Helaman 1–9 (Unit 22)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Helaman 1–9 (unit 22) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa panginahanglan sa imong mga estudyante.

Day 1 (Helaman 1–2)

Samtang nagtuon ang mga estudyante sa politikal nga kasungian ug pagpamatay sa mga Nephite ug sa gihimong pag-ilog sa mga Lamanite sa siyudad sa Zarahemla, ilang nakat-unan nga ang panagbangi magdala sa pagkabahin-bahin ug maghimo kanato nga dali madutlan sa impluwensya sa kaaway. Nakakat-on sab sila nga ang tinago nga mga kalihokan magdala og kalaglagan sa mga katilingban.

Day 2 (Helaman 3–4)

Pinaagi sa pagtuon kon sa unsang paagi nakasugakod ang mga mapaubsanong Nephite nga sumusunod sa Manluluwas sa grabing pagpanglutos, nakat-unan sa mga estudyante nga bisan sa mga pagpanglutos ug pagsulay, ang atong pagtuo kang Jesukristo molambo kon mapaubsanon kitang motawag sa Dios ug motugyan sa atong kasingkasing ngadto Kaniya. Samtang nagtuon ang mga estudyante kon sa unsang paagi ang nag-usbaw nga garbo sa mga Nephite nagtugot sa mga Lamanite nga maangkon ang katunga sa yuta sa mga Nephite, ilang nakat-unan nga ang garbo ug kadautan mobulag kanato gikan sa Espiritu sa Ginoo ug mapasagdan lang kita sa atong kaugalingong kusog.

Day 3 (Helaman 5)

Pinaagi sa pagtuon sa tambag nga gihatag ni Helaman sa iyang mga anak nga si Nephi ug Lehi, nakat-unan sa mga estudyante nga kon atong itukod ang atong pundasyon diha kang Jesukristo, si Satanas walay gahum batok kanato. Pinaagi sa gahum sa Dios ug sa hugot nga pagtuo ug sa misyonaryong mga paningkamot ni Nephi ug Lehi, daghang Lamanite ang naghinulsol. Nakat-unan sa mga estudyante nga kon gamiton nato ang hugot nga pagtuo kang Jesukristo ug maghinulsol sa atong mga sala, ang Espiritu Santo mopuno og kalipay ug kalinaw sa atong kasingkasing.

Day 4 (Helaman 6–9)

Nakat-unan sa mga estudyante nga kon motuo kita ug motuman sa mga pulong sa Ginoo, Iyang ibu-bu ang Iyang Espiritu ngari kanato. Gipahimangnoan ni Nephi ang dautang mga Nephite bahin sa mga sangputanan sa ilang pagkadautan ug gipasabut nga kon magdumili kita sa paghinulsol sa atong mga sala, mawala kanato ang panalipud sa Ginoo ug mga panalangin sa kinabuhing dayon. Human makapaminaw sa mga pulong ni Nephi, ang ubang mga tawo milaban niya. Nakat-unan sa mga estudyante nga kon makigbatok kita sa dautan, mapugngan nato ang paglambo niini. Gipahinumduman ni Nephi ang mga tawo nga daghang propeta ang mipamatuod sa Manluluwas ug mitudlo nga kon kita mag-focus kang Jesukristo ug mogamit og hugot nga pagtuo Kaniya, makadawat kita og kinabuhing dayon. Gikan sa mga pagtulun-an ni Nephi nga narekord sa Helaman 7–9, nakat-unan sa mga estudyante nga ang pulong sa mga propeta matuman.

Pasiuna

Taliwala sa naglambo nga panagbingkil ug kadautan, gitudloan ni Nephi ang iyang mga anak nga lalaki nga si Jesukristo angay nga maoy pundasyon sa ilang pagtuo. Ang mga pagtulun-an ni Nephi mahitungod sa paghinulsol ug pagpamati sa pulong sa mga propeta sa Ginoo mahinungdanon alang sa kalipay sa mga katawhan.

Mga Sugyot alang sa Pagtudlo

Helaman 1–5

Ang mga Nephite nag-antus sa kapildihan tungod sa panagbingkil ug kadautan; daghang Lamanite ang nakabig samtang si Nephi ug Lehi nagsangyaw sa ebanghelyo

Hangyoa ang mga estudyante sa paghunahuna nganong ang uban nga building makabarug man sa dugayng panahon samtang ang uban mahagsa. Dayon ipangutana: Nganong importante man sa usa ka building nga dunay lig-ong pundasyon?

Dapita ang usa ka estudyante sa pagbasa og kusog sa Helaman 5:12. Tungod kay usa man kini ka scripture mastery nga bersikulo, dapita ang pipila ka mga estudyante nga sulayan kini sa pag-recite gikan sa ilang hunahuna. Awhaga sila sa pagsulay bisan og dili nila kini makompleto sa pagmemorya. Dayon ipangutana ang mosunod nga mga pangutana:

Unsa man ang gisaad niini nga mga bersikulo kon itukod nato ang atong kinabuhi sa pundasyon ni Jesukristo? (Ang tubag sa mga estudyante kinahanglang magpahayag nga kon atong itukod ang atong pundasyon diha kang Jesukristo, si Satanas walay gahum batok kanato.)
Unsa man ang inyong gihimo aron matukod ang inyong kinabuhi sa pundasyon ni Jesukristo?

Dapita ang mga estudyante sa paghisgot og mga panahon dihang ang ilang pagpamatuod sa Manluluwas mitabang nila sa pagbatok sa mga tintasyon o paglahutay sa mga pagsulay. Ipaambit ang imong pagpamatuod mahitungod sa espiritwal nga kalig-on nga imong nadawat tungod kay gitukod nimo ang imong kinabuhi sa pundasyon ni Jesukristo. Awhaga ang mga estudyante sa paghunahuna og usa o daghan pang mga paagi nga makapaningkamot sila aron mas maayong pagkatukod ang ilang kinabuhi diha sa lig-on nga sukaranan ni Kristo.

Helaman 6–7

Ang mga Lamanite nahimong mas matarung samtang ang mga Nephite nahimong mas dautan; si Nephi nagsangyaw ngadto sa dautang mga Nephite ug gisugo sila sa paghinulsol

Pahinumdumi ang mga estudyante nga samtang daghan sa mga Lamanite ang naghinulsol ug nahimong lig-on sa ebanghelyo, ang mga Nephite nagpakabuhi sa kadautan ug ang Balaang Espiritu mibiya kanila. Hangyoa ang mga estudyante sa paghunahuna og usa ka panahon sa ilang kinabuhi dihang mibati sila sa Espiritu nga mibiya kanila tungod sa ilang mga pagpili.

Ipasabut nga dihang nakita ni Nephi ang kahimtang sa iyang mga tawo, “ang iyang kasingkasing napuno uban sa kasubo” (Helaman 7:6). Misaka siya sa tore sa iyang tanaman aron sa pag-ampo ug nagbangutan sa kadautan sa mga tawo. Ang panon sa katawhan nagpundok libut kaniya, ug gigamit ni Nephi ang oportunidad sa pagtudlo kanila.

Pagdapit og estudyante sa pagduol sa atubangan sa klase nga magrepresentar kang Nephi nga naa sa iyang tore. Hangyoa ang estudyante sa pagbasa og kusog sa Helaman 7:15–22, 26–28 samtang ang uban diha sa klase magsunod. Sa dili pa siya mobasa, bahina og katunga ang klase. Hangyoa ang katunga sa pagpangita kon unsa ang gitudlo ni Nephi nga sala sa mga Nephite, ug hangyoa ang laing katunga sa pag-ila sa mga sangputanan nga gipamatuod ni Nephi nga moabut kon dili maghinulsol ang mga Nephite. Dayon hangyoa ang mga estudyante sa pagreport unsay ilang nakit-an.

Human makatubag ang mga estudyante, dapita sila sa pagsulti sa mga baruganan nga atong makat-unan gikan niini nga istorya. Tingali lahi nga mga baruganan ang ipaambit sa mga estudyante, apan kinahanglan nga masulti nila nga kon magdumili kita sa paghinulsol sa atong mga sala, mawala kanato ang panalipud sa Ginoo ug mga panalangin sa kinabuhing dayon.

Aron matabangan ang mga estudyante sa pagsabut niini nga baruganan, dapita sila sa pagpasabut unsa nga mga sangputanan ang mahimong moabut sa mga tawo dinhi sa mosunod nga mga sitwasyon: (1) Usa ka batan-ong lalaki midumili sa paghinulsol sa iyang pagkaadik sa pornograpiya. (2) Ang kinatas-ang prayoridad sa usa ka batan-ong babaye mao ang pagkahimong sikat ug inila bisan og lahi ang gitudlo sa iyang mga ginikanan. (3) Usa ka batan-ong lalaki nakapaminaw sa gitudlo sa propeta sa pagsiksik sa mga kasulatan ug mag-ampo, apan midumili siya sa paghimo niini.

Dapita ang mga estudyante sa pagpamalandong kon duna bay butang nga gikinahanglan nilang hinulsulan aron maangkon nila sa mas hingpit ang kalig-on sa Ginoo diha sa ilang kinabuhi.

Helaman 8

Gitudlo ni Nephi nga ang tanang propeta nagpamatuod kang Jesukristo

Isulat sa pisara ang mga pulong nga modawat ug molimud. Hangyoa ang mga estudyante sa pagpasabut unsay kalainan niining duha ka pulong. Dapita ang usa ka estudyante sa pagbasa sa Helaman 8:13 samtang mangita ang klase sa unsay giingon ni Nephi nga gilimud sa mga tawo. Mahimo nimong awhagon ang mga estudyante sa pagmarka sa unsay ilang nadiskubrihan.

Pakit-a ang mga estudyante sa litrato nga Moises ug ang Tumbaga [Brass] nga Bitin (Libro sa mga Hulagway sa Ebanghelyo [2009], nu. 16). Dapita sila sa pagbasa sa Helaman 8:14–15 ug sa pag-ila kon unsay gitudlo ni Moises mahitungod sa Manluluwas. Dapita sila sa pagreport unsay ilang nakat-unan. Dayon ipangutana:

Unsa ang pipila ka mga paagi nga ang usa ka tawo makatan-aw sa Manluluwas inubanan sa pagtuo?
Unsay buot ipasabut sa pagbaton og “mahinulsulon nga espiritu”? (Magmapainubsanon, mahinulsulon, ug madawaton sa kabubut-on sa Ginoo.) Ngano nga kining kinaiyaha mahinungdanon samtang motan-aw kita sa Manluluwas?
Sa unsang paagi ang pagkahibalo mahitungod sa Pag-ula sa Manluluwas makatabang nato sa pagbatok sa dautan ug sa paghinulsol kon kita makasala?

Dapita ang mga estudyante sa pagsulti sa baruganan nga atong makat-unan gikan niini nga mga bersikulo. Ang mga estudyante mahimong mogamit og lain-laing mga pulong, apan kinahanglan nilang masulti nga kon kita mag-focus kang Jesukristo ug mogamit og hugot nga pagtuo Kaniya, makadawat kita og kinabuhing dayon.

Dapita ang usa ka estudyante sa pagbasa og kusog sa Helaman 8:16, ug hangyoa ang klase sa pag-ila kon si kinsa pa ang nagtudlo mahitungod sa misyon sa Manluluwas. Ipasiksik dayon sa mga estudyante ang Helaman 8:17–22 alang sa ngalan sa ubang mga propeta kinsa mipamatuod kang Jesukristo. Dapita ang mga estudyante sa paghunahuna kon sa unsang paagi ang mga propeta sa karaang panahon, ingon man sa atong panahon, mihatag sa pagpamatuod bahin sa misyon sa Manluluwas ug makatubos nga sakripisyo.

Dapita ang mga estudyante sa pagpaambit sa ilang mga pagpamatuod kon unsay ipasabut sa Pag-ula sa Manluluwas diha sa ilang kinabuhi. Mahimo usab nga mopaambit ka sa imong pagpamatuod.

Sunod nga Unit (Helaman 10–16)

Hangyoa ang mga estudyante sa pag-imagine nga ang Ginoo misaad nila nga Siya mobuhat sa tanan nga Iyang gihangyo nga buhaton. Si Nephi matinud-anon kaayo nga ang Ginoo mihimo niini nga saad kaniya ug gihatagan siya sa gahum sa pagsilyo. Awhaga ang mga estudyante sa pagtuon sa Helaman 10–11 niining semanaha, nga mangita sa mga paagi nga gigamit ni Nephi ang gahum nga gihatag sa Ginoo kaniya aron pagtabang sa iyang mga katawhan. Dapita usab sila sa pagpangita kon pila ka timailhan bahin sa pagkatawo ug pagkamatay ni Jesukristo ang ilang mahibaloan samtang magtuon sila sa mga panagna ni Samuel nga Lamanite diha sa Helaman 13–16.