3 Nephi 11:18–16:20 (Unit 25)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa 3 Nephi 11:18–16:20 (unit 25) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (3 Nephi 11:18–12:48)

Nakat-unan sa mga estudyante nga gikinahanglan gayud nga ang pagbunyag pagahimoon sa tawo kinsa naghupot sa tukma nga awtoridad ug kinahanglan gayud nga buhaton diha sa paagi nga gitakda sa Ginoo. Natun-an usab nila ang doktrina ni Kristo ug nakat-on nga ang Espiritu Santo nagpamatuod sa Langitnong Amahan ug ni Jesukristo. Sa ilang pagtuon sa mga Kabulahanan ug sa pagpasabut sa Manluluwas sa mas taas nga balaod, ilang nakat-unan nga kon kita magpuyo sumala sa mga pagtulun-an ni Jesukristo, kita mapanalanginan ug maandam sa pagsulod sa gingharian sa langit. Nakat-unan usab nila nga kon kita moduol ngadto ni Kristo ug mosunod sa Iyang mga sugo, kita mas mahisama Kaniya ug sa atong Amahan sa Langit, kinsa mga hingpit.

Day 2 (3 Nephi 13)

Gikan sa mga pagtulun-an sa Manluluwas mahitungod sa kadasig alang sa paghatag og halad, pag-ampo, ug pagpuasa, nakat-unan sa mga estudyante nga kon kita mobuhat sa matarung nga mga buhat sa pagpahimuot sa Langitnong Amahan, Siya dayag nga moganti kanato. Samtang ang mga estudyante nagtuon sa mga pagtulun-an sa Manluluwas mahitungod sa kaimposible nga mag-alagad og duha ka agalon, ilang nakat-unan ang mosunod nga mga baruganan: Aron mahimo nga ang Dios maoy atong Agalon, kinahanglan higugmaon ug serbisyuhan nato Siya labaw pa sa mga butang sa kalibutan. Kon atong tinguhaon og una ang gingharian sa Dios, Siya motabang kanato sa pagsangkap sa atong mga panginahanglan.

Day 3 (3 Nephi 14)

Ang mga pagtulun-an sa Manluluwas mahitungod sa paghukom sa matarung nga paagi nakatabang sa mga estudyante nga makasabut nga kita pagahukman sumala sa paagi nga kita mohukom sa uban. Nakat-unan usab nila nga ang Langitnong Amahan mopanalangin kanato kon kita mag-ampo alang sa Iyang tabang. Ang mga estudyante nagdrowing og mga hulagway nga nagpakita sa mga pagtulun-an sa Manluluwas ug nakakat-on nga kita kinahanglang mobuhat sa kabubut-on sa Langitnong Amahan aron makasulod sa gingharian sa langit.

Day 4 (3 Nephi 15–16)

Nakat-unan sa mga estudyante nga si Jesukristo mao ang tinubdan sa tanan nga mga balaod ug mga sugo sa ebanghelyo. Kon kita motan-aw ngadto Kaniya pinaagi sa pagsunod sa Iyang mga sugo ug paglahutay hangtud sa katapusan, Siya mohatag kanato og kinabuhing dayon. Samtang ang mga estudyante nagtuon sa mga pulong sa Manluluwas mahitungod sa “lain nga karnero” (3 Nephi 15:21), ilang nakat-unan nga ang Dios nag-amuma sa tanan Niyang mga anak ug nagpakita sa Iyang Kaugalingon ngadto kanila. Nakat-unan usab nila nga ang Dios naghatag kanato sa kahibalo ug kamatuoran sumala sa atong hugot nga pagtuo ug kamasulundon.

Pasiuna

Niini nga leksyon ang mga estudyante mokonsiderar kon sa unsang paagi makaapekto ang panagbingkil sa ilang abilidad nga mobati sa Espiritu. Maghunahuna usab sila mahitungod niadtong nahimong positibo nga mga ehemplo ngadto kanila ug mokonsiderar kon sa unsang paagi nga makaalagad sila og mas maayo isip mga ehemplo ngadto sa uban.

Mga Sugyot alang sa Pagtudlo

3 Nephi 11:18–41

Si Jesukristo mihan-ay sa paagi sa bunyag, nanghimaraut sa panagbingkil, ug mipahayag sa Iyang doktrina

Isulat sa pisara ang pulong nga panagbingkil, ug hangyoa ang mga estudyante nga ihulagway kini nga pulong (argumento, kasungian, o panaglantugi).

Dapita ang mga estudyante nga sa daklit ilista sa pisara ang pipila ka mga sitwasyon o mga kalihokan diin sila mahimong adunay kalagmitan nga makasinati og panagbingkil. (Mahimong duna kay usa ka estudyante isip tigsulat samtang ang klase maghatag sa mga tubag.) Samtang nagbuhat niining kalihokan, likayi ang unsay gitawag ni Elder Dallin H. Oaks sa Korum sa Napulog Duha ka mga Apostoles nga “mga pamaagi sa kaaway” nga mahimong makaawhag og “debate ug kontrobersiya” (The Lord’s Way [1991], 139).

Pahinumdumi ang mga estudyante nga sa 3 Nephi 11 ilang mabasa nga si Jesukristo mipakita ngadto sa mga Nephite kinsa nanagpundok didto sa templo. Dapita ang usa ka estudyante sa pagbasa og kusog sa 3 Nephi 11:28, ug hangyoa ang klase sa pagpangita sa hilisgutan nga gilalisan sa pipila sa mga Nephite. (Aron matabangan ang mga estudyante nga makasabut niini nga bersikulo, mahimo nimong ipasabut nga ang pulong nga panaglalis nagpasabut og mga argumento o dili pagkasinabut.)

Ipangutana: Ngano kaha nga importante nga likayan ang panaglalis o panagbingkil kon maghisgot sa ebanghelyo ngadto sa uban?

Isulat ang mosunod diha sa pisara: Ang espiritu sa panagbingkil dili iya sa Dios, apan … Dapita ang usa ka estudyante sa pagbasa og kusog sa 3 Nephi 11:29–30, ug hangyoa ang mga estudyante sa pag-ila kon asa naggikan ang espiritu sa panagbingkil. Ang kamatuoran nga ilang makit-an mahimong ipahayag sama sa mosunod: Ang espiritu sa panagbingkil dili iya sa Dios, apan iya sa yawa. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.

Ipangutana: Sa unsang paagi nga ang paghinumdom sa mga pagtulun-an sa Manluluwas diha sa 3 Nephi 11:29–30 makatabang kaninyo kon kamo anaa sa sitwasyon nga makig-away? (Mahimo nimong itudlo ang piho nga mga sitwasyon nga gisulat sa pisara o ipakonsiderar sa mga estudyante og usa ka sitwasyon diin ang usa ka tawo gusto nga makiglalis kabahin sa mga punto sa ebanghelyo.)

Aron matabangan ang mga estudyante nga makasabut sa usa ka importante nga sangputanan sa panagbingkil, basaha o i-display ang mosunod nga pamahayag ni Presidente James E. Faust sa Unang Kapangulohan: “Kon adunay panagbingkil, ang Espiritu sa Ginoo mobiya, dili magsapayan kon si kinsa ang sayop” (“What I Want My Son to Know before He Leaves on His Mission,” Ensign, Mayo 1996, 41).

Mahimo nimong isugyot sa mga estudyante nga isulat kini nga pamahayag diha sa ilang mga kasulatan o sa ilang mga scripture study journal.

Ipangutana: Nabati ba ninyo sukad nga ang Espiritu sa Ginoo mibiya tungod sa panagbingkil? Unsay inyong gibati kabahin niana?

Ipasabut ang pulong sa Manluluwas mahitungod sa panagbingkil diha sa 3 Nephi 11:30: “Mao kini ang akong doktrina, nga ang ingon niini nga mga butang pagahunungon.” Dayon ipangutana ang mosunod:

Unsaon nato paghunong ang panagbingkil ug mga panaglalis?
Unsaon nato pagsupak sa uban ug maglikay sa panagbingkil?
Sa unsang paagi kamo mibati nga napanalanginan sa inyong mga paningkamot sa paglikay o pagbuntog sa panagbingkil?

Mahimo kang mopakigbahin og kasinatian sa dihang mibati ka nga napanalanginan tungod sa imong paningkamot sa paglikay o pagbuntog sa panagbingkil. Dapita ang mga estudyante nga mo-refer ngadto sa lista diha sa pisara ug magpili og usa ka sitwasyon diin kanunay silang mobati nga gustong makig-away. Hatagi sila og panahon sa pagsulat og usa ka tumong alang sa paagi nga sila maningkamot sa paglikay o pagbuntog sa panagbingkil diha niana nga sitwasyon.

3 Nephi 12–16

Si Jesukristo nagtudlo sa mga baruganan nga makatabang sa Iyang mga anak nga mopadulong ngadto sa pagkahingpit

Dapita ang mga estudyante sa pagbarug ug i-recite ang 3 Nephi 12:48. Tingali kinahanglan nimong ipapraktis nila og pila ka higayon aron hingpit nilang ma-recite ang scripture mastery passage. Hangyoa ang mga estudyante sa paggamit sa ilang mga kasulatan aron ipakita ang pipila sa mga hiyas sa pagkahingpit nga gihisgutan diha sa 3 Nephi 12:1–12 nga ilang gilauman nga mas mapalambo pa.

Pagbutang og gamayng asin sa kutsara, ug pangutan-a ang mga estudyante sa pagtag-an kon unsa kining butanga. Dayon dapita ang usa ka estudyante sa pagduol ug ilhon ang butang pinaagi sa pagtilaw niini. Human kini maila sa estudyante nga asin, hangyoa ang klase sa paglista sa mga benepisyo sa asin. Samtang ilang tubagon, siguroha nga maklaro nga agi og dugang sa timpla sa pagkaon, ang asin gigamit isip usa ka preservative aron dili madaut ang karne.

Hangyoa ang mga estudyante sa pagbasa sa 3 Nephi 12:13 nga mangita kon kinsa ang gipakasama sa Manluluwas ngadto sa asin. Samtang motubag ang mga estudyante, ipasabut nga Siya nag-refer dili lang sa pundok sa mga katawhan didto sa templo nianang adlawa apan sa tanan usab kinsa mga nabunyagan ngadto sa Iyang pakigsaad.

Ipangutana: Sa unsang paagi nga kita, isip mga sumusunod ni Jesukristo, mahimong sama sa asin? (Angay kitang motabang sa pagpatunhay o pagluwas sa katawhan ug mopalambo sa kalibutan pinaagi sa pag-impluwensya sa uban alang sa kaayohan.)

Ipasabut nga sa 3 Nephi 12:13 ang pulong nga tagamtamon nagpasabut dili lamang ang lami sa asin, apan ang gamit usab niini isip preservative.

Hangyoa ang usa ka estudyante sa pagbasa sa mosunod nga pamahayag ni Elder Carlos E. Asay sa Seventy kalabut sa paagi nga ang asin mawad-an sa lami:

“Ang asin dili mawad-an sa iyang lami sa kadugayan. Ang lami mawala sa paagi nga masagulan ug makontaminado. Sa samang paagi … ang kamaayo ug kalidad mobiya sa tawo kon ang iyang hunahuna makontaminado sa hugaw nga mga hunahuna, nagdaut sa iyang ba-ba pinaagi sa pagsulti og mas ubos kay sa kamatuoran, ug sayop nga paggamit sa iyang kusog sa paghimo og dautang mga buhat” (“Salt of the Earth: Savor of Men and Saviors of Men,” Ensign, Mayo 1980, 42).

Ipangutana: Nganong kinahanglan kitang maningkamot nga mahimong putli aron makaimpluwensya sa uban alang sa kaayohan?

Ipakita sa mga estudyante ang usa ka flashlight. Pasigaa kini, ug dapita ang mga estudyante sa pagbasa sa 3 Nephi 12:14–16 ug pangitaa kon sa unsang paagi nga ang Manluluwas migamit sa kahayag sa pagtudlo og dugang mahitungod sa tahas sa Iyang mga katawhan sa pakigsaad diha sa kalibutan. Sa dili pa sila mobasa, tingali makatabang ang pagpasabut nga ang usa ka tadyaw usa ka bukag.

Ipangutana: Sa unsa kaha nga paagi nga ang mga miyembro sa Simbahan kinsa nagsunod sa ilang mga pakigsaad mahimong kahayag ngadto sa uban?

Tabuni ang kahayag gamit ang usa ka bukag o toalya, ug ipangutana ang mosunod:

Unsa ang pipila ka mga pamaagi nga kita mahimong matintal sa pagtabon sa atong kahayag?
Sumala sa 3 Nephi 12:16, nganong gusto sa Manluluwas nga atong ipakita ang matarung nga ehemplo alang sa uban? (Samtang kita magpakita og matarung nga ehemplo, kita makatabang sa uban nga himayaon ang Langitnong Amahan. Mahimo nimong isugyot nga isulat sa mga estudyante kini nga baruganan diha sa margin sa ilang mga kasulatan.)
Kang kinsang matarung nga ehemplo ang nakatabang kaninyo nga mas maduol ngadto sa Langitnong Amahan o nakapalig-on sa inyong tinguha nga sundon sa mas hingpit ang ebanghelyo?

Awhaga ang mga estudyante nga mahimong sama sa asin ug sama sa usa ka kahayag ngadto sa kalibutan pinaagi sa pagpili nga mahimong matarung nga mga ehemplo.

Ipasabut nga ang Manluluwas mipadayon sa pagtudlo sa mga Nephite nga ang tinuod nga ganti sa matarung nga pagsunod sa mga sugo moabut samtang sila nagsimba sa walay pagpakaaron-ingnon ug wala magbutang sa ilang mga kasingkasing diha sa kalibutanong mga bahandi o ganti. Isulat ang mosunod nga mga pakisayran sa kasulatan diha sa pisara: 3 Nephi 13:22; 13:31–33; 14:7–8; 15:9; 16:13. Dapita ang mga estudyante sa pagpangita niining mga tudling ug ilhon ang pipila ka mga ganti nga ang Amahan sa Langit misaad kanato kon ang atong mga kasingkasing nag-focus sa matarung nga pagpakabuhi. Human sa igo nga panahon, dapita sila sa pagreport sa unsay ilang nakit-an.

Ipakigbahin ngadto sa mga estudyante ang imong pagpamatuod nga ang Langitnong Amahan ug si Jesukristo motabang ug mopanalangin kanila sa ilang mga paningkamot sa paghunong sa panagbingkil ug mahimong usa ka matarung nga ehemplo ngadto sa kalibutan.

Sunod nga Unit (3 Nephi 17–22)

Sultihi ang mga estudyante nga samtang magtuon sila sa 3 Nephi 17–22, ilang mabasa nga si Jesukristo nakahilak sa dihang Siya nakig-uban sa mga anak sa mga Nephite. Awhaga sila sa pagpangita sa mga tubag sa mosunod nga mga pangutana: Unsa ang Iyang gibuhat alang kanila? Unsa ang ubang milagro nga nahimo ni Jesus samtang nangalagad sa mga Nephite?