Leksyon 122
3 Nephi 12
Pasiuna
Si Jesukristo mitudlo sa mga Nephite kon unsaon pagdawat sa mga panalangin sa Iyang ebanghelyo ug mitudlo kanila sa pag-impluwensya sa uban alang sa kaayohan. Iyang gipamahayag nga natuman na Niya ang balaod ni Moises, ug mihatag Siya sa mga katawhan og mas taas nga balaod aron maandam sila nga mahimong sama Kaniya ug sa atong Amahan sa Langit.
Mga Sugyot alang sa Pagtudlo
3 Nephi 12:1–12
Si Jesukristo mitudlo sa pundok sa mga katawhan mahitungod sa mga panalangin nga atong madawat kon kita mosunod sa Iyang ebanghelyo
Sa dili pa magklase, isulat ang mosunod nga mga pangutana diha sa pisara:
Naglaum ba ang Langitnong Amahan nga mahingpit kita?
Gikinahanglan ba kita nga mahimong hingpit niining kinabuhia aron makasulod sa celestial nga gingharian?
Mahimo ba gayud kitang hingpit?
Sa sinugdanan sa leksyon, dapita ang mga estudyante nga mamalandong niining mga pangutana. Hangyoa sila sa pagkonsiderar sa mga pangutana sa tibuok leksyon.
Dapita ang usa ka estudyante sa pagbasa og kusog sa 3 Nephi 12:48. Ipasabut nga usa kini ka scripture mastery passage. Mahimo nimong isugyot nga markahan sa mga estudyante kining tudling sa lahi nga paagi aron sayon ra nila kining matultolan.
Dapita ang usa ka estudyante sa pagbasa sa mosunod nga pamahayag ni Elder Russell M. Nelson sa Korum sa Napulog Duha ka mga Apostoles mahitungod sa sugo nga mahimong hingpit:
“Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon mora og makapaluya [lisud] ug walay katapusan. Ang pagkahingpit gilauman. Ang pagkahingpit mahitabo lamang human sa Pagkabanhaw ug pinaagi lamang sa Ginoo. Naghulat kini sa tanan nga naghigugma kaniya ug nagsunod sa iyang mga sugo” (“Perfection Pending,” Ensign, Nob. 1995, 88).
-
Ngano kaha nga ang pagkahingpit moabut “pinaagi lamang sa Ginoo”?
Ribyuha ang tulo ka mga pangutana sa sinugdanan sa leksyon. Pangutan-a ang mga estudyante kon ila bang usbon ang ilang mga tubag niadtong mga pangutana human mabasa ang 3 Nephi 12:48 ug nadungog ang pagpasabut ni Elder Nelson. Tabangi ang mga estudyante nga makasabut nga ang Langitnong Amahan wala maglaum kanato nga mahimong hingpit sa atong mortal nga kinabuhi apan samtang kita makugihong naningkamot sa pagsunod sa mga sugo ug samtang kita mosalig sa Pag-ula, kita sa katapusan mahimong hingpit.
Isulat sa pisara ang pulong nga bulahan. Dapita ang mga estudyante sa pagbasa og hilum sa 3 Nephi 12:1–12, nga mangita alang sa hiyas nga ang Manluluwas nag-awhag kanato nga atong palambuon ug sa mga panalangin nga Iyang gisaad isip resulta.
-
Unsa nga mga panalangin ang miabut sa inyong kinabuhi isip resulta sa pagsunod sa mga pagtulun-an ni Jesukristo diha sa 3 Nephi 12:1–12?
Ipasabut kon kapila makita ang pulong nga bulahan niining mga bersikulo. Ipakigbahin ang imong pagpamatuod kon sa unsang paagi nga ikaw napanalanginan samtang ikaw nagpakabuhi sumala sa mga pagtulun-an sa Manluluwas.
Hangyoa ang mga estudyante sa pagsulat diha sa mga notebook o mga scripture study journal mahitungod sa usa ka panalangin nga ilang gitinguha nga gihulagway diha sa 3 Nephi 12:1–12. Ipasulat nila ang hiyas nga kinahanglan nilang palambuon aron makadawat nianang panalangin. Dayon dapita sila sa pagsulat kon unsay gusto nilang buhaton aron mapalambo kana nga hiyas. Dapita ang pipila ka estudyante sa pagpakigbahin kon unsay ilang gisulat ug ngano.
3 Nephi 12:13–16
Ang Manluluwas nag-awhag sa pundok sa mga katawhan nga mahimong matarung nga mga ehemplo ngadto sa kalibutan
I-display ang usa ka sudlanan sa asin. Hangyoa ang klase sa pagtino sa mga benepisyo sa asin. Samtang motubag ang mga estudyante, siguroa nga maklaro nga ang asin itimpla sa pagkaon ug kini usa ka preservative aron mapugngan ang pagkadaut sa karne. Mahimo usab nimong ipasabut nga ubos sa balaod ni Moises, ang mga pari gisugo sa paghalad og asin uban sa ilang mga halad (tan-awa sa Levitico 2:13). Sa ingon, ang asin mao ang simbolo sa pakigsaad tali sa Ginoo ug sa Iyang katawhan.
Dapita ang mga estudyante sa pagbasa og hilum sa 3 Nephi 12:13 ug ilhon kon si kinsa ang gipakasama sa Manluluwas ngadto sa asin. Samtang motubag ang mga estudyante, ipasabut nga ang Manluluwas wala lamang nagpasabut ngadto sa pundok sa mga katawhan didto sa templo nianang adlawa apan kadtong tanang nabunyagan sa Iyang Simbahan ug nagsunod sa Iyang ebanghelyo.
-
Sa unsang paagi nga kita, isip sumusunod ni Jesukristo, mahimong sama sa asin? (Angay kitang motabang sa pagpatunhay o pagluwas sa katawhan ug mopalambo sa kalibutan pinaagi sa pag-impluwensya sa uban alang sa kaayohan.)
-
Unsa kaha ang gipasabut sa asin nga mawad-an sa lami niini?
Samtang maghisgot ang mga estudyante niining pangutana, mahimo nimong basahon ang mosunod nga pamahayag ni Elder Carlos E. Asay sa Seventy:
“Ang asin dili mawad-an sa iyang lami sa kadugayan. Ang lami mawala sa paagi nga masagulan ug makontaminado. … Ang kamaayo ug kalidad mobiya sa tawo kon ang iyang hunahuna kontaminado sa hugaw nga mga hunahuna, nagdaut sa iyang ba-ba pinaagi sa pagsulti og mas ubos kay sa kamatuoran, ug sayop nga paggamit sa iyang kusog sa paghimo og dautang mga buhat” (“Salt of the Earth: Savor of Men and Savior of Men, “ Ensign, Mayo 1980, 42).
-
Nganong gikinahanglan nga kita putli aron sa pag-impluwensya sa uban alang sa kaayohan?
Ipasabut nga ang Manluluwas migamit og laing simbolo aron sa pagtudlo kon sa unsang paagi nga ang mga miyembro sa pakigsaad sa Iyang Simbahan moimpluwensya sa uban alang sa kaayohan. Dapita ang usa ka estudyante sa pagbasa og kusog sa 3 Nephi 12:14–16. Hangyoa ang klase sa pagsunod, nga mangita kon sa unsang paagi nga ang Manluluwas migamit sa kahayag aron sa pagtudlo mahitungod sa tahas sa Iyang mga katawhan sa pakigsaad dinhi sa kalibutan. Sa dili pa mobasa ang estudyante, mahimo nimong ipasabut nga ang usa ka tadyaw sama sa usa ka bukag.
-
Sa unsa kaha nga paagi nga ang mga miyembro sa Simbahan mahimong kahayag ngadto sa uban? Unsa kaha ang gipasabut sa ipasanag ang atong kahayag? (Samtang ang mga estudyante motubag niining pangutana, tabangi sila nga makasabut kon sa unsang paagi nga ang ilang mga ehemplo sa pagpakabuhi nga matarung makatabang sa ubang mga tawo.)
-
Sa unsa kaha nga paagi nga ang ubang miyembro sa Simbahan nagtabon sa ilang kahayag?
-
Sumala sa 3 Nephi 12:16, nganong gusto sa Manluluwas nga atong ipasanag ang atong kahayag? (Samtang kita magpakita og matarung nga ehemplo, kita makatabang sa uban nga himayaon ang Langitnong Amahan. Mahimo nimong isugyot nga isulat sa mga estudyante kini nga baruganan sa ilang kaugalingong mga pulong diha sa ilang mga kasulatan.)
-
Kang kinsang matarung nga ehemplo ang nakatabang ninyo nga mas maduol ngadto sa Langitnong Amahan o nakapalig-on sa inyong tinguha nga sundon sa mas hingpit ang ebanghelyo?
Dapita ang mga estudyante sa pagpamalandong sa ehemplo nga ilang gihimo alang niadtong naglibut kanila. Awhaga sila sa paghunahuna kon sa unsang paagi nga sila mas makatabang sa uban nga mapalambo ang ilang gugma sa Langitnong Amahan ug sa ilang tinguha sa pagsunod Kaniya.
3 Nephi 12:17–48
Si Jesukristo nagtudlo sa pundok sa mga katawhan sa mas taas nga balaod nga makatabang kanila nga mahimong sama Kaniya ug sa Langitnong Amahan
Ipasabut nga ang Manluluwas mipadayon sa pagtudlo sa mga Nephite kon unsaon sa pagduol ngadto Kaniya ug makasulod sa gingharian sa langit. Dapita ang usa ka estudyante sa pagbasa og kusog sa 3 Nephi 12:19–20. Hangyoa ang klase sa pagsunod, nga mangita sa usa ka pulong nga makita sa daghang higayon niining mga bersikulo.
-
Unsang importante nga pulong ang gigamit sa Manluluwas og katulo isip kabahin niining imbitasyon sa pagduol ngadto Kaniya? (Mga Sugo.)
Ipasabut nga ang 3 Nephi 12:21–47 naglangkob sa pipila ka piho nga mga sugo nga gihatag sa Manluluwas nga makatabang kanato sa pagduol ngadto Kaniya ug mahimong mas mahisama Kaniya. Sa dihang Siya mitudlo niini nga mga sugo ngadto sa mga Nephite, Siya mipasabut sa mga lagda nga kabahin sa balaod ni Moises ug dayon gitudlo ang mas taas nga balaod. Siya mipasabut sa tradisyonal nga panabut sa balaod ni Moises sa dihang Iyang gigamit ang mga pulong sama sa “giingon kanila sa karaan nga panahon” ug “kini nahisulat.” Sa dihang Siya miingon “apan ako moingon nganha kaninyo,” gipaila Niya ang paagi nga Iyang gitinguha kanato sa pagsunod nianang sugo karon.
Aron matabangan ang mga estudyante sa pagtuon niini nga mga bersikulo, kopyaha ang mosunod nga tsart diha sa pisara. Bahina ang klase ngadto sa upat ka grupo. I-assign sa matag grupo ang usa ka laray sa tsart, ug dapita sila sa pagbasa sa kauban nga mga bersikulo ug tubagon ang mga pangutana.
|
Unsa ang tradisyonal nga pagsabut diha sa balaod ni Moises? |
Sa unsang paagi nga ang Manluluwas mitambag kanato sa pagpakabuhi? |
Unsa kaha ang buhaton sa batan-ong lalaki o babaye aron magamit ang pagtulun-an sa Manluluwas? |
|---|---|---|
Alang sa kaayohan sa mga estudyante nga nagbasa sa 3 Nephi 12:22, mahimo nimong ipasabut nga ang Buang usa ka makadaut o biay-biay nga termino nga nagpahayag og pagtamay o pagbugal-bugal (tan-awa sa Mateo 5:22). Mahimo usab nimong ipasabut nga si Elder David E. Sorensen sa Seventy mitudlo nga ang mga pulong nga “pakig-uyon dayon kamo sa inyong kaaway” (3 Nephi 12:25) nagpasabut nga “paghusay sa atong mga panagbingkil sa sayo pa, agi og kahadlok nga ang pagkakaron nga kaligutgot motubo ngadto sa pisikal o emosyonal nga pagdagmal, ug kita maulipon sa atong kasuko” (“Ang Pagpasaylo Makapausab sa Kaligutgot ngadto sa Gugma,” Ensign o Liahona Mayo 2003, 11).
Kon mahuman na ang mga estudyante sa pagtuon sa gi-assign nga mga bersikulo, dapita ang matag grupo sa pagreport sa ilang mga tubag. Mahimo nimong ipasulat kanila ang ilang mga tubag diha sa tsart sa pisara.
-
Unsa ang ingon og nausab tali sa balaod ni Moises ug sa mas taas nga balaod nga gitudlo ni Jesukristo?
Mahimo nimong ipasabut nga ang mas taas nga balaod mas nag-focus na sa atong mga tinguha, mga hunahuna, ug mga motibo kay sa atong linihukan.
-
Sa atong pagpaningkamot nga mahingpit, nganong importante man kaayo nga mag-focus sa atong mga tinguha, mga hunahuna, ug mga motibo?
Dapita ang mga estudyante sa pagpili og usa sa mga pagtulun-an sa Manluluwas diha sa 3 Nephi 12 ug magsulat og paragraph mahitungod kon unsaon nila nga makahimo og kalamboan niana nga aspeto.
Dapita ang usa ka estudyante sa pagbasa og kusog sa 3 Nephi 12:19–20. Tabangi ang mga estudyante nga makasabut nga pinaagi sa paghinulsol ug makugihong pagpaningkamot sa pagsunod sa mga sugo nga gitudlo sa Manluluwas, kita mahimong hingpit pinaagi sa Pag-ula ug “makasulod sa gingharian sa langit” (3 Nephi 12:20).
Kon makompleto sa mga estudyante kining mga kalihokan, dapita sila sa pagpakigbahin kon unsa ang labing makahuluganon ngadto kanila. I-summarize kini nga kapitulo pinaagi sa pagsulat sa mosunod nga baruganan diha sa pisara: Kon kita moduol ngadto ni Kristo ug mosunod sa Iyang mga sugo, kita mas mahisama Kaniya ug sa atong Amahan sa Langit, kinsa mga hingpit. Pahinumdumi ang mga estudyante nga aron makakuha og bisan unsa nga matang sa pagkahingpit, kita kinahanglang mosalig sa Pag-ula ni Jesukristo. Dapita ang mga estudyante sa pagsulat mahitungod sa usa o duha ka mga paagi nga gusto nilang magamit ang mga pagtulun-an sa Manluluwas nga ilang nakat-unan karon. Tapusa pinaagi sa pagpakigbahin sa imong pagpamatuod sa baruganan nga imong gisulat diha sa pisara.
Scripture Mastery—3 Nephi 12:48
Dapita ang mga estudyante sa pag-abli sa ilang mga kasulatan ngadto sa 3 Nephi 12:48. Hangyoa sila nga magdungan sa pagbasa og kusog. Hatagi og panahon ang mga estudyante sa pagtuon sa bersikulo, ug dayon hangyoa sila sa pagsira sa ilang mga kasulatan ug usbon pagsulti ang bersikulo nga walay sayop kutob sa ilang mahimo. Ipabalik nila kini nga proseso nga motan-aw sa bersikulo, isira ang ilang mga kasulatan, ug dayon isulti pag-usab ang bersikulo nga gimemorya.
-
Giunsa ninyo paglambo inubanan sa paningkamot?
-
Sa unsang paagi nga kining kalihokan nakatabang sa inyong pagsabut sa inyong panaw ngadto sa kahingpitan?
Ipasabut nga ang atong mga paningkamot sa kinabuhi mahinungdanon. Pahinumdumi hinoon ang mga estudyante, nga ang Ginoo wala maglaum kanato nga mahimong hingpit sa tanang butang atol sa atong mortal nga kinabuhi. Pinaagi sa Pag-ula ug sa atong makugihong mga paningkamot sa pagsunod sa Manluluwas, kita sa katapusan mahimong hingpit. Dapita ang mga estudyante sa paghunahuna og usa ka paagi nga sila maningkamot sa pagsunod sa Manluluwas.
Pahinumdom: Tungod sa gitas-on niini nga leksyon, mahimo nimo kining gamiton nga kalihokan sa laing adlaw, kon aduna kay mas dakong panahon.
Komentaryo ug Background nga Impormasyon
3 Nephi 12:28–30. Ang sala sa kahigal
Si Elder Jeffrey R. Holland sa Korum sa Napulog Duha ka mga Apostoles mipasabut:
“Nganong ang kahigal usa man ka makamatay nga sala? Kana, agig dugang sa hingpit nga epekto niana diha sa atong mga kalag, nagtuo ako nga sala kini tungod kay mohugaw kini sa labing taas ug labing balaan nga pakigrelasyon nga gihatag sa Dios dinhi kanato sa mortalidad—ang gugma nga gibatunan sa lalaki ug sa babaye alang sa usag usa ug ang tinguha nga ang magtiayon kinahanglan magbaton og mga anak ngadto sa usa ka pamilya gitumong nga magmahangturon. … Ang gugma mohimo kanato og kinaiya nga makaduol ngadto sa Dios ug sa ubang mga tawo. Ang kahigal, sa laing bahin, dili gayud diosnon ug magmaya sa kaugalingong pagpatuyang. Ang gugma mohimo kanato nga manggihatagon ug bukas nga kasingkasing; ang kahigal mohimo kanato nga gutom” (“Walay Luna alang sa Kaaway sa Akong Kalag,” Ensign o Liahona, Mayo 2010, 44–45).
3 Nephi 12:43–44. “Kamo mohigugma sa inyong silingan” ug “higugmaa ang inyong mga kaaway”
Ang pagtulun-an sa Manluluwas ngadto sa mga Nephite nga sila maghigugmaay sa usag usa ug maghigugma sa ilang mga kaaway tukma sa panahon ug mahinungdanon. Human sa mga siglo nga panaggubat tali sa mga Nephite ug mga Lamanite, ingon man ang mga katuigan sa kaugalingong panagsumpaki, aduna untay tradisyon sa pagdumot tali sa magkaatbang nga mga grupo. Sama pananglit, sa Mosiah 10:17 gipahayag nga ang mga Lamanite “mitudlo sa ilang mga anak nga sila kinahanglan modumot kanila [sa mga Nephite], ug nga sila kinahanglan mobuno kanila, ug nga sila kinahanglan mangawat ug manglungkab kanila, ug mobuhat sa tanan nga sila makahimo sa paglaglag kanila.” Kon nagpadayon lang unta ang mga katawhan sa pagsunod sa mga pagtulun-an sa Manluluwas diha sa 3 Nephi 12:43–44, lagmit nakaangkon sila og tunhay nga kalinaw ug permanenting paghunong sa sayop nga pagtudlo sa mga anak sa pagdumot sa ilang mga kaaway. Hinoon, ang malinawon nga mga katuigan nga misunod sa pagbisita sa Manluluwas nadaut tungod kay ang pipila sa mga tawo “mituyo sa pagsukol batok sa ebanghelyo ni Kristo; ug sila mitudlo sa ilang mga anak nga sila dili motuo.” Ilang gipili nga mopahiangay “sa pagkadautan ug sa pagkasalawayon sa ilang mga amahan, sama kaniadto sa sinugdanan. Ug sila gitudloan sa pagdumot sa mga anak sa Dios, ingon sa mga Lamanite nga gitudloan sa pagdumot sa mga anak ni Nephi gikan pa sa sinugdanan.” (4 Nephi 1:38–39).