Mosiah 27

Pasiuna

Si Alma nga Batan-on ug ang anak nga mga lalaki ni Mosiah mirebelde batok sa ilang mga amahan ug sa Ginoo ug misulay sa pagguba sa Simbahan sa Dios. Natapos ang ilang mga paningkamot sa dihang usa ka anghel, nga gipadala isip tubag sa mga pag-ampo sa matarung, nagtawag kanila ngadto sa paghinulsol. Agi og resulta niining milagrosong kasinatian, natawo sila pag-usab pinaagi sa Pag-ula ni Jesukristo, ug mibiyahe sila sa tibuok yuta sa Zarahemla aron sa pagsangyaw sa ebanghelyo ug sa pag-ayo sa mga kadaut nga ilang nahimo.

Mga Sugyot alang sa Pagtudlo

Mosiah 27:1–22

Usa ka anghel nagtawag ni Alma nga Batan-on ug sa mga anak nga lalaki ni Mosiah ngadto sa paghinulsol

Aron sa paghatag og kinatibuk-ang kahulugan alang niini nga leksyon, i-summarize ang Mosiah 27:1–7 pinaagi sa pagpasabut nga daghan sa mga dili tumutuo sa Zarahemla ang misugod sa pagpanggukod niadtong kinsa nasakop sa Simbahan. Human gimantala ni Haring Mosiah ang usa ka pahayag nga nagdili sa mao nga mga lihok, ang kadaghanan sa mga katawhan misunod ug ang kalinaw napahiuli. Bisan pa niana, pipila sa mga katawhan mipadayon sa pagsulay sa pagguba sa Simbahan. Lima niadtong mga katawhan mao ang anak nga lalaki ni Alma nga si Alma ug anak nga mga lalaki ni Haring Mosiah nga si Ammon, Aaron, Omner, ug Himni. Ang anak nga lalaki ni Alma nga si Alma sa kasagaran gitawag isip Alma nga Batan-on.

Dapita ang usa ka estudyante sa pagbasa og kusog sa Mosiah 27:8–10. Hangyoa ang klase sa pag-ila sa mga pulong nga naghulagway ni Alma nga Batan-on ug sa anak nga mga lalaki ni Mosiah.

Unsa nga bahin sa paghulagway ni Alma ug sa anak nga mga lalaki ni Mosiah ang labaw nganha kaninyo? Ngano? (Paglista og mga pulong diha sa pisara samtang ang mga estudyante nag-ila niini. Paghatag og luna diha sa pisara aron sa paghimo og ikaduhang lista sa kaulahian sa leksyon.)

Hangyoa ang mga estudyante nga mamalandong sa hilum sa mosunod nga mga pangutana:

Kon ikaw nagpuyo sa Zarahemla niini nga panahon, sa imong hunahuna sa unsa kaha nga paagi ikaw moatubang sa mga lihok ni Alma ug sa anak nga mga lalaki ni Mosiah?

I-display ang litrato sa Pagkakabig ni Alma nga Batan-on (Libro sa mga Hulagway sa Ebanghelyo [2009], nu.77). Hangyoa ang mga estudyante sa pagbasa og hilum sa Mosiah 27:11–13, nga mao ang istorya nga gipakita niini nga painting. Dayon dapita ang usa ka estudyante sa pagbasa og kusog sa Mosiah 27:14. Hangyoa ang klase sa pagpangita sa mga rason nga gihatag sa anghel sa pagduol ngadto ni Alma ug sa anak nga mga lalaki ni Mosiah.

Unsa ang gitudlo niini nga bersikulo mahitungod sa unsa nga paagi kita makatabang sa uban kinsa nakigbisog? (Siguroha nga ang mga estudyante nakasabut nga ang Ginoo nagtubag sa atong matinud-anong mga pag-ampo alang sa uban. Mahimo nimong isulat kini nga baruganan diha sa pisara ug isugyot nga isulat kini sa mga estudyante diha sa ilang mga kasulatan tupad sa Mosiah 27:14. Mahimo usab nimong isugyot nga ilang dugangan og usa ka cross-reference ngadto sa Santiago 5:16. Ipasabut nga ang Ginoo nagtubag sa atong mga pag-ampo dili lamang alang niadtong kinsa espirituhanong nakigbisog apan alang usab niadtong kinsa adunay ubang matang sa mga hagit ug mga panginahanglan.)
Kanus-a ang pag-ampo sa usa ka laing tawo naghimo og kalainan sa inyong kinabuhi?
Kanus-a ninyo gibati nga ang inyong mga pag-ampo mihimo og kalainan sa kinabuhi sa laing tawo?

Awhaga ang mga estudyante sa pagpadayon og pag-ampo alang sa uban. Pagpamatuod nga ang istorya kabahin ni Alma nga Batan-on ug sa anak nga mga lalaki ni Mosiah usa ka ebidensya nga ang Ginoo nagdungog sa atong mga pag-ampo alang sa uban. Dili siya mosanta sa kabubut-on niadtong kinsa atong giampo, apan dunggon Niya ang atong mga pag-ampo, ug tubagon Niya sa Iyang paagi ug sa Iyang panahon.

Dapita ang usa ka estudyante sa pagbarug sa atubangan sa klase ug sa pagbasa og kusog sa Mosiah 27:15–16. Ipasabut nga kini ang mga pulong sa anghel ngadto ni Alma ug sa anak nga mga lalaki ni Mosiah. Hatagi og gibug-aton nga ang anghel namulong “uban sa usa ka tingog sa dugdog diin nakahimo sa yuta sa pag-uyog” (Mosiah 27:11).

Unsa ang nakapadani kaninyo mahitungod sa unsay gibuhat ug gisulti sa anghel? Ngano nga nakapadani kini kaninyo?

I-summarize ang Mosiah 27:19–22 pinaagi sa pagpasabut nga human mipakigbahin ang anghel sa iyang mensahe, dili makasulti si Alma, naluya. ug giyayungan nga walay umoy ngadto sa iyang amahan (tan-awa sa Mosiah 27:19). Sa dihang nadunggan sa amahan ni Alma unsay nahitabo. siya “nalipay, kay siya nasayud nga kini mao ang gahum sa Dios” (Mosiah 27:20). Gipundok niya ang mga katawhan “nga sila unta makasaksi unsa ang nahimo sa Ginoo alang sa iyang anak nga lalaki” (Mosiah 27:21). Gipapundok usab niya ang mga pari, ug sila nagpuasa ug nag-ampo nga ang iyang anak nga lalaki unta makadawat sa iyang kusog ug makasulti (tan-awa sa Mosiah 27:22).

Mosiah 27:23–31

Naghinulsol si Alma nga Batan-on ug natawo pag-usab

Balik ngadto sa lista nga naghulagway ni Alma ug sa anak nga mga lalaki ni Mosiah nga inyong gisulat diha sa pisara og una. Nganli kana nga lista og Kaniadto. Sulati og Human diha sa pikas bahin sa pisara. Dapita ang mga estudyante sa pagbasa sa Mosiah 27:23–24, 28–29, nga mangita og mga pulong ug hugpong sa mga pulong nga nagpakita kon sa unsa nga paagi si Alma nausab. Hatagi ang pipila ka mga estudyante og oportunidad sa pagsulat niini nga mga pulong diha sa pisara.

Sumala sa Mosiah 27:24 ug 28, unsa ang gibuhat ni Alma nga migiya ngadto niini nga kausaban? Unsa ang gibuhat sa Ginoo? Samtang kita nagtinguha nga mausab ug mosunod sa Manluluwas, ngano nga importanting masabtan kon unsa ang atong kinahanglan gayud nga buhaton? Ngano nga importanting masabtan kon unsa ang buhaton sa Ginoo alang kanato?
Sa unsa kaha nga paagi nga ang pagkat-on mahitungod sa kasinatian ni Alma nagtabang sa usa ka tawo kinsa naghunahuna nga siya dili mapasaylo?

Dapita ang usa ka estudyante sa pagbasa og kusog sa Mosiah 27:25–26. Hangyoa ang klase sa pag-ila sa doktrina nga gitudlo sa Ginoo ni Alma. (Bisan og ang mga estudyante mahimong mogamit og lahi nga mga pulong, siguroha nga ilang nasabtan nga matag usa kanato kinahanglan gayud nga matawo pag-usab pinaagi sa Pag-ula ni Jesukristo. (Mahimo nimong isulat kini nga kamatuoran diha sa pisara.)

Ipasabut nga ang matawo pag-usab nagpasabut og pagbaton sa Espiritu sa Ginoo nga maghimo og usa ka dako nga kausaban diha sa kasingkasing sa usa ka tawo nga sa ingon ang tawo wala nay tinguha sa pagbuhat og dautan apan hinoon nagtinguha sa pagpangita sa mga butang sa Dios (tan-awa sa Mosiah 5:2).

Mahimo usab nimong ipasabut nga bisan tuod ang gamhanang kausaban sa kasingkasing sa dayag nahitabo og dali alang ni Alma ug sa anak nga mga lalaki ni Mosiah, ang kadaghanan kanato mas inanay nga nausab pinaagi sa Pag-ula. Kini usa ka proseso nga labaw kay sa usa ka panghitabo. Aron matabangan ang mga estudyante nga masabtan kini nga doktrina, dapita ang usa kanila sa pagbasa sa mosunod nga pamahayag ni Presidente Ezra Taft Benzon:

“Kinahanglan gayud kitang magbinantayon, samtang kita nagtinguha nga mahimong mas diosnon, nga dili kita madismaya ug mawad-an og paglaum. Ang pagkahimong Kristohanon usa ka tibuok kinabuhi nga paninguha ug sa kasagaran naglakip og pagtubo ug pag-usab nga hinay, hapit dili maila. Ang mga kasulatan nagrekord og talagsaong mga istorya sa mga tawo kinsang mga kinabuhi mahinuklugong nausab, dihadiha, sama ni: Alma nga Batan-on, Pablo diha sa dalan paingon sa Damascus, Enos nag-ampo hangtud sa lawom sa kagabhion, Haring Lamoni. Ang ingon nga makahibulong nga mga ehemplo sa gahum sa pag-usab bisan niadtong naumol sa sala naghatag og pagsalig nga ang Pag-ula makakab-ut bisan niadtong labing nailadman sa pagkawalay paglaum.

“Apan kita kinahanglan gayud nga magmatngon samtang kita maghisgot niining talagsaong mga ehemplo. Bisan tuod kini mga tinuod ug gamhanan, kini dili sagad kay sa kasagarang hitabo. Kay sa matag Pablo, matag Enos, ug matag Haring Lamoni, adunay gatusan ug liboan ka mga tawo kinsa nakakaplag sa proseso sa paghinulsol nga mas hinay, mas hapit dili maila. Matag adlaw nagkaduol sila sa Ginoo, wala kaayo makaamgo nga sila nagtukod og diosnong kinabuhi. Nagpuyo sila og malinawong mga kinabuhi sa kaayo, serbisyo ug pasalig” (“A Mighty Change of Heart,” Ensign, Oct. 1989, 5).

Human ang mga estudyante makigbahin unsay ilang nakat-unan gikan niini nga pamahayag, dapita sila sa paggahin og pipila ka minuto sa pagtubag og usa sa mga pangutana diha sa ilang mga scripture study journal. (Mahimo nimong isulat kini nga mga pangutana diha sa pisara sa wala pay klase, mag-andam og handout uban ang mga pangutana, o basahon ang mga pangutana og hinay aron ang mga estudyante makasulat niini diha sa ilang mga scripture study journal.)

Sa unsa nga paagi kamo nausab pinaagi sa Pag-ula samtang kamo naghinulsol ug naghimo sa inyong labing maayo sa pagsunod sa Manluluwas?
Unsa ang usa ka butang nga kamo makahimo nga mas hingpit nga makaduol ngadto sa Ginoo aron kamo mausab pinaagi sa Pag-ula?

Dapita ang pipila ka mga estudyante sa pagpakigbahin kon unsa ang ilang nasulat ug sa pagsulti mahitungod sa kausaban nga mahitabo diha kanato samtang kita naghinulsol ug nagpakita og hugot nga pagtuo diha ni Jesukristo ug sa Iyang Pag-ula. (Pahinumdumi ang mga estudyante nga dili sila kinahanglan nga mopakigbahin og bisan unsa nga personal o pribado kaayo.) Siguroha nga sila nakasabut nga kinahanglan dili sila mosulti mahitungod sa ilang nangagi nga mga sala.)

Mosiah 27:32–37

Si Alma nga Batan-on ug ang anak nga mga lalaki ni Mosiah mipanaw sa tibuok yuta, naningkamot sa pag-ayo sa mga kadaut nga ilang nahimo ug sa paglig-on sa Simbahan.

Ipasabut nga ang tinuod nga paghinulsol usa ka kausaban sa kasingkasing, dili lamang usa ka determinasyon sa paghunong og buhat sa usa ka butang nga sayop. Dapita ang usa ka estudyante sa pagbasa og kusog sa Mosiah 27:32–37 Hangyoa ang klase sa pag-ila unsa ang gibuhat ni Alma ug sa anak nga mga lalaki ni Mosiah nga milapas pa kay sa paghunong lamang sa unsa ang ilang gibuhat nga sayop.

Unsa nga ebidensya ang inyong nakita nga si Alma ug ang anak nga mga lalaki ni Mosiah sa tinuoray nausab?
Unsa ang atong makat-unan gikan sa ilang ehemplo?

Ang mga tubag sa mga estudyante mahimong maglakip sa mosunod:

Bisan kadtong kinsa mibatok sa Ginoo ug sa Iyang mga pagtulun-an mahimong mapasaylo.

Aron tinuoray nga maghinulsol, ang usa ka tawo kinahanglan gayud nga mobuhat sa tanan nga mahimo aron sa pag-ayo sa kadaot nga iyang nahimo. (Mahimo nimong ipasabut nga kita usahay naggamit sa pulong pag-uli sa pagpasabut ngadto sa lihok sa pag-ayo sa kadaot nga nahimo ug sa pag-usab sa atong dili maalamon nga mga pagpili.)

Pinaagi sa Pag-ula ni Jesukristo, kita makahimo sa pag-usab ngadto sa kahimtang sa pagkamatarung.

Taposa pinaagi sa pagpamatuod nga ang istorya kabahin ni Alma ug sa anak nga mga lalaki ni Mosiah maoy usa ka panig-ingan sa gahum sa Pag-ula ni Jesukristo sa pag-usab kanato. Pagpamatuod kabahin sa tinguha sa Manluluwas sa pagpasaylo sa tanan kinsa, sama niining batan-on nga mga lalaki, nagpakita og hugot nga pagtuo diha Kaniya ug naningkamot sa pagsunod Kaniya.

Komentaryo ug Background nga Impormasyon

Mosiah 27:25. Matawo pag-usab

Si Elder David A. Bednar sa Korum sa Napulog Duha ka mga Apostoles milarawan sa proseso sa pagpakatawo pag-usab:

“Atong sugdan ang proseso sa pagpakatawo pag-usab pinaagi sa pagpakita og hugot nga pagtuo diha ni Kristo, paghinulsol sa atong mga sala, ug pagpabunyag pinaagi sa pagpaunlod alang sa kapasayloan sa mga sala pinaagi sa tawo nga adunay awtoridad sa priesthood.

“… Ug human kita mohaw-as gikan sa mga tubig sa bunyag, ang atong mga kalag kinahanglang ihumol ug ipatuhop sa kamatuoran ug sa kahayag sa ebanghelyo sa Manluluwas. Panagsa ug mabaw nga pagkahumol diha sa doktrina ni Kristo ug parsyal nga pag-apil sa Iyang gipahiuli nga Simbahan dili makahatag sa espiritwal nga kausaban nga makahimo kanato sa paglakaw og bag-ong kinabuhi. Hinoon, ang pagkamatinud-anon ngadto sa mga pakigsaad, pagkamakanunayon sa pasalig, ug paghalad sa atong tibuok kalag ngadto sa Dios gikinahanglan kon kita buot nga modawat sa mga panalangin sa kahangturan. …

“Ang hingpit nga paghumol ug pagtuhop sa ebanghelyo sa Manluluwas importante nga mga lakang sa proseso sa pagpakatawo pag-usab” (“Kinahanglang Matawo Kamo Pag-usab,” Ensign o Liahona, Mayo 2007, 21).

Si Elder Bruce R. McConkie usab sa Korum sa Napulog Duha ka mga Apostoles mipasabut:

“Kita natawo pag-usab samtang kita namatay kalabut ngadto sa pagkadili matarung ug kon kita mabuhi kalabut ngadto sa mga butang sa Espiritu. Apan kana dili mahitabo dihadiha, sa kalit. Kana … usa ka proseso. Ang pagpakatawo pag-usab usa ka hinay-hinay nga butang, gawas sa pipila ka panagsaong hitabo nga hilabihan ka milagroso nga kini nahisulat diha sa mga kasulatan. Kutob sa kalabutan sa kinatibuk-ang miyembro sa Simbahan, kita natawo pag-usab pinaagi sa hinay-hinay, ug kita natawo pag-usab ngadto sa dugang kahayag ug dugang nga kahibalo ug dugang nga mga tinguha alang sa pagkamatarung samtang nagsunod kita sa mga sugo. …

Isip mga miyembro sa Simbahan, kon kita magmapa og dalan nga naggiya ngadto sa kinabuhing dayon, kon kita magsugod sa mga proseso sa espiritwal nga pagkatawo pag-usab, ug nagpadulong sa hustong direksyon; kon kita magmapa sa pagbalaan sa atong mga kalag, ug sa hinay-hinay nagpadulong niana nga direksyon; kon kita magmapa og dalan nga mahimong hingpit, ug, lakang matag lakang ug yugto matag yugto, naghingpit sa atong mga kalag pinaagi sa pagbuntog sa kalibutan, nan kini sa bug-os magarantiyahan—walay pangutana bisan unsa mahitungod niini—kita makaangkon og kinabuhing dayon. Bisan tuod kon kita adunay espiritwal nga pagkatawo pag-usab nga nag-una kanato, kahingpitan nga nag-una kanato, ang hingpit nga antas sa pagbalaan nga nag-una kanato, kon kita magmapa og dalan ug magsunod niini sa labing maayo nga atong mahimo niini nga kinabuhi, nan kon mobiya kita niini nga kinabuhi magpadayon kita diha sa eksaktong sama nga dalan” (“Jesus Christ and Him Crucified,” Brigham Young University 1976 Speeches, Sept. 5, 1976, 5–6, speeches.byu.edu).