Mga Pulong ni Mormon–Mosiah 6 (Unit 11)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina, ug mga baruganan nga nakat-unan sa mga estudyante samtang sila nagtuon sa Mga Pulong ni Mormon–Mosiah 6 (unit 11) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa mga estudyante.

Day 1 (Mga Pulong ni Mormon–Mosiah 2)

Pinaagi sa pagtuon sa kasinatian ni Mormon diha sa pagsunod sa Espiritu ug paglakip sa gagmay nga mga palid ni Nephi uban sa iyang rekord, gikat-unan sa mga estudyante nga ang Ginoo nahibalo sa tanang mga butang. Gitudlo ni Haring Benjamin nga kon ang mga Nephite wala pay mga kasulatan, sila magkakunhod unta tungod sa pagkawalay pagtuo ug nga ang pagsiksik sa mga kasulatan nagtabang kanato sa pagkahibalo ug sa pagsunod sa mga sugo. Gitudloan niya ang iyang mga katawhan og importanting mga baruganan sama sa: Kon kita nag-alagad sa uban, nag-alagad kita sa Dios. Kon gibati nato nga utangan ngadto sa Dios, buot kitang moalagad sa uban ug ang atong pasalamat magtubo. Kon gisunod nato ang mga sugo, kita pagapanalanginan sa temporal ug espiritwal nga paagi.

Day 2 (Mosiah 3)

Giistorya ni Haring Benjamin ang mga pulong sa usa ka anghel, kinsa midala sa “malipayon nga mga balita sa dako nga kalipay” mahitungod sa pag-anhi sa Ginoo dinhi sa mortalidad. Gikat-unan sa mga estudyante nga kini gipanagna labaw pa sa 100 ka tuig sa wala pa ang mga panghitabo nahinabo nga si Jesukristo mag-antus aron kita maluwas gikan sa atong mga sala. Maluwas kita gikan sa atong mga sala samtang kita nagpakita og hugot nga pagtuo diha ni Jesukristo ug naghinulsol. Kon kita motugyan ngadto sa mga pagdani sa Balaang Espiritu, makabuntog kita sa kinaiyanhong tawo pinaagi sa Pag-ula ni Jesukristo.

Day 3 (Mosiah 4)

Gipuno sa mensahe ni Haring Benjamin sa Espiritu sa Ginoo ang iyang mga katawhan. Gikat-unan sa mga estudyante nga samtang nagpakita kita og hugot nga pagtuo diha ni Jesukristo ug kinasingkasing nga maghinulsol, atong madawat ang kapasayloan sa atong mga sala. Gitudloan ni Haring Benjamin ang iyang mga katawhan nga kon kita magpaubos sa atong mga kaugalingon diha sa atubangan sa Dios ug maningkamot sa pag-ugmad og Kristohanong mga hiyas, kita makabaton og kapasayloan sa atong mga sala.

Day 4 (Mosiah 5–6)

Samtang sila nagbasa sa kausaban nga miabut diha sa mga katawhan ni Haring Benjamin, gikat-unan sa mga estudyante nga samtang kita nagpakita og hugot nga pagtuo diha ni Jesukristo ug nagdawat sa Balaang Espiritu, kita makasinati og dako nga kausaban sa kasingkasing. Mipakigsaad ang mga katawhan ni Haring Benjamin sa pagbuhat sa kabubut-on sa Ginoo ug sa pagsunod sa Iyang mga sugo, nagpakita nga atong gidala diha sa atong mga kaugalingon ang ngalan ni Jesukristo kon kita naghimo ug nagsunod og sagradong mga pakigsaad.

Pasiuna

Kini nga leksyon motabang sa mga estudyante sa pagsabut sa mga pagtulun-an ni Haring Benjamin ngadto sa iyang anak nga mga lalaki ug sa iyang mga katawhan tulo ka tuig sa wala pa ang iyang kamatayon. Gitudloan ni Haring Benjamin ang iyang mga katawhan kon unsaon pagdawat ug pagpabilin og kapasayloan sa ilang mga sala pinaagi sa pagpakita og hugot nga pagtuo diha ni Jesukristo.

Mga Sugyot alang sa Pagtudlo

Mga Pulong ni Mormon

Nephi ug Mormon nagpahayag sa ilang pagsalig sa Dios

Dapita ang usa ka estudyante sa pagbasa sa 1 Nephi 9:2–3 aron sa pagpahinumdom sa mga estudyante nga si Nephi gisugo sa pagbuhat og duha ka pundok sa mga palid. Tabangi sila sa pagsabut nga dinhi niini nga tudling ang pundok sa mga pulong nga “niini nga mga palid” nagpasabut sa gagmay nga mga palid ni Nephi, nga naglangkub og usa ka rekord nga una sa tanan kalabut sa sagradong mga butang. Hangyoa ang usa ka estudyante sa pagbasa og kusog sa 1 Nephi 9:4. Hangyoa ang klase sa pagpangita sa katuyoan sa dagkong mga palid (usa ka istorya sa pagmando sa mga hari ug mga gubat sa mga katawhan).

Pahinumdumi ang mga estudyante nga samtang si Mormon nagmubo sa dagkong mga palid ni Nephi, nadiskubrihan niya ang gagmay nga mga palid taliwala sa ubang mga rekord. Gidasig siya sa Espiritu Santo sa paglakip sa unsay nakaplagan niya sa gagmay nga mga palid uban sa iyang minubo, bisan tuod wala siya mahibalo kon ngano (tan-awa sa Mga Pulong ni Mormon 1:7).

Dapita ang katunga sa klase sa pagpangita diha sa 1 Nephi 9:5–6 kon ngano si Nephi gisugo sa paghimo sa gagmay nga mga palid. Ipapangita sa laing katunga sa klase diha sa Mga Pulong ni Mormon 1:6–7 kon nganong midesisyon si Mormon sa paglakip sa gagmay nga mga palid uban sa iyang minubo. Human nagreport ang mga sakop sa klase, pangutan-a kon unsa ang gitudlo niini nga mga tudling gikan sa Nephi ug Mormon kanila mahitungod sa Ginoo. (Ang mga estudyante mahimong mogamit og lain-laing mga pulong, apan siguroha nga sila nagpahayag og pagsabut nga ang Ginoo nahibalo sa tanang mga butang.)

Unsa ang umaabut nga “maalamong katuyoan” nga gipasabut ni Nephi ug ni Mormon? (Nahibalo ang Ginoo nga sa 1828, ang gagmay nga mga palid moilis sa nawala nga 116 ka mga pahina sa manuskrito sa Basahon ni Mormon Tan-awa ang unit 6, day 1 diha sa giya sa pagtuon sa estudyante.)
Sa unsang paagi nga ang inyong pagsabut nga ang Ginoo nahibalo sa tanang mga butang sa umaabut naghatag kaninyo og hugot nga pagtuo sa pagsunod sa espiritwal nga mga pag-aghat nga inyong madawat?

Kon gibati ninyo ang panginahanglan sa paggahin og dugang pang panahon niining bahin sa leksyon, hangyoa ang mga estudyante kon makapaambit ba sila og mga kasinatian sa dihang gibati nila ang pag-aghat sa Espiritu sa pagbuhat og usa ka butang ug wala hibaloi ang mga katuyoan sa mga pag-aghat hangtud sa ulahi na.

Mosiah 1

Gitawag ni Haring Benjamin ang mga katawhan sa pagpundok

Ipasabut nga ang gagmay nga mga palid ni Nephi naglakip sa kasaysayan sa mga Nephite gikan sa pagpangalagad ni Lehi hangtud sa panahon sa dihang gihiusa ni Haring Mosiah ang mga katawhan sa Nephi ug sa Zarahemla ug sa dihang ang anak nga lalaki ni Mosiah nga si Benjamin nagmando sa tibuok gingharian sa pagkamatarung. Gihatagan og responsibilidad si Haring Benjamin sa sagradong mga rekord. (Tan-awa sa Omni 1:23, 25.)

Duol sa katapusan sa kinabuhi ni Haring Benjamin, gisugo niya ang iyang anak nga lalaki nga si Mosiah sa pagpundok sa mga katawhan. Dapita ang mga estudyante sa pagbasa sa Mosiah 1:10–11 ug pangitaa ang mga rason nga si Haring Benjamin gustong makigsulti ngadto sa mga katawhan. (Gusto niyang ipahibalo nga si Mosiah mao ang sunod nga hari ug sa paghatag og ngalan sa mga katawhan.)

Mosiah 2–6

Nagtudlo si Haring Benjamin sa iyang mga katawhan mahitungod sa Pag-ula sa Manluluwas

Pakit-a ang mga estudyante sa litrato ni Haring Benjamin nga Namulong sa Iyang mga Katawhan (62298; Libro sa mga Hulagway sa Ebanghelyo [2009], no. 74). Basaha ang Mosiah 2:12–19 ngadto sa klase. Dapita ang mga estudyante sa pagpataas sa ilang mga kamot kon ilang mailhan ang mga hugpong sa mga pulong nga nagpaila sa kinaiya ni Haring Benjamin. Samtang nagpataas sa ilang mga kamot, hunonga ang pagbasa ug hangyoa sila sa pagpasabut kon unsa ang ilang nailhan ug kon unsa ang gipadayag niini sa kinaiya ni Haring Benjamin.

Mahimo nimong pangutan-on ang mga estudyante unsa ang ilang nakat-unan mahitungod sa pag-alagad diha sa Mosiah 2:17. (Ang tubag sa mga estudyante kinahanglan nga nagpakita og pagsabut nga kon kita nag-alagad sa uban, kita nag-alagad sa Dios.) Mahimo usab nimong ipausab og sulti sa klase ang Mosiah 2:17, usa ka scripture mastery passage, nga gisag-ulo. Hunahunaa ang pagdapit sa mga estudyante sa pagpaambit kon sa unsa nga paagi sila sa bag-ohay nag-alagad sa Dios pinaagi sa pag-alagad sa uban.

Isulat ang mosunod nga mga tudling sa kasulatan diha sa pisara o diha sa usa ka pirasong papel. Ayaw apila ang mga tubag diha sa parentesis. I-assign sa matag estudyante ang pagribyu sa usa sa mga tudling sa kasulatan. Ipahinumdom kanila nga ang sermon ni Haring Benjamin gipunting niini nga tema: “Ang kaluwasan modangat ngadto sa mga katawhan, lamang diha ug pinaagi sa ngalan ni Kristo, ang Ginoong Makagagahum” (Mosiah 3:17). Ang matag tudling sa kasulatan nagtudlo og usa ka butang mahitungod niini nga tema.

Mosiah 2:20–25, 34. (Kon kita makaila sa atong pagkautangan ngadto sa Dios, ang atong pasalamat magtubo.
Mosiah 3:7–11, 17–18. (Nag-antus si Jesukristo aron kita maluwas gikan sa atong mga sala. Kon kita magpakita og hugot nga pagtuo diha ni Jesukristo pinaagi sa paghinulsol, kita maluwas gikan sa atong mga sala.)
Mosiah 3:12–16, 19–21. (Kon kita motugyan ngadto sa mga pag-aghat sa Balaang Espiritu, pinaagi sa Pag-ula ni Jesukristo kita makabuntog sa kinaiyanhong tawo ug mahimong usa ka santos.)
Mosiah 4:5–8, 19–21, 26. (Kon kita magpaubos sa atong mga kaugalingon diha sa atubangan sa Dios ug maningkamot sa pag-ugmad og Kristohanong mga hiyas, kita makabaton og kapasayloan sa atong mga sala.)

Human mahatagan ang mga estudyante og igo nga panahon, tuguti sila sa pagreport unsa ang ilang nakat-unan ngadto sa klase o diha sa gagmay nga mga grupo. Dayon hangyoa ang pipila ka mga estudyante sa pagpili og usa sa mga baruganan ug sa pagpasabut kon sa unsa nga paagi kini magamit nila sa ilang mga kinabuhi.

Dapita ang usa ka estudyante sa pagbasa og kusog sa Mosiah 4:1–3 Hangyoa ang klase sa pagsunod, nga mangita kon giunsa pagtubag sa mga katawhan ang mga pulong ni Haring Benjamin. Dayon hangyoa ang lain nga estudyante sa pagbasa og kusog sa Mosiah 5:1-2, 5–8 Hangyoa ang klase sa pagpangita kon sa unsa nga paagi kita nagdala diha kanato sa ngalan sa Ginoo. Siguroha nga nasabtan sa mga estudyante kini nga baruganan: Kita nagdala diha sa atong mga kaugalingon sa ngalan ni Jesukristo kon kita naghimo ug naghupot og sagradong mga pakigsaad. Mahimo nimong pahinumduman ang mga estudyante nga usa sa mga rason nga gipundok ni Haring Benjamin ang mga tawo mao ang pagtudlo kanila mahitungod sa paghimo og mga pakigsaad. Gipahinungod usab niya ang iyang anak nga lalaki nga si Mosiah nga mahimong hari ibabaw sa mga katawhan (tan-awa sa Mosiah 6:3).

Sa pagtapos, hangyoa ang mga estudyante kon usa kanila gusto bang mopaambit unsay ilang gibati mahitungod sa pagdala diha sa ilang mga kaugalingon sa ngalan ni Jesukristo sa bunyag. Hangyoa sila sa pagpamalandong sa mosunod nga mga pangutana:

Unsaon ninyo paggamit sa personal ang mga baruganan gikan sa pamulong ni Haring Benjamin?
Unsa ang kahulugan nganha kaninyo ang pagdala diha sa inyong kaugalingon sa pangalan ni Jesukristo?

Mahimo ka usab nga mopamatuod sa hingpit nga kalipay nga moabut pinaagi sa pagtuo diha ni Jesukristo ug pagsalig diha sa Iyang Pag-ula.

Sunod nga Unit (Mosiah 7–17)

Pangutan-a ang mga estudyante: Mobarug ba kamo alang ni Jesukristo bisan og ang pagbuhat sa ingon nagpasabut nga kamo pagapatyon? Pahibaloa ang mga estudyante nga sunod semana sila magtuon sa mga pagtulun-an ni propeta Abinadi. Awhaga sila sa pagpangita sa mensahe nga andam si Abinadi sa paghatag ngadto sa mga Nephite, bisan tuod nahibalo siya nga siya pagapatyon.