Leksyon 130: 3 Nephi 21–22

Leksyon 130

3 Nephi 21–22

Pasiuna

Samtang si Jesukristo mipadayon sa pagtudlo sa mga Nephite, Siya mipasabut nga ang pagtungha sa Basahon ni Mormon sa katapusang mga adlaw maoy usa ka timailhan nga Siya misugod na sa pagpundok sa Israel ug sa pagtuman sa Iyang pakigsaad ngadto sa Iyang mga katawhan. Nagpasabut sa Iyang dakong gugma alang sa Iyang mga katawhan sa pakigsaad, ang Manluluwas mikutlo sa mga panagna ni Isaias mahitungod sa pagpahiuli sa mga katawhan sa pakigsaad.

Mga Sugyot alang sa Pagtudlo

3 Nephi 21:1–11

Si Jesukristo nagtudlo nga ang pagtungha sa Basahon ni Mormon mao ang usa ka timailhan sa pagpundok sa Israel sa katapusang mga adlaw

Sa dili pa magsugod ang klase, drowinga ang mosunod nga mga timailhan diha sa pisara (o gamita ang laing mga timailhan nga komon kon asa kamo nagpuyo).

Imahe

wheel man sign

Imahe

crosswalk sign

Imahe

exit sign

Imahe

two-way sign

Hangyoa ang mga estudyante sa pag-ila kon unsay gipasabut sa matag timailhan. Dayon ipangutana ang mosunod:

Unsa ang gamit sa mga timailhan? (Aron pag-andam, pagpasidaan, ug pagtudlo kanato.)
Nganong importante nga ang usa ka timailhan tukma ang pagkabutang ug ang mensahe sa timailhan sayon sabton?

Pahinumdumi ang mga estudyante nga kanunayng gipamulong sa mga kasulatan ang mga timailhan sa pag-andam, pagpasidaan, ug pagtudlo kanato kalabut sa katumanan sa plano sa Langitnong Amahan. Dapita ang mga estudyante sa pagsiksik sa 3 Nephi 21:1–2, 7, nga mangita sa pulong nga timailhan. Mahimo nimong isugyot nga markahan nila ang pulong bisan asa nga dapit kini makita niadtong mga bersikulo. Dayon hangyoa sila nga basahon og maayo ang bersikulo 1 sa hilum nga paagi.

Ngano kaha nga miingon ang Ginoo nga Siya mohatag niining partikular nga timailhan? (Aron mahibalo ang mga katawhan nga Siya nagpundok na sa balay ni Israel.)

Dapita ang mga estudyante sa pagbasa og hilum sa 3 Nephi 21:1–7, ug hangyoa sila sa pagtimaan sa mga pulong nga “kini nga mga butang” ug “kini nga mga buhat” ug sa paghunahuna kon unsa ang gipasabut niadtong mga pulong.

Nakig-istorya ngadto sa mga Nephite, ang Manluluwas namulong bahin “[niini] nga mga butang diin Ako mipahayag nganha kaninyo” (3 Nephi 21:2). Asa man narekord ang Iyang mga pulong ngadto sa mga Nephite? (Diha sa Basahon ni Mormon.)
Sumala niining mga bersikulo, unsa ang usa ka timailhan nga ang Dios nagtuman sa Iyang mga pakigsaad sa ulahing mga adlaw? (Tabangi ang mga estudyante nga mahibaloan ang mosunod nga kamatuoran [isulat kini diha sa pisara]: Ang pagtungha sa Basahon ni Mormon mao ang usa ka timailhan nga ang Dios nagtuman sa Iyang pakigsaad sa pagpundok sa Israel sa ulahing mga adlaw.)

Dapita ang usa ka estudyante sa pagbasa og kusog sa mosunod nga pamahayag ni Elder Russell M. Nelson sa Korum sa Napulog Duha ka mga Apostoles. Hangyoa ang klase sa pagpaminaw og mga paagi nga ang Basahon ni Mormon nagtabang sa mga tawo nga magkapundok ngadto sa buhat sa Ginoo.

Imahe

Elder Russell M. Nelson

“Ang Basahon ni Mormon maoy sentro niini nga buhat. Nagpadayag kini sa doktrina sa pagpundok. Nakapahimo kini sa mga tawo nga makat-on kabahin ni Jesukristo, nga motuo sa Iyang ebanghelyo, ug mopasakop sa Iyang Simbahan. Gani, kon wala pa ang Basahon ni Mormon, ang gisaad nga pagpundok sa Israel dili unta mahitabo” (“Ang Pagpundok sa Nagkatibulaag nga Israel,” Ensign o Liahona, Nob. 2006, 80).

Kanus-a man nga ang Basahon ni Mormon nakatabang kaninyo niining paagiha? Kanus-a man ninyo nakita nga ang Basahon ni Mormon nakatabang sa ubang tawo niining paagiha?

Dapita ang usa ka estudyante sa pagbasa og kusog sa 3 Nephi 21:9, ug hangyoa ang klase sa pagtimaan sa mga pulong nga “usa ka mahinungdanon ug usa ka kahibulongan nga buhat”. Ipasabut nga kining mga pulong nagpasabut ngadto sa Pagpahiuli sa ebanghelyo ni Jesukristo, nga naglakip sa pagtungha sa Basahon ni Mormon.

Unsa ang mahinungdanon ug kahibulongan sa Pagpahiuli sa ebanghelyo ni Jesukristo?

Imahe

Brother Joseph

Ipasabut nga ang 3 Nephi 21:9 nag-refer ngadto sa “usa ka tawo.” Dapita ang mga estudyante sa paghunahuna kon si kinsa kaha kini nga tawo. Dayon ipakita ang usa ka litrato ni Joseph Smith (tingali ang litrato nga Brother Joseph o ang litrato nga Ang Unang Panan-awon [Libro sa mga Hulagway sa Ebanghelyo (2009), nu. 87 o nu. 90]). Sultihi ang mga estudyante nga si Elder Jeffrey R. Holland sa Korum sa Napulog Duha ka mga Apostoles mitino sa tawo nga mao si Joseph Smith (tan-awa sa Christ and the New Covenant: The Messianic Message of the Book of Mormon [1997] 287–88). Dapita ang mga estudyante sa pagbasa og hilum sa 3 Nephi 21:10–11, nga mamalandong kon sa unsang paagi nga si Propeta Joseph Smith mihaum sa deskripsyon nag anaa niining mga bersikulo.

Sa unsang paagi gipakita sa Dios pinaagi ni Joseph Smith nga ang Iyang “kaalam labaw pa kay sa kamaliputon sa yawa”?
Sumala sa 3 Nephi 21:11, unsa ang mahitabo niadtong wala nagtuo diha sa mga pulong ni Kristo nga gipadala pinaagi ni Joseph Smith? (Sila “isalikway” gikan sa mga panalangin nga moabut pinaagi sa mga pakigsaad.)

3 Nephi 21:12–22:17

Ang Manluluwas namulong bahin sa kalaglagan sa dili mahinulsulon ug sa pagpahiuli sa Iyang mga katawhan nga maghinulsol ug mobalik ngadto Kaniya

I-summarize ang 3 Nephi 21:12–21 pinaagi sa pagpasabut nga ang Manluluwas mihatag og usa ka pasidaan niadtong naa sa katapusang mga adlaw kinsa dili motuo Kaniya ug maghinulsol. Siya miingon nga ang ilang mga kabtangan, siyudad, lig-ong panalipod, ug dautang mga buhat gub-on. Siya miingon usab nga sila isalikway gikan sa Iyang mga katawhan sa pakigsaad.

Dapita ang mga estudyante sa pagbasa og hilum sa 3 Nephi 21:22, 25–28, nga mangita sa mga panalangin ug mga responsibilidad nga moabut niadtong anaa sa katapusang mga adlaw kinsa maghinulsol ug mopatalinghug ngadto sa mga pulong sa Manluluwas.

Pangutan-a ang mga estudyante kon unsaon kaha nila pag-summarize ang mga pagtulun-an diha sa 3 Nephi 21:12–22, 25–28. Dapita ang usa ka estudyante sa pagsulat sa ilang mga tubag diha sa pisara. Dayon i-summarize ang tanang mga tubag diha sa pisara pinaagi sa pagpasabut nga samtang kita maghinulsol ug mopatalinghug ngadto sa mga pulong sa Manluluwas, kita gipundok isip kabahin sa Iyang mga katawhan sa pakigsaad. (Mahimo nimong isulat kining kamatuoran diha sa pisara.)

Pagdrowing og tolda diha sa pisara o sa usa ka poster (mahimo nimo kining buhaton sa dili pa magklase). Ipasabut nga si Jesukristo mikutlo sa usa ka panagna nga Siya midasig ni propeta Isaias sa pagsulat mga siglo na ang milabay. Dinhi niining panagna, si Isaias mikumpara sa Simbahan, uban sa mga pakigsaad ug mga panalangin niini, ngadto sa usa ka tolda.

Imahe

tent

Unsa ang pipila ka mga bintaha nga masilungan sa usa ka tolda? (Ang mga tubag mahimong maglakip nga ang usa ka tolda maghatag og proteksyon gikan sa unos ug landong gikan sa adlaw.)
Sa unsang paagi nga ang Simbahan sama sa usa ka tolda?

Hangyoa ang usa ka estudyante sa pagbasa og kusog sa 3 Nephi 22:2.

Nganong kining “tolda” kinahanglang mapalapdan ug mapalig-on sa ulahing mga adlaw? (Tungod kay daghang mga tawo ang mopasakop sa Simbahan o mobalik ngadto sa ilang mga pakigsaad uban sa Ginoo.) Unsa ang inyong mahimo aron makatabang sa pagpalapad sa tolda ug makapalig-on sa mga istaka? (Awhaga ang mga estudyante sa pagbuhat sa ilang mga tubag ngadto niining pangutana.)

Ipasabut nga dinhi niining samang panagna, si Isaias migamit og laing sambingay. Siya mi-refer ngadto sa balay ni Israel isip usa ka asawa kansang bana mao ang Ginoo. Dapita ang usa ka estudyante sa pagbasa og kusog sa 3 Nephi 22:4–5, ug hangyoa ang klase sa pagpangita sa mga pulong sa kahupayan alang sa asawa.

Unsa nga mga pulong sa kahupayan ang inyong makita diha sa 3 Nephi 22:4? (Ang mga tubag mahimong maglakip sa “kamo dili maulaw” ug “kamo … dili makahinumdom sa kaulawan sa inyong pagkabatan-on.”) Nganong makapahupay man nga makahibalo nga ang “bana” mao ang “Manunubos, ang Usa nga Balaan sa Israel”? (3 Nephi 22:5).
Sa unsang paagi nga kining mga bersikulo susama sa tubag sa Manluluwas ngari kanato kon kita makasala?

Dapita ang mga estudyante sa pagbasa og hilum sa 3 Nephi 22:7–10, nga mangita sa mga saad nga gihimo sa Manluluwas ngadto sa Iyang mga katawhan sa pakigsaad kinsa mobalik ngadto Kaniya.

Unsa ang gisaad sa Manluluwas niadtong mobalik ngadto Kaniya?
Unsa ang pipila ka mga kamatuoran nga atong makat-unan mahitungod sa Ginoo niining mga bersikulo? (Ang mga estudyante mahimong mopakigbahin og pipila ka nagkalain-laing mga tubag niining pangutana. Siguroha nga mahibalo sila sa mosunod nga kamatuoran: Ang Ginoo nagpakita sa walay katapusan nga pagkamabination ug kalooy ngadto sa mga tawo nga mobalik ngadto Kaniya. Mahimo nimong isulat kining kamatuoran diha sa pisara. Mahimo usab nimong ikonsiderar nga isugyot sa mga estudyante nga isulat kini diha sa ilang mga kasulatan tupad sa 3 Nephi 22:7–10.)

Aron matabangan ang mga estudyante nga mas makasabut sa 3 Nephi 22:4–10, ikonsiderar ang pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Imahe

Elder Jeffrey R. Holland

“Bisan tuod aduna na dihay pagkawalay pulos ug usahay pagkadili-matinud-anon, ang bana (si Jesukristo) nagbawi ug nagtubos gihapon sa iyang pangasaw-unon (ang Israel). Ang imahe ni Jehova isip pamanhunon ug ang Israel isip pangasaw-unon mao ang usa sa labing komon nga gigamit nga pasumbingay diha sa kasulatan, nga gigamit sa Ginoo ug sa iyang mga propeta nga naghulagway sa relasyon tali sa Makagagahum ug sa mga anak sa pakigsaad.

“… Si Kristo, sa usa ka okasyon, nasuko sa masinupakon nga Israel, apan sa kanunay kana sa makadiyot ug temporaryo lang—‘sa mubo nga panahon.’ Ang kapuangod ug kalooy kanunayng mobalik ug mopatigbabaw sa labing makapadasig nga paagi. Ang mga bukid ug ang mga kabungturan mahimong mawala. Ang tubig sa dakong kadagatan mahimong maughan. Ang labing minos nga posibling mahitabo nga mga butang sa kalibutan mahimong mahitabo, apan ang kamabination ug kalinaw sa Ginoo dili gayud makuha gikan sa iyang mga katawhan sa pakigsaad. Siya mihimo og usa ka langitnong panumpa nga siya dili masuko kanila hangtud sa kahangturan” (Christ and the New Covenant, 290).

Unsa nga mga ebidensya sa kalooy ug kamabination sa Manluluwas ang inyong nakita sa inyong kinabuhi? (Siguroha nga makasabut ang mga estudyante nga sila dili kinahanglang mopakigbahin og bisan unsang butang nga personal o pribado kaayo.)
Sa unsang paagi nga ang pag-angkon og kahibalo sa kalooy ug kamabination sa Manluluwas makaimpluwensya sa atong pagkamatinud-anon sa mga pakigsaad?

Ipasabut nga ang Manluluwas mipadayon sa pagtudlo sa mga Nephite sa mga panalangin nga naghulat sa matarung. Dapita ang mga estudyante sa pagsiksik sa hilum sa 3 Nephi 22:13–17, nga mangita alang sa usa ka gisaad nga panalangin nga mao ang labing makahuluganon ngadto kanila. Ipasabut nga samtang magbasa kita mahitungod niining gisaad nga mga panalangin, atong makita nga ang katawhan sa Ginoo maestablisar diha sa pagkamatarung ug magmadaugon batok sa kadautan.

Tapusa uban sa imong pagpamatuod bahin sa mga kamatuoran nga nahisgutan dinhi niining leksyon. Dapita ang mga estudyante sa pagsulat og tulo o upat ka mga sentence diha sa mga notebook o mga scripture study journal mahitungod sa usa ka butang nga ilang mabuhat karon aron mahimong angayan alang sa mga panalangin nga gitinguha sa Ginoo nga ihatag ngadto kanila.

Komentaryo ug Background nga Impormasyon

3 Nephi 21:12–13. “Ingon sa usa ka leon taliwala sa mga mananap sa lasang”

Nagpasabut ngadto sa mga pagtulun-an diha sa 3 Nephi 20:16, si Elder Bruce R. McConkie sa Korum sa Napulog Duha ka mga Apostoles mihimo sa mosunod nga pamahayag. Ang iyang mga komentaryo magamit usab sa 3 Nephi 21:12–13.

“Kining mga pulong sa atong Ginoo ngadto sa mga Nephite mga kinutlo gikan sa Miqueas 5:8–9 ug nagpasabut ngadto sa mga kaalautan ug sa katapusang pagsunog nga molaglag sa dautan atol sa Ikaduhang Pag-anhi. Gawas lang sa pipila kinsa mga mapainubsanon nga sumusunod ni Kristo, ang mga Hentil dili mohinulsol. Sila magmaya diha sa ilang mga pagkasalawayon ug sa sala batok sa gipahiuli nga ebanghelyo, ug sila pagasunugon pinaagi sa kahayag sa pag-anhi sa atong Ginoo samtang ang mga matarung—nga gitawag dinhi og mga salin ni Jacob—makasugakod. Ug unya, sa propetikanhon nga paghulagway, kini ingon nga ang salin sa Israel milaglag sa ilang mga kaaway isip usa ka batan-on nga leon taliwala sa mga panon sa karnero” (The Millennial Messiah: The Second Coming of the Son of Man [1982], 248).

3 Nephi 21:22. “Ako motukod sa akong simbahan taliwala kanila”

Ang pagpundok sa Israel mahitabo kon ang mga tawo motuo kang Jesukristo ug mahimong kabahin sa Iyang Simbahan (tan-awa sa 1 Nephi 15:14–16; 2 Nephi 9:1–2; 3 Nephi 5:20–26; 21:22; Mormon 9:36–37). Si Elder Bruce R. McConkie mitudlo:

“Wala gayuy usa nga mapundok uban sa Israel hangtud nga sila modawat sa Usa nga Gilansang. … Ang kasamtangan nga pagpundok sa mga Judeo ngadto sa Palestina politikal, dili espirituhanon, ug kini dili mao ang pagpundok sa Israel nga gihisgutan sa mga panagna.

“Ang pagpundok sa Israel naglangkob sa pagpasakop sa Ang Simbahan ni Jesukirsto sa mga Santos sa Ulahing mga Adlaw, ang simbahan nga mao ang bugtong tinuod ug buhi nga simbahan sa ibabaw sa yuta” (A New Witness for the Articles of Faith [1985], 564, 565; tan-awa usab sa mga pahina 511, 519–20 ug The Millennial Messiah: The Second Coming of the Son of Man [1982], 229).

3 Nephi 21:22–25. Ang Bag-ong Jerusalem

Giklaro ni Daniel H. Ludlow kon kinsa ang motukod sa siyudad sa Bag-ong Jerusalem:

“Ang ‘Bag-ong Jerusalem’ sa katapusang mga adlaw pagatukuron diha sa kayutaan sa Amerika pinaagi sa (1) ‘mga salin ni Jacob,’ (2) mga Hentil kinsa ‘moduol ngadto sa pakigsaad ug pagaiphon nga … salin ni Jacob,’ ug (3) ‘ingon ka daghan sa balay ni Israel nga moabut.’ (3 Nephi 21:22–25. Basaha usab ang 3 Nephi 20:22; Ether 13:1–12.)” (A Companion to Your Study of the Book of Mormon [1976], 281).

3 Nephi 22:2. “Lig-una ang inyong mga istaka”

Si Presidente Ezra Taft Benson mipasabut sa kahulugan sa termino nga istaka sumala sa paggamit niini diha sa 3 Nephi 22:2 ug ubang mga tudling sa kasulatan:

“Ang termino nga istaka usa ka pagsimbolo sa pagpahayag. Ihulagway diha sa inyong hunahuna ang dakong tolda nga gibanting ngadto sa daghang mga istaka nga lig-ong giugsok sa yuta.

“Ang mga propeta mitandi sa Zion sa ulahing mga adlaw ngadto sa usa ka dakong tolda nga naglukop sa kalibutan. Kana nga tolda gisuportahan sa mga banting nga gihigot ngadto sa mga istaka. Kadtong mga istaka, siyempre, mao ang lain-laing hiyograpikanhong mga organisasyon nga nagkatag sa tibuok kalibutan. Sa pagkakaron, ang Israel gipundok ngadto sa nagkalain-lain nga mga istaka sa Zion” (“Strengthen Thy Stakes,” Ensign, Ene. 1991, 2).