Mosiah 7–17 (Unit 12)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina, ug mga baruganan nga nakat-unan sa mga estudyante samtang sila nagtuon sa Mosiah 7–17 (unit 12) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa mga estudyante.

Day 1 (Mosiah 7–8)

Samtang ilang gitun-an ang Mosiah 7–8, gipunting sa mga estudyante ang koneksyon tali sa pagkadautan ug sa pagkaulipon. Gikat-unan usab nila gikan sa mga pulong ni Haring Limhi nga ang pag-ila sa atong mga kadautan ug pagbati og kasubo alang niini makagiya kanato sa pagbalik ngadto sa Ginoo alang sa kaluwasan. Gipasalig ni Ammon si Limhi nga ang Ginoo naghatag og mga propeta, mga manalagna, ug mga tigpadayag sa kaayohan sa mga katawhan.

Day 2 (Mosiah 9–10)

Ang mga estudyante daghan pang nakat-unan mahitungod kon giunsa sa grupo sa mga Nephite, nga gitawag og mga katawhan ni Zeniff, pagpuyo taliwala sa mga Lamanite. Ang mosunod nga kamatuoran nahatagan og importansya sa dihang si Zeniff ug ang iyang mga katawhan nakiggubat batok sa manggugubat nga mga Lamanite: Ang Ginoo molig-on kanato samtang kita mobuhat sa tanan nga atong mahimo ug mobutang sa atong pagsalig diha Kaniya.

Day 3 (Mosiah 11–14)

Gigiyahan ni Haring Noah ang iyang mga katawhan sa paghimo og mga salawayon ug mga kadautan. Nadiskubrihan sa mga estudyante nga ang Dios nagpadala og mga propeta aron sa pagtabang kanato sa paghinulsol, paglikay sa pagkaalaot, ug pag-angkon sa kaluwasan. Pinaagi sa mga pagtulun-an sa propeta nga si Abinadi, nakat-unan sa mga estudyante nga kon kita magsunod sa mga sugo sa Dios, kita maluwas. Nakat-unan usab nila nga ang Pag-ula ni Jesukristo mao ang tinubdan sa kaluwasan.

Day 4 (Mosiah 15–17)

Sa wala pa ang iyang pagkamartir, maisugong gipadayag ni Abinadi nga ang Pag-ula ni Jesukristo nagtagbaw sa mga gipangayo sa hustisya alang niadtong kinsa nagtuo diha sa matubsanong gahum sa Manluluwas, naghinulsol sa ilang mga sala, ug nagsunod sa mga sugo. Gitudlo usab ni Abinadi nga tungod sa Pag-ula ni Jesukristo, ang tanang mga tawo mabanhaw. Pinaagi sa pagtuon niini nga mga doktrina, gihunahuna sa mga estudyante ang importansya sa pagsalig diha sa Manluluwas ug sa pagmatinuoron ngadto sa Dios sa tanan nga mga sitwasyon.

Pasiuna

AngMosiah 7–17 naghulagway sa mga panaw ug mga kasinatian sa lain-laing mga indibidwal ug mga grupo sa mga katawhan. Ang pagpili ni Zeniff sa paggiya og usa ka grupo sa mga Nephite sa pagpuyo taliwala sa mga Lamanite adunay gibug-aton sa duha ka mga nasud. Sama pananglit, ang mga katawhan ni Zeniff ug ang ilang mga kaliwat gisinati ang mga pagsulay, apostasiya, pagkaulipon, espiritwal nga pagkatawo pag-usab,ug pagkaluwas. Ang unang bahin niini nga leksyon mohatag sa mga estudyante og oportunidad sa pagribyu sa mga ngalan, mga dapit, ug mga panghitabo nga gitun-an nila niini nga semana. Ang ikaduhang bahin niini nga leksyon motabang sa mga estudyante og pag-ila sa pinakatema sa mensahe sa propetang si Abinadi—si Jesukristo ug ang Iyang Pag-ula. Kini usa ka mensahe nga andam nga pakamatyan ni Abinadi.

Mga Sugyot alang sa Pagtudlo

Mosiah 7–17

Ribyu sa nahinaboan sa kasaysayan ug doktrina

Aron pagtabang kanimo sa pagpasabut sa mga panghitabo niini nga leksyon, ribyuha ang tsart sa “Kinatibuk-ang Pagpasabut sa Mosiah 7–24” sa unit 12, day 1 sa giya sa estudyante sa pagtuon. Dapita ang mga estudyante sa pagbasa sa Mosiah 7:1–2, ug ipaila nila ang duha ka mga yuta nga gihinganlan. Hangyoa sila sa pagpasabut kon nganong lain-lain nga mga grupo sa mga Nephite buot nga mobiyahe gikan sa usa ka yuta ngadto sa lain.

Isulat ang mga ngalan sa duha ka mga yuta sa magkaatbang nga mga tumoy sa pisara (o sa piraso nga papel):

Yuta sa Zarahemla

Yuta sa Nephi (Lehi-Nephi)

Ang mosunod nga mga pangutana tingali makatabang samtang ikaw ug ang mga estudyante nagribyu sa mga panghitabo. Isulat diha sa pisara ang mga ngalan sa mga indibidwal nga inyong hisgutan. Mahimo nimong gamiton ang tanan o ang pipila lamang sa mga pangutana, nag-agad sa mga komentaryo sa mga estudyante.

Ngano nga si Zeniff buot mobiya sa yuta sa Zarahemla? (Tan-awa sa Mosiah 9:1, 3.)
Sa unsa nga paagi si Zeniff, Noah, ug Limhi may relasyon? (Tan-awa sa Mosiah 7:9.)
Unsa nga matang sa pagkahari si Noah? (Tan-awa sa Mosiah 11:1–5, 11.)
Unsa ang gibuhat sa Dios aron sa pagdani ni Noah ug sa iyang mga katawhan sa pagbiya sa ilang hilabihan ka pagkadautan ug pagkasalawayon? (Gipadala niya ang Iyang propeta nga si Abinadi sa pagtawag kanila ngadto sa paghinulsol.)
Unsay inyong ikasulti kanamo mahitungod ni Alma? Ang mga tubag mahimong maglakip nga siya usa sa mga pari ni Haring Noah, nga gituohan ug gisulat niya ang mga pulong ni Abinadi, ug nga siya milayas aron malikayan nga mapatay.
Nganong si Moises ug si Isaias importante niini nga mga kapitulo, bisan tuod sila nagpuyo sa dugay na kaayo nga wala pa si Abinadi ug didto sa laing bahin sa kalibutan?
Nganong gipadala ni Limhi ang 43 sa iyang mga katawhan ngadto sa kamingawan? (Si Limhi ug ang iyang mga katawhan diha sa pagkaulipon sa mga Lamanite ug naninguha sa pagpangayo og panabang gikan sa mga katawhan sa Zarahemla. Unsa hinoon ang ilang nakit-an sa Zarahemla? (Gikit-an nila ang usa ka guba nga sibilisasyon ug 24 ka bulawan nga mga palid nga adunay mga sulat diha niini.)
Unsa ang gibuhat ni Ammon ug sa ubang 15 ka mga tawo? (Gipadala sila ni Mosiah sa pagsusi kon unsa ang nahitabo sa mga katawhan ni Zeniff. Ilang nakit-an ang mga kaliwat niadtong mga tawo nga anaa sa pagkaulipon. Ang apo nga lalaki ni Zeniff nga si Limhi mao ang ilang hari.)
Kinsa ang miserbisyo isip hari sa Zarahemla ug isip usa ka propeta, manalagna, ug tigpadayag? (Mosiah.) Ngano nga ang iyang tahas isip manalagna importante ngadto ni Limhi? (Nahibaloan ni Limhi nga si Mosiah makahubad sa mga panulat diha sa 24 ka bulawan nga mga palid.)

Ipasabut nga mga 80 ka tuig ang milabay tali sa pagbiya ni Zeniff ug sa iyang mga katawhan sa Zarahemla ug sa pag-abut ni Ammon ug sa iyang mga kauban diha sa yuta sa Nephi.

Human nimo natabangan ang mga estudyante nga mas masabtan og maayo ang istorya sa kasaysayan, pahinumdumi sila nga adunay lain nga indibidwal nga ilang gitun-an niini nga semana kansang ngalan wala pa diha sa pisara.

Hangyoa ang matag estudyante sa pagbasa sa Mosiah 16:6–8 ug pag-ila sa pangalan niini nga indibidwal. Sultihi ang mga estudyante nga bisan tuod kini nga bahin sa Basahon ni Mormon nagdala og daghang kasaysayan, kini naghatag usab og importansya sa doktrina sa kaluwasan pinaagi ni Jesukristo.

Aron sa paghatag og gibug-aton sa importansya sa kaluwasan pinaagi ni Jesukristo, kopyaha ang mosunod nga tsart diha sa pisara o ihatag kini og handout. Dapita ang mga estudyante sa pagtrabaho nga magpares aron sa pagtuon sa mga scripture reference nga gilista diha sa tsart ug hisgutan ang ilang makita. Tungod kay pipila sa mga pangutana sa paggamit mga personal kaayo ang matang, makadisider ang mga estudyante kon tubagon ba kini og kusog ngadto sa usag usa, isulat ang mga tubag diha sa ilang mga scripture study journal, o sa hilum hunahunaon ang ilang mga tubag.

Kasulatan	Unsa ang Pangitaon	Mga Pangutana sa Paggamit
Mosiah 7:33	Sa unsa nga paagi kita maluwas gikan sa espiritwal ug pisikal nga pagkaulipon.	Sa tulo ka mga punto nga gihatagan og gibug-aton ni Limhi, hain ang inyong gibati nga kinahanglang inyong buhaton sa pagpalig-on niini nga panahon?
Mosiah 13:11	Ngano nga si Haring Noah napakyas sa pagsabut sa misyon ni Jesukristo.	Unsa ang mga ebidensya sa inyong kinabuhi nga ang mga sugo nasulat diha sa inyong kasingkasing? Sa unsa nga mga paagi kamo makatuon ug makatudlo og pagkamatarung?
Mosiah 14:3–7	Makahuluganong mga pulong ug hugpong sa mga pulong mahitungod sa pag-antos ug pagsalikway sa Manluluwas.	Sa unsa nga mga paagi ang mga katawhan nanghimaraut ug nagsalikway sa Manluluwas karon? Sa unsa nga paagi ang usa ka tawo nagtago sa iyang nawong gikan Kaniya? Sa unsa nga paagi ang usa ka tawo naghimo sa bali?
Mosiah 15:6–9, 11	Unsa ang “gibugto” ni Jesukristo ug unsa ang Iyang “naangkon”; usab, unsa ang atong naangkon tungod sa sakripisyo sa Manluluwas.	Sa unsa nga mga paagi ang Ginoo sa bag-ohay mipataliwala alang kaninyo? Sa unsa nga paagi Siya mibarug tali kaninyo ug sa gipangayo sa hustisya?

Aron matabangan ang mga estudyante sa pagpamalandong kabahin sa unsay ilang natun-an niini nga kalihokan sa kasulatan ug sa ilang mga leksyon alang sa semana, pangutan-a: Giunsa sa mga baruganan ug sa mga doktrina nga inyong gitun-an niini nga semana pagtabang kaninyo sa pagpaabut og usa ka kapasayloan sa inyong mga sala?

Hatagi ang mga estudyante og oportunidad sa pagpamatuod kabahin ni Jesukristo.

Usa ka paagi nga imong matapos ang leksyon karon mao ang pagbasa sa Mosiah 16:13–15 ug sa pagpaambit sa imong pagpamatuod sa atong panginahanglan alang sa Manluluwas. Ang lain nga paagi mao ang pagpatataw ngadto sa imong mga estudyante og duha ka mga doktrina o mga baruganan nga ilang nakat-unan niini nga semana: nga ang Pag-ula ni Jesukristo mao ang tinubdan sa kaluwasan ug nga si Jesukristo nagtagbaw sa mga gipangayo sa hustisya alang sa tanan kinsa maghinulsol.

Sunod nga Unit (Mosiah 18–25)

Mosiah 18–25 nagpadayag kon giunsa sa duha ka grupo sa paglayas gikan sa pagkaulipon diha sa ilang mga kaaway ug pagbalik nga luwas ngadto sa Zarahemla. Inyong makat-unan giunsa sa Dios paggiya ang matag grupo sa paglayas. Ang usa ka grupo misunod sa plano ni Gideon nga hubgon ang mga gwardiya, ug ang lain nga grupo milayas pinaagi sa pagsunod ni Alma samtang natulog ang mga Lamanite. Kinsa ang nakaingon sa mga Lamanite nga nakatulog?