Mga Sugyot alang sa Pailin-ilin nga mga Adlaw [Flexible Days]

Ang giya sa gipaspason alang sa mga daily teacher gibase sa 36 ka semana o 180 ka adlaw nga school year. Kini nga manwal naghatag og 160 ka inadlaw nga mga leksyon, nagbilin og 20 ka adlaw nga walay gihatag nga materyal sa pagtudlo. Kining 20 ka “pailin-ilin nga mga adlaw [flexible days]” kinahanglang gamiton sa maalamong paagi alang sa maayo nga mga tumong ug mga kalihokan, lakip ang mosunod:

1. Pagpahiangay sa inadlaw nga mga leksyon. Mahimo ka nga mogahin og ekstra nga oras sa usa ka leksyon nga nagkinahanglan og dugang panahon aron epektibo ang pagtudlo. Mahimo usab nimong gamiton ang dugang nga mga ideya sa pagtudlo nga makita diha sa katapusan sa pipila ka mga leksyon o mogahin og panahon sa pagtubag sa mga pangutana sa mga estudyante mahitungod sa usa ka piho nga tudling sa kasulatan o hilisgutan sa ebanghelyo. Ang pailin-ilin nga mga adlaw magtugot kanimo nga makapahimulos niini nga mga oportunidad samtang nagsunod ka sa iskedyul sa gipaspason ug nagtuman sa imong katungdanan sa pagtudlo sa mga kasulatan sa pasunod nga paagi.

2. Pagsag-ulo sa importanting mga tudling sa kasulatan ug Sukaranang mga Doktrina. Mahimo nimong gamiton ang pangribyu nga mga kalihokan alang sa mga scripture mastery passage nga makita sa tibuok manwal ug diha sa appendix. Makahimo ka og dugang nga mga pangribyu nga mga kalihokan sa scripture mastery nga motubag sa piho nga mga panginahanglan ug interes sa mga estudyante sa imong klase. Magamit usab nimo ang parte sa usa ka pailin-ilin nga adlaw alang sa mga kalihokan nga makatabang sa mga estudyante sa pagribyu ug pagpalawom sa ilang pagsabut sa Sukaranang mga Doktrina. Sa pagsugod sa tuig, mahimo nimong gamiton ang pailin-ilin nga adlaw alang sa pagpahigayon sa Basic Doctrines Assessment (BDA) [Assessment alang sa Sukaranang mga Doktrina (ASD)] nga gidesinyo aron matabangan ang mga magtutudlo sa pag-assess sa mga estudyante sa ilang nasabtan, gituohan, nahibaloan kon unsaon sa paggamit, ug pagpasabut sa pipila ka sukaranang mga doktrina sa Simbahan. Sa pagpangita sa Assessment sa Sukaranang mga Doktrina ug uban pang mga assessment diha sa S&I website (si.lds.org), i-search gamit ang keyword nga assessment. Ang mga report sa ASD [BDA] makatabang sa mga magtutudlo nga mipahigayon sa assessment sa pag-analisar sa mga panginahanglan sa mga estudyante ug mapahaum ang pagtudlo aron makab-ot kana nga mga panginahanglan.

3. Pagribyu sa miaging materyal. Makatabang sa mga estudyante nga hinumduman sa matag karon ug unya ang ilang nakat-unan sa miaging mga leksyon o gikan sa piho nga basahon sa kasulatan. Mahimo nimong hatagan ang mga estudyante og oportunidad sa pagpasabut og usa ka kamatuoran gikan sa miagi nga leksyon ug sa pagpakigbahin kon sa unsang paagi kana nga kamatuoran nakaimpluwensya sa ilang mga kinabuhi. Makahimo ug makapahigayon ka usab og mubo nga eksamin o mga kalihokan sa pagkat-on nga magribyu sa miaging materyal.

4. Pagtugot alang sa mga pagkabalda sa iskedyul. Ang mga kalihokan o mga panagtigum sa eskwelahan, mga kalihokan sa komunidad, panahon, ug uban pang mga pagkabalda tingali magkinahanglan nga imong i-cancel o pamub-an ang klase sa matag karon ug unya. Ang pailin-ilin nga mga adlaw mahimong gamiton alang sa ingon nga mga pagkabalda.