Mormon 7–8:11

Pasiuna

Human sa katapusang gubat tali sa mga Nephite ug mga Lamanite, si Mormon misulat ngadto sa umaabut nga mga kaliwat sa katawhan sa Basahon ni Mormon kabahin sa kaimportante nga mahibalo si kinsa sila ug unsay kinahanglan nilang buhaton aron maluwas. Uban sa dakong gugma alang sa umaabut nga mga kaliwat sa iyang mga kaaway, si Mormon mitudlo sa kaimportante sa pagsunod sa ebanghelyo ni Jesukristo aron mahimo kining “maayo diha [kanila] sa adlaw sa paghukom” (Mormon 7:10). Human namatay si Mormon, ang iyang anak, si Moroni, ang nahibilin sa pagsulat kabahin sa kalaglagan sa iyang katawhan.

Mga Sugyot alang sa Pagtudlo

Mormon 7

Sa katapusan nga pagpamatuod ni Mormon, siya miawhag sa kaliwatan sa mga Lamanite sa pagtuo kang Jesukristo ug pagsunod sa Iyang ebanghelyo

Isulat ang numero 230,000 diha sa pisara. Pangutan-a ang mga estudyante kon nahinumdom ba sila konsa unsang paagi kini nga numero may kalabutan sa pagkalaglag sa mga Nephite. (Kini mao ang numero sa mga sundalo nga Nephite kinsa nangamatay sa katapusang gubat, nga natala sa Mormon 6. Mahimo nimong hatagan og gibug-aton nga ang mga numero sa Mormon 6:10–15 makita nga nagpasabut lamang niadtong nakigbatok sa gubat, dili niadtong daghan kaayo nga nangamatay isip resulta sa gubat.) Ipahunahuna sa mga estudyante nga sila naluwas sa usa ka dako nga gubat diin ilang mga sakop sa pamilya ug mga higala nangamatay ug ang ilang nasud nabihag. Hatagi sila og higayon sa paghunahuna kabahin sa ilang isulti kon mosulat sila og mensahe sa ilang kaliwatan sa mga tawo nga mipatay sa ilang mga minahal ug mibihag sa ilang nasud.

Dapita ang mga estudyante sa pagbasa sa hilum sa Mormon 7:1–4, nga mangita sa pipila sa katapusan nga mga pulong ni Mormon ngadto sa kaliwatan sa mga Lamanite.

Unsa ang gusto ni Mormon nga mahibaloan sa kaliwatan sa mga Lamanite?
Unsa nga mga hiyas sa Manluluwas ang inyong makita sa mga pulong ni Mormon ngadto sa iyang mga kaaway?

Tabangi ang mga estudyante sa pagsabut nga gitudloan ni Mormon ang kaliwatan sa mga Lamanite unsa ang kinahanglan nilang buhaton aron maluwas. Siya adunay gugma nga putli alang sa tanang katawhan, bisan sa iyang mga kaaway.

Hangyoa ang mga estudyante sa pagbasa sa hilum sa Mormon 7:5, 8, 10, nga ilhon unsa ang gitudlo ni Mormon sa iyang mambabasa nga kinahanglan nilang buhaton. Hangyoa ang mga estudyante sa pagpakigbahin sa unsay ilang nakit-an, ug ilista ang ilang mga tubag sa pisara. Mahimo nimong hisgutan nga ang mga pagtulun-an ni Mormon mao ra mismo nga mga baruganan sa ebanghelyo nga makaluwas unta sa mga Nephite gikan sa pagkalaglag (tan-awa sa Mormon 3:2).

Dapita ang usa ka estudyante sa pagbasa og kusog sa Mormon 7:6–7. Hangyoa ang klase sa pagsunod, nga mangita kon unsay gitanyag sa Ginoo niadtong motuo Kaniya ug modawat sa Iyang ebanghelyo. Human mo-report ang mga estudyante sa ilang nakit-an, awhaga sila sa pagsulat sa mosunod nga kamatuoran tupad sa Mormon 7:6–7: Ang Ginoo nagtanyag og kaluwasan ngadto sa tanan, ug motubos Siya niadtong modawat sa mga baruganan ug mga ordinansa sa Iyang ebanghelyo.

Isulat ang mosunod nga pangutana diha sa pisara. Dapita ang mga estudyante sa pagsulat sa ilang mga tubag sa pangutana diha sa mga notebook o sa mga scripture study journal.

Sumala sa Mormon 7:7, unsa ang mga panalangin niadtong mahukman nga “walay kasaypanan” sa atubangan sa Dios?

Dapita ang pipila ka mga estudyante sa pagpakigbahin sa ilang gisulat.

Mormon 8:1–11

Human namatay si Mormon, ang iyang anak nga si Moroni nahibilin nga nag-inusara sa pagsulat kabahin sa kalaglagan sa iyang katawhan

Hangyoa ang mga estudyante sa paghunahuna og higayon nga sila nag-inusara sa usa ka sitwasyon nga nasulayan ang ilang pagtuo—tingali usa ka sitwasyon diin dali ra unta silang makabuhat og usa ka butang nga sayop nga walay makakita kanila. Dapita sila sa pagkonsiderar kon ang ilang determinasyon sa pagsunod sa Manluluwas ug pagsunod sa Iyang mga sugo nianang higayona milambo, pareha ra gihapon, o mikunhod.

Ngano kaha ang ubang mga tawo mopili man nga magpabilin nga dili matinud-anon kon sila mag-inusara sa usa ka sitwasyon nga mohagit sa ilang pagtuo?
Ngano kaha ang ubang mga tawo mopili man nga magpabilin nga matinud-anon sa samang sitwasyon?

Ipasabut nga si Mormon gipatay human sa katapusan nga gubat tali sa mga Nephite ug mga Lamanite, ug ang iyang anak nga si Moroni nahibilin nga nag-inusara, walay ni bisan miyembro sa pamilya o iyang katawhan. Dapita ang usa ka estudyante sa pagbasa og kusog sa mga pulong ni Moroni sa Mormon 8:1–9, ug hangyoa ang klase sa pagpangita og mga deskripsyon sa mga kahimtang ni Moroni. Hangyoa sila nga moreport sa unsay ilang nakit-an.

Unsa kahay inyong bation kon kamo pa ang anaa sa dapit ni Moroni?

Gamit ang mga petsa sa ubos sa mga pahina o sa mga summary sa kapitulo, tabangi ang mga estudyante nga mahibalo nga mga 16 ka tuig na ang milabay tali sa katapusang sinulat nga mga pulong ni Mormon ug sa panahon nga misugod og sulat si Moroni sa mga palid. Dayon dapita ang mga estudyante sa pagtan-aw og balik sa Mormon 8:1–4 aron pagsusi unsa ang gustong buhaton ni Moroni, bisan og nag-inusara siya sa dugay na nga panahon. Hangyoa sila nga moreport sa unsay ilang nakit-an. (Kinahanglang makita nila nga determinado siya nga motuman sa iyang amahan ug mosulat sa mga palid.)

Unsa nga mga baruganan ang atong makat-unan gikan sa kamasulundon ni Moroni bisan sa iyang mga sirkumstansya? (Samtang mopakigbahin ang mga estudyante sa ilang mga ideya, hatagi og gibug-aton ang mosunod nga kamatuoran: Bisan kon kita nag-inusara, makapili gihapon kita nga magpabilin nga matinud-anon. Mahimo kang modapit sa mga estudyante sa pagsulat niini nga kamatuoran diha sa ilang mga kasulatan tupad sa Mormon 8:1–4.)

Ipaila nga si Moroni adunay talagsaon nga misyon. Siya “nahibilin nga nag-inusara sa pagsulat sa masulub-on nga sugilanon sa kalaglagan sa [iyang] mga katawhan” (Mormon 8:3). Bisan og ang mga estudyante dili moatubang og mao gyud nga mga sirkumstansya, mahimo silang moatubang og mga sitwasyon diin sila nag-inusara ug kinahanglan nga magpabilin nga matinud-anon. Mahimo usab silang moatubang og mga sitwasyon nga mobati sila nga nag-inusara bisan og anaa sila kauban sa ubang mga tawo—sama sa mga higayon nga anaa sila sa mga tawo nga wala magsunod sa mga sumbanan nga gi-establisar sa Ginoo ug sa Iyang mga propeta.

Kinsa ang inyong nahibaloan nga nagmatinud-anon bisan og nag-inusara sila sa mahagiton nga mga sirkumstansya?

Kon ang mga estudyante motubag niini nga pangutana, ipangutana ang pipila o tanan niining follow-up nga mga pangutana:

Giunsa niining tawhana sa paglihok niadto nga mga sirkumstansya?
Sa unsang paagi ang tawo napanalanginan ra gayud sa pagbuhat sa unsay gisugo sa Dios kaniya nga buhaton?
Sa unsang paagi nga kini nga mga ehemplo makatabang kaninyo?

Dapita ang mga estudyante sa pagbasa og hilum sa Mormon 8:10–11. Hangyoa sila sa pag-ila og usa ka paagi nga ang Ginoo mipaluyo ni Moroni ug Mormon atol sa malisud nga mga sirkumstansya nga ilang giatubang. (Ang Ginoo mipadala sa Tulo ka mga Nephite aron sa pagpangalagad ngadto kang Mormon ug Moroni; tan-awa usab sa 3 Nephi 28:25–26.) Hatagi og gibug-aton nga kon matinud-anon kita sa Dios sa nag-inusara o malisud nga mga kahimtang, tabangan kita Niya nga magpabilin nga matinud-anon. Gamita ang mosunod nga mga pangutana sa paghisgot niini nga kamatuoran:

Kanus-a kamo nagmasulundon sa usa sa mga sugo sa Langitnong Amahan sa usa ka lisud kaayo nga kahimtang? Sa unsang paagi kamo napanalanginan sa pagbuhat sa ingon?
Sa inyong hunahuna nganong importante man nga mangandam karon nga magmatinud-anon sa malisud nga mga kahimtang sa umaabut?

Aron sa pag-awhag sa mga estudyante sa pagpabilin nga matinud-anon sa mga kahimtang nga kinahanglan silang mobarug nga mag-inusara, ipakigbahin ang mosunod nga pamahayag ni Presidente Thomas S. Monson:

Imahe

President Thomas S. Monson

“Sa atong pagpakabuhi matag adlaw, dili kapugngan nga ang atong pagtuo hagiton. Tingali usahay makita nato ang atong kaugalingon nga gilibutan sa uban ug sa gihapon nagbarug nga gamay ra o gani nagbarug nga nag-inusara kabahin sa unsay mahimong dawaton ug unsay dili. Aduna ba kitay moral nga kaisug sa pagbarug nga lig-on alang sa atong mga gituohan, bisan kon ang pagbuhat sa ingon nagkinahanglan nga magbarug kita nga mag-inusara? … Hinaut nga magmaisugon kita ug andam sa pagbarug sa unsay atong gituohan, ug kon kinahanglan kitang magbarug nga mag-inusara diha sa proseso, hinaut nga maisugon nato kanang buhaton, gilig-on sa kahibalo nga sa pagkatinuod wala kita mag-inusara kon magbarug uban sa atong Amahan sa Langit.” (“Magmaisugon sa Pagbarug nga Mag-inusara,” Ensign o Liahona, Nob. 2011, 60, 67).

Tapusa pinaagi sa pagpakigbahin og usa ka kasinatian sa dihang ang Ginoo mipanalangin kanimo tungod sa pagkamatinud-anon bisan og nag-inusara o anaa sa malisud nga kahimtang.

Ribyu sa Scripture Mastery

Isulat ang awhag diha sa pisara. Ipasabut nga ang pulong awhag nagpasabut og kusganong pag-aghat sa uban sa paglihok sa piho nga paagi. Ipasabut nga ang katapusang mga pulong ni Mormon diha sa Mormon 7 maayo nga panig-ingnan sa pag-awhag. Hatagi ang estudyante og mga pirasong papel ug sultihi sila nga mosulat sila og pag-awhag base sa usa sa ilang paborito nga mga scripture mastery passage diha sa Basahon ni Mormon. Sa ibabaw sa piraso nga papel, ipasulat sa mga estudyante ang: “Ako buot nga mamulong ngadto sa kabatan-onan sa katapusang mga adlaw.” Dapita ang matag estudyante sa pagpili og paborito nga scripture mastery passage ug dayon sa pagsulat og usa ka pag-awhag sa kabatan-onan sa katapusang mga adlaw base sa tudling nga ilang gipili. Ang ilang pag-awhag mahimong maglakip og summary sa nag-unang mga kamatuoran diha sa scripture mastery passage, usa ka pagpasabut og nganong kini nga mga kamatuoran importante sa kabatan-onan karon, ug usa ka pagdapit sa paglihok sumala niini nga mga kamatuoran. Ang mga pag-awhag mahimong tapuson uban sa saad sama sa nakita diha sa Mormon 7:7 o Mormon 7:10. Mahimo kang mohangyo sa pipila ka mga estudyante sa pagpakigbahin sa ilang nahuman nga mga pag-awhag ngadto sa klase. Mahimo ka usab nga mangolekta niini nga mga pag-awhag aron magamit isip mga timailhan sa umaabut nga mga kalihokan sa scripture mastery o aron i-display sa classroom.

Mubo nga sulat: Mahimo kang mogamit niini nga kalihokan bisan kanus-a atol sa leksyon. Sama pananglit, mahimo nimo kining gamiton sa katapusan sa leksyon, o mahimo nimo kining gamiton human sa paghisgot sa Mormon 7.

Komentaryo ug Background nga Impormasyon

Mormon 7. Katapusan nga pangamuyo ni Mormon sa pagtuo kang Kristo

Si Elder Jeffrey R. Holland sa Korum sa Napulog Duha ka mga Apostoles mipasabut sa katapusan nga pangamuyo ni Mormon sa pagtuo kang Kristo, usa ka hangyo nga iyang gisulat ngadto sa katawhan sa atong panahon human nakakita sa kalaglagan sa iyang tibuok nasud:

“Nagsulti samtang gainusara diha sa kamatayon, si Mormon mitumong sa iyang komentaryo sa mga katawhan sa umaabut, ilabi na niadtong ‘salin sa balay ni Israel’ kinsa usa ka adlaw mobasa sa iyang halangdon nga rekord. Kadtong sa lahi nga panahon ug dapit kinahanglang makat-on unsa ang nalimtan niadtong nanaghigda sa iyang atubangan—nga ang tanan kinahanglang ‘motuo diha kang Jesukristo, nga siya mao ang Anak sa Dios,’ nga human sa iyang pagkalansang sa krus sa Jerusalem siya, ‘pinaagi sa gahum sa Amahan … nabuhi pag-usab, diin siya nakaangkon og kadaugan sa lubnganan; ug usab diha kaniya ang kahapdos sa kamatayon nabuntog.

“Ug siya mipahinabo sa pagkabanhaw sa mga patay … [ug] sa katubsanan sa kalibutan.’ Kadtong natubos mahimo dayon, tungod ni Kristo, makatagamtam og ‘usa ka kahimtang sa kalipay nga walay katapusan.’ [Mormon 7:2, 5–7.] …

“Ang ‘pagtuo kang Kristo,’ ilabi na kon gisukod sa ingon ka maguol apan malikayan nga mga sangputanan, mao ang katapusan nga pangamuyo ni Mormon ug bugtong niya nga paglaum. Mao kini ang labing mahinungdanon nga katuyoan sa tibuok basahon nga moabut sa kalibutan sa ulahing mga adlaw nga nagdala sa iyang pangalan” (Christ and the New Covenant: The Messianic Message of the Book of Mormon [1997], 321–22).