Ether 13–Moroni 7:19 (Unit 31)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estuyante samtang gitun-an nila ang Ether 13–Moroni 7:19 (unit 31) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang sa pipila niini nga mga doktrina ug mga baruganan. Sunda ang mga pag-aghat sa Espiritu Santo samtang imong ikonsiderar ang mga panginahanglan sa imong mga estudyante.

Day 1 (Ether 13–15)

Gisalikway sa mga Jaredite ang propeta nga si Ether ug mipadayon sa pagkadautan ug pakiggubat hangtud sa katapusan gilaglag nila ang usag usa. Gikan niini nga istorya, nakat-unan sa mga estudyante nga kon atong isalikway ang mga pasidaan sa Ginoo nga maghinulsol, ang Iyang Espiritu mobiya ug si Satanas makaangkon og gahum sa atong mga kasingkasing. Ang mga estudyante nahimo usab nga nakahibalo nga ang kasuko ug panimalos naggiya kanato sa paghimo og mga pagpili nga makasakit sa atong mga kaugalingon ug sa uban. Sa iyang istorya sa pagkalaglag sa mga Jaredite, gihatagan ni Moroni ang iyang mga tigbasa og paglaum pinaagi sa pagpahayag nga ang Bag-ong Jerusalem, o Zion pagatukuron sa ulahing mga adlaw.

Day 2 (Moroni 1–5)

Samtang si Moroni naglatagaw alang sa kaluwasan sa iyang kinabuhi, mirekord siya og dugang impormasyon sa priesthood ug sa mga ordinansa sa ebanghelyo. Gisulat niya nga ang pagtugyan sa gasa sa Espiritu Santo ug ang pag-orden ngadto sa buhatan sa priesthood gihimo pinaagi sa pagpandong sa mga kamot pinaagi niadtong anaay awtoridad. Ang pagtagad ni Moroni sa sakrament naghatag sa mga estudyante og higayon sa pagpamalandong kon sa unsa nga paagi ang mga simbolo sa sakramento makatabang kanila sa paghinumdom sa Pag-ula ni Jeukristo. Gipahinumduman usab sila nga samtang matinud-anon silang magsunod sa mga pakigsaad kalabut sa sakrament, kanunay sila nga makabaton sa Espiritu sa Ginoo nga uban kanila.

Day 3 (Moroni 6)

Gihatagan og gibug-aton ni Moroni ang importansya sa bunyag, pakigdait diha sa Simbahan, ug sa pagdumala og mga miting sa Simbahan pinaagi sa Espiritu Santo. Nakat-unan sa mga estudyante nga pinaagi sa bunyag kita nakigsaad sa pagdala diha sa atong mga kaugalingon sa ngalan ni Jesukristo ug sa pag-alagad Kaniya hangtud sa katapusan. Nakat-unan usab nila ang mahitungod sa responsibilidad nga sila aduna sa pag-amuma sa espirituhanong paagi sa ubang mga miyembro sa Simbahan pinaagi sa pag-uban kanunay aron sa pagpuasa ug pag-ampo ug sa pag-ambit sa sakrament agig paghinumdom ni Jesukristo. Agi og dugang, nakat-unan sa mga estudyante nga kon kanunay kitang maghinulsol ug mangayo og kapasayloan uban sa tinuod nga katuyoan, kita pasayloon.

Day 4 (Moroni 7:1–19)

Girekord ni Moroni ang usa ka pakigpulong nga gihatag sa iyang amahan, kinsa mitudlo nga aron mapanalanginan sa atong maayong mga buhat, kinahanglan gayud nga atong buhaton kadtong mga buhat uban ang tinuod nga katuyoan. Niini nga pakigpulong gitudlo usab ni Mormon kon sa unsa nga paagi kita makahimo og matarung nga mga paghukom. Nadiskobrehan sa mga estudyante nga bisan unsa ang moabut nga gikan sa Dios nagdapit kanato sa pagbuhat og maayo ug sa paghigugma ug sa pag-alagad sa Dios, ug bisan unsa ang naghaylo kanato sa pagbuhat og dautan ug sa pakig-away batok sa Dios nagagikan sa yawa. Nangamuyo si Mormon sa iyang mga tigpaminaw sa pagpangita nga makugihon sa Kahayag ni Kristo, nga makahatag kanila og gahum sa pag-ila tali sa maayo ug sa dautan.

Pasiuna

Ang leksyon karong adlawa naghatag og gibug-aton sa mga rason ug panginahanglan alang sa matag usa kanato sa pagtambong og mga miting sa Simbahan. Kini nag-awhag usab sa mga estudyante sa ilang determinasyon sa pag-ila tali sa maayo ug sa dautan ug sa pagpangita nga makugihon sa Kahayag ni Kristo aron makahimo og maayo nga mga paghukom.

Mga Sugyot alang sa Pagtudlo

Ether 14–15

Nagrekord si Moroni sa katapusan sa Jaredite nga sibilisasyon

Isulat ang 2,000,000 diha sa pisara. Hangyoa ang mga estudyante sa paghunahuna sa gidaghanon nga duha ka milyon nga tawo itandi sa gidaghanon sa mga tawo nga nagpuyo sa ilang siyudad. Dapita ang usa ka estudyante sa pagbasa og kusog sa Ether 15: 1–2 samtang ang klase nagribyu sa unsay nahitabo sa duha ka milyong mga Jaredite.

Pangutan-a kon may mga estudyante bang makasag-ulo sa mga panghitabo nga misangpot sa kalaglagan sa mga Jaredite ingon nga girekord diha sa Ether 14–15. Kon ang mga estudyante may kabalaka sa pagtubag, dapita sila sa pagribyu sa mosunod nga mga tudling sa kasulatan: Ether 14:5–10, 24; 15:1–6, 19, 22.

Ipangutana: Unsa ang pipila ka mga leksyon atong makat-unan gikan sa pagkalaglag sa mga Jaredite?

Kining duha ka mga kamatuoran gipatataw diha sa mga leksyon sa mga estudyante sulod sa semana: (1) Kon atong isalikway ang mga pasidaan sa Ginoo sa paghinulsol, ang Iyang Espiritu mobiya ug si Satanas makaangkon og gahum sa atong mga kasingkasing. (2) Ang kasuko ug panimalos naggiya sa mga tawo sa paghimo og mga pagpili nga makasakit sa ilang kaugalingon ug sa uban.

Ipangutana: Unsa ang pipila ka mga sitwasyon diin kini nga mga leksyon magamit sa kinabuhi sa usa ka batan-ong lalaki o batan-ong babaye karon?

Moroni 1–3

Si Moroni nagpamatuod nga siya dili molimud ni Kristo

Dapita ang usa ka estudyante sa pagbasa og kusog sa Moroni 1:1–4. Dayon ipangutana sa klase ang mosunod:

Ngano nga ang mga Lamanite mopatay unta ni Moroni?
Unsa ang gipakita niini mahitungod sa hugot nga pagtuo ug kaisug ni Moroni? Sa unsa nga paagi kita makapalambo og ingon ka lig-on nga pagpamatuod ni Jesukristo?

Moroni 4–6

Nagrekord si Moroni sa mga pag-ampo sa sakrament, ang mga kwalipikasyon alang sa bunyag, ug ang mga rason alang sa mga miting sa Simbahan

Isulat ang mosunod nga mga pulong diha sa pisara: Nganong mosimba ako inig ka Dominggo. Dapita ang mga estudyante sa pagpangita sa Moroni 4–6 ug pag-andam og usa- ngadto sa duha ka minuto nga tubag niini nga pahayag pinaagi sa paghimo og pipila ka mga note diha sa ilang mga scripture study journal. Awhaga sila sa paglakip diha sa ilang mga tubag og dili mominos og duha sa mosunod nga mga elemento (mahimo nimong isulat kini diha sa pisara o andamon kini diha sa usa ka handout):

Usa ka tudling sa kasulatan gikan sa Moroni 4–6 nga nagpasabut sa rason alang sa pag-uban diha sa simbahan.
Usa ka doktrina o baruganan nga nagpasabut kon nganong kita kinahanglan nga motambong og mga miting sa Simbahan.
Usa ka personal nga kasinatian nga nagpakita kon nganong kita kinahanglan nga motambong og mga miting sa Simbahan.
Usa ka personal nga pagpamatuod sa importansya sa pagtambong og mga miting sa Simbahan.

Sa higayon nga ang mga estudyante makabaton og igong panahon sa pag-andam sa ilang mga hunahuna, dapita ang pipila kanila sa pagpakigbahin sa ilang mga panabut ngadto sa klase.

Human ang mga estudyante nakigbahin sa unsay ilang nakat-unan, idugang ang imong pagpamatuod sa mga kamatuoran nga ilang nailhan ug sa importansya sa pag-uban kanunay diha sa mga miting sa Simbahan.

Moroni 7:1–19

Nagtudlo si Mormon kon unsaon sa paghukom tali sa maayo ug sa dautan

Sa dili pa magklase, pun-a og tubig ang usa ka tasa ug ang lain nga tasa sudli og tubig nga sinagulan og puti nga suka (o asin). Ang mga tasa kinahanglan nga parehas tan-awon. Pahibaloa ang klase nga ikaw may duha ka tasa nga tubig nga parehas tan-awon, apan ang usa niini matagamtam nga aslum (o parat). Paghangyo og usa ka boluntaryo sa pagdeterminar hain nga tasa adunay maayo nga tubig ug hain nga tasa adunay aslum (o parat) nga tubig (mahimo nilang buhaton kini pinaagi sa pagtilaw o sa pagsimhot niini).

Ipangutana: Unsaon nato pagkahibalo nga ang usa ka butang dautan kon dili gayud kini sulayan?

Ipasabut nga sa iyang rekord gilakip ni Moroni ang usa ka wali gikan sa iyang amahan, si Mormon, nga naghatag og panabut niini nga pangutana. Dapita ang usa ka estudyante sa pagbasa og kusog sa Moroni 7:11–13, 15–16. Hangyoa ang klase sa pagpili og dili mominos usa ka pulong nga importante kanila nga nagpasabut kon unsaon nato pag-ila tali sa maayo ug sa dautan. Hatagi ang pipila ka mga estudyante og oportunidad sa pagpakigbahin og mga pulong nga ilang napili.

Dapita ang usa ka estudyante sa pagbasa og kusog sa Moroni 7:19 , ug hangyoa ang klase sa pagpangita sa unsay gisulti ni Mormon nga kinahanglan natong buhaton aron mahibaloan ang maayo gikan sa adautan.

Ipangutana: Unsay gitambag ni Mormon kanato nga buhaton aron kita makaila tali sa maayo ug sa dautan?

Ang mga estudyante kinahanglan nga makaila sa mosunod nga baruganan: Samtang kita makugihong mangita sa Kahayag ni Kristo, makaila kita tali sa maayo ug sa dautan.

Pangutan-a ang mga estudyante sa mosunod:

Gikan sa inyong mga gitun-an niini nga semana, unsay inyong nasabtan bahin sa Kahayag ni Kristo?
Kanus-a ang Kahayag ni Kristo mitabang kaninyo sa pag-ila tali sa maayo ug sa dautan?

Hatagi ang mga estudyante og usa ka minuto o duha sa paglista sa ilang paboritong mga salida sa telebisyon, mga kanta, mga banda, mga Internite site, apps, mga video game, o personal nga mga butang. Dapita sila sa paggamit sa Moroni 7:16–19 sa pagdeterminar kon ang mga butang diha sa ilang lista nagtabang kanila nga mas maduol sa Dios o mas mapalayo gikan Kaniya.

Pahinumdumi ang mga estudyante sa pagdapit nga ilang nadawat diha sa ilang pagtuon niini nga semana aron sa pagpapha gikan sa ilang mga kinabuhi niadtong mga butang nga dili maayo ug nga “maghupot sa matag maayong butang” (Moroni 7:19). Mahimo nimong ipakigbahin ang imong kasinatian sa dihang imong gisunod ang Kahayag ni Kristo ug nakahimo ka sa pag-ila tali sa maayo ug sa dautan.

Sunod nga Unit (Moroni 7:20–10:34)

Dapita ang mga estudyante sa paghunahuna sa mosunod nga mga pangutana samtang magtuon sila sa sunod nga unit: Unsa ang gugma nga putli? Unsaon pagbaton sa usa ka tawo og gugma nga putli? Nganong dili kinahanglan ang mga bata o mga masuso nga bunyagan? Sa unsa nga paagi si Mormon ug si Moroni nagpabiling matinud-anon bisan og giliyokan sila sa pagkadautan? Unsa ang katapusang mga pulong ni Moroni? Nganong importante kini?