Leksyon 154: Moroni 6

Leksyon 154

Moroni 6

Pasiuna

Sa nagkaduol si Moroni sa paghuman sa iyang mga panulat diha sa mga palid, gipasabut niya ang pipila ka mga kwalipikasyon alang sa mga indibidwal nga pagabunyagan ngadto sa Simbahan. Dayon iyang gi-outline ang mga responsibilidad sa mga miyembro sa Simbahan sa pag-atiman sa usag usa. Gipasabut usab niya ang mga katuyoan sa mga miting sa Simbahan ug gihatagan og gibug-aton ang panginahanglan alang sa mga miting sa Simbahan nga ipahigayon pinaagi sa impluwensya sa Espiritu Santo.

Mga Sugyot alang sa Pagtudlo

Moroni 6:1–3

Nagpasabut si Moroni sa mga panginahanglan alang sa bunyag

Pahunahunaa ang mga estudyante nga sila adunay siyete anyos nga igsoon kinsa mag-otso anyos na sa pipila ka bulan. Pahunahunaa usab sila nga ang ilang mga ginikanan mihangyo kanila sa pagtudlo og leksyon sa family home evening kon unsaon sa pagpangandam alang sa bunyag. Dapita ang pipila ka mga estudyante sa pagsulti kon unsa ang ilang itudlo aron matabangan ang ilang manghud nga igsoon sa pagpangandam nga mabunyagan.

Ipasabut nga ang Moroni 6 naglangkob sa paghulagway ni Moroni sa mga panginahanglnon alang sa bunyag. Dapita ang mga estudyante sa pagbasa og hilum sa Moroni 6:1–3, mangita sa mga panginahanglanon alang sa bunyag. Dayon hangyoa ang mga estudyante sa pagpakigbahin kon unsa ang ilang nakit-an. Ikonsiderar ang pagpangutana sa mosunod:

Unsa sa inyong hunahuna ang kahulugan nga kadtong nanginahanglan nga mabunyagan gikinahanglan nga makapakita og “buhat nga angay nga sila [mahimong] takus niini”? (Sila kinahanglan nga magpuyo sa pagkamasulundon sa mga sugo sa Dios, magpakita nga sila andam sa paghimo ug pagsunod sa pakigsaad sa bunyag.)
Ngano kaha nga importante alang sa indibidwal nga magbaton og “usa ka masulub-on nga kasingkasing ug usa ka mahinulsulon nga espiritu” sa dili pa magpabunyag? (Mahimo nimong ipasabut nga ang mga pulong nga “usa ka masulub-on nga kasingkasing ug usa ka mahinulsulon nga espiritu” nagpasabut sa pagkamapainubsanon ug pagkaandam sa usa ka tawo sa paghinulsol ug pagsunod sa mga sugo sa Ginoo.)

Dapita ang usa ka estudyante sa pagbasa og kusog sa Moroni 6:3, ug hangyoa ang klase sa pag-ila kon unsa ang atong gipakigsaad nga buhaton diha sa bunyag. Ang mga estudyante kinahanglan nga moila sa mosunod nga kamatuoran: Pinaagi sa bunyag, kita nakigsaad sa pagdala diha sa atong mga kaugalingon sa ngalan ni Jesukristo ug sa pag-alagad Kaniya hangtud sa katapusan. (Mahimo nimong hangyoon ang mga estudyante sa paghinumdom kon unsa ang ilang nakat-unan sa milabay nga leksyon mahitungod sa unsay kahulugan sa pagdala diha sa atong mga kaugalingon sa ngalan ni Jesukristo.)

Gikan sa inyong kasinatian, ngano nga ang indibidwal kinsa gusto nga magpabunyag nagkinahanglan og determinasyon sa pag-alagad ni Kristo hangtud sa katapusan?
Unsa ang inyong nabuhat sa pagpadayon ug paglig-on sa inyong determinasyon sa pag-alagad sa Ginoo?

Moroni 6:4

Nagpasabut si Moroni kon unsaon sa pag-atiman ug sa pag-amuma sa espirituhanong paagi ang mga miyembro sa Simbahan

Sultihi ang mga estudyante nga human maghulagway sa mga panginahanglanon alang sa bunyag, gipasabut ni Moroni unsay gibuhat sa iyang panahon aron matabangan ang bag-ong binunyagan nga mga indibidwal nga magpabiling matinud-anon sa ilang mga pakigsaad. Dapita ang mga estudyante sa pagbasa og hilum sa Moroni 6:4, nga mangita sa unsay gibuhat sa mga miyembro sa Simbahan sa pagtabang sa bag-ong mga kinabig. Hangyoa ang mga estudyante nga moreport sa unsay ilang nakat-unan. Ilista sa pisara ang ilang mga tubag.

Hangyoa ang mga estudyante sa pag-summarize sa unsay gitudlo sa Moroni 6:4 mahitungod sa atong mga responsibilidad ngadto sa ubang miyembro sa Simbahan ilabi na sa bag-ong mga miyembro. (Sama pananglit, ang mga estudyante mahimong motubag og sama sa mosunod: Kita adunay responsibilidad sa paghinumdom sa ubang mga miyembro sa Simbahan ug sa pag-amuma kanila sa espirituhanong paagi pinaagi sa pulong sa Dios. Sila mahimo usab moingon nga kinahanglan nga magtinabangay kita nga magpadayong mabinantayon ngadto sa pag-ampo ug nga kita kinahanglan nga magtinabangay nga mosalig diha sa Manluluwas ug sa Iyang Pag-ula.)

Sa unsa nga paagi atong matuman ang atong responsibilidad sa paghinumdom sa usag usa?
Sa unsa nga paagi atong amumahan ang usag usa “sa maayong pulong sa Dios”?
Unsa nga mga panalangin ang moabut gikan sa pagka-naamumahan pinaagi sa pulong sa Dios?

Basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Kadaghanan sa mga tawo wala moanha sa simbahan sa pagpangita lamang og pipila ka bag-ong mga kamatuoran sa ebanghelyo o sa pakigkita og daang mga higala, bisan tuod kanang tanan importante. Sila mianha nga nagpangita og espirituhanong kasinatian. Gusto sila og kalinaw. Gusto sila nga ang ilang pagtuo malig-on ug ang ilang paglaum mabag-o. Gusto sila, sa daklit, nga maamumahan pinaagi sa maayong pulong sa Dios, pagalig-unon pinaagi sa mga gahum sa langit. Kita kinsa gitawag sa pagpamulong o pagtudlo o pagpangulo adunay obligasyon sa pagtabang nga mahatag kana, kutob sa labing maayo nga atong mahimo” (“A Teacher Come from God,” Ensign, Mayo 1998, 26).

Hangyoa ang mga estudyante sa pagkonsiderar sa mga tawo kinsa naghimo og mga paningkamot, o kinsa mihimo og paningkamot, sa paghinumdom ug sa pag-amuma kanila sa espirituhanong paagi. Pangutan-a sila kon nakahunahuna ba sila sukad, sama pananglit, mahitungod sa tanang mga indibidwal kinsa nag-ampo alang kanila, miandam og mga leksyon alang kanila, miawhag kanila sa ilang mga kalihokan diha sa Simbahan, ug mitabang kanila pinaagi sa mga hagit nga ilang giatubang. Dapita ang pipila ka mga estudyante sa pagpakigbahin kon sa unsa nga paagi sila napanalanginan tungod kay usa ka tawo naghinumdom kanila ug nag-amuma kanila pinaagi sa pulong sa Dios. Mahimo nimong ikonsiderar ang paghatag sa mga estudyante og panahon sa paghimo og mga sulat sa pagpasalamat sa mga tawo kinsang mga paningkamot nakatabang kanila.

Hangyoa ang mga estudyante sa pagkonsiderar og piho nga mga indibidwal kinsa gusto sa Ginoo nga ilang hinumduman o amumahan. Dapita ang mga estudyante sa pagsulat sa ilang mga notebook o mga scripture study journal unsay ilang mahimo aron mas maayo ang ilang pagtuman sa responsibilidad nga sila aduna ngadto sa ubang mga miyembro sa Simbahan. Awhaga sila sa paghatag og espesyal nga atensyon sa mga panginahanglan sa bag-ong mga miyembro.

Moroni 6:5–9

Naghulagway si Moroni sa mga katuyoan sa mga miting sa Simbahan ug sa unsa nga paagi ang mga miting gipahigayon

Hangyoa ang mga estudyante sa paghunahuna nga ang matag usa kanila usa ka ginikanan sa usa ka batan-ong lalaki ug batan-ong babaye kinsa, sulod sa milabay nga pipila ka mga semana, nag-ingon nga siya dili gusto nga mosimba tungod kay kini ingon og walay kahulugan ug laay. Dapita ang mga estudyante sa pagkonsiderar kon unsa kaha ang ilang isulti sa pag-awhag sa tin-edyer sa pagsimba ug kon unsaon kaha nila pagtabang siya sa pagsabut sa husto nga mga rason sa pagsimba kanunay.

Isulat sa pisara ang mosunod nga dili kompleto nga pamahayag:

Isip mga miyembro sa Simbahan, kita gikinahanglan nga magtigum kanunay aron …

Dapita ang usa ka estudyante sa pagbasa og kusog sa Moroni 6:5–6. Hangyoa ang klase sa pagsunod ug sa pagpangita og mga paagi sa pagkompleto sa pamahayag diha sa pisara. Samtang ang mga estudyante nagreport kon unsay ilang nakit-an, isulat ang ilang mga tubag diha sa pisara. Ang ilang mga tubag mahimong maglakip sa mosunod nga mga kamatuoran:

Isip mga miyembro sa Simbahan, kita gikinahanglan nga magtigum kanunay aron sa pagpuasa ug pag-ampo.

Isip mga miyembro sa Simbahan, kita gikinahanglan nga magtigum kanunay aron sa paglig-on sa usag usa sa espirituhanong paagi.

Isip mga miyembro sa Simbahan, kita gikinahanglan nga magtigum kanunay aron sa pag-ambit sa sakrament agi og paghinumdom ni Jesukristo.

Si Elder Dallin H. Oaks sa Korum sa Napulog Duha ka mga Apostoles mipakigbahin og tipik sa usa ka sulat gikan sa usa ka higala kinsa nakakat-on kon unsaon sa pagpangita og hingpit nga kalipay pinaagi sa pagsimba:

“Sa mga tuig nga milabay, giusab nako ang akong kinaiya mahitungod sa pagsimba. Dili na ako mosimba alang sa akong kaayohan, apan sa paghunahuna sa uban. Ako nagsiguro sa pagtimbaya sa mga tawo kinsa naglingkod nga nag-inusara, sa pag-abi-abi og mga bisita, … sa pagboluntaryo og buluhaton. …

“Sa ato pa, miadto ko sa Simbahan kada semana uban sa tuyo nga mahimong aktibo, dili kay mag-urong lang, ug mihimo og positibo nga kalainan sa mga kinabuhi sa uban. Isip sangputanan, ang akong pagtambong sa mga miting sa Simbahan mas makalingaw pa gayud ug may katagbawan” (gikutlo gikan sa “Dili Hinakog nga Pagserbisyo,” Ensign o Liahona, Mayo 2009, 96).

Samtang maghunahuna ka mahitungod sa mga panginahanglan sa mga estudyante sa imong klase, ikonsiderar ang pagpangutana sa pipila o sa tanang mga pangutana aron sa pagtabang nila sa pagtuki ug sa paggamit sa mga baruganan nga ilang nahibaloan gikan sa Moroni 6:5–6:

Unsa nga mga kasinatian ang nagtudlo kanimo sa importansya sa pag-ampo ug pagpuasa uban sa mga miyembro sa imong ward o branch?
Unsa kaha ang buot ipasabut sa mga pulong nga atong gikinahanglan ang “pagpakigsulti sa usag usa mahitungod sa kaayohan sa [atong] mga kalag”? (Moroni 6:5). Unsaon nato pagbuhat niini diha sa simbahan?
Sa unsa nga paagi kaha ang atong kasinatian sa simbahan ma-impluwensyahan kon kita mosimba uban sa tinguha sa paglig-on sa uban sa espirituhanong paagi?
Unsa ang pipila ka mga butang nga atong mahinumduman mahitungod sa Manluluwas kon moambit kita sa sakrament? Sa unsa nga paagi nga ang pag-ambit sa sakrament nagtabang kanato sa paghinumdom Kaniya sa tibuok semana?
Sa unsa nga paagi nga ang pagsimba alang sa mga katuyoan nga atong nahisgutan nagtabang sa “pag-agak [kanato] sa matarung nga agianan”? (Moroni 6:4). Unsay imong mabuhat aron maawhag ang ubang mga kabatan-onan sa pagtambong og mga miting sa Simbahan?

Basaha og kusog ang mosunod nga pahayag ni Presidente Joseph Fielding Smith:

“Walay dapit sa Zion alang sa makasasala nga tinuyo. Adunay dapit alang sa mahinulsulong makasasala, alang sa tawo kinsa mitalikod sa kadautan ug nangita alang sa kinabuhing dayon ug sa kahayag sa Ebanghelyo” (sa Conference Report, Abr. 1915, 120).

Dayon dapita ang mga estudyante sa pagbasa og hilum sa Moroni 6:7–8, nga mangita sa unsay “higpit nga gibantayan.” sa mga lider sa Simbahan sa panahon ni Moroni.” Dapita ang mga estudyante sa pagreport unsa ang ilang nakat-unan. Mahimo nimong ipasabut nga niini nga bersikulo, ang pulong nga “pagapapason” nagpasabut og pahimulag. Kon ang mga miyembro sa Simbahan makahimo og seryusong sala ug dili maghinulsol, mahimo sila nga ipahimulag, o mawad-an sa ilang pagkamiyembro sa Simbahan ug sa mga panalangin sa ilang mga pakigsaad.

Unsa ang pipila ka mga butang ang gihimo sa mga lider sa Simbahan karon aron sa pagtabang kanato sa paglikay sa kadautan?
Sumala sa Moroni 6:8, unsa nga saad ang gihatag ngari kanato kon kita sa sinsero nga paagi maghinulsol sa atong mga sala? (Kon kanunay kitang maghinulsol ug mangayo og pasaylo uban ang tinuod nga katuyoan kita pasayloon.)

Hangyoa ang mga estudyante sa pagkonsiderar sa mga oportunidad nga kinahanglan ilang bation ang Espiritu Santo atol sa ilang regular nga mga miting sa Simbahan inig ka Dominggo (sama pananglit, panahon sa mga pag-ampo, panahon sa sakrament, samtang ang mga miyembro naghatag og mga pakigpulong o nagtudlo, samtang nag-awit sa mga himno, o samtang namalandong og kasulatan atol sa leksyon). Dapita ang mga estudyante sa pagbasa og kusog sa Moroni 6:9. Hangyoa ang klase sa pagsunod ug sa pag-ila kon unsa ang tahas sa Espiritu Santo sa atong mga miting.

Unsa nga kamatuoran ang atong makat-unan gikan sa Moroni 6:9 mahitungod sa unsa nga paagi kinahanglan nga ipahigayon ang mga miting sa Simbahan? (Ang mga miting sa Simbahan kinahanglan nga ipahigayon pinaagi sa gahum sa Espiritu Santo.)
Kanus-a ninyo gibati nga ang miting sa Simbahan gidumala sa gahum sa Espiritu Santo?

Aron ang mga estudyante matabangan kon sa unsa nga paagi kini nga kamatuoran maggamit ngadto sa tanang mga aspeto sa mga miting sa atong Simbahan, hangyoa sila nga maghunahuna diha sa ilang mga kaugalingon nga anaa sila sa posisyon sa mga indibidwal sa mosunod nga mga sitwasyon. (Mahimo nimong isulat kini sa pisara sa wala pa ang klase o andamon kini isip usa ka handout.) Dapita ang mga estudyante sa pagpasabut kon sa unsa nga paagi ang baruganan nga ilang nailhan sa Moroni 6:9 mahimong gamiton sa matag usa niini nga mga sitwasyon.

Gihangyo ka sa paghatag og pakigpulong sa sakrament miting mahitungod sa Pag-ula ni Jesukristo.
Gihangyo ka sa pagplano og musikal nga presentasyon alang sa umaabut nga miting sa sakrament.
Naglingkod ka sa usa ka miting sa pagpamatuod ug gibati ang pag-aghat sa pagpakigbahin sa imong pagpamatuod, apan dili ka sigurado kon unsa ang imong kinahanglang isulti.

Pahinumdumi ang mga estudyante nga sa sinugdanan sa leksyon, naghangyo ka kanila mahitungod kon unsa kaha ang isulti sa mga ginikanan sa pag-awhag sa usa ka batan-ong lalaki o babaye aron mosimba. Sa pagtapos sa leksyon, pangutan-a ang mga estudyante kon unsa kaha ang ilang gihunahuna nga ipakigbahin. Dayon ipakigbahin ang imong pagpamatuod mahitungod sa mga panalangin sa pagsimba ug bisan unsa nga baruganan nga inyong nahisgutan karong adlawa.

Komentaryo ug Background nga Impormasyon

Moroni 6:2. “Usa ka masulub-on nga kasingkasing ug usa ka mahinulsulon nga espiritu”

Si Elder D. Todd Christofferson sa Korum sa Napulog Duha ka mga Apostoles mipasabut kon unsa ang gipasabut sa pagtanyag og masulub-on nga kasingkasing ug usa ka mahinulsulon nga espiritu ngadto sa Ginoo:

“Sa inyong pagtinguha sa panalangin sa konbersyon, inyong mahalad ngadto sa Ginoo ang gasa sa inyong masulub-on o mabasulon nga kasingkasing ug sa inyong mahinulsulon, o masulundon nga espiritu. Sa tinuod lang, mao kini ang gasa sa inyong kaugalingon—kon unsa gayud kamo ug kon unsa gayud ang inyong maabut” (“Kon Ikaw Makabig,” Ensign o Liahona, Mayo 2004, 12).

Moroni 6:4. “Nalimpyo pinaagi sa gahum sa Espiritu Santo”

Madawat nato ang balaang gahum sa Pag-ula sa Manluluwas pinaagi sa pakig-uban sa Espiritu Santo (tan-awa sa Nephi 27:19–20; Moroni 6:4). Si Elder Bruce R. McConkie sa Korum sa Napulog Duha ka mga Apostoles mipasabut:

“Ang mga sa sala gilimpyohan dili sa mga tubig sa bunyag, sama sa pinasumbingay natong pagkasulti apan kini kon atong madawat ang Espiritu Santo. Ang Balaang Espiritu sa Dios ang mopapas sa pagkakalibutanon ug magdala kanato ngadto sa usa ka kahimtang sa pagkamatarung. Mamahimo kita nga limpyo kon dawaton gayud nato ang pakigdait ug pakig-uban sa Espiritu Santo. Niana dayon nga ang sala ug ang hugaw ug ang dautan maugdaw sa atong mga kalag ingon og daw kalayo. Ang bunyag sa Espiritu Santo mao ang bunyag sa kalayo” (A New Witness for the Articles of Faith [1985], 290; tan-awa usab ang pahina 239).

Moroni 6:4. Ang atong katungdanan sa pag-amuma sa usag usa

Si Presidente Henry B. Eyring sa Unang Kapangulohan mipakigbahin sa mosunod nga kasinatian:

“Ako nakakita og daghang magbalantay kinsa nagpakaon sa ilang mga panon. Ang usa mao ang presidente sa korum sa mga deacon. Usa sa iyang mga miyembro sa korum nagpuyo duol sa akong panimalay. Kanang silingan nga batang lalaki wala na gyud makatambong og miting sa korum ni nakabuhat og bisan unsa sa mga miyembro sa iyang korum. Ang iyang ama-ama dili miyembro, ug ang iyang inahan wala magsimbahan.

“Ang presidency sa iyang korum sa mga deacon nagkita sa council usa ka buntag sa Dominggo. … Diha sa ilang miting sa presidency, kadtong mga 13-ang panuigon nga mga magbalantay nahinumdom sa batang lalaki kinsa wala gayud moanha. Giistoryahan nila ang mahitungod sa dako niyang panginahanglan sa unsay ilang nadawat. Gi-assign sa presidente ang iyang counselor sa pagpangita nianang nahisalaag nga karnero.

“Nakaila ko sa counselor, ug nahibalo ako nga siya maulawon, ug ako nahibalo sa kalisud sa buluhaton, busa nagtan-aw ako uban ang katingala pinaagi sa akong atubangan nga bintana samtang ang counselor mibaktas agi sa akong panimalay, misaka sa dalan padulong ngadto sa panimalay sa batang lalaki kinsa wala gayud sukad mosimba. Ang mga kamot sa magbalantay diha sa iyang mga bulsa. Ang iyang mga mata diha sa yuta. Milakaw siya og hinay, sama sa imong buhaton kon dili ka sigurado nga maabut nimo ang imong gusto kon asa ka padulong. Sa 20 minutos o maingon-ingon, mibalik siya sa dalan kauban ang nawala nga deacon naglakaw diha sa iyang kilid. Kana nga sitwasyon gibalik-balik sulod sa pipila ka Dominggo. Dayon ang batang lalaki kinsa nawala ug nakit-an mibalhin.

“… Katuigan ang milabay, didto ko sa usa ka stake conference, kontinente ang gilay-on gikan sa akong nahimutang kon diin kana nga presidency magmiting sa council. Usa ka ubanong lalaki miduol kanako ug sa hinay miingon,‘Ang akong apo nga lalaki mipuyo sa inyong ward mga tuig ang milabay.’ Uban ang kalumo, miistorya siya kanako kabahin sa kinabuhi nianang bata nga lalaki. Ug unya nangutana siya kon ako bang makit-an kadtong deacon kinsa milakaw og hinay saka niadto nga dalan. Ug siya nagduhaduha kon mapasalamatan ko ba siya ug maistoryahan siya nga ang iyang apo nga lalaki, karon dako na, makahinumdom gihapon” (“Watch with Me,” Ensign, Mayo 2001, 38–39).

Moroni 6:4. Paglig-on sa bag-ong mga kinabig

Giawhag ni Presidente Gordon B. Hinckley ang tanang miyembro sa Simbahan, lakip ang mga kabatan-onan, sa pag-amuma ug paglig-on niadtong kinsa nagpasakop sa Simbahan:

“Dili sayon kining butanga nga mahimong miyembro niini nga Simbahan. Sa kadaghanan nga sitwasyon kini naglakip sa pagbiya sa daang nabatasan, pagtalikod sa karaang mga higala ug mga kauban, ug pagsulod ngadto sa usa ka bag-o nga kapunongan diin lahi ug daw lisud.

“Uban sa nagkadaghan nga mga kinabig, kinahanglan gayud kitang mohimo og dugang nga paningkamot sa pag-abag kanila samtang misulay sila sa pagsunod sa mga sugo. Ang matag usa kanila nagkinahanglan og tulo ka butang: usa ka higala, usa ka responsibilidad, ug pag-amuma pinaagi sa ‘maayo nga pulong sa Dios’ (Moro. 6:4). Kini atong katungdanan ug oportunidad ang paghatag niini nga mga butang. …

Kini buhat alang sa tanan. Kini buhat alang sa mga home teacher ug visiting teacher. Kini buhat alang sa bishopric, alang sa mga korum sa priesthood, alang sa Relief Society, sa young men ug young women, bisan sa Primary.

“Didto ako sa usa ka fast and testimony Sunday nga miting sa milabay lamang nga Dominggo. Usa ka 15 o 16 anyos nga batang lalaki ang mibarug atubangan sa kongregasyon ug miingon nga siya nakahukom nga magpabunyag.

“Dayon sa tagsa-tagsa ang batang mga lalaki sa korum sa mga teacher miduol sa mikropono sa pagpahayag sa ilang gugma alang kaniya, sa pagsulti kaniya nga siya naghimo sa hustong butang, ug sa pagsiguro kaniya nga sila modapig kaniya ug motabang kaniya. Nindot kaayo kini nga kasinatian nga madungog kadtong batan-ong mga lalaki nga nagsulti sa mga pulong sa pagdayeg ug pag-awhag sa ilang higala” (“Converts and Young Men,” Ensign, Mayo 1997, 47–48).