1 Nephi 19

Pasiuna

Niini nga kapitulo, mipasabut si Nephi nga ang pipila ka mga tawo dili motahud sa Dios sa Israel, nga si Jesukristo. Sa ato pa, sila motunob-tunob ni Jesukristo sa ilang mga tiil pinaagi sa wala paghatag Kaniya og pagtagad ug wala mopatalinghug sa Iyang tambag. Giistorya usab ni Nephi ang mga pagtulun-an sa karaang mga propeta kinsa nanagna nga kadtong responsable sa pagkastigo ug paglansang sa Manluluwas, ingon man usab sa ilang mga kaliwat, pagatibulaagon ug sakiton hangtud ilang pabalikon ang ilang mga kasingkasing ngadto sa Ginoo. Nianang higayuna, ang Ginoo “mohinumdom sa mga pakigsaad diin siya mihimo ngadto sa ilang mga amahan” (tan-awa sa 1 Nephi 19:15). Mipasabut si Nephi nga gisulat niya kining mga butanga aron sa pagdani sa iyang katawhan sa paghinumdom sa Ginoo ug motuo Kaniya. Siya mitudlo sa iyang katawhan sa pagpahisama sa mga kasulatan sa ilang kaugalingon aron sa pagtabang nila nga motuo sa Ginoo.

Mga Sugyot alang sa Pagtudlo

1 Nephi 19:1–19

Girekord ni Nephi ang mga panagna ni Jesukristo sa pagtabang sa katawhan sa paghinumdom sa ilang Manunubos

Paggunit og kopya sa Basahon ni Mormon. I-summarize ang 1 Nephi 19:1–4 pinaagi sa pagpasabut nga si Nephi gimandoan sa paghimo og duha ka set sa mga palid—usa sa pagrekord sa sagrado (relihiyoso) nga kasaysayan ug ang lain alang sa sekular nga kasaysayan sa iyang katawhan. Dapita ang usa ka estudyante sa pagbasa og kusog sa 1 Nephi 19:3, 5–6. Hangyoa ang nahibilin sa klase sa pagpangita mahitungod sa unsay gisulti ni Nephi bahin sa “sagrado” nga mga butang.

Unsa nga katarungan ang gihatag ni Nephi sa pagtipig og sagrado nga mga butang?

Dapita ang usa ka estudyante sa pagbasa og kusog sa 1 Nephi 19:7. Sa dili pa siya mobasa niini, ipasabut nga niini nga bersikulo, ang pulong nga “Dios sa Israel” nagpasabut ni Jesukristo. Ang bersikulo naglakip usab sa mga pulong nga wala mohatag og pagtagad, nagpasabut nga “walay bili.” Ang dili paghatag og pagtagad mao ang pagtratar niana nga tawo nga walay bili.

Human makasulti nga siya mosulat lamang mahitungod niana nga sagrado, unsa ang gisugdan ni Nephi sa pagsulat?
Sumala sa 1 Nephi 19:7, sa unsang paagi nga ang ubang mga tawo motunob-tunob sa Manluluwas sa ilang mga tiil, o “wala mohatag kaniya og pagtagad”?
Sa unsa nga paagi nga ang pagdumili sa pagpaminaw sa tambag sa Ginoo nahisama sa wala pagtagad Kaniya o pagtunob-tunod Kaniya sa mga tiil?

Dapita ang usa ka estudyante sa pagbasa og kusog sa 1 Nephi 19:8–10. Hangyoa ang klase sa pagpangita og mga paagi nga ang mga tawo motratar sa Manluluwas isip usa ka butang nga walay bili atol sa Iyang mortal nga pangalagad. (Mahimo nimong isugyot nga ang mga estudyante momarka sa mga pulong nga ilang makit-an.)

Sa unsa nga paagi nga ang mga tawo motratar sa Manluluwas isip usa ka butang nga walay bili atol sa Iyang mortal nga pangalagad?
Unsa nga mga detalye niini nga mga bersikulo ang nagpakita nga ang Manluluwas wala magtagad nato isip “usa ka butang nga walay bili”? (Ang mga estudyante kinahanglang makasabut nga ang Manluluwas nag-antus sa tanan nga Iyang gihimo “tungod sa iyang mahigugmaon nga pagbati ug sa iyang pagkamainantuson ngadto sa mga katawhan.”)
Samtang kamo maghunahuna niini nga mga bersikulo, unsa ang inyong gibati sa Manluluwas?

Dapita ang usa ka estudyante sa pagbasa sa 1 Nephi 19:13−14, ug ipapangita sa klase unsay gipahayag ni propeta Zenos nga mga rason niadtong mipalansang sa Manluluwas (ug sa ilang mga kaliwatan) nga “sila pagahampakon pinaagi sa tanan nga mga katawhan.”

Unsa nga mga rason ang gihatag ni propeta Zenos nga kadtong mipalansang sa Manluluwas (ug ang ilang mga kaliwatan) mahimong “pagahampakon pinaagi sa tanan nga mga katawhan”?

Isulat ang mosunod nga pamahayag diha sa pisara: Ilang gipalayo ang ilang mga kasingkasing.

Unsa sa inyong hunahuna ang gipasabut sa pagpalayo sa kasingkasing gikan sa Ginoo?

Human makatubag ang mga estudyante, sultihi ang klase nga ikaw gusto og pipila ka mga estudyante nga motabang sa paghulagway kon sa unsa nga paagi kini nga pulong magamit nato karon. Pagdapit og pipila ka mga estudyante sa pagduol sa pisara. Hangyoa ang matag usa nila sa pagsulat og usa ka ehemplo sa usa ka lihok nga magpakita nga ang tawo mipalayo sa iyang kasingkasing gikan sa Ginoo. Dayon hangyoa sila sa pagpasabut unsa ang pipila ka mga sangputanan sa pagpalayo sa kasingkasing sa paagi sa ilang paglista. (Sama pananglit, usa ka estudyante mahimong mosulat og paghunong sa pagtuon sa mga kasulatan ug dayon mopasabut nga ang usa sa sangputanan niini nga lihok mao ang pagminus sa abilidad sa pagdawat og pagpadayag.)

Human ang pipila ka mga estudyante makapasabut sa ilang mga ehemplo, sultihi ang klase nga bisan pa kon nganong atong gipalayo ang atong mga kasingkasing gikan sa Ginoo, makapili kita nga mopabalik sa atong mga kasingkasing ngadto Kaniya. Dapita ang mga estudyante sa pagbasa og hilum sa 1 Nephi 19:14−17, mangita sa saad sa Ginoo niadtong kinsa mopabalik sa ilang mga kasingkasing ngadto Kaniya.

Kanus-a tibulaagon sa Ginoo ang Israel? (Kon sila mopalayo sa ilang mga kasingkasing gikan Kaniya.)
Kanus-a pundukon sa Ginoo ang Israel? (Kon sila mopabalik sa ilang mga kasingkasing ngadto Kaniya.)
Unsa ang giingon sa Ginoo nga Iyang buhaton alang niadtong dili na mopabalik sa ilang mga kasingkasing batok Kaniya?
Unsa sa inyong hunahuna ang gipasabut nga ang Ginoo mahinumdom niining mga tawhana ug sa mga pakigsaad nga Iyang gihimo uban sa ilang mga amahan?

Tabangi ang mga estudyante nga makasabut nga ang Ginoo wala makalimot niining mga tawhana. Nagpuyo sila sa paagi nga Siya dili makahatag ngadto kanila sa tanang mga panalangin sa ebanghelyo. Samtang ang ilang mga kaliwatan mopabalik sa ilang mga kasingkasing ngadto Kaniya, ang Ginoo misaad nga hinumduman sila, mopundok kanila ngadto sa Iyang Simbahan, ug mohatag sa tanang mga panalangin sa ebanghelyo ngadto kanila.

Unsa sa inyong hunahuna ang kahulugan sa mga saad sa mga bersikulo 15–17 alang kanato? (Usa ka ideya nga kinahanglang mogawas niini nga panaghisgutan mao nga kon atong pabalikon ang atong mga kasingkasing ngadto sa Ginoo, Iyang tahuron ang mga pakigsaad nga atong gihimo uban Kaniya.)

Hangyoa ang mga estudyante sa pagpamalandong sa mosunod nga mga pangutana ug pagsulat sa mga tubag diha sa mga scripture study journal o mga class notebook. (Mahimo nimong isulat ang mga pangutana diha sa pisara.)

Unsa nga matang sa mga lihok ang magpakita nga kamo ug ang inyong pamilya mipabalik sa inyong mga kasingkasing ngadto sa Ginoo?
Kanus-a ang maong mga lihok nakatabang ninyo o sa inyong pamilya pagdawat sa mga panalangin sa Ginoo?

Ikonsiderar ang pagdapit og pipila ka mga estudyante sa pagpakigbahin sa ilang mga tubag uban sa klase. Pahinumdumi sila nga dili kinahanglan nga mopakigbahin sila og mga kasinatian nga personal ra kaayo o pribado.

Ilakbit sa pagpasabut nga si Nephi gusto nga ang iyang rekord alang sa tanang mga sakop sa balay sa Israel—lakip nato. Dapita ang usa ka estudyante sa pagbasa sa 1 Nephi 19:18−19, ug hangyoa ang klase sa pag-ila unsay gusto nga iawhag ni Nephi nga atong buhaton. Ipamatuod nga kon kita mahinumdom sa Ginoo ug mopabalik sa atong mga kasingkasing ngadto Kaniya, Iyang ihatag ngari nato ang mga panalangin sa Iyang ebanghelyo.

1 Nephi 19:20–24

Gipasabut ni Nephi nganong migamit siya og karaan nga kasulatan sa pagtudlo sa iyang katawhan

Ipakigbahin ang mosunod nga pamahayag ni Presidente Henry B. Eyring sa Unang Kapangulohan, kinutlo gikan sa pakigpulong ngadto sa mga religious educator sa Church Educational System:

“Mohimo ako niini nga saad kaninyo mahitungod sa pagbasa sa Basahon ni Mormon: Kamo mapaduol niini ingon nga inyong masabtan nga gibutang sa Ginoo niini ang Iyang mensahe kaninyo. Sila si Nephi, Mormon, ug Moroni nasayud niana nga, ug kadtong nagbutang niini nagbutang og mga mensahe alang kaninyo. Manghinaut ako nga kamo masaligon nga ang basahon gisulat alang sa inyong mga estudyante. Dunay yano, direkta nga mga mensahe alang kanila nga mosulti nila unsaon sa pag-usab. Mahitungod niana ang basahon. Pagpamatuod kini sa Ginoo nga si Jesukristo ug sa Pag-ula ug sa unsa nga paagi kini magamit sa ilang mga kinabuhi. Makaangkon kamo og kasinatian niining tuiga nga mobati sa kausaban nga moabut pinaagi sa gahum sa Pag-ula tungod sa pagtuon niini nga basahon.” (“The Book of Mormon Will Change Your Life,” Ensign, Peb. 2004, 11).

Samtang kamo magtuon sa Basahon ni Mormon, makatabang ba nga masayud nga sila si Nephi, Mormon, ug Moroni naglakip og mga mensahe alang kaninyo?

Ipakigbahin ang mosunod nga pamahayag ni Presidente Ezra Taft Benson:

“Ang Basahon ni Mormon gisulat alang kanato karon. Ang Dios mao ang tagsulat sa basahon. Rekord kini sa napukan nga katawhan, gitigum sa dinasig nga mga tawo aron mapanalanginan kita. Kadtong mga tawo wala gayud makabaton sa basahon—alang kini nato. Si Mormon, ang karaang propeta diin maoy gikuhaan sa pangalan sa basahon, mimubo sa gatusan ka tuig nga mga rekord. Ang Dios, kinsa nasayud sa katapusan gikan sa sinugdanan, misulti kaniya unsay ilakip sa iyang pagmubo nga gikinahanglan sa atong panahon” (“The Book of Mormon Is the Word of God,” Ensign, Ene. 1988, 3).

“Kon sila nakakita sa atong panahon, ug mipili niadtong mga butang nga bililhon kaayo alang kanato, dili ba angayan lang nga ingon niana ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, ‘Ngano man ang Ginoo nagdasig ni Mormon (o Moroni o Alma) sa paglakip niana sa iyang rekord? Unsa nga leksyon ang akong makat-unan gikan niana nga makatabang kanako sa pagpakabuhi niining panahona?’” (“The Book of Mormon—Keystone of Our Religion,” Ensign, Nob. 1986, 6).

Dapita ang klase sa pagbasa sa hilum sa 1 Nephi 19:22−23, mangita sa deskripsyon ni Nephi kon giunsa niya pagtabang ang iyang kaigsoonan nga makakita sa mga mensahe alang sa ilang kaugalingon diha sa mga kasulatan.

Unsa nga resulta ang gipaabut ni Nephi gikan sa pagpahisama sa mga kasulatan ngadto sa iyang kaugalingon ug sa iyang katawhan?
Unsa ang gipasabut sa pulong nga kaayohan? (Benepisyo, bintaha, bililhon nga naangkon.)

Andama ang mosunod nga tsart isip usa ka handout, o ipakita kini sa pisara ug ipakopya sa mga estudyante diha sa ilang mga scripture study journal.

Pagpahisama sa mga Kasulatan sa Atong mga Kaugalingon		Paggamit sa mga Kamatuoran sa Kasulatan
Unsa nga sitwasyon o sirkumstansya ang gihulagway sa tudling sa kasulatan?	Sa unsa nga paagi kini sama sa usa ka sitwasyon sa akong kinabuhi o sa kalibutan nga naglibut kanako?	Unsa nga kamatuoran o mensahe ang gitudlo niini nga tudling sa kasulatan?	Unsaon nako pagsunod niini nga kamatuoran o mensahe sa akong sitwasyon?

Ipakita ang tsart pinaagi sa pagpasabut nga ang pagpahisama nagpasabut sa pagtandi. Ang pagpahisama sa mga kasulatan sa atong kaugalingon nagpasabut nga atong itandi ang usa ka sirkumstansya diha sa mga kasulatan uban sa sitwasyon sa atong kaugalingong kinabuhi o sa kalibutan nga naglibut kanato. Ang pag-ila og mga kapareha tali sa mga sirkumstansya diha sa mga kasulatan ug sa mga sitwasyon sa atong kaugalingong kinabuhi nag-andam nato sa pagpangita ug paggamit sa mga kamatuoran sa kasulatan. Ang sama nga mga kamatuoran nga nagamit sa mga tawo nga atong nabasahan diha sa mga kasulatan mahimong atong magamit kon kita anaa sa susama nga mga sirkumstansya.

Sa pagtabang sa mga estudyante nga makasabut kon sa unsa nga paagi nga ang pagpahisama mosangpot ngadto sa paggamit, dapita sila sa pagkompleto sa ilang tsart samtang imong ribyuhon uban nila ang unang scripture mastery passage sa Basahon ni Mormon, 1 Nephi 3:7. Dapita ang usa ka estudyante sa pagbasa og kusog sa 1 Nephi 3:7.

Unsa nga mga sirkumstansya ang gitubag ni Nephi sa dihang siya misulti niini nga mga pulong? (Gihangyo siya sa usa ka propeta—iyang amahan, nga si Lehi—sa pagbalik ngadto sa Jerusalem aron sa pagkuha sa mga palid nga tumbaga. Ang iyang mga igsoong lalaki nagbagulbol mahitungod sa kalisud niining buluhaton.)
Sa unsang paagi nga ang sirkumstansya ni Nephi sama sa usa ka sitwasyon sa inyong kinabuhi? Kanus-a ang Ginoo nagpaabut kaninyo sa pagbuhat og butang nga malisud?
Unsa nga kamatuoran ang nakatabang ni Nephi niini nga sitwasyon? (Si Nephi nasayud nga kon ang Ginoo mohatag og usa ka sugo ngadto sa Iyang mga anak, Siya nag-andam og paagi alang kanila nga matuman kini.)
Unsay inyong mahimo sa pagsunod niini nga kamatuoran sa inyong sitwasyon?

Dapita ang pipila ka mga estudyante sa pagpakigbahin kon giunsa nila sa pagpahisama ang 1 Nephi 3:7 sa ilang kaugalingon ug sa unsa nga paagi nga ilang magamit kini sa ilang kinabuhi. (Pahinumdumi sila nga dili kinahanglan nga mopakigbahin og mga kasinatian nga personal ra kaayo o pribado.)

Sa pagtapos sa leksyon, paggunit og kopya sa Basahon ni Mormon pag-usab. Pahinumdumi ang mga estudyante nga si Nephi mikonsiderar sa iyang mga sinulat mahitungod sa Manluluwas nga sagrado ug bililhon kaayo sa iyang kaugalingon ug sa uban. Awhaga ang mga estudyante sa pagtuon sa mga kasulatan ug sa pagpangita sa mga mensahe nga gibutang sa Ginoo ug sa Iyang mga propeta alang kanato. Ipamatuod nga samtang atong ipahisama ang mga kasulatan ngari sa atong kaugalingon, makat-on ug mahatagan kita og kaayohan gikan niini.

Awhaga ang mga estudyante sa pagtuon sa mga kasulatan sa ilang kaugalingon ug sa pagpangita og mga tudling nga ilang mapahisama sa ilang kaugalingon. Mahimong ilang sulayan sa pagsukip sa ilang mga pangalan diha sa pipila ka mga bersikulo ug basahon ang mga bersikulo ingon og ang Ginoo o ang Iyang mga propeta ang direktang nakigsulti ngadto kanila. Sama pananglit, mahimong basahon nila pag-una ang bahin sa 2 Nephi 31:20 sama niini: “Busa, ikaw [isukip ang pangalan] kinahanglan gayud nga mopadayon sa unahan uban ang pagkamakanunayon kang Kristo.”

Mahimong mohatag ka og blangko nga mga kopya sa tsart nga magamit sa mga estudyante sa ilang balay. Dapita sila sa pag-anha sa sunod nga klase nga andam sa pagpakigbahin kon giunsa nila pagpahisama ang mga kasulatan nganha sa ilang kaugalingon ug kon sa unsa nga paagi sila nakat-on ug nahatagan og kaayohan gikan sa kasinatian.

Komentaryo ug Background nga Impormasyon

1 Nephi 19:10–16. Zenock, Neum, ug Zenos

Si Nephi mikutlo gikan sa mga sinulat nila ni Zenock, Neum, ug Zenos. Kini mga propeta panahon sa Daang Tugon kansang mga panagna mahitungod ni Jesukristo narekord sa tumbaga nga mga palid; busa, nasayud kita nga sila nagpuyo sa wala pa ang 600 B.C. Naghisgot sila mahitungod sa kinabuhi ug pangalagad sa Mesiyas ug sa kapalaran sa balay sa Israel (tan-awa usab sa Helaman 8:19−20). Kon wala ang Basahon ni Mormon, wala kitay mahibaloan mahitungod niining tulo ka mga propeta o sa ilang mga pagsaksi ni Jesukristo.