Leksyon 16

1 Nephi 15

Pasiuna

Human makadawat si Nephi og panan-awon nga susama sa panan-awon nga nadawat sa iyang amahan, mibalik siya ngadto sa tolda sa iyang amahan. Didto iyang nakit-an ang iyang mga igsoong lalaki nga nakiglalis sa mga pagtulun-an ni Lehi. Gipanton ni Nephi ang iyang mga igsoong lalaki tungod sa ilang katig-a og kasingkasing ug gipahinumduman sila unsaon sa pagdawat og pagpadayag alang sa ilang mga kaugalingon. Gipasabut dayon niya ang pipila ka mga pagtulun-an ni Lehi mahitungod sa natural nga mga sanga sa kahoy nga oliba ug ang kahulugan sa panan-awon ni Lehi sa kahoy sa kinabuhi. Ang 1 Nephi 15 nagtandi sa makugihong paningkamot ni Nephi sa pagpangita sa kamatuoran uban sa kaswal nga mga paningkamot sa iyang mga igsoong lalaki (ta-awa sa 1 Nephi 15:9–11).

Mga Sugyot alang sa Pagtudlo

1 Nephi 15:1–11

Nagbagulbol ang mga igsoong lalaki ni Nephi nga dili sila makasabut sa panan-awon ni Lehi

Hangyoa ang mga estudyante sa paglista og pipila ka mga kalihokan nga nagkinahanglan og paningkamot sa atong bahin sa dili pa kita makatagamtam sa mga resulta. Mahimo nimong ilista ang ilang mga tubag diha sa pisara. (Ang mga tubag mahimong maglakip sa schoolwork, pagpananom, pagpatukar og instrumento sa musika, pagdula og sport, ug pagpaugnat sa kusog. Dapita ang mga estudyante sa paghunahuna og mga ehemplo nga ilang nasinati.)

• Sa mga kalihokan nga inyong gihunahuna, unsa nga relasyon ang inyong nakita tali sa pagpaningkamot nga inyong gihimo ug sa mga resulta nga mosunod?

Human makatubag ang mga estudyante niini nga pangutana, awhaga sila sa pagpangita og susama nga sumbanan niini nga leksyon samtang sila magtuon sa 1 Nephi 15.

Sultihi ang mga estudyante nga sa 1 Nephi 15 nagsugod ni Nephi nga mibalik ngadto sa tolda sa iyang amahan human makadawat og panan-awon susama sa kang Lehi. Dapita ang usa ka estudyante sa pagbasa og kusog sa 1 Nephi 15:1–2, 7. Hangyoa ang klase sa pagpangita unsay nasugatan ni Nephi sa dihang mibalik siya ngadto sa tolda sa iyang amahan.

Masiksikon nga mga pangutana

Ang epektibo nga masiksikon nga mga pangutana modapit sa mga estudyante sa pagsiksik sa mga kasulatan alang sa mga detalye mahitungod sa istorya ug maglig-on sa ilang sukaranang pagsabut sa scripture block. Kini nga mga pangutana sa kasagaran naglakip sa mga pulong sama sa kinsa, unsa, kanus-a, unsaon, asa, ug ngano. Tungod kay ang masiksikon nga mga pangutana mag-awhag sa mga estudyante sa pagpangita sa impormasyon diha sa mga kasulatan, makatabang ang pagpangutana sa maong mga pangutana sa dili pa ipabasa sa mga estudyante ang mga bersikulo diin ang mga tubag makita. Kini makapatutok sa atensyon sa mga estudyante sa pagdiskobre sa mga tubag diha sa tudling sa kasulatan samtang kini gibasa.

• Unsa ang nakita ni Nephi sa dihang mibalik siya ngadto sa tolda sa iyang amahan?

• Unsay gilalisan sa mga igsoong lalaki ni Nephi? Ngano man?

Dapita ang usa ka estudyante sa pagbasa og kusog sa 1 Nephi 15:3. Hangyoa ang klase sa pag-ila sa rason ngano nga ang mga igsoong lalaki ni Nephi naglisud sa pagsabut sa mga butang nga gitudlo ni Lehi kanila.

• Sumala sa 1 Nephi 15:3, ngano nga ang mga igsoong lalaki ni Nephi naglisud sa pagsabut sa mga butang nga gitudlo ni Lehi kanila?

• Unsa ang gibuhat ni Nephi aron makat-on og espirituhanong mga kamatuoran? (Aron sa pagtabang sa mga estudyante nga makatubag niini nga pangutana, mahimong pabasahon nimo sila sa 1 Nephi 10:17.)

Dapita ang usa ka estudyante sa pagbasa og kusog sa 1 Nephi 15:8.

• Magkonsiderar nga bag-o lang si Nephi nakadawat og langitnong mga panan-awon agig tubag sa iyang mga pangutana (tan-awa sa 1 Nephi 11–14), ngano nga natural alang niya sa pagpangutana sa iyang mga igsoong lalaki kon nakapangutana na ba sila sa Ginoo?

Dapita ang usa ka estudyante sa pagbasa og kusog sa 1 Nephi 15:9. Dayon paghangyo og usa ka estudyante sa pagsulat sa tubag sa mga igsoong lalaki ni Nephi diha sa pisara:

Kami wala; kay ang Ginoo wala magtug-an sa ingon nga butang nga mahibaloan ngari kanamo.

Sa pisara, badlisi ang pulong “kami wala.”

• Unsay wala buhata sa mga igsoong lalaki ni Nephi?

Isukip ang tubag (nangutana sa Ginoo, nag-ampo, o nangayo sa Ginoo) ngadto sa sentence diha sa pisara aron mabasa kini karon nga:

Kami wala mangutana sa Ginoo; kay ang Ginoo wala magtug-an sa ingon nga butang nga mahibaloan ngari kanamo.

(Sa laing pagkasulti, “Wala kami mangayo, tungod kay ang Ginoo dili makigsulti kanamo.”)

• Unsa ang problema sa panghunahuna nila ni Laman ug Lemuel?

Siguroha nga ang mga estudyante nakakita sa sayop sa panghunahuna sa mga igsoong lalaki ni Nephi. Dapita sila sa pag-usab sa mga pulong sa sentence diha sa pisara aron klaro kining mohulagway ngano nga ang mga igsoong lalaki ni Nephi wala makadawat sa tabang sa Ginoo sa pagsabut sa mga pagtulun-an ni Lehi. Posible nga mga tubag mahimong maglakip sa “Ang Ginoo dili mopahibalo namo sa mga butang tungod kay wala kami mangutana Kaniya” ug “Tungod kay wala kami mangayo sa Ginoo, Siya wala mopahibalo niining mga butanga ngari kanamo.”

Dapita ang usa ka estudyante sa pagbasa og kusog sa 1 Nephi 15:10–11. Ipapangita sa klase ang mga kamatuoran nga gitudlo ni Nephi sa iyang mga igsoong lalaki sa pagtabang nila nga makat-on unsaon nga makaangkon og mga tubag gikan sa Dios.

• Unsa nga tambag ang gihatag ni Nephi sa iyang mga igsoong lalaki sa pagtabang nila nga makasabut sa mga pulong sa ilang amahan ug makadawat og mga tubag gikan sa Dios? (Mitambag si Nephi sa iyang mga igsoong lalaki nga dili magpatig-a sa ilang mga kasingkasing, sa pagpangayo pinaagi sa hugot nga pagtuo, sa pagtuo nga sila makadawat og tubag, ug sa pagkugi sa paghupot sa mga sugo. Tabangi ang mga estudyante nga makakita nga si Nephi nasayud sa kabililhon niini nga mga baruganan tungod kay siya misunod niini sa iyang kaugalingon ug nakadawat og pagpadayag isip resulta.)

Aron matabangan ang mga estudyante nga makaila sa mga baruganan gikan niini nga mga bersikulo, isulat ang mosunod sa pisara:

Kon … , busa …

• Base sa unsay atong nabasa sa 1 Nephi 15:10–11, unsaon nato sa pagkompleto niini nga pamahayag?

Mahimong mogamit ang mga estudyante og lain-laing mga pulong, apan kinahanglan sila nga mopakita og pagsabut nga kon kita mangutana sa Ginoo pinaagi sa hugot nga pagtuo ug pagsunod sa Iyang mga sugo, nan kita maandam sa pagdawat og pagpadayag ug giya gikan Kaniya. (Mahimo nimong isulat sa pisara kini nga baruganan.)

Andama ang mosunod nga mga pangutana sa dili pa ang klase, diha sa pisara o sa handout:

1. Sa unsa nga paagi kamo mopasabut niini nga baruganan sa pagtabang og usa ka tawo nga makasabut unsaon nga matudloan sa Ginoo ug makasabut sa espirituhanong mga kamatuoran?

2. Sa unsa nga paagi nga ang inyong personal nga mga paningkamot nakaapekto sa inyong abilidad sa pagdawat sa giya sa Ginoo ug makasabut sa ebanghelyo?

Ipares-pares ang mga estudyante. Sa matag pares, hangyoa ang usa ka partner sa pagpamalandong sa unang pangutana ug ang usang partner mamalandong sa ikaduhang pangutana. Hangyoa sila sa pagpakigbahin sa ilang mga tubag ngadto sa usag usa. Human makahisgot ang mga estudyante og igo sa ilang mga tubag, pagdapit og pipila sa pagpakigbahin sa ilang mga hunahuna uban sa klase. Ipasabut og maayo nga ang atong paningkamot ug tinguha sa pagpangita sa direksyon sa Espiritu adunay importante nga sangputanan sa atong mga pagpamatuod ug sa atong pagkaduol ngadto sa Ginoo.

1 Nephi 15:12–20

Gipasabut ni Nephi ang pagkatibulaag ug pagkapundok sa Israel

Ilakbit sa pag-summarize ang 1 Nephi 15:12–20. Ipasabut nga aron sa pagtabang nga masulbad ang panaglalis sa iyang mga igsoong lalaki, mitudlo si Nephi kanila sa kahulugan sa panagna ni Lehi mahitungod sa “kinaiyanhon nga mga sanga sa kahoy nga oliba” ug sa mga Hentil (tan-awa sa 1 Nephi 10:12–14; 15:7). Iyang gipasabut nga ang kahoy nga oliba nagrepresentar sa balay sa Israel. Tungod kay ang pamilya ni Lehi mibiya sa Jerusalem ug nabulag gikan sa uban sa balay sa Israel, sama kini sa usa ka sanga nga nabali gikan sa kahoy nga oliba (tan-awa sa 1 Nephi 15:12). Midugang siya sa pagpasabut nga sa ulahing mga adlaw, daghang mga tuig human ang mga kaliwat ni Lehi “mokunhod tungod sa pagkawalay pagtuo” (1 Nephi 15:13), ang kahingpitan sa ebanghelyo ihatag ngadto sa mga Hentil. Ang mga Hentil maoy modala sa ebanghelyo ngadto sa kaliwat ni Lehi, mopahiuli nila ngadto sa kahibalo sa ilang Manunubos ug ngadto sa mga panalangin sa pakigsaad sa ilang mga amahan. Sama kini sa pagpundok ug pagsumbak sa ilang sanga balik ngadto sa kahoy nga oliba (tan-awa sa 1 Nephi 15:13–17). Kini nga pagpahiuli mahitabo dili lamang sa mga kaliwat ni Lehi apan alang sa tanan sa balay sa Israel (tan-awa sa 1 Nephi 15:18–20; tan-awa usab sa 1 Nephi 10:12–14).

Ipamatuod nga ang Ginoo motuman sa Iyang mga saad ug mahinumdom sa Iyang mga pakigsaad uban sa Iyang mga anak. Nagtinguha Siya nga ang tanan makadawat sa mga panalangin sa ebanghelyo.

1 Nephi 15:21–36

Gitubag ni Nephi ang mga pangutana sa iyang mga igsoong lalaki mahitungod sa panan-awon ni Lehi

Ipasabut nga sa nahibilin sa 1 Nephi 15, mabasa nato ang mga tubag ni Nephi sa mga pangutana sa iyang mga igsoong lalaki mahitungod sa panan-awon ni Lehi. Gigamit ni Nephi unsay iyang nakat-unan sa iyang kaugalingong panan-awon sa pagtudlo kanila.

Ipakita ang mosunod nga pamahayag ni Presidente Ezra Taft Benson diha sa pisara o sa usa ka handout. Dapita ang mga estudyante sa pagtag-an sa pulong nga kinahanglang isukip ngadto sa matag sentence.

1. “Sa … makita nato ang gahum sa pagbatok sa tintasyon.”

2. “Ang … adunay gahum sa paglig-on sa mga Santos ug sangkapan sila sa Espiritu.”

3. “Iyang maoy usa sa labing bililhon sa mga gasa nga Iyang gihatag kanato.”

Kon ang mga estudyante nakahatag na sa ilang mga pagtag-an, hangyoa ang usa ka estudyante sa pagbasa og kusog sa 1 Nephi 15:23–24. Dapita ang mga estudyante sa pagpangita og pulong niini nga tudling nga makatabang nila nga saktong makakompleto sa mga pamahayag ni Presidente Benson. Human mabasa ang mga bersikulo, hangyoa ang mga estudyante pagtag-an pag-usab sa pulong nga mokompleto sa matag usa sa mga pamahayag. Ribyuha ang saktong mga tubag uban sa klase. (Mga tubag: 1—pulong sa Dios; 2—pulong sa Dios; 3—pulong. [Tan-awa sa “The Power of the Word,” Ensign, Mayo 1986, 80, 82.])

Ipasiksik sa mga estudyante sa hilum ang 1 Nephi 15:24–25. Dapita ang katunga sa mga estudyante sa pag-ila niini nga mga bersikulo ang pipila ka mga panalangin sa pagsunod sa pulong sa Dios. Hangyoa ang laing katunga sa pag-ila sa mga pulong nga nagsugyot unsaon nato pagsunod ang pulong sa Dios aron madawat kadto nga mga panalangin. Hangyoa ang matag grupo sa pagpakigbahin unsay ilang makit-an.

• Unsay angay natong buhaton nga “mopatalinghug,” “hugot nga mogunit,” ug “mamati” sa pulong sa Dios? (Ang mga tubag mahimong maglakip sa inadlaw nga pagtuon sa kasulatan, pagpaminaw ug pagpatalinghug sa tambag sa dinasig nga mga lider sa Simbahan, ug pagtinguha ug pagsunod sa personal nga pagpadayag pinaagi sa pag-ampo.)

Dapita ang mga estudyante sa pagpahayag sa ilang kaugalingong mga pulong ang usa ka baruganan nga nag-summarize unsay gitudlo niini nga mga bersikulo mahitungod sa pagtuon sa kasulatan ug sa mga panalangin nga ikahatag niini sa atong mga kinabuhi. Usa ka posible nga tubag mao nga ang pagtuon ug pagsunod sa pulong sa Dios kada adlaw makapalig-on nato batok sa mga tintasyon ni Satanas. Sa paghatag sa mga estudyante og oportunidad sa pagpamatuod niini nga baruganan, pangutan-a:

• Kanus-a nga ang inadlaw nga pagtuon sa kasulatan nakalig-on ninyo batok sa tintasyon? (Pahinumdumi ang mga estudyante nga dili sila kinahanglang mopakigbahin og mga kasinatian nga personal o pribado ra kaayo.)

Basaha ang mosunod nga pamahayag ni Elder Robert D. Hales sa Korum sa Napulog Duha ka mga Apostoles:

“Gikinahanglan kini pag-ayo nga mga kamatuoran nga ang Langitnong Amahan mihatag ni Lehi ug ni Nephi og klarong mga panan-awon nga nagrepresentar sa pulong sa Dios isip ang gunitanan nga puthaw. Ang amahan ug ang anak nakakat-on nga ang paghupot niining lig-on, dili mabali, hingpit nga masaligan nga giya mao lamang ang agianan aron pabiling magsubay nianang higpit ug pig-ot nga dalan nga modala ngadto sa atong Manluluwas.” (“Balaan nga mga Kasulatan: Ang Gahum sa Dios alang sa Atong Kaluwasan,” Ensign o Liahona, Nob. 2006, 25).

Pahinumdumi ang mga estudyante nga sa panan-awon ni Lehi, kadtong kinsa hugot nga naggunit sa gunitanan nga puthaw luwas nga nagiyahan agi sa gabon sa kangitngit, nga nagrepresentar sa mga tintasyon sa yawa (tan-awa sa 1 Nephi 12:17).

Ilakbit sa pag-summarize ang 1 Nephi 15:26–29. Sultihi ang mga estudyante nga ang mga igsoong lalaki ni Nephi mihangyo niya sa pagpasabut sa kahulugan sa suba nga nakita sa ilang amahan sa iyang panan-awon. Gipasabut niya nga kini nagrepresentar sa makalilisang nga impyerno alang sa dautan, nagbulag nila gikan sa Dios ug sa Iyang katawhan.

• Unsay namatikdan ni Nephi sa suba nga may tubig nga wala mamatikdi sa iyang amahan? (Ang tubig hugaw.)

Ipasabut nga sa 1 Nephi 15:33–36, nagtudlo si Nephi mahitungod sa kaangayan sa Dios ug ngano nga ang dautan pagabulagon gikan sa matarung. Dapita ang pipila ka mga estudyante nga magpuli-puli sa pagbasa og kusog sa 1 Nephi 15:33–36.

• Ngano nga ang dautan ibulag gikan sa matarung?

• Sa unsa nga paagi nga ang pagkahibalo nga walay mahugaw nga tawo ang makasulod sa gingharian sa Dios makatabang unta kang Laman ug Lemuel?

Awhaga ang mga estudyante sa pagkonsiderar sa mga baruganan nga ilang nakat-unan sa 1 Nephi 15 pinaagi sa pagpamalandong sa mosunod nga mga pangutana sa hilum nga paagi:

• Sa unsa nga paagi nga ang mga panan-awon nila ni Lehi ug Nephi nagpakita sa tinguha sa Dios nila ni Laman ug Lemuel? Sa unsa nga paagi nga kini nagpakita sa tinguha sa Dios diha kaninyo?

• Unsay inyong mahimo sa paggamit sa mga baruganan nga inyong nakat-unan samtang kamo nagtuon niini nga kapitulo? (Mahimo nimong dapiton ang mga estudyante sa pagsulat og mga tubag niini nga pangutana diha sa ilang mga scripture study journal o class notebook.)

Ikonsiderar ang pagtapos sa leksyon pinaagi sa pagbasa pag-usab sa 1 Nephi 15:25 ngadto sa klase. Ipakigbahin ang imong pagpamatuod sa mga panalangin nga moabut kon kita mopatalinghug sa pulong sa Dios ug motuman sa Iyang mga sugo. Ipaniguro kanila ang dakong gugma sa Dios alang nila ug nga Siya mopanalangin kanila sa ilang matarung nga mga paningkamot.

Komentaryo ug Background nga Impormasyon

1 Nephi 15:12–13. Mga Judeo ug mga Hentil

Si Elder Bruce R. McConkie sa Korum sa Napulog Duha ka mga Apostoles miila sa “mga Judeo” ug “mga Hentil” nga gihisgutan sa 1 Nephi 15: “Sila si Lehi ug Nephi mibahin sa tanang mga tawo ngadto sa duha ka mga kampo, ang mga Judeo ug mga Hentil. Ang mga Judeo mao ang mga lumulupyo sa gingharian sa Juda o ang ilang mga kaliwat; ang uban gikonsiderar nga mga Hentil. Sa ingon, kita mao ang mga Hentil nga gihisgutan niini nga kasulatan [1 Nephi 15:13;] kita ang midawat sa kahingpitan sa ebanghelyo; ug kita ang modala niini ngadto sa mga Lamanite, kinsa mga Judeo, tungod kay ang ilang mga amahan gikan sa Jerusalem ug gikan sa gingharian ni Juda” (A New Witness for the Articles of Faith [1985], 556). Timan-i nga ang mga Lamanite gikonsiderar nga mga Judeo tungod kay ang ilang mga katigulangan gikan sa yuta ni Juda.

Si Elder McConkie piho usab nga miila sa mga Hentil nga dako og ikatabang sa Pagpahiuli: “Si Joseph Smith … usa ka Hentil nga pinaagi sa iyang kamot ang Basahon ni Mormon miabut, ug ang mga miyembro sa Ang Simbahan ni Jesukristo sa mga Santos sa Ulahing mga Adlaw … mga Hentil nga nagdala sa kaluwasan ngadto sa mga Lamanite ug ngadto sa mga Judeo” (The Millennial Messiah [1982], 233). Bisan og si Joseph Smith ug ang uban kinsa midala sa Basahon ni Mormon kabahin sa balay sa Israel pinaagi sa linya sa ilang dugo, giisip sila nga mga Hentil tungod kay dili sila gikan sa yuta ni Juda.

1 Nephi 15:13–16. Ulahing adlaw nga Pagpahiuli sa ebanghelyo

Si Presidente Gordon B. Hinckley mipahayag: “Akong mga kaigsoonan, nakaamgo ba kamo kon unsay ania kanato? Nakaamgo ba kamo sa atong dapit niining talagsaong drama sa kasaysayan sa tawo? Mao kini ang importante nga punto sa tanan nga miagi na kaniadto. Kini ang panahon sa pasiuli. Kini ang mga panahon sa pagpahiuli. Kini ang panahon nga ang mga tawo sa tibuok kalibutan moadto sa mga bukid sa balay sa Ginoo aron sa pagtinguha ug pagkat-on sa Iyang mga pamaagi ug sa paglakaw diha sa Iyang mga dalan. Mao kini ang natingban sa tanan nga mga siglo sa panahon sukad sa pagkatawo ni Kristo hangtud sa kasamtangan ug talagsaong adlaw” (“At the Summit of the Ages,” Ensign, Nob. 1999, 74).