kahuyang sa uban?

Ipasabut nga ang Ether 12:26 naghisgot og kaaghup. (Mahimo nimong ipasabut nga ang pagkahimong maaghup mao ang pagkamapainubsanon ug pagkamatudloan ug mapailubon sa mga panahon sa pag-antus.)

• Ngano kaha nga kinahanglan natong magmaaghup aron dili motutok sa mga kahuyang sa uban?

Sa dili pa mopadayon, ipasabut og maayo nga kon kita maaghup, atong madawat ang grasya sa Ginoo sa pagtabang kanato nga dili motutok sa mga kahuyang sa uban.

I-summarize ang Ether 12:29–32 pinaagi sa pagpasabut nga si Moroni mitudlo sa kaimportante sa pagpakita og hugot nga pagtuo ug pagbaton og paglaum ug gugmang putli. Mahimo nimong ipasabut nga “ang gugma nga putli mao ang tiunay nga gugma ni Kristo” (Moroni 7:47).

Dapita ang mga estudyante sa pagbasa og hilum sa Ether 12:33–35, nga mangita sa mga rason nganong importante nga mopakita og gugmang putli kon mag-atubang sa mga kahuyang sa uban.

• Sumala sa Ether 12:34, unsa ang sangputanan nga atong atubangon kon wala kitay gugma nga putli?

Sa pagtapos, dapita ang mga estudyante sa pagbasa og hilum sa Ether 12:38–41. Hangyoa sila sa pagsulat diha sa mga notebook o mga scripture study journal kabahin sa unsay ilang gibuhat sa pagtubag sa pagdapit nga narekord sa Ether 12:41—“[Pangitaa kini] nga Jesus diin ang mga propeta ug mga apostoles misulat.”

Pagpamatuod nga samtang magmapainubsanon kita ug magpakita og hugot nga pagtuo kang Jesukristo, Siya “mohimo sa mahuyang nga mga butang nga mahimo nga malig-on [ngari kanato]” (Ether 12:27). Awhaga ang mga estudyante sa pagbuhat sa mga plano nga ilang gisulat. Mahimo usab nimo silang awhagon sa pagpangayo sa tabang sa Ginoo sa pagpakita og gugma nga putli kon sila mag-atubang sa mga kahuyang sa uban.

Scripture Mastery—Ether 12:27

Aron matabangan ang mga estudyante nga makasag-ulo sa Ether 12:27, isulat ang mosunod nga mga pulong diha sa pisara ug dapita ang mga estudyante sa pagkopya niini sa usa ka piraso nga papel:

Kon … moduol … mopakita … kahuyang … mohatag … kahuyang … magpaubos … grasya … tanan nga mga tawo … magpaubos … kon … magpaubos … hugot nga pagtuo … mahuyang … malig-on.

Hangyoa ang mga estudyante sa pagbasa og hilum sa Ether 12:27, nga timan-an kini nga mga pulong. Dayon dapita sila sa pag-recite sa bersikulo kutob sa gidaghanon nga ilang mahimo, nga magtan-aw lamang sa mga pulong diha sa ilang mga papel. Awhaga ang mga estudyante nga ibutang ang piraso sa papel sa dapit nga makit-an nila unya o ugma (sama pananglit, diha sa bulsa o sa ilang mga kasulatan). Dapita sila nga ribyuhon ang Ether 12:27 matag higayon nga ilang makit-an ang piraso sa papel hangtud nga masag-ulo na nila ang tudling.

Komentaryo ug Background nga Impormasyon

Ether 12:27. “Ako mopakita ngadto kanila sa ilang kahuyang”

Si Elder Bruce C. Hafen sa Seventy mipasabut nga ang atong panlimbasug aron mabuntog ang kahuyang mahinungdanon sa atong katuyoan dinhi sa yuta:

“Ang plano sa atong Amahan magpaubos kanato sa tintasyon ug kaalaot niining napukan nga kalibutan. …

“Mao nga kon kamo adunay mga problema sa inyong kinabuhi, ayaw hunahunaa nga adunay sayop diha kaninyo. Ang pagpaningkamot uban niadtong mga problemaha mao ang kinauyokan nga katuyoan sa kinabuhi. Samtang kita mopaduol sa Dios, Siya mopakita sa atong mga kahuyang, ug tungod niini makapahimo kanato nga mas maalamon, mas malig-on. Kon kamo dugang nga nakamatikod sa inyong mga kahuyang, kana tingali nagpasabut nga kamo mas nagpaduol ngadto sa Dios, wala magpalayo” (“Ang Pag-ula: Ang Tanan alang sa Tanan,” Ensign o Liahona, Mayo 2004, 97).

Ang mosunod nga istorya mahitungod sa usa ka batan-ong lalaki kinsa nakasinati og katumanan sa saad sa Ginoo sa Ether 12:27:

Ang tanang batan-ong lalaki sa Simbahan giawhag sa pagkab-ot og mga tumong pinaagi sa programa sa Katungdanan ngadto sa Dios ug, sa ubang mga dapit, sa programa sa Scouting. Ang mga ginikanan ni Jonathan Perez nagkapuliki sa pagsangkap alang sa iyang dakong pamilya, ug ang iyang mga higala mibiay-biay sa iyang mga paningkamot sa pagkab-ot sa ranggo nga Eagle sa programa sa Scouting. Bisan pa niini nga mga kalisud, si Jonathan mihimo og tumong ug mitrabaho. Paglabay sa panahon, ug uban sa tabang ug suporta sa iyang mga lider sa Young Men, iyang nakab-ut ang iyang tumong. Misulat siya, “Kini nga kasinatian mitudlo kanako nga bisan unsa pa ang mga babag o mga hagit nga akong masinati, ang Ginoo motabang kanako sa pagbuntog sa akong mga kakulangan ug mga kahuyang (Ether 12:27). Dili igsapayan unsa ang background nga atong gigikanan o kon adunahan man kita o kabus. Makakab-ot kita sa atong mga tumong tungod kay kauban nato ang Ginoo” (Jonathan Perez, “An Honor Earned,” New Era, Nob. 2007, 45).

Dugang nga Ideya sa Pagtudlo

Ether 12:26. Pagbaliwala sa mga kahuyang sa uban

Ipasabut nga ang usa ka kahuyang nga gipanglimbasugan sa daghang mga tawo mao ang pagkadili kamao nga magpaubos ug magpakita og hugot nga pagtuo kon mag-atubang sila sa mga kahuyang sa uban. Basaha og kusog ang duha o tulo sa mosunod nga mga sitwasyon. Hunong human sa matag usa ug dapita ang mga estudyante sa pagpasabut kon sa unsang paagi ang pagbaton og hugot nga pagtuo kang Jesukristo, pagbaton og paglaum nga makaangkon sa mahangturong mga panalangin, o paglihok uban sa gugma nga putli makatabang sa tawo nga molihok sa saktong paagi niana nga sitwasyon.

1. Usa ka kaila o higala adunay mga kinaiya nga makasamok kaninyo.

2. Usa ka sakop sa inyong ward mihatag og pakigpulong o leksyon nga inyong gibati nga laay.

3. Adunay tawo nga kritikal nga magsulti mahitungod ninyo.

4. Usa ka sakop sa pamilya adunay usa ka depekto nga usahay makapalisud sa inyong kinabuhi.

Ether 12:27. Pagbuntog sa mga kahuyang

Aron matabangan ang mga estudyante nga makasabut kon sa unsang paagi ang atong mga kahuyang mahimong kalig-on, dapita ang duha ka mga estudyante sa pagbasa sa mosunod nga tinuod nga mga istorya. Hangyoa ang katunga sa klase sa pagpaminaw kon sa unsang paagi ang mga indibidwal sa matag istorya mipaubos sa ilang mga kaugalingon ug miduol kang Jesukristo. Hangyoa ang laing katunga sa klase sa pagtino kon sa unsang paagi nabuntog ang kahuyang nga naghasol sa matag indibidwal.

Usa ka batan-ong babaye misulat:

“Maulawon gayud ko nga tawo kon anaa sa mga tawo nga dili kaayo nako kaila. …

“Misugod ang ting-eskwela, ug daw nasayud si Satanas sa akong kahuyang ug naningkamot nga mosamot kini. …

“Usa ka gabii sa wala pa matulog, nagbasa ko sa Ether 12. … ‘Kon [ang mga tawo] magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.’ …

“Mga luha milugmaw sa akong mga mata. Nasayud ko nga ang akong gibati mao ang akong tinguha nga moduol kang Kristo. Sa kalit nakasabut ko nga ang Ginoo adunay plano alang kanako. Nakaamgo usab ko nga ang Ginoo gusto nga motabang kanako nga makahimo og maayo nga mga higala. Kon aduna lang akoy pagpaubos ug hugot nga pagtuo, ang Ginoo motabang sa akong kahuyang nga mahimong kalig-on. …

“Bag-ohay lang nakong nakita kon sa unsang paagi ang Ginoo mituman sa Iyang saad” (Raina Nibarger, “Shy No More,” New Era, Okt. 2009, 45).

Usa ka batan-ong lalaki misulti sa iyang panlimbasug nga mahimong limpyo gikan sa pagkaadik sa pornograpiya:

“Kuryuso ko ug gipangatarungan ang akong pagkalambigit sa pornograpiya pinaagi sa pagpahinumdom sa akong kaugalingon nga ang mga tawo sa eskwelahan nalambigit usab niini, ug daw dili dako nga problema alang kanila. …

“Ang kakuryuso nahimong kaikag, ug ang kaikag nahimong usa ka grabe nga kinaiya. Sa wala madugay naadik ko. …”

Kining batan-ong lalaki sa katapusan mihukom nga magpaubos sa iyang kaugalingon ug modangup sa Ginoo:

“Mapainubsanon kong miyukbo sa atubangan sa Ginoo nga naglihak ug nagpakilooy og kalig-on nga lapas sa akong kaugalingon. Sunod sunod nga gabii nag-ampo ko, ug sa katapusan nasayud ko nga kinahanglan kong makig-istorya sa akong bishop mahitungod niini. Kadto ang labing lisud nga bahin. …

“Milanat og dugayng panahon ug sinserong paningkamot aron maputol ang ngil-ad nga mga kinaiya. Sa katapusan gihukman ko sa akong lider sa priesthood isip takus nga moserbisyo og misyon. Ang labing nindot nga pagbati sa kalibutan mao ang pagsulod sa templo ug masayud nga limpyo ko. Ang Espiritu nga gusto nakong bation … misanap sa akong kasingkasing ug kinabuhi. Mapasalamaton kaayo ko sa Pag-ula ni Jesukristo” (“Danger Ahead! Avoiding Pornography’s Trap,” New Era, Okt. 2002, 34, 35, 37, 39).