2 Nephi 32–Jacob 4 (Unit 9)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante dihang gitun-an nila ang 2 Nephi 32–Jacob 4 (Unit 9) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (2 Nephi 32)

Sa dihang nagtuon ang mga estudyante sa 2 Nephi 32, nakat-on sila nga kon magbusog kita sa mga pulong ni Kristo, ang mga pulong ni Kristo motug-an kanato sa tanan nga mga butang nga kinahanglan natong buhaton. Nakat-on usab sila nga kon kanunay kitang mag-ampo, makahimo kita sa tanang mga butang nga gusto sa Ginoo nga buhaton nato alang sa kaayohan sa atong mga kalag. Ang leksyon midapit sa mga estudyante nga tingubon kon unsay ilang nakat-unan mahitungod sa kanunayng pag-ampo sulod sa 24 oras.

Day 2 (2 Nephi 33)

Dinhi niini nga leksyon mahitungod sa katapusang pagpamatuod ni Nephi, nakat-on ang mga estudyante nga kita ang mopili kon ablihon nato ang atong mga kasingkasing o dili ngadto sa pagdasig sa Espiritu Santo. Giribyu usab nila ang 1 Nephi ug 2 Nephi, nagpili og usa ka tudling sa mga kasulatan nga midasig kanila nga mobuhat og maayo o nga motuo kang Kristo.

Day 3 (Jacob 1–2)

Diha sa ilang leksyon mahitungod sa Jacob 1–2, nakat-on ang mga estudyante nga ang mga lider sa priesthood makugihong nagtrabaho aron matabangan kita nga moduol ngadto kang Kristo ug nga aduna silay balaan nga responsibilidad sa pagtudlo sa pulong sa Dios ug sa pagpasidaan batok sa sala. Pinaagi sa pagtuon sa wali ni Jacob ngadto sa iyang mga katawhan, nakat-on ang mga estudyante nga kinahanglan natong tinguhaon ang gingharian sa Dios labaw pa kay sa ubang mga tinguha. Misulat sila diha sa ilang mga scripture study journal mahitungod sa usa ka pamaagi nga mahimo nilang gamiton ang mga panalangin ug mga oportunidad nga gihatag sa Ginoo diha kanila aron sa pagtukod sa gingharian sa Dios ug sa pagpanalangin sa mga kinabuhi sa uban. Gitutukan usab nila ang kamatuoran nga ang Ginoo mahimuot sa kaputli sa tanang mga tawo, lalaki ug babaye. Gihangyo sila sa pagpamalandong kon sa unsang paagi ang pagsunod sa balaod sa kaputli nagpanalangin sa mga pamilya ug nagpahimuot sa Ginoo.

Day 4 (Jacob 3–4)

Samtang mipadayon ang mga estudyante sa pagtuon sa wali ni Jacob, nakat-on sila nga ang Dios mohupay sa putli og kasingkasing diha sa ilang mga kasakit. Ang leksyon nagtutok niini nga doktrina: Pinaagi sa Pag-ula ni Jesukristo, mahimo kitang mapuno sa paglaum ug mopakig-uli sa atong mga kaugalingon ngadto sa Dios. Misulat ang mga estudyante mahitungod sa ilang personal nga mga rason alang sa kagustuhan nga mopamatuod kang Jesukristo ug sa Pag-ula.

Pasiuna

Kini nga leksyon motabang sa mga estudyante nga makasabut nga mipamatuod si Nephi sa misyon ni Jesukristo. Ang mga estudyante makabaton og oportunidad sa pagpakigbahin kon sa unsang paagi ang mga pulong ni Jacob makatabang kanila sa pagbuntog sa garbo ug sa paggamit sa ilang mga panalangin gikan sa Dios sa pagtukod sa Iyang gingharian. Makabaton sila og oportunidad nga gamiton ang mga baruganan ug mga doktrina nga ilang makat-unan diha sa Jacob 2 sa paghisgot sa kaimportante sa pagsunod sa balaod sa kaputli sa Ginoo. Maghisgot sila og mga pamaagi sa pagpangita og mga oportunidad nga mamulong mahitungod ni Jesukristo ug sa Pag-ula.

Mga Sugyot alang sa Pagtudlo

2 Nephi 32–33

Mitambag si Nephi kanato nga tinguhaon ang balaan nga direksyon pinaagi sa mga pulong ni Jesukristo

Sugdi kini nga leksyon pinaagi sa pagpangutana sa mosunod:

Unsay usa sa inyong paborito nga mga sports o mga kalihokan?
Unsa nga sukaranang mga kahanas ang kinahanglan ninyong bansayon kanunay aron mahimong hawud niana nga sport o kalihokan?
Unsay mahitabo kon mapasagdan ra sa usa ka tawo ang pagbansay niadtong sukaranan nga mga kahanas?

Sultihi ang klase nga adunay sukaranan nga mga buluhaton nga magdapit sa Espiritu Santo nga hatagan kita og giya gikan sa atong Amahan sa Langit. Kopyaha ang mosunod nga tsart diha sa pisara o andama kini isip usa ka handout.

Pag-ampo	Pagdawat og Giya gikan sa Espiritu Santo	Pagtuon sa Kasulatan
2 Nephi 32:8–9	2 Nephi 32:5; 33:1–2	2 Nephi 32:3; 33:4

Hangyoa ang matag estudyante nga mopili og usa sa mga buluhaton diha sa tsart ug basahon ang katugma nga mga tudling sa kasulatan. Ipares-pares ang mga estudyante o bahina sa gagmay nga mga grupo. Hangyoa ang mga estudyante nga magpuli-puli sa pagpakigbahin kon sa unsang paagi ang pag-ampo, pagdawat sa giya gikan sa Espiritu Santo, ug pagtuon sa kasulatan nakatabang kanila sa pagdawat og giya gikan sa Dios.

Mahimo nimong hangyuon ang mga estudyante nga moreport kon sa unsang paagi nakatabang kanila ang mga panudlo ni Elder David A. Bednar mahitungod sa sugo nga kanunayng mag-ampo. Mahimo usab nimo silang pangutan-on kon sa unsang paagi napalambo ang ilang mga pag-ampo pinaagi sa assignment nga sulod sa 24 oras tipunon ang unsay ilang nakat-unan mahitungod sa kanunay nga pag-ampo. (Mga assignment kini gikan sa day 1.)

Jacob 1–2

Gipanton ni Jacob ang iyang mga katawhan tungod sa ilang gugma sa katigayunan, garbo, ug sekswal nga pagka-imoral

Isulat ang mosunod nga han-ay sa mga pulong diha sa pisara: Tungod kay ang pipila ka mga tawo mas daghan og … kay sa uban, mahimo silang matintal sa pagtuo nga mas maayo sila kay sa uban.

Dapita ang mga estudyante sa pagsugyot og lainlaing mga pulong nga mokompleto niini nga pamahayag. Ang posible nga mga tubag naglakip sa kwarta, katigayunan, abilidad sa musika, kahanas sa pagka-atleta, mga talento, naeskwelahan, salabutan, mga oportunidad sa paglambo, kahibalo sa ebanghelyo, ug materyal nga mga butang. Dapita ang mga estudyante nga ikonsiderar sa hilum nga paagi kon kini nga pamahayag, uban sa bisan unsa sa lainlaing mga pulong nga ilang gisugyot, tinuod ba alang kanila.

Pahinumdumi ang mga estudyante nga tungod sa gugma ni Jacob alang sa iyang mga katawhan ug sa iyang pagkamasulundon ngadto sa mga kasugoan sa Ginoo, mipasidaan siya sa iyang mga katawhan sa ilang mga kahuyang ug mga sala. Dapita ang mga estudyante nga basahon ang Jacob 2:12–13 ug mosugyot og mga pamaagi nga tingali ilang makompleto ang pamahayag diha sa pisara aron mohulagway kini sa pipila ka mga Nephite sa panahon sa pagpangalagad ni Jacob.

Dapita ang mga estudyante nga basahon ang Jacob 2:17–21 ug pangitaon ang mga pulong sa tambag nga makatabang kanila sa pagbuntog sa garbo. (Mahimong ila nang gimarkahan kini nga mga pulong sa tambag diha sa ilang personal nga pagtuon.) Dapita ang mga estudyante nga mopakigbahin og pipila ka mga pulong sa tambag nga ilang nakit-an ug mopasabut kon sa unsang paagi kini nga tambag makatabang kanila sa pagbuntog sa garbo.

Ipasabut nga kini nga mga bersikulo nagtudlo sa mosunod nga kamatuoran: Kinahanglan natong tinguhaon ang gingharian sa Dios labaw sa tanang mga tinguha. Dapita ang pipila ka mga estudyante nga mopakigbahin og usa ka pamaagi nga ilang magamit ang mga panalangin ug mga oportunidad nga gihatag sa Ginoo diha kanila aron sa pagtukod sa gingharian sa Dios ug sa pagpanalangin sa uban.

Aron maandam ang mga estudyante sa pagribyu sa mga pagtulun-an ni Jacob mahitungod sa sekswal nga kaputli, dapita sila sa paghunahuna nga dunay tawo nga nangutana nila nganong mituo sila sa pagsunod sa balaod sa kaputli. Hangyoa ang mga estudyante nga basahon ang Jacob 2:28–35 alang sa tabang sa pagtubag niini nga pangutana. Tingali makatabang nga mapahinumduman sila nga ilang nakat-unan ang mosunod nga kamatuoran isip kabahin sa ilang personal nga pagtuon: Mahimuot ang Ginoo diha sa kaputli. Gitun-an usab nila ang mga sangputanan sa sekswal nga pagka-imoral nga gihulagway niini nga mga bersikulo. Dapita ang mga estudyante sa pagpakigbahin kon unsaon kaha nila sa pagpasabut, base sa Jacob 2:28–35, kon unsaon nila pagtubag kini nga pangutana.

Ipangutana: Sumala sa Jacob 2:27, unsa ang “pulong sa Ginoo” mahitungod sa pagbaton og labaw sa usa ka asawa? (Ipaklaro gayud nga misugo ang Ginoo nga ang usa ka tawo kinahanglan maminyo sa usa lamang ka asawa.)

Ipasabut nga dunay mga panahon sa kasaysayan sa kalibutan, misugo ang Ginoo sa Iyang mga katawhan nga mobuhat sa dinaghan nga kaminyoon [pagpangasawa og daghan]. Sama pananglit, ang dinaghan nga kaminyoon nga gibuhat ni Abraham ug Sarah sa panahon sa Daang Tugon (tan-awa sa Genesis 16:1–3; D&P 132:34–35, 37) ug sa ilang anak nga si Isaac ug sa ilang apo nga si Jacob (tan-awa sa D&P 132:37), ug gibuhat usab kini sulod sa usa ka panahon niadtong bag-o pa ang gipahiuli nga Simbahan, nga nagsugod kang Propeta Joseph Smith (tan-awa sa D&P 132:32–33, 53). Apan niadtong 1890, misugo ang Dios sa Iyang propeta nga si Wilford Woodruff nga tapuson ang buhat sa dinaghan nga kaminyoon (tan-awa sa D&P, Opisyal nga Pahayag 1).

Hatagi og panahon ang mga estudyante nga pamalandungan kon sa unsang paagi ang mga pagpili nga ilang gihimo aron mahimong putli ug limpyo makapahimuot sa Ginoo ug sa uban. Dapita sila sa pagpasabut kon sa unsang paagi ang pagsunod sa balaod sa kaputli karon mopanalangin kanila ug sa ilang mga pamilya—karon ug sa umaabut. Ipasabut kon sa unsang paagi ang pagsunod sa balaod sa kaputli mipanalangin kanimo ug sa imong pamilya.

Jacob 3–4

Nag-awhag si Jacob sa iyang mga katawhan nga maghinulsol ug moangkon og usa ka paglaum nga makabalik sila sa presensya sa Dios

Pagbutang og gamay nga litrato ni Jesukristo diha sa tunga-tunga sa pisara, sa usa ka poster, o diha sa usa ka pirasong papel. Sa palibut sa litrato, pagsulat og pipila ka mga pulong nga nagrepresentar og mga butang nga makababag sa mga tawo gikan sa Manluluwas ug sa Iyang ebanghelyo. Hangyoa ang mga estudyante sa pagpakli ngadto sa Jacob 4:14. Ipasabut nga kini nga bersikulo naglakip sa mga pulong nga “pagtan-aw lapas sa tumong.” Pangutan-a sila unsay gipasabut sa “tumong” dinhi niini nga bersikulo. (Si Elder Neal A. Maxwell sa Korum sa Napulog Duha ka mga Apostoles mitudlo nga “ang tumong mao si Kristo” [“Jesus of Nazareth, Savior and King,” Ensign, Dis. 2007, 45].) Human mopakigbahin niini nga pagpasabut, dapita ang usa ka estudyante sa pagbasa og kusog sa Jacob 4:14–15.

Ipangutana: Unsa kahay gipasabut sa pagtan-aw lapas sa tumong? (Pagsentro sa atong kinabuhi ngadto sa bisan unsa nga butang gawas sa Manluluwas ug sa Iyang ebanghelyo.)

Dapita ang mga estudyante sa pagbasa sa Jacob 4:4–12 ug pangitaon ang pipila ka mga rason nganong mituo si Jacob kang Jesukristo ug nganong iyang gibati nga importanting masayud ang uban mahitungod sa Pag-ula. Isip resulta niini nga panaghisgot, siguroha nga maklaro gayud ang mosunod nga kamatuoran: Pinaagi sa Pag-ula ni Jesukristo, mahimo kitang mapuno sa paglaum ug mopakig-uli sa atong mga kaugalingon ngadto sa Dios.

Ipakigbahin ang imong mga pagbati sa pagpasalamat alang sa Manluluwas ug sa Iyang Pag-ula. Ipamatuod nga si Jesukristo mao ang “tumong” diin kinahanglan natong itutok ang atong kinabuhi. Sa pagtapos sa leksyon, hangyoa ang mga estudyante sa paghunahuna kon unsay ilang buhaton aron maka-focus diha sa Manluluwas sa mosunod nga mga adlaw.

Sunod nga Unit (Jacob 5 ngadto sa Omni)

Pangutan-a ang mga estudyante: Unsa ang usa ka anti-Kristo? Unsaon ninyo pagtubag sa usa ka anti-Kristo? Samtang magbasa kamo sa mga kasulatan diha sa sunod nga unit, bantayi unsay gisulti ug gibuhat ni Jacob sa dihang giharong siya ni Sherem nga usa ka anti-Kristo. Pangitaa usab ang mga panalangin nga nadawat ni Enos tungod kay iyang gitinguha ang Dios sa tibuok niyang kasingkasing, nag-ampo sa tibuok adlaw ug hangtud sa kagabhion. Pangitaa ang mga rason nganong mibiya ang mga Nephite sa yuta sa ilang unang kabilin ug mipasakop uban sa mga Mulekite.