Helaman 10

Pasiuna

Ang paghusay aron matino kinsa ang mipatay sa labaw nga maghuhukom natapos dihang ang pagpadayag ni Nephi mahitungod sa nagpatay gipamatud-an. Tungod kay nakalingkawas sa silot gikan sa sayop nga mga akusasyon nga gipasangil ngadto kaniya, si Nephi miuli sa iyang balay. Iyang gipamalandungan unsay gipakita sa Ginoo kaniya sa gibating kasubo tungod sa kadautan sa mga tawo. Niini nga panahon sa pagpamalandong ug kasubo, nadungog niya ang tingog sa Ginoo. Gipanalanginan siya sa Ginoo og gahum sa pagbugkos ug gisugo siya nga ipadayon ang pagsangyaw sa paghinulsol ngadto sa mga tawo. Diha dayon gituman ni Nephi ang sugo sa Ginoo.

Mga Sugyot alang sa Pagtudlo

Helaman 10:1–11

Nakadawat si Nephi og gahum sa pagsilyo

Pahinumdumi ang mga estudyante sa gipadayag ni Nephi mahitungod sa pagpatay sa labaw nga maghuhukom, nga narekord sa Helaman 8–9. Dapita ang mga estudyante sa paghunahuna sa ilang kaugalingon nga naa sa posisyon ni Nephi, human gayud nga gipadayag niya kon si kinsa ang mipatay sa labaw nga maghuhukom.

Unsay imong bation? Unsay mapaabut nimo nga reaksyon sa uban?
Unsay gusto nimong isulti ngadto sa mga tawo?
Unsay imong bation kon ibaliwala ka lang sa mga tawo ug pasagdan kang mag-inusara?

Ipasabut nga human nalimpyuhan sa pasangil nga pagpatay sa labaw nga maghuhukom, mipauli si Nephi. Dapita ang usa ka estudyante sa pagbasa og kusog sa Helaman 10:1–3, ug hangyoa ang klase sa pagpangita unsay gihimo ni Nephi dihang milakaw siya pauli. Mahimo nimong isugyot nga markahan sa mga estudyante ang pulong nga nagpalandong nga makita niini nga mga bersikulo.

Nganong si Nephi anaa man sa “kasubo”?
Unsay nahitabo samtang namalandong si Nephi? (Ang tingog sa Ginoo miabut kaniya.) Unsa man ang relasyon tali sa pagpamalandong ug sa pagkadawat og pinadayag?

Sa pagtubag sa mga estudyante, tabangi sila sa pag-ila sa mosunod nga baruganan: Ang pagpamalandong sa mga butang sa Ginoo mag-andam kanato sa pagdawat og pagpadayag. Mahimo nimong isulat sa pisara kini nga baruganan.

Hangyoa ang mga estudyante kon makahunahuna ba sila og mga istorya diha sa mga kasulatan o kasaysayan sa Simbahan dihang nakadawat og pagpadayag ang mga tawo agig resulta sa pagpamalandong sa mga butang sa Ginoo. (Ang mga ehemplo naglakip sa anak ni Lehi nga si Nephi, kinsa nakadawat og panan-awon human sa tinguha nga makakita sa mga butang nga nakita sa iyang amahan ug “nagpalandong sa akong kasingkasing” [tan-awa sa 1 Nephi 10:17; 11:1]; kang Joseph Smith, kansang Unang Panan-awon miabut human siya “namalandong … pagbalik-balik” sa Santiago 1:5 [tan-awa sa Joseph Smith—History 1:11–17]; ug kang Joseph F. Smith, kinsa nakadawat og panan-awon bahin sa katubsanan sa mga patay human nga gipamalandungan ug gihinuktukan ang mga pulong sa Ginoo [tan-awa sa D&P 138:1–6, 11].)

Kanus-a nga ang pagpamalandong nakatabang ninyo nga makadawat og personal nga pagpadayag? (Mahimo nimong hisgutan nga ang pagkadawat og personal nga pagpadayag sa kasagaran dili mahinuklugon sama sa ubang mga ehemplo nga naa sa mga kasulatan. Ang mga kasinatian sa pagpadayag sa kasagaran mao ang mga panahon sa kalit nga paglamdag, sama sa kalit nato nga pagkasabut sa butang nga kita kaniadto naglisud sa pagsabut.)
Unsa ang pipila ka higayon o mga sitwasyon dihang ang pagpamalandong sa mga butang sa Ginoo labihan ka tukma? (Ang mga ehemplo nianang mga butanga naglakip sa panahon atol ug pagkahuman sa miting sa sakrament, sa dili pa ug human sa personal nga mga pag-ampo ug pagtuon sa kasulatan, human sa pagtan-aw o pagpaminaw sa kinatibuk-ang komperensya, samtang nagpuasa, samtang nagserbisyo sa templo, ug samtang nagtahud sa Ginoo atol sa Igpapahulay.)

Awhaga ang mga estudyante sa paggahin og panahon nga makapamalandong sa regular nga paagi. Isugyot nga ilang isulat ang mga impresyon nga ilang nadawat dihang namalandong sila.

Aron maandam ang mga estudyante sa pagpadayon og tuon sa kasinatian ni Nephi, dapita sila sa pag-imagine nga ang ilang mga silingan mobiya sa ilang balay sulod sa usa ka panahon ug nagkinahanglan nga dunay tawo nga mobantay sa ilang balay ug mga kabtangan.

Unsa kaha nga matang sa tawo ang gusto sa imong mga silingan nga mobantay sa ilang balay?
Sa unsang paagi kaha nimo ikapakita sa imong mga silingan nga ikaw andam nga mahatagan sa ingon niana nga mga responsibilidad?

Dapita ang mga estudyante sa pagbasa og hilum sa Helaman 10:4–5, nga mangita kon nganong gihatag sa Ginoo kang Nephi ang dagkong mga panalangin ug responsibilidad. (Mahimo nimong ipasabut nga ang walay kaluya nagpasabut og kakugi o dili kapuyon.) Dapita ang mga estudyante sa pagreport unsay ilang nakit-an.

Sa unsang paagi ang pagkawalay kaluya sa pagserbisyo nagpakita nga ang Ginoo mohatag diri kanato sa mga panalangin ug responsibilidad?
Sa unsang paagiha kaha ang pagsunod sa ehemplo ni Nephi nga kawalay kahadlok sa mga tawo makatabang nato nga maandam alang sa responsibilidad sa gingharian sa Dios?
Unsa ang ipasabut diha nimo sa mga pulong nga “ikaw … wala magtinguha sa imong kaugalingon nga kinabuhi”?

Isulat sa pisara ang mosunod: Ihatag sa Ginoo diri kanato ang mga panalangin ug responsibilidad kon atong . … Pangutan-a ang mga estudyante kon unsaon nila sa pagkompleto kini nga pamahayag, base sa unsay ilang nakat-unan mahitungod ni Nephi diha sa Helaman 10:4–5. Usa ka paagi nga makompleto sa mga estudyante ang pamahayag mao kining mosunod: Ihatag sa Ginoo diri kanato ang mga panalangin og responsibilidad kon atong unahon ang Iyang kabubut-on kay sa atong kaugalingon. Mahimo nimong isugyot nga isulat sa mga estudyante kini nga kamatuoran diha sa ilang mga kasulatan o sa ilang mga notebook o mga scripture study journal.

Dapita ang mga estudyante sa pagpamalandong sa mosunod nga mga pangutana ug isulat ang ilang mga tubag sa usa niini:

Unsay imong nahimo sa imong kinabuhi bag-ohay lang aron ikapakita sa Ginoo nga ang Iyang kabubut-on mas importante kay sa imong kaugalingon?
Unsa ang usa ka dapit sa inyong kinabuhi diin kamo mas magtinguha sa kabubut-on sa Ginoo?

Ipamatuod ang kaandam sa Ginoo sa paghatag kanato og mas dako ug mas dagkong mga panalangin kon kita magtinguha sa Iyang kabubut-on ug motuman sa Iyang mga sugo.

Dapita ang mga estudyante sa pagbasa og hilum sa Helaman 10:5–7, nga mangita sa mga panalangin ug responsibilidad nga gihatag sa Ginoo kang Nephi. Samtang magbasa ang mga estudyante, isulat sa pisara ang mosunod:

Bersikulo 5

Bersikulo 6

Bersikulo 7

Dapita ang pipila ka mga estudyante nga isulat sa pisara, tupad sa katugma nga numero sa bersikulo, ang mga panalangin nga gihatag sa Ginoo kang Nephi.

Iklaro gayud nga usa sa mga panalangin nga gihatag sa Ginoo kang Nephi mao ang gahum sa pagsilyo o pagbugkos. Dayon isulat sa pisara ang mosunod nga kamatuoran: Ang gahum sa pagsilyo magbugkos ug magbad-bad dinhi sa yuta ug sa langit. Mahimo nimong isugyot nga isulat sa mga estudyante kini nga mga kamatuoran diha sa ilang mga kasulatan tupad sa Helaman 10:7.

Pangutan-a ang mga estudyante kon may nailhan ba silang uban gawas ni Nephi kinsa nahatagan og gahum sa pagbugkos. Human makatubag ang mga estudyante, mahimo nimo silang dapiton sa pag-cross-reference sa Helaman 10:7 ngadto sa mosunod nga mga kasulatan: 1 Mga Hari 17:1 (Elias); Mateo 16:15–19 (Pedro); Doktrina ug mga Pakigsaad 132:46 (Joseph Smith).

Ipasabut nga ang mga yawe nga sama niini nga gahum gihuptan karon sa Presidente sa Simbahan ni Jesukristo sa mga Santos sa Ulahing mga Adlaw. Sama ni Nephi, ang mga Presidente sa Simbahan miserbisyo nga walay kaluya ug mipakita nga ang Ginoo makahatag kanila og talagsaong mga panalangin ug responsibilidad. Sa kasagaran mag-refer kita sa gahum sa pagbugkos nga may kalabutan sa pag-seal sa mga pamilya pinaagi sa mga ordinansa sa templo.

Aron matabangan ang mga estudyante nga mas makasabut sa gahum sa pagbugkos, dapita ang usa ka estudyante sa pagbasa og kusog sa mosunod nga pamahayag ni Elder Russell M. Nelson sa Korum sa Napulog Duha ka mga Apostoles:

Imahe

Elder Russell M. Nelson

“Ang mga templo, mga ordinansa, mga pakigsaad, mga endowment, ug mga sealing gipahiuli na, sa tukma nga paagi sigun sa gipanagna. Ang mga ordinansa sa templo nagsangkap alang sa pakig-uli ngadto sa Ginoo ug nag-seal sa mga pamilya hangtud sa kahangturan. Ang pagkamasulundon sa sagrado nga mga pakigsaad nga gihimo diha sa mga templo naghimo kanato nga sarang alang sa kinabuhing dayon—ang labing mahinungdanon nga gasa sa Dios ngadto sa tawo” (“Pangandam alang sa mga Pananalangin sa Templo,” Ensign, Okt. 2010, 42).

Sa unsa nga paagi kamo napanalanginan pinaagi sa kahibalo nga ang mga pamilya magkahiusa sa kahangturan?
Sa unsang paagi ninyo mapangita ang mga panalangin sa gahum sa pagbugkos o pagsilyo sa umaabut? (Ang mga tubag tingali maglakip nga ang mga estudyante makaandam alang sa pagminyo sa templo aron mahimo nila ang templo ug buhat sa family history karon nga maoy magtugot nga ma-seal sila ngadto sa ilang patay na nga mga katigulangan.)

Ipaambit ang imong mga pagbati mahitungod sa mga panalangin sa gahum sa pagbugkos ug kaimportante sa pagdawat sa mga ordinansa sa pagsilyo sulod sa templo.

Helaman 10:12–19

Gituman ni Nephi ang sugo sa Ginoo nga isangyaw ang paghinulsol ngadto sa katawhan

Pangutan-a ang mga estudyante kon nakasulay na ba sila nga ilangay ang ilang paghimo og usa ka butang diin gisugo sila sa paghimo. (Ang mga ehemplo maglakip sa paghunong nga ikompleto ang buluhaton sa panimalay o assignment sa eskwela o trabaho.)

Unsa nga mensahe ang atong gipadala ngadto sa uban kon kita molangay sa butang nga ilang gihangyo kanato?

Dapita ang usa ka estudyante sa pagbasa og kusog sa Helaman 10:11–12. Hangyoa ang klase sa pagsunod, nga mangita kon giunsa ni Nephi sa pagsanong ang sugo sa Ginoo kaniya nga isangyaw ang paghinulsol ngadto sa katawhan.

Unsa man ang atong gipakita sa Ginoo kon mosanong dayon kita sa Iyang tambag ug mga sugo?

Dapita ang usa ka estudyante sa pagbasa og kusog sa Helaman 10:13–14. Dayon hangyoa ang laing estudyante sa pagbasa og kusog sa Helaman 10:15–17.

Unsa ang matudlo sa ehemplo ni Nephi dinhi niini nga mga bersikulo ngari kanato?
Giunsa sa Ginoo pagtabang si Nephi?

Tabangi nga makita sa mga estudyante nga tungod sa kamatinud-anon ni Nephi, ang Ginoo miprotekta kaniya ug mipanalangin kaniya og talagsaong gahum. Determinado si Nephi nga motuman sa misyon nga gihatag sa Ginoo kaniya.

Unsaon nimo pagpakita ang imong determinasyon sa pagserbisyo sa Ginoo?

Awhaga ang mga estudyante sa pagpangita og mga paagi nga unahon ang kabubut-on sa Ginoo kay sa ilang kaugalingon ug motuman dayon. Ipamatuod ang mga panalangin nga moabut kon kita mosunod sa Ginoo.

Ribyu sa Scripture Mastery

Ang gitas-on niini nga leksyon maghatag og oras alang sa mosunod nga kalihokan sa pagribyu sa scripture mastery.

I-assign ang matag estudyante og usa sa mosunod nga mga bersikulo sa scripture mastery sa pagbasa sa hilum nga paagi sa: 1 Nephi 3:7; 2 Nephi 2:27; 2 Nephi 31:19–20; Mosiah 2:17. Hangyoa ang mga estudyante sa pagbasa sa tudling nga gi-assign diha nila ug paghunahuna sa unsang paagi kini nagamit ni Nephi ug sa iyang pangalagad sigun sa narekord sa Helaman 10. Human sa igong panahon, dapita ang pipila ka mga estudyante sa pagtubag.