Jacob 5:1–51

Pasiuna

Sa pagtudlo sa iyang mga katawhan, mikutlo si Jacob sa sambingay sa maayo ug ihalas nga mga kahoy nga oliba, nga sa sinugdan gihatag pinaagi sa usa ka propeta nga ginganlan og Zenos ug nalakip sa mga palid nga tumbaga. Migamit si Jacob niini nga sambingay aron sa pagtudlo nga ang Ginoo magtinguha sa pagdala og kaluwasan ngadto sa tanang mga katawhan—gani ngadto niadtong taliwala sa Iyang mga katawhan sa pakigsaad kinsa mibiya Kaniya. Tungod sa gitas-on sa Jacob 5, gibahin kini sa duha ka mga leksyon.

Mga Sugyot alang sa Pagtudlo

Jacob 5:1–14

Mikutlo si Jacob kang Zenos, kinsa mipahisama sa balay ni Israel ngadto sa usa ka maayo nga kahoy nga oliba

Ikonsiderar ang pagsugod niini nga leksyon pinaagi sa pagbasa sa mosunod nga mga ehemplo sa mga batan-on kinsa nagduhaduha sa kaandam sa Ginoo nga mopasaylo kanila sa ilang mga sala:

Milambo ang masalaypong kinaiya sa usa ka batan-ong tighupot sa priesthood. Nagtuo siya nga mapasaylo ra ang uban, apan nagduhaduha siya nga dawaton sa Ginoo ang iyang paghinulsol.
Ang usa ka batan-ong babaye nakalapas sa usa ka sugo. Nakasinati siya og kahasol sa konsensya, mibati og kalisang mahitungod sa iyang kaugalingon, ug nangutana kon gihigugma pa ba siya sa Ginoo.

Dapita ang mga estudyante nga mamalandong sa mosunod nga pangutana nga dili tubagon og kusog:

Naghunahuna ba kamo mahitungod sa kaandam sa Ginoo nga mopasaylo sa inyong mga sala?

Ipasabut nga nanagna si Jacob nga ang mga Judeo mosalikway ni Jesukristo (tan-awa sa Jacob 4:15). Mitudlo usab siya nga mopadayon gihapon si Jesukristo sa pagtrabaho alang sa kaluwasan sa Iyang mga katawhan bisan human nga misalikway sila Kaniya (tan-awa sa Jacob 4:17–18). Aron mahulagway kini nga kamatuoran, mikutlo si Jacob og usa ka sambingay nga gihatag pinaagi sa usa ka propeta nga ginganlan og Zenos. Ang usa ka sambingay naggamit og simbolikanhong mga karakter, mga butang, ug mga aksyon aron sa pagtudlo sa mga kamatuoran. Samtang magtuon ang mga estudyante niini nga sambingay, makakat-on sila og importante nga mga leksyon mahitungod sa kaandam ni Jesukristo nga motabang niadtong kinsa mibiya Kaniya.

Dapita ang usa ka estudyante sa pagbasa og kusog sa Jacob 5:1–2, ug ipapangita sa klase kon kinsay gihisgutan ni Zenos (ang balay ni Israel). Tingali kinahanglan nimong ipasabut nga sa dihang mihimo si propeta Jacob sa Daang Tugon og mga pakigsaad uban sa Ginoo, giusab sa Ginoo ang iyang pangalan ngadto sa Israel. Ang mga pulong nga “balay ni Israel” nagpasabut sa mga kaliwat ni Jacob ug sa tanang mga katawhan kinsa nabunyagan ug mihimo og mga pakigsaad uban sa Ginoo.

Kinsa niini nga klase ang sakop sa balay ni Israel? (Tingali kinahanglan nimong ipasabut nga ang tanang mga miyembro sa Simbahan kabahin na sa balay ni Israel. Kabahin sila sa sambingay diha sa Jacob 5.)

Dapita ang usa ka estudyante sa pagbasa og kusog sa Jacob 5:3. Hangyoa ang klase nga mangita kon unsay gigamit ni Zenos dinhi niini nga sambingay aron sa pagrepresentar sa balay ni Israel. Human moreport ang mga estudyante kon unsay ilang nakit-an, ipasabut nga ang kahoy nga mga oliba bililhon kaayo sa karaan nga Israel, diin mipuyo si Zenos. Gigamit ang mga oliba alang sa pagkaon, ug ang lana sa oliba gigamit alang sa pagluto ug medisina ug isip sugnod sa mga lampara. Ang mga kahoy nga oliba nagkinahanglan og tumang pag-amuma ug pag-ugmad aron matabangan kini nga mamunga og maayo nga bunga. Ipasabut nga dinhi niini nga sambingay, ang maayo nga kahoy nga oliba nahimutang diha sa usa ka ubasan, nga nagrepresentar sa kalibutan.

Sumala sa Jacob 5:3, unsay misugod og kahitabo sa maayo nga kahoy nga oliba? Unsay gilarawan sa pagkadunot sa kahoy? (Awhaga ang mga estudyante nga mogamit sa footnote 3d sa pagtubag niini nga pangutana.)
Unsa ang apostasiya? (Pagbiya gikan sa Ginoo ug sa Iyang ebanghelyo.)

Dapita ang mga estudyante sa pagbasa sa Jacob 5:4–6 sa hilum nga paagi. Hangyoa sila sa paghunahuna kon kinsa ang agalon sa ubasan ug unsay girepresentaran sa iyang mga gibuhat nga pagpul-ong, pagkalot, ug pag-amuma. Dayon sugoa sila sa pagpasabut kon unsa sa ilang hunahuna ang girepresentaran niini nga mga simbolo. (Tingali kinahanglan nimo silang tabangan nga makasabut nga ang agalon sa ubasan nagrepresentar ni Jesukristo. Ang pagpul-ong, pagkalot, ug pag-amuma nagrepresentar sa mga paningkamot sa Ginoo aron matabangan kita nga makadawat sa mga panalangin sa Iyang Pag-ula ug sa mga paningkamot sa mga propeta nga tudluan ug tawgon ang mga katawhan sa paghinulsol.)

Dapita ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Sa sinugdanan pa kini nga sambingay nga gi-istorya og balik ni Jacob gituyo nga maghisgot bahin ni Jesukristo. …Bisan og ang Ginoo sa ubasan ug ang iyang mga tigtrabaho naningkamot sa paglig-on, pagpul-ong, pagputli, ug paghimo sa ilang mga kahoy nga mabungahon nga miresulta sa usa ka hugna sa makasaysayanong paglarawan sa pagkatibulaag ug pagpundok sa Israel, ang mas lawom nga kahulugan sa Pag-ula nagsuporta ug nag-impluwensya sa ilang mga trabaho” (Christ and the New Covenant: The Messianic Message of the Book of Mormon [1997], 165).

Aron matabangan ang mga estudyante nga makakita kon sa unsang paagi kini nga sambingay naghulagway sa kabalaka sa Ginoo alang kanila, tudloi sila nga mahimo nilang ipuli ang ilang mga pangalan kon hisgutan na ang mga kahoy nga oliba. Mahimo nimo kining ipahayag pinaagi sa paghatag sa mosunod nga ehemplo gikan sa Jacob 5:7: “Kini nakapaguol kanako nga Ako mawad-an ni [inyong pangalan].” Ipasabut nga samtang ipuli nato ang atong mga pangalan diha sa Jacob 5 sa mga dapit nga makahuluganon ug angay, mas makakat-on kita mahitungod sa kabalaka sa Ginoo alang kanato.

I-display ang mosunod nga tsart. Ipasabut nga naglista kini sa mga kahulugan sa mga simbolo diha sa sambingay ni Zenos. (Mahimo kang magbuhat og mga kopya sa tsart isip handout o ipakopya sa mga estudyante ang tsart diha sa ilang mga scripture study journal.)

Jacob 5: Ang Sambingay sa Maayo ug Ihalas nga mga Kahoy nga Oliba
Simbolo	Posible nga Kahulugan
Maayo nga kahoy nga oliba	Ang balay ni Israel, mga katawhan sa pakigsaad sa Dios
Ang ubasan	Ang kalibutan
Pagkadunot	Sala ug apostasiya
Ginoo ug agalon sa ubasan	Jesukristo
Pagpul-ong, pagkalot, ug pag-amuma	Mga paningkamot sa Ginoo sa pagtabang sa mga katawhan nga makadawat sa mga panalangin sa Iyang Pag-ula
Sulugoon sa agalon sa ubasan	Mga propeta sa Ginoo
Mga sanga	Mga grupo sa mga katawhan
Ihalas nga kahoy nga oliba	Mga hentil—kadtong kinsa wala mihimo og mga pakigsaad uban sa Ginoo. Sa wala madugay diha sa sambingay, ang natural nga mga kahoy nga oliba nahimong ihalas, nagrepresentar sa mga bahin sa balay ni Israel nga napukan ngadto sa pag-apostasiya.
Pagsumbak ug pagtanom sa mga sanga	Ang pagkatibulaag ug pagpundok sa mga katawhan sa pakigsaad sa Ginoo. Agig dugang, ang pagsumbak sa ihalas nga mga sanga ngadto sa maayo nga kahoy nga oliba nagrepresentar sa pagkakabig niadtong kinsa nahimong kabahin sa mga katawhan sa pakigsaad sa Ginoo.
Pagsunog sa mga sanga	Mga paghukom sa Dios ngadto sa mga dautan
Bunga	Mga kinabuhi o mga binuhatan sa mga katawhan

Hangyoa ang usa ka estudyante sa pagbasa og kusog sa Jacob 5:7, 9–10, ug ipapangita sa klase kon unsay sunod nga gibuhat sa agalon sa ubasan aron maluwas ang maayo nga kahoy nga oliba. Ipareport sa mga estudyante kon unsay ilang nakit-an. (Tingali kinahanglan nimong ipasabut nga ang pagsumbak mao ang pagsukip sa usa ka sanga gikan sa usa ka kahoy ngadto sa lain nga kahoy. Ang mga pagsumbak niini nga mga bersikulo nagrepresentar sa mga paningkamot sa Ginoo sa pagtabang sa mga Hentil nga mahimong kabahin sa Iyang mga katawhan sa pakigsaad pinaagi sa pagbunyag ug pagkakabig. Ang pagsunog sa pipila ka mga sanga nagrepresentar sa mga paghukom sa Ginoo ngadto sa labing dautan nga mga miyembro sa balay ni Israel.)

Dapita ang usa ka estudyante sa pagbasa og kusog sa Jacob 5:11. Hangyoa ang klase nga mangita og ebidensya sa kabalaka sa agalon alang sa mga gamut sa maayo nga kahoy nga oliba. Ipareport sa mga estudyante kon unsay ilang nakit-an.

Pahinumdumi ang mga estudyante nga ang Jacob 5:6 nagpahayag nga ang maayo nga kahoy nga oliba misugod sa pagsalingsing og linghod ug malumo nga mga sanga. Hangyoa ang usa ka estudyante sa pagbasa og kusog sa Jacob 5:8, 13–14. Hangyoa ang klase sa pag-ila kon unsay gibuhat sa agalon ngadto niini nga mga sanga. Mahimo usab nimo silang hangyuon sa pagkonsiderar kon sa unsang paagi ang panaw sa pamilya ni Lehi naghatag og usa ka ehemplo sa mga gibuhat sa agalon diha sa Jacob 5:8, 13–14.

Jacob 5:15–40

Ang agalon sa ubasan ug ang iyang sulugoon nag-ugmad [nagtrabaho] aron matabangan ang ubasan nga mamunga og maayo nga bunga

Bahina ang klase ngadto sa duha ka grupo. I-assign ang unang grupo sa pagtuon sa Jacob 5:15–28 ug ang ikaduhang grupo sa pagtuon sa Jacob 5:29–40. Hangyoa ang mga estudyante sa pagbuhat sa mosunod samtang nagtuon sila (mahimo nimong isulat kini nga mga instruksyon diha sa pisara):

I-summarize kon unsay nahitabo diha sa ubasan ug unsa kaha ang girepresentaran niana.
Ilha ang mga pulong nga nagpakita sa mga paningkamot sa agalon sa ubasan sa pagpreserbar sa maayo (o natural) nga kahoy nga oliba ug sa mga sanga niini.

Human mahatagan ang mga estudyante og igong panahon sa pagtuon sa naka-assign nila nga mga bersikulo, hangyoa sila sa pag-summarize kon unsay nahitabo diha sa ubasan ug sa pagpasabut kon unsa kaha ang girepresentaran niana. Sugdi gikan sa mga estudyante kinsa nakatuon sa Jacob 5:15–28. Diha sa ubos mao ang sampol nga mga summary ug mga interpretasyon.

Jacob 5:15–28. Unsay nahitabo: Ang tanang gisumbak nga mga sanga midala og maayo nga bunga. Hinoon, ang usa ka sanga, bisan gitanom diha sa maayo nga bahin sa ubasan, namunga og maayo ug ihalas nga bunga. Unsa kaha ang girepresentaran niini: Ang maayo nga bunga sa hapit tibuok ubasan nagrepresentar sa pagkamatarung diha sa yuta sa panahon ni Kristo ug sa Iyang mga Apostoles. Ang sanga nga namunga og pipila ka maayo nga bunga ug pipila ka ihalas nga bunga nagrepresentar sa matarung ug dautan nga kaliwat ni Lehi.

Jacob 5:29–40. Unsay nahitabo: Ang tanang mga bunga sa tibuok ubasan nahimong dautan. Unsa kaha ang girepresentaran niini: Ang pagkahimong dautan sa tanang mga bunga nagrepresentar sa Dakong Apostasiya, nga sa panahon niini ang ebanghelyo ni Jesukristo nawala gikan sa yuta human sa yutan-ong pagpangalagad sa mga Apostoles ni Kristo.

Human mopakigbahin ang duha ka grupo niini nga mga summary, ipangutana:

Unsa nga mga pulong ang nagpakita sa mga paningkamot sa agalon aron ma-preserbar ang maayo nga kahoy nga oliba ug ang mga sanga niini? Unsay gihulagway niini mahitungod sa mga pagbati sa Ginoo ngadto sa Iyang mga katawhan sa pakigsaad?
Samtang naghisgot kita niini nga sambingay, unsay inyong nakat-unan mahitungod ni Jesukristo, ang agalon sa ubasan? (Lakip sa daghang mga kamatuoran nga gitudlo niini nga mga bersikulo, kinahanglang makasabut ang mga estudyante nga ang Ginoo naghigugma kanato ug makugihong nagtrabaho alang sa atong kaluwasan.)
Sa unsang paagi kini nga sambingay may kalabutan sa mga ehemplo diha sa sinugdanan sa leksyon sa duha ka batan-on kinsa nagduhaduha mahitungod sa kaandam sa Ginoo nga mopasaylo kanila sa ilang mga sala?

Jacob 5:41–51

Nasubo ang agalon alang sa iyang ubasan

Dapita ang pipila ka estudyante nga magpuli-puli sa pagbasa og kusog sa Jacob 5:41–42, 46–50. (Mahimo nimong ipasabut nga ang mga pulong nga “pagkamapahitas-on sa ubasan” Jacob 5:48 mahimong nagpasabut sa garbo.) Hangyoa ang klase nga mangita og mga pulong nga nagpakita sa gugma ug kabalaka sa agalon alang sa iyang ubasan ug sa iyang kasubo kon ang mga kahoy dili mamunga og maayo nga bunga. Dapita ang mga estudyante sa pagpakigbahin og mga pulong gikan niini nga mga bersikulo nga labing makahuluganon alang kanila ug sa pagpasabut nganong makahuluganon kini nga mga pulong. Human mopakigbahin ang mga estudyante, pangutan-a ang klase:

Sa unsang paagi ang pag-amuma sa agalon alang sa iyang ubasan nagrepresentar sa gugma sa Ginoo alang kanato?
Unsay pipila ka mga ehemplo, gikan sa mga kasulatan o gikan sa inyong kinabuhi, nga nagpakita nga ang Ginoo nagpadayon sa iyang paghigugma ug pag-amuma sa mga katawhan bisan human sila mibiya Kaniya?

Sa pagtapos, pahinumdumi ang mga estudyante nga ang agalon mikonsiderar sa pagputol sa tanang mga kahoy tungod kay nahimong dautan ang tanang mga bunga niini bisan pa sa tanan niyang gibuhat (tan-awa sa Jacob 5:49).

Biyaan kaha sa agalon ang iyang ubasan? Ngano o nganong dili man?

Human mopakigbahin ang mga estudyante sa ilang mga tubag, basaha ang Jacob 5:51 ngadto sa klase. Ipamatuod nga ang Ginoo nahigugma kanato ug nagpakita ug dakong kalooy ug pailub samtang nag-ugmad Siya aron tabangan kitang moduol ngadto Kaniya ug modala og matarung nga mga buhat. Ipasabut nga ang sunod nga leksyon molakip og panaghisgot sa katapusang mga paningkamot sa agalon sa pagluwas sa iyang ubasan.