Leksyon 15
1 Nephi 14
Pasiuna
Ang 1 Nephi 14 mitapos sa asoy sa panan-awon ni Nephi. Niini nga bahin sa panan-awon, si Nephi giingnan sa mga panalangin nga gisaad ngadto niadtong kinsa maghinulsol ug magpatalinghug sa Ginoo, ug ang mga tunglo nga moabut diha sa dautan kinsa nagpatig-a sa ilang mga kasingkasing batok sa Ginoo. Si Nephi gipakita usab nga ang Ginoo motabang ug manalipod niadtong kinsa magpuyo nga matarung ug motuman sa ilang mga pakigsaad ug nga Siya molaglag sa gamhanan ug salawayon nga simbahan sa yawa.
Mga Sugyot alang sa Pagtudlo
1 Nephi 14:1–7
Nakita ni Nephi ang mga sangputanan sa umaabut nga mga henerasyon sa pagsunod o pagsupak sa Ginoo
Dapita ang mga estudyante sa pag-abli sa ilang mga kasulatan ngadto sa 1 Nephi 14. Ipasabut nga karon magpadayon sila sa pagtuon sa panan-awon ni Nephi. Hangyoa ang mga estudyante sa pagpamalandong kon unsaon nila sa pagkompleto ang mosunod nga mga sentence:
-
Kon ako mosunod sa Ginoo, nan …
-
Kon ako magdumili sa pagsunod sa Ginoo, nan …
Sa higayon nga ang mga estudyante mipakigbahin na sa ilang mga tubag, itudlo nga ang pulong kon nagsugyot og pagpili. Depende kon unsay atong gipili, makasinati kita og lahi nga mga sangputanan. Ipasabut nga si Nephi nakakita sa umaabut nga mga henerasyon ug nakasabut nga kon sila magmatarung, mapanalanginan sila; o kon sila mopili sa pagkadautan, sila pagatungluhon. Dapita ang klase sa pagkonsiderar sa tibuok leksyon kon sa unsa nga paagi nga ang pagpili nga magmasulundon ngadto sa Ginoo nakahatag nila og mga panalangin.
Drowinga ang mosunod nga dayagram diha sa pisara:
Dapita ang usa ka estudyante sa pagbasa og kusog sa 1 Nephi 14:1–2. Hangyoa ang klase sa pag-ila (1) sa pagpili nga gipakita ni Nephi nga mahimo sa mga Hentil, ug (2) sa mga panalangin nga nakita ni Nephi nga moabut sa mga Hentil kon mohimo sila niana nga pagpili. Samtang ang mga estudyante mopakigbahin unsay ilang nakit-an, sulati ang mga blangko diha sa pisara aron makita kini sama sa mosunod:
Tingali kinahanglan nimong ipasabut nga sa mga kasulatan, ang pulong “mga babag” (1 Nephi 14:1) sa kasagaran nagpasabut nga mga kalisud nga makapugong sa mga tawo sa pagsunod sa Ginoo. Ang “pagaiphon diha sa balay ni Israel” (1 Nephi 14:2) nagpasabut nga iphon uban sa mga katawhan sa pakigsaad sa Ginoo.
-
Nganong importante nga makauban sa sinaaran nga mga katawhan sa Ginoo? (Aron makadawat sa mga panalangin sa pakigsaad sama kang Abraham [tan-awa sa D&P 132:30–31].)
-
Unsay gipasabut sa “pagpatalinghug ngadto sa Kordero sa Dios”?
-
Sa mga ganti sa pagkamasulundon nga gilista sa pisara, unsa ang labing makahuluganon kaninyo? Ngano man?
-
Kanus-a kamo nagpatalinghug sa Ginoo ug nakakita sa Iyang mga panalangin sa inyong kinabuhi? (Pahinumdumi ang mga estudyante nga kinahanglang dili sila mopakigbahin og mga kasinatian nga personal o pribado ra kaayo.)
Sa laing bahin sa pisara drowinga ang mosunod nga dayagram:
Ipabasa sa usa ka estudyante og kusog ang 1 Nephi 14:5–7. Hangyoa ang klase sa pagpangita sa (1) mga panalangin nga moabut niadtong kinsa maghinulsol ug sa (2) negatibo nga mga sangputanan niadtong kinsa magpatig-a sa ilang mga kasingkasing. Kompletuha ang diagram, sama sa inyong gibuhat sa nangaging kalihokan. (Kon ang mga tawo maghinulsol, “kini maayo alang kanila” [1 Nephi 14:5] ug sila makadawat og “kalinaw ug kinabuhi nga dayon” [1 Nephi 14:7]. Kon ang mga tawo mopatig-a sa ilang mga kasingkasing, sila “mamatay” [1 Nephi 14:5] ug “pagkadala ubos sa pagkabihag” ug “kalaglagan” [1 Nephi 14:7].)
Samtang ang mga estudyante motubag, kinahanglan nimong ipasabut nga ang “mahinungdanon ug kahibulongan nga buhat” nga gihisgutan sa 1 Nephi 14:7 nagpasabut sa pagpahiuli sa priesthood, sa ebanghelyo, ug sa Simbahan sa Ginoo sa ulahing mga adlaw.
-
Sa unsa nga paagi nga Ang Simbahan ni Jesukristo sa mga Santos sa Ulahing mga Adlaw “mahinungdanon ug kahibulongan” nganha kaninyo? Unsaon niini paghatag og kalinaw diha kaninyo? Sa unsa nga paagi kini makahatag og paglaum alang sa kinabuhing dayon?
Ikonsiderar ang paghatag sa mga estudyante og panahon sa hilum nga pagpamalandong unsa nga dalan nga gihulagway sa pisara ang ilang gisubay karon. Ipamatuod nga ang pagsunod sa Ginoo ug paghinulsol sa atong mga sala mosangput ngadto sa daghang mga panalangin. Mahimo usab nga imong ipamatuod nga ang pagpatig-a sa atong mga kasingkasing batok sa Ginoo ug sa Iyang Simbahan mosangput ngadto sa pagkabihag ug kalaglagan.
1 Nephi 14:8–17
Nakita ni Nephi ang gubat tali sa Simbahan sa Kordero sa Dios ug sa gamhanan ug salawayon nga simbahan
Dapita ang mga estudyante sa paghunahuna nga bag-o lang silang nalista nga makig-away sa usa ka gubat.
-
Unsa ang inyong buhaton aron makaandam sa gubat?
Ipasabut nga ang anghel mitudlo ni Nephi mahitungod sa dakong gubat nga mahitabo sa ulahing mga adlaw.
Dapita ang tulo ka estudyante nga magpuli-puli sa pagbasa og kusog sa 1 Nephi 14:9–11. Hangyoa ang nahibilin sa klase sa pag-ila sa duha ka grupo nga nagkabangi. (Mahimo nimong pahinumduman ang mga estudyante nga ang gamhanan ug salawayon nga simbahan nagpasabut ni bisan kinsa nga indibidwal o grupo nga mogiya sa mga tawo palayo sa Dios ug sa Iyang mga balaod.)
-
Unsa nga mga pulong ang gigamit sa paghulagway sa “gamhanan ug salawayon nga simbahan”?
-
Sumala sa panan-awon ni Nephi, asa ang “gamhanan ug salawayon nga simbahan” makita sa katapusang mga adlaw?
Hangyoa ang tulo pa ka mga estudyante nga magpuli-puli sa pagbasa og kusog sa 1 Nephi 14:12–14. Dapita ang klase sa pagpangita og mga rason nganong kita makabaton og paglaum bahin sa umaabut.
-
Sumala sa 1 Nephi 14:12, unsa nga simbahan ang dunay mas daghang tawo?
-
Ngano nga ang Simbahan sa Kordero dunay mas gamay nga mga tawo kay sa gamhanan ug salawayon nga simbahan?
-
Sumala sa 1 Nephi 14:13, alang sa unsa nga katuyoan nga ang gamhanan ug salawayon nga simbahan motigum og pundok sa mga katawhan?
Ipamatuod nga kita anaa sa gubat nga gihulagway ni Nephi—usa ka espirituhanong gubat batok sa dautan sa ulahing mga adlaw. Isip mga miyembro sa Simbahan sa Kordero, lupig kita sa gidaghanon, ug kita nagkinahanglan og tabang kon kita gusto nga magmadaugon batok sa gahum sa dautan.
-
Unsa ang inyong nabasahan sa 1 Nephi 14:14 nga nakahatag ninyo og paglaum?
Ipasabut og maayo nga ang mga saad nga gihatag niini nga mga kasulatan alang gayud niadtong kinsa mohimo ug motuman sa mga pakigsaad uban sa Ginoo. Pahinumdumi ang mga estudyante nga sila misulod ngadto sa pakigsaad sa bunyag uban sa Ginoo. Kuhaa ang atensyon sa mga estudyante ngadto sa mga pulong nga “gisangkapan sa katarung ug uban sa gahum sa Dios” sa 1 Nephi 14:14.
-
Unsa ang gipasabut sa “gisangkapan sa katarung ug uban sa gahum sa Dios” nganha kaninyo?
-
Sa unsa nga mga paagi nga ang “gisangkapan sa katarung ug uban sa gahum sa Dios” sama nga dunay taming ug mga hinagiban sa atong pakiggubat batok sa dautan?
-
Kanus-a kamo mibati nga kamo “gisangkapan sa katarung ug uban sa gahum sa Dios”? Unsay inyong gibati?
Pangutan-a ang mga estudyante unsaon nila sa pag-summarize sa mensahe diha sa 1 Nephi 14:1–14. Siguroha nga sila nakasabut nga kon kita magpuyo nga matarung ug motuman sa atong mga pakigsaad, ang gahum sa Dios motabang nato nga magmadaugon batok sa dautan.
Dapita ang mga estudyante sa pagtimbang-timbang sa ilang kinabuhi ug pagkonsiderar unsay angay nilang buhaton aron mas masangkapan og maayo uban sa katarung. Awhaga sila sa paglihok sa bisan unsa nga mga pag-aghat nga ilang madawat. Ipaniguro kanila nga kon sila magpabilin nga matinud-anon, sila adunay oportunidad sa pagsulod ngadto sa sagrado nga mga templo ug mohimo og dugang nga mga pakigsaad uban sa Ginoo. Ang mga saad ug mga pakigsaad nga ilang himoon didto makahatag og dako nga gahum ug panalipod sa ilang mga kinabuhi.
Dapita ang usa ka estudyante sa pagbasa og kusog sa 1 Nephi 14:3–4. Hangyoa ang laing estudyante sa pagbasa og kusog sa 1 Nephi 14:15–17.
-
Unsa ang mahitabo sa gamhanan ug salawayon nga Simbahan?
-
Unsa ang katapusang sangputanan sa gubat tali sa Simbahan sa Kordero (ang gingharian sa Dios) ug sa pwersa sa dautan?
-
Sa unsa nga paagi nga ang pagkahibalo sa resulta niini nga pakigbisog makatabang ninyo?
Basaha sa klase ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
“Kita [nga mga miyembro sa Simbahan] gamay ra nga bahin kon itandi ngadto sa binilyon nga katawhan dinhi sa yuta. Apan kita nagpabilin sa gihapon, ug kita nahibalo kaayo sa atong nahibaloan, ug kita magpadayon ug magsangyaw sa ebanghelyo.
“Ang Basahon ni Mormon miklaro niini nga kita dili modominar tungod sa gidaghanon. Apan kita adunay gahum sa priesthood. [tan-awa sa 1 Nephi 14:14]. …
“Kita makahimo ug sa tukma nga panahon piho nga makahimo sa pag-impluwensya sa tanang katawhan. Mahibaloan kini kon kinsa kita ug ngano nga kita mao. Ingon og kini walay paglaum, hilabihan kini ka lisud; apan dili lamang kini posible kondili sigurado nga kita makadaug sa gubat batok ni Satanas” (“Ang Gahum sa Priesthood,” Ensign o Liahona, Mayo 2010, 7).
Ipaniguro sa mga estudyante nga ang gingharian sa Dios magmadaugon sa katapusang mga adlaw. Ipadayag ang pagsalig nga sila makasalig sa Dios ug nga ang Iyang gahum makabuntog sa tanang dautan. Awhaga sila nga mahimong pwersa alang sa kaayohan sa pag-impluwensya sa uban.
1 Nephi 14:18–27
Nakita ni Nephi si Juan ang Tigpadayag
Isulat sa pisara ang mosunod nga mga pangutana:
Kinsa sa Napulog Duha ka mga Apostoles sa Manluluwas ang nakita ni Nephi sa panan-awon?
Unsa ang gisulat niini nga Apostol?
Ngano nga si Nephi gimandoan nga dili isulat ang uban sa iyang panan-awon?
Dapita ang mga estudyante sa pagbasa sa hilum sa 1 Nephi 14:18–27. Dayon ilakbit paghisgot ang mga tubag ngadto sa mga pangutana nga anaa sa pisara.
Ipasabut nga kini nga mga bersikulo naghisgot sa kabahin sa mga sinulat ni Juan diha sa basahon sa Pinadayag. Ang dakong tema niana nga basahon mao nga ang Dios magmadaugon batok sa mga gahum sa dautan. Sama ni Juan, si Nephi nakakita usab og panan-awon sa katapusan sa kalibutan, apan gimandoan siya nga dili kini irekord tungod kay si Juan gihatagan og responsibilidad sa pagbuhat sa ingon. Kon duna pay panahon, mahimo nimong tapuson ang leksyon uban sa mubo nga panaghisgutanay mahitungod kon sa unsa nga paagi nga ang Biblia ug ang Basahon ni Mormon nagkatambayayong sa “pagtukod sa kamatuoran” sa usag usa ug ingon nga “usa” (1 Nephi 13:40–41).
Komentaryo ug Background nga Impormasyon
1 Nephi 14:7. “Usa ka mahinungdanon ug kahibulongan nga buhat”
Ang mga kasulatan naghulagway sa Pagpahiuli sa ebanghelyo ug sa organisasyon sa Simbahan isip “usa ka mahinungdanon ug kahibulongan nga buhat” (1 Nephi 14:7; 3 Nephi 21:9). Niining kinatibuk-ang kahulugan, ang pulong mahinungdanon nagpasabut nga talagsaon ug makahuluganon, samtang ang kahibulongan nagpasabut nga katingalahan ug makadasig. Ang trabaho naghisgot og buhat o kalampusan.
1 Nephi 14:14. “Gisangkapan sa katarung ug uban sa gahum sa Dios”
Si Elder Neal A. Maxwell sa Korum sa Napulog Duha ka mga Apostoles mipasabut sa unsang paagi kita “gisangkapan sa katarung ug uban sa gahum sa Dios” (1 Nephi 14:14):
“Atong tan-awon ang atong kaugalingon. Alang sa Simbahan, ang mga kasulatan nagsugyot sa paspas nga pagpili ug paspas nga pagtubo sa espirituhanon ug gidaghanon—kining tanan mag-una sa panahon nga ang mga katawhan sa Dios ‘sangkapan sa katarung’—dili hinagiban—ug sa higayon nga ang himaya sa Ginoo ibu-bu diha kanila (1 Nephi 14:14; tan-awa usab sa 1 Pedro 4:17; D&P 112:25). Ang Ginoo determinado nga makabaton og natestingan, putli, ug nasulayan nga mga katawhan (tan-awa sa D&P 100:16; 101:4; 136:31), ug ‘walay bisan unsa nga ang Ginoo nga imong Dios mohukom diha sa iyang kasingkasing nga buhaton gawas nga siya mobuhat niini’ (Abraham 3:17)” (“For I Will Lead You Along,” Ensign, Mayo 1988, 8).
“Ang mga miyembro sa Simbahan adunay espesyal nga miting nga tambongan, mga kaigsoonan. Nakita kini ni Nephi. Sa umaabut nga adlaw, miingon siya, ang mga katawhan sa pakigsaad ni Jesus, ‘kinsa nagkatibulaag diha sa ibabaw sa tibuok yuta,’ ‘sangkapan sa katarung ug uban sa gahum sa Dios sa dako nga himaya.’ (1 Ne. 14:14.) Mahitabo kini, human lamang kon daghang mga miyembro nahimong balaan ug mahalaron sa pamatasan” (“Repentance,” Ensign, Nob. 1991, 32).