Leksyon 43: Jacob 1–Jacob 2:11

Leksyon 43

Jacob 1–Jacob 2:11

Pasiuna

Human sa kamatayon ni Nephi, misugod ang mga Nephite nga “nagpatuyang sa ilang mga kaugalingon sa ingon og dautan nga mga kalihokan” ubos sa pagmando sa usa ka bag-o nga hari (Jacob 1:15). Si Jacob ug ang iyang igsoon nga lalaki nga si Joseph gitudlo na ni Nephi isip mga pari ug mga magtutudlo sa mga katawhan, ug makugihon silang mitrabaho sa pagdani sa mga katawhan nga maghinulsol ug moduol kang Kristo. Misunod si Jacob sa sugo ni Nephi nga i-rekord ang sagrado nga mga pagtulun-an, mga pagpadayag, ug mga panagna diha sa gagmay nga mga palid.

Mga Sugyot alang sa Pagtudlo

Jacob 1:1–8

Gi-rekord ni Jacob ang sagrado nga mga kamatuoran ug mga buhat aron matabangan ang uban sa pagduol kang Jesukristo

Hangyoa ang mga estudyante sa paghatag og mga ehemplo sa lainlaing mga tawag [title] sa mga lider sa priesthood. (Ang mga tubag mahimong maglakip sa mga propeta ug mga apostoles, mga General Authority, mga presidente sa stake, mga bishop, ug mga presidente sa korum.) Dapita ang pipila ka mga estudyante nga sa daklit mopakigbahin og pipila ka mga pamaagi diin ang mga lider sa priesthood mipanalangin sa ilang kinabuhi pinaagi sa priesthood nga pagserbisyo.

Ipasabut nga gitudlo na ni Nephi ang iyang manghud nga mga lalaki nga si Jacob ug Joseph isip mga pari ug mga magtutudlo sa mga katawhan (tan-awa sa 2 Nephi 5:26; Jacob 1:18). Sa dihang duol na si Nephi sa katapusan sa iyang kinabuhi, gisangon niya kang Jacob ang mga palid nga naglangkob sa rekord sa ilang mga katawhan.

Dapita ang mga estudyante sa pagbasa sa Jacob 1:1–4 sa hilum nga paagi. Hangyoa sila sa pagpangita kon unsay gisugo ni Nephi kang Jacob nga i-rekord diha sa mga palid, ug kon ngano. (Mahimo nimong isugyot nga markahan sa mga estudyante ang mga sugo ni Nephi kang Jacob.) Human ang mga estudyante nahatagan og igong panahon sa pagbasa, hangyoa ang pipila kanila nga sultihan ang klase kon unsay ilang nakit-an.

Kon dili mahisgutan sa mga estudyante, ipahayag ang katapusang mga pulong sa Jacob 1:4—“alang sa kaayohan sa atong mga katawhan.”

Unsay gipasabut sa mga pulong nga “alang sa kaayohan sa atong mga katawhan”? (Alang sa ilang kaayohan.)

Dapita ang usa ka estudyante sa pagbasa og kusog sa Jacob 1:5–6. Hangyoa ang klase nga mangita kon unsay gipadayag sa Ginoo ngadto kang Jacob ug Joseph nga makatabang kanila sa pagtudlo sa ilang mga katawhan. (Mahimo nimong ipasabut nga ang “dako nga kahingawa” nagpasabut sa ilang dakong kabalaka alang sa ilang mga katawhan.)

Unsay gipadayag sa Ginoo ngadto kang Jacob ug Joseph? (Gipakita Niya kon unsay mahitabo sa mga Nephite sa umaabut, ug mipadayag Siya og mga detalye mahitungod sa pag-abut ni Kristo.)
Sa unsa kahang paagi ang pagkasayud niini nga mga butang nakatabang ni Jacob ug Joseph sa pagtudlo sa ilang mga katawhan?

Isulat ang pulong pagdani diha sa pisara. Hangyoa ang mga estudyante sa pagbasa sa Jacob 1:7–8 sa hilum nga paagi, nga mangita kon unsay gusto ni Jacob ug Joseph nga madani ang mga katawhan sa pagbuhat. (Mahimo nimong isugyot nga markahan sa mga estudyante kon unsay ilang makit-an.) Dapita ang pipila ka mga estudyante nga isulat sa pisara ang usa ka butang nga ilang madiskubrihan.

Gikan sa lista diha sa pisara, dapita ang mga estudyante sa pagpili og usa o duha ka hugpong sa mga pulong nga gusto nilang mas masabtan pa. Samtang ang mga estudyante mopili niini nga mga mga pulong, ipangutana kon ang ubang mga estudyante makatabang ba sa pagpasabut niini. Dinhi niini nga panaghisgot, mahimong makatabang ang mosunod nga mga depinisyon:

“Makasulod ngadto sa iyang kapahulayan”—Ang pagsulod ngadto sa kapahulayan sa Ginoo nagpasabut sa pagtagamtam og kalinaw dinhi niini nga kinabuhi ug pagdawat sa “kahingpitan sa himaya sa [Dios]” didto sa sunod nga kinabuhi (D&P 84:24).

“Mopamalandong sa kamatayon [ni Kristo]”—Usa ka depinisyon sa mopamalandong mao ang pagtan-aw o ang pag-usisa og maayo. Sa dihang misulat si Jacob nga gusto niyang madani ang mga katawhan sa “pagtuo kang Kristo, ug mopamalandong sa iyang kamatayon,” tingali iyang gipasabut nga gusto niyang usisahon nila og maayo ang Pag-ula ni Jesukristo, makaamgo sa kaimportante niini, ug makaangkon og personal nga pagpamatuod niini.

“Mopas-an sa iyang krus”—Kini nga mga pulong nagpasabut sa atong kaandam nga modumili sa atong mga kaugalingon sa dili diosnon ug sa kalibutanon nga mga kahigal ug nga maghupot sa mga sugo sa Ginoo (tan-awa sa Joseph Smith Translation, Matthew 16:26 []; Lucas 9:23; 2 Nephi 9:18). Nagpasabut usab kini sa atong kaandam nga molahutay og mosakripisyo samtang nagsunod kita sa Manluluwas.

“Moantus sa pagbiay-biay sa kalibutan”—Kini nga mga pulong nagpasabut sa paghupot sa mga sugo bisan pa sa kalibutanon nga kalisud, pagpakaulaw, ug pagsupak nga kasagaran moabut sa mga disipulo ni Jesukristo.

Hangyoa ang mga estudyante sa pag-summarize kon unsay ilang nakat-unan gikan sa Jacob 1:1–8 mahitungod sa mga responsibilidad sa mga lider sa priesthood. Samtang nagpakigbahin ang mga estudyante sa ilang mga ideya, hatagi og gibug-aton nga ang mga lider sa priesthood makugihong nagtrabaho aron tabangan kita nga moduol kang Kristo. (Mahimo nimong isulat sa pisara kini nga baruganan.)

Sa unsang paagi ang atong mga lider sa priesthood nagtrabaho aron tabangan kita nga moduol kang Kristo?

Hatagi og pipila ka minuto ang mga estudyante nga mosulat diha sa ilang mga scripture study journal mahitungod sa mga pamaagi diin ang mga propeta o ang ubang mga lider sa priesthood nakatabang kanila sa usa o duha ka mga dapit nga ilang napilian diha sa Jacob 1:7–8. Dapita ang pipila ka mga estudyante sa pagpakigbahin sa unsay ilang gisulat. (Pahinumdumi sila nga dili ipakigbahin ang bisan unsa nga personal o pribado kaayo.)

Jacob 1:9–2:11

Nagpasidaan si Jacob sa mga katawhan mahitungod sa ilang pagkadautan

Awhaga ang mga estudyante nga pamalandungan ang mosunod nga pangutana atol sa nahibilin nga bahin sa leksyon:

Ngano man nga nagpasidaan kanato ang mga lider sa Simbahan batok sa sala?

Girekord ni Jacob nga human sa kamatayon sa iyang igsoong lalaki nga si Nephi, misugod ang mga katawhan sa pagpatuyang diha sa piho nga dautang mga kalihokan. Dapita ang mga estudyante sa pagbasa sa Jacob 1:15–16 sa hilum nga paagi. Hangyoa sila sa pagpangita og tulo ka dapit nga nakapabalaka ni Jacob. (Human makatubag ang mga estudyante, mahimo nimong isulat ang mga pulong imoralidad, pagkakalibutanon, ug garbo diha sa pisara.)

Ipabasa sa mga estudyante ang Jacob 1:17–19 sa hilum nga paagi, nga mangita kon unsay gibuhat ni Jacob ug Joseph aron matabangan ang ilang mga katawhan. Hangyoa sila sa pagreport kon unsay ilang makit-an. Dapita ang usa ka estudyante nga isulat diha sa pisara ang ilang mga tubag.

Unsa kahay gipasabut sa makabaton og “sugo gikan sa Ginoo”?(Jacob 1:17). (Masayud kon unsay gusto sa Ginoo nga atong buhaton.)

Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Hangyoa ang klase nga maminaw sa pipila ka mga pamaagi diin ang mga lider sa Simbahan mangita sa mga sugo gikan sa Ginoo samtang mangandam sila nga motudlo diha sa kinatibuk-ang komperensya:

Imahe

Elder Jeffrey R. Holland

“Tingali nahibalo na kamo (apan kon kamo wala pa mahibalo kinahanglang mahibalo kamo) nga uban sa panagsa nga eksepsyon, walay usa ka lalaki o babaye kinsa namulong [diha sa kinatibuk-ang komperensya] ang gihatagan og usa ka hilisgutan. Ang kada usa nga mamumulong kinahanglan nga magpuasa ug mag-ampo, magtuon ug magtinguha, magsige og usab sa iyang pakigpulong hangtud nga siya masaligon nga alang niini nga komperensya, niining higayuna, anaa kaniya ang hilisgutan nga gusto sa Ginoo nga iyang ipresentar nga walay pagsapayan sa personal nga kagustohan o ganahan nga hisgutan. … Matag usa mihilak, nabalaka ug kinasingkasing nga nagtinguha sa giya sa Ginoo nga mogiya sa iyang mga hunahuna ug igsusulti” (“Bandila ngadto sa mga Nasud,” Ensign o Liahona, Mayo 2011, 111).

Unsay gibuhat sa mga mamumulong sa kinatibuk-ang komperensya aron mangita sa mga sugo gikan sa Ginoo?
Nganong importante mang masabtan nga nagtinguha ang mga lider sa Simbahan sa pagtudlo kanato kon unsay gusto sa Ginoo nga atong mahibaloan? Sa unsa kahang paagi ang pagtimaan niini maka-impluwensya sa atong kinaiya kon maminaw kita kanila nga motudlo?
Sumala sa Jacob 1:19, unsay mga responsibilidad ni Jacob ug Joseph? (Samtang motubag ang mga estudyante, siguroa nga makasabut sila nga ang mga lider sa priesthood adunay sagrado nga responsibilidad sa pagtudlo sa pulong sa Dios ug sa pagpahimangno batok sa sala. Mahimo nimong isulat kini nga kamatuoran diha sa pisara.)
Nganong usa man ka panalangin kon adunay mga ginikanan ug mga lider sa Simbahan kinsa nagpahimangno kanato sa masalaypong mga kinaiya?
Unsa nga mga pulong ang gigamit ni Jacob aron sa paghulagway kon sa unsang paagi sila kinahanglang motudlo? Unsay mga sangputanan kon wala nila buhata ang ilang mga responsibilidad?

Hangyoa ang mga estudyante sa paghunahuna kon unsay ilang bation kon, sama ni Jacob, anaa sila sa posisyon sa pagkalider ug gidasig nga manawagan sa mga katawhan sa paghinulsol tungod sa imoralidad, pagkakalibutanon, ug garbo. Ipares-pares ang mga estudyante. Dapita ang mga pares nga magpuli-puli og basa ngadto sa usag usa gikan sa Jacob 2:1–3, 6–7, 10–11. Hangyoa sila nga mangita sa mga pulong nga nagpakita sa mga pagbati ni Jacob mahitungod sa iyang tahas nga manawagan sa mga katawhan sa paghinulsol. Human sa igo nga panahon, dapita ang pipila ka mga estudyante sa pagpakigbahin sa ilang mga tubag ngadto sa klase.

Unsay gipakita niini nga mga pulong mahitungod sa mga pagbati ni Jacob ngadto sa pagtawag sa iyang mga katawhan sa paghinulsol? (Siguroha nga makasabut ang mga estudyante nga bisan og gilisdan si Jacob niini nga responsibilidad, iya kining gipadayon tungod kay mahunahunaon siya sa mga katawhan ug tungod kay gusto niyang sundon ang mga sugo sa Dios.)

Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).

Sa pagtapos, pasulata ang mga estudyante diha sa ilang mga scripture study journal mahitungod sa (1) unsay natudlo sa mga lider sa Simbahan kanila sa bag-o lang ug sa unsang paagi nila kini magamit sa ilang kinabuhi o (2) kon sa unsang paagi nila magamit ang ilang nakat-unan karon diha sa ilang mga calling sa klase o sa mga quorum presidency, diha sa ilang mga responsibilidad isip mga home teacher, o diha sa ubang mga oportunidad sa pagkalider. (Mahimo nimong isulat kini nga mga instruksyon diha sa pisara.) Awhaga ang mga estudyante nga sundon ang tambag sa ilang mga lider sa priesthood. Taposa pinaagi sa pagpakigbahin sa imong pagpamatuod sa mga baruganan nga gitudlo niini nga leksyon.

Komentaryo ug Background nga Impormasyon

Jacob 1:18. “Gitudlo nga mga pari ug mga magtutudlo”

Mipasabut si Presidente Joseph Fielding Smith sa kahulugan sa mga pulong “mga pari ug mga magtutudlo” diha sa Jacob 1:18:

“Midumala ang mga Nephite pinaagi sa Melchizedek Priesthood gikan sa panahon ni Lehi ngadto sa panahon sa pagtungha sa atong Manluluwas taliwala kanila. Tinuod nga si Nephi ‘mitudlo ni Jacob ug Joseph’ nga sila kinahanglang mahimong mga pari ug mga magtutudlo sa tibuok yuta sa mga Nephite, apan tungod kay ang plural nga mga termino nga mga pari ug mga magtutudlo maoy gigamit wala kini magpasabut sa piho nga mga office sa priesthood diha sa matag sitwasyon, apan kini usa ka kinatibuk-ang tahas sa pagtudlo, pagdumala, ug pagpahimangno sa mga katawhan” (Answers to Gospel Questions, comp. Joseph Fielding Smith Jr., 5 vols. [1957–66], 1:124).

Jacob 1:19. “Kami mipalambo sa among mga buluhaton ngadto sa Ginoo”

Si Presidente Thomas S. Monson mipasabut sa unsay gipasabut sa pagpalambo sa usa ka calling:

“Unsa man ang gipasabut sa pagpalambo sa calling? Nagpasabut kini sa pag-ugmad niini sa kaligdong ug kaimportante, sa paghimo niini nga madungganon ug dalaygon sa mga mata sa tanang mga tawo, sa pagpadako ug paglig-on niini, sa pagtugot sa kahayag sa langit nga modan-ag niini aron makita sa ubang mga tawo.

Ug unsaon man sa usa ka tawo pagpalambo sa iyang calling? Pinaagi lamang sa pagpahigayon og serbisyo nga may kalabutan niini. Ang elder mopalambo sa inordinahang calling sa usa ka elder pinaagi sa pagkat-on sa iyang mga katungdanan isip usa ka elder ug dayon sa pagbuhat niini. Sama sa elder, mao usab ang deacon, teacher, priest, bishop, ug kada usa nga naghupot sa katungdanan sa priesthood” (“Ang Sagradong Tawag sa Pagserbisyo,” Ensign o Liahona, Mayo 2005, 54–55).

Jacob 1:19; 2:2. “Manubag sa mga sala sa mga katawhan dinhi sa among mga ulo”

Kadtong kinsa adunay mga katungdanan sa pagkalider diha sa Simbahan adunay dakong responsibilidad. Mitudlo si Jacob nga kon magpasagad ang mga lider sa pagtudlo sa pulong sa Dios ngadto kinsa sila gitawag sa pagdumala, mahimo silang may tulubagon alang sa mga sala sa mga katawhan. Sa pagpamulong ngadto sa mga kaigsoonan sa priesthood, mipasabut si Presidente John Taylor sa responsibilidad nga gihulagway ni Jacob:

“Kon kamo dili mopalambo sa inyong balaang mga tawag, ang Dios mohimo kaninyo nga responsable alang niadtong kinsa mahimong inyo untang maluwas kon kamo naghimo pa sa inyong katungdanan.” (Mga Pagtulun-an sa mga Presidente sa Simbahan: John Taylor [2001], 201).

Si Presidente Hugh B. Brown sa Unang Kapangulohan mikomentaryo sa pamahayag ni Presidente Taylor:

“Usa kini ka mahagiton nga pamahayag. Kon mawagtang kanako kon unsa untay akong maangkon sa sunod nga kinabuhi tungod sa sala nga tinuyo o sa sala kay wala buhata ang angay, ako mismo mag-antus ug, walay pagduhaduha, uban sa akong mga hinigugma. Apan kon mapakyas ako sa akong tahas isip usa ka bishop, usa ka stake president, usa ka mission president, o usa sa mga General Authority sa Simbahan—kon bisan kinsa kanato mapakyas sa pagtudlo, pagdumala, paggiya, ug pagtabang nga maluwas kadtong ubos sa atong pagdumala ug sulod sa atong katungod, ang Ginoo mohimo kanatong responsable kon sila mangawala isip resulta sa atong pagkapakyas” (diha sa Conference Report, Okt. 1962, 84).

Jacob 2:8. Ang “pulong sa Dios … makapaalim sa samaran nga kalag”

Kon ang bag-o nga impormasyon makalibug o makasamok ngadto sa mga tigkat-on sa ebanghelyo, mas maayo pa alang kanila nga mangita sa mga tubag gikan sa Dios, kinsa nasayud sa tanang butang, kay sa mangita diha sa Internet o modangup ngadto sa anti-Mormon nga materyal. Ang direkta nga pagdangup ngadto sa Dios alang sa mga tubag nagpakita sa atong hugot nga pagtuo diha Kaniya ug nagtugot kanato nga makadawat og mga tubag pinaagi sa Espiritu Santo. Kinahanglan usab kitang modangup ngadto sa mga kasulatan ug sa mga pulong sa mga apostoles ug mga propeta sa ulahing mga adlaw, nga makatubag sa lisud nga mga pangutana ug makapaalim og mga samad. Ang mosunod nga mga kasulatan nagtudlo kanato kon asa kita modangup ug kon unsay kinahanglan natong buhaton kon aduna kitay mahagiton nga mga pangutana ug mga kabalaka:

Jacob 2:8—Ang “pulong sa Dios … makapaalim sa samaran nga kalag.”

James 1:5–6—“Kon hain kaninyo ang nagkulang sa kaalam, papangayoa siya sa Dios, … ug kini ihatag ngadto kaniya. Hinoon kinahanglan nga mangayo siya uban sa pagtoo.”

Moroni 10:5—“Ug pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang.”