Leksyon 51

Mga Pulong ni Mormon–Mosiah 1

Pasiuna

Ang basahon nga giulohan og Mga Pulong ni Mormon nagsilbi isip usa ka taytayan tali sa gagmay nga mga palid ni Nephi ug sa minubo ni Mormon sa dagkong mga palid ni Nephi. Niini nga basahon, nga gisulat ni Mormon hapit 400 ka tuig human sa pagkatawo ni Jesukristo, gipasabut ni Mormon nga iyang gipangayo ang pag-agak gikan sa Dios ug gigiyahan sa Balaang Espiritu mahitungod sa unsay ilakip sa iyang rekord. Gihisgutan usab niya si Haring Benjamin ug mihatag og mahinungdanong mga panabut mahitungod kon nganong si Haring Benjamin adunay ingon ka dako kaayong impluwensya sa iyang mga katawhan. AngMosiah 1 naglangkub og pipila sa mga pagtulun-an ni Haring Benjamin ngadto sa iyang anak nga mga lalaki. Gitudloan niya sila nga ang mga kasulatan nagtabang kanato sa paghinumdom sa Dios ug sa pagsunod sa Iyang mga sugo.

Mga Sugyot alang sa Pagtudlo

Mga Pulong ni Mormon 1:1–11

Nagpamatuod si Mormon nga gipreserbar sa Dios ang nagkalain-laing mga rekord alang sa usa ka maalamong katuyoan.

Hangyoa ang mga estudyante sa paghunahuna mahitungod sa usa ka panahon sa dihang ang Espiritu miaghat kanila sa pagbuhat og usa ka butang. Mahimong imo silang pasulaton mahitungod niini nga kasinatian diha sa ilang mga scripture study journal o mga class notebook. Aron matabangan sila sa paghunahuna mahitungod sa ilang mga kasinatian, mahimong mopakigbahin ka og usa ka lakbit nimong kaugalingon nga kasinatian. Pahibaloa ang mga estudyante nga sa kaulahian sa leksyon, mohangyo ka sa pipila kanila sa pagpakigbahin sa ilang mga kasinatian ngadto sa klase.

Ipasabut ngadto sa mga estudyante nga karon sila magtuon sa ehemplo sa usa ka tawo kinsa misunod og pag-aghat bisan tuod siya wala makasabut sa tanan nga mga rason kon nganong kinahanglan niyang buhaton kini.

Ipatan-aw ngadto sa mga estudyante ang Mga Pulong ni Mormon ug ipapangita (sa ubos sa pahina o diha sa summary sa kapitulo) ang bana-bana nga petsa kon kanus-a gisulat ni Mormon ang basahon. Hangyoa sila sa pagtandi niana nga petsa sa mga petsa sa mga basahon ni Omni ug Mosiah.

• Unsa ang atong makat-unan mahitungod sa Mga Pulong ni Mormon gikan niini nga mga petsa?

Ipakita ang litrato ni Mormon nga Nagpamubo sa mga Palid (62520; Libro sa mga Hulagway sa Ebanghelyo [2009], nu. 73). Dapita ang usa ka estudyante sa pagbasa og kusog sa Mga Pulong ni Mormon 1:1–2 Tabangi ang mga estudyante sa pagsabut nga gisulat ni Mormon ang basahon nga giulohan og Mga Pulong ni Mormon human ang kadaghanan sa mga panghitabo sa Basahon ni Mormon nahitabo. Ipasabut nga ang Mga Pulong ni Mormon nagtabang kanato sa pagsabut nga ang Basahon ni Mormon gihugpong gikan sa nagkalain-laing mga rekord. Kini nagpakita usab nga gigiyahan sa pagpadayag kini nga proseso.

Aron matabangan ang mga estudyante sa paghunahuna kon giunsa sa Mga Pulong ni Mormon, sa gagmay nga mga palid ni Nephi, ug sa minubo ni Mormon sa dagkong mga palid ni Nephi naghiusa sa pagtakdo sa Basahon ni Mormon, hunahunaa ang pagpakita kanila sa tsart nga giulohan og “Ang mga Palid ug ang Kalabutan Niini ngadto sa Gimantala nga Basahon ni Mormon” diha sa apendiks sa katapusan niini nga manwal. Mahimo usab nga imong andamon ang mosunod nga visual aid sa wala pa ang klase:

Pundoka ang duha ka basahon ug usa ka pirasong papel. Ang usa ka basahon kinahanglang kaduhaon ang gibag-on sa usa. Sa buko-buko sa mas nipis nga basahon, ipatapot ang gilis sa papel nga gimarkahan og Gagmay nga mga Palid ni Nephi. Sa buko-buko sa mas baga nga basahon, ipatapot ang gilis sa papel nga gimarkahan og Ang Minubo ni Mormon sa Dagkong mga Palid ni Nephi. Sa piraso nga papel, isulat ang Ang mga Pulong ni Mormon.

Sa paggamit niini nga visual aid sa klase, ipataas ang basahon nga nagrepresentar sa minubo ni Mormon sa dagkong mga palid ni Nephi. Ipasabut nga ang mga rekord diha sa dagkong mga palid ni Nephi mao ang nag-unang tinubdan alang sa Basahon ni Mormon. Gikan sa minubo ni Mormon niini nga rekord, gihubad ni Joseph Smith ang mga basahon ni Mosiah, Alma, Helaman, 3 Nephi, ug 4 Nephi.

Dapita ang mga estudyante sa pagbasa og hilum sa Mga Pulong ni Mormon 1:3. Hangyoa sila sa pagpangita sa unsay nadiskubrihan ni Mormon human niya gimubo ang usa ka bahin sa dagkong mga palid ni Nephi. Samtang nagreport ang mga estudyante kon unsa ang ilang nakit-an, tabangi sila sa pagsabut nga ang hugpong sa mga pulong “kini nga mga palid” nagpasabut ngadto sa gagmay nga mga palid ni Nephi. Ipataas ang basahon nga nagrepresentar sa gagmay nga mga palid ni Nephi. Ipasabut nga gikan niini nga rekord, gihubad ni Joseph Smith ang mga basahon sa 1 Nephi hangtud sa Omni.

Ipabasa sa mga estudyante ang Mga Pulong ni Mormon 1:4–6 aron makat-unan kon unsay gibati ni Mormon mahitungod sa gagmay nga mga palid ni Nephi.

• Unsa ang nakit-an ni Mormon diha sa gagmay nga mga palid ni Nephi nga nakapahimuot?

• Unsa ang gibuhat ni Mormon sa gagmay nga mga palid ni Nephi?

Aron sa pagpakita nga gilakip ni Mormon ang gagmay nga mga palid ni Nephi uban sa iyang minubo sa dagkong mga palid ni Nephi, ibutang ang mas nipis nga basahon ibabaw sa mas baga nga basahon.

Dapita ang usa ka estudyante sa pagbasa og kusog sa Mga Pulong ni Mormon 1:7 Hangyoa ang klase sa pagpangita sa rason ni Mormon sa paglakip sa gagmay nga mga palid ni Nephi uban sa iyang minubo sa dagkong mga palid ni Nephi.

• Ngano nga giapil ni Mormon ang gagmay nga mga palid uban sa iyang minubo sa dagkong mga palid ? (Gisunod niya ang pag-aghat gikan sa Espiritu.) Nasabtan ba niya ang tanan nga mga rason nganong kinahanglan nga buhaton niya kini?

Tabangi ang mga estudyante sa pag-ila nga nasabtan ni Mormon ang pipila ka mga rason nganong ang gagmay nga mga palid importante. Nailhan niya ang dakong espiritwal nga bili niini ug nahimuot sa mga panagna kalabut ni Jesukristo nga gilangkob niini (tan-awa sa Mga Pulong ni Mormon 1:4–6). Bisan pa niana, wala siya mahibalo sa tanan nga mga rason kon nganong kinahanglan niyang iapil kini agi og dugang ngadto sa bahin sa dagkong mga palid nga naglakip sa samang panahon sa kasaysayan. (Aron mabasa ang mahitungod sa usa ka rason nga wala mahibaloi ni Mormon niana nga panahon, tan-awa ang pasiuna ngadto sa Mga Pulong ni Mormon niini nga manwal.)

Iparibyu og hilum sa mga estudyante ang Mga Pulong ni Mormon 1:7, nga mangita sa mga doktrina nga gitudlo ni Mormon mahitungod sa Ginoo. Siguroha nga ilang nasabtan nga ang Ginoo nahibalo sa tanang mga butang ug nga ang Ginoo makahimo pinaagi kanato aron sa pagtuman sa Iyang kabubut-on.

• Sa unsa kaha nga paagi kini nga mga doktrina nagtabang ni Mormon sa paglihok diha sa pag-aghat nga iyang nadawat?

• Sa unsa kaha nga paagi kini nga mga kamatuoran nagtabang kaninyo kon ikaw makadawat og mga pag-aghat gikan sa Espiritu?

Awhaga ang mga estudyante sa pagribyu sa sitwasyon nga ilang gisulat o gihunahuna sa sinugdanan sa klase. Dapita ang pipila kanila sa pagsulti mahitungod sa mga pag-aghat nga ilang nadawat, sa unsa nga paagi sila milihok niadto nga mga pag-aghat, ug unsa ang nahitabo isip resulta. (Siguroha nga ilang nasabtan nga sila dili kinahanglanang mobati nga obligado sa pagpakigbahin og mga kasinatian nga personal o pribado kaayo.) Samtang nakigbahin ang mga estudyante sa ilang mga kasinatian, mahimong mangutana ka sa mosunod:

• Nahibalo ka ba kong unsa ang mahitabo sa tanan kon ikaw mosunod niini nga pag-aghat?

• Unsa ang naghatag kanimo og determinasyon ug pagtuo sa paglihok diha sa pag-aghat?

Ipataas ang basahon nga nagrepresentar sa minubo ni Mormon sa dagkong mga palid, uban sa basahon nga nagrepresentar sa gagmay nga mga palid ni Nephi nga nagtungtong ibabaw niini. Dayon ipataas ang palid nga papel nga nagrepresentar sa Mga Pulong ni Mormon.

• Diin ang Mga Pulong ni Mormon natakdo kalabut ngadto niining uban nga mga rekord?

Samtang ang mga estudyante nagtubag, ibutang ang piraso nga papel nga nagrepresentar sa Mga Pulong ni Mormon taliwala sa duha ka mga basahon. Ipasabut nga ang Mga Pulong ni Mormon nagsilbi isip usa ka taytayan nga nagsumpay sa kutay sa hitabo tali sa gagmay nga mga palid ni Nephi ug sa minubo ni Mormon sa dagkong mga palid ni Nephi.

Dapita ang usa ka estudyante sa pagbasa og kusog sa Mga Buhat 1:8. Hangyoa ang klase sa pagpangita sa unsay gilauman ni Mormon nga mahimong resulta sa pagsunod sa pag-aghat nga iapil ang gagmay nga mga palid ni Nephi diha sa iyang hugpong sa mga rekord.

Hatagi og gibug-aton nga ang tanan nga mga panulat nga kutob natun-an sa mga estudyante sa Basahon ni Mormon karon nga tuig (1 Nephi–Omni) anaa kanila tungod kay si Mormon misunod sa espiritwal nga panghunahuna sa paglakip sa gagmay nga mga palid.

• Sa unsa nga paagi nga ang pagkamasulundon ni Mormon ngadto sa mga pag-aghat sa Balaang Espiritu mipanalangin sa inyong kinabuhi?

• Unsa ang pipila ka mga pagtulun-an diha sa 1 Nephi hangtud sa Omni nga mapasalamaton ka sa pag-angkon? Ngano nga ikaw mapasalamaton alang niadto nga mga pagtulun-an?

• Hunahunaa ang pagkaandam ni Mormon sa pagsunod sa espiritwal nga mga pag-aghat. Sa unsa nga paagi nga ang atong pagkaandam sa pagsunod sa espiritwal nga mga pag-aghat maka-impluwensya sa atong mga kinabuhi? Sa unsa nga paagi kini nga pagkaandam maka-impluwensya sa mga kinabuhi sa uban? (Ipasabut nga ang Ginoo makapanalangin sa uban pinaagi kanato kon kita mosunod sa mga pag-aghat sa Espiritu Santo.)

Pagpamatuod nga kon kita matinud-anon ngadto sa mga pag-aghat sa Balaang Espiritu, ang Ginoo maglihok “diha [kanato] sa pagbuhat sumala sa iyang kabubut-on” (Mga Pulong ni Mormon 1:7).

Mga Pulong ni Mormon 1:12–18

Nagpatunhay si Haring Benjamin og kalinaw diha sa yuta

Isulat ang gikan sa panagbingkil ngadto sa kalinaw diha sa pisara. Ipasabut nga ang Mga Pulong ni Mormon 1:12–18 nagpaila sa pagmando ni Haring Benjamin. Kining matarung nga tawo nag-atubang og daghan nga mga babag atol sa iyang serbisyo isip usa ka propeta ug hari sa mga tawo. Paresa-paresa ang mga estudyante ug ipabasa ang Mga Pulong ni Mormon 1:12–18 uban sa ilang mga pares. Hangyoa sila sa pag-ila kon unsay gibuhat ni Haring Benjamin ug sa uban nga mga propeta sa pagpatunhay og kalinaw diha sa yuta.

Human ang mga estudyante nakabaton og panahon sa pagbasa, hangyoa sila sa pagsulat og pamahayag diha sa ilang mga scripture study journal nga nag-summarize unsay gibuhat ni Haring Benjamin ug sa iyang mga katawhan sa pag-uswag gikan sa panagbingkil ngadto sa kalinaw. Dapita ang pipila ka mga estudyante sa pagsulat sa ilang mga pamahayag diha sa pisara. Ang mga summary sa mga estudyante mahimong parehas sa mosunod nga mga pamahayag:

Kon kita mosunod sa dinasig nga pagpangulo sa mga propeta, makapatunhay kita og kalinaw.

Diha sa kalig-on sa Ginoo kita makahimo sa pagbuntog og mga hagit.

Gitawag kita sa paghago sa tibuok natong gahum sa pagpatunhay og kalinaw.

Tuguti ang mga estudyante sa paggamit sa ilang kaugalingong mga pulong.

Samtang ang mga estudyante nagpahayag sa mga doktrina ug mga baruganan nga ilang nakaplagan diha sa mga kasulatan, ayaw pagsugyot nga ang ilang mga tubag sayop tungod lamang kay kini lahi gikan sa mga pulong nga gigamit niini nga manwal. Hinoon, kon ang pamahayag sa estudyante sayop sa doktrinal nga paagi, imo kining responsibilidad sa pagtabang kaniya sa hinay-hinay sa pagtarung sa pamahayag. Ang pagbuhat sa mao mahimong maghatag og importanting kasinatian sa pagkat-on samtang nagpalambo og kahimtang sa gugma ug pagtahod.

Idirekta ang atensyon sa mga estudyante ngadto sa Mga Pulong ni Mormon 1:17, diin nag-ingon si Mormon nga si Haring Benjamin ug “daghan nga balaan nga mga tawo diha sa yuta … namulong sa pulong sa Dios uban ang gahum ug uban ang awtoridad [pagtugot].” Ipasabut nga sa sunod nga pipila ka mga leksyon, ang mga estudyante magtuon og usa ka sermon ni Haring Benjamin nga nagpakita sa gahum ug awtoridad sa iyang pagtulun-an.

Mosiah 1:1–18

Nagtudlo si Haring Benjamin sa iyang anak nga mga lalaki sa importansya sa mga kasulatan

Hangyoa ang mga estudyante sa paghanduraw nga sila wala sukad makahibalo og bisan unsa mahitungod sa mga kasulatan.

• Sama sa unsa kaha ang inyong kinabuhi kon wala pa gyud ninyo ang mga kasulatan?

• Hain nga mga kamatuoran ang labing malisud alang kaninyo sa pagpuyo nga wala kini?

Sa lakbit ipaila ang basahon ni Mosiah. Ipasabut nga ang sinugdanan niini nga basahon nagpakita sa tinguha ni Haring Benjamin alang sa iyang anak nga mga lalaki sa pagpadayon og pagkat-on gikan sa mga kasulatan (tan-awa sa Mosiah 1:2). Sa pagtudlo ni Haring Benjamin sa iyang anak nga mga lalaki, gipasabut niya unsa kalahi ang ilang mga kinabuhi kon sila wala gayud makadawat og mga kasulatan.

Dapita ang pipila ka mga estudyante nga magpuli-puli sa pagbasa og kusog sa Mosiah 1:3–8. Hangyoa ang klase sa pagpangita og mga paagi nga ang mga Nephite gipanalanginan tungod kay sila adunay mga kasulatan. Hangyoa ang mga estudyante sa pagreport sa unsay ilang nakat-unan.

• Sa unsa nga mga paagi mituo si Haring Benjamin nga ang mga kasulatan motabang sa iyang anak nga mga lalaki?

• Unsa ang gisugyot ni Haring Benjamin sa kalabutan tali sa pagsiksik sa mga kasulatan ug sa pagsunod sa mga sugo sa Dios? (Bisan og ang mga estudyante mahimong mogamit og lahi nga mga pulong sa pagpahayag sa ilang mga tubag, kinahanglan maila nila ang mosunod nga kamatuoran: Ang pagsiksik sa mga kasulatan nagtabang kanato nga mahibalo ug mosunod sa mga sugo. Mahimo nga mosugyot ka nga isulat sa mga estudyante kini nga kamatuoran diha sa ilang mga kasulatan tupad sa Mosiah 1:3–8.)

• Kanus-a ang pagtuon sa kasulatan mitabang kanimo sa pagsunod sa mga sugo?

Ipakigbahin ang imong pagpamatuod nga ang mga kasulatan tinuod ug nga kini nagtabang kanato sa pagsunod sa mga sugo.

Isulat ang mosunod nga mga pangutana diha sa pisara. (Mahimo nga imong isulat kini sa wala pa ang klase.)

Unsa nga pahibalo ang giplano ni Haring Benjamin nga himoon mahitungod sa iyang anak nga lalaki nga si Mosiah?

Unsa ang gisulti ni Haring Benjamin mahitungod sa “usa ka ngalan” aron mailhan ang mga katawhan?

Ngano nga ang mga Nephite wala malaglag sa mga Lamanite?

Unsa nga mga butang ang gihangyo ni Haring Benjamin kang Mosiah nga ampingan niya?

Hangyoa ang mga estudyante sa paghatag og usa ka minuto ug pagtan-aw kon pila niini nga mga pangutana ilang makita ang mga tubag diha sa Mosiah 1:10–18.

Human ang mga estudyante naghatag og lakbit nga mga tubag ngadto niini nga mga pangutana, ipahibalo nga human sa sunod nga pipila ka mga leksyon tun-an nila ang sermon diin si Haring Benjamin mihatag sa iyang katawhan og “usa ka ngalan nga dili gayud mapapas, gawas kon kini pinaagi sa kalapasan” (Mosiah 1:12).

Komentaryo ug Background nga Impormasyon

Mga Pulong ni Mormon 1:12–18. Ang unang pangalagad ni Haring Benjamin

Gilista ni Mormon ang pipila sa mga hagit nga giatubang ni Haring Benjamin sa iyang unang pangalagad: mga panagbingkil taliwala sa iyang mga katawhan; mga gubat sa misulong nga mga kasundalohan nga Lamanite; mini nga mga Kristo; mini nga mga propeta, mga magsasangyaw, ug mga magtutudlo; mga pagsumpaki gikan sa mga Nephite ngadto sa mga Lamanite; pagkatikig og liog sa mga katawhan (tan-awa sa Mga Pulong ni Mormon 1:12–17). Busa “uban sa pagbulig sa balaan nga mga propeta,” si Haring Benjamin “naghari ibabaw sa iyang mga katawhan diha sa pagkamatarung” ug “nakahimo sa makausa pa og pagpatunhay sa kalinaw diha sa yuta” (Mga Pulong ni Mormon 1:16–18).