Leksyon 58

Mosiah 11–12:17

Pasiuna

Tungod sa garbo ug samok nga pagpuyo ni Haring Noah daghan sa iyang mga katawhan nadala ngadto sa pagkadautan, gipadala sa Ginoo ang propeta nga si Abinadi aron sa pagpasidaan ni Noah ug sa iyang mga katawhan. Gipasidan-an sila ni Abinadi nga sila ibutang ubos sa pagkaulipon kon dili sila maghinulsol. Gipili sa mga katawhan ang dili pagsunod sa mga pasidaan, ug misugo si Haring Noah nga ibalhog si Abinadi ngadto sa bilanggoan.

Ipahiangay ang mga leksyon sa mga panginahanglan sa mga estudyante

Kadaghanan sa mga leksyon naglangkob og mas daghang scriptural nga mga kamatuoran kay sa imong mahuman sa panahon nga gihatag kanimo. Samtang imong tun-an ang mga kasulatan ug ang kurikulum, tinguhaa ang paggiya sa Espiritu Santo aron mahibaloan hain nga mga doktrina ug mga baruganan ang labing importante alang sa imong mga estudyante nga makat-unan ug hisgutan diha sa leksyon. Ang Espiritu Santo motabang kanimo sa pagpahiangay sa matag leksyon ngadto sa mga panginahanglan sa mga estudyante.

Mga Sugyot alang sa Pagtudlo

Mosiah 11:1–19

Naggiya si Haring Noah sa iyang mga katawhan ngadto sa pagkadautan.

Isulat ang mosunod nga mga pangutana diha sa pisara sa wala pay klase:

Unsaon ninyo pagtubag kon ang inyong mga ginikanan misugyot nga pipila sa inyong mga higala adunay ngil-ad nga impluwensya diha kaninyo?

Unsaon ninyo pagtubag kon ang usa ka lider sa Simbahan miingon nga usa sa inyong paborito nga mga kalihokan mibabag sa inyong espirituhanong pagtubo?

Unsaon ninyo pagtubag kon ang propeta misulti sa tin-aw batok sa usa ka piho nga matang sa kalingawan nga kamo malingaw?

Hangyoa ang mga estudyante sa pagpamalandong sa hilum nining mga pangutana: Dayon pangutana:

• Nganong mahagiton kini nga mga sitwasyon?

• Unsa ang inyong mabuhat sa pagsunod sa tambag sa inyong mga ginikanan o mga lider sa mga sitwasyon sama niini?

• Ngano nga ang matarung nga mga tawo andam sa pagsunod og tambag bisan kon kini nagkinahanglan og malisud nga kausaban sa ilang mga kinabuhi?

Ipasabut nga niini nga leksyon, ang mga estudyante makakat-on mahitungod sa usa ka grupo sa mga katawhan kinsa dili andam sa pagsunod sa tambag gikan sa usa ka propeta.

Aron sa paghatag og kinatibuk-ang kahulugan alang sa leksyon, pahinumdumi ang mga estudyante nga si Zeniff nangulo og usa ka grupo sa mga katawhan ngadto sa yuta sa Nephi, diin gidala sila sa pagkaulipon sa mga Lamanite. Bisan og ang mainitong paningkamot ni Zeniff migiya niya nga malingla sa mga Lamanite, maayo siya nga tawo, ug gitudloan niya ang iyang mga katawhan sa pagbutang sa ilang pagsalig diha sa Ginoo. Sa wala pa mamatay si Zeniff, gitugyan niya ang gingharian sa iyang anak nga lalaki nga si Noah. (Tan-awa sa Mosiah 9–10.)

Ipasabut nga si Noah usa ka dautan nga tawo. Aron sa pagpakita giunsa pag-impluwensya sa iyang pagkadautan ang mga katawhan, bahina ang klase ngadto sa duha ka mga grupo. Hangyoa ang unang grupo sa pagbasa sa Mosiah 11:1–2, 5–7, ug hangyoa ang ikaduhang grupo sa pagbasa sa Mosiah 11:14–19. Dapita ang duha ka mga grupo sa pagpangita sa mga detalye kon giunsa pag-impluwensya sa pagkadautan ni Haring Noah ang iyang mga katawhan. Tabangi ang mga estudyante sa pagtuki niini nga mga bersikulo pinaagi sa pagpangutana ingon sa mosunod:

• Ngano sa inyong hunahuna ang mga katawhan andam sa pagsuporta ni Noah sa iyang pagkadautan?

• Ngano nga ang “kawang ug maulog-ulugong mga pulong” nagdala sa mga katawhan nga malingla? (Samtang ang mga estudyante naghisgot niini nga pangutana, mahimo nimong ipasabut nga ang pag-ulog-ulog bakak nga pagdayeg, kasagaran gihatag aron sa pagmani-obra sa tawo nga gidayeg.)

• Gikan niini nga asoy sa mga katawhan ni Noah, unsa ang atong makat-unan mahitungod sa unsa nga paagi kinahanglan tubagon ang kawang ug maulog-ulugong mga pulong? (Kon kita motuo sa kawang ug maulog-ulugong mga pulong sa uban, atong giablihan ang atong mga kaugalingon nga masayop.

• Unsa ang atong mabuhat kon ang mga tawo nga naglibut kanato nagpuyo nga dili matarung?

Mosiah 11:20–12:17

Gipasidan-an ni Abinadi ang mga katawhan nga sila madala ngadto sa pagkaulipon kon dili sila maghinulsol

Dapita ang usa ka estudyante sa pagbasa og kusog sa Mosiah 11:20.

• Unsa ang gibuhat sa Ginoo aron sa pagtabang sa mga katawhan ni Noah? (Mipadala siya og usa ka propeta aron sa pagtawag kanila sa paghinulsol.)

Isulat ang mosunod nga baruganan diha sa pisara: Ang Dios nagpadala og mga propeta aron sa pagtabang kanato sa paghinulsol ug sa paglikay og kasakit. Ipasabut nga ang Ginoo mipadala ni Abinadi duha ka higayon aron sa pagpasidaan sa mga katawhan.

Kopyaha ang mosunod nga tsart diha sa pisara. Pagbilin og igo nga luna aron masulatan og summary ubos sa matag pakisayran nga kasulatan.

	Mensahe ni Abinadi	Reaksyon sa mga Katawhan
Unang Pasidaan	Mosiah 11:20–25	Mosiah 11:26–29
Ikaduhang Pasidaan	Mosiah 12:1–8	Mosiah 12:9–17

Aron matabangan ang mga estudyante nga masabtan ang mensahe ni Abinadi, hangyoa ang katunga nila sa pagbasa sa Mosiah 11:20–25, nga nagsulti sa unang pasidaan ni Abinadi, ug hangyoa ang lain nga katunga sa pagbasa sa Mosiah 12:1–8, nga nagsulti mahitungod sa ikaduhang pasidaan. Dapita ang mga estudyante sa matag grupo sa pagsummarize sa mga mensahe ni Abinadi samtang ang usa ka estudyante nagsulat sa ilang mga summary diha sa pisara ubos sa angay nga mga pakisayran.

Dapita ang mga estudyante sa pagsulat diha sa pisara.

Kon ang mga estudyante nagsulat diha sa pisara, makaatubang ka sa klase ug padayon sa paghimo og panaghisgot. Kini nagtawag sa atensyon sa mga estudyante ngadto sa pisara ug nag-aghat og pag-apil. Pahinumdumi ang mga estudyante nga wala sila kinahanglana nga mosulat sa tibuok nga mga tubag—sa pipila lamang ka importanting mga pulong gikan sa mga komentaryo sa mga katawhan. Aron sa pagdugang og pag-apil, mahimo nimong dapiton ang usa ka estudyante sa pagsulat sulod sa pipila ka minuto ug dayon hatagi ang laing estudyante og oportunidad sa paglihok isip tigsulat.

• Unsa nga mga kalainan ang inyong nakita tali sa duha ka mga pasidaan?

Aron matabangan ang mga estudyante nga makakita niini nga mga kalainan, hunahunaa ang pagtawag sa ilang atensyon ngadto sa Mosiah 11:20–25 ug sa gibalik-balik nga hugpong sa mga pulong “gawas kon sila maghinulsol” ug “gawas kon kini nga mga katawhan maghinulsol.” Mahimo nimong awhagon sila nga markahan kini nga mga hugpong sa mga pulong. Dayon awhaga sila sa pagpangita sa kalainan tali sa pagkasulti niini nga mga hugpong sa mga pulong ug sa pagkasulti diha sa Mosiah 12:1–8. Mahimo nimong isugyot nga maghatag ang mga estudyante og piho nga atensyon ngadto sa mga pulong mohimo ug mahinabo niini nga mga bersikulo. Tabangi ang mga estudyante nga makakita nga ang mga katawhan makalikay unta niini nga mga sangputanan kon sila naghinulsol pa human sa unang pasidaan. Tungod kay ang mga katawhan midumili sa paghinulsol, ang mga sangputanan nahimong permanente ug mas grabe sa ikaduhang pasidaan ni Abinadi.

• Unsa ang gitudlo kaninyo niining mga kalainan mahitungod sa mga sangputanan sa dili pagsunod sa pasidaan sa usa ka propeta?

• Unsa ang mga kuyaw sa pagpadayon diha sa atong mga sala ug sa dili paghinulsol?

Aron matabangan ang mga estudyante nga masabtan ang reaksyon sa mga katawhan ngadto sa mga mensahe ni Abinadi, hangyoa ang katunga sa mga estudyante sa pagbasa sa Mosiah 11:26–29, magtimaan sa reaksyon sa mga katawhan ug sa ilang hari ngadto sa unang mensahe ni Abinadi. Hangyoa ang laing katunga sa mga estudyante sa pagbasa sa Mosiah 12:9-17, nga magtimaan sa reaksyon ngadto sa ikaduhang mensahe ni Abinadi. Hangyoa ang mga estudyante sa matag grupo sa pag-summarize sa mga reaksyon samtang ang usa ka estudyante nagsulat sa mga summary diha sa tsart.

• Ngano sa inyong hunahuna ang mga katawhan mi-react uban ang kasuko ngadto ni Abinadi, kinsa naninguha sa pagtabang kanila? Ngano sa inyong hunahuna ilang gipanalipdan si Haring Noah, kinsa naggiya kanila ngadto sa kasakit?

• Diha sa Mosiah 11:29, atong mabasa nga “ang mga mata sa mga katawhan nabutaan.” Sa unsa nga paagi nabutaan kini nga mga tawo ngadto sa kamatuoran?

Samtang ang mga estudyante naghisgot niini nga mga pangutana, tabangi sila sa pag-ila sa mosunod nga baruganan: Ang sala makabuta kanato gikan sa pag-ila sa kamatuoran sa mga pulong sa mga propeta. Ipasabut nga, diha sa ilang pagkabuta, ang mga katawhan naghunahuna nga si Noah ilang higala ug nga si Abinadi ilang kaaway, nga ang baligtad mao ang tinuod. Hangyoa ang mga estudyante nga mamalandong sa hilum sa mosunod nga mga pangutana:

• Nasuko ba kamo sukad o gipanalipdan ang inyong mga sayop sa dihang usa ka tawo mikorihir kaninyo, bisan tuod nahibalo kamo nga sila husto?

• Unsa ang inyong mabuhat sa pagdawat sa tambag sa mga sakop sa pamilya, lokal nga mga lider sa Simbahan, ug mga propeta kon sila nagtambag kaninyo kon unsaon pagsunod ang pulong sa Dios?

Ipasabut nga daghang mga katawhan nag-awhag kanato sa pagpuyo sumala sa pulong sa Dios. Aron matabangan ang mga estudyante sa paghunahuna pa mahitungod kon unsaon sa pagreact og husto ngadto niadtong kinsa nagtambag kanato sa pag-usab o paghinulsol, balik ngadto sa tulo ka mga pangutana nga inyong gisulat diha sa pisara sa wala pa ang klase. Hangyoa ang mga estudyante sa pagtubag sa usa sa mga pangutana diha sa ilang mga scripture study journal o mga class notebook. Kon sila adunay igo nga panahon sa pagsulat, dapita ang pipila kanila sa pagsulti mahitungod sa usa ka panahon nga sila napanalanginan tungod kay sila misunod sa tambag gikan sa ilang mga ginikanan o mga lider. Awhaga sila sa pagpaninguha ug pagsunod sa tambag sa mga ginikanan, lokal nga mga lider sa Simbahan, ug mga propeta.

Ribyu sa Scripture Mastery

Ang panabut sa mga estudyante mahitungod sa mga scripture passage molambo kon maghimo sila og kaugalingon nilang mga pangutana mahitungod sa mga tudling. Dapita ang mga estudyante sa pagtinabangay, isip usa ka klase o sa ginagmayng mga grupo, sa pagsulat og mga clue nga nagtudlo ngadto sa piho nga mga scripture mastery passage. (Mahimo kang magpili og usa ka pundok sa mga tudling o passage nga gusto nimong makat-unan sa mga estudyante o maribyu.) Dayon ipabasa nila ang ilang mga clue nganha kanimo. Mga punto ipremyo nganha kanimo kon imong matag-an og husto ang scripture mastery passage. Mga punto ipremyo ngadto sa klase kon ikaw dili makatag-an og husto.

Pahinumdom: Kon wala kay panahon sa paggamit niini nga kalihokan isip kabahin niini nga leksyon, mahimo nimo kining gamiton sa laing adlaw. Alang sa uban nga pangribyu nga mga kalihokan, tan-awa ang appendix sa katapusan niining manwal.