Leksyon 8
1 Nephi 3–4
Pasiuna
Ang Ginoo misugo kang Lehi sa pagpabalik sa iyang mga anak nga lalaki ngadto sa Jerusalem aron sa pagkuha sa mga palid nga tumbaga gikan kang Laban. Sila si Laman ug Lemuel wala makakita kon unsaon nila pagtuman kini nga sugo, apan si Nephi dunay hugot nga pagtuo nga ang Ginoo mohatag og paagi nga ilang matuman unsay Iyang gikinahanglan. Bisan pa sa nasugatan nga balik-balik nga kalisud, matinud-anong nagpadayon si Nephi sa paghimo unsay gisugo sa Ginoo kaniya. Isip resulta, gigiyahan siya sa Balaang Espiritu ug malampusong nakuha ang mga palid.
Mga Sugyot alang sa Pagtudlo
1 Nephi 3:1–9, 19–20
Ang mga anak nga lalaki ni Lehi mibalik ngadto sa Jerusalem aron kuhaon ang mga palid nga tumbaga
Isulat ang mosunod nga mga pamahayag diha sa pisara sa dili pa magsugod ang klase. Hangyoa ang mga estudyante sa pagpili sa pamahayag nga labing maghulagway sa unsang paagi sila nagtuo nga ang Ginoo motabang kanato kon Siya mosugo nato sa pagbuhat og lisud nga mga butang.
Kon maningkamot kamo sa pagtuman og usa ka sugo o usa ka lisud nga buluhaton gikan sa Ginoo, Siya:
-
Mousab sa sugo aron kini mahimong yano ug sayon alang ninyo nga tumanon.
-
Mopanalangin sa inyong mga paningkamot pinaagi sa paghatag og paagi alang ninyo sa pagtuman sa sugo, bisan pa og kini lisud.
-
Mopatunga ug mobuhat sa tanang buluhaton alang ninyo.
-
Magkinahanglan kaninyo nga mobuhat sa tanan sa inyong kaugalingon nga walay bisan unsa nga tabang.
Dapita ang pipila ka mga estudyante sa pagpakigbahin sa tubag nga ilang napilian ug sa ilang rason sa pagpili niini.
Ipasabut nga adunay daghang mga paagi nga makapanalangin ang Ginoo niadtong kinsa naningkamot sa pagtuman sa Iyang mga sugo. Samtang ang mga estudyante magtuon sa asoy ni Nephi sa 1 Nephi 3–4, dapita sila sa pagpangita og mga ehemplo niini nga baruganan. Awhaga usab ang mga estudyante sa pagtimaan kon sa unsa nga paagi si Nephi ug ang iyang mga igsoong lalaki managlahi ang mga reaksyon sa mga hagit.
Hangyoa ang pipila ka mga estudyante nga magpuli-puli sa pagbasa og kusog sa 1 Nephi 3:1–9. Hangyoa ang nahibilin sa klase sa pagpaminaw sa mga rason ngano nga si Nephi andam nga mobuhat unsay gihangyo sa iyang amahan.
Sila si Laman ug Lemuel mibati nga ang sugo sa pagbalik ngadto sa Jerusalem alang sa mga palid nga tumbaga “usa ka malisud nga butang nga gipabuhat ni [Lehi] kanila” (1 Nephi 3:5). Sa pagtabang sa mga estudyante nga makasabut sa pipila ka mga rason ngano nga sila si Laman ug Lemuel mibati niini, mahimo nimo silang pahinumduman nga sila nakapanaw na og layo gikan sa Jerusalem.
-
Ngano sa inyong hunahuna nga si Nephi andam nga mobuhat unsay gisugo sa iyang amahan nga walay pagbagulbol?
Dapita ang mga estudyante sa pagsulti pag-usab sa baruganan nga gipamatuod ni Nephi sa 1 Nephi 3:7 isip “kon-nan” nga pamahayag. Sama pananglit, ang mga estudyante mahimong moingon nga kon kita magtinguha sa pagbuhat unsay gisugo sa Ginoo, nan Siya moandam og paagi alang nato aron makatuman niini. Ipasabut nga ang 1 Nephi 3:7 usa ka scripture mastery passage. Ipasabut nga ang mga estudyante motutok sa 25 ka scripture mastery passage sa tibuok tuig (alang sa dugang nga impormasyon, tan-awa ang appendix niini nga manwal). Ang 25 ka mga scripture mastery nga pakisayran gilista sa luyo sa seminary bookmark. Mahimo nimong awhagon ang mga estudyante sa pagmarka sa mga scripture mastery passage sa lahi nga paagi aron sayon nilang makit-an ang mga tudling.
-
Kanus-a kamo mibati nga ang Ginoo “miandam og paagi” alang kaninyo sa pagtuman sa usa sa Iyang mga sugo?
Dapita ang usa ka estudyante sa pagbasa og kusog sa 1 Nephi 3:3, 19–20. Hangyoa ang nahibilin sa klase sa pagpaminaw sa mga pulong nga nagsulti ngano nga ang mga palid nga tumbaga bililhon kaayo sa pamilya ni Lehi ug sa ilang mga kaliwatan. (Mahimo kang mosugyot nga markahan sa mga estudyante kini nga mga pulong diha sa ilang mga kasulatan.) Human ang mga estudyante mipakigbahin unsay ilang nakit-an, ipasabut nga ang mga palid nga tumbaga usa ka volume sa karaang kasulatan nga naglakip sa daghan nga sama nga mga sinulat ug impormasyon sa Daang Tugon.
-
Ngano sa inyong hunahuna nga ang mga sulod sa mga palid nga tumbaga importante kaayo nga si Nephi ug ang iyang mga igsoong lalaki mobalik ngadto sa Jerusalem aron sa pagkuha niini?
-
Unsa ang anaa sa mga kasulatan karon nga bililhon nganha kaninyo? Nganong bililhon man kini kaninyo?
1 Nephi 3:10–31
Gikawat ni Laban ang kabtangan ni Lehi ug misulay sa pagpatay ni Nephi ug sa iyang mga igsoong lalaki
Dapita ang katunga sa klase sa pagtuon sa unang pagsulay ni Nephi ug sa iyang mga igsoong lalaki sa pagkuha sa mga palid nga tumbaga (tan-awa sa 1 Nephi 3:10–18). Dapita ang laing katunga sa pagtuon sa ikaduhang pagsulay (tan-awa sa 1 Nephi 3:21–31). Patrabahoa ang matag estudyante nga sila ra ug motubag sa mosunod nga mga pangutana. Mahimo nimong ipakompleto kanila kini nga assignment diha sa ilang mga scripture study journal o mga class notebook. Ipakita ang mga pangutana diha sa pisara o andama kini isip usa ka handout alang sa matag estudyante.
-
Kinsa ang miadto?
-
Unsay gihimo nila?
-
Unsay ilang reaksyon human mapakyas ang unang pagsulay?
-
Alang niadtong nagtuon sa unang pagsulay: Si Nephi ug ang iyang mga igsoong lalaki “hilabihan ka pagkamasulub-on” human nga napakyas sila sa pagkuha sa mga palid nga tumbaga (tan-awa sa 1 Nephi 3:14). Sa unsa nga paagi nga lahi ang reaksyon ni Nephi niini nga kapakyasan kay sa iyang mga igsoong lalaki? (Tan-awa sa 1 Nephi 3:15–16.)
Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).
Alang niadtong nagtuon sa ikaduhang pagsulay: sila si Laman ug Lemuel nasuko ni Nephi human napakyas ang ilang ikaduhang pagsulay. Ilang gibunalan si Nephi ug nagsulti og mahait nga mga pulong ngadto kaniya. Bisan human misaad ang anghel nga ang Ginoo motugyan ni Laban ngadto sa ilang mga kamot, nagpadayon sila sa pagbagulbol ug pagkwestyon sa ilang abilidad sa paglampos. Sa unsa nga paagi kaha nga ang kasuko nila ni Laman ug Lemuel nakaapekto sa ilang abilidad sa pagbaton og hugot nga pagtuo sa saad sa anghel? Sa unsa nga paagi nga ang kasuko, panagbingkil, pagbagulbol, ug pagkawalay pagtuo makapugong nato sa pagsabut sa mga mensahe sa Dios alang nato? (Tan-awa sa 1 Nephi 3:28–31; 3 Nephi 11:29.)
-
Unsa nga mga panabut ang inyong naangkon gikan sa mga bersikulo nga inyong gitun-an?
Human ang mga estudyante adunay igong panahon sa pagtubag sa mga pangutana, dapita ang pipila kanila sa pagpakigbahin sa ilang mga tubag.
1 Nephi 4:1–38
Nakuha ni Nephi ang mga palid nga tumbaga
Hangyoa ang mga estudyante sa pag-ila sa mga pangutana nga gipangutana nila ni Laman ug Lemuel sa 1 Nephi 3:31.
Dapita ang usa ka estudyante sa pagbasa og kusog sa 1 Nephi 4:1–3. Hangyoa ang klase sa pagpaminaw sa mga tubag ni Nephi sa mga pangutana sa iyang mga igsoong lalaki.
-
Sa unsa nga paagi nga ang istorya ni Moises may kalabutan sa mga pangutana nila ni Laman ug Lemuel?
Kon ang mga estudyante nagkinahanglan og tabang sa pagtubag niini nga pangutana, ipasabut nga si Moises nag-atubang og susama nga hagit sa dihang gisugo siya sa pagdala sa mga anak ni Israel gawas sa Ehipto. Bisan pa sa balik-balik nga mga pagsulay, si Moises wala makahimo sa pagdani sa Paraon sa pagbuhi sa mga anak ni Israel gikan sa pagkaulipon. Hinoon, si Moises mipadayon sa pagbuhat unsay gisugo sa Ginoo kaniya, ug ang Ginoo mihatag og paagi kaniya aron mahimong gawasnon ang mga anak ni Israel. Gigamit ni Nephi ang ehemplo ni Moises sa mga sirkumstansya sa iyang pamilya. Masaligon siya nga ang Dios moandam usab og paagi alang kanila.
-
Unsa nga baruganan ang inyong nakat-unan gikan sa tubag ni Nephi ngadto sa iyang mga igsoong lalaki?
Bisan og ang mga estudyante magkalahi-lahi og gamay sa ilang mga tubag, kinahanglang magpadayag kini nga kon kita matinud-anon sa pagpadayon sa pagbuhat unsay gikinahanglan sa Ginoo, bisan pa sa kalisud, Siya moandam og paagi alang nato sa pagtuman unsay Iyang gisugo. (Mahimo nimong isulat sa pisara kini nga baruganan.)
Refer ngadto sa mga pamahayag nga imong gipakita diha sa pisara sa sinugdanan sa leksyon.
-
Karon nga nakatuon na kamo sa kasinatian ni Nephi, unsa nga pamahayag sa inyong hunahuna ang labing nag-summarize sa baruganan nga bag-o lang ninyong nakita?
Samtang ang mga estudyante magtuon sa nahibilin sa asoy ni Nephi, awhaga sila sa pagpangita og kumpirmasyon niini nga baruganan sa mga resulta sa paglahutay ni Nephi.
Dapita ang usa ka estudyante sa pagbasa og kusog sa 1 Nephi 4:4–6. Mahimo nimong isugyot nga markahan sa mga estudyante ang 1 Nephi 4:6 diha sa ilang mga kasulatan.
Tabangi ang mga estudyante nga makasabut nga ang Ginoo modasig kanato sa pagbuhat og butang nga dili dayon ipadayag unsaon, kanus-a, o nganong buhaton nato kini. Nakat-on si Nephi unsaon, kanus-a, ug ngano nga ang Ginoo motabang lamang kaniya human siya motugot sa Espiritu Santo sa paggiya kaniya ug human siya mohukom nga mopadayon pinaagi sa hugot nga pagtuo.
Sultihi ang mga estudyante nga si Presidente Harold B. Lee nakaobserbar nga kita sa kasagaran gusto nga makakita sa “katapusan gikan sa sinugdanan,” o sa sangputanan, sa dili pa kita mosunod sa direksyon sa Ginoo. Mitambag siya:
“Kinahanglan kamo nga makat-on sa paglakaw sa ngilit sa kahayag, ug tingali pipila ka lakang ngadto sa kangitngit [ang wala mailhi], ug inyong makaplagan nga ang kahayag mopakita ug mag-una kaninyo” (sa Lucile C. Tate, Boyd K. Packer: A Watchman on the Tower [1995], 137–38).
Dapita ang usa ka estudyante sa pagbasa og kusog sa 1 Nephi 4:7.
-
Sa 1 Nephi 4:7, unsa ang importante mahitungod sa mga pulong “bisan pa niana ako mipadayon”?
-
Unsa ang gitudlo sa kasinatian ni Nephi mahitungod sa relasyon tali sa atong pagkaandam sa “pag-adto ug pagbuhat” ug sa atong abilidad nga giyahan sa Ginoo?
Dapita ang pipila ka mga estudyante sa pagpuli-puli sa pagbasa og kusog gikan sa 1 Nephi 4:8–18.
-
Unsa nga mga rason ang gihatag sa Espiritu ngadto ni Nephi sa sugo sa Ginoo sa pagpatay ni Laban?
I-summarize ang nahibilin sa asoy ni Nephi sa kalampusan sa pagkuha sa mga palid (tan-awa sa 1 Nephi 4:19–38), o dapita ang usa ka estudyante kinsa sinati sa nahibilin nga istorya sa pag-istorya niini. Hangyoa ang mga estudyante sa pag-ila sa mga baruganan nga ilang makita nga gihulagway niining katapusang paningkamot sa pagkuha sa mga palid. Human sila makahatag sa ilang mga nasabtan, idugang ang imong pagpamatuod nga kon kita mogamit og hugot nga pagtuo sa Dios ug sa pagtinguha sa pagbuhat unsay Iyang gisugo, bisan og dili kita makakita sa sangputanan, Siya mogiya nato pinaagi sa impluwensya sa Espiritu Santo.
Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).
Sa pagtabang nga molawom pa ang mga pagpamatuod sa mga estudyante niini nga baruganan, dapita sila sa pagpakigbahin og mga kasinatian sa dihang sila milihok inubanan sa hugot nga pagtuo nga wala makahibalo sa sinugdanan kon sa unsa nga paagi o kanus-a ang Dios motabang kanila.
Dapita ang mga estudyante sa pagpamalandong og usa ka sitwasyon nga karon ilang giatubang diin ang mga gikinahanglan sa Ginoo lisud alang kanila. Hangyoa sila sa pagrekord diha sa ilang mga scripture study journal unsay ilang buhaton sa pagpakita sa Ginoo sa ilang pagkaandam sa “pag-adto ug pagbuhat” unsay Iyang gisugo. Kon mahuman na sila sa pagsulat, ipadayag ang imong pagsalig nga kon kita mopakita sa atong hugot nga pagtuo, ang Ginoo motabang nato nga matuman ang bisan unsa nga Iyang gisugo kanato.
Scripture Mastery—1 Nephi 3:7
Isulat sa pisara ang pagkamasulundon, hugot nga pagtuo, ug pagsalig. Ipangutana:
-
Unsa nga mga ebidensya sa pagkamasulundon, hugot nga pagtuo, ug pagsalig ni Nephi ang inyong nakita sa 1 Nephi 3?
-
Sa unsa nga paagi nga kini nga mga hiyas makatabang sa uban kinsa gitawag sa pagserbisyo sa usa ka misyon?
Dapita ang matag estudyante sa paghimo og sulat ngadto sa usa ka misyonaryo, nga mangutana sa misyonaryo sa unsang paagi iyang nagamit ang 1 Nephi 3:7. Awhaga ang mga estudyante sa pagpakigbahin sa bisan unsa nga mga tubag nga ilang madawat sa ilang mga sulat.
Pahibalo: Sa katapusan sa matag leksyon nga dunay scripture mastery passage, inyong makita ang dugang nga kalihokan nga gidesenyo sa pagtabang sa mga estudyante sa pagmaster sa tudling. Mahimo nimong gamiton kini nga mga kalihokan bisan kanus-a (alang sa dugang nga impormasyon, tan-awa sa appendix ug sa Gospel Teaching and Learning handbook). Tungod sa matang ug gitas-on sa leksyon karon, mahimo nimong gamiton kini nga kalihokan sa laing adlaw, kon duna na kay igong panahon.
Komentaryo ug Background nga Impormasyon
1 Nephi 4:10–12. Ang sugo sa pagpatay ni Laban
Unsay ikapangatarungan sa usa ka matarung nga tawo sama ni Nephi sa paghunos sa kinabuhi sa laing tawo? Si Propeta Joseph Smith mitudlo nga ang Ginoo mihimo og mga sumbanan sa matarung ug sayop:
“Ang Dios miingon, ‘Dili ka magpatay;’ sa laing higayon Siya miingon ‘Patya ang tanan.’ Mao kini ang baruganan diin ang pangagamhanan sa langit gipahigayon—pinaagi sa pagpadayag nga gipahiangay niini nga kahimtang diin ang mga anak sa gingharian gibutang. Bisan unsa ang gimando sa Dios kini matarung gayud, bisan unsa pa kini, bisan tuod kon kita dili makakita sa hinungdan sa ingon hangtud nga ang mga panghitabo dugay nang nahitabo” (History of the Church, 5:135).
Aron mas makasabut sa sugo sa Ginoo sa pagpatay ni Laban, makatabang ang paghinumdom sa mosunod:
-
Ang Ginoo mihatag ni Laban og duha ka higayon nga ihatag ang mga palid nga tumbaga sa wala pa kuhaa ang iyang kinabuhi. Si Laban usa ka bakakon ug kawatan, ug sa duha ka higayon buot siya nga mopatay. Ubos sa balaod ni Moises, ang pagpangawat ug pagsulay sa pagpatay mahimong silotan sa kamatayon (tan-awa sa Exodo 21:14; 22:2; Deuteronomio 24:7).
-
Ang Ginoo gusto nga si Lehi ug ang iyang mga kaliwat makabaton sa rekord sa kasulatan nga anaa sa mga palid nga tumbaga, bisan kon “ang usa ka tawo mamatay” (1 Nephi 4:13) aron kini mahitabo. Ang mga palid nga tumbaga wala lamang mopanalangin sa Nephite ug Mulekite nga mga nasud, nakahatag usab kini og pipila ka sulod sa bulawan nga mga palid (sama sa mga kinutlo ni Isaias ug gikan sa sambingay ni Zenos sa maayo ug ihalas nga mga kahoy nga oliba). Ang Basahon ni Mormon nakapanalangin og minilyon ka mga tawo ug mopanalangin pa og daghan. Sa katapusan, kining tanan namiligro sa dihang si Nephi mibarug batok ni Laban ug misunod sa direksyon sa Espiritu.
Ang pipila ka mga tawo sayop nga mibati nga ang Espiritu sa Ginoo miaghat nila sa pagbuhat og butang nga supak sa unsay gisugo na sa Ginoo. Ang mosunod nga pamahayag ni Presidente Ezra Taft Benson naghatag og tulo ka mubo nga mga test nga atong magamit aron sa paglikay nga mailad ug masaligong makahibalo kon ang espirituhanong mga impresyon gikan sa Ginoo:
“1.Unsa ang ikasulti sa sumbanan nga mga kasulatan bahin niini? ‘Ngadto sa balaod ug ngadto sa pagpamatuod: kon sila dili managsulti sumala niining pulonga, sa pagkamatuod walay kabuntagon alang kanila,’ miingon si Isaias. (Isa. 8:20.) …
“Kita kinahanglang magkugi sa pagtuon sa mga kasulatan. Ang atong tagaan og espesyal nga importansya mao ang Basahon ni Mormon ug ang Doktrina ug mga Pakigsaad. …
“2.Ang ikaduha nga giya mao ang: unsa ang gisulti sa mga Presidente sa Simbahan sa ulahing mga adlaw bahin sa hilisgutan—ilabi na sa buhi nga Presidente? …
“Adunay usa lamang ka tawo sa yuta karon kinsa makasulti alang sa Simbahan. (Tan-awa sa D&P 132:7; 21:4.) Kana nga tawo mao [ang] Presidente [sa Simbahan]. Tungod kay siya mohatag sa pulong sa Ginoo alang nato karon, ang iyang mga pulong adunay mas dinalian nga kaimportante kay sa niadtong mga propeta nga namatay na. Kon maghisgot ubos sa impluwensya sa Espiritu Santo ang iyang mga pulong mga kasulatan. (Tan-awa sa D&P 68:4.) …
“3.Ang ikatulo ug katapusang test mao ang Espiritu Santo—ang test sa Espiritu. Pinaagi niana nga Espiritu kita ‘… mahimong masayud sa kamatuoran sa tanan nga mga butang.’ (Moroni 10:5 Kini nga test epektibo lamang sa hingpit kon ang usa ka channel sa komunikasyon uban sa Dios limpyo ug mahiyason ug wala mabulingi sa sala” (sa Conference Report, Okt. 1963, 16–17).