Helaman 10–16 (Unit 23)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Helaman 10–16 (unit 23) dili tuyo nga itudlo isip kabahin sa imong leksyon. Ang leksyon nga imong itudlo magsentro lamang sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa panginahanglan sa imong mga estudyante.

Day 1 (Helaman 10)

Ang Helaman 10 naghatag sa mga estudyante og oportunidad sa pagkat-on mahitungod sa espiritwal nga kalig-on ni Nephi. Pinaagi sa iyang ehemplo, nakat-unan sa mga estudyante nga ang pagpamalandong sa mga butang sa Ginoo mag-andam kanato aron makadawat og padayag. Nakakat-on sab sila nga ihatag sa Ginoo diri kanato ang mga panalangin ug responsibilidad kon atong unahon ang Iyang kabubut-on kay sa atong kaugalingon. Dihang giuna ni Nephi ang kabubut-on sa Ginoo kay sa iyang kaugalingon, gihatag sa Ginoo ngadto kaniya ang gahum sa pagsilyo o pagbugkos.

Day 2 (Helaman 11–12)

Pinaagi sa pagtuon sa 14 ka tuig nga kasaysayan sa mga Nephite, nakat-unan sa mga estudyante nga pinaagi sa pagpaubos ug paghinulsol malikayan nato ang garbo ug ang pagkalaglag. Kon dili kita magmatngon, ang atong kaliwatan modala kanato sa paghikalimot sa Ginoo. Gitudlo ni Nephi nga aron matabangan ang mga tawo sa paglikay niini nga sayop, ang Ginoo mopanton sa Iyang katawhan aron sila mahinumdom Kaniya.

Day 3 (Helaman 13–14)

Si Samuel, usa ka propeta nga Lamanite, mibutyag nga ang mga propeta mamulong sa mga mensahe nga ibutang sa Dios diha sa ilang mga kasingkasing. Sa pagtuon sa propetikanhon niyang mga pasidaan, nakat-unan sa mga estudyante nga kon atong isalikway ang pulong sa mga propeta sa Ginoo, masinati nato ang pagmahay ug kasub-anan. Giawhag ni Samuel ang mga tawo nga tuohan si Jesukristo ug mipamatuod nga ang Ginoo mohatag og mga timailhan ug katingalahan sa pagtabang aron sila motuo Kaniya.

Day 4 (Helaman 15–16)

Tungod kay gipanalanginan og labihan ka daghan sa Ginoo ang mga Nephite, gipaningkamutan ni Samuel ang pagtabang aron ilang masabtan ang mga paghukom sa Dios nga ilang sagubangon kon dili sila maghinulsol. Gumikan niini, nakat-unan sa mga estudyante nga kon ang mga tawo dili na magmatuohon human makadawat sa kahingpitan sa ebanghelyo, mas dako nga panghimaraot ang ilang madawat. Gikan sa tubag sa mga Nephite ngadto kang Samuel, nakat-unan sa mga estudyante nga kon pilion nato ang pagsalikway sa mga saksi sa Ginoo, atong gitugutan si Satanas nga moimpluwensya sa atong kasingkasing.

Pasiuna

Sa Helaman 10–16 ang papel sa mga propeta nga isangyaw ang paghinulsol gihatagan og importansya. Niining tibuok nga semana, naay oportunidad ang mga estudyante sa pagtuon sa kamatinud-anon sa mga propeta nga si Nephi ug ni Samuel nga Lamanite. Silang duha nakadawat og espiritwal nga manipestasyon ug adunay awtoridad sa pagpangalagad tali sa mga badlungon nga mga Nephite. Sa walay pagtagad sa kagahi o katig-a sa kasingkasing sa mga tawo, gisangyaw nilang duha ang paghinulsol. Gitudlo nila nga ang paghinulsol makita pinaagi sa pagsunod sa mga baruganan nga pinasubay kang Jesukristo ug dili pinaagi sa pagbuhat og dautan.

Mga Sugyot alang sa Pagtudlo

Helaman 10–16

Si Helaman ug Samuel matinud-anong nangalagad sa katawhan

Pangutan-a ang mga estudyante kon nakasulay na ba sila og sitwasyon diin ang ilang mga higala dili ganahan nga mosuporta sa mga sumbanan nga gitudlo diha sa booklet nga Alang sa Kalig-on sa mga Kabatan-onan. Mahimo nimong dapiton ang pipila ka mga estudyante sa pagpaambit sa ilang mga kasinatian ug isulti unsay ilang gibati ug nakat-unan.

Sultihi ang mga estudyante nga ang Helaman 10–16 naghatag og mga ehemplo sa duha ka tawo kinsa mibarug alang sa mga sumbanan sa Ginoo bisan og dili ganahan ang mga tawo niini. Dapita ang mga estudyante sa paghunahuna kon unsay ilang makat-unan gikan sa mga ehemplo ni Nephi ug ni Samuel nga Lamanite nga makatabang nila sa susama nga mga kahimtang.

I-drowing sa pisara ang mosunod nga tsart o sa usa ka pirasong papel:

Mga pagkapareho nila ni Nephi ug Samuel nga Lamanite
Nephi (Helaman 10:1–5, 12, 15–16)		Samuel (Helaman 13:1–6; 16:1–2)

Hangyoa ang mga estudyante sa pagpangita sa mga bersikulo nga nalista diha sa tsart, nga mangita sa pagkaparehas nila ni Nephi ug ni Samuel. Dapita ang pipila ka mga estudyante sa paglista niini nga mga pagkaparehas sa blangko nga luna diha sa tsart. Ang lista mahimong maglakip sa mosunod: gisalikway sa mga tawo; nakadungog sa tingog sa Ginoo; misunod dayon sa gisugo sa Ginoo; gipamulong ang unsay gibutang sa Ginoo diha sa ilang kasingkasing; mipasidaan sa mga Nephite nga kon dili sila maghinulsol, sila pagalaglagon; gipanalipdan sa gahum sa Dios aron ilang mahatag ang Iyang mensahe.

Human malista sa mga estudyante ang mga pagkaparehas nga ilang nadiskubrihan, hangyoa ang usa ka estudyante sa pagbasa og kusog sa Helaman 10:4. Dayon ipangutana ang mosunod:

Unsa man ang pipila ka posibling mga rason sa walay pagkaluya ni Nephi?
Giunsa man sab ni Samuel sa pagpakita ang kawalay pagkaluya? Sa unsang paagi kita makapalambo og ingon niana nga walay pagkaluya?

Hangyoa ang usa ka estudyante sa pagbasa diha sa klase sa mosunod nga pamahayag ni Elder Neal A. Maxwell sa Korum sa Napulog Duha ka mga Apostoles, diin gitudlo niya sa unsang paagi mapalambo nato kini nga kinaiya:

“Kon mag-focus kita kang Jesus ug sa Iyang buhat, ang atong kalipay ug atong kapasidad sa pagpadayon molambo. … Wala si Nephi maghunahuna sa ‘kaugalingon lamang niyang kinabuhi,’ apan hinoon gitinguha niya ang pagbuhat sa kabubut-on sa Dios. Naghatag kini kaniya og dugang ug dili mabahin nga kusog nga naghimong posible sa iyang paglahutay ug walay pagkaluya nga kakugi. Nasayud si Nephi kon asa nga direksyon siya nag-atubang: padulong sa Dios” (If Thou Endure It Well [1996], 116).

Ipangutana:

Sumala ni Elder Maxwell, unsa man ang atong mahimo aron makaserbisyo uban sa walay pagkaluya nga kakugi?
Unsa nga mga pulong diha sa Helaman 10:4 ang nagpakita nga si Nephi “nag-atubang padulong sa Dios,” o sa laing mga pulong, nakatutok sa paghimo sa kabubut-on sa Dios?
Unsa nga mga pulong diha sa Helaman 13:3–5 ang nagpakita nga gibutang ni Samuel og una ang kabubut-on sa Dios labaw kay sa iyang kaugalingon?
Unsa nga kamatuoran ang atong makat-unan gikan sa mga kasinatian ni Nephi ug ni Samuel? (Usa ka posibling tubag ang magpakita sa kamatuoran nga nakat-unan sa mga estudyante sa ilang personal nga pagtuon niining semanaha: Ihatag sa Ginoo diri kanato ang mga panalangin ug responsibilidad kon atong unahon ang Iyang kabubut-on kay sa atong kaugalingon.)

Basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, mahitungod sa 12 anyos nga batang babaye kinsa midawat og una sa kabubut-on sa Ginoo kay sa iyang kaugalingon:

“Dili kita makaangkon og tinuod nga hugot nga pagtuo sa Ginoo kon wala usab ang hingpit nga pagsalig sa kabubut-on sa Ginoo ug sa panahon sa Ginoo. Kon aduna kita niana nga matang sa pagtuo ug pagsalig sa Ginoo, anaa kanato ang tinuod nga siguridad sa atong kinabuhi. …

“May nabasa ko mahitungod sa usa ka batan-ong babaye kinsa migamit og ingon niana nga matang sa pagtuo ug pagsalig. Sulod sa pipila ka bulan ang iyang mama grabe ang sakit. Sa katapusan, ang matinud-anong amahan mitawag sa iyang mga anak sa kilid sa iyang higdanan ug giingnan sila nga manamilit na sa ilang inahan kay siya himatyon na. Misupak ang 12 anyos niyang anak nga babaye:

“‘Papa, dili ko gustong mamatay si mama. Kauban nako siya sa ospital … sulod sa unom ka bulan; sa daghang higayon … gialagaran nimo siya, ug nahupay siya sa iyang sakit ug dayon makatulog. Gusto nakong imong ipandong ang imong mga kamot ngadto ni mama ug ayuhon siya.’

“Ang amahan, nga si Elder Heber J. Grant, misulti sa iyang mga anak sa gibati sa iyang kasingkasing nga miabut na ang panahon sa ilang inahan. Nanglakaw ang mga anak, ug miluhod siya kilid sa gihigdaan sa iyang asawa. Sa wala madugay iyang nahinumduman ang iyang pag-ampo: ‘Giingnan nako ang Ginoo nga akong giila ang iyang mga kamot dinhi sa kinabuhi [ug] sa kamatayon. … Apan giingnan nako ang Ginoo nga kulang ko sa kalig-on nga ang akong asawa mamatay ug kini makaapekto sa pagtuo sa akong gagmayng mga anak.’ Nangamuyo siya sa Ginoo nga hatagan ang iyang anak og ‘kahibalo nga Iyaha kining hunahuna ug kabubut-on nga mamatay na ang iyang mama.’

“Sulod sa usa ka oras namatay ang inahan. Dihang gitawag ni Elder Grant ang mga bata balik sa iyang kwarto ug gisultihan sila, ang unom ka tuig niyang anak nga lalaki [ngalan si Heber] nagsugod sa hilabihang pagbakho. Ang dose anyos nga igsoon niyang babaye migakos niya ug miingon: ‘Ayaw paghilak, Heber; kay dihang nanggawas kita niini nga kwarto, ang tingog sa Ginoo gikan sa langit miingon ngari nako, Sa kamatayon sa imong mama matuman ang kabubut-on sa Ginoo’ (Bryant S. Hinckley, Heber J. Grant: Highlights in the Life of a Great Leader, Salt Lake City: Deseret Book Co., 1951, pp. 243–44).

“Kon kita adunay sama niana nga matang sa pagtuo ug pagsalig nga gipakita sa batan-ong babaye, makabaton kita og kalig-on nga makasuporta kanato sa matag importanting panghitabo sa atong kinabuhi” (“Faith in the Lord Jesus Christ,” Ensign, Mayo 1994, 100).

Ipangutana:

Unsay nakatabang ni Presidente Heber J. Grant ug sa iyang pamilya nga unahon ang kabubut-on sa Ginoo kay sa ilang kaugalingon?
Nakasinati na ba mo diin nagkinahanglan nga mosalig kamo sa Dios ug giuna ang Iyang kabubut-on kay sa inyong kaugalingon? (Ikonsiderar ang pagdapit og pipila ka mga estudyante nga ipakigbahin ang ilang mga kasinatian diha sa klase. Pahinumdumi sila nga kinahanglang dili sila mopakigbahin og mga kasinatian nga personal o pribado ra kaayo.)

Ipaniguro sa mga estudyante nga kon mosalig kita sa Dios ug unahon ang Iyang kabubut-on kay sa atong kaugalingon, Siya mosuporta kanato sa lisud nga mga panahon.

Ipasabut nga ang usa ka importanting bahin sa pangalagad ni Nephi mao ang pagtabang sa mga tawo aron mahinumdom sa Dios ug maghinulsol sa ilang mga sala. Hinoon, padayon nilang gipagahi ang ilang kasingkasing ug dili gustong makorihian.

Bahina ang klase ngadto sa duha ka grupo. Hangyoa ang usa ka grupo sa pagbasa sa Helaman 10:15–18; 11:3–10 ug ang lain nga grupo mobasa sa Helaman 11:30–37; 12:1–3. (Mahimo nimong isulat kini nga mga reference diha sa pisara.) Hangyoa ang matag grupo sa pagpangandam sa paghisgot kon nganong gipanton sa Ginoo ang Iyang mga katawhan. Tingali mosulti ang mga estudyante og pipila ka lain-laing mga rason, apan siguroa nga masulti nila nga ang Ginoo mopanton sa Iyang katawhan aron sila mahinumdom Kaniya.

Unsa man nga matang sa pagpanton ang gigamit sa Ginoo aron makamatngon ang mga tawo?
Sumala sa Helaman 12:3, daghang tawo ang dili makahinumdom sa Ginoo hangtud nga Siya mopanton kanila. Ngano kaha nga ingon man niini?

Dapita ang usa ka estudyante sa pagbasa og kusog sa Helaman 15:3.

Sa unsang paagi ang pagpanton sa Ginoo usa ka ekspresyon sa paghigugma?

Hangyoa ang mga estudyante sa pagpaambit sa ilang mga tubag sa assignment 5 diha sa day 2 niining semanaha. Mahimo nimong sublion nga pinaagi sa pagpaubos ug paghinulsol, malikayan nato ang garbo ug pagkalaglag ug nga kon dili kita magmatngon, ang atong kaliwatan modala kanato sa paghikalimot sa Ginoo.

Sunod nga Unit (3 Nephi 1–11)

Diha sa sunod nga assignment sa mga estudyante, basahon nila ang mahitungod sa tibuok nasud nga Nephite nga nagpundok aron makig-away sa mga tulisan ni Gadianton sa taas nga serye sa pakig-away. Giunsa man pagpildi sa mga Nephite ang dautang mga tulisan? Mabasa usab sa mga estudyante ang mahitungod sa dako kaayong kadaot nga nahitabo sa Amerika atol sa pagkamatay ni Jesukristo sa Jerusalem. Diha sa kangitngit, nabati sa mga tawo ang tingog ni Jesukristo. Dayon ang nabanhaw nga Manluluwas miadto ug personal nga nangalagad kanila. Ipahunahuna sa mga estudyante kon unsa kaha ang ilang pagbati kon didto pa sila.