3 Nephi 28

Pasiuna

Dihang nangutana si Jesukristo sa matag usa sa Iyang napulog duha ka Nephite nga mga disipulo kon unsa ang ilang gitinguha diha Kaniya, siyam ang mihangyo nga mobalik sa labing dali ngadto Kaniya kon ang ilang pagpangalagad dinhi sa yuta makompleto na. Tulo ang mihangyo nga magpabilin sa yuta aron makadala sa mga kalag ngadto Kaniya hangtud sa Iyang Ikaduhang Pag-anhi. Ang Ginoo mitahud sa duha ka matarung nga mga tinguha. Si Mormon mihatag og pipila ka mga detalye sa pagpangalagad sa Tulo ka Nephite, ug mipakigbahin usab siya sa gipadayag sa Ginoo ngadto kaniya mahitungod sa pisikal nga kausaban nga nasinati sa Tulo ka Nephite aron sila magpabilin sa yuta.

Mga Sugyot alang sa Pagtudlo

3 Nephi 28:1–11

Si Jesukristo mitugot sa mga tinguha sa Iyang mga disipulo nga mga Nephite

Dapita ang mga estudyante sa pagpamalandong kon unsaon nila sa pagtubag kon si Jesukristo mipakita kanila ug nangutana, “Unsa ang inyong tinguha kanako?” Hangyoa sila sa pagsulat sa ilang mga tubag diha sa mga notebook o mga scripture study journal. Hatagi sila og oportunidad sa pagpakigbahin kon unsay ilang nasulat kon sila mobati nga komportable sa pagbuhat niini.

Dapita ang mga estudyante sa pagbasa sa 3 Nephi 28:1–3, nga mangita sa tubag sa siyam ka mga disipulo nga Nephite sa dihang ang Ginoo nangutana kanila. Human makareport ang mga estudyante kon unsay ilang nakat-unan, ipangutana:

Unsa ang gibati sa Manluluwas mahitungod sa tinguha niining siyam ka mga disipulo?

Dapita ang mga estudyante sa pagbasa og hilum sa 3 Nephi 28:4–9, nga mangita kon unsay gitinguha sa nahibilin nga tulo ka mga disipulo sa Manluluwas. Ipareport sa mga estudyante kon unsay ilang nakit-an. (Mahimong makatabang nga makuha ang pagtagad sa mga estudyante sa mosunod nga pamahayag diha sa 3 Nephi 28: 9: “Kamo nagtinguha nga inyong dad-on ang mga kalag sa mga tawo ngari kanako.”)

Unsa ang gibati sa Manluluwas mahitungod sa tinguha niining tulo ka mga disipulo?
Sumala sa 3 Nephi 28:8–9, unsay gisaad sa Manluluwas sa Tulo ka Nephite aron ang ilang matarung nga mga tinguha matuman?

Dapita ang usa ka estudyante sa pagbasa og kusog sa 3 Nephi 28:10, ug hangyoa ang klase sa pagpangita sa mga panalangin nga gisaad sa Ginoo sa Tulo ka Nephite.

Unsa ang gisaad sa Ginoo sa Tulo ka Nephite? Kanus-a kamo nakakita nga ang pagserbisyo ngadto sa uban mosangput sa kalipay?
Unsay atong makat-unan mahitungod sa Ginoo gikan sa 3 Nephi 28:1–10? (Ang mga tubag sa mga estudyante niini nga pangutana mahimong maglakip nga ang Ginoo mopanalangin kanato sumala sa atong matarung nga tinguha ug nga ikahimuot sa Ginoo kon kita magtinguha sa pagtabang sa uban nga moduol ngadto Kaniya.)

Aron matabangan ang mga estudyante nga masabtan ang kaimportante sa matarung nga mga tinguha, basaha ang mosunod nga mga pamahayag:

Si Elder Neal A. Maxwell sa Korum sa Napulog Duha ka mga Apostoles miingon:

“Unsay padayon natong gitinguha, sulod sa taas nga panahon, maoy atong makab-ot sa katapusan ug maoy atong madawat didto sa kahangturan. …

“Busa, ang matarung nga mga tinguha kinahanglan nga magmakanunayon” (“According to the Desire of [Our] Hearts,” Ensign, Nob. 1996, 21–22).

Si Presidente Brigham Young mitudlo:

“Ang mga lalaki ug mga babaye, kinsa nagtinguha nga makaangkon og bahin sa celestial nga gingharian, makakaplag nga kinahanglan silang makigbatok sa kaaway sa tanang pagkamatarung sa matag adlaw” (“Remarks,” Deseret News, Dis. 28, 1864, 98).

Ngano kaha nga kinahanglan gayud kitang makigbatok sa matag adlaw aron ang atong matarung nga mga tinguha matuman?
Kanus-a kamo mibati nga ang Ginoo mipanalangin kaninyo tungod sa inyong matarung nga mga tinguha?

I-refer ang mga estudyante ngadto sa mga tinguha nga ilang gisulat sa pagsugod sa klase. Dapita sila sa pagsulat og pipila ka mga pulong mahitungod sa unsa ang sugdan nila nga buhaton karon aron sa pagsiguro nga kadtong matarung nga mga tinguha matuman.

3 Nephi 28:12–35

Si Mormon mihulagway sa pagpangalagad sa Tulo ka Nephite

Dapita ang usa ka estudyante sa pagbasa og kusog sa 3 Nephi 28:12–16. Hangyoa ang klase sa pagsunod, nga mangita kon unsa ang nahitabo ngadto sa mga disipulo nga Nephite human mibiya ang Manluluwas kanila. Ipasabut nga ang mga disipulo nakasinati og transpigurasyon—usa ka temporaryo nga kausaban sa ilang mga lawas.

Sumala sa 3 Nephi 28:15, unsa ang usa ka rason nganong ang mga disipulo kinahanglan nga mabalhin sa nahimayang panagway? (Aron nga “sila makakita sa mga butang kalabut sa Dios.”)

Ipasabut nga sugod sa 3 Nephi 28:17, atong mabasa ang paghulagway ni Mormon sa pagpangalagad sa Tulo ka Nephite. Dapita ang mga estudyante sa pagbasa og hilum sa 3 Nephi 28:17, nga mangita kon unsay wala mahibaloi ni Mormon mahitungod sa pisikal nga kondisyon sa Tulo ka Nehpite sa dihang siya misulat niini nga istorya. (Mahimo nimong sultihan ang mga estudyante nga sa kaulahian sa leksyon, sila makakat-on og dugang mahitungod sa kausaban nga nasinati sa Tulo ka Nephite.)

Dapita ang pipila ka estudyante nga magpuli-puli sa pagbasa og kusog sa 3 Nephi 28:18–23. Hangyoa ang klase sa pagsunod, nga mangita kon sa unsang paagi nga ang Ginoo mipanalangin sa Tulo ka Nephite aron sila makahimo sa ilang matarung nga mga tinguha.

Unsa ang gibuhat sa Tulo ka Nephite aron matuman ang ilang tinguha sa pagdala sa uban ngadto sa Manluluwas?
Sa unsang paagi nga ang Ginoo mipanalangin kanila aron sila makatuman sa ilang tinguha?

Dapita ang mga estudyante sa pagbasa og hilum sa 3 Nephi 28: 25–32, nga ilhon ang mga tawo kinsa nakabenepisyo ug gani makabenepisyo gikan sa pagpangalagad sa Tulo ka Nephite. Mahimo nimong isugyot nga markahan sa mga estudyante ang ilang makit-an. (Timan-i nga sa 3 Nephi 28:27–28 gipakita ang usa ka rason nganong kita kinahanglan nga magmaampingon mahitungod sa pagtuo ug pagpakigbahin og mga istorya nga gikan sa mga tawo nga miangkon nga nakahimamat sa Tulo ka Nephite: si Mormon miingon nga ang mga tawo kinsa serbisyohan sa Tulo ka Nephite “wala makaila kanila.”)

3 Nephi 28:36–40

Si Mormon nakakat-on mahitungod sa kahimtang sa nabalhin sa pagkahimaya nga mga binuhat

Pangutan-a ang mga estudyante kon sukad-sukad aduna ba silay usa ka pangutana mahitungod sa ebanghelyo o kon nakabasa ba sila og bisan unsang butang sa kasulatan nga wala nila masabti. Pahinumdumi sila nga sa dihang si Mormon unang misulat mahitungod sa transpigurasyon sa Tulo ka Nephite, siya miingon nga siya wala makasabut sa hingpit nga kausaban diha sa ilang pisikal nga kahimtang panahon sa ilang pagpangalagad dinhi sa yuta (tan-awa sa 3 Nephi 28:17).

Kang kinsa man kamo moduol kon kamo adunay mga pangutana mahitungod sa ebanghelyo o mahitungod sa mga tudling sa kasulatan? Ngano man?

Dapita ang mga estudyante sa pagbasa og hilum sa 3 Nephi 28:36–37 sa pagdiskubre unsa ang gibuhat ni Mormon sa pagpangita sa tubag sa iyang pangutana.

Unsa nga baruganan ang atong makat-unan gikan ni Mormon mahitungod kon unsaon pagdawat og dugang nga pagpasabut? (Bisan og ang mga estudyante mahimong motubag niining pangutana sa lain-laing paagi, siguroa nga mahibalo sila sa mosunod nga baruganan: Kon kita magkulang sa panabut, kita kinahanglan nga mangutana sa Langitnong Amahan ug makadawat kita og giya.)
Unsa ang pipila ka mga ehemplo nga naghulagway niining baruganan?
Unsa ang pipila ka mga sitwasyon diin kita tingali kinahanglang mangutana sa Langitnong Amahan alang sa mas dakong pagsabut?

Basaha ang mosunod nga pamahayag, diin si Presidente Spencer W. Kimball nagpasabut og pipila ka mga sirkumstansya diin kita angayng mag-ampo alang sa tabang:

Imahe

Presidente Spencer W. Kimball

“Matag usa kanato adunay dako kaayong panginahanglan sa Iyang panabang samtang magtinguha kita sa pagkat-on sa mga kamatuoran sa ebanghelyo ug dayon sa pagsunod niini, samtang magtinguha kita sa iyang tabang sa dagkong mga desisyon sa atong kinabuhi, mga desisyon nga may kalabutan sa pag-eskwela, kaminyoon, panarbaho, dapit nga kapuy-an, pagpadako sa atong mga pamilya, pagserbisyo sa usag usa diha sa buhat sa Ginoo, ug pagtinguha sa iyang kapasayloan ug padayon nga giya ug panalipod sa tanan natong buhaton. Ang atong listahan sa mga panginahanglan kinahanglang taas ug tinuod ug kinasingkasing. …

“Human sa tibuok kinabuhi nga mga pag-ampo, nasayud ko sa gugma ug gahum ug kalig-on nga moabut gikan sa matinuoron ug kinasingkasing nga pag-ampo. Nasayud ko sa kaandam sa atong Amahan sa pagtabang kanato sa atong mortal nga kasinatian, sa pagtudlo kanato, sa paggiya kanato. Sa ingon, uban sa dakong gugma, ang atong Manluluwas miingon, ‘Unsay akong isulti ngadto sa usa akong isulti ngadto sa tanan; pag-ampo kanunay.’ ((D&P 93:49.)” “Pray Always,” Ensign, Okt. 1981, 3, 6).

Unsaon ninyo pagpalambo sa inyong pagtuo diha sa gahum sa pag-ampo? Kanus-a kamo ug ang inyong pamilya nakadawat og mga tubag sa inyong mga pag-ampo?

Awhaga ang mga estudyante sa pagdangup sa Langitnong Amahan diha sa pag-ampo samtang sila maningkamot sa pagsabut sa ebanghelyo ug moatubang sa mga hagit sa kinabuhi. Pagpamatuod sa mga panalangin nga miabut sa imong kinabuhi sa dihang imong gidala angimong mga hagit ug mga pangutana ngadto sa Langitnong Amahan.

Ipasabut nga ang kausaban nga nasinati sa Tulo ka Nephite gitawag nga nabalhin sa pagkahimaya. Pipila sa matinud-anon nga mga sulugoon sa Ginoo nabalhin sa pagkahimaya aron sila makapadayon sa ilang pangalagad dinhi sa yuta. Samtang si Mormon mipadayon sa pagpangutana kabahin niining kausaban, nakat-on siya mahitungod sa kahimtang sa nabalhin sa pagkahimaya nga mga binuhat.

Isulat ang Nabalhin sa Pagkahimaya nga mga Binuhat diha sa pisara. Dapita ang usa ka estudyante sa pagbasa og kusog sa 3 Nephi 28:37–38. Hangyoa ang klase sa pagsunod, nga mangita kon unsay nakat-unan ni Mormon mahitungod sa kausaban nga nahitabo sa mga lawas sa Tulo ka Nephite.

Unsay nakat-unan ni Mormon mahitungod sa nabalhin sa pagkahimaya nga mga binuhat? (Hangyoa ang usa ka estudyante nga moserbisyo isip usa ka tigsulat ug isulat ang tubag sa ubang mga estudyante diha sa pisara. Ang mga tubag kinahanglang maglakip nga ang nabalhin sa pagkahimaya nga mga binuhat dili “makatilaw og kamatayon,” nga sila dili mobati og kasakit, ug nga sila dili makasinati og kasub-anan gawas sa kaguol nga ilang mabati tungod sa mga sala sa kalibutan.)
Nganong gikinahanglan man kini nga kausaban sa ilang mga lawas? (Mahimong imong iparibyu sa mga estudyante ang 3 Nephi 28:6–7. Ang kausaban gikinahanglan aron sila makatuman sa ilang matarung nga tinguha nga magpabilin sa yuta ug mopadayon sa pagdala og mga kalag ngadto kang Kristo hangtud sa Ikaduhang Pag-anhi sa Manluluwas.)

Dapita ang mga estudyante sa pagbasa og hilum sa 3 Nephi 28:39–40, nga mangita sa dugang nga impormasyon mahitungod sa nabalhin sa pagkahimaya nga mga binuhat. Samtang magreport ang mga estudyante, ipasulat diha sa pisara sa laing tigsulat ang ilang mga nakit-an. (Ang mga tubag kinahanglang maglakip nga ang nabalhin sa pagkahimaya nga mga binuhat dili gayud matintal ni Satanas, nga sila balaan, ug nga “ang mga gahum sa yuta dili makapugong kanila.”) Mahimong gikinahanglan nimong ipasabut nga bisan ang nabalhin sa pagkahimaya nga mga binuhat dili mag-antus og kasakit sa kamatayon, sila dili mga binanhaw. Dili nila madawat kanang “dako pa nga kausaban” hangtud sa Adlaw sa Paghukom, nga sila pagabalhinon gikan sa pagka-mortal ngadto sa pagka-imortal diha-diha dayon—“sa usa ka pamilok sa mata” (tan-awa sa 3 Nephi 28:8, 40).

Tapusa pinaagi sa pagpamatuod sa mga baruganan ug mga doktrina nga nahisgutan sa klase. Dapita ang mga estudyante sa paglihok sa mga pag-aghat nga ilang nadawat gikan sa Espiritu.

Komentaryo ug Background nga Impormasyon

3 Nephi 28. Transpigurasyon ug nabalhin sa pagkahimaya

Ang Tulo ka Nephite nahimaya ang panagway ug nabalhin sa pagkahimaya.

Ang Transpigurasyon, nga gihisgutan diha sa 3 Nephi 28:13–17, mao ang “kahimtang sa mga tawo kinsa temporaryong nausab ang panagway ug kinaiyahan—nga mao, ang pagsaka sa mas taas nga ang-ang sa pagka-espirituhanon—aron sila makalahutay sa presensya ug himaya sa langitnong mga binuhat” (Giya ngadto sa mga Kasulatan, “Transpigurasyon,” scriptures.lds.org; tan-awa usab sa D&P 67:11; Moises 1:11). Ang mga kasulatan naghisgot sa mga tawo kinsa nabalhin sa pagkahimaya, lakip na ni Moises (tan-awa sa Moises 1:9–11); ni Jesukristo, Pedro, Santiago ug Juan (tan-awa sa Mateo 17:1–8); ug ni Joseph Smith (tan-awa sa Joseph Smith—Kasaysayan 1:14–20).

Ang nabalhin sa pagkahimaya nga mga binuhat mao ang “mga tawo kinsa giusab aron dili makasinati og sakit o kamatayon hangtud sa ilang pagkabanhaw ngadto sa pagka-imortal” (Giya ngadto sa mga Kasulatan, “Nabalhin sa Pagkahimaya nga mga Binuhat ,” scriptures.lds.org; tan-awa usab sa 3 Nephi 28:7–9, 20–22, 37–40). Ang ilang katuyoan mao ang pagdala og mga kalag ngadto kang Kristo (tan-awa sa 3 Nephi 28:9). Ang mga kasulatan naglangkob sa mga istorya sa mga tawo kinsa nabalhin sa pagkahimaya, lakip nilang Enoch (tan-awa sa Genesis 5:24; Mga Hebreohanon 11:5), Moises (tan-awa sa Alma 45:19), Elijah (tan-awa sa 2 Mga Hari 2:11), ug Juan ang Hinigugma (tan-awa sa Juan 21:22–23; D&P 7).