Leksyon 133: 3 Nephi 27

Leksyon 133

3 Nephi 27

Pasiuna

Sa wala madugay human sa pagpangalagad sa Manluluwas diha sa mga Nephite, ang napulog duha ka Nephite nga bag-ong gitawag sa pagkadisipulo nanagtigum sa pag-ampo ug pagpuasa. Si Jesukristo mipakita ngadto kanila ug mitubag sa ilang pangutana kalabut sa angayng ipangalan sa Simbahan. Siya mitudlo kanila mahitungod sa Iyang ebanghelyo ug misugo kanila nga mahimong sama Kaniya.

Mga Sugyot alang sa Pagtudlo

3 Nephi 27:1–12

Si Jesukristo nagtudlo sa napulog duha ka mga disipulo nga ang Iyang Simbahan kinahanglan modala sa Iyang ngalan

Bahina ang klase nga maggrupo sa tinagutlo o tinagup-at. Kon gamay ra ang imong klase, ang matag estudyante magtinagsa sa pagbuhat. Hangyoa ang matag grupo (o indibidwal) sa paghunahuna nga magsugod sila og usa ka bag-ong club o team sa sport. Hangyoa ang matag grupo sa paghukom kon unsang matang sa club o team sa sport ang ilang himoon, sama sa science club o usa ka team sa football, ug dayon hangyoa sila sa pagpili og usa ka ngalan alang sa ilang organisasyon. Hangyoa ang matag grupo sa pagsulat sa ilang ngalan diha sa usa ka piraso nga papel. Dayon kolektaha ang mga papel sa mga grupo. (Kini nga kalihokan kinahanglan nga kadiyot ra. Kinahanglan nga dili kini mokuha og dako kaayong panahon o pagtagad nga malayo sa mga doktrina ug mga baruganan diha sa 3 Nephi 27.)

Basaha og kusog ang ngalan diha sa matag papel. Human nimo mabasa ang matag ngalan, hangyoa ang klase sa pagtag-an, base sa ngalan, sa matang niini nga club o team.

Unsa ang mensahe sa usa ka ngalan mahitungod sa usa ka organisasyon ug sa mga katawhan niini?

Ipasabut nga sa wala madugay human sa pagbisita ni Jesukristo sa mga Nephite, ang Iyang napulog duha ka mga disipulo nga Nephite nagkahiusa diha sa pagpuasa ug pag-ampo (tan-awa sa 3 Nephi 27:1). Dapita ang pipila ka estudyante nga magpuli-puli sa pagbasa og kusog sa 3 Nephi 27:2–7. Hangyoa ang klase sa pagsunod, nga mangita sa pangutana sa mga disipulo ug sa tubag sa Manluluwas.

Unsa ang gisulti sa Manluluwas nga angayng itawag sa Iyang Simbahan?
Unsa ang mga rason nga Iyang gihatag sa paghingalan sa Simbahan sa Iyang Kaugalingon?

Dapita ang mga estudyante sa pagsiksik sa hilum sa 3 Nephi 27:8–12, nga mangita sa paghulagway sa Manluluwas sa Iyang tinuod nga Simbahan. Samtang nagtuon sila, isulat ang mosunod nga dili kompletong pamahayag diha sa pisara:

Ang tinuod nga Simbahan ni Jesukristo kinahanglan …

Human nakabaton og igong panahon ang mga estudyante sa pagsiksik niini nga mga bersikulo, pangutan-a sila kon unsaon nila sa pagkompleto ang sentence diha sa pisara base sa unsay ilang nabasahan. (Ang mga estudyante kinahanglang mahibalo sa mosunod nga kamatuoran: Ang tinuod nga Simbahan ni Jesukristo kinahanglan pagatawgon pinaagi sa Iyang ngalan ug matukod diha sa Iyang ebanghelyo.)

Ngano kahang importante man alang sa Simbahan sa Manluluwas nga magdala sa Iyang ngalan?
Unsa kaha ang ipasabut nga ang Simbahan kinahanglang “[m]atukod diha sa [Iyang] ebanghelyo”? (3 Nephi 27:10). Ngano kaha nga importante alang sa Simbahan nga pagatukuron diha sa Iyang ebanghelyo imbis nga diha sa mga buhat sa mga tawo?

Dapita ang mga estudyante sa pagkompleto sa mosunod nga sentence diha sa mga notebook o mga scripture study journal: “Ang akong pagkamiyembro sa Simbahan ni Jesukristo importante kanako tungod kay …”

3 Nephi 27:13–22

Si Jesukristo mipasabut sa Iyang ebanghelyo ug nagtudlo unsay angay natong buhaton aron makabarug nga walay kasaypanan diha sa Iyang atubangan ug sa Iyang Amahan

Hangyoa ang mga estudyante sa paghunahuna mahitungod sa unsay ilang gibati sa dihang nasakpan sila nga may gibuhat nga sayop. (Ayaw sila hangyoa sa pagpakigbahin niini nga mga kasinatian.) Dayon hangyoa sila sa paghunahuna kon unsa kaha ang bation kon mobarug sa atubangan sa Ginoo aron mahukman. Awhaga sila sa pagpamalandong sa mosunod nga pangutana:

Unsay inyong bation atubangan sa Ginoo kon kamo sad-an?

Ipasabut nga ang pulong ebanghelyo nagpasabut og “maayong balita.” Dapita ang pipila ka estudyante nga magpuli-puli sa pagbasa og kusog sa 3 Nephi 27:13–16, ug hangyoa ang klase sa pagpangita sa maayong balita niining mga bersikulo. Hangyoa usab sila sa pagkonsiderar kon sa unsang paagi nga kining maayong balita may kalabutan ngadto sa adlaw kon sila mobarug sa atubangan sa Dios aron pagahukman.

Ang Manluluwas mipamatuod nga Siya mianhi sa kalibutan sa pagbuhat sa kabubut-on sa Iyang Amahan. Sumala sa 3 Nephi 27:14, unsa ang tuyo sa Langitnong Amahan sa pagpadala ni Jesukristo nganhi sa kalibutan?
Base sa 3 Nephi 27:13–14, unsa man ang sukaranan sa ebanghelyo? (Bisan og ang mga estudyante mahimong mogamit og lain-laing mga pulong, kinahanglan silang mahibalo sa mosunod nga kamatuoran: Ang sukaranan sa ebanghelyo mao nga si Jesukristo mibuhat sa kabubut-on sa Iyang Amahan sa pagtuman sa Pag-ula. Mahimo nimong dapiton ang mga estudyante sa pagsulat niining kamatuoran diha sa ilang mga kasulatan tupad sa 3 Nephi 27:13–14.)
Tungod kay ang Manluluwas mituman sa kabubut-on sa Iyang Amahan, unsa ang mahitabo alang sa tanang katawhan? (Kita pagabayawon atubangan Kaniya aron pagahukman ang atong mga buhat.)

Dapita ang mga estudyante sa pagsiksik sa hilum sa 3 Nephi 27:16, nga mangita sa mga buhat nga angay natong buhaton aron madawat ang tanang mga panalangin sa Pag-ula ug sa pag-andam alang sa paghukom. Hangyoa ang mga estudyante sa pagreport sa unsay ilang nakit-an. Dapita ang usa ka estudyante sa pagsulat sa ilang mga tubag diha sa pisara.

Sumala niini nga bersikulo, unsa nga mga panalangin ang moabut niadtong kinsa maghinulsol, mabunyagan, ug molahutay hangtud sa katapusan? (Ang mga tubag sa mga estudyante kinahanglang magpakita sa mosunod nga kamatuoran: Kon kita maghinulsol, mabunyagan, ug molahutay hangtud sa katapusan, kita mahimong walay sala kon kita mobarug atubangan sa Dios aron pagahukman.)

Dapita ang usa ka estudyante sa pagbasa og kusog sa 3 Nephi 27:17–19. Hangyoa ang klase sa pagsunod, nga mangita kon unsay mahitabo niadtong dili maghinulsol o molahutay hangtud sa katapusan.

Gikan sa inyong nabasahan, nganong ang tanang anak sa Langitnong Amahan nagkinahanglan sa Pag-ula ni Jesukristo?
Unsa nga maayo nga balita ang anaa alang kanato samtang kita maghunahuna mahitungod sa pagbarug atubangan sa Ginoo aron pagahukman?

Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Imahe

Elder Jeffrey R. Holland

“Ang ‘maayong balita’ [mao] nga ang kamatayon ug ang impyerno [mahimo] nga malutsan, nga ang kasaypanan ug mga sala [mahimong] mabuntog, nga [adunay] paglaum, nga [adunay] tabang, nga ang lisud sulbaron [ma]sulbad, nga ang kaaway [na]lupig na. Ang maayong balita [mao] nga ang tanang lubnganan usa ka adlaw [ma]bakante, nga ang tanang kalag [ma]himong putli na usab, nga ang matag anak sa Dios [maka]balik pag-usab ngadto sa Amahan kinsa mihatag kanila og kinabuhi ”(“Missionary Work and the Atonement,” Ensign, Mar. 2001, 8, 10).

Dapita ang usa ka estudyante sa pagbasa og kusog sa 3 Nephi 27:20–21, ug hangyoa ang klase sa pagpangita sa imbitasyon sa Manluluwas ngari kanato.

Unsa man ang imbitasyon sa Manluluwas dinhi niini nga mga bersikulo?

Aron matabangan ang mga estudyante sa paghunahuna mahitungod sa ilang mga paningkamot sa pagdawat niining imbitasyon, dapita sila sa pagtubag sa mosunod nga mga pangutana diha sa mga notebook o mga scripture study journal. (Mahimo nimong isulat kining mga pangutana diha sa pisara sa dili pa magklase o basahon kini sa hinay aron ang mga estudyante makasulat niini.)

Nganong gusto man sa Manluluwas nga kamo maghinulsol ug moduol ngadto Kaniya?
Sa unsang mga paagi nga kamo nagdawat sa imbitasyon sa Manluluwas diha sa 3 Nephi 27:20–21?
Unsay inyong mahimo karon aron makaandam sa pagbarug nga walay lama diha sa atubangan sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 76:40–42. Hangyoa ang klase sa pagsunod, nga mangita og dugang nga mga pagtulun-an mahitungod kon nganong ang ebanghelyo mao ang maayong balita. (Mahimo nimong isugyot nga isulat sa mga estudyante ang D&P 76:40–42 diha sa ilang mga kasulatan tupad sa 3 Nephi 27:13.)

Sa bag-ong sugod sa leksyon, imong gihangyo ang mga estudyante sa pagpamalandong kon unsay ilang bation diha sa atubangan sa Ginoo kon sila sad-an. Niining puntoha sa leksyon, dapita sila sa pagpamalandong kon unsa kaha ang ilang bation diha sa atubangan sa Manluluwas kon sila makahibalo nga sila nalimpyuhan pinaagi sa Iyang Pag-ula ug pinaagi sa pagkamasulundon ngadto sa mga baruganan, mga sugo, ug mga ordinansa sa ebanghelyo.

Kon inyong ikahinabi ang Manluluwas nianang panahona, unsay inyong isulti?
Base sa unsay inyong natun-an karon, unsaon man ninyo sa pagpasabut ang maayong balita sa ebanghelyo ni Jesukristo ngadto sa usa ka higala?

3 Nephi 27:23–33

Si Jesukristo mimando sa Iyang mga disipulo nga mamahimong sama Kaniya

I-summarize ang 3 Nephi 27:23–26 pinaagi sa pagpasabut nga ang Manluluwas mihatag og instruksyon ngadto sa Iyang napulog duha ka mga disipulo nga Nephite ug mitudlo kanila mahitungod sa ilang mga responsibilidad. Dapita ang mga estudyante sa pagbasa og hilum sa 3 Nephi 27: 27, nga mangita sa sugo nga Iyang gihatag sa mga disipulo aron sila matabangan sa pagtuman sa ilang tahas isip mga maghuhukom sa katawhan.

Ngano kaha nga importante alang sa mga maghuhukom sa katawhan nga mahisama sa Manluluwas?

Hangyoa ang mga estudyante sa pagribyu sa 3 Nephi 27:21.

Unsa ang gimando sa Manluluwas nga buhaton sa mga disipulo?
Unsa man ang relasyon tali sa paghimo sa mga buhat sa Manluluwas ug sa pagkahimong sama Kaniya?

Samtang maghisgot ang mga estudyante niining pangutana, isulat ang mosunod nga baruganan diha sa pisara: Ang Ginoo naglaum sa Iyang mga disipulo nga mohimo sa Iyang mga buhat ug mahimong sama Kaniya.

Unsa ang pipila ka mga paagi aron kita mahisama sa Manluluwas? Unsa ang pipila ka mga buhat nga atong mahimo samtang magsunod kita sa Iyang ehemplo?
Sa unsang mga paagi nga kamo napanalanginan samtang naningkamot kamo sa pagsunod sa ehemplo sa Manluluwas?

Tapusa ang klase pinaagi sa pagpamatuod sa mga panalangin nga moabut samtang kita naningkamot nga mahisama kang Jesukristo.

Komentaryo ug Background nga Impormasyon

3 Nephi 27:8. Ang ngalan sa Simbahan

Ang Unang Kapangulohan mipahayag:

“Ang paggamit sa gipadayag nga ngalan nga, Ang Simbahan ni Jesukristo sa mga Santos sa Ulahing mga Adlaw (D&P 115:4), nagkadako ang kaimportante diha sa atong responsibilidad sa pagsangyaw sa pangalan sa Manluluwas sa tibuok kalibutan. Tungod niana, mohangyo kami nga kon maghisgot kita sa Simbahan atong gamiton ang kompletong pangalan niini kon mahimo” (Sulat sa Unang Kapangulohan, Peb. 23, 2001).

Si Presidente Harold B. Lee mitudlo:

“Sa dihang siya [ang Ginoo] mipadayag sa ngalan diin pagatawgon ang Simbahan, migamit siya og pipila ka mga makapainteresado nga mga pagpahayag. Siya miingon, ‘Kay sa ingon ang akong simbahan pagatawgon sa katapusan nga mga adlaw, gani Ang Simbahan ni Jesukristo sa mga Santos sa Ulahing mga Adlaw.’ (D&P 115:4.)

“Ang pulong ang importante: dili lang Simbahan ni Jesukristo sa mga Santos sa Ulahing mga Adlaw, tungod kay sa pagsulti nga ‘Ang Simbahan’ nagpaila niini isip ang bugtong tinuod nga simbahan sa ibabaw sa yuta. Wala siya moingon nga ang Mormon nga Simbahan; wala siya moingon nga LDS nga Simbahan, apan ang klaro, lig-on, dili masaypan nga pamahayag, ‘gani Ang Simbahan ni Jesukirsto sa mga Santos sa Ulahing mga Adlaw’” (“The Way to Eternal Life,” Ensign, Nob. 1971, 13).

3 Nephi 27:13–21. Ang ebanghelyo ni Jesukristo

Si Propeta Joseph Smith mipasabut sa sentro nga mensahe sa ebanghelyo ni Jesukristo:

“Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabutan sa atong relihiyon sumpay lamang niini” (Mga Pagtulun-an sa mga Presidente sa Simbahan: Joseph Smith [2007], 58).

Si Elder Russell M. Nelson sa Korum sa Napulog Duha ka mga Apostoles mitudlo:

“Ang pulong nga ebanghelyo nagpasabut og ‘maayong balita.’ Ang maayong balita mao ang Ginoong Jesukristo ug ang Iyang mensahe sa kaluwasan. Si Jesus miila sa ebanghelyo nga maglakip sa Iyang misyon ug sa Iyang pangalagad dinhi sa mortalidad. Sa Iyang misyon nga pamahayag, si Jesus miingon:

“‘Kini mao ang ebanghelyo diin Ako mihatag kaninyo—nga Ako mianhi sa kalibutan aron sa pagbuhat sa kabubut-on sa akong Amahan, tungod kay ang akong Amahan mipadala kanako.

“‘Ug ang akong Amahan mipadala kanako nga Ako unta ituboy diha sa krus.’ [3 Nephi 27:13–14.

“Ang mortal nga misyon sa Manluluwas atong nasayran isip mao ang Pag-ula.

“Ang mortal nga pangalagad sa Manluluwas naglakip sa tanang butang nga Iyang gibuhat—ang Iyang mga pagtulun-an, mga pagpahayag sa gugma, pagtagad sa mga ordinansa, mga sumbanan sa pag-ampo, paglahutay, ug dugang pa. Nagpakabuhi Siya aron atong mahimong Ehemplo, diin miisip usab Siya ngadto sa ebanghelyo sa Iyang pamahayag kalabut sa pagpangalagad. ‘Kini mao ang akong ebanghelyo,’ Siya miingon, ‘… kay ang mga buhat nga kamo nakakita nga Ako mihimo kana kamo mobuhat usab.’ [3 Nephi 27:21.] Busa, hugot nga pagtuo; paghinulsol; pagbunyag pinaagi sa tubig, kalayo, ug sa Espiritu Santo; ang pagpundok sa mga pinili; ug ang paglahutay ngadto sa katapusan mao ang tanan kabahin sa ebanghelyo” (“Ang Tigulang nga mga Misyonaryo ug ang Ebanghelyo,” Ensign o Liahona, Nob. 2004, 81).

3 Nephi 27:27. Pagkahimong sama ni Jesukrito

Si Presidente Ezra Taft Benson mitudlo:

“Labing talagsaon ug labing bulahan ug malipayon ang tawo kansang kinabuhi duol kaayo sa sumbanan ni Kristo. Wala kini kalabutan sa yutan-ong katigayunan, gahum, o dungog. Ang bugtong tinud-anay nga sukdanan sa kamaayo, kabulahan, ug kamalipayon mao ang kon unsa ka duol ang kinabuhi nga nahisama sa Agalon, nga si Jesukristo. Siya mao ang matarung nga dalan, ang hingpit nga kamatuoran, ug ang abunda nga kinabuhi” (“Jesus Christ—Gifts and Expectations” [debosyonal nga pakigpulong sa BYU, Dis. 10, 1974], 1, speeches.byu.edu).