Leksyon 64
Mosiah 23–24
Pasiuna
Human milayas si Alma ug ang iyang mga katawhan gikan sa kasundalohan ni Haring Noah, gitukod nila ang usa ka matarung nga siyudad. Bisan tuod sila nakabig ngadto sa ebanghelyo, nasinati nila ang mga kasakit ug mga hagit. Gibutang sila sa mga Lamanite sa pagkaulipon. Samtang si Alma ug ang iyang mga katawhan nagpakita og hugot nga pagtuo og pagpailub, gipagaan sa Ginoo ang ilang mga palas-anon ug sa wala madugay giluwas sila gikan sa pagkaulipon. (Hinumdumi nga ang Mosiah 23–24 gibana-bana nga naglakip sa samang yugto sa panahon ingon sa Mosiah 19–22.)
Mga Sugyot alang sa Pagtudlo
Mosiah 23:1–20
Ang Ginoo nagtabang ni Alma ug sa iyang mga katawhan paglayas gikan sa kasundalohan ni Haring Noah, ug sa pagtukod og usa ka matarung nga siyudad
Pakit-a ang mga estudyante og litrato ni Alma Namunyag diha sa mga Katubigan sa Mormon (62332; Libro sa mga Hulagway sa Ebanghelyo [2009], nu. 76). Dapita ang usa ka estudyante sa pagsulti sa klase unsay iyang nahibaloan mahitungod sa tawo kinsa namunyag sa uban diha sa litrato. (Kon ang mga estudyante maglisud sa pagtubag, mahimo nimong isugyot nga ilang basahon ang summary sa kapitulo sa Mosiah 18 sa pagpahimumdom kanila sa istorya ni Alma ug sa iyang mga katawhan diha sa mga Katubigan sa Mormon.)
Ipares-pares ang mga estudyante. Dapita ang matag pares sa pagpuli-puli og basa ngadto sa usag usa gikan sa Mosiah 23:1–5, 19. Hangyoa sila sa pagpangita og hugpong sa mga pulong nga nagpakita kon giunsa sa Ginoo pagpanalangin si Alma ug ang iyang mga katawhan samtang sila mihinulsol og mipili sa pagpuyo nga matarung. (Mahimo nimong isugyot nga markahan nila kini nga mga hugpong sa mga pulong.) Hangyoa ang mga estudyante sa pagreport sa ilang nakit-an.
Dapita ang mga estudyante sa pagtan-aw sa ilang mga diagram nga nagpakita sa kinatibuk-ang pagpasabut sa mga panaw diha sa Mosiah 7–24. Tudloi sila sa pagdrowing sa yuta sa Helam sa ilang mga diagram diha sa angay nga dapit. Padrowinga usab sila og pana gikan sa mga Katubigan sa Mormon ngadto sa yuta sa Helam, ug pabutangi og ngalan kini nga pana og “Alma ug ang iyang mga katawhan mibiya.” (Alang sa kompleto nga diagram, tan-awa ang appendix diha sa katapusan niini nga manwal.)
Sa lakbit ipasabut nga sa Mosiah 23:6–14, mabasa nato nga gisalikway ni Alma ang hangyo sa mga katawhan nga mahimo siya nga ilang hari. Dapita ang usa ka estudyante sa pagbasa og kusog sa Mosiah 23:9–10, 12. Hangyoa ang klase sa pagpangita sa paghulagway ni Alma sa epekto ni Haring Noah diha kaniya ug sa iyang mga katawhan. Hangyoa ang mga estudyante sa pagreport sa ilang nakit-an.
-
Unsay gitudlo sa mga hugpong sa mga pulong “nabitik sa laang” ug “nagapos sa mga gapos sa kadautan” mahitungod sa mga epekto sa sala?
-
Nganong makatabang kanato ang pag-ila sa mga impluwensya nga migiya kanato ngadto sa pagpakasala sa nangaging panahon?
-
Human kita maghinulsol, ngano kaha nga importante ang paghinumdom kon unsa “kasakit” ang paghinulsol?
Hangyoa ang usa ka estudyante sa pagbasa og kusog sa Mosiah 23:13. Ipasabut ang tambag ni Alma nga “mobarug nga malig-on diha sa kalingkawasan diin kamo nahimo nga gawasnon.”
-
Sa unsa nga paagi kini nga tambag magamit ngadto sa proseso sa paghinulsol? (Tabangi ang mga estudyante sa pagsabut nga sa panahon nga ang Ginoo nagluwas kanato gikan sa sala ug nagsinati kita sa kagawasan sa pagpasaylo, kinahanglan gayud nga maghimo kita og matarung nga mga pagpili sa pagpadayon niana nga kalingkawasan.)
Dapita ang mga estudyante sa pagsiksik og hilum sa Mosiah 23:14–18, mangita sa pipila ka mga butang nga gitudlo ni Alma sa mga katawhan nga buhaton aron sa pagpadayon sa ilang kalingkawasan. Dapita ang pipila ka mga estudyante sa pagreport unsay ilang nakit-an.
Dapita ang usa ka estudyante sa pagbasa og kusog sa Mosiah 23:19–20. Hangyoa ang klase sa pag-ila sa hugpong sa mga pulong nga nagpakita nga gipanalanginan sa Ginoo ang mga katawhan kon gipili nila ang pagpuyo og matarung (“pag-uswag sa hilabihan”).
-
Unsaon ninyo sa pagsummarize unsay inyong nakat-unan gikan sa kasinatian ni Alma ug sa iyang mga katawhan? (Diha sa ubang mga kamatuoran, ang mga estudyante mahimong mosulti nga kon kita mohinulsol ug mopili sa pagpuyo nga matarung, ang Ginoo mopanalangin kanato ug mopalingkawas kanato gikan sa mga gapos sa kadautan.)
-
Kanus-a ninyo nakita kini nga baruganan nga natuman diha sa inyong kinabuhi o diha sa kinabuhi sa usa ka higala o sakop sa pamilya? (Pahinumdumi ang mga estudyante nga dili sila kinahanglan nga mopakigbahin og mga kasinatian nga personal o pribado.)
Mosiah 23:21–29
Usa ka kasundalohan nga mga Lamanite ug ang dautang mga pari ni Haring Noah nagdala ni Alma ug sa iyang mga katawhan ngadto sa pagkaulipon
Aron matabangan ang mga estudyante sa pagsabut nga kadtong kinsa mga matarung kinahanglan gayud nga magsinati gihapon og mga pagsulay, pangutan-a ang mga estudyante sa paghunahuna og usa ka panahon sa ilang mga kinabuhi nga sila makakonektar ngadto sa mosunod nga pamahayag ni Elder Richard G. Scott sa Korum sa Napulog Duha ka mga Apostoles:
“Ang pagsulay … gikinahanglan bisan kon kamo nagpuyo og usa ka takus, matarung nga kinabuhi ug nagmasulundon sa mga sugo [sa Dios]. Igo lang nga ang tanan ingon og maayo ang dagan, ang mga hagit kasagaran moabut sa dinaghang takal nga gihatag og dungan” (“Trust in the Lord,” Ensign, Nob. 1995, 16).
Hangyoa ang mga estudyante sa pagsiksik sa Mosiah 23:21–22 aron sa pagdiskubre kon ngano ang Ginoo motugot niadtong kinsa nagpili sa pagpuyo og matarung sa pagsinati og mga pagsulay ug kalisdanan. Samtang ang mga estudyante nagreport sa unsay ilang nakit-an, tabangi sila sa pagsabut nga ang Ginoo mosulay sa atong pailub ug hugot nga pagtuo aron sa pagtabang kanato nga madugangan ang atong pagsalig diha Kaniya.
Dapita ang mga estudyante sa pagsulat sa mosunod nga mga pangutana diha sa ilang mga scripture study journal o mga class notebook. Hangyoa sila sa pagpamalandong niini nga mga pangutana samtang sila nagtuon sa nahibilin sa Mosiah 23. Kinahanglan dili sila mosulat sa ilang mga tubag hangtud imo silang sugoon sa pagbuhat sa ingon sa kadugayan sa leksyon.
-
Unsang mga pagsulay ang inyong gisinati karon?
-
Sa unsa nga paagi kamo makabansay og hugot nga pagtuo ug pagsalig diha sa Dios atol sa inyong mga panahon sa pagsulay?
Hangyoa ang mga estudyante sa pagbasa sa Mosiah 23:23–29. Dapita sila sa pagpangita og mga paagi si Alma ug ang iyang mga katawhan gisulayan ug unsa ang ilang gibuhat sa pagpakita sa ilang pagsalig sa Dios.
-
Sa unsa nga paagi nga ang pag-ampo ug ang pagsunod sa tambag sa propeta nagtabang kanato atol sa pagsulay? (Nakatabang kini kanato sa pagdugang og pailub ug hugot nga pagtuo. Nakatabang usab kini kanato sa pagdawat og kalig-on, personal nga pagpadayag, kalinaw, ug pagsalig aron kita makalahutay sa atong mga pagsulay o makakaplag og kaluwasan gikan niini.)
Mosiah 23:30–24:25
Nag-antus si Alma ug ang iyang mga katawhan sa pagpanggukod, apan ang Ginoo nagpagaan sa ilang mga palas-anon ug sa milagrosong paagi nagluwas kanila
Aron matabangan ang mga estudyante sa pagsabut sa relasyon ni Amulon sa mga Lamanite ug sa ilang hari, i-summarize ang Mosiah 23:30–39 ug 24:1–7. Ipasabut nga si Amulon mao ang lider sa dautang mga pari ni Haring Noah, kinsa misalikway ni Alma tungod sa pagsuporta ni Abinadi. Si Amulon, kauban sa ubang dautan nga mga pari ug sa ilang mga asawa nga mga Lamanite, nakig-uban sa mga Lamanite. Nakaangkon si Amulon sa pagsalig sa hari nga Lamanite, kinsa mitudlo dayon kaniya sa pagmando sa tibuok kayutaan sa mga Nephite diha sa yuta sa Helam, lakip sa mga katawhan ni Alma.
Dapita ang usa ka estudyante sa pagduol sa atubangan sa klasehanan, ug hangyoa siya sa pagbutang og walay sulod nga backpack sa likod. (Ang estudyante manginahanglan sa iyang mga kasulatan.) Pangutan-a ang estudyante kon unsa ka sayon ang pagdala sa walay sulod nga backpack sa tibuok adlaw. Dapita kini nga estudyante sa pagbasa og kusog sa Mosiah 24:8–11. Matag higayon nagbasa ang estudyante mahitungod sa usa ka butang nga unta mahimong usa ka pagsulay alang ni Alma ug sa iyang mga katawhan, pagbutang og dakong bato o ubang bug-at nga butang ngadto sa backpack. Kon mahuman og basa ang estudyante, pangutan-a siya kon unsa ka sayon ang pagdala sa puno nga backpack sa tibuok adlaw. (Ang estudyante kinahanglan nga magpabilin diha sa atubangan sa klase ug magpas-an sa bug-at nga backpack hangtud sugoon sa pagpalingkod.) Pangutan-a ang klase:
-
Unsa ang girepresentar sa dagkong mga bato o bug-at nga mga butang sa backpack diha sa atong mga kinabuhi?
-
Sa unsa nga paagi kini nga mga matang sa mga palas-anon nakaapekto kanato?
Hangyoa ang usa ka estudyante sa pagbasa og kusog sa Mosiah 24:10–12. Dapita ang klase sa pagpangita kon unsay gihimo sa mga katawhan ni Alma aron madawat ang panabang sa ilang mga palas-anon. Dapita ang mga estudyante sa pagpasabut kon unsa ang ilang nakit-an.
-
Sa unsa nga paagi ang pag-ampo nagtabang kanato kon kita adunay malisud nga mga palas-anon?
-
Kon kita nagsinati og mga pagsulay, ngano kahang makahupay nga mahibalo nga ang Dios nasayud sa “mga hunahuna sa [atong] mga kasingkasing”?
Pagdapit og mga estudyante sa pagbasa sa Mosiah 24:13–15 aron mahibaloan kon unsay nahitabo sa mga katawhan ni Alma samtang sila nagpadayon sa pag-ampo alang sa panabang.
-
Unsa ang gisaad sa Ginoo nga buhaton alang sa mga katawhan ni Alma? (Samtang ang mga estudyante nagtubag, mahimong mohangyo ka og laing estudyante o duha sa pag-alsa sa ubos sa backpack aron sa pagpagaan sa palas-anon sa estudyante nga nagpas-an niini—sa pagtimaan kon unsaon sa Ginoo pagpagaan sa atong mga palas-anon.) Sa unsa nga paagi kini nga saad may kalabutan ngadto sa pakigsaad nga ilang gihimo diha sa mga Katubigan sa Mormon? (Tan-awa sa Mosiah 18:8–10.)
-
Nganong makatabang kini nga mahibalo nga ang Ginoo dili sa kanunay diha-diha mokuha sa atong mga palas-anon o mokuha sa atong mga hagit?
-
Unsay atong makat-unan gikan sa paagi nga si Alma ug ang iyang mga katawhan miatubang sa ilang mga pagsulay?
-
Kanus-a ninyo nabati nga ang Ginoo naghatag kaninyo og kalig-on sa paglahutay og pagsulay o pagpas-an og palas-unon?
Dapita ang mga estudyante sa pagbasa og hilum sa Mosiah 24:16–17, 21 Hangyoa sila sa pagpangita og mga pulong nga mohulagway pa kon sa unsa nga paagi ang mga katawhan miatubang sa ilang mga pagsulay ug sa unsa nga paagi ang Ginoo mitabang kanila. Dapita ang usa o duha ka mga estudyante sa pagpasabut sa ilang kaugalingon nga mga pulong sa bisan unsa nga koneksyon nga ilang makita tali sa mga lihok sa mga katawhan ug sa mga lihok sa Ginoo. Isulat ang mosunod nga mga baruganan diha sa pisara: Kon kita mapailubong mosunod sa kabubut-on sa Ginoo, molig-on Siya kanato ug moluwas kanato gikan sa atong mga pagsulay sa Iyang panahon.
Dapita ang estudyante diha sa atubangan sa klase sa pagkuha sa backpack. Hangyoa siya sa paghulagway kon unsay bation nga walay palas-anon. Dapita ang mao gihapon nga estudyante sa pagbasa sa Mosiah 24:21–22. Mahimo nimong hangyoon ang estudyante sa pagpakigbakigbahin kon sa unsa nga paagi siya makakonektar ngadto sa unsay gihimo sa mga katawhan niini nga mga bersikulo.
I-summarize ang Mosiah 24:18–25 pinaagi sa pagpasabut nga si Alma ug ang iyang mga katawhan nakalayas tungod kay gihimo sa Ginoo nga makatulog og lawom ang mga Lamanite. Dayon gigiyahan sa Ginoo si Alma ug ang iyang mga katawhan ngadto sa Zarahemla, diin si Haring Mosiah miabiabi kanila uban sa hingpit nga kalipay. Si Alma ug ang iyang mga katawhan “mibu-bu sa ilang mga pasalamat ngadto sa Dios,” nasayud nga “walay usa nga makaluwas kanila gawas kini sa Ginoo nga ilang Dios” (Mosiah 24:21; tan-awa usab sa Mosiah 25:16).
Sa ilang mga diagram nga nagpakita sa kinatibuk-ang pagpasabut sa mga panaw diha sa Mosiah 7–24, ipadrowing sa mga estudyante ang arrow gikan sa yuta sa Helam ngadto sa yuta sa Zarahemla. Sultihi sila sa pagbutang og ngalan niini nga panaw “Ang paglayas sa mga katawhan ni Alma.”
Sa pagtapos, dapita ang mga estudyante sa pagsulat og mga tubag sa duha ka mga pangutana nga ilang gisulat sa ilang mga scripture study journal sa bag-o pa ang leksyon. Hangyoa sila sa pagpamalandong sa ilang mga pagsulay ug sa unsa nga paagi sila makabansay og hugot nga pagtuo ug pagsalig diha sa Dios aron sa pagtabang kanila sa paglahutay. Pakigbahin sa imong pagpamatuod nga kon kita mapainubsanong mosunod sa kabubut-on sa Ginoo, molig-on Siya kanato ug moluwas kanato gikan sa atong mga pagsulay sa Iyang panahon. Mahimo usab nimong dapiton ang mga estudyante sa pagpakigbahin og mga ehemplo kabahin sa unsa nga paagi ang Ginoo naglig-on kanila diha sa ilang mga pagsulay.
Komentaryo ug Background nga Impormasyon
Mosiah 21–24. Pagpakita og kalahi sa pagkaulipon sa mga katawhan ni Limhi ngadto sa pagkaulipon sa mga katawhan ni Alma
|
Mga katawhan ni Limhi |
Mga katawhan ni Alma |
|---|---|
|
Naulipon sila human sa daghang paagas og dugo (tan-awa sa Mosiah 21:5–13). |
Naulipon sila nga walay paagas og dugo (tan-awa sa Mosiah 23:35–38). |
|
Ang Ginoo dugay mitubag sa ilang pangamuyo tungod sa ilang mga kadautan(tan-awa sa Mosiah 21:15). |
Ang Ginoo mitubag dayon sa ilang mga pag-ampo (tan-awa sa Mosiah 23:10–13). |
|
Ang ilang mga palas-anon migaan tungod kay ang Ginoo mipahumok sa mga kasingkasing sa mga Lamanite (tan-awa sa Mosiah 21:15). |
Ang Ginoo mipalig-on kanila aron sila makadaug sa ilang mga alantuson uban sa kasayon (tan-awa sa Mosiah 24:14–15). |
|
Si Gideon naghunahuna og plano sa paglayas(tan-awa sa Mosiah 21:36; 22:1–9). |
Ang Ginoo nag-ingon kanila, “Pagmadasigon, kay pagkaugma Ako moluwas kaninyo gikan sa pagkaulipon” (Mosiah 24:16). |
|
Gihubog nila ang mga gwardiya (tan-awa sa Mosiah 22:10). |
Gihimo sa Ginoo nga ang mga gwardiya makatulog (tan-awa sa Mosiah 24:19). |
Mosiah 23:21. Sa unsa nga paagi nga ang mga pagsulay usa ka kaayohan alang kanato?
Bisan tuod og ang mga katawhan kinsa misunod ni Alma naghinulsol ug nagmatinud-anon, ang Ginoo mitugot kanila nga sa makadiyot daug-daugon sa mga Lamanite isip usa ka pagsulay sa ilang pagpailub ug hugot nga pagtuo.
Gitudlo ni Elder Orson F. Whitney sa Korum sa Napulog Duha ka mga Apostoles nga ang tanan nga atong nasinati nagtudlo kanato og bililhong mga leksyon:
“Walay kasakit nga atong giantus, walay pagsulay nga atong nasinati ang makawang. Kini nakapakat-on kanato, sa pagpalambo sa mga kinaiya sama sa pagpailub, hugot nga pagtuo, kalig-on, ug pagkamapainubsanon. Ang tanan nga atong giantus ug ang tanan nga atong gilahutay, ilabi na kon mapailubon kitang nagsagubang niini, nagpalig-on sa atong kinaiya, nagputli sa atong mga kasingkasing, nagpalambo sa atong mga kalag, ug naghimo natong mas malumo ug maloloy-on, mas takus nga tawgong mga anak sa Dios … ug pinaagi kini sa kasubo ug pag-antus, kahago ug kalisdanan, nga kita makadawat sa pagmatuto nga kita mianhi aron sa pag-angkon ug diin mohimo natong mas sama sa atong Amahan ug Inahan sa langit” (diha sa Spencer W. Kimball, Faith Precedes the Miracle [1972], 98.)
Si Elder Richard G. Scott sa Korum sa Napulog Duha ka mga Apostoles mipasabut og dugang sa bili ug katuyoan sa mga pagsulay:
“Kon kadtong mga pagsulay dili mga sangputanan sa inyong pagkamasinupakon, kini mga ebidensya nga ang Ginoo mibati nga kamo andam nga molambo pa (tan-awa sa Prob. 3:11–12). Busa Siya naghatag kaninyo og mga kasinatian nga nag-awhag og kalamboan, pagsabut, ug kapuangod, nga mohashas kaninyo alang sa inyong mahangturong kaayohan. Aron pagkuha kaninyo gikan sa hain kamo nahimutang ngadto sa dapit nga gusto Niyang inyong adtoan nanginahanglan og taas nga pag-inat, ug kana sa kinatibuk-an nagdala og kalisdanan ug kasakit” (“Trust in the Lord,” Ensign, Nob. 1995, 16–17).
Mosiah 24:15–16. Sa unsa nga paagi nga ang atong kinaiya nakaapekto sa atong peronal nga kalamboan pinaagi sa mga pagsulay?
Si Elder Richard G. Scott sa Korum sa Napulog Duha ka mga Apostoles miawhag kanato sa pagsalig diha sa Ginoo kon kita nagsinati og mga hagit:
“Ang Ginoo naghatag og gibug-aton sa inyong personal nga pagtubo ug paglambo. Kana nga paglambo mokusog kon kamo andam sa pagtugot Kaniya sa paggiya kaninyo sa matag kasinatian sa pagtubo nga inyong masinati, bisan kon kini sa sinugdanan inyo bang indibidwal nga kagustohan o dili. Kon mosalig kamo sa Ginoo, kon andam kamo nga ang inyong kasingkasing ug hunahuna ma-sentro diha sa Iyang kabubut-on, ug kon kamo mangayo nga magiyahan sa Espiritu Santo sa paghimo sa Iyang kabubut-on, kamo makasiguro sa kinadak-ang kalipay diha sa inyong agianan ug ang labing makatagbaw nga kalampusan niining mortal nga kasinatian. Kon moreklamo kamo sa tanang butang nga gisugo kaninyo, o maisugong mosupak sa matag dili maayo nga hagit, naghimo kamo niini nga mas malisud alang sa Ginoo sa pagpanalangin kaninyo” (“Finding Joy in Life,” Ensign, Mayo 1996, 25).