1 Nephi 2

Pasiuna

Ang asoy sa 1 Nephi 2 nagpakita og lahi nga mga tubag sa mga sugo gikan sa Ginoo. Si Lehi misunod sa sugo sa Ginoo sa pagdala sa iyang pamilya ngadto sa kamingawan. Nag-atubang sa kalisud niini nga sugo, sila si Laman ug Lemuel misukol. Sa pagtandi, si Nephi nagtinguha og saksi nga magkumpirma.

Mga Sugyot alang sa Pagtudlo

1 Nephi 2:1–7

Ang Dios misugo ni Lehi sa pagbiya ngadto sa kamingawan

Hangyoa ang mga estudyante sa paghunahuna nga ang ilang mga ginikanan misulti nila nga ang ilang pamilya kinahanglang mobiya sa ilang mga panimalay ugma, biyaan hapit ilang tanang mga kabtangan. Manglakaw sila ngadto sa kamingawan, magdala lamang sa mga probisyon nga ilang gikinahanglan aron magpabiling buhi.

Unsa kaha ang imong tubag?
Sa unsa nga paagi mausab ang inyong tubag kon kamo nasayud nga ang sugo sa pagbalhin ngadto sa kamingawan nagagikan sa Ginoo?

Dapita ang usa ka estudyante sa pagbasa og kusog sa 1 Nephi 2:1–6. Hangyoa ang klase sa pagpangita sa mga rason ngano nga si Lehi midala sa iyang pamilya ngadto sa kamingawan.

Unsa nga sugo ang nadawat ni Lehi gikan sa Ginoo? (Tan-awa sa 1 Nephi 2:2.)
Unsa ang inyong makat-unan gikan sa mga desisyon ni Lehi mahitungod kon unsay dad-on ug unsay ibilin?

Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).

Hangyoa ang usa ka estudyante sa pagbasa og kusog sa 1 Nephi 2:7.

Mihalad og pasalamat si Lehi ngadto sa Ginoo pagbiya gyud niya sa iyang panimalay ug mga kabtangan. Unsay atong makat-unan gikan niini?
Unsa may angay nga pasalamatan ni Lehi?

Isulat ang mosunod nga pamahayag diha sa pisara: Kon kita matinud-anon ug masulundon, ang Ginoo motabang nato sa mga panahon sa pagsulay.

Kanus-a kamo mibati nga ang Ginoo mitabang ninyo sa mga panahon sa pagsulay? (Awhaga ang mga estudyante sa pagtinguha og giya sa Espiritu sa pagtubag niini nga pangutana. Tabangi sila nga makasabut nga dili kinahanglan nga mopakigbahin sila og mga kasinatian nga personal ra kaayo o pribado.)

1 Nephi 2:8–15

Sila si Laman ug Lemuel nagbagulbol batok sa ilang amahan

Hangyoa ang mga estudyante sa pagpangutana sa ilang mga kaugalinon sa hilum kon nakabagulbol ba sila sukad, nasulti ba nila o diha ra sa ilang kahiladman, mahitungod sa usa ka sugo gikan sa Ginoo o mahitungod sa usa ka hangyo gikan sa usa ka ginikanan o lider sa Simbahan. Hatagi sila og panahon sa paghunahuna sa ilang mga kasinatian.

Nganong usahay kita magbagulbol kon hatagan kita og direksyon?

Isulat ang Suba ug Walog diha sa pisara. Dapita ang usa ka estudyante sa pagbasa og kusog sa 1 Nephi 2:8–10.

Sa unsang paagi nga si Lehi gusto nga si Laman mahisama sa usa ka suba? Sa unsang paagi nga gusto niya nga si Lemuel mahisama sa usa ka walog? (Mahimo nimong hangyoon ang mga estudyante sa pagsulat sa ilang mga tubag diha sa pisara tupad sa mga pulong nga Suba ug Walog.)
Unsay gipaningkamutan ni Lehi nga itudlo kang Laman ug Lemuel?

Ipabasa sa mga estudyante sa hilum ang 1 Nephi 2:11–14.

Unsa ang pipila ka mga rason ngano nga si Laman ug Lemuel nagbagulbol batok sa ilang amahan?
Sa 1 Nephi 2:11, ang pulong nga pagkatikig og liog nagpasabut sa garbo o kagahi og ulo. Ngano nga ang pagbati sa garbo usahay mosangpot sa mga tawo sa pagbagulbol?
Ngano kaha nga ang pagbagulbol usahay moresulta kon ang mga tawo dili makasabut sa mga pamaagi sa Dios?

Ipasabut nga usa sa rason nga si Satanas gusto nga kita magbagulbol mao nga makapugong kini nato sa pagsunod sa buhi nga mga propeta, sa ubang dinasig nga mga lider, ug sa mga ginikanan. Isip kabahin sa inyong panaghisgutan, mahimo kang mopakigbahin sa mosunod, base sa usa ka pamahayag ni Elder H. Ross Workman sa Seventy:

“Ang pagbagulbol naglangkob og tulo ka mga lakang, ang matag usa mosangpot ngadto sa sunod nga dalan sa pagsupak.” Una, ang mga tawo magsugod sa pagpangutana. Mangutana sila “una sa ilang kaugalingong mga hunahuna,” ug dayon ilang itanom ang mga pangutana “sa mga hunahuna sa uban.” Ikaduha, kadtong kinsa nagbagulbol magsugod sa “pagpangatarungan ug pagpamalibad sa ilang kaugalingon sa pagbuhat unsay gisugo ngadto nila nga ilang buhaton. … Sa ingon, sila [mohimo] og pamalibad sa pagkamasinupakon.” Ang ilang mga pamalibad mosangpot ngadto sa ikatulo nga lakang: “Pagtinapulan sa pagsunod sa sugo sa Ginoo. …

“Dapiton nako kamo sa pagtutok sa sugo gikan sa buhi nga mga propeta nga naghasol pag-ayo kaninyo. Nagkwestyon ba kamo kon ang sugo alang ba kaninyo? Nakaandam ba kamo og mga pamalibad nganong dili kamo makasunod sa sugo? Mobati ba kamo nga nasagmuyo o nasamukan niadtong mopahinumdom kaninyo sa sugo? Nagtinapulan ba kamo sa pagsunod niini? Pagbantay sa pagpanglimbong sa kaaway. Pagbantay sa pagbagulbol” (“Beware of Murmuring,” Ensign, Nob. 2001, 85–86).

Dapita ang mga estudyante sa pagtubag sa mosunod nga pangutana diha sa ilang mga scripture study journal o mga class notebook:

Unsay inyong buhaton kon inyong mamatikdan ang inyong kaugalingon nga nagbagulbol mahitungod sa mga propeta ug mga sugo sa Ginoo?

1 Nephi 2:16–19

Si Nephi nagtinguha sa pagsabut gikan sa Ginoo

Ipabasa ug pamalandungi sa hilum sa mga estudyante ang 1 Nephi 2:16, 19.

Giunsa pagtubag ni Nephi ang mensahe sa iyang amahan?
Kanus-a kamo mitawag sa Dios ug mibati nga nahumok ang inyong kasingkasing?

Hatagi ang mga estudyante og oportunidad sa pagsulti og mga higayon sa dihang ang Ginoo mipahumok sa ilang mga kasingkasing (apan pahinumdumi sila nga dili sila kinahanglan nga mobati nga obligado sa pagpakigbahin og mga kasinatian nga personal ra kaayo o pribado). Dugang pa, mahimo kang mosulti og usa ka higayon sa dihang ang Ginoo mipahumok sa imong kasingkasing. Hatagi og kasiguroan ang mga estudyante nga kon kita motawag sa Dios, Siya makapahumok sa atong mga kasingkasing sa pagtuo sa Iyang mga pulong.

Mga pangutana nga magdapit og inspirasyon

Si Presidente Henry B. Eyring sa Unang Kapangulohan mitudlo nga ang pipila ka mga pangutana nagdapit og inspirasyon. Mitambag siya sa mga magtutudlo sa pagpangutana “nga modapit sa mga indibidwal sa pagsiksik sa ilang mga hunahuna alang sa mga pagbati.” Mga pangutana nga motugot sa mga estudyante sa pagpamalandong sa milabay nga mga kasinatian, kay sa maghinumdom lang og impormasyon, makaandam nila nga matudloan sa Espiritu. Si Presidente Eyring miingon: “Pagmaalamon sa paghulat og kadiyot sa dili pa motawag og usa ka tawo sa pagtubag. Bisan kadtong dili mosulti maghunahuna og espirituhanong mga kasinatian. Kana makadapit sa Espiritu Santo” (“The Lord Will Multiply the Harvest” [pakigpulong ngadto sa mga CES religious educator, Peb.6, 1998], 6, si.lds.org).

Basaha og kusog ang 1 Nephi 2:19. Hangyoa ang mga estudyante sa pagpasabut sa ilang kaugalingong mga pulong sa kahulugan sa mga termino nga “kanunay naningkamot” ug “pagpaubos sa kasingkasing.” Awhaga sila sa pagtinguha sa Ginoo sama ni Nephi.

Dapita ang usa ka estudyante sa pagbasa og kusog sa 1 Nephi 2:17–18.

Unsa nga mga baruganan ang atong makat-unan gikan sa lain-lain nga mga tubag nila ni Nephi, Sam, Laman, ug Lemuel?
Kanus-a nga ang mga pulong sa sakop sa pamilya o higala nakapalig-on sa inyong pagtuo, sama sa mga pulong ni Nephi nakapalig-on sa pagtuo ni Sam?

1 Nephi 2:20–24

Kadtong maghupot sa mga sugo mouswag sa yuta

Ipabasa sa mga estudyante ang 1 Nephi 2:20–21. Dapita sila sa pag-ila o pagmarka sa saad nga “sanglit kamo maghupot sa akong mga sugo, kamo mouswag .” Ipasabut nga samtang sila magtuon sa Basahon ni Mormon, makabasa sila og daghang mga higayon nga kini nga saad natuman.

Ikonsiderar ang pagpakigbahin sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

“Ang pagkamasulundon mao ang unang balaod sa langit. Ang tanang kauswagan, ang tanang kahingpitan, ang tanang kaluwasan, ang tanang pagkadiosnon, ang tanang matarung ug makiangayon ug matinud-anon, ang tanang maayong mga butang moabut niadtong kinsa nagsunod sa mga balaod Kaniya kinsa Mahangturon. Walay laing mas importante sa tibuok kahangturan kay sa paghupot sa mga sugo sa Dios” (The Promised Messiah: The First Coming of Christ [1978], 126).

Ipakigbahin ang imong pagpamatuod nga ang Dios mopanalangin niadtong kinsa masulundon ug matinud-anon. Sama ni Nephi, ang mga estudyante makapalambo og pagsalig sa pagdawat og direksyon gikan sa Ginoo. Awhaga sila sa pagpaningkamot nga mahimong mas masulundon ug mosunod sa giya nga ilang nadawat gikan sa Balaang Espiritu.

Dugang nga Ideya sa Pagtudlo

1 Nephi 2:1–3, 16–19. Humok nga mga kasingkasing ug pagpadayag

Pahinumdumi ang mga estudyante nga sa 1 Nephi 1, gihulagway ni Nephi ang usa ka pagpadayag nga nadawat ni Lehi samtang siya “gidaug sa Espiritu” (1 Nephi 1:7). Niana nga panan-awon, si Lehi nagbasa gikan sa usa ka basahon nga dunay mga panagna ug “napuno sa Espiritu“ (1 Nephi 1:12). Sa 1 Nephi 2, ang tema sa pagpadayag nagpadayon samtang si Nephi naghisgot nga ang iyang amahan nakadawat og pasidaan gikan sa Ginoo pinaagi sa usa ka damgo (tan-awa sa 1 Nephi 2:1–3). Naghisgot usab si Nephi sa iyang kaugalingong kasinatian ug pagsunod sa tingog sa Ginoo.

Pagpakita og duha ka mga butang—kanang humok ug makatuhop (sama sa piraso sa panapton o usa ka espongha) ug kanang gahi (sama sa usa ka bato). Unya dapita ang usa ka estudyante sa pagbasa og kusog sa 1 Nephi 2:16–19.

Sa unsa nga paagi nga ang mga kasingkasing nila ni Lehi, Nephi, ug Sam sama niining humok nga butang?
Sa unsa nga paagi nga ang mga kasingkasing nila ni Laman ug Lemuel sama niining gahi nga butang?
Sa unsa nga paagi nga ang espirituhanong kondisyon sa atong mga kasingkasing makaimpluwensya sa atong abilidad sa pagdawat og pagpadayag?

Tabangi ang mga estudyante nga makasabut nga ang Ginoo mopadayag og kahibalo ngari kanato samtang kita maningkamot sa pagtinguha Kaniya. Isip kabahin sa inyong panaghisgutan, mahimo nimong ipares-pares ang mga estudyante ug ipabasa nila ang ulohan nga “Pagpadayag” diha sa Giya ngadto sa mga Kasulatan. Hangyoa sila sa paghisgot sa mosunod nga pangutana:

Unsay atong mabuhat aron pag-andam sa atong kaugalingon sa pagdawat og pagpadayag gikan sa Ginoo?