Mosiah 18–25 (Unit 13)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Mosiah 18–25 (unit 13) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa mga estudyante.

Day 1 (Mosiah 18)

Human sa kamatayon ni Abinadi, si Alma naghinulsol ug nagtudlo sa ebanghelyo ni Jesukristo ngadto sa uban diha sa Mga Katubigan sa Mormon. Pinaagi sa pagtuon niini nga panig-ingnan, gikat-unan sa mga estudyante nga atong madawat ang Espiritu sa Ginoo ug ang saad nga kinabuhing dayon pinaagi sa paghimo ug paghupot sa pakigsaad sa bunyag ug nga mahinungdanong mga panalangin moabut ngadto kinsa naghupot sa pakigsaad sa bunyag.

Day 2 (Mosiah 19–20)

Human si Haring Noah ug ang iyang mga katawhan misalikway sa mga pagtulun-an ni Abinadi ug gitinguha ang paglaglag ni Alma ug sa iyang mga sumusunod, giatake sila sa mga Lamanite. Gipatay si Noah sa iyang mga katawhan, ug ang iyang anak nga lalaki nga si Limhi nahimong hari. Samtang nagbasa ang mga estudyante kon giunsa pagdala ang mga katawhan ni Limhi ngadto sa pagkaulipon sa mga Lamanite, gikat-unan nila nga ang pagsalikway sa mga pulong sa mga sulugoon sa Ginoo nagdala og pag-antus ug kaguol. Naawhag sila sa paghunahuna og usa ka panahon sa dihang ilang gisinati ang kalinaw ug espiritwal nga kahilwasan pinaagi sa pagsunod sa tambag sa mga sulugoon sa Ginoo.

Day 3 (Mosiah 21–24)

Gikat-unan sa mga estudyante nga si Alma ug ang iyang mga katawhan, bisan og matarung, gidala usab ngadto sa pagkaulipon sa mga Lamanite. Gihimo sa mga estudyante ang usa ka tsart diha sa ilang mga scripture study journal nga nagtandi sa pagkaulipon ug pagkaluwas ni Limhi ug sa iyang mga katawhan ngadto sa kang Alma ug sa iyang mga katawhan. Gitudlo sa istorya kabahin sa mga katawhan ni Limhi nga samtang kita nagtinguha sa paghimo ug paghupot og mga pakigsaad, ang Ginoo mohatag og paagi alang sa atong kaluwasan. Alang sa grupo ni Alma, gikat-unan sa mga estudyante nga kon kita mapainubsanong mosunod sa kabubut-on sa Ginoo, molig-on Siya kanato ug moluwas kanato gikan sa atong mga pagsulay diha sa Iyang panahon.

Day 4 (Mosiah 25)

Human ang mga katawhan ni Limhi ug ang mga katawhan ni Alma luwas nga gihiusa ubos ni Haring Mosiah didto sa Zarahemla, ang ilang istorya gibasa sa tanang mga katawhan. Gikat-unan sa mga estudyante nga pinaagi sa pagtuon sa mga rekord sa pakigsabut sa Dios ngadto sa uban, kita makabati og hingpit nga kalipay ug pasalamat alang sa kaayo sa Dios. Samtang gipamalandong sa mga estudyante kon sa unsa nga paagi ang pagkamiyembro sa Simbahan sa panahon ni Nephi susama sa pagkamiyembro sa Simbahan karon, gikat-unan nila nga samtang atong dad-on diha sa atong mga kaugalingon ang ngalan ni Jesukristo ug magpuyo og matarung, ang Ginoo mopanalangin kanato uban sa Iyang Espiritu. Gisulat sa mga estudyante ang mahitungod sa unsaon nga ang pagkaandam sa pagdala diha sa atong mga kaugalingon sa ngalan ni Jesukristo maghimo og kalainan sa ilang mga kinabuhi.

Pasiuna

Ang pagtandi ug pagkalahi sa mga kasinatian sa mga katawhan ni Alma ug sa mga katawhan ni Limhi makatabang sa mga estudyante pagdiskubre og bililhong mga baruganan kalabut sa tinubdan sa atong mga pagsulay ug sa unsa nga paagi kita maluwas gikan sa kalisdanan pinaagi sa atong hugot nga pagtuo diha ni Jesukristo. Tabangi ang mga estudyante nga mahibalo nga samtang sila naghimo ug naghupot og sagradong mga pakigsaad, nagsalig sa Ginoo, ug mapainubsanong nagtawag diha Kaniya alang sa panabang, molig-on Siya kanila ug moluwas kanila gikan sa ilang mga kalisdanan diha sa Iyang kaugalingong paagi ug sa Iyang kaugalingong panahon.

Mga Sugyot alang sa Pagtudlo

Mosiah 18

Nagsangyaw sa ebanghelyo si Alma ngadto sa mga katawhan ni Haring Noah, ug daghan ang naghinulsol ug nagtinguha sa pagpabunyag

Hangyoa ang mga estudyante sa paghunahuna sa ilang kaugalingon nga mga bunyag. Dapita sila sa pagpakigbahin og pipila ka mga dili makalimtang mga detalye kabahin sa ilang kasinatian. Dayon ipakita, kon anaa, ang litrato ni Alma Namunyag diha sa Mga Katubigan sa Mormon (62332; Libro sa mga Hulagway sa Ebanghelyo [2009], nu. 76), ug hangyoa sila sa paghinumdom sa mga panghitabo nga gihulagway diha sa Mosiah 18:8–11. Pangutan-a ang mga estudyante kon unsa ang ilang nasabtan mahitungod sa katuyoan sa bunyag ug sa pakigsaad sa bunyag sa dihang sila gibunyagan.

Human hisguti sa mga estudyante ang istorya diha sa Mosiah 18, ipaukab nila ang day 1, assignment 1 sa ilang mga scripture study journal, diin ilang gi-diagram kon unsay gitudlo ni Alma mahitungod sa pakigsaad sa bunyag ingon nga gipasabut diha sa Mosiah 18:8–11. Dapita ang usa ka estudyante sa pagkopya sa iyang diagram diha sa pisara o ipakigbahin kini ngadto sa klase, ug pangutan-a ang ubang mga estudyante kon sila ba adunay bisan unsa nga ikadugang ngadto sa “Ako Nagsaad” ug ang “Dios Nagsaad” nga mga kolum. Dayon isulat ang mosunod nga baruganan diha sa pisara o sa usa ka piraso nga papel: Atong madawat ang Espiritu sa Ginoo ug ang saad sa kinabuhing dayon pinaagi sa paghimo ug pagtuman sa pakigsaad sa bunyag. Mahimo nimong isugyot nga ang mga estudyante mosulat niini nga baruganan diha sa ilang mga kasulatan tupad sa Mosiah 18:8–11.

Pangutana: Sa unsa nga paagi nga ang inyong pagsabut sa pakigsaad sa bunyag nag-impluwensya sa inyong tinguha sa paghupot niini nga pakigsaad?

Mosiah 19–24

Ang mga katawhan ni Limhi ug ang mga sumusunod ni Alma giluwas gikan sa pagkaulipon ngadto sa mga Lamanite

Hangyoa ang usa ka estudyante sa pagbasa sa unang pamahayag ni Elder Richard G. Scott sa Korum sa Napulog Duha ka mga Apostoles diha sa leksyon sa day 3 niini nga unit diha sa giya sa estudyante sa pagtuon. Pangutan-a ang mga estudyante unsay gisulti ni Elder Scott nga duha ka matang sa mga pagsulay nga atong atubangon sa atong mga kinabuhi. (Kinahanglan ilang badlisan kini sa ubos sa ilang mga manwal.) Isulat ang Mga hagit nga moabut gikan sa kalapasan ug Kausaban nga moabut gikan sa pagsulay diha sa pisara.

Hangyoa ang mga estudyante sa pagribyu sa ilang mga tubag sa day 3, assignment 1 diha sa ilang mga scripture study journal. Dayon isulat ang Mga katawhan ni Limhi ubos sa “Mga hagit nga moabut gikan sa kalapasan” (tan-awa sa Mosiah 19:10, 25–28; 20:20–21) ug ang Mga katawhan ni Alma ubos sa “Kausaban nga moabut gikan sa pagsulay” (tan-awa sa Mosiah 23:18–21). Dapita ang mga estudyante sa paglista diha sa pisara kon unsaon sa mga katawhan karon mahimong makasinati sa matag usa niini nga mga matang sa mga hagit.

Samtang ikaw nagribyu sa mosunod nga mga baruganan uban sa imong mga estudyante, isulat kini sa pisara.

Dapita ang mga estudyante sa pagbasa sa Mosiah 21:13–16 nga nagpares. Hangyoa sila sa pag-ila og mga pulong nga nagtudlo nga kon kita mopaubos sa atong mga kaugalingon, motawag diha sa ngalan sa Ginoo, ug mohinulsol sa atong mga sala, ang Dios motubag sa atong mga pag-ampo ug mopagaan sa palas-anon sa atong mga sala diha sa iyang kaugalingong panahon. Hangyoa ang mga estudyante sa pagpakigbahin kon unsaon sa ilang hunahuna ang usa ka tawo makagamit niini nga baruganan kon sila nagsinati og usa sa mga hagit nga anaa diha sa pisara.

Dapita ang mga estudyante sa pagbasa sa Mosiah 21:31–32, 35 ug ipa-summarize ang paglayas sa mga katawhan ni Limhi diha sa Mosiah 22 aron sa pagpakita nga kon kita makigsaad sa pagserbisyo sa Dios ug magsunod sa Iyang mga sugo, ang Ginoo mohatag og paagi alang sa atong kaluwasan. Mahimo nimong awhagon ang mga estudyante sa pagsulat niini nga baruganan diha sa ilang mga kasulatan tupad sa Mosiah 21:31–35.

Aron sa pagribyu og baruganan nga gikat-unan sa mga estudyante gikan sa pagtuon mahitungod sa mga katawhan ni Alma, hangyoa ang usa ka estudyante sa pag-summarize sa istorya kon sa unsa nga paagi ang mga katawhan ni Alma nadala sa pagkaulipon sa mga Lamanite (tan-awa sa Mosiah 23:25–24:11). Dapita ang pipila ka mga estudyante sa pagpuli-pulig basa og kusog sa Mosiah 24:12–17. Hangyoa sila sa pagpasabut og mga pulong nga nagtudlo nga kon kita mapainubsanong mosunod sa kabubut-on sa Ginoo, molig-on Siya kanato ug moluwas kanato gikan sa atong mga pagsulay diha sa Iyang panahon. Mahimo nimong awhagon sila sa pagmarka og importanting mga pulong o hugpong sa mga pulong niini nga mga bersikulo.

Kopyaha ang mosunod nga mga ehemplo diha sa pisara o ihatag kini nga handout. Hangyoa ang mga estudyante sa pagpasabut kon unsaon nila paggamit ang mga kamatuoran nga ilang gikat-unan gikan sa pagtuon mahitungod sa mga katawhan ni Limhi ug Alma aron sa pagtabang sa tawo sa matag ehemplo.

Ang usa ka higala nakaila sa panginahanglan sa paghinulsol ug nagsinati og grabeng pagbati sa pagkadili takus ug pagkanawad-an og kadasig, naghunahuna kon posible ba kaha ang pagbuntog sa mga tintasyon ug mga pagbati sa kahasol sa konsensya. Unsaon ninyo sa paggamit ang istorya sa mga katawhan ni Limhi aron sa paghatag sa inyong higala sa kaisug ug paglaum sa paghinulsol? (Mahimo nimong awhagon ang mga estudyante sa pag-ila og piho nga mga bersikulo diha sa Mosiah 21 nga mahimo nilang ipakigbahin niini nga higala. Dapita ang mga estudyante sa pagpasabut kon nganong sila naghunahuna nga ang mga bersikulo nga ilang napili motabang sa higala.)
Usa ka higala mahilig maglingaw-lingaw ug naninguha sa pagpuyo pinasubay sa mga sumbanan sa ebanghelyo. Ang pipila ka mga tawo dili gusto nga makig-uban niini nga tawo, nag-ingon nga siya “sobra ra ka maayo” alang kanila. Unsaon ninyo paggamit ang istorya sa mga katawhan ni Alma aron sa pagtabang sa inyong higala nga mosalig sa Ginoo ug makakaplag og kalig-on ug kahupayan sa panahon niini nga pagsulay? (Mahimo nimong awhagon ang mga estudyante sa pag-ila og piho nga mga bersikulo diha sa Mosiah 24 nga mahimo nilang ipakigbahin sa ilang higala. Dapita sila sa pagpasabut kon nganong sila naghunahuna nga ang mga bersikulo nga ilang napili makatabang.)

Dapita ang mga estudyante sa pagsulti mahitungod sa mga panahon sa dihang sila o ang mga tawo nga ilang nailhan nakasaksi sa gahum sa kaluwasan sa Ginoo diha sa ilang mga kinabuhi. (Pagbantay nga dili moawhag o motugot sa mga estudyante sa pagpakigbahin og dili angay nga mga detalye sa nangaging mga kalapasan diha sa klase.) Awhaga ang mga estudyante sa paghupot sa ilang mga pakigsaad, pagtawag sa Ginoo alang sa panabang, ug sa pagsalig sa gahum sa Iyang kaluwasan alang sa bisan unsang mga pagsulay nga ilang giatubang sa ilang mga kinabuhi. Taposa ang klase pinaagi sa pagpaambit sa imong pagpamatuod sa gahum sa Ginoo sa pagluwas kanato gikan sa mga hagit ug mga kalisud nga moabut gikan man sa atong kaugalingong mga kalapasan o gikan sa pagsulay nga gituyo aron sa pag-usab kanato.

Sunod nga Unit (Mosiah 26–Alma 4)

Sa umaabut nga semana, ang mga estudyante magkat-on mahitungod sa anghel kinsa gipadala aron sa pagsanta ni Alma nga Batan-on gikan sa paglaglag sa Simbahan. Ilang tun-an kon unsa ang nahitabo ni Alma human niini nga kasinatian ug basahon ang pipila sa labing importante nga mga pagtulun-an kabahin sa pagkatawo pag-usab nga makaplagan diha sa kasulatan. Sa dihang namatay si Haring Mosiah, si Alma gipili nga mahimong lider nga Nephite. Si Amlici, usa ka dautang tawo, misulay sa pagbuntog kaniya. Awhaga ang mga estudyante sa pagpangita kon unsa ang gibuhat ni Alma sa pagdapit sa gahum sa kaluwasan sa Ginoo niini nga sitwasyon.