Moroni 7:20–10:34 (Unit 32)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang gitun-an nila ang Moroni 7:20–10:34 (unit 32) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Espiritu Santo samtang imong ikonsiderar ang mga panginahanglan sa imong mga estudyante.

Day 1 (Moroni 7:20–48)

Samtang gipadayon sa mga estudyante ang ilang pagtuon sa wali ni Mormon ngadto sa mga katawhan diha sa sinagoga, nakat-unan nila ang importanting mga baruganan mahitungod sa hugot nga pagtuo, paglaum, ug gugmang putli: Samtang kita nagpakita og hugot nga pagtuo diha ni Jesukristo, kita makahupot sa matag maayo nga butang. Kon kita magpakita og hugot nga pagtuo diha ni Jesukristo, makaangkon kita og paglaum pinaagi sa Iyang Pag-ula nga mabanhaw ngadto sa kinabuhing dayon. Kon kita mag-ampo ngadto sa Amahan uban sa tanang kusog sa kasingkasing ug magpuyo ingon nga tinuod nga mga manununod ni Jesukristo, kita mapuno sa gugmang putli.

Day 2 (Moroni 8–9)

Pinaagi sa pagtuon sa sulat gikan sa Mormon ngadto sa Moroni nga girekord diha sa Moroni 8, nakat-unan sa mga estudyante nga ang paghinulsol ug bunyag gikinahanglan alang sa tanan kinsa may tulubagon ug sarang nga makahimo og sala. Gitun-an usab nila ang doktrina nga ang gagmay nga mga bata naluwas pinaagi sa Pag-ula ni Jesukristo. Pinaagi sa pagtuon sa sulat nga girekord diha sa Moroni 9, nakat-unan sa mga estudyante nga kita kinahanglang maghago nga makugihon diha sa pag-alagad sa Dios bisan og kadtong atong gialagaran wala mahimuot. Agi og dugang, nakat-unan sa mga estudyante gikan sa mga ehemplo ni Mormon ug Moroni nga kon kita matinud-anon diha ni Jesukristo, Siya mobayaw kanato bisan og ang mga kalisud ug kadautan naglibut kanato.

Day 3 (Moroni 10:1–7, 27–29)

Samtang gitun-an sa mga estudyante ang panapos nga pagpamatuod ni Moroni, napahinumduman sila nga kon kita mangayo sa Dios diha sa hugot nga pagtuo ug uban sa tinuod nga katuyoan, makadawat kita og pagpamatuod sa Basahon ni Mormon ug ni Jesukristo pinaagi sa Espiritu Santo. Nakat-unan usab nila nga kadtong kinsa nakadawat sa Basahon ni Mormon may tulubagon ngadto sa Dios kon giunsa nila paggamit kini.

Day 4 (Moroni 10:8-26, 30-34)

Nakat-unan sa mga estudyante nga ang Dios naghatag og mga gasa sa Espiritu aron mapahimuslan sa Iyang mga anak. Nakat-unan usab nila nga kon kita adunay hugot nga pagtuo, kita makahimo sa pagbuhat unsay gusto sa Manluluwas nga atong buhaton. Gitun-an usab nila ang katapusang mga pulong ni Moroni diha sa Basahon ni Mormon, nga nagtudlo nga sa atong pagduol ngadto ni Jesukristo, kita mahimo nga putli ug hingpit pinaagi sa Iyang Pag-ula.

Pasiuna

Kini nga leksyon makatabang sa mga estudyante nga mas masabtan kon unsa ang gipasabut sa paghupot sa maayong mga butang. Mahatagan ang mga estudyante og higayon sa pagpasabut kon sa unsa nga paagi ang usa ka tawo makakat-on alang sa iyang kaugalingon nga ang Basahon ni Mormon tinuod. Sila usab makahimo sa pagpakigbahin sa ilang mga pagpamatuod sa Basahon ni Mormon ug paghisgot kon sa unsa nga paagi ang ilang mga pagpamatuod nalig-on niini nga tuig. Ang Moroni 7–9 naglangkob og mga sulat nga gilakip ni Moroni sa iyang basahon.

Mga Sugyot alang sa Pagtudlo

Moroni 7:20–48

Nagrekord si Moroni sa mga pagtulun-an ni Mormon sa hugot nga pagtuo diha ni Jesukristo, paglaum, ug gugma nga putli

Isulat ang mga pulong nga hikap ug paghupot diha sa pisara. Hangyoa ang usa ka estudyante sa pag-adto sa atubangan sa klasehanan ug sa pagpakita sa klase unsa ang gipasabut sa paghikap sa Basahon ni Mormon. Dayon hangyoa ang estudyante sa pagpakita unsa ang gipasabut sa paghupot sa Basahon ni Mormon.

Dapita ang mga estudyante sa pagbasa sa hilum sa Moroni 7:19 ug sa pagpangita unsay gisulti ni Mormon nga atong kinahanglan nga huptan. Dayon ipangutana ang mosunod:

Unsay gisulti ni Mormon nga atong huptan?
Unsa sa inyong hunahuna ang gipasabut sa “paghupot sa matag maayo nga butang”? (Tabangi ang mga estudyante sa pagsabut nga ang “matag maayong butang” maglakip sa matarung nga mga tumong, mga lihok, mga hunahuna, mga baruganan, ug mga butang.)

Ipasabut nga gipadayon ni Mormon ang pagtudlo kon sa unsa nga paagi kita makahimo nga “maghupot sa matag maayo nga butang.” Dapita ang pipila ka mga estudyante sa pagpuli-puli sa pagbasa og kusog gikan sa Moroni 7:20–22, 25. Hangyoa ang klase sa pagpangita sa tambag ni Mormon kon unsay kinahanglan gayud natong buhaton aron “maghupot sa matag maayo nga butang.”

Isulat ang mosunod nga dili kompleto nga pahayag diha sa pisara: Samtang kita … , makahupot kita sa matag maayo nga butang.

Pangutana: Human mabasa kini nga mga bersikulo, unsaon ninyo pagkompleto kini nga pahayag? (Usa ka tubag nga mahimong ihatag sa mga estudyante mao nga samtang kita nagpakita og hugot nga pagtuo diha ni Jesukristo, kita makahupot sa matag maayo nga butang.)

Pahinumdumi ang mga estudyante nga niini nga kapitulo mipamatuod usab si Mormon nga pinaagi sa hugot nga pagtuo diha ni Jesukristo mahimo kitang mapuno sa gasa sa gugma nga putli (tan-awa sa Moroni 7:48). Dapita ang klase sa pagsulay og recite sa scripture mastery passage nga Moroni 7:45, 47–48 nga gisag-ulo. Ang mga miyembro sa klase makabasa usab og kusog sa mga bersikulo.

Ipangutana ang mosunod:

Unsa ang inyong paborito nga mga pulong sa Moroni 7:45, 47–48? Nganong kana nga mga pulong makahuluganon nganha kaninyo?
Kanus-a kamo nakakita og usa ka tawo nga nagmanggiloy-on, o kanus-a ninyo gibati nga nagtabang kaninyo ang Ginoo nga magmanggiloy-on? (Mahimo ninyong ipakigbahin ang inyong mga tubag niini nga mga pangutana.)

Moroni 10

Nag-awhag si Moroni kanato sa pag-angkon og usa ka pagpamatuod sa Basahon ni Mormon ug sa pagduol ngadto ni Jesukristo

Ribyuha uban sa mga estudyante ang katuyoan sa sukaranang bato diha sa arko. Hisguti kon sa unsa nga paagi ang ideya sa usa ka sukaranang bato may kalabutan sa Basahon ni Mormon. (Mahimo nimong i-refer ang mga estudyante ngadto sa hulagway diha sa unit 1, day 3 sa ilang mga giya sa pagtuon.) Dapita ang mga estudyante sa pagpakigbahin kon sa unsa nga paagi ang Basahon ni Mormon mao ang sukaranang bato sa ilang mga pagpamatuod.

Dapita ang usa ka estudyante sa pagbasa sa Moroni 10:3–5. Hangyoa ang mga estudyante sa paghunahuna nganong kini nga mga bersikulo importante nga ipakigbahin sa tanang mga tawo, miyembro sila o dili sa atong Simbahan. Dapita ang pipila ka mga estudyante sa pagpakigbahin sa ilang mga hunahuna, ug dayon pangutan-a: Unsay gisulti ni Moroni nga atong kinahanglan nga buhaton aron mahibalo sa kamatuoran? (Samtang nagtubag ang mga estudyante, mahimo nimong isulat ang ilang mga tubag sa pisara. Ipasabut nga kini nga mga tubag mga paagi nga kita makapangita diha sa hugot nga pagtuo aron mahibalo “sa kamatuoran sa tanang mga butang.”)

Dapita ang usa ka estudyante sa pagbasa sa Moroni 10:6–7, ug dayon pangutan-a: Agi og dugang ngadto sa pagkatinuod sa Basahon ni Mormon, unsa pa ang atong mahibaloan pinaagi sa gahum sa Espiritu Santo? (Ang Espiritu Santo mopanghimatuod nga si Jesus mao ang Kristo.)

Isulat ang mosunod nga baruganan diha sa pisara: Nga kon kita mangayo sa Dios diha sa hugot nga pagtuo ug uban sa tinuod nga katuyoan, makadawat kita og pagpamatuod sa Basahon ni Mormon ug ni Jesukristo pinaagi sa Espiritu Santo.

Pahinumdumi ang mga estudyante nga si Moroni mibilin og katapusang pagdapit alang sa tanang mga tawo kinsa mobasa sa Basahon ni Mormon. Hangyoa ang usa ka estudyante sa pagbasa sa iyang pagdapit, nga makit-an diha sa Moroni 10:30, 32–33. Hangyoa ang mga sakop sa klase sa pagpangita og mga paagi nga kita “makaduol ngadto ni Kristo.” (Mahimo nimong isugyot nga ilang markahan unsay ilang nakit-an.) Dayon ipangutana ang mosunod:

Unsa nga pagdapit ang gihatag ni Moroni ngari kanato diha sa katapusan niining sagrado nga rekord?
Unsa nga mga pulong niini nga mga bersikulo ang nagtabang kaninyong mahibalo unsaon sa “pagduol ngadto ni Kristo”?
Unsa nga mga baruganan ang inyong makat-unan gikan niini nga mga bersikulo? (Ang mga tubag sa mga estudyante mahimong naglakip sa mosunod nga baruganan: Samtang kita moduol ngadto ni Kristo, kita mahimong putli ug hingpit pinaagi sa Iyang Pag-ula. Mahimo nimong isulat kini nga baruganan diha sa pisara.)
Unsa ang kahulugan niini nganha kaninyo nga kamo mahimo lamang nga hingpit pinaagi ni Jesukristo?

Dapita ang matag estudyante sa pagpili og usa sa mosunod nga mga pangutana ug sa paghunahuna og tubag niini. (Mahimo nimong i-display kini nga mga pangutana diha sa pisara o andamon kini diha sa usa ka handout sa wala pay klase.) Human sa igo nga panahon, hangyoa ang pipila ka mga estudyante sa pagpakigbahin sa ilang mga tubag ngadto sa klase.

Giunsa ninyo pagkahibalo nga ang Basahon ni Mormon tinuod?
Giunsa kamo pagtabang sa Manluluwas nga mahimong mas labaw kay sa kamo makahimo sa inyong kaugalingon lamang?
Kon inyong hinumduman ang inyong pagtuon sa Basahon ni Mormon niining tuiga, unsay usa ka butang nga gusto ninyong buhaton sa pagpalambo sa inyong pagtuon niini nga mga kasulatan?

Human ang mga estudyante makigbahin sa ilang mga tubag, mahimo kang makigbahin sa imong pagpamatuod sa Basahon ni Mormon ug sa Pag-ula ni Jesukristo. Agi og dugang, ipakigbahin sa mga estudyante ang imong pasalamat alang kanila ug sa ilang mga paningkamot sa pagtuon ug sa pagkat-on diha sa seminary niini nga tuig. Awhaga sila sa pagpadayon og basa sa mga kasulatan matag adlaw ug sa pagpaninguha sa paggamit unsay ilang nakat-unan diha sa ilang mga kinabuhi.