3 Nephi 13

Pasiuna

Ang Manluluwas mipadayon sa Iyang wali didto sa templo sa yuta sa Bountiful. Siya mipasidaan sa mga katawhan batok sa pagpakaaron-ingnon ug mitudlo kanila sa pagbuhat og matarung nga mga buhat aron ikahimuot sa Langitnong Amahan. Siya misugo usab sa pundok sa katawhan sa pagtigum og mga bahandi didto sa langit ug migiya sa Iyang mga disipulo nga unahon sa pagpangita ang gingharian sa Dios sa dili pa ang ilang kaugalingong temporal nga mga kabalaka.

Mga Sugyot alang sa Pagtudlo

3 Nephi 13:1–18

Ang Manluluwas mipasidaan sa mga Nephite batok sa pagpakaaron ingnon ug mitudlo kanila sa pagbuhat og matarung nga mga buhat aron ikahimuot sa Langitnong Amahan

Sa dili pa magklase, pag-andam og usa ka handout sa mosunod nga self-assessment, ug paghimo og mga kopya alang sa matag estudyante. Kon dili kana posible, mahimo nimong ipresentar ang pag-assess pinaagi sa pagsulti o isulat kini sa pisara.

Mohatag ko og limos (mga buhat sa relihiyusong debosyon o pagserbisyo sa uban) tungod kay:
1. Angay nakong buhaton.
2. Gihigugma nako ang Ginoo ug ganahan kong motabang sa ubang tawo.
3. Gusto nako nga maayo ang hunahuna sa ubang tawo bahin nako.
Mag-ampo ko tungod kay:
1. Gusto ko nga makasulti sa akong mga ginikanan o sa akong bishop og “oo” kon mangutana sila nako kon ako nag-ampo ba.
2. Kabahin lang kini sa akong inadlaw nga tulumanon.
3. Gusto ko nga makigsulti ngadto sa akong Langitnong Amahan.
Magpuasa ko tungod kay:
1. Ang pagpuasa makatabang kanako nga mas maduol ngadto sa Ginoo.
2. Ang ubang mga tawo magtuo nga ako huyang kon ako dili mohimo.
3. Ang akong mga ginikanan nagsulti kanako nga kinahanglan kong mohimo.

Sa pagsugod sa leksyon, hangyoa ang mga estudyante sa pagkompleto sa self-assessment (diha man sa handout o sa mga notebook o mga scripture study journal) pinaagi sa pagtino kon hain sa mga pulong ang labing naghulagway sa ilang mga motibo o mga rason sa paghatag og limos, pag-ampo, ug pagpuasa. Ipasalig sa mga estudyante nga dili nimo sila hangyuon sa pagpakigbahin sa ilang mga tubag ngadto sa uban. Inigka-human sa mga estudyante sa self-assessment, ipasabut nga ang posible nga mga tubag nga gilista sa ubos sa paghatag og mga limos, pag-ampo, ug pagpuasa nagpakita sa lain-lain natong mga motibo o mga rason sa pagbuhat niini o sa laing mga kalihokan kalabut sa ebanghelyo (kita mahimong mobuhat niini, sama pananglit, tungod sa katungdanan o obligasyon, aron dayegon sa ubang mga tawo, o aron mahimuot ang Langitnong Amahan).

Importante ba kon ngano nga mohimo kita og matarung nga mga buhat? Ngano o nganong dili man?

Isulat ang mosunod nga mga hilisgutan ug kauban nga mga pakisayran sa kasulatan diha sa pisara (mahimo nimo kining buhaton sa dili pa magklase):

Limos: 3 Nephi 13:1–4

Pag-ampo: 3 Nephi 13:5–6

Pagpuasa: 3 Nephi 13:16–18

Ipasabut nga ang 3 Nephi 13 misaysay kon sa unsang paagi nga si Jesukristo mipadayon sa pagtudlo sa pundok sa mga Nephite didto sa templo ug mitudlo kanila mahitungod sa kaimportante sa motibo sa usa ka tawo sa paghatag og limos, pag-ampo, ug pagpuasa.

Dapita ang mga estudyante sa pagpili og usa sa tulo ka mga hilisgutan nga gilista diha sa pisara. Hangyoa sila sa pagbasa og hilum sa may kalabutan nga tudling sa kasulatan, nga mangita sa mga tubag sa mosunod nga mga pangutana (mahimo nimong isulat kini nga mga pangutana diha sa pisara):

Unsa nga motibo ang gipasidaan sa Ginoo samtang naghimo kita niining kalihokan?
Unsa ang gisulti sa Ginoo bahin sa paagi kon unsaon nato sa paghimo kining kalihokan?

Sa dili pa sugdan sa mga estudyante, mahimong makatabang ang pagpasabut sa maut isip usa ka tawo kinsa napakaaron-ingnon nga matarung o kinsa nagsulti og usa ka butang apan laing ang gibuhat.

Dapita ang pipila ka mga estudyante sa pagpakigbahin sa mga tubag nga ilang nakit-an sa duha ka mga pangutana. (Gikan sa ilang pagpangita, ang mga estudyante kinahanglan nga makadiskubre nga ang Ginoo mipasidaan batok sa paghimo og matarung nga mga buhat aron makita sa mga tawo ug mitudlo nga kinahanglan maghimo kita og matarung nga mga buhat aron ikahimuot sa atong Langitnong Amahan.) Aron matabangan ang mga estudyante nga magpadayon sa paghunahuna sa mga pagtulun-an sa Manluluwas ug mogamit niini, ipangutana ang mosunod:

Sa unsang paagi nga ang atong mga motibo sa paghimo og matarung nga mga buhat makaapekto sa pamaagi sa atong paghimo niini?
Unsa ang pipila ka mga matarung nga mga motibo nga mahimong makapadasig sa usa ka tawo sa paghatag og limos, pag-ampo, o pagpuasa sa tago?

Isulat ang mosunod diha sa pisara: Kon kita mohimo og matarung nga mga buhat aron ikahimuot sa Langitnong Amahan …

Sumala sa 3 Nephi 13:4, 6, 18, unsa nga panalangin ang moabut niadtong kinsa mohimo og matarung nga mga buhat aron ikahimuot sa Langitnong Amahan? (Samtang nagtubag ang mga estudyante, kompletuha ang pamahayag diha sa pisara: Kon kita mohimo og matarung nga mga buhat aron ikahimuot sa Langitnong Amahan, Siya moganti kanato sa dayag.)

Dapita ang mga estudyante nga ribyuhon sa daklit ang ilang mga self-assessment ug magtimbang-timbang sa ilang mga motibo sa paghatag og limos, pag-ampo o pagpuasa. Awhaga sila sa pagkonsiderar kon unsaon nila paggamit ang mga pagtulun-an sa Manluluwas aron mapalambo ang ilang mga motibo sa pagbuhat niini o sa ubang mga kalihokan, sama sa pagtuon sa kasulatan, pagbayad sa ikapulo, pagtambong sa simbahan, ug sa pag-ambit sa sakrament.

3 Nephi 13:19–24

Si Jesukristo nagtudlo sa pundok sa mga katawhan sa pagtigum og mga bahandi didto sa langit

Isulat ang mosunod nga mga pulong diha sa pisara: Mga Bahandi dinhi sa Yuta ug Mga Bahandi didto sa Langit. Dapita ang mga estudyante sa paghisgot sa mosunod nga pangutana nga may kauban:

Unsa ang pipila ka mga ehemplo sa mga bahandi dinhi sa yuta ug mga bahandi didto sa langit?

Human ang mga estudyante makahigayon sa paghisgot niining pangutana, mahimo nimong hangyuon ang pipila sa pagpakigbahin sa ilang mga tubag diha sa klase. Ikonsiderar ang paghisgot sa usa ka ehemplo gikan sa imong kinabuhi bahin sa usa ka bahandi dinhi sa yuta (mahimo nimong ipakita ang usa ka kabtangan nga imong gipanag-iya) ug usa ka ehemplo sa bahandi didto sa langit (mahimo nimong ipakita ang usa ka litrato sa imong pamilya o maghisgot sa kaimportante sa imong pagpamatuod). Dapita ang usa ka estudyante sa pagbasa og kusog sa 3 Nephi 13:19–23. Hangyoa ang klase sa pagsunod ug ilhon ang tambag nga gihatag sa Manluluwas mahitungod sa pagpangita og mga bahandi dinhi sa yuta ug mga bahandi didto sa langit.

Sumala sa 3 Nephi 13:19–20, unsa ang kalainan sa mga bahandi dinhi sa yuta gikan sa mga bahandi didto sa langit?
Sa unsang paagi nga ang pagpangita og mga bahandi dinhi sa yuta makabalda kanato sa pagpangita og mga bahandi didto sa langit? (Mahimo nimong klaruhon nga ang Manluluwas wala magtudlo nga dautan ang kwarta o ang kalibutanong mga kabtangan; hinoon, Iyang gipasabut og maayo ang kaimportante sa pagbutang sa atong mga kasingkasing sa mga bahandi didto sa langit nga molungtad.)
Unsa kaha ang gipasabut sa mga pulong nga “kon … ang inyong mata bug-os” diha sa 3 Nephi 13:22? Unsaon ninyo pagpakita og paningkamot sa pagtigum og mga bahandi didto sa langit?

Dapita ang usa ka estudyante sa pagsulat sa pulong nga Dios sa usa ka piraso nga papel ug ibutang kini sa usa ka bahin sa classroom. Dapita ang laing estudyante sa pagsulat sa pulong nga Pagkakalibutanon diha sa usa ka piraso nga papel ug ibutang kini sa pikas bahin sa classroom. Hangyoa ang ikatulo nga estudyante sa pagtindog sa atubangan sa klase ug atubangon ang papel nga gisulatan og Dios. Sunod, hangyoa ang estudyante sa pagliso ug atubangon ang papel nga gisulatan og Pagkakalibutanon. Dapita ang estudyante nga mosulay sa pag-atubang sa duha ka mga papel sa samang higayon. Hangyoa ang klase sa pagbasa og hilum sa 3 Nephi 13:24 ug ikonsiderar kon sa unsang paagi nga kining bersikulo may kalabutan ngadto sa pagpaningkamot sa estudyante sa pag-atubang sa mga papel sa samang higayon. Ipasabut nga ang pulong nga mammon nagrepresentar sa pagkakalibutanon o mga katigayunan.

Sa unsang paagi nga ang pagtinguha sa pagserbisyo sa Dios ug sa katigayunan sama sa paningkamot pag-atubang sa duha ka bong-bong sa samang higayon?
Unsa kaha ang pipila ka mga ehemplo sa pagpaningkamot sa pagserbisyo sa Dios ug sa mammon sa samang higayon?

Dapita ang klase sa pagtindog ug mag-atubang sa papel nga gisulatan og Dios.

Nganong importante alang kaninyo nga anaa ang Dios isip inyong agalon?
Base sa mga pulong sa Manluluwas sa 3 Nephi 13:24, unsaon ninyo pagkahibalo nga ang Dios mao ang inyong agalon? (Bisan og ang mga estudyante makahatag og daghang hustong tubag, siguroha nga ilang matino ang mosunod nga baruganan: Aron maanaa ang Dios isip atong Agalon, kinahanglan higugmaon ug serbisyuhan nato Siya labaw pa sa mga butang sa kalibutan.)

Samtang nagtindog pa ang mga estudyante, basaha ang mga ehemplo sa ubos ug hangyoa sila nga mag-atubang sa bahin sa classroom nga nagrepresentar sa agalon nga sa ilang hunahuna mao ang ilang giserbisyuhan—Dios o Pagkakalibutanon (katigayunan). Hangyoa ang mga estudyante sa pagpasabut kon nganong mipili sila sa pagliso niana nga bahin sa classroom. (Mahimo nimong ipahaum kini nga mga ehemplo aron makab-ot ang mga kahimtang ug interes sa mga estudyante nga imong gitudloan.)

Usa ka batan-ong lalaki mibalibad sa trabaho nga nagkinahanglan kaniya nga makapalta sa iyang mga miting sa Dominggo ug hinoon mipili sa trabaho nga mas gamay ang sweldo nga dili siya makapalta sa iyang mga miting.
Usa ka batan-ong babaye kanunayng nagreklamo ngadto sa iyang mga ginikanan mahitungod sa iyang panginahanglan sa bag-ong sinina. Ang mga sinina nga iyang gusto mas mahal pa kay sa unsay maabut sa iyang pamilya.
Usa ka batan-ong lalaki regular nga nagbayad sa iyang ikapulo sa kwarta nga iyang tinarbahoan. Apan, gigamit niya ang tanang nahibilin sa iyang kinitaan sa pagpamalit og mga butang nga makalingaw, lakip sa dili tukma nga mga salida ug mga awit, ug wala magtigum para ibayad sa misyon o edukasyon.
Usa ka batan-ong babaye migamit kanunay og bahin sa iyang kinitaan sa pagpamalit og ginagmayng mga regalo aron sa pagpakita og gugma sa uban.

Pagkahuman sa kalihokan, dapita ang mga estudyante sa pagpanglingkod, ug dayon pangutan-a sila sa mosunod:

Base sa inyong mga nasinati, ngano kaha nga lisud ang kanunayng maghigugma ug magserbisyo sa Dios kay sa mga butang sa kalibutan? Nganong ang pag-una sa Dios angayang paningkamutan?

3 Nephi 13:25–34

Ang Manluluwas mitudlo sa napulog duha ka mga disipulo nga unahon sa pagpangita ang gingharian sa Dios sa dili pa ang kaugalingon nilang temporal nga mga kabalaka

I-summarize ang 3 Nephi 13:25–31 pinaagi sa pagsulti sa mga estudyante nga si Jesukristo mitudlo sa Iyang napulog duha ka mga disipulo nga dili mabalaka sa ilang temporal nga panginahanglan alang sa pagkaon ug sinina. Ipasabut nga bisan tuod nga kining mga pagtulun-an piho nga gihatag ngadto sa napulog duha ka mga disipulo, ang importanting mga baruganan magamit sa kinatibuk-an. Dapita ang usa ka estudyante sa pagbasa og kusog sa 3 Nephi 13:32–33. Hangyoa ang klase sa pagsunod ug tinuon kon giunsa sa paghupay sa Manluluwas ang Iyang mga disipulo kalabut sa ilang temporal nga mga panginahanglan.

Sa unsang paagi nga ang pagkaamgo nga ang Dios nasayud sa atong panginahanglan makatabang kanato?
Sumala sa 3 Nephi 13:33, unsa ang gisaad ni Jesukristo niadtong giuna ang Dios ug ang Iyang gingharian diha sa ilang mga kinabuhi? (Bisan og ang mga estudyante mahimong motubag sa lain-laing mga paagi, siguroa nga mahibalo sila sa mosunod nga baruganan: Kon unahon nato sa pagtinguha ang gingharian sa Dios, Siya motabang kanato sa pagsangkap sa atong mga panginahanglan. Mahimo nimong isulat sa pisara kini nga baruganan.)
Unsa ang inyong bation kon ang usa ka suod nga higala o sakop sa pamilya gipalabi ang inyong mga interes ug panginahanglan kay sa iyang kaugalingon? Unsa ang atong gipakita ngadto sa Langitnong Amahan ug sa Manluluwas kon sila atong giuna labaw pa sa atong temporal nga panginahanglan ug interes?

Dapita ang mga estudyante sa pagsulat sa ilang mga notebook o mga scripture study journal og usa ka tumong kalabut sa usa ka butang nga ilang mahimo aron mas hingpit nga mauna ang Dios diha sa ilang mga kinabuhi. Mahimo nimong tapuson ang leksyon pinaagi sa pagpamatuod sa mga panalangin nga imong nasinati samtang ikaw nagtinguha sa pag-una sa Dios ug sa Iyang gingharian diha sa imong kinabuhi.

Dugang nga mga Ideya sa Pagtudlo

3 Nephi 13:7–15. Pagpalambo sa atong mga pag-ampo

Ipasabut nga ang Manluluwas mihatag og dugang nga panudlo aron sa pagtabang kanato sa pag-ampo sa paagi nga ikahimuot sa Langitnong Amahan. Hangyoa ang mga estudyante sa pagbasa og hilum sa 3 Nephi 13:7–15 ug sa pagpangita og dili mominos sa duha ka mga butang nga makatabang kanila sa pagpalambo sa ilang mga pag-ampo. Dapita ang mga estudyante kinsa komportabling makasulti sa klase kon unsa ang ilang nakat-unan ug sa unsang paagi nga kini makatabang nila sa pagpalambo sa ilang mga pag-ampo. Mahimo usab nimong ipangutana ang mosunod aron sa pagdasig og panaghisgutan sa klase:

Unsa kaha ang gipasabut sa pag-ampo nga naggamit og kawang nga pagbalik-balik? (Tabangi ang mga estudyante nga makasabut nga, dinhi niini nga konteksto, ang kawang nagpasabut nga “walay unod” o “walay punto.” Ang pag-ampo gamit ang kawang nga pagbalik-balik mao ang pagsubli sa samang pag-ampo o sa samang mga pulong sa usa ka pag-ampo sa paagi nga wala hunahunaa.) Ngano kaha nga importanting malikayan ang kawang nga pagbalik-balik sa atong mga pag-ampo ngadto sa Langitnong Amahan?
Unsa ang pipila ka mga butang nga inyong mahimo aron malikayan ang kawang nga pagbalik-balik samtang kamo nag-ampo?
Unsa ang gitudlo sa Manluluwas sa Iyang ehemplo sa pag-ampo nga makatabang kanato nga malikayan ang pagpakaaron-ingnon?

Dapita ang mga estudyante sa pagpamalandong sa kalidad sa ilang mga pag-ampo ug magtinguha sa pagpalambo niini pinaagi sa paggamit sa unsay ilang nakat-unan gikan sa mga pagtulun-an sa Manluluwas.

3 Nephi 13:32–33. Unaha sa pagpangita ang gingharian sa Dios

Sa paghulagway sa baruganan nga gitudlo diha sa 3 Nephi 13:32–33, mahimo nimong ipasalida ang video gikan sa mga serye sa Mormon Messages for Youth (anaa sa mormonchannel.org). Pipila niining mga video naghatag og mga ehemplo sa mga tawo kinsa giuna ang Dios ug ang Iyang gingharian sa ilang kinabuhi. (Sama pananglit, mahimo nimong ipakita ang “A Work in Progress” o “No Regrets.”) Mahimo usab nimong ihulagway kining baruganan pinaagi sa pagpakigbahin og usa ka kaugalingon nimong kasinatian nga may kalabutan niini o usa nga gikan sa Ensign o sa New Era.

Human mapasalida ang video o masaysay ang kasinatian, mahimo nimong ipangutana ang mosunod:

Giunsa niining tawhana sa pag-una ang Dios diha sa iyang kinabuhi?
Unsang mga panalangin ang iyang nadawat gumikan sa pag-una sa Dios?

Aron matabangan ang mga estudyante nga makasabut og dugang nga mga paagi nga sila mapanalanginan sa pag-una sa Dios diha sa ilang kinabuhi, ipabasa sa usa ka estudyante ang mosunod nga pamahayag ni Presidente Ezra Taft Benson:

“Kon atong unahon ang Dios, ang tanan nga butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga pangangkon sa atong pagbati, sa kapuno sa atong panahon, sa mga kaayohan nga atong gitinguha, ug sa pagpahimutang sa atong mga prayoridad. …

“Kinahanglan nga ang Dios, ang Amahan sa atong mga espiritu, maoy atong unahon sa atong mga kinabuhi” (“The Great Commandment—Love the Lord,” Ensign, Mayo 1988, 4, 5).

Dapita ang mga estudyante sa pagpakigbahin og mga ehemplo kon sa unsang paagi nga sila o ang ilang kaila napanalanginan tungod sa pag-una sa Dios diha sa ilang kinabuhi.