Librarya
Leksyon 66: Mosiah 26

Leksyon 66

Mosiah 26

Pasiuna

Sa panahon sa pagmando ni Mosiah, daghan sa mga bag-ong kaliwatan—kadtong kinsa gagmay pa nga mga bata sa panahon sa katapusang pakigpulong ni Haring Benjamin—wala mituo sa mga pagtulun-an sa Simbahan ug midumili sa pagtawag sa Ginoo. Kining dili matuohon nga mga kabatan-onan miimpluwensya sa ubang mga miyembro sa Simbahan sa paghimo og bug-at nga mga sala. Kadaghanan niining mga malapason gidala ngadto sa atubangan ni Alma, ang lider sa Simbahan. Wala mahibalo si Alma kon unsa ang buhaton og una, apan sa katapusan gipangutana niya ang Ginoo alang sa paggiya kon unsaon ang paghukom sa dili masunurong mga miyembro. Gipadayag sa Ginoo ang proseso nga kinahanglang sundon ni Alma sa paghimo sa mga miyembro sa Simbahan nga manubag sa ilang mga sala. Gikat-unan usab ni Alma ang kalooy ug ang pagkaandam sa Dios nga mopasaylo niadtong kinsa naghinulsol. Gisunod ni Alma ang tambag sa Ginoo ug midala og kahusay sa Simbahan.

Mga Sugyot alang sa Pagtudlo

Mosiah 26:1–6

Daghan sa bag-ong kaliwatan dili motuo sa ebanghelyo ug naggiya sa uban sa paghimo og sala

Sa dili pa magklase, isulat ang mosunod nga mga pangutana diha sa pisara:

Unsaon ninyo sa paghulagway ang inyong mga pagpamatuod karon?

Sa unsa nga mga paagi nga inyong gusto nga motubo ang inyong pagpamatuod?

Hangyoa ang mga estudyante sa pagtubag niini nga mga pangutana diha sa ilang mga scripture study journal o mga class notebook. Human sa igong panahon, ipasabut nga ang Mosiah 26 naglangkob og istorya sa usa ka grupo sa mga katawhan kinsa wala mobuhat unsay kinahanglan nilang buhaton aron sa pag-amuma sa ilang mga pagpamatuod. Agig resulta, ang ilang hugot nga pagtuo diha sa Dios wala gayud molambo, ug nadala nila ang daghang mga miyembro sa Simbahan ngadto sa kasal-anan ug kasaypanan. Isugyot nga samtang ang mga estudyante magtuon niini nga istorya, hunahunaon nila kon unsay gitudlo niini mahitungod sa pagpalambo ug paglig-on sa ilang mga pagpamatuod.

Dapita ang usa ka estudyante sa pagbasa og kusog sa Mosiah 26:1–3. Dayon pangutan-a ang klase:

  • Unsa nga pagpili ang gihimo sa kadaghanan sa bag-ong kaliwatan? (Gipili nila ang dili pagtuo sa mga tradisyon sa ilang mga ginikanan.)

  • Ngano sa inyong hunahuna ang pagkadili matuohon sa mga katawhan nagpugong sa ilang abilidad sa “pagsabut sa pulong sa Dios”? Mosiah 26:3).

Ipasabut nga ang pagtuo (o gani ang pagbaton og tinguha sa pagtuo) naggiya ngadto sa mga paglihok nga naglig-on sa atong mga pagpamatuod. Sa laing bahin, kon ang mga katawhan magpili sa dili pagtuo, nagpili usab sila sa dili pagbuhat og pipila ka mga butang nga motabang kanila sa pagpalambo og lig-on nga mga pagpamatuod. Dapita ang mga estudyante sa pagbasa sa hilum sa Mosiah 26:3–4, 6. Hangyoa ang katunga sa klase sa pagpangita sa unsay dili buhaton sa bag-ong kaliwatan tungod sa ilang pagkawalay pagtuo. Hangyoa ang laing katunga sa klase sa pagpangita sa mga resulta niining pagkadili matuohon.

  • Unsa ang gidumili sa bag-ong kaliwatan nga buhaton tungod sa ilang pagkawalay pagtuo?

  • Unsa ang mga epekto sa ilang pagkadili matuohon?

Human ang mga estudyante naghisgot niini nga mga pangutana, isulat ang mosunod diha sa pisara: Aron sa pagpalambo ug pagpabilin og pagpamatuod, kinahanglan nato ang …

Imahe
President Henry B. Eyring

Hangyoa ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan. Hangyoa ang klase sa pagpaminaw og mga paagi sa pagkompleto sa sentence diha sa pisara.

Ang pagpamatuod nagkinahanglan og pag-amuma pinaagi sa pag-ampo diha sa hugot nga pagtuo, ang pagkagutom alang sa pulong sa Dios sa kasulatan, ug ang pagkamasulundon sa kamatuoran nga atong nadawat. Adunay kakuyaw nianang pagpasagad sa pag-ampo. Adunay kakuyaw sa atong pagpamatuod nianang panagsang pagtuon ug pagbasa sa mga kasulatan. Kini ang gikinahanglan nga mga sustansya sa atong pagpamatuod. …

“Ang pagbusog diha sa pulong sa Dios, pag-ampo sa kinasingkasing, ug pagmasulundon sa mga sugo sa Ginoo kinahanglan nga idapat sa samang paagi ug sa kanunay aron ang inyong pagpamatuod motubo ug molambo” (“Usa ka Buhing Pagpamatuod,” Ensign o Liahona, Mayo 2011, 127).

  • Unsa nga mga kalihokan ang giila ni Presidente Eyring nga motabang kanato sa pagpalambo sa atong mga pagpamatuod? (Samtang ang mga estudyante nag-ila niini nga mga kalihokan, isal-ot kini ngadto sa sentence diha sa pisara: Aron sa pagpalambo ug pagpadayon og pagpamatuod, kinahanglan nato ang pagbusog sa pulong sa Dios, pag-ampo nga hugot ang pagtuo, ug pagsunod sa mga sugo sa Ginoo.)

  • Sa unsa nga paagi kini nga mga kalihokan miimpluwensya sa inyong pagpamatuod?

Dapita ang mga estudyante pagbasa sa hilum sa Mosiah 26:5–6 mangita kon giunsa sa dili matuohon nga mga kabatan-onan pag-impluwensya sa pipila ka mga miyembro sa Simbahan.

  • Hunahunaa ang mosunod nga pamahayag: “Kini nahimo nga angay nga kadto kinsa nakabuhat og sala, nga anaa diha sa simbahan, kinahanglan pahimangnoan sila sa simbahan.”(Mosiah 26:6). Sa inyong hunahuna unsa ang ipasabut niini? (Kinahanglan sa mga miyembro sa Simbahan kinsa nakasala nga pagahukman ug adunay tulubagon.)

Mosiah 26:7–14

Nangayo si Alma sa Ginoo og paggiya kon unsaon ang paghukom niadtong kinsa nakahimo og sala

Ipahunahuna sa mga estudyante kon sama kini sa unsa nga mahimong bishop sa usa ka ward nga may mga miyembro kinsa nakahimo og bug-at nga mga sala ug dili mahinulsulon. Hangyoa ang mga estudyante sa pagpamalandong sa hilum kon unsay ilang buhaton niini nga sitwasyon. Sa unsa nga paagi sila motuman sa ilang responsibilidad sa paghimo sa mga miyembro nga may tulubagon sa ilang mga sala ug sa pagtabang kanila nga maghinulsol? Ipasabut nga si Alma, ang lider sa Simbahan, nag-atubang og sama nga hagit.

I-summarize ang Mosiah 26:7–12 pinaagi sa pagpasabut nga kadtong kinsa nakasala gidala sa atubangan ni Alma. Walay sama niini nga nahitabo kaniadto diha sa Simbahan, ug wala mahibalo si Alma kon unsay buhaton. Mihukom siya sa pagpadala sa mga malapason ngadto ni Haring Mosiah aron pagahukman. Gipabalik sila ni Haring Mosiah ngadto ni Alma, kinsa naghupot sa awtoridad gikan sa Dios sa paghukom sa mga miyembro sa Simbahan kinsa nakasala.

Dapita ang usa ka estudyante sa pagbasa og kusog sa Mosiah 26:13–14. Hangyoa ang klase sa pagpangita sa unsay gibati ni Alma mahitungod sa iyang responsibilidad sa paghukom niadtong kinsa nakasala.

  • Sa dihang gibati ni Alma ang kalisud mahitungod sa iyang katungdanan sa paghukom sa mga malapason, unsa ang iyang gibuhat?

  • Nganong importanting mahibaloan nga ang mga bishop ug mga branch president nagtinguha ug nagdawat sa giya sa sa Ginoo kon nagtabang niadtong kinsa nakasala?

Mosiah 26:15–32

Nagpadayag ang Ginoo ngadto ni Alma kon sa unsa nga paagi himoon ang mga miyembro sa Simbahan nga may tulubagon alang sa ilang mga sala ug magpahimutang og mga kondisyon sa paghinulsol.

Aron matabangan ang mga estudyante nga masabtan ang kinatibuk-ang kahulugan sa Mosiah 26:15–32, ipasabut nga kini nga mga bersikulo naglangkob sa tubag sa Ginoo ngadto sa pangutana ni Alma kalabut sa unsay iyang kinahanglan nga buhaton mahitungod sa mga malapason. Samtang ang mga estudyante nagtuon sa tubag sa Ginoo, awhaga sila sa pagpangita og mga baruganan ug mga doktrina nga magtabang kanila nga mas masabtan pa og maayo ang tahas sa mga maghuhukom nga priesthood, sama sa mga bishop ug mga branch president (ug, alang sa mga tighupot sa Melchizedek Priesthood, mga presidente sa stake, district, ug misyon). Hangyoa usab sila sa pagpangita og mga baruganan ug mga doktrina mahitungod sa pagpangayo og pasaylo.

Dapita ang mga estudyante sa pagbasa og hilum sa Mosiah 26:17–28, nga nagtimaan sa matag higayon naggamit ang Ginoo sa pulong nga akong o Ako. Mahimo nimong isugyot nga markahan sa mga estudyante kini nga mga pulong sa matag higayon nga kini makita. Dayon pangutan-a ang klase:

  • Sa Mosiah 26:17–28, unsa ang gisugyot sa mga pulong nga Ako ug akong mahitungod sa katungdanan sa Ginoo diha sa proseso sa paghinulsol? (Mahimo nimong dapiton ang mga estudyante sa pagpakigbahin og piho nga mga hugpong sa mga pulong o mga bersikulo nga nagsuporta sa ilang mga tubag.

  • Unsa nga mga kamatuoran ang atong makat-unan gikan sa Mosiah 26:20–21 mahitungod sa tahas sa mga sulugoon sa Ginoo diha sa proseso sa paghinulsol? (Tabangi ang mga estudyante nga masabtan nga ang mga lider sa priesthood nagrepresentar sa Ginoo ug nga sa mga sitwasyon nga bug-at ang sala, ang mga bishop ug mga branch president makatabang kanato sa paghinulsol ug sa pagdawat og pasaylo.)

  • Sa unsa nga mga paagi makatabang ang bishop o branch president niadtong kinsa nakigbisog sa sala ug mga tintasyon?

Ipasabut nga gitudloan sa Ginoo si Alma mahitungod sa unsay kinahanglan gayud nga buhaton niadtong naninguha og pasaylo aron makahinulsol. Dapita ang mga estudyante sa pagsiksik sa Mosiah 26:29–32 nga magpares ug sa pag-ila og mga baruganan nga magtabang kanila nga makasabut unsa ang gikinahanglan sa Ginoo kanato kon kita maghinulsol.

Human ang mga estudyante adunay higayon sa pagtuon niini nga mga bersikulo, dapita ang pipila ka mga estudyante sa pagsulat diha sa pisara, gamit ang ilang kaugalingon nga mga pulong, sa mga baruganan nga ilang nadiskubrihan. Ang ilang mga tubag mahimong maglakip sa mosunod:

Ang pagkumpisal sa mga sala maggiya ngadto sa pagpasaylo.

Mopasaylo ang Ginoo niadtong kinsa naghinulsol diha sa ka katim-os sa ilang mga kasingkasing.

Kinahanglan gayud kitang mopasaylo sa uban aron madawat ang pagpasaylo sa Ginoo.

Aron matabangan ang mga estudyante nga mas masabtan kini nga mga baruganan, ipangutana ang pipila o ang tanan nga mosunod nga mga pangutana:

  • Sa Mosiah 26:29, unsa ang gipasabut sa hugpong sa mga pulong “mokumpisal sa iyang mga sala sa atubangan kanimo ug kanako”? (Mahimo nimong ipasabut nga niini nga bersikulo, ang pulong kanimo nagpasabut ngadto ni Alma.)

  • Kon ang usa ka tawo nakahimo og usa ka bug-at nga sala, ngano sa inyong hunahuna ang tawo gikinahanglan nga mokumpisal ngadto sa Ginoo ug ngadto sa angay nga lider sa Simbahan? Bug-at nga mga kalapasan, sama sa paglapas sa balaod sa kaputli, mahimong makarisgo sa pagkamiyembro sa tawo diha sa Simbahan. Busa, sa ingon nga mga sitwasyon ang usa ka tawo kinahanglan nga ikumpisal ang sala ngadto sa Ginoo ug sa Iyang representante diha sa Simbahan. Ang mga bishop ug mga branch president naghupot sa mga yawe sa priesthood aron sa pagtabang niadtong kinsa nakasala sa pagpangayo og pasaylo Samtang ang Ginoo lamang ang makapasaylo og mga sala, ang mga lider sa priesthood adunay tahas sa pagsuporta diha sa pagtabang sa mga tawo nga madawat kana nga pasaylo. Huptan nila ang tanang mga pagkumpisal nga tinago ug tabangan kadtong kinsa nagkumpisal sa tibuok proseso sa paghinulsol.)

  • Unsa sa inyong hunahuna ang gipasabut alang sa usa ka tawo nga maghinulsol “diha sa ka tim-os sa iyang kasingkasing”? (Mosiah 26:29).

  • Sa inyong hunahuna ngano nga ang Ginoo nagkinahanglan kanato nga mopasaylo sa uban? Sa unsa nga paagi nga ang paghinulsol ug ang pagpasaylo sa uban konektado? (Tan-awa sa 3 Nephi 13:14–15; D&P 64:8–11.)

  • Unsa nga hugpong sa mga pulong niini nga mga bersikulo mahimong maghatag og kaisug o kahupay ngadto sa usa ka tawo kinsa nagtinguha sa paghinulsol apan wala mobati nga siya mahimong mapasaylo?

Mosiah 26:33–39

Nagsunod si Alma sa tambag sa Ginoo, naghukom niadtong kinsa nakasala ug nagdala og kahusay sa Simbahan.

Ipasabut nga ang Mosiah 26:33–37 nag-istorya kon giunsa pagsunod ni Alma ang mga panudlo sa Ginoo, paghukom sa mga miyembro sa Simbahan kinsa nakasala, ug pagdala og kahusay sa Simbahan. Dapita ang mga estudyante sa pagbasa og hilum sa Mosiah 26:34–37, nga mangita sa mga resulta sa mga paningkamot ni Alma sa pagsunod sa tambag sa Ginoo. Pakigbahin sa imong pagpamatuod nga samtang kita maghinulsol ug magpuyo nga matarung, makabaton kita og kalinaw sa atong mga kasingkasing ug mouswag sa espirituhanong paagi.

Komentaryo ug Background nga Impormasyon

Mosiah 26:29–30. Ang importanting mga bahin sa paghinulsol

Gitudlo ni Elder Richard G. Scott sa Korum sa Napulog Duha ka mga Apostoles ang mahitungod sa importanting mga bahin sa paghinulsol:

“Si Spencer W. Kimball [mihatag] og usa ka nindot kaayo nga giya ngadto sa pagpasaylo pinaagi sa paghinulsol. Kini nakatabang og daghan sa pagpangita sa ilang dalan pabalik. Iyang [giila] ang lima ka importanting mga bahin sa paghinulsol.

“Kaguol alang sa sala. Pagtuon ug pagpamalandong aron sa pagdeterminar kon unsa ka bug-at ang pagtan-aw sa Ginoo sa inyong kalapasan. Kana modala og pang-ayo sa kasubo ug pagbasol. Kini magdala usab og sinserong tinguha alang sa kausaban ug kaandam sa pagtuman sa matag gikinahanglan alang sa pagpasaylo. …

“Pagbiya sa sala. Kini usa ka dili matarug, permanenting desisyon nga dili mousab sa kalapasan. Pinaagi sa pagsunod niini nga pasalig, ang pait nga matagamtam niana nga sala dili kinahanglan nga usbon sa pagsinati. …

Pagkumpisal sa sala. Kanunay ninyong gikinahanglan ang pagkumpisal sa inyong mga sala ngadto sa Ginoo. Kon kini bug-at nga mga kalapasan, sama sa imoralidad, gikinahanglan kining ikumpisal ngadto sa bishop o stake president. Palihug sabta nga ang pagkumpisal dili paghinulsol. Kini usa ka importanting lakang, apan sa kaugalingon dili igo. Ang dili pagkumpisal sa tanan pinaagi sa paghisgot og minos nga mga sayop dili motabang kaninyo pagsulbad sa mas bug-at, wala gipahayag nga kalapasan. Importante sa pagpasaylo mao ang pagkaandam sa hingpit nga ipahayag ngadto sa Ginoo ug, kon kinahanglan, sa Iyang priesthood nga maghuhukom sa tanan nga inyong nabuhat. …

Pag-uli tungod sa sala. Kinahanglan gayud ninyong i-uli kutob sa mahimo ang tanan nga gikawat, giguba, o gihugawan. Ang andam nga pag-uli usa ka lig-ong ebidensya ngadto sa Ginoo nga kamo may pasalig nga mobuhat sa tanan nga inyong mahimo sa paghinulsol.

“Ang pagkamasulundon ngadto sa tanang mga sugo. Ang bug-os nga pagkamasulundon nagdala og hingpit nga gahum sa ebanghelyo nganha sa inyong kinabuhi nga may kalig-on sa pagpunting diha sa pagbiya og piho nga mga sala. Kini naglakip og mga butang nga tingali sa sinugdanan kamo wala maghunahuna nga kabahin sa paghinulsol, sama sa pagtambong og mga miting, pagbayad sa ikapulo, paghatag og serbisyo, ug sa pagpasaylo sa uban …

“Modugang ako og ikaunom nga lakang: Pag-ila sa Manluluwas. Sa tanang gikinahanglan nga mga lakang sa paghinulsol, magpamatuod ako nga ang labing importante mao nga kamo magbaton og lig-on nga pagtuo nga ang pagpasaylo moabut tungod sa Manunubos. Importante nga mahibaloan nga sa Iyang mga kondisyon lamang kamo mapasaylo” (“Finding Forgiveness,” Ensign, Mayo 1995, 76).

Iprinta