3 Nephi 14

Pasiuna

Samtang si Jesukristo nagpadayon sa Iyang wali didto sa templo sa Bountiful, Siya mipasidaan sa katawhan mahitungod sa paghukom sa uban ug mitudlo kanila sa pagtinguha sa mga panalangin gikan sa Langitnong Amahan pinaagi sa pag-ampo ug pagbuhat sa Iyang kabubut-on. Ang Manluluwas mipasidaan usab kanila mahitungod sa mini nga mga propeta ug mipasabut og maayo sa kaimportante sa pagbuhat sa kabubut-on sa Dios.

Mga Sugyot alang sa Pagtudlo

3 Nephi 14:1–6

Ang Manluluwas nagtudlo mahitungod sa paghimo og matarung nga mga paghukom

Aron maandam ang mga estudyante sa pagtuon sa mga pagtulun-an sa Manluluwas sa paghimo og matarung nga mga paghukom, basaha ang mosunod nga istorya nga gisaysay ni Presidente Thomas S. Monson:

“Usa ka batan-ong magtiayon, si Lisa ug John, namalhin ngadto sa bag-ong kasilinganan. Usa ka buntag samtang namahaw sila, si Lisa mili-li sa bintana ug nagtan-aw sa iyang silingan nga nanghay-hay sa iyang linabhan.

“‘Kana nga linabhan dili limpyo!’ Matud ni Lisa. ‘Ang atong mga silingan dili kahibalong manglaba og sinina!’

“Mitan-aw si John apan walay gisulti.

“Sa matag higayon nga manghay-hay ang iyang silingan, mao gihapon ang mga komentaryo ni Lisa.

“Paglabay sa pipila ka semana, si Lisa natingala nga sa iyang pagli-li sa bintana nakakita og nindot, limpyong linabhan nga nakahay-hay sa nataran sa silingan. Miingon siya sa iyang bana, ‘Tan-awa, John—sa katapusan nakakat-on ra siya unsaon sa paglaba og tarung! Giunsa man kaha niya kini paghimo!

“Si John mitubag, ‘Kahibalo ka mahal, duna koy tubag alang nimo. Mainteres ka nga masayud nga misayo ko og mata kaganihang buntag ug gihugasan ang atong mga bintana!’” (“Ang Gugma nga Pultli Dili Gayud Mopakyas,” Ensign o Liahona, Nob. 2010, 122).

Unsa nga mga leksyon ang atong makat-unan gikan niini nga istorya?

Ipasabut nga ang 3 Nephi 14 naglangkob og usa ka sumpay sa mga pagtulun-an sa Manluluwas ngadto sa mga Nephite didto sa templo. Dapita ang usa ka estudyante sa pagbasa sa 3 Nephi 14:1–2. Hangyoa ang klase sa pagsunod ug ilhon ang pasidaan nga gihatag ni Jesukristo mahitungod sa paghukom sa uban. Mahimo nimong ipasabut nga ang pulong magsukod, nga makita sa 3 Nephi 14:2, nagpasabut nga paghukom. Ang mga pulong “sa bisan unsa nga sukod kamo magsukod” nagpasabut sa sumbanan nga gigamit sa usa ka tawo sa pagsukod o paghukom sa ubang tawo.

Sa unsang paagi kamo makapahayag sa kamatuoran diha sa 3 Nephi 14:2 sa inyong kaugalingong mga pulong? (Ang mga tubag sa mga estudyante kinahanglang magpakita sa mosunod nga kamatuoran: Kita pagahukman sumala sa paagi nga kita mohukom sa uban.)

Aron matabangan ang mga estudyante nga makasabut sa mando sa Manluluwas nga “ayaw paghukom” 3 Nephi 14:1, dapita ang usa ka estudyante sa pagbasa sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw sa matang sa paghukom nga angay natong likayan nga buhaton ngadto sa uban.

Ang “Katapusang paghukom … mao ang umaabut nga okasyon diin kitang tanan mobarug sa atubangan sa hukmanan ni Kristo aron pagahukman sumala sa atong mga buhat. … Nagtuo ko nga ang mando diha sa kasulatan nga ‘ayaw paghukom’ klaro kaayo nga gipasabut nga mao kining katapusang paghukom. …

“… Ngano nga ang Manluluwas mimando man nga dili kita mohukom og katapusang mga paghukom? Nagtuo ko nga kini nga sugo gihatag tungod kay maghunahuna man kita sa paghimo og katapusang mga paghukom sa higayon nga mamahayag kita nga ang usa ka tawo ma-impyerno (o malangit) tungod sa piho nga buhat o sa piho nga panahon. Kon ato kining buhaton—ug adunay dako nga tintasyon sa pagbuhat sa ingon—atong gipasakitan ang atong mga kaugalingon ug ang tawo nga ato kunohay nga gihukman. …

“…Ang ebanghelyo mao ang ebanghelyo sa paglaum, ug walay usa nato nga dunay katungod nga ilimud ang gahum sa Pag-ula aron sa paglimpyo sa kaugalingon nga mga sala, pagpasaylo, ug pag-usab sa kinabuhi sa tukma nga kahimtang” (“‘Judge Not’ and Judging,” Ensign, Ago. 1999, 7, 9).

Sa unsang paagi nga ang pamahayag ni Elder Oaks nakatabang ninyo nga makasabut sa mando sa Manluluwas nga “ayaw paghukom”?

Ipakita ang usa ka tipik sa materyal, sama sa usa ka gamayng tinagsip sa kahoy. Ipasabut nga ang laing pulong sa tipik mao ang puling. Dayon ipakita (o drowinga diha sa pisara) usa ka troso o usa ka taas nga piraso sa kahoy. Pahibaloa ang mga estudyante nga ang Manluluwas nagpasabut ngadto sa usa ka puling ug sa usa ka troso aron sa pagtabang kanato nga makasabut sa mga problema nga mahitabo kon kita mohukom sa uban sa dili matarung nga paagi. Dapita ang usa ka estudyante sa pagbasa og kusog sa 3 Nephi 14:3–5, ug hangyoa ang klase sa paghunahuna kon unsa ang girepresentaran sa puling ug sa troso.

Unsa ang girepresentaran sa puling? (Usa ka sayop nga atong makita sa laing tawo.) Unsa ang girepresentaran sa troso? (Atong kaugalingong mga sayop.)

Ipasabut nga ang analohiya sa Manluluwas nag-focus sa mga butang nga mitapot sa mata. Ang ingon nga mga butang makaapekto sa panan-aw sa tawo.

Sa unsang paagi nga ang atong mga sayop makaapekto sa atong pagtagad sa uban?

Dapita ang mga estudyante sa pagkonsiderar kon angay ba gayud kitang mohimo og mga paghukom sa ubang mga tawo. Hatagi sila og panahon nga makapamalandong niining pangutana. Dayon ipasabut nga sa dinasig nga hubad sa Mateo 7:1, si Propeta Joseph Smith mipatin-aw sa pagtulun-an sa Manluluwas mahitungod sa pagpanghukom sa uban. Sumala ni Joseph Smith, ang Manluluwas miingon, “Ayaw paghukom sa dili matarung nga paagi, aron ikaw dili pagahukman: apan paghukom sa matarung nga paghukom” (Hubad ni Joseph Smith, Mateo 7:1 [diha sa Mateo 7:1, footnote a]). Dapita ang usa ka estudyante sa pagbasa sa mosunod nga pagpasabut diha sa Matinud-anon sa Tinuhoan:

“Usahay ang mga tawo mobati nga sayop ang paghukom sa uban sa bisan unsang paagi. Samtang tinuod kini nga kinahanglang dili ka mopanghimaraut sa uban o mohukom kanila sa dili matarung nga paagi, kinahanglan ka nga mohimo og mga paghukom kabahin sa mga ideya, mga sitwasyon, ug mga tawo sa tibuok nimong kinabuhi. Ang Ginoo mihatag og daghang mga sugo nga dili nimo matuman kon walay pagahimoon nga mga paghukom” (Matinud-anon sa Tinuhoan: Usa ka Pakisayran sa Ebanghelyo [2004], 134).

Aron matabangan ang mga estudyante nga makita nga ang Manluluwas mitudlo sa kaimportante sa paghimo og matarung nga mga paghukom, dapita sila sa pagbasa og hilum sa 3 Nephi 14:6. Hangyoa sila sa pag-ila sa pipila ka mga paghukom nga Iyang gisugo kanato nga atong himoon. Hangyoa sila sa pagreport kon unsay ilang nakit-an.

Unsay buot ipasabut sa paghatag og mga butang nga balaan ngadto sa mga iro o sa paglabay og mga perlas ngadto sa mga baboy? (Sa pagpakigbahin og butang nga sagrado uban niadtong kinsa dili mopasalamat niini o dili motahud sa kasagrado niini.)
Sa unsang paagi nga ang tambag sa Manluluwas diha sa 3 Nephi 14:6 nagkinahanglan nga kita mohimo og mga paghukom sa uban?

Human makatubag ang mga estudyante, basaha ang mosunod nga pamahayag ni Elder Dallin H. Oaks mahitungod sa ubang mga sitwasyon diin kita kinahanglan nga mohimo og matarung nga mga paghukom:

“Kitang tanan mohimo og mga paghukom sa pagpili sa atong mga higala, sa pagpili kon unsaon nato paggamit sa atong oras ug atong salapi, ug, sa dayag, sa pagpili og mahangturong kompanyon. …

“…Ang usa ka matarung nga paghukom magiyahan pinaagi sa Espiritu sa Ginoo, dili pinaagi sa kasuko, panimalos, kasina, o sa kaugalingong interes”(“‘Judge Not’ and Judging,” 9).

Nganong importante man ang paghimo og matarung nga paghukom sa mga aspeto sama sa pagpili og mga higala, ang pagdesisyon kon unsaon paggamit ang atong oras ug kwarta, ug pagpili og mahangturong kompanyon?
Unsa pa ang ubang mga sitwasyon diin kinahanglan kita nga mohimo og mga paghukom sa uban? (Tingali maghisgot ang mga estudyante sa pagpili tali sa potensyal nga employer o sa pagdawat og usa ka imbitasyon sa usa ka pakig-date.)

3 Nephi 14:7–11

Ang Manluluwas nagtudlo mahitungod sa pagtinguha sa mga panalangin gikan sa Langitnong Amahan

Hangyoa ang mga estudyante sa pagbasa og hilum sa 3 Nephi 14:7–11, nga mangita sa mga pagtulun-an sa Manluluwas mahitungod sa kaandam sa Langitnong Amahan sa pagtubag sa atong mga pag-ampo. Ipasabut nga kon ang yutan-ong mga amahan, kinsa mabination ug mahigugmaon apan dili hingpit, mohatag sa ilang mga anak og pan ug isda imbis mga bato ug mga bitin, ang atong Langitnong Amahan, kinsa hingpit ang kamabination ug kamahigugmaon, siguradong motubag sa mga pag-ampo sa Iyang mga anak alang sa panabang.

Unsa nga mga baruganan ang atong makat-unan gikan sa 3 Nephi 14:7–11? (Ang mga estudyante mahimong motubag og lain-laing mga baruganan. Usa ka baruganan nga mahimo nimong ipasabut og maayo mao nga ang Langitnong Amahan mopanalangin kanato kon kita mag-ampo alang sa Iyang tabang.)
Nganong importante man nganha ninyo ang makahibalo nga ang Langitnong Amahan motubag sa inyong mga pag-ampo?
Kanus-a ninyo nabati ang gugma sa Langitnong Amahan alang kaninyo sa paagi nga gitubag Niya ang inyong mga pag-ampo? (Mahimo nimong hatagan ang mga estudyante og higayon sa pagpamalandong niining pangutana sa dili pa sila motubag niini. Ikonsiderar usab ang pagpakigbahin sa imong kaugalingong kasinatian.)

3 Nephi 14:12–27

Ang Manluluwas nagtudlo sa kaimportante sa pagbuhat sa kabubut-on sa Langitnong Amahan

Dapita ang mga estudyante sa pagbasa og hilum sa 3 Nephi 14:12, ug hangyoa sila sa pagkonsiderar kon sa unsang paagi nga ang pagtulun-an sa Manluluwas niini nga bersikulo makatabang kanila nga mahimong mas mahisama sa Langitnong Amahan.

Sa unsang paagi nga ang pagsunod sa tambag diha sa 3 Nephi 14:12 makatabang kanato nga mas mahisama sa atong Langitnong Amahan?

Pahibaloa ang mga estudyante nga samtang ang Manluluwas mipadayon sa pagtudlo, Siya migamit og mahinungdanong mga analohiya sa pagtabang kanato nga makasabut sa kaimportante sa pagbuhat sa kabubut-on sa Langitnong Amahan.

Sa pag-andam sa mga estudyante sa pagtuon sa mga analohiya sa Manluluwas diha sa 3 Nephi 14, ipahigayon ang mosunod nga kalihokan:

Bahina ang mga estudyante sa 2–4 ka grupo. Hatagi ang matag estudyante og usa ka pirasong papel. Isulat sa pisara ang mosunod nga mga pakisayran sa kasulatan, ug i-assign ang usa niini ngadto sa matag grupo: 3 Nephi 14:13–14; 3 Nephi 14:15–20; 3 Nephi 14:24–27. (Kon dako ang imong klase, i-assign ang mga scripture block ngadto sa sobra sa usa ka grupo.) Hangyoa ang mga estudyante sa pagbasa sa mga kasulatan nga gi-assign ngadto nila ug i-drowing ang mga analohiya nga gigamit sa Manluluwas. Ipasulat usab nila kon unsa ang ilang nakat-unan gikan sa mga analohiya.

Human sa igong panahon, hangyoa ang mga estudyante nga ipakita sa klase ang ilang mga litrato ug ipasabut kon unsay ilang nakat-unan. Samtang magpresentar ang mga estudyante kon unsay ilang nakat-unan, ipangutana ang mosunod:

Sa unsang paagi nga ang pagsunod sa ebanghelyo ni Jesukristo nahisama sa paglakaw diha sa pig-ot nga dalan? Sa unsang paagi nga ang pagsalikway sa mga pagtulun-an ni Jesukristo nahisama sa paglakaw diha sa lapad nga dalan? (Tan-awa sa 3 Nephi 14:13–14.) Unsay pipila ka mga pamaagi diin ang mga pagtulun-an sa Manluluwas lahi sa mga pagtulun-an sa kalibutan?
Ngano kaha nga ang usa ka lobo magsul-ob sa saput sa karnero? (Tan-awa sa 3 Nephi 14:15.) Unsa ang gisulti niining analohiya ngari kanato mahitungod sa mga tinguha ug mga lihok sa mini nga mga propeta?
Kon ang mga kahoy diha sa 3 Nephi 14:16–20 nagrepresentar sa mga katawhan, unsa kaha ang girepresentaran sa mga bunga? (Ang mga tubag tingali maglakip sa hunahuna, mga pulong, binuhatan, ug impluwensya sa mga tawo ngadto sa uban.)
Kon kita makadungog sa mga pulong sa Manluluwas ug mosunod niini, sa unsang paagi nga kita nahisama sa usa ka tawo nga nagtukod sa iyang balay ibabaw sa bato? (Tan-awa sa 3 Nephi 14:24–25.) Kon kita mopili sa dili pagsunod sa mga pulong sa Manluluwas, sa unsang paagi nga kita nahisama sa usa ka tawo kinsa nagtukod sa iyang balay diha sa balas? (Tan-awa sa 3 Nephi 14:26–27.)

Human sa mga presentasyon ug panaghisgutan sa mga estudyante, hangyoa ang usa ka estudyante sa pagbasa og kusog sa 3 Nephi 14:21–23.
Unsay atong makat-unan gikan sa 3 Nephi 14:21? (Ang mga estudyante mahimong mogamit og lain-laing mga pulong, apan kinahanglan silang makahibalo sa mosunod nga kamatuoran [isulat kini nga kamatuoran diha sa pisara]: Kinahanglan gayud natong buhaton ang kabubut-on sa Langitnong Amahan aron makasulod sa gingharian sa langit.)

Unsay kalabutan niining kamatuoran ngadto sa mga gihulagway sa halapad ug pig-ot nga mga dalan, maayo ug dautan nga mga kahoy, ug ang maalamon nga tawo ug ang buang- nga tawo?

Hatagi ang mga estudyante og panahon sa pagpamalandong ug sa paggamit kon unsay ilang nakat-unan gikan sa 3 Nephi 14. Dapita sila sa pagsulat diha sa ilang mga notebook o mga scripture study journal mahitungod kon unsaon nila pagpalambo sa ilang mga paningkamot sa pagsunod sa mga pagtulun-an sa Manluluwas diha sa 3 Nephi 14. Kon itugot sa panahon, dapita ang pipila ka mga estudyante sa pag-summarize sa unsay ilang nakat-unan ug sa pagpakigbahin kon unsay ilang buhaton tungod sa ilang nakat-unan. Mahimo nimong tapuson pinaagi sa pagpamatuod sa mga panalangin nga imong nadawat samtang ikaw nagsunod sa kabubut-on sa Langitnong Amahan.