Moroni 4–5

Pasiuna

Girekord ni Moroni ang mga instruksyon sa Manluluwas ngadto sa mga Nephite kalabut sa pagpahigayon sa sakrament, lakip sa mga pag-ampo nga gamiton sa mga tighupot sa priesthood sa pagpanalangin sa pan ug bino.

Mga Sugyot alang sa Pagtudlo

Moroni 4–5

Si Moroni nagpasabut kon sa unsa nga paagi ang sakrament ipahigayon

Kon posible, pag-display og sacramental tray sa pan ug sacramental tray sa tubig. (Samtang tingali angay ang pag-display niini nga mga item, kinahanglan nga dili ka mosulay sa pagkopya sa bisan unsa nga paagi sa sakrament nga ordinansa.) Hatagi ang mga estudyante og pirasong papel ug hangyoa sila sa pagsulat gikan sa hunahuna, sa labing maayo nga ilang mahimo, sa usa sa mga pag-ampo sa sakrament. Human ang mga estudyante adunay igo nga panahon, ipasabut nga isip kabahin sa iyang rekord, gilakip ni Moroni kini nga mga pag-ampo ingon nga gihatag sa Ginoo alang sa pagpahigayon sa sakrament. Ipapakli nila ang Moroni 4:3 o Moroni 5:2 ug i-check ang ilang mga tubag. Dayon pangutana:

Kon ang usa ka higala sa lain nga relihiyon mohukom nga motambong sa sakrament miting uban nimo, unsaon nimo pagpasabut ang kahulugan sa sakrament ug ang importansya niini nganha kanimo?

Aron matabangan ang mga estudyante sa pagsabut sa usa sa mga katuyoan sa sakrament, dapita ang usa ka estudyante sa pagbasa og kusog sa Moroni 4:1–3 ug ang lain nga estudyante sa pagbasa og kusog sa Moroni 5:1–2. Dapita ang mga estudyante sa pag-ila sa mga pulong sa Moroni 4:3 ug sa Moroni 5:2 nga nagpasabut unsa ang girepresentar sa sakramental nga pan ug tubig. (Mahimo kang mosugyot nga markahan sa mga estudyante kini nga mga pulong diha sa ilang mga kasulatan. (Mahimo nimo nga pahinumduman ang klase nga karon ang Simbahan naggamit og tubig sa sakrament imbis bino, ingon nga gitugot pinaagi sa usa ka pagpadayag nga gihatag ngadto ni Joseph Smith [tan-awa sa D&P 27:2]

Unsa ang girepresentar sa pan? (Lawas ni Jesukristo. Tan-awa sa Mateo 26:26; 3 Nephi 18:6–7.)
Unsa ang girepresentar sa tubig? (Dugo ni Jesukristo. Tan-awa sa Mateo 26:27–28; 3 Nephi 18:8–11.)
Ngano nga ang lawas ug dugo sa Manluluwas makahuluganon kanato? (Samtang tubagon sa mga estudyante kini nga pangutana, kinahanglan nga ilang hisgutan ang pisikal nga pag-antus ug pagkamatay sa Manluluwas diha sa krus. Kinahanglan ilang hisgutan ang Iyang Pagkabanhaw, dihang ang Iyang lawas nahiusa sa Iyang espiritu tulo ka adlaw human Niya giangkon ang kamatayon diha sa Iyang Kaugalingon. Kinahanglan usab nga ilang hisgutan ang Iyang hilabihang espiritwal nga pag-antus ug panghingutas sa dihang gidala Niya diha sa Iyang Kaugalingon ang atong mga sala, naghimo nga ang Iyang dugo miagas gikan sa matag lungag sa panit. Tungod kay gidala Niya diha sa Iyang Kaugalingon ang pisikal nga kamatayon, ang tanang mga tawo mabanhaw. Tungod kay Siya nag-antus alang sa atong mga sala, kita mapasaylo sa atong mga sala kon kita maghinulsol.)

Isulat ang mosunod nga dili kompleto nga pahayag diha sa pisara: Ang mga timaan sa sakrament nagtabang kanato sa paghinumdom … Pangutan-a ang mga estudyante kon unsaon nila sa pag-summarize kining importanting katuyoan sa sakrament. Dayon kompletoha ang kamatuoran diha sa pisara sama sa mosunod: Ang mga timaan sa sakrament nagtabang kanato sa paghinumdom sa Pag-ula ni Jesukristo.

Dapita ang mga estudyante sa pagpamalandong sa mosunod nga pangutana nga gipangutana ni Elder David B. Haight sa Korum sa Napulog Duha ka mga Apostoles:

“Unsay atong gihimo isip mga miyembro sa Simbahan sa paghinumdom sa atong Ginoo ug Manluluwas, sa Iyang sakripisyo, ug sa atong pagkautangan ngadto Kaniya?” (“Remembering the Savior’s Atonement,” Ensign, Apr. 1988, 7).

Unsa ang atong mabuhat aron matutukan ang paghinumdom sa Pag-ula panahon sa sakrament?
Unsa ang inyong nasinati sa dihang sinsero ninyong gipamalandong ang Pag-ula sa Manluluwas panahon sa sakrament?

Human ang mga estudyante makigbahin sa ilang mga panabut, dapita sila sa pagsulat diha sa mga notebook o mga scripture study journal og usa ka paagi nga matutok ang ilang mga hunahuna diha sa Pag-ula sa sunod nilang oportunidad sa pag-ambit sa sakrament. (Mahimo nimong dapiton ang pipila ka estudyante sa pagpakigbahin unsay ilang gisulat.)

Aron matabangan ang mga estudyante sa pagsabut sa dugang nga mga katuyoan sa sakrament, i-drowing ang mosunod nga tsart diha sa pisara sa dili pa magklase, dili ilabut ang mga tubag diha sa parentises. Dapita ang mga estudyante sa pagkopya sa tsart diha sa mga notebook o mga scripture study journal.

Unsay akong gipakigsaad nga buhaton	Unsay akong gituohan nga maoy kahulugan sa pagtuman niini nga bahin sa akong pakigsaad	Unsay akong mabuhat sa paghupot niining bahin sa akong pakigsaad
(Andam sa pagdala diha sa akong kaugalingon sa ngalan sa Ginoo)
(Kanunay maghinumdom Kaniya)
(Maghupot sa Iyang mga sugo)

Pahinumdumi ang mga estudyante nga samtang kita nag-ambit sa sakrament, naghimo kita og mga pakigsaad, o sagradong mga pakigsabut, uban sa Dios. Dapita ang mga estudyante sa pagribyu og hilum sa Moroni 4:3. Diha sa unang kolum sa tsart ipasulat nila ang tulo ka mga saad nga ilang himoon kon sila moambit sa sakrament. Hangyoa sila sa pagtsek sa ilang mga tubag uban sa usa nga naglingkod tupad nila. Dayon dapita sila sa pagsulat sa ikaduhang kolum sa tinagsa. Human sa igong panahon, dapita ang pipila ka mga estudyante sa pagpakigbahin sa unsay ilang gisulat. Samtang ang mga estudyante nakigbahin unsay ilang nasulat, gamita ang pipila o ang tanan sa mosunod nga materyal aron matabangan sila sa pagpalawom sa ilang pagsabut sa matag bahin sa pakigsaad.

Aron matabangan ang mga estudyante sa pagpalawom sa ilang pagsabut sa unsay kahulugan sa pagdala diha sa atong mga kaugalingon sa ngalan ni Jesukristo, dapita ang usa ka estudyante sa pagbasa sa mosunod nga pahayag ni Presidente Henry B. Eyring sa Unang Kapangulohan:

“Nagsaad kita sa pagdala sa Iyang ngalan diha kanato. Kana nagpasabut nga kita kinahanglan gayud nga makakita sa atong kaugalingon ingon nga Iya. Ato Siyang unahon diha sa atong mga kinabuhi. Kita gusto sa unsay Iyang gusto kay sa unsay atong gusto o unsay gitudlo sa kalibutan nga atong gustohon” (“That We May Be One,” Ensign,, May 1998, 67).

Ipasabut nga kon kita nagsaksi sa atong pagkaandam sa pagdala diha sa atong mga kaugalingon sa ngalan ni Jesukristo, kita nagpasalig sa pagpuyo isip Iyang mga disipulo. Nagsaad kita nga dili nato pakaulawan o sawayon ang Iyang ngalan. Nagpasalig kita sa pagserbisyo Kaniya ug sa atong isigkatawo. Nagpakita usab kita nga andam kita nga mailhan uban Kaniya ug sa Iyang Simbahan.

Giunsa nimo sa pagpaningkamot nga ikapakita ang imong pagkaandam sa pagdala diha sa imong kaugalingon ang ngalan sa Ginoo? Unsay epekto nga nahimo niini sa imong kinabuhi?

Dapita ang mga estudyante nga itandi ang pag-ampo alang sa pan diha sa Moroni 4:3 ngadto sa pag-ampo alang sa bino diha sa Moroni 5:2. Pangutan-a sila kon unsa nga mga kalainan ug mga pagkaparehas ang ilang namatikdan. Ipasabut nga ang saad nga “sa kanunay mahinumdom kaniya” makita sa duha ka mga pag-ampo.

Sa imong hunahuna unsa ang gipasabut sa “kanunay mahinumdom kaniya”?

Dapita ang usa ka estudyante sa pagbasa sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles. Hangyoa ang klase sa pagpaminaw ug sa pag-ila kon unsa ang atong mahimo aron sa pagtabang kanato nga sa kanunay mahinumdom sa Manluluwas.

“Kinahanglang unahon nato ang pagpahimutang sa mga butang nga mahimong posible ang kanunay nga paghinumdom Kaniya—kanunay nga pag-ampo ug pagtuon sa kasulatan, mahunahunaon nga pagtuon sa apostolikanhon nga mga pagtulun-an, senimana nga pagpangandam sa pag-ambit sa sakrament sa takus nga paagi, pagsimba sa Dominggo, ug sa pag-rekord ug paghinumdom unsa ang gitudlo sa Espiritu ug sa kasinatian mahitungod sa pagkatinun-an.

“Ubang mga butang mahimong moabut sa inyong hunahuna ilabi na sa angay ninyo niining puntoha sa inyong kinabuhi. …

“… Ako makapamatuod nga sa paglabay sa panahon ang atong tinguha ug kapasidad sa kanunay nga paghinumdom ug pagsunod sa Manluluwas motubo. Kinahanglan kitang mapailubon nga maningkamot hangtud sa katapusan ug mag-ampo kanunay alang sa pag-ila ug sa balaan nga tabang nga atong gikinahanglan.” (“Kanunay Mohinumdom Kaniya,” Liahona, Abr. 2011, 23, paragraph 14, 15, ug 21).

Unsa ang imong nahimo aron “sa kanunay mahinumdom kaniya”?
Sa unsang paagi nga ang kanunay nga paghinumdom sa Manluluwas nakatabang kanato sa paghupot sa ubang mga bahin sa atong pakigsaad?
Sa inyong hunahuna nganong importante alang kanato ang matag semana nga pag-ambit sa sakrament?

Aron mahatagan og gibug-aton sa atong saad sa pagsunod sa mga sugo, dapita ang usa ka estudyante sa pagbasa sa mosunod nga pahayag gikan sa Alang sa Kalig-on sa mga Kabatan-onan:

“Ang Langitnong Amahan mihatag kaninyo og kabubut-on, ang abilidad sa pagpili sa matarung kay sa sayop ug sa paglihok alang sa inyong kaugalingon. “Sunod sa paghatag sa kinabuhi mismo, ang katungod sa pagdumala sa inyong kinabuhi mao ang usa sa labing mahinungdanong mga gasa sa Dios nganha kaninyo. Samtang ania sa yuta, kamo pagasulayan aron makita kon kamo mogamit ba sa inyong kabubut-on sa pagpakita sa inyong gugma alang sa Dios pinaagi sa pagsunod sa Iyang mga sugo” (alang sa Kalig-on sa mga Kabatan-onan [2011], 2).

Unsa ang imong buhaton matag adlaw aron matabangan ang imong kaugalingon sa pagsunod sa mga sugo sa Dios?

Human hisguti sa mga estudyante ang mga saad nga atong gibag-o pinaagi sa sakrament matag semana, hangyoa sila nga isulat diha sa ikatulong kolum sa tsart ang usa ka butang nga ilang buhaton sulod sa semana alang sa mas maayong paghupot sa matag bahin sa pakigsaad. (Dapita sila sa pagpakigbahain og pipila sa ilang mga ideya (apan siguroha nga ilang nasabtan nga dili nila ipakigabahin ang bisan unsa nga personal o pribado kaayo).

Ipasabut nga samtang kita naghupot sa mga pakigsaad nga atong gihimo uban sa Ginoo, nagsaad Siya sa pagpanalangin kanato (tan-awa sa D&P 82:10). Dapita ang mga estudyante sa pagsiksik sa Moroni 4:3 ug Moroni 5:2, nga mangita sa unsay gisaad sa Ginoo kanato kon kita magsunod sa mga saad nga atong gibag-o sa dihang miambit kita sa sakrament. Isulat ang mosunod nga dili kompleto nga pahayag diha sa pisara ubos sa tsart: Samtang matinud-anon kitang nagsunod sa pakigsaad sa sakrament … Dapita ang mga estudyante sa paghuman sa pahayag diha sa pisara basi sa unsay ilang nakat-unan gikan sa Moroni 4:3 ug Moroni 5:2. (Usa ka paagi sa paghuman sa pahayag mao ang mosunod: Samtang matinud-anon kitang nagsunod sa pakigsaad sa sakrament, kita kanunay nga makabaton sa Espiritu sa Ginoo uban kanato.)

Sa unsa nga paagi kini nga saad nga ang Espiritu kanunay nga makauban kanato takus sa atong mga paningkamot sa pagsunod niini nga pakigsaad?

Dapita ang usa ka estudyante sa pagbasa sa mosunod nga pamahayag ni Elder David A. Bednar sa Korum sa Napulog Duha ka mga Apostoles. Papaminawa ang klase kon unsay mahimo sa Espiritu alang kanato.

“Ang Espiritu sa Ginoo mahimo natong giya ug mopanalangin kanato og paggiya, panudlo, ug espirituhanong proteksyon sa panahon sa atong mortal nga panaw” (“Nga Kita Unta sa Kanunay Makabaton sa Iyang Espiritu uban Kanato,” Ensign o Liahona, Mayo 2006, 31).

Kanus-a kamo nakadawat og paggiya, direksyon, panudlo, o proteksyon tungod sa pakig-uban sa Espiritu Santo? Agi og dugang sa paghangyo sa mga estudyante sa pagpakigbahin og mga kasinatian, mahimo nimong ipakigbahin ang imong kaugalingon nga kasinatian.)
Matag semana atol sa sakrament kita adunay oportunidad sa paghunahuna kon unsa ka maayo ang atong pagsunod sa pakigsaad nga gihulagway diha sa sakrament nga mga pag-ampo. Sa unsa nga paagi kini nagtabang kanato sa atong mga paningkamot aron makabaton kanunay sa Espiritu uban kanato?
Samtang kamo namalandong kon unsay inyong nakat-unan karon mahitungod sa pag-ambit sa sakrament, unsa nga bahin sa mga pag-ampo sa sakrament ang makahuluganon kaayo kaninyo? Ngano?

Awhaga ang mga estudyante sa pagpamalandong sa Pag-ula sa Manluluwas samtang nag-ambit sila sa sakrament. Dapita sila sa pagribyu sa ilang mga tsart ug sa pagsunod niadtong ilang mga ideya alang sa pagsunod sa pakigsaad sa sakrament sa mas hingpit nga paagi. Pahinumdumi ang mga estudyante sa saad sa Ginoo ngari kanato kon kita magsunod niini nga pakigsaad: kita sa kanunay makabaton sa Iyang Espiritu uban kanato. Ipamatuod ang mga panalangin nga moabut sa atong kinabuhi samtang kita naghinumdom ug nagsunod sa pakigsaad nga atong gihimo matag semana kon kita nag-ambit sa sakrament.

Ribyu sa Scripture Mastery

Mahimo nimong i-iskedyul ang usa ka katapusang scripture mastery test o ribyu nga kalihokan aron matabangan ang mga estudyante sa paglig-on sa ilang kahanas sa pinili nga mga tudling sa Basahon ni Mormon. Pagdesider kon unsaon nimo sa pagtesting ang ilang kahibalo, ug pagplano og kalihokan nga motakdo niana nga katuyoan. Mahimo ka nga magmugna og pagpares-pares o fill-in the blank nga test nga may mga kapanguhaan o key words o mga sitwasyon, o mahimo nimong testingan ang mga estudyante kon unsa nila ka maayong nasag-ulo ang piho nga mga tudling. Lain nga paagi mao ang pag-assign sa matag estudyante sa pagtudlo og mubo nga leksyon o paghatag og pakigpulong gamit ang mga tudling sa scripture mastery isip nag-una nga kapanguhaan. Bisan unsa ang gusto nimong format para sa panapos nga kasinatian bahin sa mga scripture mastery passage, hatagi ang mga estudyante og panahon sa pagtuon ug pagpangandam. Ang gitas-on sa leksyon karon tingali mohatag og panahon sa pagsugod niini nga pagpangandam.