Leksyon 13: 1 Nephi 10–11

Leksyon 13

1 Nephi 10–11

Pasiuna

Human makadungog sa asoy sa iyang amahan nga si Lehi bahin sa iyang panan-awon, si Nephi nagtinguha nga makakita, makadungog, ug masayud sa iyang kaugalingon sa mga butang nga nakita ug nadungog ni Lehi (tan-awa sa 1 Nephi 10:17). Samtang siya namalandong sa mga pagtulun-an sa iyang amahan, si Nephi “gibayaw sa Espiritu sa Ginoo” (1 Nephi 11:1) ug nakadawat sa iyang kaugalingong panan-awon. Kini nga panan-awon giasoy pag-usab sa 1 Nephi 11–14. Sa 1 Nephi 11 mabasa nato ang bahin sa kahoy sa kinabuhi, ang gunitanan nga puthaw, ug ang dako ug lapad nga gambalay, ingon man usab ang pagkatawo, bunyag, pangalagad, ug paglansang sa Manluluwas. Samtang nagsaksi si Nephi niining mga butanga, iyang nakita ang gugma sa Dios alang sa Iyang mga anak.

Mga Sugyot alang sa Pagtudlo

1 Nephi 10:1–16

Si Lehi nanagna sa Mesiyas

I-lakbit sa pag-summarize ang 1 Nephi 10:1–16 pinaagi sa pagsulti sa mga estudyante nga human moistorya sa iyang panan-awon bahin sa kahoy sa kinabuhi, si Lehi mihatag usab ug sunod-sunod nga mga panagna. Kini naglakip sa mga detalye kon kanus-a si Jesukristo moanhi sa yuta (tan-awa sa 1 Nephi 10:4), Iyang bunyag ni Juan Bautista (tan-awa sa 1 Nephi 10:7–10), Iyang pagkalansang sa krus ug pagkabanhaw (tan-awa sa 1 Nephi 10:11), ug sa umaabut nga pagkatibulaag ug pagkapundok sa Israel (tan-awa sa 1 Nephi 10:12–14).

Dapita ang usa ka estudyante sa pagbasa og kusog sa 1 Nephi 10:4–6. (Mahimo nimong ipasabut nga ang Mesiyas “usa ka matang sa Aramaic ug Hebreohanon nga pulong nga nagpasabut og ‘ang dinihugan.’ Sa Bag-ong Tugon si Jesus mao ang gitawag og Kristo, nga mao ang katumbas sa pinulongan nga Gresyanhon sa Mesiyas. Kini nagpasabut nga ang dinihugan nga Propeta, Pari, Hari, ug Tigluwas kansang pag-anhi mahinamong gipaabut sa mga Judeo” [Giya ngadto sa mga Kasulatan, “Mesiyas,” scriptures.lds.org; tan-awa usab sa Bible Dictionary, “Messiah”].)

Sumala sa panagna ni Lehi, kanus-a moanhi ang Manluluwas? (Tan-awa sa 1 Nephi 10:4.)
Unsay mahitabo sa katawhan kon sila dili mosalig sa Manluluwas? (Tan-awa sa 1 Nephi 10:6.)

1 Nephi 10:17–22; 11:1–6

Nagtinguha si Nephi nga makakita, makadungog, ug masayud sa mga kamatuoran nga gitudlo sa iyang amahan

Hangyoa ang mga estudyante sa pagkonsiderar sa mosunod nga ehemplo: Tulo ka mga batan-ong lalaki mitambong sa samang miting sa Simbahan. Human makapauli, usa sa batan-ong lalaki mibati nga ang miting sum-ol ug usik-usik sa iyang panahon. Ang lain nagtuo nga maayo ang miting apan wala maapektuhi niini. Ang ikatulo mipauli nga nabayaw sa Espiritu Santo ug nakadawat og inspirasyon ug direksyon alang sa iyang kinabuhi, bisan lapas pa sa unsay gitudlo sa miting.

Sa unsa nga paagi nga kini posible nga ang tulo ka mga batan-ong lalaki mitambong sa samang miting apan managlahi ang mga kasinatian?

Ipasabut nga kini nga ehemplo susama sa kasinatian ni Laman, Lemuel, ug Nephi sa dihang sila nakadungog sa mga panagna sa ilang amahan ug sa asoy sa iyang panan-awon. Sila si Laman and Lemuel wala makasabut sa mga pulong sa ilang amahan ug nakiglalis sa unsay ilang nadungog (tan-awa sa 1 Nephi 15:2). Si Nephi, sa laing bahin, miduol sa Ginoo aron makasabut. Mihatag siya og nindot kaayo nga ehemplo kon unsaon sa pagtinguha ug pagdawat og pagpadayag.

Sultihi ang mga estudyante nga samtang sila magtuon sa kasinatian ni Nephi, ilang makita ang mga baruganan nga makatabang nila nga magtinguha ug makadawat og pagpadayag alang sa ilang mga kaugalingon. Awhaga sila sa pagkahibalo sa mga butang nga gibuhat ni Nephi nga nakapahimo niya sa pagdawat og pagpadayag susama sa nadawat ni Lehi.

Bahina ang klase ngadto sa tulo ka grupo. I-assign sa matag grupo ang usa sa mga kategoriya ug pundok sa mga pangutana sa mosunod nga tsart. (Mahimo nimong ipakita ang tsart diha sa pisara sa dili pa magsugod ang klase.) Dapita ang mga estudyante sa pagbasa sa hilum sa 1 Nephi 10:17 ug 11:1–6 ug sa pag-andam og mga tubag sa na-assign nila nga mga pangutana.

Tinguha

Unsa ang gitinguha ni Nephi nga makita, madungog, ug masayran?

Sa unsang paagi nga ang atong tinguha makaapekto sa atong abilidad sa pagdawat og pagpadayag?

Unsay akong gitinguha nga masayran gikan sa Ginoo?

Pagtuo

Unsa nga mga pagtuo ang gipahayag ni Nephi samtang siya nagtinguha og pagpadayag?

Sa unsa nga paagi nga kini nga mga pagtuo makaimpluwensya sa atong abilidad sa pagdawat og pagpadayag?

Unsaon nako pagpalambo sa akong pagpamatuod ug pagtuo kang Jesukristo?

Pamalandong

Unsay nahitabo sa dihang si Nephi naglingkod nga namalandong?

Ngano ang pagpamalandong mosangpot sa pagpadayag?

Unsay akong mabuhat aron mas makugihon sa pagpamalandong sa mga pulong sa mga propeta?

Dapita ang pipila ka mga estudyante gikan sa matag grupo sa pagpakigbahin og mga tubag sa ilang unang duha ka na-assign nga mga pangutana. (Mahimo usab nimong dapiton ang mga estudyante sa pagtubag sa ikatulo nga pangutana, apan ipaniguro nila nga dili sila kinahanglang mopakigbahin sa mga tubag nga personal ra kaayo o pribado.)

Dapita ang usa ka estudyante sa pagbasa og kusog sa 1 Nephi 10:19.

Kinsa ang makahibalo sa mga misteryo sa Dios?
Sa unsa nga gahum nga ang mga misteryo sa Dios ipadayag?
Unsa ang angay natong buhaton aron makadawat og pagpadayag pinaagi sa gahum sa Espiritu Santo?
Unsa sa inyong hunahuna ang gipasabut sa makugihong pagtinguha?
Unsa ang gibuhat ni Nephi nga nagpakita nga siya makugihong nagtinguha nga makakita, makadungog, ug masayud sa mga butang nga gitudlo sa iyang amahan?

Isulat ang mosunod nga pamahayag diha sa pisara:

Ang Dios mopadayag sa kamatuoran ngadto …

Hangyoa ang mga estudyante sa pag-summarize unsay ilang nakat-unan gikan sa kasinatian ni Nephi pinaagi sa pagkompleto sa pamahayag diha sa pisara. Samtang ang mga estudyante mahimong mopili og laing mga pulong, ang ilang mga tubag kinahanglang magpakita sa kamatuoran nga Ang Dios mopadayag sa kamatuoran ngadto sa tanan nga makugihong nagtinguha Kaniya. (Mahimo nimong isulat sa pisara kini nga baruganan.)

Awhaga ang mga estudyante sa paghunahuna og panahon sa dihang ang makugihong pagtinguha sa Dios migiya nila sa pagbati sa Iyang Espiritu ug nakadawat og pagpadayag. (Tingali makatabang ang paghisgot nga ang pagpadayag mahimong maglakip sa pagdawat og giya kon maghimo og desisyon, pag-angkon og dugang pagsabut, pagdawat og kahupayan, o pagdawat og kasigurohan nga ang usa ka butang tinuod.) Dapita ang mga estudyante sa pagpakigbahin sa ilang mga kasinatian uban sa klase. Mahimo usab nimong ipamatuod unsay imong nasinati pinaagi sa imong mga paningkamot sa pagkugi sa pagtinguha sa Ginoo.

1 Nephi 11:7–36

Si Nephi nakasaksi sa pagpakig-angay sa Dios

Ipasabut ngadto sa mga estudyante nga si Nephi nagpadayon sa pagpamalandong ug nagtinguha og balaang giya atol sa iyang panan-awon. Sa dihang si Nephi mihangyo nga makahibalo sa interpretasyon sa kahoy nga nakita niya ug sa iyang amahan, usa ka anghel nagpakita aron sa pagtabang kaniya. Ang anghel nangutana, “Nasayud ba ikaw sa kahulugan sa kahoy nga nakita sa imong amahan?” (1 Nephi 11:21). Ribyuha ang kahulugan sa kahoy pinaagi sa pagpapuli-puli sa mga estudyante sa pagbasa og kusog gikan sa 1 Nephi 11:18–23.

Unsa ang gisulti ni Nephi nga kahulugan sa kahoy? (Human ang mga estudyante makatubag, mahimo nimong itudlo nga si Nephi nakakita ni Maria nga nagkugos sa bata nga si Jesus, ug ang anghel miila sa bata nga “ang Anak sa Mahangturong Amahan.” Ang anghel dayon nangutana ni Nephi sa kahulugan sa kahoy sa pagtabang kaniya nga makahibalo nga kini nagrepresentar ni Jesukristo. Sa dihang si Nephi mitubag nga kini nagrepresentar “sa gugma sa Dios,” nagpasabut siya sa gugma sa Dios nga gipadayag pinaagi sa gasa sa Iyang Anak. Makasinati kita sa gugma sa Dios pinaagi sa pag-ambit sa mga panalangin sa Pag-ula ni Jesukristo.)
Giunsa paghulagway ni Nephi ug sa anghel ang gugma sa Dios?

Hangyoa ang usa ka estudyante sa pagbasa sa 1 Nephi 11:16. (Ipasabut nga ang pulong pagpakig-angay nagpasabut nga boluntaryong mipaubos gikan sa usa ka katungdanan o kaligdong. Mahimo nimong dapiton ang mga estudyante nga isulat kini nga pamahayag diha sa ilang mga kasulatan tupad sa 1 Nephi 11:16.)

Ipapangita sa mga estudyante ang tubag ni Nephi sa pangutana sa anghel pinaagi sa pagbasa og kusog sa 1 Nephi 11:17.

Unsa man ang nahibaloan ni Nephi?
Unsa ang wala niya mahibaloi?

Human makatubag si Nephi, ang anghel mipakita kaniya og pipila ka mga ehemplo sa pagpakig-angay sa Dios aron sa pagtabang sa pagpalawom sa iyang pagsabut sa gugma sa Dios. Ipasabut ngadto sa mga estudyante nga ang “pagpakig-angay sa Dios” nagpasabut ngadto sa Dios nga Amahan ug ni Jesukristo.

Ipakigbahin ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles, kinsa mipasabut sa pagpakig-angay sa Dios, ang atong Langitnong Amahan:

“Ang pagpakig-angay sa Dios anaa sa kamatuoran nga siya, usa ka nahimaya nga Binuhat, mikanaug gikan sa mahangturong trono aron mahimong Amahan sa usa ka mortal nga Anak” (The Mortal Messiah [1979], 1:314).

Imahe

The Birth of Jesus

Aron sa pagtabang sa mga estudyante nga makasabut kon sa unsa nga paagi nga “ang pagpakig-angay sa Dios” nagpasabut usab ngadto ni Jesukristo, ipakita ang litrato nga Ang Pagkatawo ni Jesus (62116; Libro sa mga Hulagway sa Ebanghelyo [2009], nu. 30). Dapita ang usa ka estudyante sa pagbasa og kusog sa 1 Nephi 11:13–21. Dapita ang laing estudyante sa pag-ila unsa ang kalabutan niini nga mga bersikulo sa litrato. Ipabasa sa usa ka estudyante ang mosunod nga pamahayag ni Elder Gerald N. Lund, kanhi usa ka Seventy. Dapita ang klase sa pagpaminaw sa mga paagi nga ang Manluluwas nagpakita sa Iyang gugma alang nato.

“Ania si Jesus—usa ka sakop sa Dios nga Kapangulohan, ang Unang Natawo sa Amahan, ang Tiglalang, ang Jehova sa Daang Tugon—karon mibiya sa iyang balaan nga kahimtang; mikuha gikan sa Iyang kaugalingon sa tanang himaya ug kaharianon ug misulod sa lawas sa usa ka gamay nga bata; walay mahimo, nagsalig sa hingpit sa Iyang inahan ug sa yutan-ong amahan. Nga Siya wala moabut ngadto sa labing maayong yutan-ong mga palasyo ug … gihatagan og daghang mga alahas apan miabut diha sa ordinaryo nga kamalig ang makapatingala. Dili ikahibulong nga ang anghel miingon ngadto ni Nephi, ‘Tan-awa ang pagpakig-angay sa Dios!’” (Jesus Christ, Key to the Plan of Salvation [1991], 16).

Sa unsang paagi nga ang pagkatawo sa Manluluwas nagpakita sa Iyang gugma alang kanato?

Siguroha nga kini klaro nga ang pagkaandam sa Manluluwas sa pagpuyo og usa ka mortal nga kinabuhi nagpakita sa Iyang gugma alang kanato.

Imahe

Christ Healing the Sick at Bethesda

Ipakita ang mga litrato Jesus Nagbuhi sa Anak nga Babaye ni Jairo (62231; Libro sa mga Hulagway sa Ebanghelyo, nu. 41) ug Kristo Nag-ayo sa Masakiton didto sa Betsata (Libro sa mga Hulagway sa Ebanghelyo, nu. 42). Dapita ang usa ka estudyante sa pagbasa og kusog sa 1 Nephi 11:28 ug 31. Awhaga ang klase sa pag-ila og mga paagi nga ang mga litrato susama sa mga bersikulo.

Kinsa ang nakita ni Nephi nga gialagaran ug giayo sa Manluluwas?
Sa unsang paagi nga ang mga lihok sa Manluluwas nagpakita sa Iyang gugma?

Ipabasa og kusog sa usa ka estudyante ang 1 Nephi 11:32–33. Dapita ang klase sa pagpaminaw sa ehemplo sa gugma sa Manluluwas.

Imahe

The Crucifixion

Human ipakigbahin sa mga estudyante unsa ang ilang nailhan, ipakita ang litrato nga Ang Paglansang (62505; Libro sa mga Hulagway sa Ebanghelyo, nu. 57).

Ipamatuod nga ang pagpakig-angay ni Jesukristo nagpakita sa gugma sa Dios alang kanato. Ang Manluluwas nakig-angay sa pagpuyo og mortal nga kinabuhi, nangalagad ug miayo sa masakiton ug gitakbuyan, ug namatay alang sa atong tanang mga sala aron kita makabalik ngadto sa presensya sa Langitnong Amahan.

Sa unsa nga paagi nga ang pagkahibalo sa pagpakig-angay ug gugma sa Manluluwas makaimpluwensya sa inyong mga pagbati Kaniya?

Tapusa pinaagi sa pagdapit sa mga estudyante sa pagpakigbahin kon sa unsa nga paagi nga ang gugma sa Dios mao ang “labing madanihon” ug “labing hingpit nga kalipay” ngadto kanila (tan-awa sa 1 Nephi 11:22–23). Ipamatuod nga kon kita mosunod sa ehemplo ni Nephi ug makugihong magtinguha sa Dios, atong bation ang Iyang gugma ug makasinati og kalipay sa pag-ambit sa mga panalangin nga anaa pinaagi sa Pag-ula ni Kristo.

Dapita ang mga estudyante sa pagsunod sa ehemplo ni Nephi sa mga paningkamot nga ilang gihimo sa pagtinguha og pagpadayag. Pahinumdumi sila sa ilang tahas isip mga tigkat-on sa klase sa seminary ug nga ang hugot nga pagtuo ug paningkamot nga ilang himoon sa ilang inadlaw nga personal nga pagtuon sa kasulatan ug pag-apil sa klase makaapekto sa ilang abilidad sa pagkat-on pinaagi sa Espiritu.

Komentaryo ug Background nga Impormasyon

1 Nephi 10:17–19. Pagkat-on pinaagi sa gahum sa Espiritu Santo

Si Elder Russell M. Nelson sa Korum sa Napulog Duha ka mga Apostoles mipasabut og maayo sa panginahanglan sa pagkat-on sa mga kamatuoran sa ebanghelyo pinaagi sa gahum sa Espiritu Santo:

“Ang pagsunod sa mga sumbanan sa Ginoo nagkinahanglan nga kita mopalambo sa gasa sa Espiritu Santo. Kana nga gasa makatabang nato nga makasabut sa doktrina ug magamit kini sa personal. Tungod kay ang kamatuoran nga gihatag pinaagi sa pagpadayag masabtan lamang pinaagi sa pagpadayag, ang atong mga pagtuon kinahanglang mainampoon” (“Living by Scriptural Guidance,” Ensign, Nob. 2000, 17).

1 Nephi 11:1. Ang kaimportante sa pagpamalandong

Si Elder Gerald N. Lund sa Seventy mitudlo sa kaimportante sa pagpamalandong sa proseso sa pagtinguha og pagpadayag:

Paggahin og panahon sa pagpamalandong ug paghunahuna. Palayo gikan sa daghang kalihokan sa kinabuhi. Pangita og hilum nga lugar ug paggahin og panahon sa paglingkod ug paghunahuna, sa pagpaminaw sa inyong mga hunahuna ug mga pagbati, sa pagbukas sa inyong kaugalingon ngadto sa mga pag-aghat sa Espiritu Hinumdumi unsa ang gisulti sa mosunod nga mga propeta nga ilang gihimo sa wala pa makadawat og importante nga mga pagpadayag. Nephi: ‘Samtang ako naglingkod nga namalandong sa akong kasingkasing’ (1 Nephi 11:1). Si Joseph Smith ug Sidney Rigdon: ‘Samtang kami namalandong diha niini nga mga butang’ (D&P 76:19). Joseph F. Smith: ‘Ako naglingkod sa akong lawak namalandong sa mga kasulatan ug namalandong’ (D&P 138:1–2). Joseph Smith: ‘Ang akong hunahuna gitawag ngadto sa mahinungdanon nga pamalandong. … Ako namalandong … pagbalik-balik [sa mga pulong ni Santiago]’ (JS—H 1:8, 12).

“Usahay kinahanglan natong tuyuon sa pagpadaplin sa mga kabalaka sa kalibutan, ipadaplin ang mga dinalian sa atong inadlaw nga kinabuhi, ug mangita og hilum nga lugar ug hilum nga panahon diin kita makalingkod ug mamalandong ug maghunahuna ug maghinuktok—ug maminaw sa hinay ug hinagawhaw nga tingog nga naghunghong” (“The Voice of the Lord” [Brigham Young University devotional address, Dis. 2, 1997], 9–10, speeches.byu.edu).