Leksyon 138
Mormon 3–4
Pasiuna
Human nakuha pag-usab ang ilang mga yuta gikan sa mga Lamanite, ang mga Nephite nangandam na usab alang sa gubat. Nanghangyo si Mormon sa mga Nephite nga maghinulsol. Hinuon, nanghambug pa sila sa ilang kaugalingon nga kalig-on ug nanumpa nga manimalos alang sa ilang mga kaigsoonan nga nangamatay. Tungod kay ang Ginoo nagdili sa Iyang katawhan nga manimalos, midumili si Mormon sa pagpangulo sa kasundalohan sa mga Nephite ug napildi sila. Samtang nagpadayon ang mga Nephite sa pagkadautan, gibu-bu sa Dios ang Iyang paghukom ngadto kanila, ug ang mga Lamanite misugod sa pagsilhig kanila gikan sa yuta.
Mga Sugyot alang sa Pagtudlo
Mormon 3:1–8
Ang Ginoo miluwas sa mga Nephite sa gubat aron mahatagan sila sa kahigayunan sa paghinulsol, apan nagmagahi sila sa ilang mga kasingkasing
Sa dili pa magklase, isulat ang mosunod nga pangutana sa pisara: Mibati ka ba sukad nga ang Ginoo misulay sa pagkuha sa imong atensyon ug miawhag kanimo sa pag-usab og usa ka butang sa imong kinabuhi?
Sugdi pinaagi sa paghangyo sa mga estudyante sa pagpakigbahin sa ilang mga tubag sa pangutana nga naa sa pisara. (Siguroa nga dili sila mobati nga naobligar nga mopakigbahin og bisan unsa nga personal o pribado ra kaayo.) Mahimo usab nimong ikonsiderar ang pagpakigbahin og usa ka kasinatian.
Ipasabut nga ang Ginoo gustong mokuha sa atensyon sa mga Nephite aron sila mausab sa ilang dautan nga mga binuhatan. Bisan pa man, ang mga Nephite mipatig-a sa ilang mga kasingkasing ug wala makaamgo nga ang Ginoo nagpalangin kanila sa ilang mga gubat batok sa mga Lamanite. Human ang mga Nephite mihimo og usa ka kasabutan uban sa mga Lamanite ug sa mga tulisan ni Gadianton (tan-awa sa Mormon 2:28), giprotektahan sila sa Ginoo, nga nagtugot kanila sa pagpakabuhi sulod sa 10 ka tuig nga walay bingkil. Niadtong mga tuiga, gitabangan ni Mormon ang mga Nephite sa pagpangandam alang sa umaabut nga mga pag-atake (tan-awa sa Mormon 3:1).
Dapita ang usa ka estudyante sa pagbasa og kusog sa Mormon 3:2–3. Hangyoa ang klase sa pagsunod, nga mangita kon unsay gusto sa Ginoo nga buhaton sa mga Nephite atol sa panahon sa kalinaw nga Iyang gihatag kanila.
-
Unsa nga mensahe ang gisugo sa Ginoo ni Mormon nga ihatag sa mga Nephite? Nasabtan ba sa mga Nephite kini nga mensahe? Giunsa man pagtubag sa mga Nephite ang mensahe?
-
Sumala sa Mormon 3:3, ngano nga giluwas man sa Ginoo ang mga Nephite sa ilang bag-ohay lang nga mga gubat bisan sa ilang pagkadautan?
-
Unsa nga kamatuoran ang imong nailhan gikan sa mga pagtagad sa Ginoo sa mga Nephite nga girekord diha sa Mormon 3:2–3? (Ang mga estudyante mahimong mohatag og lain-laing mga tubag. I-summarize ang ilang mga tubag pinaagi sa pagsulat sa mosunod nga kamatuoran sa pisara: Ang Ginoo naghatag kanato og igong mga kahigayunan sa paghinulsol sa atong mga sala. Mahimo kang mosugyot nga isulat sa mga estudyante kini nga kamatuoran diha sa ilang mga kasulatan.)
I-summarize ang Mormon 3:4–8 pinaagi sa pagpasabut nga ang Ginoo miprotektar sa mga Nephite sa gubat sa duha pa ka mga higayon, bisan sa ilang kadautan ug sa ilang pagdumili nga modangup Kaniya.
-
Unsay matudlo kanimo kabahin sa kinaiya sa Ginoo sa Iyang pagprotektar sa mga Nephite? (Ang mga tubag mahimong maglakip nga ang Ginoo maloloy-on ug mapailubon.)
Ipasabut nga ang Ginoo mohatag kanatong tanan og “kahigayunan alang sa paghinulsol” (Mormon 3:3). Dayon hangyoa ang mga estudyante nga mamalandong sa hilum sa mosunod nga mga pangutana:
-
Nagmatinguhaon ka ba sa paghinulsol ug sa paghimo sa mga kausaban nga gusto sa Dios nga imong buhaton? Aduna bay mga kausaban nga imong mabuhat karon aron mahimo nga tawo nga gusto sa Dios nga ikaw mamahimo?
Ipamatuod ang kamabination ug kamapailubon sa Dios sa paghatag kanato og mga oportunidad sa paghinulsol. Dapita ang mga estudyante sa pagpangita og mga oportunidad ug mga imbitasyon aron maghimo og mga kausaban sa ilang mga kinabuhi, ug awhaga sila sa paghimo dayon og mga kausaban.
Mormon 3:9–22
Misamot ang kadautan sa mga Nephite, ug nagdumili si Mormon sa pagpangulo sa ilang mga kasundalohan
Ipasabut nga ang mga Nephite wala motubag sa mga imbitasyon sa Ginoo sa paghinulsol apan hinoon nagpatig-a sa ilang mga kasingkasing. Dapita ang usa ka estudyante sa pagbasa og kusog sa Mormon 3:9–10. Hangyoa ang klase sa pagsunod, nga mangita kon unsay gibuhat sa mga Nephite tungod sa ilang daghang kadaugan batok sa mga Lamanite. (Tingali kinahanglan nimong isulti sa mga estudyante nga ang pulong nga manimalos sa bersikulo 9 nagpasabut sa pagtinguha nga mobalos.)
-
Unsa man ang gibuhat sa mga Nephite human sa ilang kadaugan batok sa mga Lamanite?
-
Nganong sayop man nga manghambug ang mga Nephite bahin sa ilang kaugalingon nga kalig-on? Unsa man ang gipakita niini nga pagpanghambug kabahin sa ilang relasyon sa Dios?
Dapita ang usa ka estudyante sa pagbasa og kusog sa Mormon 3:11–13. Hangyoa ang klase sa pagpangita sa tubag ni Mormon sa dihang nanumpa ang mga Nephite nga manimalos.
-
Unsay gibuhat ni Mormon sa dihang ang mga Nephite mipahayag og tinguha sa pagpanimalos sa mga Lamanite?
-
Nakasulay ka ba sa pagtinguha og pagpanimalos sa usa ka tawo? Ngano sa imong hunahuna nga ang tinguha sa pagpanimalos usa ka natural nga tubag alang sa kadaghanan?
-
Nangulo si Mormon sa kasundalohan sa mga Nephite sobra 30 ka tuig, bisan sa ilang kadautan. Unsa man ang matudlo mahitungod sa kaseryuso sa pagtinguha og panimalos ang pagdumili ni Mormon nga mangulo sa kasundalohan?
Dapita ang usa ka estudyante sa pagbasa sa Mormon 3:14–16, ug awhaga ang klase sa pagpangita kon unsay gitudlo sa Ginoo kang Mormon kabahin sa tinguha sa pagpanimalos.
-
Unsay pagbati sa Ginoo mahitungod sa pagtinguha sa pagpanimalos? (Mahimong magkalain-lain ang mga tubag sa mga estudyante. I-summarize ang ilang mga tubag pinaagi sa pagsulat sa mosunod nga kamatuoran sa pisara: Ang Ginoo nagdili kanato sa pagtinguha sa pagpanimalos.)
Aron pagtabang sa mga estudyante nga mas makasabut sa tambag sa Ginoo sa mga bersikulo 14–16, hangyoa ang mga estudyante sa pagpahayag pag-usab sa unang bahin sa Mormon 3:15 (“Ang pagpanimalos ako, ug Ako ang mobayad pag-usab”) sa ilang kaugalingon nga mga pulong.
-
Nganong importante man nga dili magtinguha sa pagpanimalos? Unsaon nato sa pagbuntog ang mga tinguha sa pagpanimalos?
Aron matabangan ang mga estudyante nga makat-on kon unsaon sa pagbuntog ang mga pagbati sa pagpanimalos, dapita ang usa ka estudyante sa pagbasa og kusog sa mosunod nga tambag gikan ni Presidente James E. Faust sa Unang Kapangulohan: Kon mahimo, paghatag og kopya sa kinutlo alang sa matag estudyante.
“Gikinahanglan natong ilhon ug dawaton ang kasuko nga mga pagbati. Nagkinahanglan og pagpaubos ang pagbuhat niini, apan kon kita moluhod ug mangayo sa Langitnong Amahan alang sa usa ka pagbati sa pagpasaylo, Siya motabang kanato. Ang Ginoo nagkinahanglan kanato ‘nga mopasaylo sa tanan nga mga tawo’ [D&P 64:10] alang sa atong kaugalingong kaayohan tungod kay ang ‘kasilag nagsumpo sa espirituhanong pagtubo.’ [Orson F. Whitney, Gospel Themes (1914), 144.] Sa pagkuha lamang diha sa atong mga kaugalingon sa kasilag ug kaligutgot nga ang Ginoo makabutang og kahupay sa atong mga kasingkasing. …
“… Kon ang trahedya moigo, kinahanglan dili kita motubag pinaagi sa panimalos apan hinoon pasagdan ang hustisya nga modagan, ug unya buhian. Dili sayon ang pagbuhi ug haw-angon ang atong kasing-kasing sa nagkadako nga kalagot. Ang Manluluwas midalit kanatong tanan og bililhong kalinaw pinaagi sa Iyang Pag-ula, apan kini moabut lamang samtang kita andam mopapahawa sa dili maayo nga mga pagbati sa kasuko, kasilag, o panimalos” (“Ang Makaalim nga Gahum sa Pagpasaylo,” Ensign o Liahona, Mayo 2007, 69).
Dapita ang usa ka estudyante sa pagbasa og kusog sa Mormon 3:17, 20–22, ug hangyoa ang klase sa pagpangita kon unsay gusto ni Mormon nga atong masayran. Mahimo kang modapit og mga estudyante sa pagmarka sa tambag ni Mormon sa “paghinulsol ug sa pag-andam aron mobarug sa atubangan sa hukmanan ni Kristo” (Mormon 3:22).
Mormon 4
Ang mga Lamanite misugod sa pagsilhig sa mga Nephite gikan sa yuta
Hangyoa ang mga estudyante sa pag-isa sa ilang kamot kon may nailhan silang tawo nga nakahimo og sayop apan wala masakpi o makasinati sa mga sangputanan sa nahimong sayop. Dapita ang mga estudyante sa pagpamalandong sa mosunod nga pangutana:
-
Nakahunahuna ba kamo kon kanus-a modangat ang mga sangputanan sa sayop nga mga pagpili ngadto sa usa ka tawo kinsa nasayud gayud nga nagpili sa sayop?
Dapita ang mga estudyante sa pagbasa sa hilum sa Mormon 4:1–2, nga mangita sa unsay nahitabo sa kasundalohan sa mga Nephite samtang nagtinguha sila sa pagpanimalos ngadto sa mga Lamanite. Dayon hangyoa ang mga estudyante sa pagbasa sa hilum sa Mormon 4:4, nga mangita nganong ang kasundalohan sa mga Nephite wala nagmalampuson. Hangyoa ang mga estudyante sa pagreport sa ilang nakit-an.
Dapita ang usa ka estudyante sa pagbasa og kusog sa Mormon 4:5. Dapita ang klase sa pagsunod, nga mangita sa mga kamatuoran nga gitudlo niini nga bersikulo kabahin sa mga resulta sa pagpadayon diha sa pagkadautan. Samtang ipakigbahin sa mga estudyante unsa ang ilang nakit-an, isulat sa pisara ang mosunod nga kamatuoran gikan sa Mormon 4:5: “Ang mga paghukom sa Dios mobuntog sa mga dautan.” Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.
Dapita ang mga estudyante sa pagbasa sa hilum sa Mormon 4:10–12, nga mangita sa mga paghulagway sa kadautan sa mga Nephite. Hangyoa ang mga estudyante sa pagreport sa ilang nakit-an.
Dapita ang pipila ka estudyante nga magpuli-puli sa pagbasa og kusog gikan sa Mormon 4:13–14, 18, 21–22. Hangyoa ang klase sa pagsunod, nga mangita kon sa unsang paagi ang mga paghukom sa Dios gibu-bu ngadto sa mga Nephite.
-
Alang kanimo, unsa ang pinakaguol nga bahin niini nga istorya?
I-refer ang mga estudyante sa mga baruganan nga imong gisulat diha sa pisara. Dapita sila sa pagpamalandong kon sa unsang paagi nila magamit kini nga mga kamatuoran sa ilang kinabuhi. Awhaga sila sa pagbuhat sa mga pag-aghat sa Balaang Espiritu nga ilang nadawat sa ilang pagpamalandong.
Ipamatuod ang kamabination ug gugma sa Ginoo sa paghatag kanato og mga oportunidad sa paghinulsol. Ipamatuod usab nga ang mga sangputanan moabut kanunay niadtong nagpadayon sa pagpakasala.
Komentaryo ug Background nga Impormasyon
Mormon 3:9–10. Pagpanumpa
Miingon si Mormon nga ang mga Nephite nanumpa “sa mga langit, ug usab sa trono sa Dios” nga sila magtinguha sa pagpanimalos sa mga Lamanite (tan-awa sa Mormon 3:9–10). Ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles mipasabut sa kamahinungdanon sa pagpanumpa sa mga panahon sa Basahon ni Mormon, sa ingon naghatag kanato og panabut sa matampalason nga kinaiya sa mga Nephite sa ilang pagsulay sa pag-apil sa Dios sa ilang pagpanimalos.
“Kini nga pagpanumpa sa karaang panahon labaw kaayo ka mahinungdanon kay sa nahibaloan sa kadaghanan kanato.
“Sama pananglit: Si Nephi ug ang iyang mga igsoon naninguha sa pagkuha sa mga palid nga tumbaga gikan kang Laban. Namiligro ang ilang kinabuhi. Apan si Nephi nanumpa niini: ‘Ingon nga ang Ginoo buhi, ug samtang kita buhi, kita dili mobalik ngadto sa atong amahan sa kamingawan hangtud matuman ang butang nga gisugo sa Ginoo kanato.’ (1 Ne. 3:15.)
“Sa ingon gihimo ni Nephi nga partner ang Dios. Kon napakyas siya sa pagkuha sa mga palid, nagpasabut kini nga napakyas ang Dios. Ug tungod kay dili mapakyas ang Dios, katungdanan ni Nephi ang pagkuha sa mga palid o ihatag ang iyang kinabuhi sa pagsulay niini” (“The Doctrine of the Priesthood,” Ensign, Mayo 1982, 33).