Pasiuna sa Scripture Mastery

Ang Seminaries and Institutes of Religion mipili og 25 ka mga scripture mastery passage alang sa matag usa sa upat ka mga kurso sa seminary. Kini nga mga tudling naghatag og usa ka importante nga pundasyon sa kasulatan alang sa pagsabut ug pagpakigbahin sa ebanghelyo ug sa paglig-on sa pagtuo. Ang mga scripture mastery passage alang sa Basahon ni Mormon mao ang mosunod:

Ang mga estudyante sa seminary giawhag sa pagpalambo og “pag-master” niini nga mga tudling. Mas makatabang ka sa imong mga estudyante kon masag-ulo usab nimo kini nga mga tudling. Ang pag-master sa mga tudling sa kasulatan naglakip sa mosunod:

Pagpangita sa mga bersikulo pinaagi sa pagkasayud sa konektado nga mga scripture reference
Pagsabut sa kinatibuk-ang kahulugan ug sulod sa mga tudling sa kasulatan
Paggamit sa mga baruganan ug mga doktrina sa ebanghelyo nga gitudlo sa mga tudling sa kasulatan
Pagmemorya sa mga tudling

Kamakanunayon, Ekspektasyon, ug mga Pamaagi

Samtang nagplano ka sa pagtabang sa mga estudyante nga mamemorya ang mga tudling sa kasulatan, mas magmalampuson ka kon makanunayon ka nga mo-refer ngadto sa mga scripture mastery passage, momintinar og angay nga mga ekspektasyon, ug mogamit og mga pamaagi nga magustohan sa lain-laing mga estilo sa pagkat-on.

Ang pagkamakanunayon ug pagbalik-balik sa pagtudlo sa scripture mastery makatabang sa mga estudyante nga mabutang ang mga kamatuoran diha sa ilang malungtarong mga panumduman [long-term memories] nga magamit sa umaabut. Mahimong makatabang ang pag-outline sa kurso sa pagtuon alang sa tuig ug sa paghimo og plano aron kanunay nga makahatag og mga oportunidad sa classroom alang sa mga estudyante nga mamemorya ang mga tudling sa kasulatan. Pagmaalamon sa pagtino kon unsa kasagad ug unsa kadako ang panahon nga igahin sa pagtabang sa mga estudyante nga makakat-on sa mga scripture mastery passage. Siguroha nga ang mga kalihokan sa scripture mastery dili mohulip sa inadlaw nga pasunod nga pagtuon sa mga kasulatan. Mahimo ka nga modesisyon nga mogahin og pipila ka minuto matag adlaw sa pagribyu sa mga scripture mastery passage uban sa imong mga estudyante. O tingali modesisyon ka nga mohatag og mubo nga mastery activity kausa o kaduha matag semana sulod sa 10 ngadto sa 15 minutos. Bisan giunsa nimo pagplano sa pagtabang sa mga estudyante nga makakat-on sa mga scripture mastery passage, pagmakanunayon lang ug tukma ang imong mga paningkamot.

Ibase sa abilidad sa matag estudyante ang imong mga ekspektasyon sa scripture mastery. Ang pagmemorya sa mga tudling sa kasulatan nagkinahanglan og paningkamot diha sa bahin sa tigkat-on. Pakig-istoryahi ang mga estudyante nga ang ilang kalampusan sa scripture mastery mag-agad kaayo sa ilang kinaiya ug sa ilang kaandam nga motrabaho. Awhaga sila sa paghimo og mga tumong nga mapatas-an ang ilang mga abilidad. Pagmabination sa mga estudyante nga tingali maglisud sa pagmemorya, ug pagmahimong andam nga mapahiangay ang imong mga ekspektasyon ug mga pamaagi sa pagtudlo sumala sa panginahanglan sa imong mga estudyante.

Aron mahimong madanihon ngadto sa mas daghang matang sa personalidad ug mga estilo sa pagkat-on, ilain-lain ang mga pamaagi nga imong gamiton sa pagtabang sa mga estudyante nga mamemorya ang mga tudling sa kasulatan. Sama sa tanan nga mga pagtudlo ug pagkat-on sa ebanghelyo, pagmaalamon sa imong mga pagpili sa mga kalihokan aron ang Espiritu Santo makasuporta sa pagkahimong hanas sa mga estudyante diha sa kasulatan ug doktrina. Makaplagan nimo ang pipila ka angay nga mga pamaagi sa pagtudlo sa scripture mastery sa mga leksyon niini nga manwal. Alang sa dugang nga mga pamaagi sa pagtudlo sa scripture mastery, tan-awa sa ubos ang nakalista nga mga kalihokan sa scripture mastery.

Scripture Mastery sa Kurikulum

Ang scripture mastery gisulat diha sa kurikulum sa pipila ka mga paagi. Ang usa ka scripture mastery icon nag-ila unsaon pagtratar ang mga scripture mastery passage diha sa materyal sa leksyon. Ang mga scripture mastery passage gipaila ug gihisgutan diha sa konteksto sa mga kapitulo diin kini nahimutang. Ang dugang nga mga ideya sa pagtudlo alang sa mga scripture mastery passage makita diha sa katapusan sa mga leksyon diin kini nahimutang. Kining dugang nga mga ideya sa pagtudlo makatabang sa pagbalanse sa upat ka mga elemento sa scripture mastery (pagpangita, pagsabut, paggamit, ug pagmemorya) kalabut sa matag tudling. Sama pananglit, kon ang leksyon nagtabang sa mga estudyante sa pagsabut ug paggamit sa scripture mastery passage, niana ang dugang nga ideya sa pagtudlo makatabang kanila sa pagpangita o pagmemorya sa tudling.

Ang kurikulum kanunay usab nga naghatag og pangribyu nga mga kalihokan sa scripture mastery nga mahimong gamiton kon itugot sa panahon ug nahiuyon sa mga tumong sa scripture mastery sa imong klase. Kini nga mga pagribyu mahimong suportahan og mga kalihokan sa scripture mastery nga gilista sa ubos. Mahimo nimong gamiton ang ekstra nga panahon dapit sa sinugdanan o katapusan sa usa ka mas mubo nga leksyon sa pagbuhat og usa niini nga pangribyu nga mga kalihokan.

Gisugyot nga mga Paagi alang sa Scripture Mastery

Aron matabangan ang mga estudyante sa mga kahanas sa pagpangita, mahimo nimong iplano ang pagpaila sa 25 ka mga mastery passage sa sinugdanan sa kurso ug dayon paningkamutan ang pagpalambo sa scripture mastery sa tibuok kurso. O mahimo nimong ipaila ang pipila ka mga tudling matag bulan ug motutok sa pagpasag-ulo niana nga mga tudling niana nga bulan. Ang ingon niana nga mga pasiuna mahimong maglakip sa pagsugyot nga ang mga estudyante momarka sa mga scripture mastery passage diha sa ilang tagsa-tagsa ka mga kopya sa kasulatan, pagtabang sa mga estudyante sa paghunahuna og mga paagi nga mahinumduman ang importanting mga pulong ug mga pakisayran, ug pagpasabut sa mga doktrina ug mga baruganan nga anaa sa matag tudling. Mahimo usab nimong ilakip ang mga estudyante sa pagpaila sa mga scripture mastery passage pinaagi sa pag-assign kanila sa paggamit sa mga tudling diha sa ilang mga debosyunal o pinaagi sa pagdapit kanila sa pagtudlo sa usag usa unsaon sa paghinumdom ug pagpangita sa mga tudling. Hatagig gibug-aton ang responsibilidad sa paghinumdom sa mga scripture mastery passage gamit ang panagsa nga mga eksamin ug mga kalihokan sa pagpangita (tan-awa ang mga kalihokan sa scripture mastery sa ubos alang sa mga ehemplo). Ang lista sa 25 ka mga mastery passage alang niini nga kurso sa pagtuon makita diha sa mga bookmark sa estudyante ug sa mga scripture mastery card.

Aron matabangan ang mga estudyante sa pagsabut sa mga scripture mastery passage, hatagig gibug-aton kini nga mga tudling kon motumaw kini sa imong inadlaw nga mga leksyon. Mahimo usab nimong gamiton ang mga kalihokan sa scripture mastery nga naa sa ubos aron mapalambo ang kahibalo ug abilidad sa mga estudyante sa pagpasabut sa mga kamatuoran nga anaa sa mga tudling. Hatagi ang mga estudyante og mga oportunidad diha sa mga debosyunal o atol sa klase sa pagpasabut kon sa unsang paagi ang mga kamatuoran diha sa scripture mastery passage makatabang kanila nga mas makasabut sa Sukaranang mga Doktrina.

Aron masuportahan ang mga estudyante sa ilang paggamit sa mga kamatuoran nga makaplagan diha sa mga scripture mastery passage, awhaga sila sa pagsunod sa mga aghat sa Espiritu Santo sa pagsabut kon sa unsang paagi ang mga kamatuoran diha sa mga tudling magamit sa ilang kinabuhi. Aron matabangan ang mga estudyante sa pagsunod sa mga kamatuoran nga ilang nakat-unan, mahimo ka nga mopapilit usahay og usa ka hagit kalabut sa usa ka scripture mastery passage diha sa bulletin board sa klase. O mahimo nimong hatagan ang mga estudyante og mga oportunidad diha sa klase nga magpraktis sa pagtudlo sa mga doktrina ug mga baruganan sa ebanghelyo gamit ang mga scripture mastery passage (tan-awa ang mga kalihokan sa scripture mastery diha sa ubos alang sa mga ideya). Mahimo usab nimong dapiton ang mga estudyante sa paggamit sa mga baruganan nga ilang nakat-unan diha sa mga leksyon kon asa makita ang mga scripture mastery passage. Hatagi ang mga estudyante og mga oportunidad, sa debosyunal o sa laing mga higayon, sa pagreport sa ilang mga kasinatian. Makatabang kini kanila nga mapalambo ang ilang pagsaksi sa mga kamatuoran nga ilang nakat-unan gikan sa mga scripture mastery passage.

Aron matabangan ang mga estudyante sa pagmemorya sa 25 ka mga scripture mastery passage, makaplano ka sa pagmemorya og duha o tulo ka mga tudling kada bulan diha sa klase. Mahimo usab nimong hagiton ang mga estudyante sa pagmemorya og piho nga mga tudling diha sa panimalay (makahimo sila niini uban sa ilang mga pamilya o i-recite ang mga tudling ngadto sa usa ka ginikanan o sakop sa pamilya). Mahimo nimong himoon ang pagmemorya isip kabahin sa inadlaw nga mga debosyunal pinaagi sa paghangyo sa klase sa pag-recite og usa ka tudling o pinaagi sa paghatag og panahon alang sa mga estudyante sa pagmemorya nga magpares. Ang paghatag sa mga estudyante og mga oportunidad sa pag-recite og mga scripture mastery passage nga magpares o sa ginagmay nga mga grupo o sa atubangan sa klase makatabang kanila nga manubag sa ilang mga paningkamot. Ang mga kalihokan sa scripture mastery nga naa sa ubos naglakip sa nagkalain-laing mga pamaagi sa pagmemorya. Bantayi nga ang mga ekspektasyon sa pagmemorya mohaum sa mga abilidad ug mga sirkumstansya sa matag estudyante. Ang mga estudyante dili angay nga mobati nga maulawan o mabug-atan kon dili sila makamemorya sa mga tudling.