Mosiah 19–20

Pasiuna

Human si Alma ug ang iyang mga katawhan milikay sa kasundalohan ni Haring Noah, misugod sa pag-antus si Haring Noah ug ang iyang mga katawhan sa mga sangputanan sa ilang pagkadili matarung, ingon nga gipanagna ni Abinadi—sila giatake ug giulipon sa mga Lamanite, ug giantus ni Haring Noah ang kamatayon pinaagi sa kalayo. Ang anak nga lalaki ni Noah nga si Limhi nahimong hari human sa kamatayon ni Noah. Sa dihang ang kanhing mga pari ni Noah midagit sa usa ka grupo sa anak nga mga babaye sa Lamanite, gibasol sa mga Lamanite ang mga katawhan ni Limhi ug nag-andam sa pag-atake kanila. Ang mga katawhan ni Limhi maisugong nakig-away, ug ilang nasamdan ug nabihag ang hari sa mga Lamanite. Gihupay ni Limhi ang Lamanite nga hari, kinsa midani dayon sa iyang mga katawhan sa pagbalik nga malinawon ngadto sa ilang kaugalingong yuta.

Mga Sugyot alang sa Pagtudlo

Mosiah 19–20

Ang mga Nephite nga diha sa yuta sa Lehi-Nephi nagsinati sa katumanan sa mga panagna ni Abinadi

Dapita ang mga estudyante sa paghunahuna og panahon sa dihang usa ka tawo mipasidaan kanila mahitungod sa kuyaw nga dili nila makita daan. Hangyoa sila sa pagsaysay mahitungod kon giunsa sila sa pagpanalangin tungod kay sila nagsunod og pahimangno. Tabangi ang mga estudyante sa paghisgot sa katuyoan sa mga pasidaan pinaagi sa pagpangutana sa mosunod:

Unsay katuyoan sa usa ka pasidaan? Kinsa ang magpasidaan kaninyo mahitungod sa mga butang nga kinahanglan ninyong likayan o mga butang nga mahimong makadaot kaninyo?
Kang kinsa ang Dios nagpadayag og espiritwal nga mga pasidaan alang sa Iyang Simbahan?

Pahinumdumi ang mga estudyante nga ang Ginoo mipadala ni Abinadi aron sa pagpasidaan sa mga Nephite sa mga sangputanan sa ilang mga sala. Aron matabangan ang mga estudyante sa pagribyu sa mga panagna ni Abinadi ngadto sa mga Nephite diha sa yuta sa Lehi-Nephi, kopyaha ang mosunod nga tsart diha sa pisara. Siguroha ang pagbilin og igo nga luna alang sa mga estudyante sa pagsulat ubos sa matag han-ay sa mga pakisayran nga kasulatan.

Panagna mahitungod sa mga katawhan ni Haring Noah (Mosiah 12:1–2; 17:17)	Katumanan (Mosiah 19:10, 14–15; 20:20; 21:2–4)
Panagna mahitungod ni Haring Noah (Mosiah 12:3; 17:18)	Katumanan (Mosiah 19:18–20)

Dapita ang usa ka estudyante sa pagbasa og kusog sa Mosiah 12:1–2. Hangyoa ang klase sa pag-ila unsa ang gipanagna ni Abinadi nga mahitabo ngadto sa mga katawhan ni Haring Noah tungod kay sila wala maghinulsol. Dapita ang usa ka estudyante sa paglista sa mga sangputanan diha sa kahon sa taas sa walang kilid sa tsart diha sa pisara. Ipabasa og kusog sa laing estudyante ang Mosiah 12:3. Hangyoa ang klase sa pag-ila unsa ang gipanagna ni Abinadi nga mahitabo ni Haring Noah. Ipasulat sa usa ka estudyante kini nga sangputanan diha sa tsart.

Aron matabangan ang mga estudyante sa paghunahuna mahitungod sa kahulugan sa espiritwal nga mga pasidaan nga atong madawat pinaagi sa mga propeta, ipakigbahin ang mosunod nga istorya nga giistorya ni Elder David R. Stone sa Seventy:

“Usa ka Dominggo sa buntag, sobra sa usa ka tuig na ang milabay, nimata kami sa usa ka nindot nga buntag didto sa Santo Domingo diha sa Dominican Republic. Ang adlaw sa Caribbean nagsidlak, ug ang langit naghayag. Usa ka malumo nga hoyohoy naghuyop, hapit wala makapalihok sa mga dahon sa mga kahoy; mainit kini ug malinawon ug walay timik. Apan layo ngadto sa dagat, dili maabut sa among pisikal nga mga pagbati nianang adlawa, ang makahugno nga tiglaglag nagpadulong kanamo, mabangis ug dili masanta. Ang Hurricane Center, nga may responsibilidad sa pagsubay ug pagtagna sa dalan sa Hurricane Georges, kanunay nga naghatag og bag-o nga impormasyon nga anaa sa Internet. Diha sa malinawon, kalmang kahilum nianang buntaga, pinaagi niadtong mga satellite nga nagsubay sa unos, akong nakita ang gipanagna nga dalan sa unos, gitumong sama sa pana diha sa kasingkasing sa Santo Dominggo.

“Sulod sa 48 oras ang unos miigo og grabe kaayo sa isla … mapintas, nagbiya sa dalan niini og pagkaguba, kasubo, ug kamatayon. …

“Dako kaayo sama sa kadaot ug kaguba ug kamatay gikan niining mangilngig nga katingalahang pwersa, aduna pay labaw nga kasubo nga mahimo diha sa kinabuhi sa mga tawo pinaagi sa mga espiritwal nga dagkong unos. Kining mapintas nga mga gahum kasagaran makahimo og mas makagun-ob nga kadaot kay sa pisikal nga mga dagkong unos, tungod kay kini makaguba sa atong mga kalag ug mokawat kanato sa atong mahangturong panan-aw ug saad. …

“Apan kita usab adunay atong mga magbalantay sa espiritwal nga dagkong unos, kadtong kinsang calling mao ang pagbantay ug pagpasidaan, pagtabang kanato sa paglikay sa espiritwal nga kadaot, kaguba ug gani kamatayon. Ang atong mga magbalantay sa tore nailhan kanato isip ang mga apostoles ug mga propeta. Sila ang atong espiritwal nga mga mata sa kalangitan, ug sila nahibalo, pinaagi sa inspirasyon ug panan-aw ug putli nga salabutan, sa dalan nga kining mga unos moagi. Nagpadayon sila sa pagpataas sa ilang mga tingog sa pagpasidaan kanato sa makalolooy nga mga sangputanan sa tinuyo ug patuyang nga mga paglapas sa mga sugo sa Ginoo. Ang tinuyo nga dili pagtagad sa ilang mga pasidaan mao ang pagpadani og kasakit, kasubo, ug kadaot. Ang pagsunod kanila mao ang pagsunod sa pinili nga mga sulugoon sa Ginoo ngadto sa espiritwal nga mga tugwayanan sa kalinaw ug sa kabuhong” (“Spiritual Hurricanes,” Ensign, Nob. 1999, 31–32).

Sa unsa nga paagi kini nga istorya may kalabutan ngadto sa papel ni Abinadi taliwala sa mga katawhan ni Haring Noah?

Sultihi ang mga etudyante nga ang mosunod nga kalihokan motabang kanila nga mahimong mas mapamilyar sa dagan sa mga hitabo sa Mosiah 19–20 ug makita ang katumanan sa mga panagna ni Abinadi dinhi niini nga mga kapitulo. Human niini nga kalihokan, kompletohon sa mga estudyante ang tuo nga kolum sa tsart diha sa pisara.

Isulat ang mosunod nga 11 ka mga pamahayag diha sa pisara sa wala pa ang klase, o andama kini isip usa ka handout alang sa matag estudyante. Dapita ang mga estudyante nga i-scan ang Mosiah 19-20. Samtang sila nagbasa, pabutangi nila og numero ang pagkasunod-sunod sa mga panghitabo diha sa lista. Mahimo nimong sultihan ang mga estudyante nga ang mga summary sa kapitulo naghatag og makatabang nga mga ilhanan.

Si Gideon nagtinguha sa pagpatay ni Haring Noah.

Ang mga kababayen-an ug kabataan nga Nephite nangamuyo sa mga Lamanite sa dili pagpatay kanila.

Nag-antus si Haring Noah og kamatayon pinaagi sa kalayo.

Usa ka kasundalohan nga Lamanite miabut diha sa mga utlanan sa Shemlon.

Gikidnap sa mga pari ni Noah ang 24 ka anak nga mga babayeng Lamanite.

Nangamuyo ang haring Lamanite sa iyang kasundalohan sa pagluwas sa mga katawhan ni Limhi.

Milayas si Noah ug pipila sa iyang mga katawhan gikan sa mga Lamanite, gibiyaan ang ilang mga asawa ug mga anak.

Nagsugo si Limhi sa iyang mga katawhan sa dili pagpatay sa haring Lamanite.

Dihay kalinaw tali sa mga Nephite ug mga Lamanite sulod sa duha ka tuig.

Nagsaad si Limhi nga ang iyang mga katawhan motugyan katunga sa ilang mga kabtangan ngadto sa mga Lamanite.

Nasanta sa mga Nephite ang atake sa mga Lamanite ug nabihag ang haring Lamanite.

Hatagi ang mga estudyante og 5 ngadto sa 10 minutos sa pagkompleto niini nga kalihokan. Dayon gamita ang lista sa pagribyu sa dagan sa mga hitabo diha sa Mosiah 19–20. (Ang husto nga pagkasunod-sunod sa mga panghitabo sugod sa ibabaw sa lista, mao ang mosunod: 1, 4, 5, 2, 8, 11, 3, 10, 7, 6, 9.)

I-refer og balik ang mga estudyante ngadto sa tsart diha sa pisara. Bahina ang klase ngadto sa duha ka grupo. Hangyoa ang usa ka grupo sa pagsiksik sa Mosiah 19:10, 14–15; 20:20; 21:2–4 aron tan-awon kon sa unsa nga paagi ang mga panagna ni Abinadi mahitungod sa mga katawhan ni Haring Noah nangatuman. Hangyoa ang ikaduhang grupo sa pagsiksik sa Mosiah 19:18–20 aron tan-awon kon sa unsa nga paagi ang panagna ni Abinadi mahitungod ni Haring Noah natuman. Dapita ang usa ka estudyante gikan sa matag grupo sa pagsummarize kon sa unsa nga paagi ang mga panagna ni Abinadi nangatuman. Dapita ang lain nga estudyante sa pagsulat sa ilang mga summary diha sa tsart.

Dapita ang mga estudyante sa pagbasa og hilum sa Mosiah 20:21.

Unsa ang gisulti ni Gideon nga hinungdan sa pag-antus sa mga katawhan?

Hangyoa ang mga estudyante sa pagpasabut diha sa ilang kaugalingong mga pulong unsay gusto ni Gideon nga masabtan sa mga katawhan. Samtang mahimo silang mogamit og lahi nga mga pulong, ang mga estudyante kinahanglan nga mopakita og pagsabut nga ang pagsalikway sa mga pulong sa mga sulugoon sa Ginoo nagdala og mga kasakit ug kaguol. (Mahimo nimong isulat sa pisara kini nga baruganan.)

Sultihi ang mga estudyante nga ang Ginoo naghatag og susama nga pasidaan ngadto niadtong diha sa katapusang mga adlaw kinsa wala maminaw ngadto sa Iyang tingog. Hangyoa ang usa ka estudyante sa pagbasa og kusog sa Doktrina ug mga Pakigsaad 133:70–72. Mahimo nimong isugyot nga isulat sa mga estudyante kini nga pakisayran diha sa margin sa ilang mga kasulatan tupad sa Mosiah 20:21.

Unsa ang pipila ka mga butang nga gitudlo sa mga propeta ug mga apostoles sa atong panahon nga makatabang kanato sa paglikay sa pag-antus ug kaguol? Unsa ang ilang gitudlo nga makatabang pagdala kanato og kalinaw ug kalipay ug makatabang kanato sa pagbalik ngadto sa presensya sa Dios? (Mahimo nimong pakit-on ang mga estudyante og bag-ong edisyon sa kinatibuk-ang komperensya sa Ensign ug hinganli ang pipila ka mga ulohan sa mga pakigpulong nga gihatag sa mga propeta.)

Dapita ang mga estudyante sa pagsulti mahitungod sa mga panahon nga sila napanalanginan tungod kay sila nagsunod sa tambag sa mga lider sa Simbahan.

Aron matabangan ang mga estudyante sa pagsabut nga ang pagpamati sa mga pulong sa mga propeta makadala kanato og kalinaw ug nagtabang kanato sa pagbalik ngadto sa presensya sa Dios, ipakigbahin ang mosunod nga pamahayag ni Elder Robert D. Hales sa Korum sa Napulog Duha ka mga Apostoles:

Imahe

Elder Robert D. Hales

“Ang atong espiritwal nga kahilwasan anaa sa pagpaminaw sa tataw nga tingog sa atong buhing propeta. Kon kita maminaw sa iyang tingog ug mosunod sa iyang tambag, kita makahimo sa pagpuyo ingon nga si Kristo gusto kanato nga magpuyo ug molahutay hangtud sa katapusan aron nga usa ka adlaw kita, uban sa atong mga pamilya, mobalik ngadto sa presensya sa atong Langitnong Amahan ug sa atong Manluluwas nga si Jesukristo” (“Hear the Prophet’s Voice and Obey,” Ensign, Mayo 1995, 17).

Taposa ang leksyon pinaagi sa pagpamatuod sa kalinaw ug espiritwal nga kahilwasan nga moabut tungod sa pagsunod sa tambag sa mga sulugoon sa Ginoo.

Ribyu sa Scripture Mastery

Kon itugot sa panahon, mahimo nimong i-ribyu ang mga scripture mastery passage nga imong gitudlo niining tuiga aron sa pagtabang sa mga estudyante sa paghinumdom sa importanting mga pulong sa matag tudling.

Hatagi ang mga estudyante og pipila ka minuto sa pagribyu sa mga scripture mastery passage nga ilang nakat-unan kutob niining tuiga sa ting-eskwela. Dapita ang usa ka estudyante sa pagduol sa atubangan sa classroom nga dala ang iyang mga kasulatan. Hangyoa ang estudyante sa pagpakli ngadto sa usa sa mga scripture mastery passage nga dili ipakita kang bisan kinsa. (Kon adunay mga scripture mastery card, mahimo nimong pagamiton ang estudyante.) Pasulata ang estudyante og usa ka pulong gikan sa scripture mastery passage diha sa pisara. (Awhaga ang estudyante sa pagpili og importanting mga pulong gikan sa tudling kay sa dili kaayo mahinungdanong mga pulong sama sa ug o ang.) Dapita ang nahibilin sa klase sa pagsiksik sa ilang mga kasulatan alang sa scripture mastery passage nga sa ilang hunahuna didto naggikan ang pulong. Kon walay makakita sa husto nga tudling gamit ang usa ka pulong, hangyoa ang estudyante sa pagsulat og laing pulong gikan sa scripture mastery passage diha sa pisara. Balika kini nga proseso hangtud adunay bisan usa lamang ka estudyante ang nakakita sa husto nga tudling. Dapita ang nahibilin sa klase sa pagpakli ngadto sa tudling, ug ipa-recite kini sa mga estudyante og dungan. Dayon balika ang kalihokan ngadto sa laing estudyante ug lain nga scripture mastery passage.