គោលលទ្ធិ និង សេចក្ដីសញ្ញា ២០:៣៨–៦៧

បុព្វកថា

ការរៀបចំសាសនាចក្រឡើងនៅថ្ងៃទី ៦ ខែ មេសា ឆ្នាំ ១៨៣០ បានផ្ដល់ជាមធ្យោបាយដើម្បីឲ្យពិធីបរិសុទ្ធនៃបព្វជិតភាពត្រូវបានបម្រើដល់កូនចៅរបស់ព្រះវរបិតាសួគ៌ទូទាំងពិភពលោកនៅថ្ងៃចុងក្រោយ ។ នៅពីមុនការរៀបចំសាសនាចក្រ ព្រះអម្ចាស់បានចាប់ផ្ដើមបើកសម្ដែងករណីយកិច្ចនៃតំណែងនានារបស់បព្វជិតភាពទៅដល់ព្យាការី យ៉ូសែប ស៊្មីធ នៅដើមរដូវក្ដៅក្នុងឆ្នាំ ១៨២៩ ។.គោលលទ្ធិ និង សេចក្តីសញ្ញា ២០តាំងឡើងករណីយកិច្ចទាំងនេះជាច្រើន ហើយណែនាំដល់ពួកអ្នកកាន់បព្វជិតភាពអំពីការចាត់ចែងពិធីបរិសុទ្ធ ហើយមើលការខុសត្រូវ និង បម្រើដល់សមាជិកសាសនាចក្រ ។

គោលលទ្ធិ និង សេចក្ដីសញ្ញា ២០:៣៨-៥៩

ករណីយកិច្ចទាំងឡាយនៃតំណែងបព្វជិតភាព ត្រូវបានតាំងឡើង

តើអ្នកនឹងឆ្លើយយ៉ាងដូចម្ដេច ប្រសិនបើមាននរណាម្នាក់សួរថា « តើនរណាជាអ្នកចាត់ចែងនៅក្នុងសាសនាចក្ររបស់អ្នក » ? នៅពេលអ្នកសិក្សា គោលលទ្ធិ និង សេចក្តីសញ្ញា ២០:៣៨–៦៧ សូមគិតអំពីរបៀបដែលអ្នកអាចឆ្លើយសំណួរនេះ ។

សូមចម្លងងារ និង សេចក្ដីយោងខាងក្រោមនេះចូលទៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ ក្រោយមកសូមអានបទគម្ពីរទាំងនេះ រួចធ្វើបញ្ជីករណីយកិច្ចនៃតំណែងបព្វជិតភាពនៅពីក្រោមចំណងជើងងារដ៏ត្រឹមត្រូវក្នុងសៀវភៅកំណត់ហេតុរបស់អ្នក ។ វាអាចនឹងជួយអ្នក ក្នុងការយល់វាក្យសព្ទ « អែលឌើរ » ដែលមាននៅក្នុងខគម្ពីរទាំងនេះ ដែលសំដៅទៅលើអ្នកកាន់បព្វជិតភាពមិលគីស្សាដែក ។

អែលឌើរ

(គ. និង ស. ២០:៣៨–៤៥) ។

សង្ឃ

(គ. និង ស. ២០:៤៦–៥២) ។

គ្រូ និង ឌីកុន

(គ. និង ស. ២០:៥៣–៥៩) ។

បន្ទាប់ពីអ្នកបានសរសេរករណីយកិច្ចទាំងឡាយដាក់នៅពីក្រោមចំណងជើងងារដ៏ត្រឹមត្រូវហើយ សូមគូសបន្ទាត់ពីក្រោមចំណុចខុសគ្នា ដែលអ្នកសម្គាល់ឃើញរវាងករណីយកិច្ចរបស់អែលឌើរ សង្ឃ គ្រូ និង ឌីកុន ។ សូមគូសរង្វង់លើចំណុចស្រដៀងគ្នា ។

ឥឡូវ ដោយអ្នកបានសិក្សាបន្តិចរួចមកហើយអំពីករណីយកិច្ចនៃបព្វជិតភាព នោះសូមគូសបន្ទាត់ផ្គូផ្គងពីតំណែងបព្វជិតភាព ទៅករណីយកិច្ចទាំងឡាយ ដែលអ្នកកាន់បព្វជិតភាពទាំងនោះមានសិទ្ធិអំណាចធ្វើ នៅក្នុងតារាងខាងក្រោមនេះ ៖

អែលឌើរ	សិទ្ធិអំណាចប្រគល់អំណោយទាននៃព្រះវិញ្ញាណបរិសុទ្ធ
សង្ឃ	សិទ្ធិអំណាចចាត់ចែង ( ប្រសិទ្ធពរ ) សាក្រាម៉ង់
គ្រូ	សិទ្ធិអំណាចតែងតាំងឌីកុន
ឌីកុន	សិទ្ធិអំណាចបង្រៀន

ចម្លើយសម្រាប់លំហាត់ផ្គូផ្គងនេះមាននៅចុងបញ្ចប់នៃមេរៀន ។ សូមកត់ចំណាំថា តំណែងបព្វជិតភាពជាន់ខ្ពស់ បូកបញ្ចូលករណីយកិច្ច និង សិទ្ធិអំណាចនៃបព្វជិតភាពដែលតូចជាង ។

សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកអំពីគោលការណ៍មួយ ដែលសង្ខេបការទទួលខុសត្រូវរបស់អ្នកកាន់បព្វជិតភាពទាំងអស់ ។

សូមប្រៀបធៀបគោលការណ៍របស់អ្នកជាមួយគោលការណ៍ដូចតទៅនេះ ៖ អ្នកកាន់បព្វជិតភាពទាំងអស់ មានការទទួលខុសត្រូវដើម្បីចាត់ចែងពិធីបរិសុទ្ធ និងមើលការខុសត្រូវលើសមាជិកនៃសាសនាចក្រ ហើយបម្រើពួកគេ។ អ្នកអាចនឹងចង់សរសេរសេចក្ដីពិតនេះនៅលើគែមព្រះគម្ពីររបស់អ្នកក្បែរ គោលលទ្ធិ និង សេចក្តីសញ្ញា ២០:៣៨–៥៩ ។

ដើម្បីជួយអ្នកយល់កាន់តែច្បាស់ អំពីការទទួលខុសត្រូវរបស់អ្នកកាន់បព្វជិតភាពទាំងអស់ ក្នុងការមើលការខុសត្រូវ និង បម្រើដល់សមាជិកសាសនាចក្រ សូមអាន គោលលទ្ធិ និង សេចក្តីសញ្ញា ២០:៥៣–៥៤, ៥៩ រួចស្វែងរករបៀបទាំងឡាយ ដែលព្រះអម្ចាស់បានណែនាំអ្នកកាន់បព្វជិតភាពឲ្យបម្រើ និង ចម្រើនកម្លាំងសមាជិកសាសនាចក្រ ។ អ្នកអាចនឹងចង់គូសចំណាំនូវអ្វីដែលអ្នករកឃើញ ។ តើវិធីមួយចំនួនណាខ្លះ ដែលអ្នកកាន់បព្វជិតភាពអើរ៉ុន អាច « មើលការខុសត្រូវលើសាសនាចក្រ … ហើយនៅជាមួយ និងចម្រើនកម្លាំងពួកគេ » ?

ករណីយកិច្ចរបស់អ្នកកាន់បព្វជិតភាពអើរ៉ុន ប្រព្រឹត្តទៅលើសពីការបម្រើពិធីបរិសុទ្ធទៅទៀត ។ សូមពិចារណាអំពីសាច់រឿងខាងក្រោម ហើយគិតអំពីរបៀបដែលអ្នកកាន់បព្វជិតភាពកំពុងធ្វើករណីយកិច្ចរបស់ខ្លួន ដើម្បីអញ្ជើញមនុស្សដទៃមករកព្រះគ្រីស្ទ និង របៀបដែលពួកគេមិនកំពុងតែធ្វើ ៖

បន្ទាប់ពីអ្នកកាន់បព្វជិតភាពអើរ៉ុនម្នាក់ ជួយក្នុងការបម្រើសាក្រាម៉ង់ក្នុងការប្រជុំសាក្រាម៉ង់មួយ គាត់ចូលថ្នាក់សាលាថ្ងៃអាទិត្យ ហើយបានប្រព្រឹត្តចំពោះគ្រូបង្រៀន និង សមាជិកក្នុងថ្នាក់យ៉ាងទ្រគោះបោះបោក ។
អ្នកកាន់បព្វជិតភាពវ័យក្មេងម្នាក់ ត្រឡប់មកពីបង្រៀនតាមផ្ទះវិញ ហើយចាប់ផ្ដើមចែកចាយដំណឹងរសើប ឬ ផ្ទាល់ខ្លួនអំពីផ្ទះដែលគាត់បានទៅបង្រៀន ។
អ្នកកាន់បព្វជិតភាពមួយក្រុមជួបជុំគ្នាធ្វើការបម្រើមួយ ហើយចាប់ផ្ដើមនិយាយលែបខាយ និង ចំអន់សមាជិកក្នុងកូរ៉ុម ។

សូមឆ្លើយសំណួរដូចតទៅនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ ហេតុអ្វីបានជាសំខាន់ដែលអ្នកកាន់បព្វជិតភាពត្រូវដឹងថា ករណីយកិច្ចរបស់ខ្លួនគឺលើសពីការបម្រើពិធីបរិសុទ្ធទៅទៀត ?

អ្នកអាចនឹងចង់សរសេរសេចក្ដីថ្លែងការណ៍ដូចតទៅនេះដោយ អែលឌើរ រីឆាដ ជី ស្កត ក្នុងកូរ៉ុមនៃពួកសាវកដប់ពីរនាក់ ដាក់នៅលើគែមព្រះគម្ពីរ ឬ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ « គោលបំណងរបស់សិទ្ធិអំណាចបព្វជិតភាព គឺត្រូវផ្ដល់ឲ្យ បម្រើ លើកតម្កើង បំផុសគំនិត » ( «Honor the Priesthood and Use It Well » Ensign ឬ Liahona,ខែ វិច្ឆិកា ឆ្នាំ ២០០៨ ទំព័រ ៤៦ ) ។

សូមគិតអំពីពេលដែលអ្នកបានឃើញយុវជនក្នុងវួដ ឬ សាខារបស់អ្នកឲ្យតម្លៃដល់បព្វជិតភាពខ្លួន ដោយការមើលការខុសត្រូវ បម្រើ លើកតម្កើង បំផុសគំនិត ឬ ចម្រើនកម្លាំងមនុស្សដទៃ ។ ប្រសិនបើអ្នកគឺជាអ្នកកាន់បព្វជិតភាព សូមគិតពីការសរសេរគោលដៅមួយ ដែលនឹងជួយអ្នកបម្រើពិធីបរិសុទ្ធដោយស្មោះត្រង់ ហើយមើលការខុសត្រូវ និង ពង្រឹងសាសនាចក្រ ។

គោលលទ្ធិ និង សេចក្ដីសញ្ញា ២០:៦០-៦៧

សេចក្ដីណែនាំស្ដីពីការតែងតាំងបព្វជិតភាព ត្រូវបានផ្ដល់ឲ្យ

តើអ្នកធ្លាប់មានបទពិសោធន៍ ឬ ធ្លាប់បានឃើញការតែងតាំងបព្វជិតភាពដែរឬទេ ? សូមគិតអំពីអារម្មណ៍ដែលអ្នកមាន នៅពេលអ្នកត្រូវបានតែងតាំង ឬ ធ្វើជាសាក្សីដល់មនុស្សណាម្នាក់ទៀតដែលត្រូវបានតែងតាំង ។

សូមអាន គោលលទ្ធិ និង សេចក្តីសញ្ញា ២០:៦០ រួចសូមស្វែងរកអំណាចដែលបុគ្គលដែលកំពុងធ្វើការតែងតាំងនោះគួរតែប្រើបន្ថែមពីលើបព្វជិតភាព ។ យោងតាមខគម្ពីរនេះ តើអំណាចអ្វី ដែលគួរដឹកនាំអ្នកកាន់បព្វជិតភាព នៅពេលគាត់ប្រើប្រាស់បព្វជិតភាព ?

តើអ្នកដឹកនាំបព្វជិតភាពម្នាក់ ប្រាកដបានយ៉ាងដូចម្ដេច ថាគាត់អនុវត្តករណីយកិច្ចរបស់គាត់ដោយនូវអំណាចមួយនេះ ? ប្រធាន ប៊យដ៏ ឃេ ផាកកឺ ក្នុងកូរ៉ុមនៃពួកសាវកដប់ពីរនាក់ បានពន្យល់ពីទីកន្លែងដែលអំណាចរបស់អ្នកកាន់បព្វជិតភាពកើតចេញមកថា ៖

« សិទ្ធិអំណាចរបស់អ្នក បានមកតាមរយៈការតែងតំាងរបស់អ្នក អំណាចរបស់អ្នក បានមកតាមរយៈការគោរពប្រតិបត្តិ និង ភាពសក្តិសម ។

« អំណាចនៅក្នុងបព្វជិតភាព កើតចេញពីការអនុវត្តន៍ករណីយកិច្ចរបស់អ្នកនៅក្នុងកិច្ចការសាមញ្ញៗដូចជា ៖ ការចូលរួមការប្រជុំនានា ទទួលយកការចាត់តាំង អានព្រះគម្ពីរ គោរពពាក្យសម្ដីនៃប្រាជ្ញាវាងវៃ » ។

« ប្រធាន វិលហ្វូឌ វូឌដ្រុព្វ បានមានប្រសាសន៍ថា ៖ ‹ ខ្ញុំបានធ្វើដំណើររាប់ពាន់គីឡូម៉ែត ហើយបានប្រកាសដំណឹងល្អក្នុងនាមជាសង្ឃ ហើយពេលខ្ញុំបានថ្លែងទៅកាន់ក្រុមជំនុំលើកមុន ព្រះអម្ចាស់បានគាំទ្រខ្ញុំ ហើយបានសម្ដែងព្រះចេស្ដារបស់ទ្រង់ដើម្បីការពារជីវិតរបស់ខ្ញុំយ៉ាងច្រើន នៅពេលខ្ញុំកាន់តំណែងនោះ ក៏ដូចដែលទ្រង់បានធ្វើ ខណៈដែលខ្ញុំបានកាន់តំណែងជាសាវកម្នាក់ដែរ ។ ព្រះអម្ចាស់ គាំទ្របុរសណា ដែលកាន់ចំណែកមួយនៃបព្វជិតភាព ទោះជាគាត់ជាសង្ឃ ជាអែលឌើរ ជាពួកចិតសិបនាក់ ឬជាសាវកក្ដី បើគាត់តម្កើងការហៅរបស់គាត់ ហើយអនុវត្តករណីយកិច្ចរបស់គាត់ › » ( « The Unseen Power »New Eraខែ ឧសភា ឆ្នាំ ២០០៧ ទំព័រ ៧ សូមមើលផងដែរ «The Aaronic Priesthood » Ensignខែ វិច្ឆិកា ឆ្នាំ ១៩៨១ ទំព័រ ៣២–៣៣ ) ។

ប្រសិនបើអ្នកគឺជាយុវជនម្នាក់ សូមពិចារណាប្រកបដោយការអធិស្ឋាននូវអ្វីដែលព្រះអម្ចាស់នឹងតម្រូវឲ្យអ្នកធ្វើ ដើម្បីអញ្ជើញព្រះចេស្ដានៃព្រះវិញ្ញាណបរិសុទ្ធឲ្យគង់នៅជាមួយអ្នក ពេលអ្នកអនុវត្តករណីយកិច្ចបព្វជិតភាពនាពេលបច្ចុប្បន្ន និង ពេលអនាគត ។ ប្រសិនបើអ្នកគឺជាយុវនារី សូមពិចារណាអំពីរបៀបដែលអ្នកអាចជួយយុវជនក្នុងការខិតខំរបស់ពួកគេដើម្បីមានព្រះវិញ្ញាណគង់នៅក្នុងជីវិត និង ការបម្រើខាងបព្វជិតភាពរបស់ពួកគេ ។

សូមមើល គោលលទ្ធិ និង សេចក្ដីសញ្ញា ២០:៦៥ ។ ចេញពីអ្វីដែលអ្នករៀនអំពីខគម្ពីរនេះ ហេតុអ្វីបានជានៅក្នុងសាសនាចក្រ យើងលើកដៃដើម្បីបង្ហាញមតិគាំទ្រ ? ព្រះបញ្ញត្តិសម្រាប់សាសនាចក្រដើម្បីផ្ដល់មតិគាំទ្រជាសាធារណៈ គឺបានមកពីព្រះ ។

តើការលើកដៃរបស់អ្នក ហើយបង្ហាញមតិគាំទ្រចំពោះគ្នា មានន័យដូចម្ដេច ? អែលឌើរ ឡូរិន ស៊ី ដាន់ ដែលធ្លាប់ជាសមាជិកនៃពួកចិតសិបនាក់ បានពន្យល់អំពីការទទួលខុសត្រូវទាំងឡាយដែលមាននៅក្នុងនីតិវិធីនៃការគាំទ្រនេះថា ៖

« នៅពេលយើងគាំទ្រអ្នកកាន់តំណែងនានា យើងត្រូវបានប្រទានឱកាសនៃការគាំទ្រដល់អស់អ្នកដែលព្រះអម្ចាស់បានហៅជាស្រេចតាមរយៈវិវរណៈ ។…

« លំដាប់នោះ ព្រះអម្ចាស់ប្រទានដល់យើងនូវឱកាស ដើម្បីគាំទ្រដល់ទង្វើនៃការហៅដ៏ទេវភាពមួយ ឬក៏បង្ហាញការជំទាស់ ប្រសិនបើយើងមានអារម្មណ៍ផ្សេងពីនោះ ដោយប្រការណាមួយ ។

« ការគាំទ្រគឺជាការធ្វើឲ្យទង្វើចាក់ស្រែះទៅនឹងខ្លួនយើង ហើយតាំងចិត្តខ្លួនឯងដើម្បីទ្រទ្រង់ដល់អស់អ្នកដែលយើងបានគាំទ្រនោះ ។ នៅពេលបុគ្គលម្នាក់បានឆ្លងកាត់ទង្វើពិសិដ្ឋនៃការលើកដៃជាកែងនេះ គាត់គួរតែចងចាំដោយភ្ញាក់រឭកនូវអ្វីដែលគាត់បានធ្វើ ហើយចាប់ផ្ដើមប្រព្រឹត្តឲ្យស្របទៅនឹងការគាំទ្រមតិរបស់គាត់ទាំងជាសាធារណៈ និង ជាសម្ងាត់ផងដែរ » ( « We Are Called of God » Ensignខែ កក្កដា ឆ្នាំ ១៩៧២ ទំព័រ ៤៣ ) ។

តើអ្នកធ្លាប់បានចូលរួមក្នុងការប្រជុំសាក្រាម៉ង់ ដែលក្រុមជំនុំបានគាំទ្រដល់យុវជនម្នាក់ ដើម្បីបានតែងតាំងក្នុងតំណែងបព្វជិតភាពអើរ៉ុនដែរឬទេ ? តើក្រុមជំនុំបានលើកដៃរបស់ពួកគេដែរឬទេ ? តើបទពិសោធន៍របស់យុវជននោះ ពេលឃើញមនុស្សដទៃគាំទ្រដល់ការតែងតាំងរបស់ខ្លួន អាចជួយគាត់ឲ្យបំពេញការទទួលខុសត្រូវរបស់គាត់បានយ៉ាងដូចម្ដេច ?

សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក នូវប្រយោគពីរបី ដែលពន្យល់អំពីមូលហេតុដែលអ្នកមានអំណរគុណចំពោះសិទ្ធិអំណាចបព្វជិតភាព ។ សូមចែកចាយនូវអ្វីដែលអ្នកបានសរសេរជាមួយឪពុក/ម្ដាយ ឬ ថ្នាក់ដឹកនាំសាសនាចក្រ បងប្អូនបង្កើត ឬ មិត្តភក្ដិម្នាក់របស់អ្នក ។ សូមសុំឲ្យបុគ្គលនោះចែកចាយជាមួយអ្នកនូវអារម្មណ៍របស់ខ្លួនអំពីអត្ថន័យនៃបព្វជិតភាព ។
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖

ខ្ញុំបានសិក្សា គោលលទ្ធិ និង សេចក្តីសញ្ញា ១៩:២៣-៦៧ ហើយបានបញ្ចប់មេរៀននេះនៅ ( កាលបរិច្ឆេទ ) ។

សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖