Leksyon 159
Moroni 10:1–7, 27–29
Pasiuna
Giawhag ni Moroni ang mga Lamanite ug ang uban kinsa mobasa sa iyang pagpamatuod sa pagpangayo sa Dios sa pagkumpirmar sa kamatuoran sa iyang mga pulong. Gitudlo niya nga ang Dios mopakita sa kamatuoran sa Basahon ni Mormon ug sa ka tinuod ni Jesukristo pinaagi sa gahum sa Espiritu Santo. Gipahayag usab ni Moroni nga siya makigkita kanato sa atubangan sa hukmanan sa Dios, diin ang Ginoo Mismo mopamatuod sa kamatuoran sa mga pulong ni Moroni. (Pahibalo: Mahimo kang mohatag og panahon sa katapusan sa leksyon aron ang mga estudyante makigbahin sa ilang mga pagpamatuod sa Basahon ni Mormon. Aron sa pagsiguro nga adunay igo nga panahon, pagpili sa mainampuong paagi sa mga porsyon niini nga leksyon nga labing mapuslan kaayo sa imong mga estudyante.)
Mga Sugyot alang sa Pagtudlo
Moroni 10:1–7
Nag-awhag si Moroni kanato sa pagbaton og pagpamatuod sa Basahon ni Mormon ug ni Jesukristo
Sa dili pa magsugod ang klase, pagdrowing diha sa pisara og hulagway sa arka nga may sukaranang bato (mahimo kang mo-refer ngadto sa hulagway nga gigamit sa leksyon 4). Sugdi ang leksyon pinaagi sa pag-refer ngadto sa hulagway.
-
Unsa ang katuyoan sa sukaranang bato sa arka?
-
Sa unsa nga paagi ang sukaranang bato may kalabutan sa Basahon ni Mormon? (Kon ang mga estudyante nagkinahanglan og tabang sa pagtubag niini nga pangutana, mahimo kang mosugyot nga basahon nila ang pahayag ni Propeta Joseph Smith diha sa ikaunom nga paragraph sa pasiuna sa Basahon ni Mormon.)
Dapita ang mga estudyante sa pagbasa og hilum sa katapusang paragraph sa pasiuna sa basahon ni Mormon. Sa dili pa sila mobasa, hangyoa sila sa pagpangita sa tulo ka mga kamatuoran nga mahibaloan sa usa ka tawo pinaagi sa pagbaton og pagpamatuod sa Basahon ni Mormon.
-
Ingon nga ang arka gipugngan og usa ka sukaranang bato, unsa ang ubang mga bahin sa atong mga pagpamatuod ang gilig-on pinaagi sa pag-angkon og pagpamatuod sa Basahon ni Mormon?
-
Nganong importante alang sa matag indibidwal ang pag-angkon og iyang kaugalingong pagpamatuod sa Basahon ni Mormon?
I-summarize ang Moroni 10:1–2 pinaagi sa pagpasabut nga mga 1,400 ka mga tuig sa wala pa madawat ni Propeta Joseph Smith ang bulawang mga palid, gitapos ni Moroni ang rekord sa iyang amahan pinaagi sa pagsulat sa iyang katapusan nga pag-awhag ngadto niadtong kinsa modawat sa Basahon ni Mormon sa ulahing mga adlaw. (Kini tingali makatabang sa pagpasabut nga ang pulong awhag nagkahulugan og gamhanang pagdasig o pag-aghat sa usa ka tawo. Kini nga pulong migawas og walo ka higayon diha sa Moroni 10.)
Ipasabut nga giawhag ni Moroni ang tanan kinsa nagdawat sa Basahon ni Mormon sa pagtinguha og pagpamatuod sa kamatuoran ug sa kabalaan niini. Dapita ang mga estudyante sa pagbasa og hilum sa Moroni 10:3–4, mangita og mga pulong nga naghulagway sa mga kinahanglanon aron sa pagbaton og pagpamatuod sa Basahon ni Mormon pinaagi sa Espiritu Santo. (Mahimo kang mosugyot nga markahan sa mga estudyante kini nga mga pulong samtang ila kining makit-an. Samtang ang mga estudyante moreport sa mga pulong nga ilang nailhan, isulat ang mga pulong diha sa pisara. Ang ilang mga tubag mahimong maglakip sa mosunod:
“Mobasa niini nga mga butang”
“Mahinumdom unsa ka maloloy-on ang Ginoo”
“Palandonga kini sa inyong mga kasingkasing”
“Mangutana sa kinasingkasing, ug uban sa tinuod nga katuyoan, nga may hugot nga pagtuo kang Kristo”
Aron matabangan nga mas makasabut ang mga estudyante kon unsay kinahanglan gayud nga buhaton sa usa ka tawo aron makadawat og saksi gikan sa Espiritu Santo nga ang Basahon ni Mormon tinuod, gamita ang mosunod nga mga ideya sa pagtudlo aron mahisgutan ang matag kinahanglanon nga gitudlo ni Moroni.
1. “Mobasa niini nga mga butang”
Gidapit kita ni Moroni nga “mobasa niini nga mga butang,”o mobasa sa Basahon ni Mormon. Dapita ang usa ka estudyante sa pagbasa og kusog sa mosunod nga istorya nga gisulti ni Elder Tad R. Callister sa Korum sa Kapitoan kon sa unsang paagi ang batan-ong babaye nakabenipisyo gikan sa pagbasa sa Basahon ni Mormon:
“Usa ka 14-anyos nga batang babaye … miingon nga naghisgot siya og relihiyon uban sa usa sa iyang amiga sa eskwelahan. Miingon kaniya ang iyang amiga, ‘Unsay imong relihiyon?’
“Mitubag siya, ‘Ang Simbahan ni Jesukristo sa mga Santos sa Ulahing mga Adlaw, o Mormons.’
“Ang iyang amiga mitubag, ‘Nakahibalo ko niana nga simbahan, ug nasayud ko nga dili kana tinuod.’
“‘Giunsa nimo pagkahibalo?’ mao ang tubag.
“‘Tungod kay,’ miingon ang iyang higala, ‘nagsiksik ko niini.’
“‘Nabasa ba nimo ang Basahon ni Mormon?’
“‘Wala,’ mao ang tubag. ‘Wala ko kabasa.’
“Dayon kining matahum nga batan-ong babaye mitubag, ‘Kon mao wala ka pa makasiksik sa akong simbahan, tungod kay akong nabasa ang matag pahina sa Basahon ni Mormon ug ako nasayud nga kini tinuod’” (“Ang Book ni Mormon—Basahon Gikan sa Dios,” Ensign o Liahona, Nob. 2011, 76).
-
Ngano nga ang pagbasa sa Basahon ni Mormon importante sa pag-angkon og pagpamatuod sa katinuod niini?
-
Sa unsa nga paagi nga ang pagbasa sa Basahon ni Mormon niini nga tuig milig-on sa inyong pagpamatuod niini ug sa mga kamatuoran nga gitudlo niini?
2. “Mahinumdom unsa ka maloloy-on ang Ginoo”
Gitudlo ni Moroni nga kadtong kinsa nagbasa sa Basahon ni Mormon ug nagtinguha nga mahibalo sa katinuod niini kinahanglan nga “mahinumdom unsa ka maloloy-on ang Ginoo” (Moroni 10:3). Ipasabut nga ang pag-ila ug paghinumdom og mga higayon sa kalooy sa Ginoo makapalumo sa atong mga kasingkasing ug makaandam kanato sa pagbati sa impluwensya sa Espiritu Santo. Usa ka kahulugan sa pulong nga pagkamaloloy-on mao ang pagkamaalagarong kalooy. Dapita ang mga estudyante sa pagpamalandong og kadiyot sa dihang nakasinati sila sa kalooy sa Ginoo o sa maalagarong kalooy nganha kanila o nakita kini diha sa kinabuhi sa usa ka tawo nga ilang kaila.
Dapita ang mga estudyante sa pagpakigbahin og mga ehemplo sa kalooy sa Ginoo diha sa Basahon ni Mormon nga nahimong makahuluganon nganha kanila.
-
Sa unsang paagi kaha nga ang paghinumdom sa kalooy sa Ginoo makatabang og usa ka tawo nga andam nga modawat sa Espiritu Santo ug makakuha og pagpamatuod sa Basahon ni Mormon?
-
Unsa nga ebidensya sa kalooy sa Ginoo ang inyong nasaksihan sa inyong kinabuhi?
-
Unsay inyong mga gibati samtang inyong gihinumduman ang kalooy sa Ginoo diha sa inyong kinabuhi?
3. “Palandonga [ang kalooy sa Ginoo] sa inyong mga kasingkasing”
Gitudlo ni Moroni nga kita kinahanglan gayud nga mamalandong sa kalooy sa Ginoo diha sa atong mga kasingkasing. Ipasabut nga ang pagpamalandong sa mga paagi nga ang Ginoo nagmaloloy-on ngadto sa uban ug sa atong mga kaugalingon nag-andam kanato sa pagdawat sa impluwensya sa Espiritu Santo. Aron matabangan ang mga estudyante nga masabtan kon sa unsang paagi nga naingon niini, dapita ang estudyante sa pagbasa sa mosunod nga pagpasabut ni Elder Marvin J. Ashton sa Korum sa Napulog Duha ka mga Apostoles:
“Ang mga diksyonaryo nag-ingon nga ang pamalandong nangahulugan og pagtimbang-timbang pinaagi sa hunahuna, paghunahuna og lawom mahitungod sa, pagtuyo, paghinuktok. …
“Pinaagi sa pamalandong, naghatag kita sa Espiritu og oportunidad sa pagdani ug pagdumala. Ang pamalandong usa ka gamhanang sumpay tali sa kasingkasing ug sa hunahuna. Samtang nagbasa kita sa mga kasulatan, ang atong mga kasingkasing ug mga hunahuna matandog. Kon gamiton nato ang gasa sa pagpamalandong, atong maangkon kining mahangturong mga kamatuoran ug makaamgo kon unsaon nato sa pagtipon niini sa atong inadlaw nga mga lihok. …
“Ang pamalandong usa ka nag-uswag nga paningkamot sa hunahuna. Usa kini ka importanting gasa ngadto niadtong kinsa nakakat-on sa paggamit niini. Kita makakaplag og pagsabut, panan-aw, ug praktikal nga paggamit kon gamiton nato ang gasa sa pagpamalandong” (“There Are Many Gifts,” Ensign, Nob. 1987, 20).
-
Sa inyong pagtuon sa Basahon ni Mormon, kanus-a ang pamalandong mitabang kaninyo sa pagbati sa impluwensya sa Espiritu Santo?
-
Unsa ang atong mabuhat aron mas kanunay nga mamalandong samtang magtuon kita sa mga kasulatan?
4. “Mangutana sa kinasingkasing ug uban sa tinuod nga katuyoan, nga magbaton og hugot nga pagtuo kang Kristo”
Gitudlo ni Moroni nga kon kita gustong makadawat og saksi sa kamatuoran sa Basahon ni Mormon, kinahanglan gayud kitang mangutana sa Dios “sa kinasingkasing, uban sa tinuod nga katuyoan, nga may hugot nga pagtuo kang [Jesus] Kristo.” Ipasabut nga ang pag-ampo sa kinasingkasing ug uban ang tinuod nga katuyoan nangahulugan nga gusto natong “buhaton ang tubag nga [atong] madawat gikan sa Dios.” (Isangyaw ang Akong Ebanghelyo: Usa ka Giya sa Misyonaryong Buhat [2004], 133). Hunahunaa ang pakigbahin sa mosunod nga istorya, diin ang usa ka tawo nag-ampo uban ang tinuod nga katuyoan aron makaangkon og saksi sa kamatuoran sa Basahon ni Mormon:
“Usahay nag-ampo ako nga masayud unsay husto, apan kini mas lumalabay nga hunahuna kay sa sinsero nga pangutana. Dayon usa ka gabii nakahukom ako nga mag-ampo uban sa ‘tinuod nga katuyoan.’
“Misulti ako sa Langitnong Amahan nga ako gusto nga makaila Kaniya ug mahimong kabahin sa Iyang tinuod nga Simbahan. Misaad ako: ‘Kon imo kong pahibaloon kon si Joseph Smith usa ba ka tinuod nga propeta ug kon ang Basahon ni Mormon tinuod ba, ako mobuhat bisan unsay Imong gusto nga ipabuhat kanako. Kon ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan, mosunod ako niini ug dili mobiya.’
“Ako wala pakitai og mga katingalahan, apan akong gibati ang kalinaw ug natulog. Pipila ka oras ang milabay nahigmata ako nga may tataw nga hunahuna: ‘Si Joseph Smith usa ka tinuod nga propeta, ug ang Basahon ni Mormon tinuod.’ Ang hunahuna giubanan og dili mahulagway nga kalinaw. Nakatulog ako og balik, nga nahigmata na usab nga may sama gyud nga hunahuna ug pagbati.
“Sukad niana nga panahon, wala na gayud ako magduha-duha nga si Joseph Smith usa ka tinuod nga propeta. Ako nasayud nga kini mao ang buhat Sa Manluluwas ug nga ang Langitnong Amahan motubag sa atong kinasingkasing nga mga paghangyo” (Rodolfo Armando Pérez Bonilla, “How I Know,” Ensign, Okt. 2011, 64).
Dapita ang mga estudyante sa pagsiksik sa Moroni 10:4 ug sa pag-ila unsay buhaton sa Dios alang niadtong kinsa nagsunod sa proseso nga gi-outline ni Moroni.
-
Unsa ang gisaad ni Moroni ngadto niadtong kinsa magtinguha og pagpamatuod sa Basahon ni Mormon sa paagi nga iyang gitudlo?
-
Sa unsa nga mga paagi kaha ang Espiritu Santo nagpamatuod ngari kanato kabahin sa kamatuoran sa Basahon ni Mormon? (Siguroa nga masabtan sa mga estudyante nga kadaghanan sa pagpadayag dili moabut sa usa ka katingalahang paagi. Samtang ang pipila ka mga indibidwal tingali adunay grabe nga espirituhanong mga kasinatian, ang kadaghanan makasinati og usa ka butang nga hilum ug inanay, sama sa usa ka mainiton, malinawon nga pagbati o kasigurohan. Mahimo usab nimong ipasabut nga samtang nagtuon kita sa mga kasulatan, ang Espiritu mahimong mopamatuod sa kamatuoran sa unsay atong gibasa. Dayon, kon kita sa piho mohangyo nga mahibalo sa kamatuoran sa Basahon ni Mormon, ang Espiritu mopanghimatuod sa mga saksi nga ato nang nadawat.)
Dapita ang usa ka estudyante sa pagbasa og kusog sa Moroni 10:5–7 . Hangyoa ang klase sa pagsunod ug sa pag-ila kon unsa pa ang gisaad ni Moroni nga atong mahibaloan pinaagi sa Espiritu Santo. Ipasabut nga ang Moroni 10:4–5 usa ka scripture mastery passage. Mahimo nimong awhagon ang mga estudyante nga markahan kini nga tudling sa lahi nga paagi aron dali ra nila kining pangitaon.
-
Unsay atong makat-unan gikan sa Moroni 10:3–7? (Ang mga estudyante mahimong mogamit og lahi nga mga pulong, apan kinahanglan ilang ilhon ang mosunod nga baruganan: Kon kita mangayo sa Dios diha sa hugot nga pagtuo ug uban sa tinuod nga katuyoan, makadawat kita og pagpamatuod sa Basahon ni Mormon ug ni Jesukristo pinaagi sa Espiritu Santo.)
Dapita ang mga estudyante sa pagsulat diha sa mga notebook o scripture study manual sa usa ka tumong kon unsay ilang buhaton aron maangkon o malig-on ang ilang mga pagpamatuod sa Basahon ni Mormon. Awhaga sila sa paggamit sa baruganan nga gitudlo sa Moroni 10:4.
Moroni 10:27–29
Nagpamatuod si Moroni nga makighimamat siya kanato diha sa hukmanan sa Dios
Dapita ang usa ka estudyante sa pagbasa og kusog sa Moroni 10:27–29. Hangyoa ang klase sa paghunahuna og unsaon kaha nila pagtubag ang pangutana nga makita diha sa Moroni 10:27. Ipamatuod nga kadtong kinsa nakadawat sa Basahon ni Mormon mahimong may tulubagon ngadto sa Dios kon unsay ilang gihimo niini.
Hatagi og igong panahon sa katapusan niini nga leksyon ang pagdapit sa mga estudyante sa pagpakigbahin sa ilang mga pagpamatuod sa Basahon ni Mormon. Paghunahuna sa paghatag sa imong kaugalingong pagpamatuod sa Basahon ni Mormon. Pasaligi ang mga estudyante nga samtang sila nagpadayon sa pagtuon sa Basahon ni Mormon sa tibuok nilang mga kinabuhi, ang ilang hugot nga pagtuo diha ni Jesukristo ug sa Iyang ebanghelyo motubo.
Scripture Mastery—Moroni 10:4–5
Ang mga estudyante kinsa nagmemorya sa Moroni 10:4–5 mahimong mas andam sa pagpakigbahin sa mensahe sa Basahon ni Mormon ngadto sa uban. Isulat ang tudling diha sa pisara, ug hangyoa ang mga estudyante sa pagbasa niini og kusog isip usa ka klase. Papasa ang unom ka mga pulong, ug dayon ipabasa og usab sa klase, ipabutang ang nawala nga mga pulong samtang magbasa sila. Ipadayon kini nga proseso hangtud hapit o ang tanang tudling mapapas.
Komentaryo ug Background nga Impormasyon
Moroni 10:3. “Palandonga kini sa inyong mga kasingkasing”
Nag-refer sa Moroni 10:3, si Elder Gene R. Cook mipasabut:
“Ang katapusang lima ka mga pulong sa bersikulo naghatag og importanting pahimangno—‘palandonga kini sa inyong mga kasingkasing.’ Unsa ang nag-una sa ‘kini’—ang butang nga atong kinahanglan nga palandungon? Kini mao ang ‘pagkamaloloy-on gayud sa Ginoo ngadto sa mga katawhan, gikan sa paglalang ni Adan bisan hangtud sa panahon nga kamo makadawat niini nga mga butang.’ Kita kinahanglan nga mohinumdom sa pagkamahigugmaon, pagkamanggihatagon, pagkamaayo, pagkamapasayloon sa atong Langitnong Amahan sukad ngari kanato” (“Moroni’s Promise,” Ensign, Abr. 1994, 12).
Kining pahimangno dapit sa katapusan sa Basahon ni Mormon bahin sa paghinumdom og pagpamalandong sa kalooy sa Ginoo usa ka haum nga panapos sa pahayag ni Nephi nga “Ako, si Nephi, mopakita kaninyo nga ang malumo nga mga kalooy sa Ginoo anaa ibabaw sa tanan kinsa siya mipili” (1 Nephi 1:20).
Agig dugang sa pagpamalandong sa maloloy-ong kinaiya sa Ginoo, kadtong kinsa mobasa sa Basahon ni Mormon kinahanglan nga mamalandong sa mahangturong mga kamatuoran nga ilang nadiskubre sulod sa mga pahina niini (tan-awa ang pasiuna sa Basahon ni Mormon).
Moroni 10:4. Ang Espiritu Santo mopakita sa kamatuoran sa Basahon ni Mormon ngadto niadtong kinsa mangayo sa Dios uban ang “tinuod nga katuyoan”
Si Elder Dallin H. Oaks sa Korum sa Napulog Duha ka mga Apostoles mikomentaryo sa awhag ni Moroni nga kita mangayo sa Dios uban ang “tinuod nga katuyoan” kalabut sa kamatuoran sa Basahon ni Mormon:
“Si Moroni wala misaad og pagpakita sa Espiritu Santo ngadto niadtong kinsa naningkamot nga mahibalo sa kamatuoran sa Basahon ni Mormon alang sa panaghap o akademik nga mga rason, bisan og sila ‘nangayo sa kinasingkasing.’ Ang saad ni Moroni gihimo alang niadtong kinsa may pasalig diha sa ilang mga kasingkasing sa paglihok diha sa pagpakita kon kini madawat. Ang mga pag-ampo nga gibase sa bisan unsang uban nga rason walay saad tungod kay kini wala himoa ‘uban ang tinuod nga katuyoan’” (Pure in Heart [1988], 19–20).
Moroni 10:27–29. Ang atong kaluwasan nag-agad kon giunsa nato pagdawat ang Basahon ni Mormon
Gihatagan og gibug-aton ni Presidente Ezra Taft Benson ang importansya sa Basahon ni Mormon sa dihang iyang gihatag ang mosunod nga awhag ngadto sa tanang mga miyembro sa Simbahan:
Mga kaigsoonan, nangamuyo ako kaninyo uban sa akong tibuok kasingkasing nga inyong ikonsiderar uban sa dakong kaligdong ang importansya sa Basahon ni Mormon diha kaninyo sa personal nga paagi o sa tibuok Simbahan.
“Sobra sa 10 ka tuig ang milabay mihimo ako sa mosunod nga mga pahayag kabahin sa Basahon ni Mormon. …
“‘Ang matag Santos sa Ulahing mga Adlaw kinahanglang magtuon niini nga basahon isip usa ka buluhaton sa tibuok kinabuhi. Kay kondili iyang gibutang ang iyang kalag sa kakuyaw ug nagsalikway niadtong makahatag og espiritwal ug intelektwal nga panaghiusa sa iyang tibuok kinabuhi. Adunay kalainan tali sa usa ka kinabig kinsa natukod diha sa bato ni Kristo pinaagi sa Basahon ni Mormon ug nagpabiling nanggunit nianang gunitanan nga puthaw, ug sa tawo nga wala.’(Ensign, Mayo 1975, p. 65).
“Akong imatuod pag-usab kini nga mga pulong nganha kaninyo niining adlawa. Dili kita magpabilin ubos sa paghimaraut, uban sa kasakitan ug paghukom niini, pinaagi sa pagbaliwala niining bililhon ug kahibulongang gasa nga gihatag sa Ginoo ngari kanato. [Tan-awa sa D&P 84:54–58.] Hinoon, atong daugon ang mga saad inubanan sa pagmahal niini diha sa atong mga kasingkasing” (“The Book of Mormon—Keystone of Our Religion,” Ensign, Nob. 1986, 7).