Leksyon 53
Mosiah 3
Pasiuna
Nagpadayon sa iyang pakigpulong ngadto sa iyang mga katawhan, si Haring Benjamin mihatag sa mga pulong sa usa ka anghel nga misulti kaniya kalabut sa pangalagad ni Jesukristo. Gipamatuod ni Haring Benjamin nga pinaagi sa hugot nga pagtuo diha ni Jesukristo ug paghinulsol, kadtong kinsa nakasala makadawat og kaluwasan. Gitudlo usab niya nga pinaagi sa Pag-ula ni Jesukristo, ang indibidwal kinsa motugyan ngadto sa mga pagdani sa Balaang Espiritu “isalikway ang kinaiyanhon nga pagkatawo ug mahimo nga usa ka santos”(Mosiah 3:19).
Mga Sugyot alang sa Pagtudlo
Pahinumdom: Kon sa miaging leksyon imong giawhag ang mga estudyante sa pagmemorya ug sa paggamit sa Mosiah 2:17, hunahunaa ang paghatag kanila og oportunidad sa pagpakigbahin sa ilang mga kasinatian sulod niining adlawa. Pagmatngon nga dili mokuha og dako kaayo nga panahon niini nga ribyu. Pagbilin og igo nga panahon sa paghisgot sa mga doktrina ug mga baruganan diha sa Mosiah 3.
Mosiah 3:1–10
Naghatag si Haring Benjamin og mga pulong sa anghel mahitungod sa Pag-ula ni Jesukristo
Ipakita ang usa ka walay sulod nga baso ug usa ka sudlanan sa tubig. Dapita ang usa ka estudyante sa pagpakita kon unsay gidaghanon sa tubig nga iyang ibu-bu ngadto sa baso alang sa usa ka tawo kinsa gusto nga motilaw lamang sa tubig. Dayon sugoa ang estudyante sa pagpakita kon unsay gidaghanon sa iyang ibu-bu alang sa usa ka tawo kinsa gusto nga matagbaw. Hangyoa ang mga estudyante sa pagpamalandong sa mosunod nga mga pangutana:
-
Kon ang tubig nagrepresentar og hingpit nga kalipay, unsay gidaghanon ang inyong gusto sa inyong baso?
Ipasabut ngadto sa mga estudyante nga ang mga pagtulun-an diha sa Mosiah 3 motabang kanila sa pagkakita kon sa unsa nga paagi sila mapuno sa hingpit nga kalipay.
Dapita ang usa ka estudyante sa pagbasa og kusog sa Mosiah 3:2–5. Hangyoa ang klase sa pagpangita sa tinubdan sa mensahe ni Haring Benjamin diha sa Mosiah 3.
Hatagi og gibug-aton nga ang Mosiah 3 naglangkob og usa ka pamahayag sa anghel sa “malipayon nga mga balita sa dako nga kalipay” (Mosiah 3:3). Dapita ang pipila ka mga estudyante sa pagpuli-pulig basa og kusog gikan sa Mosiah 3:5–10. Hangyoa ang klase sa pagpangita og mga pulong nga nagtabang kanila nga mas modayeg sa misyon ni Jesukristo. Mahimo nimong isugyot nga markahan nila kini nga mga pulong. Dapita ang pipila ka mga estudyante sa pagpakigbahin sa mga pulong nga ilang nakit-an.
-
Unsay gitabang sa Mosiah 3:7 kanimo nga masabtan ang mahitungod sa misyon sa Manluluwas?
-
Ngano sa imong hunahuna ang anghel miingon nga kini nga mensahe magdala og dakong kalipay?
Dapita ang mga estudyante sa pagsulat og usa ka sentence nga summary sa Mosiah 3:5–10 diha sa ilang mga scripture study journal o mga class notebook. Human sila adunay igo nga panahon sa pagsulat, dapita ang pipila kanila sa pagpakigbahin kon unsay ilang nasulat. Ang mga summary sa mga estudyante kinahanglan nga mopakita og pagsabut sa pagtulun-an sa anghel nga nag-antus si Jesukristo aron kita maluwas gikan sa atong mga sala.
Mahimo nimong i-follow up ang mga tubag sa mga estudyante sa mosunod nga pangutana:
-
Unsa ang inyong mga pagbati samtang kamo naghunahuna mahitungod sa unsay nabuhat sa Manluluwas alang kaninyo?
Aron matabangan ang mga estudyante sa pagpalawom sa ilang pagsabut sa pag-antus sa Manluluwas, ipakigbahin ang mosunod nga pamahayag ni Elder James E. Talmage sa Korum sa Napulog Duha ka mga Apostoles:
“Ang kasakit ni Kristo didto sa tanaman dili matugkad sa may kinutubang hunahuna, ang hilabihang kasakit niini ug ang hinungdan. Siya nanglimbasog ug nag-agulo ubos sa gibug-aton nga walay laing binuhat kinsa mipuyo sa yuta maghunahuna nga posible. Dili kadto usa ka pisikal nga kasakit, ni mental nga paghigwaos lamang, nga nakapahimo Kaniya sa pag-antus sa ingon nga kasakit nga nakahimo sa pag-agas sa dugo gikan sa matag lungag sa panit; apan usa ka espirituhanong paghingutas sa kalag nga ang Dios lamang ang makahimo sa pagsinati. … Niana nga oras sa kasakit si Kristo miatubang ug mibuntog sa tanang mga kabangis nga gipahamtang ni Satanas, ‘ang prinsipe sa kalibutan’. … Sa pipila ka paagi, aktwal ug tinuod nga makalilisang bisan og ngadto sa tawo dili masabtan, gidala sa Manluluwas diha sa Iyang Kaugalingon ang gibug-aton sa mga sala sa katawhan gikan ni Adan ngadto sa katapusan sa kalibutan” (Jesus the Christ, 3rd ed. [1916], 613).
Mosiah 3:11–27
Nagpamatuod si Haring Benjamin nga pinaagi sa Pag-ula ni Jesukristo, kita makasalikway sa kinaiyanhon nga tawo ug mahimo nga mga santos
Isulti sa mga estudyante nga si Haring Benjamin mipakigbahin sa paghulagway sa anghel sa nagkalain-laing mga grupo sa mga katawhan ug sa unsa nga paagi ang Pag-ula ni Jesukristo nagamit ngadto sa matag grupo. Isulat ang mosunod nga mga pangutana diha sa pisara. Hangyoa ang mga estudyante sa pagbasa og hilum sa Mosiah 3:11–13, 16, mangita og mga tubag sa mosunod nga mga pangutana:
Sa unsa nga paagi ang Pag-ula magamit:
Ngadto niadtong kinsa namatay nga walay kahibalo sa ebanghelyo?
Ngadto niadtong kinsa mirebelde batok sa Dios ug sa tinuyo nagpakasala?
Ngadto sa mga bata kinsa namatay sa wala pa sila moabut sa edad nga may tulubagon?
Human sa igong panahon, hangyoa ang mga estudyante sa pagpakigbahin sa ilang mga tubag ngadto niini nga mga pangutana. (Aron sa pagtabang kanila sa pagtubag sa unang pangutana, mahimo nimo silang pabasahon sa Doktrina ug mga Pakigsaad 137:7–10. Aron sa pagtabang kanila sa ikatulong pangutana, mahimo nimo silang pabasahon sa Moroni 8:8, 17 ug sa Doktrina ug mga Pakigsaad 29:46–47.)
Basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles mahitungod sa epekto sa Pag-ula diha sa tanang anak sa Langitnong Amahan:
“Atong … mabasa nga ang ‘iyang dugo giula sa mga sala niadtong … kinsa namatay nga walay kasayuran sa kabubut-on sa Dios mahitungod kanila, o kinsa sa walay kasayuran nakasala’ (Mosiah 3:11). Sa samang paagi, ‘ang dugo ni Kristo giula alang sa [gagmay nga mga bata]’ (Mosiah 3:16). Kini nga mga pagtulun-an nga ang makabanhaw ug ang makalimpyo nga gahum sa Pag-ula nga alang sa tanan nagsupak sa pahayag nga ang grasya sa Dios nagluwas lamang sa pipila ka pinili. Ang Iyang grasya alang sa tanan. Kining mga pagtulun-an sa Basahon ni Mormon nagpalapad sa atong panan-aw ug nagpadako sa atong salabutan sa walay sukod nga gugma sa Dios ug sa malukpanon nga epekto sa Iyang Pag-ula alang sa katawhan sa tanang dapit” (“Tanang Tawo sa Tanang Dapit,” Ensign o Liahona, Mayo 2006, 77).
-
Unsa nga baruganan ang atong makat-unan gikan sa Mosiah 3:12 mahitungod sa unsa nga paagi ang Pag-ula magamit ngari kanato? Maluwas kita gikan sa atong mga sala samtang kita nagpakita og hugot nga pagtuo diha ni Jesukristo ug naghinulsol.)
-
Sumala niini nga bersikulo, unsa ang mahitabo ngadto niadtong kinsa nagpili nga dili magpakita og hugot nga pagtuo diha ni Jesukristo ug maghinulsol?
Ipasabut nga ang Mosiah 3:19 usa ka scripture mastery passage. Mahimo nimong awhagon ang mga estudyante sa pagmarka niini nga tudling sa lahi nga paagi aron dali nila nga madumduman kini.) Usab daniha ang atensyon diha sa Mosiah 3:19 sa paggamit sa anghel sa pulong nga “kinaiyanhong tawo.” Aron matabangan ang mga estudyante sa pagsabut niini nga hugpong sa mga pulong, basaha ang mosunod nga pagpasabut gikan sa Ang Giya ngadto sa mga Kasulatan:
Ang kinaiyanhon nga tawo mao ang “usa ka tawo kinsa mopili nga maimpluwensya pinaagi sa mga kahilayan, mga tinguha, mga kagana, ug mga pagbati sa unod kay sa pinaagi sa mga pag-awhag sa Balaang Espiritu. Ang mao nga tawo makasabut sa pisikal nga mga butang apan dili sa espiritwal nga mga butang. Ang tanang mga tawo kalibutanon, o mortal, tungod sa pagkapukan ni Adan ug ni Eva. Ang matag tawo kinahanglan gayud nga matawo pag-usab pinaagi sa pag-ula ni Jesukristo” (Ang Giya ngadto sa mga Kasulatan, “Kinaiyanhon nga Tawo,” scriptures.lds.org).
Isulat ang mosunod nga mga pangutana diha sa pisara. Ipapangita sa mga estudyante ang mga tubag ngadto sa mga pangutana samtang sila nagsiksik sa hilum sa Mosiah 3:19.
Sa unsa nga paagi gihulagway sa anghel ang relasyon sa kinaiyanhong tawo ngadto sa Dios?
Sumala niini nga bersikulo, sa unsa nga paagi maisalikway nato ang kinaiyanhong tawo?
Ipasabut nga pinaagi sa Pag-ula ni Jesukristo, ang usa ka tawo naghimo og labaw pa kay sa paghunong lamang sa pagka-usa ka “kinaiyanhong tawo.” Siya “mahimo nga usa ka santos.” Agig dugang sa pagluwas kanato gikan sa atong mga sala, ang Manluluwas nag-usab kanato ngadto sa mas maayong mga tawo kay sa atong mahimo sa atong kaugalingon. Nagtabang Siya kanato nga mahimong mas sama Kaniya. Aron matabangan ang mga estudyante nga masabtan kini nga doktrina, basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles:
“Parehong limpyo nga mga kamot ug putli nga kasingkasing ang gikinihanglan aron mosaka sa bungtod sa Ginoo ug mobarug sa Iyang balaang dapit [tan-awa sa Salmo 24:3–4].
“Tugoti ako nga mosugyot nga ang mga kamot malimpyohan pinaagi sa proseso sa pagsalikway sa kinaiyanhong pagkatawo ug sa pagbuntog sa sala ug sa dautan nga mga impluwensya sa atong mga kinabuhi pinaagi sa Pag-ula sa Manluluwas. Ang mga kasingkasing maputli inigkadawat nato sa Iyang makapalig-ong gahum sa pagbuhat og maayo ug pagkahimong mas maayo. Ang tanan natong mapuslanong mga tinguha ug maayong mga buhat, tinuod sila mahinungdanon, dili makahimo og limpyo nga mga kamot ug usa ka putli nga kasingkasing. Ang Pag-ula ni Jesukristo maoy naghatag og makalimpyo ug makatubos nga gahum nga makatabang kanato sa pagbuntog sa sala ug makaputli ug makapalig-ong gahum nga motabang kanato nga mahimong mas maayo kaysa atong mahimo nga magsalig lamang sa atong kaugalingon nga kusog. Ang walay kinutuban nga Pag-ula alang pareho sa makasasala ug sa pagkasantos sa matag usa kanato” (“Limpyo nga mga Kamot ug Putli nga Kasingkasing,” Ensign o Liahona, Nob. 2007, 82).
Aron matabangan ang mga estudyante sa pag-summarize sa mga doktrina nga ilang nakat-unan gikan sa Mosiah 3:19, pangutana:
-
Unsa ang pipila ka mga kamatuoran sa ebanghelyo nga inyong makit-an diha sa Mosiah 3:19?
Ang mga estudyante mahimong maglista og daghang mga doktrina gikan niini nga bersikulo, lakip ang mosunod:
Ang kinaiyanhon nga tawo usa ka kaaway sa Dios.
Samtang kita motugyan ngadto sa mga pagdani sa Balaang Espiritu, atong gisalikway ang kinaiyanhong pagkatawo.
Pinaagi sa Pag-ula ni Jesukristo, kita makasalikway sa kinaiyanhon nga tawo ug mahimo nga mga santos.
Dapita ang mga estudyante sa pagtubag sa usa sa mosunod nga mga pangutana diha sa ilang mga scripture study journal. (Mahimong isulat kini nga mga pangutana diha sa pisara sa wala pay klase, mag-andam og handout uban ang mga pangutana, o basahon ang mga pangutana og hinay aron ang mga estudyante makasulat niini diha sa ilang mga scripture study journal.)
-
Unsay imong mabuhat aron mas hingpit ang pagtugyan “ngadto sa mga pagdani sa Balaang Espiritu”? Unsay inyong buhaton sa sunod nga semana aron sa pag-uswag niini nga bahin sa inyong kinabuhi?
-
Unsa nga hiyas sa usa ka bata nga gilista diha sa Mosiah 3:19 nga inyong labing gikinahanglan aron sa paglambo? Unsay inyong buhaton sa sunod nga semana aron sa pagpalambo niini nga hiyas?
Aron matabangan ang mga estudyante sa pag-angkon og mas dako nga pagdayeg alang sa Pag-ula sa Manluluwas, basaha ang Mosiah 3:23–26 ngadto kanila. Ipasabut nga ang hugpong sa mga pulong “kopa sa tuman nga kasuko sa Dios” diha sa bersikulo 26 nagpasabut ngadto sa mahinabo nga pag-antus niadtong kinsa sa kabubut-on nagpakasala ug dili maghinulsol. Dayon hangyoa ang usa ka estudyante sa pagbasa sa Doktrina ug mga Pakigsaad 19:16–19. Hangyoa ang mga estudyante sa pagpaminaw sa pulong nga kopa diha sa bersikulo 18.
-
Unsa ang nahimo ni Jesukristo aron dili kita kinahanglan nga moinom “gikan sa kopa sa tuman nga kasuko sa Dios”? (Siya miambit niana nga kopa sa Iyang Kaugalingon Mismo, nagdala diha sa Iyang Kaugalingon Mismo sa silot alang sa atong mga sala. Kon kita sa tinud-anay,maghinulsol, dili kita kinahanglan nga mag-antus niana nga silot.)
Taposa pinaagi sa pagpakigbahin sa imong pagpamatuod sa mga kamatuoran nga gihisgutan dinhi niini nga leksyon.
Scripture Mastery—Mosiah 3:19
Aron matabangan ang mga estudyante sa pagsag-ulo sa Mosiah 3:19, pares-paresa sila. Hangyoa sila sa pagbasa og kusog sa Mosiah 3:19, usa ka pulong matag higayon, magbanos-banos sa matag pulong uban sa ilang pares. Hangyoa sila sa pag-usab niini nga pagbansay og pipila ka mga higayon. Mahimong imong dugangan og kalainan kini nga kalihokan pinaagi sa pagpabasa sa matag pares og duha o tulo ka mga pulong matag higayon.
Ang pagbalik-balik niini nga kalihokan motabang sa mga estudyante nga mahimong pamilyar sa sulod sa bersikulo ug mohimo niini nga mas sayon alang kanila sa pagsag-ulo sa tibuok bersikulo. Hagita sila sa pagkompleto sa ilang pagsag-ulo sa Mosiah 3:19 sa ilang kaugalingon.
Pahinumdom: Tungod sa matang ug gitas-on niini nga leksyon, mahimo nimong gamiton kini nga kalihokan sa scripture mastery sa laing adlaw, kon ikaw adunay sobra nga panahon.
Komentaryo ug Background nga Impormasyon
Mosiah 3:5–11. Nagkat-on mahitungod sa Pag-ula ni Jesukristo
Si Elder Richard G. Scott sa Korum sa Napulog Duha ka mga Apostoles mitudlo nga kita kinahanglan nga maningkamot sa pagsabut sa tanan nga atong mahimo mahitungod sa Pag-ula ni Jesukristo:
“Walay usa kanato nga igo gayud nga makapasalamat dinhi sa mortalidad sa hingpit nga makaayo nga mga sangputanan sa Pag-ula.
“Adunay labihan ka importante nga panginahanglan alang sa matag usa kanato sa paglig-on sa atong panabut sa kamahinungdanon sa Pag-ula ni Jesukristo nga mahimo kining dili matarug nga pundasyon kon asa nato tukuron ang atong mga kinabuhi. Samtang ang kalibutan nawad-an og dugang pa nga sukaranang mga sumbanan ug samtang ang dungog, hiyas, ug kaputli gianam-anam og salikway aron sa pagpangita og pisikal o emosyonal nga mga tinguha, ang atong panabut ug hugot nga pagtuo sa Pag-ula ni Jesukristo makahatag og kalig-on ug kapasidad nga gikinahanglan alang sa usa ka malampuson nga kinabuhi. Makadala usab kini og pagsalig sa mga panahon sa pagsulay ug kalinaw sa mga gutlo sa kagubot.
“Madasigon akong moawhag kaninyo sa pag-establisar og personal nga plano sa pagtuon aron mas makasabut ug makapasalamat sa walay ikatandi, mahangturon, walay kinutuban nga mga sangputanan sa hingpit nga pagtuman ni Jesukristo sa Iyang balaanong gitakda nga tawag isip ang atong Manluluwas ug Manunubos. Ang mas lawom nga personal nga pagpamalandong sa kasulatan inubanan sa pagsiksik, kinasingkasing nga pag-ampo molig-on sa inyong panabut ug pasalamat alang sa Iyang bililhon nga Pag-ula. Laing gamhanang paagi sa pagkat-on mahitungod kang Jesukristo ug sa Iyang Pag-ula mao ang kanunay nga pagtambong sa templo” (“Siya Buhi! Tanang Himaya ngadto sa Iyang Pangalan!” Ensign o Liahona, Mayo 2010, 77).
Mosiah 3:19. Ang sakrament ug pagkahimo nga usa ka Santos
Si Elder Quentin L. Cook sa Korum sa Napulog Duha ka mga Apostoles mipasabut sa sumpay tali sa sakrament ug sa atong paninguha nga mahimo nga “usa ka Santos pinaagi sa pag-ula ni Jesukristo” (Mosiah 3:19):
“Ang miting sa sakrament mao ang sagrado ug balaan kaayo sa tanang miting sa Simbahan.” Human sa Iyang Pagkabanhaw, ang Manluluwas mihimo sa sakrament ngadto sa mga Nephite. Kon kita buot nga mahimo Niyang mga tinun-an ug mahimong mapasaligon nga mga miyembro sa Iyang Simbahan, kita kinahanglan nga mahinumdom ug mohatag og balaang pagtahud sa sakrament. Nagtugot kini sa matag usa kanato sa pagpahayag uban sa masulub-on nga mga kasingkasing ug mahinulsulon nga mga espiritu sa atong pagkaandam sa pagsunod sa Manluluwas, sa paghinulsol, ug mahimong usa ka Santos pinaagi sa Pag-ula ni Kristo” (“Kita Nagsunod ni Jesukristo,” Ensign o Liahona, Mayo 2010, 84).