Leksyon 61: Mosiah 18

Leksyon 61

Mosiah 18

Pasiuna

Human sa kamatayon ni Abinadi, sa tago gitudlo ni Alma ang mga pulong ni Abinadi taliwala sa mga katawhan. Kadtong kinsa mituo kaniya nagpundok diha sa mga Katubigan sa Mormon aron nga makat-on pa. Gisangyaw ni Alma ang mensahe sa “paghinulsol, ug sa katubsanan ug sa hugot nga pagtuo sa Ginoo” (Mosiah 18:7). Kadtong kinsa midawat sa iyang mga pagtulun-an ug mihinulsol sa ilang mga sala misulod ngado sa pakigsaad sa bunyag. Ang mga katawhan matinud-anon ngadto niini nga pakigsaad, ug nagtinabangay sila sa usag usa sa temporal ug sa espiritwal.

Mga Sugyot alang sa Pagtudlo

Mosiah 18:1–16

Nagtudlo ug nagbunyag si Alma sa mga katawhan

Ipakita ang litrato ni Abinadi sa atubangan ni Haring Noah (62042; Libro sa mga Hulagway sa Ebanghelyo [2009], nu. 75). Itudlo ang mga pari sa background sa litrato. Ipasabut nga ang Mosiah 18 nagsaysay sa kasinatian ni Alma, kinsa usa sa mga pari ni Haring Noah.

Dapita ang usa ka estudyante sa pagbasa og kusog sa Mosiah 18:1, 3–6. Hangyoa ang klase sa pagpangita unsay gibuhat ni Alma human makabati sa pagpamatuod ni Abinadi. Human moreport ang mga estudyante unsay ilang nakat-unan, dapita sila sa pag-refer ngadto sa ilang mga diagram nga nagpakita sa kinatibuk-ang pagpasabut sa mga panaw diha sa Mosiah 7–24. Tudloi sila sa pagdrowing sa mga Katubigan sa Mormon diha sa angay nga dapit. (Alang sa kompleto nga diagram, tan-awa ang appendix diha sa katapusan niini nga manwal.)

Imahe

journeys in Mosiah 7–24

Ipasabut nga gituyo ni Alma ang iyang mga pagtulun-an aron sa pag-andam sa mga katawhan alang sa bunyag. Hangyoa ang mga estudyante sa paghunahuna sa makadiyot mahitungod sa ilang mga bunyag. Aron sa pagtabang kanila sa pagpamalandong unsa ang kahulugan sa ilang mga bunyag nganha kanila, mahimo kang mangutana og sama niining mosunod:

Unsa nga mga detalye ang inyong mahinumduman mahitungod sa inyong kasinatian?
Sa unsa nga paagi ang inyong mga ginikanan, mga magtutudlo, ug mga lider nagtabang kaninyo sa pag-andam alang sa bunyag?
Unsa ang inyong mas pasalamatan mahitungod sa bunyag karon kay sa kaniadto nga kamo gibunyagan?

Ipasabut nga ang istorya kabahin ni Alma nga nagtudlo ug nagbunyag sa mga katawhan diha sa mga Katubigan sa Mormon makatabang kanato sa pag-angkon og mas lawom nga pagsabut sa pakigsaad sa bunyag.

Hangyoa ang mga estudyante sa pagbasa og hilum sa Mosiah 18:2, 7, nga mangita sa unsay gitudlo ni Alma sa mga katawhan samtang giandam niya sila alang sa bunyag.

Sumala niini nga mga bersikulo, hain nga mga doktrina ug mga baruganan ang gihatagan og gibug-aton ni Alma?
Sa unsa kaha nga paagi sa inyong hunahuna nga ang pagsabut niini nga mga kamatuoran mahimong motabang sa usa ka tawo pag-andam alang sa bunyag?

Aron matabangan ang mga estudyante nga masabtan unsay ilang buhaton sa pagtuman sa pakigsaad sa bunyag, ug sa pagtabang kanila sa pagpasalamat sa mga panalangin nga ilang madawat agi og resulta, kopyaha ang mosunod nga tsart diha sa pisara. Ayaw ilakip ang mga pamahayag o mga scripture reference diha sa mas ubos nga katunga sa tsart.

Ako andam sa …	Ang Dios nagsaad …
Sa pagtambayayong sa usag usa nga mga alantuson nga sila mahimong magaan (tan-awa sa Mosiah 18:8). Sa pagbangutan uban niadtong nagbangutan (tan-awa sa Mosiah 18:9). Sa paghupay niadto nga nagkinahanglan sa kahupayan (tan-awa sa Mosiah 18:9). Mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit (tan-awa sa Mosiah 18:9). Mag-alagad sa Dios ug maghupot sa Iyang mga sugo.(tan-awa sa Mosiah 18:10).	Nga ako mahimo nga matubos sa Dios (tan-awa sa Mosiah 18:9). Nga ako malakip diha sa unang pagkabanhaw (tan-awa sa Mosiah 18:9). Nga ako makabaton og kinabuhi nga dayon (tan-awa sa Mosiah 18:9). Siya mobu-bu sa Iyang Espiritu diha kanako (tan-awa sa Mosiah 18:10).

Ako andam sa …

Ang Dios nagsaad …

Sa pagtambayayong sa usag usa nga mga alantuson nga sila mahimong magaan (tan-awa sa Mosiah 18:8).

Sa pagbangutan uban niadtong nagbangutan (tan-awa sa Mosiah 18:9).

Sa paghupay niadto nga nagkinahanglan sa kahupayan (tan-awa sa Mosiah 18:9).

Mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit (tan-awa sa Mosiah 18:9).

Mag-alagad sa Dios ug maghupot sa Iyang mga sugo.(tan-awa sa Mosiah 18:10).

Nga ako mahimo nga matubos sa Dios (tan-awa sa Mosiah 18:9).

Nga ako malakip diha sa unang pagkabanhaw (tan-awa sa Mosiah 18:9).

Nga ako makabaton og kinabuhi nga dayon (tan-awa sa Mosiah 18:9).

Siya mobu-bu sa Iyang Espiritu diha kanako (tan-awa sa Mosiah 18:10).

Ipasabut nga sa wala pa dapita ang mga katawhan nga pagabunyagan, misulti si Alma ngadto kanila mahitungod sa mga kinaiya ug mga lihok nga magpakita nga sila andam sa paghimo ug pagtuman niini nga pakigsaad ngadto sa Ginoo. (Mahimo nimong pahinumduman ang mga estudyante nga ang usa ka pakigsaad mao ang usa ka panagsabut tali sa Dios ug sa tawo apan nga ang Dios ug ang tawo “dili molihok ingon nga managsama diha sa kasabutan. Ang Dios naghatag sa mga kondisyon alang sa pakigsaad, ug ang mga tawo miuyon sa pagbuhat unsa ang iyang gipangayo kanila nga buhaton. Ang Dios niana nagsaad sa mga tawo sa pipila ka mga panalangin alang sa ilang pagkamasulundon ” [Ang Giya ngadto sa mga Kasulatan, “Pakigsaad,” scriptures.lds.org]. Alang sa usa ka ulahing adlaw nga pagpasabut sa mga kinahanglanon sa pagkanabunyagan, tan-awa sa Doktrina ug mga Pakigsaad 20:37.)

Tunga-a ang klase. Dapita ang katunga sa klase sa pagsiksik sa Mosiah 18:8–11 kon unsay gitudlo ni Alma nga atong kinahanglang andam nga buhaton kon kita bunyagan. Dapita ang laing katunga sa klase sa pagsiksik sa samang tudling ug ipaila sa unsa nga paagi ang Ginoo nagsaad sa pagpanalangin kanato kon kita motuman sa atong pakigsaad. Human ang mga estudyante may panahon sa pagtuon sa mga bersikulo, pangutan-a ang pipila kanila sa pag-adto sa pisara ug sa pagsulat diha sa angay nga mga kolum unsa ang ilang nadiskubrihan.

Aron matabangan ang mga estudyante sa pagpasalamat sa ilang pakigsaad sa bunyag, pangutana:

Unsa ang kahulugan sa mga lihok ug mga kinaiya sa unang kolum diha kanimo?
Nganong ang mga saad nga gilista diha sa ikaduhang kolum importante kanimo?

Hangyoa ang mga estudyante sa pagsiksik og hilum sa Mosiah 18:12–16, nga mangita sa mga paagi si Alma ug ang iyang mga katawhaan gipanalanginan samtang sila nakigsaad sa pagserbisyo sa Ginoo. Dapita ang mga estudyante sa pagreport unsa ang ilang nakit-an. Mahimo nimong ipasabut nga si Alma napuno sa Espiritu sa Ginoo samtang siya nangandam sa pagbunyag ni Helam ug nga si Alma ug si Helam napuno sa Espiritu sa diha nga nahuman ang bunyag, nagpakita nga ang Ginoo nagsugod na sa pagtuman sa Iyang pakigsaad sa pagbu-bu sa Iyang Espiritu diha sa iyang mga katawhan.

Ipakigbahin ang imong pagpamatuod nga atong madawat ang Espiritu sa Ginoo ug ang saad sa kinabuhing dayon pinaagi sa paghimo ug pagtuman sa pakigsaad sa bunyag.

Mosiah 18:17–30

Gitukod ni Alma ang Simbahan ni Jesukristo taliwala sa mga katawhan

Basaha ang mosunod nga pamahayag ni Presidente Henry B. Eyring sa Unang Kapangulohan:

“Gikan sa adlaw sa bunyag hangtud sa dagkong espirituhanon nga mga panghitabo sa atong kinabuhi, kita naghimo og mga saad sa Dios ug Siya naghimo og mga saad kanato. Kanunay Siyang nagtuman sa Iyang mga saad nga gitanyag pinaagi sa Iyang gihatagan og awtoridad nga mga sulugoon, apan importante kini nga pagsulay sa atong mga kinabuhi kon kita mohimo ug motuman ba sa atong mga pakigsaad ngadto Kaniya” (“Witnesses for God,” Ensign, Nob. 1996, 30).

I-refer ang mga estudyante ngadto sa tsart diha sa pisara. Ipasabut nga sila karon magkat-on mahitungod sa giunsa sa mga katawhan ni Alma sa pagpuyo sumala sa pakigsaad sa bunyag ug giunsa sila sa pagpanalangin sa pagbuhat sa ingon. Bahina ang mga estudyante ngadto sa duha ka grupo. Hangyoa ang usa ka grupo sa pagtuon sa Mosiah 18:17–23 ug ang laing grupo sa pagtuon sa Mosiah 18:24–30. Samtang sila nagbasa, dapita ang duha ka grupo sa pagpangita sa pipila ka mga paagi nga gitudlo ni Alma sa mga katawhan nga sila kinahanglan nga magpuyo aron sa pagtuman sa pakigsaad sa bunyag. Pangutan-a ang indibidwal nga mga estudyante gikan sa matag grupo sa pagreport unsa ang ilang nakit-an ngadto sa usa ka pares nga gipili gikan sa lain nga grupo. O ipareport sa representante gikan sa matag grupo unsay iyang nakat-unan ngadto sa tibuok klase.

Sa unsa nga paagi nga ang inyong pakigsaad sa bunyag nag-impluwensya sa paagi nga kamo nagpuyo matag adlaw? (Hunahunaa ang pagdapit og mga estudyante sa pagtubag niini nga pangutana pinaagi sa pagsulti mahitungod sa giunsa sa ilang pakigsaad sa bunyag sa pag-impluwensya kon sa unsa nga paagi sila nagtagad sa mga sakop sa ilang pamilya, unsa nga mga matang sa kalingawan ilang gipili o sa unsa nga paagi sila nag-interact sa ilang mga higala.)

Dapita ang mga estudyante sa pagribyu sa Mosiah 18:17, 22, 29 aron sa pagpangita og mga pulong nga nagpakita kon sa unsa nga paagi napanalanginan ang mga katawhan sa pagtuman sa ilang mga pakigsaad. Ilista kini nga mga panalangin diha sa pisara ubos sa tsart sa pakigsaad sa bunyag. (Mahimo nimong pahinumduman ang mga estudyante nga ang hugpong sa mga pulong “mga anak sa Dios” [Mosiah 18:22] adunay kalabutan sa atong pagkamahimong manununod sa kinabuhing dayon pinaagi sa Pag-ula ni Jesukristo [tan-awa sa Mosiah 5:6–8, 15].)

Aron matabangan ang mga estudyante nga makakita nga ang importanting mga panalangin moabut ngadto niadtong kinsa nagtuman sa pakigsaad sa bunyag, i-refer ang mga estudyante ngadto sa tsart diha sa pisara, ug pangutana:

Sa unsa nga mga paagi nakita ninyo ang inyong mga higala, mga sakop sa pamilya, o mga miyembro sa ward nga napanalanginan tungod sa pagtuman sa ilang mga pakigsaad?
Sa unsa nga paagi kamo napanalanginan sa Ginoo tungod sa pagtuman sa inyong mga pakigsaad sa bunyag?

Pagpamatuod mahitungod sa unsa nga paagi nga ang pagtuman sa mga pakigsaad nagdala og mga panalangin nganha sa imong kinabuhi.

Mosiah 18:31–35

Kadtong kinsa sakop sa Simbahan milayas gikan sa pagpanggukod ni Haring Noah

I-summarize ang Mosiah 18:31–33 pinaagi sa pagpasabut nga usa ka adlaw, sa dihang si Alma ug iyang mga katawhan nagtigum aron sa pagpamati sa pulong sa Ginoo, sila nadiskubrihan sa mga sulugoon ni Haring Noah. Mipadala dayon ang hari sa iyang kasundalohan aron sa paglaglag kanila.

Dapita ang usa ka estudyante sa pagbasa og kusog sa Mosiah 18:34. Ipasabut nga ang footnote a nag-refer sa mga mambabasa ngadto sa Mosiah 23:1. (Mahimo nimong dapiton ang mga estudyante sa pagmarka niini nga footnote.) Ipasabut nga ang asoy diha sa Mosiah 18:34 nagpadayon diha sa Mosiah 23:1, human sa mga kapitulo 19–22 nga nagrekord sa mga kasinatian sa mga katawhan ni Limhi. Hangyoa ang usa ka estudyante sa pagbasa og kusog sa Mosiah 23:1–2.

Sa unsa nga paagi si Alma “nahibalo” sa kuyaw nga giatubang sa iyang mga katawhan?

Isulat ang mosunod nga baruganan diha sa pisara: Ang Ginoo makapasidaan sa matarung kon sila anaa sa kuyaw. Mahimo nimong dapiton ang mga estudyante sa pagsulat niini nga baruganan diha sa margin tupad sa Mosiah 18:34.) Sa paghulagway niini nga kamatuoran, basaha ang mosunod nga istorya ni Elder Neil L. Andersen sa Korum sa Napulog Duha ka mga Apostoles:

“Nagtrabaho isip usa ka espesyal nga alagad sa FBI, nag-imbestigar ang akong higala og mga grupo sa sindikato nga nagpayuhot og ilegal nga mga drugas ngadto sa Estados Unidos.

“Usa niana ka higayon, siya ug lain nga ahente miadto sa usa ka apartment diin ilang gikatahapan ang usa ka inila kaayo nga tigbaligya og druga nag-apud-apod og cocaine. Gihulagway sa akong higala kon unsay nahitabo:

“Nanuktok kami sa pultahan sa tigpayuhot og druga. Giablihan sa suspetsado ang pultahan, ug sa pagkakita kanamo, misulay sa pagsalipod sa among panan-aw. Apan ulahi na kaayo; nakita namo ang cocaine nga diha sa iyang lamisa.

“Usa ka lalaki ug babaye nga diha sa lamisa midali dayon sa paghipos sa cocaine. Kinahanglan nga santaon namo sila sa pagwagtang sa ebidensya, mao nga dali nakong gitukmod ang suspetsado kinsa miali sa kilid sa pultahan. Sa pagtulod nako kaniya, nagkasugat ang among tinan-awan. Kahibulongan, nga wala siya mopakita og kasuko o kahadlok. “Nagpahiyum siya ngari kanako.

“Ang iyang mga mata ug ang mahigalaon nga pahiyom napakahunahuna kanako nga dili siya makahatag og kadaut, mao nga gibiyaan dayon nako siya ug misugod sa pagpaingon ngadto sa lamisa. Diha na karon sa akong luyo ang suspetsado. Sa kalit, gibati nako ang lahi, may gamhanang mando nga misulod sa akong hunahuna: “Pagbantay sa pagkadautan nga nagpaluyo diha sa nagpahiyum nga mga mata.”

“‘Gilingi dayon nako ang suspetsado. Ang iyang kamot diha sa iyang dakong bulsa sa atubangan. Sa walay langan gipugngan nako ang iyang kamot ug gibira gikan sa iyang bulsa. Diha pa nako makita, nga gikuptan sa iyang kamot, ang usa ka semi-automatic nga pistola nga andam nang ipabuto. Usa ka panaglayog ang misunod, ug akong gidis-armahan ang tawo.’ …

“… Ang Espiritu Santo mipasidaan sa akong higala sa pisikal nga kuyaw, ang Espiritu Santo mopasidaan usab kaninyo sa espirituhanon nga kuyaw” (“Pagbantay sa Kadautan nga nagpaluyo sa Nagpahiyum nga mga Mata,” Ensign o Liahona, Mayo 2005, 46–47).

Ipanghimatuod nga ang Ginoo kasagaran nga mopasidaan sa matarung sa umaabut nga kuyaw, apan kinahanglan nga dili nato hunahunaon nga kita dili matarung kon dili kita mobati og pasidaan gikan sa Espiritu Santo sa matag higayon nga kita makasugat og makuyaw nga mga sitwasyon.

Kanus-a man ninyo nabati nga ang Ginoo nagpasidaan kaninyo og pisikal o espiritwal nga kuyaw? (Human makigbahin ang mga estudyante sa ilang mga kasinatian, mahimo nimong ipakigbahin ang imong kaugalingong kasinatian.)

Komentaryo ug Background nga Impormasyon

Mosiah 18:8–11. Pagsabut sa gahum sa pakigsaad sa bunyag

Si Elder Joseph B. Wirthlin sa Korum sa Napulog Duha ka mga Apostoles miingon:

“Akong namatngunan sa tibuok nakong kinabuhi nga kon ang mga tawo moabut sa hingpit nga pagsabut sa mga panalangin ug sa gahum sa ilang pakigsaad sa bunyag, ingon isip bag-ong kinabig o isip dugay na kaayong mga miyembro sa Simbahan, dako kaayong kalipay ang moabut sa ilang mga kinabuhi ug sila naghimo sa ilang mga katungdanan sa gingharian uban sa makatakod nga kadasig.” (“Alma the Elder: A Role Model for Today,” sa Heroes from the Book of Mormon [1995], 84).

Mosiah 18:12–18. Nganong mipaunlod si Alma sa iyang kaugalingon sa tubig sa dihang iyang gibunyagan si Helam?

Gipasabut ni Presidente Fielding Smith nga “diha sa Basahon ni Mosiah piho nga gipahayag nga siya adunay awtoridad [tan-awa sa Mosiah 18:13].” Mirason si Presidente Smith nga “kon si [Alma] adunay awtoridad sa pagbunyag kana ebidensya nga siya nabunyagan [na].” Busa, gipadayon niya pagpasabut, sa dihang si Alma nanaog ngadto sa tubig uban ni Helam, kini “dili hitabo nga si Alma nagbunyag sa iyang kaugalingon, apan usa lamang ka pagpaila ngadto sa Ginoo sa iyang pagkamapainubsanon ug hingpit nga paghinulsol” (Answers to Gospel Questions, comp. Joseph Fielding Smith Jr., 5 vols. [1957–66], 3:203).