Mosiah 25

Pasiuna

Ang Mosiah 25 naghatag og panapos sa istorya sa mga katawhan ni Zeniff (tan-awa sa Mosiah 7–24). Ang mga katawhan ni Limhi ug ang mga sumusunod ni Alma mibalik ngadto sa Zarahemla ug luwas nga nahiusa ubos sa pagmando ni Haring Mosiah. Human sa pag-abut niini nga mga grupo, si Limhi ug ang iyang mga katawhan gibunyagan. Gihatagan ni Haring Mosiah si Alma og awtoridad sa pagtukod og mga simbahan sa tibuok yuta ug sa paghan-ay sa mga buluhaton sa Simbahan sa Dios taliwala sa mga katawhan ni Nephi.

Mga Sugyot alang sa Pagtudlo

Mosiah 25:1–13

Kadtong kinsa nagpundok sa Zarahemla naghiusa ug nailhan isip mga Nephite

Dapita ang mga estudyante sa paghunahuna og mga istorya nga ilang nabasa o nadunggan nga nagpakita kon giunsa sa Ginoo pagtabang ang usa ka tawo pinaagi sa paghatag og giya, kalig-on, proteksyon, o kaluwasan. Mahimo nimong isugyot nga sila maghunahuna og mga istorya diha sa mga kasulatan, kasaysayan sa Simbahan, o sa mga kinabuhi sa mga sakop sa pamilya o mga higala. Isip usa ka ehemplo, ipakigbahin ang mosunod nga istorya nga giasoy sa usa ka batan-ong babaye kinsa nag-una og suroy-suroy sa iyang grupo ug midulhog sa usa ka bungtod atol sa usa ka kalihokan sa ward didto sa gawas:

“Usa ka nagpasidaang tingog, lig-on apan hinay, miingon ‘Balik.’ Hapit ko kini gibale-wala, apan mibalik kini pag-usab. Niini nga higayon naminaw ko ug mibalik ngadto sa grupo. Samtang misugod kami sa pagdulhog, nakakita kami og dagko kaayong itom nga mga toro nga naglakaw og kusog ug nasuko ibabaw sa bungtod. Ang labing dako misugod sa pagkamras sa yuta samtang siya nagtan-aw kanamo. … Ang among priesthood lider mipalinga niini, ug nakakatkat kami sa koral ngadto sa luwas.

“Samtang misulod kami sa kampo og balik, nakaamgo ako nga kon wala pa ako naminaw sa pasidaan gikan sa Espiritu, tingali ako masakitan og maayo o gani mamatay. Nahibalo ako nga ang Langitnong Amahan personal nga nag-amuma kanako ug nagbantay kanako nga luwas. Mapasalamaton kaayo ako ngadto sa Ginoo alang niadto nga pasidaan. Kini nga kasinatian milig-on sa akong pagpamatuod ug mihatag kanako og mas dako nga gugma alang sa Ginoo” (“Turn Back,” New Era, Nob. 2010, 47).

Dapita ang usa o duha ka mga estudyante sa pagpakigbahin og istorya nga ilang gituohan nga nagpakita sa pagkamaayo ug sa gahum sa Dios diha sa kinabuhi sa laing tawo. Pangutan-a ang klase:

Sa unsa nga paagi nakatabang kaninyo nga makadungog og mga panig-ingnan sa pagkamaayo ug gahum sa Dios diha sa mga kinabuhi sa uban?

I-summarize ang Mosiah 25:1–6 pinaagi sa pagpasabut nga human ang mga katawhan ni Limhi ug ang mga katawhan ni Alma (tanan kinsa mga kaliwat sa mga katawhan ni Zeniff) nakaikyas gikan sa pagkaulipon ug nakighiusa sa mga katawhan nga nagpuyo sa Zarahemla, gibasa ni Haring Mosiah ang ilang mga rekord ngadto sa tanang mga katawhan. Ipabasa sa mga estudyante og hilum ang Mosiah 25:7, nga mangita sa kinatibuk-ang tubag sa mga katawhan ngadto sa mga istorya sa mga pakig-uban sa Dios sa mga katawhan ni Zeniff. Dapita ang usa ka estudyante sa pagpakigbahin unsay iyang nakit-an.

Kopyaha ang mosunod nga tsart diha sa pisara. Ipasabut nga diha sa Mosiah 25:8–11, mas nakakat-on kita mahitungod kon sa unsa nga paagi gitubag sa mga katawhan ang mga istorya kabahin sa mga katawhan ni Zeniff ug ni Alma. Hangyoa ang mga estudyante sa pagsiksik sa unsay nadungog sa mga katawhan ug unsay ilang gibati mahitungod niini. Ang mga tubag sa unang pakisayran gihatag sulod sa parentises isip usa ka panig-ingnan.

	Unsa ang nadungog sa mga katawhan	Unsay ilang gibati
Mosiah 25:8	(Nadungog nila kon sa unsang paagi naluwas ang mga katawhan ni Limhi gikan sa pagkaulipon.)	(Kini mipuno kanila og dako kaayong hingpit nga kalipay.)
Mosiah 25:9
Mosiah 25:10
Mosiah 25:11

Kon ang mga estudyante adunay igo nga panahon sa pagtuon sa mga scripture reference, dapita ang pipila kanila sa pagsulat diha sa pisara unsay ilang nakit-an. Hangyoa ang mga estudyante sa pag-summarize unsay ilang nakat-unan gikan sa Mosiah 25:8–11 pinaagi sa pagpahayag og mga baruganan gikan niini nga tudling nga ilang magamit sa ilang mga kaugalingon. Samtang nagtubag ang mga estudyante, tabangi sila sa pag-ila nga pinaagi sa pagtuon sa mga natala nga mga pakigsabut sa Dios ngadto sa uban, kita makabati og hingpit nga kalipay ug pasalamat alang sa kaayo sa Dios. (Samtang ang mga estudyante nagbasa niini nga mga bersikulo, mahimo nilang mamatikdan ang kasubo ug pagkawala nga resulta gikan sa sala.)

Sa unsa nga mga kapanguhaan kita makakuha aron makat-unan ang mga kasinatian sa uban sa kaayo sa Dios? (Isulat sa pisara ang mga tubag sa mga estudyante. Mahimo kining maglakip og mga kasulatan, mga pakigpulong sa kinatibuk-ang mga komperensya, mga magasin sa Simbahan, biograpiya sa mga lider sa Simbahan ug sa uban, ug mga kasaysayan sa pamilya.

Dapita ang mga estudyante sa paghunahuna sa mga panahon nga ilang nakat-unan ang kaayo sa Dios ngadto sa uban gikan sa mga kapanguhaan nga gilista diha sa pisara.

Sa unsa nga paagi kamo nakabenepisyo gikan sa pagkat-on sa pagkamaayo sa Dios ngadto sa uban gikan sa usa niini nga mga kapanguhaan?
Unsa sa inyong hunahuna ang mahangturong epekto diha sa usa ka tawo kinsa sa kanunay nagkat-on sa kaayo sa Dios sa Iyang pakigsabut ngadto sa uban?

Awhaga ang mga estudyante sa paggahin og panahon sa ilang kaugalingon sa pagpili og usa sa mga kapanguhaan nga gilista diha sa pisara ug pagsiksik og makadasig nga mga istorya kabahin sa kaayo sa Dios.

Mosiah 25:14–24

Gitukod ni Alma ang Simbahan sa Dios sa tibuok yuta sa mga Nephite

Aron sa pag-andam sa mga estudyante sa pagtuon sa organisasyon ug mga pagtulun-an sa Simbahan taliwala sa mga Nephite, pangutana:

Kanus-a kamo nakatambong og usa ka ward o branch sa Santos sa Ulahing Adlaw nga gawas sa inyong home ward o branch? Unsa nga mga pagkasama ang inyong namatikdan tali sa inyong home ward o branch ug sa usa nga inyong gibisitahan?
Sa unsa nga paagi nakatabang nga mahibalo nga ang organisasyon ug mga pagtulun-an sa Simbahan managsama sa matag ward o branch sa Simbahan?

I-summarize ang Mosiah 25:14–17 pinaagi sa pagpasabut nga human namulong ug mibasa si Mosiah ngadto sa mga katawhan, gidapit niya si Alma sa pagtudlo kanila. Dayon si Haring Limhi ug ang iyang mga katawahan mihangyo og bunyag. Gibunyagan sila ni Alma ug gisugdan ang pag-organisar sa Simbahan sa tibuok yuta.

Dapita ang pipila ka mga estudyante sa pagpuli-pulig basa og kusog gikan sa Mosiah 25:18–22. Hangyoa ang klase sa pagpangita kon sa unsa nga paagi ang Simbahan giorganisar ug gidumala taliwala sa mga Nephite sa panahon ni Alma. Aron matabangan ang mga estudyante nga masabtan ang organisasyon sa Simbahan nagsiguro nga ang tanan nga mga miyembro makadawat sa kamatuoran, pangutana sama sa mosunod:

Sa unsa nga paagi nga ang Simbahan taliwala sa mga Nephite susama sa Simbahan karon? (Kita adunay mga ward ug mga branch nga sama sa “nagkalain-lain nga mga pundok” nga gihisgutan diha sa Mosiah 25:21. Ang mga presidente sa branch, mga bishop, ug mga stake president sama sa mga pari ug mga magtutudlo kinsa nagdumala sa Simbahan sa panahon ni Alma.)
Sumala sa Mosiah 25:15–16, 22, unsa nga mga kamatuoran ang gihatagan og gibug-aton sa mga pari ug mga magtutudlo sa Simbahan sa panahon ni Mosiah? (Mahimo nimong ipasabut nga ang Ginoo naghatag og susama nga panudlo ngadto sa mga ginikanan, mga lider sa Simbahan, ug mga misyonaryo sa ulahing mga adlaw. [Tan-awa sa D&P 15:6; 19:31; 68:25.])
Nganong importante ang pagpadayon og tudlo sa paghinulsol ug hugot nga pagtuo diha sa Dios?

Hangyoa ang mga estudyante sa pagbasa sa Mosiah 25:23–24, nga mangita og hugpong sa mga pulong nga naghulagway sa mga panalangin nga nadawat niadtong kinsa mipasakop sa Simbahan sa Dios.

Sa unsa nga paagi ang mga katawhan napanalanginan agi og resulta sa pagpabunyag ug pagpasakop sa Simbahan sa Dios?
Sa unsa nga paagi ang Ginoo mipanalangin kaninyo pinaagi sa inyong pagkamiyembro sa Simbahan?

Isulat ang mosunod nga baruganan diha sa pisara: Samtang kita nagdala diha sa atong mga kaugalingon sa ngalan ni Jesukristo ug nagpuyo sumala niana, ang Ginoo mobu-bu sa Iyang Espiritu diha kanato.

Pagpamatuod ngadto sa mga estudyante nga ang mga panalangin nga ilang gisinati isip mga miyembro sa Simbahan magtubo samtang sila magtuman sa ilang mga pakigsaad ug nagdawat sa Espiritu.

Komentaryo ug Background nga Impormasyon

Mosiah 25:17–22. Awtoridad sa priesthood taliwala sa mga Nephite

Ang Basahon ni Mormon wala maghatag og piho nga mga detalye mahitungod sa priesthood nga gihuptan sa mga propeta ug sa ubang kaigsoonan taliwala sa mga Nephite ug mga Lamanite. Bisan pa niana, ang mga paghisgut sa mga ordinansa ug ang paagi nga ang Simbahan gidumala naghatag og igo nga ebidensya nga gihuptan nila ang Melchizedek nga Pagkapari. Gitudlo ni Presidente Joseph Fielding Smith nga “ang priesthood nga gihuptan [sa mga Nephite] ug ubos diin sila nangatungdanan mao ang Priesthood sunod sa balaang kapunongan, ang kapunongan sa Anak sa Dios [tan-awa sa Alma 13:1–20]. Kining halangdon nga priesthood makapangatungdanan sa matag ordinansa sa ebanghelyo” (Doctrines of Salvation, ed. Bruce R. McConkie, 3 vols. [1954–56], 3:87).

Alang sa dugang nga impormasyon mahitungod sa awtoridad sa priesthood diha sa Basahon ni Mormon, tan-awa ang Komentaryo og Background nga Impormasyon alang sa Mosiah 18.